Biz nädip maslahat bermeli?

1. Maslahaty kim bermeli? Düşündiriň.

SIZ maslahat bermegi halaýarsyňyzmy? Käbirleri höwes bilen maslahat berýär. Käbirlerine bolsa maslahat bermeli diýse duran ýeri. Nähili bolaýanda-da, biziň hemmämiz ýeri gelende maslahat bermeli bolýarys. Sebäbi Isa şägirtleriniň biri-birini söýjekdigini aýtdy (Ýah. 13:35). Eger biz gerek wagty maslahat bersek, dogan-uýalary söýýändigimizi subut ederis. Mukaddes Kitapda hem «päk ýürekden çykan maslahatyň» dostlugy berkidýändigi aýdylýar (Nak. 27:9).

2. Ýaşulular nämäni bilmeli we näme üçin? («Hepdäniň başyndaky duşuşykda berilýän maslahatlar» diýen çarçuwa serediň).

² Esasanam, ýaşulular maslahaty nädip bermelidigini gowy bilmeli. Ýehowa Isa arkaly ýaşuly doganlara ýygnagyň aladasyny etmegi tabşyrdy (1 Pet. 5:2, 3). Olar ýygnakda Mukaddes Kitaba esaslanan nutuk bilen çykyş edýärler. Dogan-uýalara çopançylyk idegini edýärler. Şeýle-de Ýehowadan daşlaşanlara ýygnaga dolanmaga kömek edýärler. Ýaşulular hem, biz hem dogan-uýalara nädip gowy maslahat berip bileris?

3. a) Biz maslahat bermegi kimden öwrenip bileris? (Işaýa 9:6; «Maslahat bereniňizde Isadan görelde alyň» diýen çarçuwa serediň). b) Makalada haýsy soraglaryň jogabyny bileris?

³ Mukaddes Kitapda maslahat beren adamlaryň mysallary ýazylan. Biz adamlara ökdelik bilen maslahat beren Isa pygamberden köp zatlary öwrenip bilýäris. Oňa «Akyldar Maslahatçy» diýilýär (Işaýa 9:6-ny okaň). Şu makalada üç soragyň jogabyny bileris. Birinjiden, bizden maslahat soranlarynda näme etmeli? Ikinjiden, soramasalar hem maslahat bermeli bolanymyzda näme etmeli? Üçünjiden, maslahaty haçan we nädip bermeli?

MASLAHAT SORANLARYNDA NÄME ETMELI?

4, 5. Maslahat bermezden öň haýsy sorag hakda oýlanmaly? Mysal getiriň.

⁴ Sizden maslahat soranlarynda ilki bilen näme edýärsiňiz? Belki, siz dogany ýa-da uýany öwüp, oňa derrew kömek etjek bolýansyňyz. Ýöne maslahat bermezden öň şu sorag hakda oýlanmaly: men şu meselede oňa dogry maslahat berip bilerinmi? Köplenç şol meseleden başy çykýan adama ýüz tutmagy maslahat bersek gowy bolýar.

⁵ Aýdaly, siziň dostuňyz agyr keselleýär. Ol bejergi almak hakda gözleg geçirýär. Soňra haýsy bejergini almalydygy hakda sizden pikiriňizi soraýar. Belki, şonda pikiriňizi aýdasyňyz geler. Ýöne siz şol ugurdan bilim alan lukman däl. Şonuň üçin oňa belli bir bejergini almagy maslahat bermän, ökde lukmany tapmaga kömek edip bilersiňiz.

6. Maslahat bermezden öň näme etsek gowy bolar?

⁶ Bizden maslahat soranlarynda şol meseleden başymyz çyksa-da, maslahat bermäge howlukmaly däl. Sebäbi Nakyllar 15:28-de: «Dogruçyl adam oýlanyp jogap berýär» diýilýär. Biz oňa näme diýmelidigini anyk bilýänem bolsak, doga edip edebiýatlarymyzdan gözleg geçirmeli we oýlanmaly. Şonda Ýehowanyň islegine gabat gelýän maslahaty bereris.

7. Natan pygamberiň wakasyndan näme öwrenýäris?

⁷ Geliň, Natan pygamber bilen bolan ýagdaý hakda gürrüň edeliň. Dawut patyşa Natan pygambere Ýehowa üçin ybadathana gurmak isleýändigini aýdýar. Natan hem şol bada Dawuda: «Göwnüň näme islese şony ediber» diýýär. Ýöne Natan pygamber ilki bilen Ýehowanyň pikirini bilmelidi. Sebäbi Ýehowa ybadathanany Dawudyň gurmagyny islemeýärdi (1 Tar. 17:1—4). Şu wakadan görnüşi ýaly, maslahat soranlarynda bir zat diýmezden öň pikirlensek paýhasly bolar (Ýak. 1:19).

8. Maslahat bermäge näme üçin howlukmaly däl?

⁸ Biz seresap bolmasak, ýalňyş maslahat berip bileris. Netijede, maslahatymyza eýerýän adam ýalňyş karara gelip, kösenmegi mümkin. Geliň, şonuň üçin maslahat bermäge howlukmalyň.

SORAMASALAR HEM MASLAHAT BERMELI BOLANDA NÄME ETMELI?

9. Ýaşulular maslahat bermezden öň nämä göz ýetirmeli? (Galatýalylar 6:1).

⁹ Käte ýaşuly doganlar «ýalňyş ädim» äden dogana ýa-da uýa maslahat bermeli bolýarlar (Galatýalylar 6:1-i okaň). Belki-de, ol entek agyr günä eden däldir, ýöne ýalňyşyp dogry ýoldan sowlandyr. Ýaşulular oňa ebedi ýaşaýşa eltýän ýoldan ýöremäge kömek etmek isleýärler (Ýak. 5:19, 20). Dogan-uýalaryň gelýän kararlary biri-biriniňkiden tapawutlanyp biler, emma bu olaryň Ýehowany gynandyrýandygyny aňlatmaýar (Rim. 14:1—4). Şonuň üçin ýaşulular maslahat bermezden öň, doganyň ýa-da uýanyň ýalňyş ädim ädendigine doly göz ýetirmeli. Eger dogan ýa-da uýa Ýehowa bilen dostlugyna zyýan ýetirýän işleri edýän bolsa, ýaşulular oňa nädip maslahat berip biler?

10—12. Ýaşulular maslahat bermeli bolanda näme etmeli? Mysal getiriň (Surata serediň).

¹⁰ Käte ýaşululara maslahat bermek aňsat bolmaýar. Pawlus resulyň aýdyşy ýaly, mesihçi özüniň ýalňyş ädim ädendigine düşünmezligi mümkin. Şonuň üçin ýaşulular maslahat bermezden öň, onuň ýüregini taýynlamaly.

¹¹ Geliň, muňa düşünmek üçin bir mysala seredeliň. Daýhan ekin ekmezden öň ýeri agdaryp ýumşadýar, soňra tohum ekýär. Eken tohumy gögerer ýaly ony suwarýar. Edil şonuň ýaly, ýaşuly hem mesihçä maslahat bermezden öň onuň bilen ýürekden gyzyklansa, gowy görýändigini we gürrüňdeş bolmak isleýändigini aýtsa, ýüregini taýýarlar. Eger mesihçi ýaşulynyň mähir bilen aladasyny edýändigini görse, maslahaty gaşyny çytman kabul eder.

¹² Gürrüňdeşlikde ýaşuly mesihçä hemmeleriň ýalňyşýandygyny, wagtal-wagtal maslahatyň gerek bolýandygyny ýatladyp biler (Rim. 3:23). Soňra mähirli hem-de sylaşykly gepleşip, Mukaddes Kitap arkaly nähili ýalňyş ädim ädendigini we ony düzetmek üçin näme etmelidigini düşündirip biler. Şeýdip, ýaşuly göçme manyda topragy ýumşadyp tohum eker. Gürrüňdeşligiň soňunda ýaşuly mesihçini ak ýürekden öwer we onuň bilen doga edip, göçme manyda eken tohumyny suwarar (Ýak. 5:15).

13. Ýaşuly mesihçiniň maslahata düşünendigini nädip anyklap biler?

¹³ Käte mesihçi berlen maslahata doly düşünmän biler. Ýaşuly muny nädip anyklamaly? Ol sypaýyçylyk bilen esasy pikirleri nygtaýan käbir soraglary berip biler (Nes. 12:11). Eger mesihçi maslahata doly düşünmedik bolsa, ýaşuly ony düzeder.

MASLAHATY HAÇAN WE NÄDIP BERMELI?

14. Näme üçin gaharly wagtymyz maslahat bermeli däl?

¹⁴ Biziň ählimiz günäli, şonuň üçin islesek-islemesek bir-birimiziň göwnümize degýäris (Kol. 3:13). Mukaddes Kitapda aýdylyşy ýaly, käte gaharymyz hem gelýär (Efes. 4:26). Ýöne biz gaharly wagtymyz maslahat bermeli däl, sebäbi «gahar Hudaýyň dogruçyllygyna garşydyr» (Ýak. 1:20). Eger gaharly wagtymyz maslahat bersek, oduň üstüne ýangyç sepen ýaly ýagdaýy has-da kynlaşdyrarys. Biz pikirimizi we aýtmak isleýän zatlarymyzy şol wagt däl-de, köşeşenimizden soň aýtmaly.

15. Alyhuwdan näme öwrenýäris? (Surata serediň).

¹⁵ Geliň, Eýýuba wagtynda maslahat beren Alyhuw hakda gürrüň edeliň. Eýýubyň dostlary oňa töhmet atýardylar. Eýýup bolsa özüni aklajak bolýardy. Alyhuwyň oňa ýüregi awaýardy. Ýöne Eýýubyň Hudaýy günäkärläp, özüni dogry hasaplaýandygyna gahary gelýärdi. Ol şonda-da Eýýubyň sözüni bölmän, soňuna çenli diňleýär. Soňra özüne gezek gelende Eýýup bilen sylaşykly gepleşip, ýumşaklyk bilen maslahat berýär (Eýp. 32:2; 33:1—7). Bizem Alyhuw ýaly maslahaty gaharly wagtymyz däl-de, köşeşenimizden soň bermeli we ýumşak, sylaşykly gepleşmeli (Nes. 3:1, 7).

MASLAHAT ALMAGY HEM BERMEGI BAŞARALYŇ

16. Zebur 32:8-den näme öwrenýäris?

¹⁶ Ýehowa: «Öwüt-ündew bererin, gözüm sende bolar» diýýär (Zebur 32:8-i okaň). Ol bize hemişe kömek etjekdigini wada berýär. Ýehowa diňe bir maslahat bermän, oňa eýermegi hem öwredýär. Geliň, bizem Ýehowadan görelde alyp, dogan-uýalar paýhasly karara geler ýaly elimizden gelen kömegi gaýgyrmalyň.

17. Ýaşulularyň berýän maslahatlarynyň bize nähili peýdasy bar? (Işaýa 32:1, 2).

¹⁷ Kyn döwürde ýaşaýandygymyz üçin her birimize maslahat gerek bolýar (2 Tim. 3:1). Esasanam, ýaşulularyň Mukaddes Kitapdan berýän maslahatlary «gurak ýurtda çeşme kimin» teşne janymyzy gandyrýar we Ýehowa wepaly gulluk etmäge kömek edýär (Işaýa 32:1, 2-nji aýatlary okaň). Biz gulagymyza hoş ýakýan zatlary aýtman, gaýtam gerekli maslahaty berýän dogan-uýalara örän minnetdar. Olaryň berýän maslahaty «kümüş gabyň içindäki altyn almalar kimindir» (Nak. 25:11). Geliň, maslahaty almagy hem bermegi öwreneliň.