Ýanýoldaşy bilen aýrylyşan imandaşlarymyzy nädip goldamaly?

Megerem, siz ýanýoldaşy bilen aýrylyşan birnäçe adamlary bilýänsiňiz. Sebäbi şu günler nikany bozmaklyk giňden ýaýran. Meselem, Polşada 30 ýaşly adamlar ýanýoldaşy bilen 3—6 ýyl bile ýaşap, soňra aýrylyşýarlar; ýöne diňe bir 30 ýaşly adamlar nikany bozmaýarlar.

Ispaniýadaky Maşgala meseleleri boýunça institutyň berýän maglumatyna görä, «geçirilen barlaglar Ýewropada durmuş guran adamlaryň ýarysynyň aýrylyşjakdygyny görkezýär». Şeýle ýagdaýy başga döwletlerde-de görse bolýar.

ÝARAMAZ DUÝGULAR GAPLANDA...

Bu giňden ýaýran ýagdaýyň döremegine näme sebäp bolýarka? Günorta Ýewropadaky nika meselesine garaýan bir tejribeli maslahatçy şeýle diýdi: «Nikanyň bozulmagy är-aýal gatnaşyklarynyň sowaşandygyny we olaryň bir-birinden daşlaşandygyny aýan edýär. Aýrylyşmaklyk adama juda agyr degýär; gahar-gazap, ökünç, lapykeçlik, göwnüçökgünlik we utanç ýaly duýgular adamyň üstüne apy-tupan kimin abanýar». Käte aýrylyşan adamlarda janyňa kast etmek ýaly pikir hem döreýär. Nikasy bozulandygy hakda resminamany alandan soň bolsa, olar göwnüçökgünlige düşüp, ýekelik duýgusyndan ejir çekýärler. Olar: «Ine, aýrylyşdymam-da, indi men nädip ýaşamaly?» diýmekleri mümkin.

Ýewanyň ýanýoldaşy bilen aýrylyşanyna birnäçe ýyl boldy. Ol şeýle diýýär: «Men ärimden aýrylyşandygyma örän utanýardym. Goňşularymyň we işdeşlerimiň arasynda „aýrylyşan“ ada galmaly boldum. Meniň muňa juda gaharym gelýärdi. Iki ýaş çagamy terbiýelemek üçin, men hem ene, hem ata bolmaly boldum»a. 12 ýyl bäri ýygnak ýaşulysy bolup gulluk edýän Adam atly doganymyz hem şeýle diýýär: «Meniň mertebäm depelenen ýaly boldy. Käte bolsa, gaty gaharym gelýärdi we özümi başgalardan çetde tutýardym».

ÖZÜŇI DÜRSEMEK ÜÇIN GÖREŞMELI

Käbirleri gelejegi barada biynjalyk bolýarlar we ýanýoldaşyndan aýrylyşanyna birnäçe ýyl geçse-de, özüni ele almak kyn bolýar. Olara hiç kim aladasyny etmeýän ýaly bolup görünýär. Bir habarçynyň aýtmagyna görä, «olar öwrenen endiklerini özgertmeli we kynçylyklaryna ýeke özleri hötde gelmeli bolýarlar».

Stanislaw şeýle ýatlaýar: «Men aýalym bilen aýrylyşanymda, ol maňa iki gyzymy görmäge rugsat bermeýärdi. Men özümi şeýle dereksiz duýdum welin, hatda Ýehowa-da terk edendir öýtdüm. Meniň asla ýaşasym gelmedi. Wagtyň geçmegi bilen, men nädogry pikir edýändigime düşündim». Ýanýoldaşy bilen aýrylyşan Wanda atly uýamyz hem gelejegi hakda aladalanýardy. Ol şeýle ýatlaýar: «Biraz wagtdan adamlar, hatda imandaşlarym hem meniň we çagalarymyň aladasyny etmez öýdýärdim. Emma häzir men ençeme dogan-uýalar bilen ýakyn gatnaşyk saklaýaryn we olar maňa çagalarymy Ýehowanyň islegine görä terbiýelemäge kömek edýärler».

Görşümiz ýaly, aýrylyşan adamlar erbet duýgulary başdan geçirýärler. Olaryň özlerine bolan ynamy gaçýar, aladasy edilmeýän ýaly pikir edýärler we özlerini dereksiz duýýarlar. Şol sebäpli olar daş-töweregindäki adamlara gaharlanýarlar. Netijede, olara hatda dogan-uýalar hem sowuk-sala garaýan we duýgudaşlyk bildirmeýän ýaly görünýär. Emma Stanislawyň we Wandanyň sözlerinden görnüşi ýaly, dogan-uýalar dogrudan-da, aýrylyşanlaryň aladasyny edýärler. Hawa, imandaşlarymyzyň kömegi göze ilmeýän ýaly bolsa-da, olar ýürekden aladamyzy edýärler.

ÝEKELIK DUÝGUSY

Biziň ýürekden edýän tagallalarymyza garamazdan, aýrylyşan dogan-uýalarymyzyň wagtal-wagtal ýekesireýändiklerini unutmaly däl. Esasan-da, aýrylaşan uýalar özlerine kän bir üns berilmeýän ýaly duýýarlar. Alisa şeýle diýýär: «Aýrylyşanyma sekiz ýyl bolsa-da, käte men özümi dereksiz duýýaryn. Şeýle ýagdaýlarda men ýeke bolasym gelýär we özüme haýpym gelip, aglaýaryn».

Şeýle duýgulary başdan geçirýän adamlar az bolmasa-da, Mukaddes Ýazgylaryň maslahatlary özlerini çetde tutýanlara peýdaly bolup biler. Hudaýyň Sözündäki maslahatlary äsgermezlik etsek, «ähli sagdyn öwüde» garşy gitdigimiz bolar (Sül. tym. 18:1). Ýekesireýän adamlar başga jynsdaky adamdan hemişe maslahat ýa-da teselli gözlemekden gaça durmagyň paýhaslydygyna düşünmeli. Şonda başga jynsdaky adama ýerliksiz duýgy döremez.

Belki-de, aýrylyşan imandaşlarymyz gelejegi hakda çendenaşa aladalanýandyrlar, ýekelik we terk edilmek ýaly harasat kimin üstüňe abanýan duýgular bilen göreşýändirler. Şeýle duýgular bilen göreşmek kyn bolýandygy sebäpli, biz dogan-uýalary goldamak üçin Ýehowanyň göreldesine eýermeli (Zeb. 55:22; 1 Pet. 5:6, 7). Biz imandaşlarymyza teklip edýän islendik kömegimizi olaryň gymmat saýjakdygyna ynanyp bileris. Dogrudan-da, olar ýygnakda özlerine goldaw berjek hakyky dostlary tapyp bilerler! (Sül. tym. 17:17; 18:24).