ÜÇÜNJI BÖLÜM
Biri göwnüňe degende — «Öýkelemäge sebäp bolsa-da...»
«Ýygnagymyzdan bir uýa ýanyma gelip, onuň puluny ogurlandygymy aýtdy. Başgalar muny eşidende, menden çetleşip başladylar. Birnäçe wagtdan ol uýa meniň beýle iş etmändigimi anyklap, ýanyma geldi-de, ötünç sorady. Ýöne men onuň ýüregime salan ýarasy üçin, içimden hiç haçan bagyşlap bilmerin diýdim» (Linda).
BELKI, senem bir doganyň ýa-da uýanyň göwnüňe degendigi ýadyňa düşýändir? Gynansak-da, käbirleri kimdir biriniň eden hereketi zerarly öz ruhy saglygyna zyýan ýetirdiler. Sen hakda-da şeýle diýse bolarmy?
Kim bizi «Hudaýyň söýgüsinden aýryp biler»?
Elbetde, ýüregiňe ýara salan imandaşyňy bagyşlamak aňsat däl. Ýöne her näme-de bolsa, mesihçiler bir-birini söýmeli (Ýahýa 13:34, 35). Imandaşymyzyň eden nähak işi bizi göwnüçökgünlige düşürip, lapykeç edip biler (Zebur 55:12).
Mukaddes Ýazgylarda käte mesihçileriň biri-birinden «öýkelemäge sebäbi bolar» diýilýär (Koloslylar 3:13). Emma biziň özümiz şeýle ýagdaýa düşenimizde, munuň hötdesinden gelmek kyn bolmagy mümkin. Şonda bize näme kömek eder? Gel, Mukaddes Ýazgylardaky üç prinsipe seredeli:
Gökdäki Atamyz hemme zady bilýär. Ýehowa ähli bolýan zatlary, şol sanda adalatsyzlyga uçraýandygymyzy we munuň bize zyýan ýetirýändigini bilýär (Ýewreýler 4:13). Üstesine-de, biz ejir çekip gynananymyzda, Ýehowa-da gynanýar (Işaýa 63:9). Ol «betbagtçylykdyr kynçylyklara» ýa-da başga zatlara, hatda gullukçylaryna-da Öz «söýgüsinden aýyrmaga» ýol bermez (Rimliler 8:35, 38, 39). Eýsem, bu bizi-de hiç zada ýa-da hiç kime Ýehowadan aýra salmaga ýol bermezlige höweslendirmeýärmi näme?
Bagyşlamak sowul-sala garamagy aňlatmaýar. Biz göwnümize degen adamy bagyşlanymyzda, onuň eden erbet işine kembaha garap, ony aklaýandygymyzy we sowuk-sala garaýandygymyzy aňlatmaýar. Ýadyňyzda bolsun, Ýehowa günäni makullamaýar, ýöne bagyşlamaga degerli sebäp bolsa bagyşlaýar (Zebur 103:12, 13; Habakuk 1:13). Ol bizi başgalary bagyşlamaga höweslendirende, öz göreldesine eýermäge çagyrýar. Sebäbi ol «gaharyny ebedi saklamaýar» (Zebur 103:9; Matta 6:14).
Göwnümize degen adamy bagyşlap, özümize peýda getirýäris. Nädip? Şeýle ýagdaýy göz öňüne getir. Sen agramy bary-ýogy bir-iki kilogram daşy alýarsyň-da, ony eliňi uzadyp duran halda saklaýarsyň. Ony biraz wagtlyk saklamak kyn düşmese gerek. Emma has köpräk saklamaly bolsa näme? Seniň pikiriňçe, daşy näçe wagt saklap bolar? Birnäçe minutmy, sagatmy ýa-da ondan köp? Muny etmek gaty kyn bolar, şeýle dälmi?! Elbetde, daşyň agramy üýtgemeýär, ýöne ony götermek gitdigiçe kynlaşýar. Öýke-kine babatda hem şeýle diýse bolar. Hatda ujypsyzja öýke-kinäni içiňde näçe köp saklasaň, şonça-da özüňe köp zyýan ýetirersiň. Ine, şonuň üçinem Ýehowa öýke-kine saklamazlyga höweslendirýär. Dogrudan-da, başgalary bagyşlap, biz özümize ýagşylyk edýäris (Süleýmanyň tymsallary 11:17).
Göwnümize degen adamy bagyşlap, biz özümize peýda getirýäris
«Ýehowanyň hut özi meniň bilen gepleşýän ýalydy»
Öýke-kine ýüreginde kök urmaz ýaly, Linda näme kömek etdi? Ol Mukaddes Ýazgylarda bagyşlamagyň wajypdygyny görkezýän aýatlaryň üstünde oýlandy (Zebur 130:3, 4). Linda, esasan, şuňa göz ýetirdi: göwnüňe degen adamy bagyşlasak, Ýehowa hem bizi bagyşlaýar (Efesliler 4:32—5:2). Linda bu aýatlaryň özüne täsir edişi barada şeýle diýýär: «Ýehowanyň hut özi meniň bilen gepleşýän ýalydy».
Wagtyň geçmegi bilen, Linda ýüregindäki öýke-kinäni aýryp bildi. Ol göwnüne degen uýany ýürekden bagyşlady we häzir ol onuň ýakyn jorasy. Linda Ýehowa yhlasly gulluk etmegini dowam etdi. Ýehowanyň saňa-da kömek etmek isleýändigine şübhelenme.