24-NJI BÖLÜM

Pawlus ýygnaklara hat ýazýar

Pawlusyň hatlary irki mesihçileriň imanyny berkidýär

TÄZE dörän mesihçiler ýygnagy Ýehowanyň niýetiniň amala aşmagy üçin wajyp orun tutmaly. Emma ilkinji mesihçiler derrew yzarlamalara duçar bolýarlar. Olar yzarlamalara we ýygnakda döreýän kynçylyklara garamazdan, Hudaýa wepaly galyp bilerlermi? Injildäki 21 hatyň mazmuny bu babatda peýdaly maslahatlary we teselli berýän sözleri öz içine alýar.

Onuň 14 hatyny — Rimlilerden tä Ýewreýlere çenli — Pawlus resul ýazýar. Bu hatlar mesihçiler ýygnagynyň ýa-da olara niýetlenen adamlaryň adyny göterýär. Geliň, Pawlusyň hatlaryndaky käbir temalara seredeliň.

Ahlak kadalary we edim-gylym. Ahlaksyzlyk, zyna we başga-da agyr günäleri edýän adamlar «Hudaýyň Patyşalagyny miras almazlar» (Galatýalylar 5:19—21; 1 Korintoslylar 6:9—11). Hudaýyň gullukçylary milletine garamazdan agzybir bolmaly (Rimliler 2:11; Efesliler 4:1—6). Olar mätäçlik çekýän imandaşlaryna kömek etmeli (2 Korintoslylar 9:7). Pawlus: «Dyngysyz doga ediň» diýip maslahat berýär. Ol imandaşlaryna ýüregini Ýehowa dökmegi ündeýär (1 Selanikliler 5:17; 2 Selanikliler 3:1; Filipililer 4:6, 7). Hudaý dogalaryňy eşider ýaly, oňa iman etmeli (Ýewreýler 11:6).

Maşgalanyň agzybir bolmagyna näme kömek eder? Är aýalyny öz teni kimin söýmeli. Aýal ärine çuňňur hormat goýmaly. Çagalar ata-enesine gulak asmaly, çünki bu Hudaýa ýaraýar. Ata-eneler çagalaryna gözegçilik etmeli we olara söýgi bilen, Hudaýyň prinsipleri boýunça terbiýe bermeli (Efesliler 5:22—6:4; Koloseliler 3:18—21).

Pawlusyň hatlaryny ýazan ýerleriniň kartasy

Hudaýyň niýetine düşünmeklik. Musanyň kanunynyň köp aýratynlyklary ysraýyllylary Mesih gelýänçä gorap, olara görkezme berýärdi (Galatýalylar 3:24). Emma mesihçilerden bu Kanuny berjaý etmek talap edilmeýär. Pawlus ýewreýlere ýazan hatynda — ýehudy mesihçilere — Musanyň kanunynyň näme üçin berlendigini we Mesih arkaly Hudaýyň niýetiniň nädip amala aşmalydygyny düşündirdi. Şeýle-de ol Kanunyň käbir aýratynlyklarynyň pygamberlik manysynyň bardygyny ýazdy. Meselem: mal gurbanlary Isanyň töleg gurbanynyň nusgasydy, çünki bu töleg arkaly, hakykatdan-da, günäler ötülýär (Ýewreýler 10:1—4). Hudaý Isanyň ölümi bilen Kanun ähtini ýatyrdy, sebäbi bu Kanun maksadyny berjaý edipdi (Koloseliler 2:13—17; Ýewreýler 8:13).

I asyrda mesihçileriň ýygnagynda Pawlusyň haty okalýar

Ýygnagyň işleýşi. Ýygnakda jogapkärli işi alyp barmak isleýän doganlar ýokary ahlak kadalaryna laýyk gelmeli we ruhy taýdan ýetişen bolmaly (1 Timoteos 3:1—10, 12, 13; Titus 1:5—9). Ýehowanyň gullukçylary yzygiderli ýygnanyşyp, bir-birini ruhlandyrmaly (Ýewreýler 10:24, 25). Ýygnak duşuşyklary abatlamaly we öwüt-nesihat bermeli (1 Korintoslylar 14:26, 31).

Pawlus Timoteosa ikinji hatyny ýazanda, Rimde tussagdady we höküm çykarylmagyna garaşýardy. Onuň ýanyna diňe käbir dostlary gorkman gelip bildiler. Pawlus wagtynyň azlygyny bilýärdi. Ol şeýle diýdi: «Men oňat söweş alyp bardym, ýaryşy bitirdim, imany goradym» (2 Timoteos 4:7). Şondan soň Pawlus öldürilen bolmaly. Emma onuň hatlary şu günler hem Hudaýyň gullukçylaryna görkezme berýär.

Rimliler, 1 we 2 Korintoslylar, Galatýalylar, Efesliler, Filipililer, Koloseliler, 1 we 2 Selanikliler, 1 we 2 Timoteos, Titus, Filimun we Ýewreýler kitaplaryna esaslanýar.

WADA EDILEN NESIL KIM?

Adam ata bilen How ene günä edensoň, Hudaý, göçme manyly sözler bilen, ýylana şeýle diýdi: «Seniň bilen aýalyň, seniň tohumyň bilen aýalyň tohumynyň arasynda, duşmançylyk salaryn Men. Onuň nesli seniň kelläňi owradar, sen bolsa onuň dabanyndan çakarsyň» (Gelip çykyş 3:15). Mukaddes Ýazgylarda Iblise «köne ýylan» diýilýär (Ylham 12:9). Onda Hudaýyň wada eden Nesli (Tohumy) ýa-da Halasgäri kim bolmaly? Bu syr Mukaddes Ýazgylarda ençeme ýylyň dowamynda kem-kemden aýan edilýär.

Adam ata bilen How ene günä edenden soň, takmynan 2000 ýyl geçende, Ýehowa bu Nesliň Ybraýymyň neberesinden geljekdigini aýtdy (Gelip çykyş 22:17, 18). Ençeme asyr geçenden soň, Pawlus Ybraýymyň neberesiniň esasy böleginiň Isa Mesihdigini görkezdi (Galatýalylar 3:16). Gelip çykyş 3:15-e görä, Isa öldürilende, göçme manyda, onuň dabanyndan «çakylar». Emma Hudaý Isany «ruh boýunça direltdi» (1 Petrus 3:18).

Şeýle-de Hudaýyň niýetine görä, 144 000 sany adam nesliň goşmaça bölegi bolar (Galatýalylar 3:29; Ylham 14:1). Olar ruh boýunça direlip, gökdäki Patyşalykda Mesihiň mirasdüşerleri bolarlar (Rimliler 8:16, 17).

Tizden gökdäki güýçli Patyşa Isa Iblisi we onuň neslini, ýagny onuň yzyna eýeren jynlary we zalym adamlary ýok eder (Ýahýa 8:44; Efesliler 6:12). Isanyň hökümdarlygy gulak asýan adamlara parahatlyk we şatlyk berer. Şeýdip, ol ýylanyň «kellesini» owradar, ýagny ony bütinleý ýok eder (Ýewreýler 2:14).