«Ol ejizlere kuwwat berýändir»
1 Biziň hemmämiz wagtal-wagtal ýadaýarys. Bu diňe bir iş edenden ýa-da işleýändigimizden däl-de, «kyn pursatlarda» ýaşaýandygymyz sebäpli bolýar (2 Tim. 3:1). Ýehowanyň Güwäçileri hökmünde gullukda gowşamaz ýaly, gerekli ruhy güýji nireden alyp bileris? Munuň üçin biz «uly güýji» bar bolan Ýehowa bil baglamaly (Iş. 40:26). Ol ähli zerurlyklarymyzy bilýär we bize ýürekden kömek etmek isleýär (1 Pet. 5:7).
2 Ýehowanyň kömegi. Ýehowa bize mukaddes ruhuny berip berkidýär. Ol bu üstün çykyp bolmaýan güýji arkaly älemi ýaratdy. Eger biz ýadan bolsak, Hudaýyň ruhy «täzeden kuwwat tapmaga» kömek edýär (Iş. 40:31). Şol sebäpli özüňize şeýle sorag beriň: «Haçan men soňky sapar doga edenimde, mesihçi borçlarymy ýerine ýetirer ýaly, mukaddes ruhy aýratyn diledim?» (Luka 11:11—13).
3 Hudaýyň ylhamlanan Sözüni her gün okap, okan zatlarymyz barada oýlanyp, Ýazgylara esaslanan edebiýatlary yzygiderli öwrenip, ruhy taýdan iýmitlensek, «akar suwlar ýakasynda ekilen, miwesini möwsüminde berýän, ýapragy solmaýan agaç ýaly bolarys» (Zeb. 1:2, 3).
4 Şeýle-de Ýehowa bize imandaşlarymyz arkaly «teselli berýär» (Kol. 4:10, 11). Olaryň ýygnaklarda berýän jogaplary, öwüt-nesihatlary we abatlaýjy gürrüňleri bizi berkidýär (Res. iş. 15:32). Ylaýta-da, mesihçi ýaşulular ruhy taýdan kömek edip ruhlandyrýar (Iş. 32:1, 2).
5 Wagyz gullugynda. Ýadap, ruhdan düşen bolsaňyz, wagyz etmegi bes etmäň! Beýleki işlerden tapawutlylykda, yzygiderli wagyz etsek, janymyz dynçlyk tapar (Mat. 11:28—30). Hoş habary wagyz etsek, Hudaýyň Patyşalygyna, ebedi ýaşaýşa we onuň berjek ajaýyp bereketlerine gönükmäge kömek eder.
6 Bu zalym dünýä ýok bolýança etmeli işler kän. «Hudaýyň berýän güýç-kuwwatyna» bil baglap, berk galmaga bizde hemme esas bar (1 Pet. 4:11). Biz «ejizlere kuwwat berýän» Ýehowa Hudaýyň kömegi bilen işimizi tamamlap bileris (Iş. 40:29).