Ilkinji älemgoşar

NUH maşgalasy bilen gämiden çykyp, ilki bilen, näme edenini bilýäňmi? Ol Hudaýa gurban, ýagny sowgat berdi. Sen muny aşakdaky suratdan görýänsiň. Tupandan maşgalasyny halas edeni üçin, Nuh Hudaýa minnetdarlyk bildirip, mallardan sowgat berdi.

Seniň pikiriňçe, onuň sowgady Ýehowa ýaradymyka? Elbetde, ýarady. Şonuň üçin ol Nuha dünýäni gaýdyp hiç haçan suw bilen ýok etmejegini aýtdy.

Basym ýer ýüzünde suw gurady. Soňra Nuh maşgalasy bilen gämiden çykyp, ýene-de ýer ýüzünde ýaşap başlady. Hudaý olara ak pata berip: «Ýer ýüzi dolýança köpeliň» diýdi.

Wagtyň geçmegi bilen adamlar uly tupan barada eşidip, şeýle tupanyň ýene-de bolmagyndan gorkmagy mümkindi. Şonuň üçin Hudaý gaýdyp ýer ýüzüni tupan bilen heläk etmejegini ýatladýan bir alamat berdi. Nähili alamatdygyny bilýäňmi? Älemgoşar.

Köplenç ýagyşdan soň gün çykanda, älemgoşar peýda bolýar. Älemgoşar dürli owadan reňklerden ybarat. Sen älemgoşary görüpmidiň? Ony suratda görýäňmi?

Hudaý şonda şeýle diýdi: «Men bütin adamzady hem-de haýwanlary tupan bilen gaýdyp ýok etmejegimi wada berýärin. Men älemgoşary bulutda goýdum. Älemgoşar görnende, beren wadamy ýadyma salaryn».

Şonuň üçin sen älemgoşary göreňde, ol saňa nämäni ýatlatmaly? Dogry, Ýehowanyň dünýäni gaýdyp uly tupan bilen ýok etmejekdigini ýatlatmaly.