Deuteronomio

20 “Kung lalabas ka sa pagbabaka laban sa iyong mga kaaway at makakita ka nga ng mga kabayo at mga karong pandigma,+ isang bayang higit na marami kaysa sa iyo, huwag kang matatakot sa kanila; sapagkat si Jehova na iyong Diyos ay sumasaiyo,+ na nag-ahon sa iyo mula sa lupain ng Ehipto.+ 2 At mangyayari nga na kapag malapit na kayo sa pagbabaka, ang saserdote ay lalapit din at magsasalita sa bayan.+ 3 At sasabihin niya sa kanila, ‘Dinggin mo, O Israel, kayo ay malapit na ngayong makipagbaka laban sa inyong mga kaaway. Huwag manlupaypay ang inyong mga puso.+ Huwag kayong matakot at tumakbo sa takot o mangatog dahil sa kanila,+ 4 sapagkat si Jehova na inyong Diyos ay humahayong kasama ninyo upang ipakipaglaban kayo sa inyong mga kaaway at iligtas kayo.’+

5 “Ang mga opisyal+ din ay magsasalita sa bayan, na sinasabi, ‘Sinong tao ang nagtayo ng isang bagong bahay at hindi pa ito napasisinayaan? Payaunin siya at pabalikin sa kaniyang bahay, dahil baka mamatay siya sa pagbabaka at ibang tao ang magpasinaya nito.+ 6 At sinong tao ang nagtanim ng isang ubasan at hindi pa ito napakikinabangan? Payaunin siya at pabalikin sa kaniyang bahay, dahil baka mamatay siya sa pagbabaka at ibang tao ang makinabang nito.+ 7 At sinong lalaki ang nakipagtipan sa isang babae at hindi pa niya ito nakukuha? Payaunin siya at pabalikin sa kaniyang bahay,+ dahil baka mamatay siya sa pagbabaka at ibang lalaki ang kumuha rito.’ 8 At ang mga opisyal ay magsasalita pa sa bayan at magsasabi, ‘Sinong tao ang matatakutin at mahina ang loob?+ Payaunin siya at pabalikin sa kaniyang bahay, upang hindi niya mapangyaring matunaw ang mga puso ng kaniyang mga kapatid na gaya ng sarili niyang puso.’+ 9 At mangyayari nga na kapag ang mga opisyal ay natapos nang magsalita sa bayan, mag-aatas din sila ng mga pinuno ng mga hukbo sa unahan ng bayan.

10 “Kapag lalapit ka sa isang lunsod upang makipaglaban doon, patatalastasan mo rin iyon ng mga kundisyon ng pakikipagpayapaan.+ 11 At mangyayari nga na kung magbigay ito sa iyo ng mapayapang sagot at pagbuksan ka nito, mangyayari rin na ang buong bayang masusumpungan doon ay magiging iyo para sa puwersahang pagtatrabaho, at maglilingkod sila sa iyo.+ 12 Ngunit kung hindi ito makipagpayapaan sa iyo,+ at makipagdigma pa nga ito sa iyo at kinailangan mong kubkubin ito, 13 tiyak na ibibigay rin ito ni Jehova na iyong Diyos sa iyong kamay, at sasaktan mo ang bawat lalaki roon sa pamamagitan ng talim ng tabak.+ 14 Tanging ang mga babae at ang maliliit na bata+ at ang mga alagang hayop+ at ang lahat ng bagay na naroroon sa lunsod, ang lahat ng samsam dito ang darambungin mo para sa iyong sarili;+ at kakainin mo ang samsam mula sa iyong mga kaaway, na ibinigay sa iyo ni Jehova na iyong Diyos.+

15 “Ganiyan ang gagawin mo sa lahat ng mga lunsod na lubhang malalayo sa iyo na hindi kasama sa mga lunsod ng mga bansang ito. 16 Doon lamang sa mga lunsod ng mga bayang ito na ibinibigay sa iyo ni Jehova na iyong Diyos bilang mana ay huwag mong panatilihing buháy ang anumang bagay na humihinga,+ 17 sapagkat walang pagsalang itatalaga mo sila sa pagkapuksa, ang mga Hiteo at ang mga Amorita, ang mga Canaanita at ang mga Perizita, ang mga Hivita at ang mga Jebusita,+ gaya ng iniutos sa iyo ni Jehova na iyong Diyos; 18 upang hindi nila kayo maturuang gawin ang ayon sa lahat ng kanilang mga karima-rimarim na bagay, na ginagawa nila sa kanilang mga diyos, at magkasala nga kayo laban kay Jehova na inyong Diyos.+

19 “Kapag kukubkubin mo ang isang lunsod nang maraming araw sa pamamagitan ng pakikipaglaban dito upang bihagin ito, huwag mong sisirain ang mga punungkahoy nito sa pamamagitan ng paggamit ng palakol sa mga iyon; sapagkat kakain ka mula sa mga iyon, at huwag mong puputulin ang mga iyon,+ sapagkat ang punungkahoy ba sa parang ay tao na kukubkubin mo? 20 Ang punungkahoy lamang na alam mong hindi punungkahoy para sa pagkain, iyon ang dapat mong sirain, at puputulin mo iyon at magtatayo ka ng mga kayariang pangubkob+ laban sa lunsod na nakikipagdigma sa iyo, hanggang sa bumagsak ito.