Pasulungin ang Kakayahan sa Ministeryo—Pagpapatotoo sa Lugar ng Negosyo

Kung Bakit Mahalaga: Dahil marami ang nagtatrabaho nang mahabang oras, karaniwan nang naipaaabot lang sa kanila ang mensahe ng Kaharian kapag nagpapatotoo tayo sa kanila sa lugar ng kanilang trabaho. Masaya at mabunga ang pagpapatotoo sa lugar ng negosyo dahil palaging may nakakausap doon at posibleng magagalang ang nagtatrabaho yamang iniisip nilang kostumer ang mga lumalapit. Para maging epektibo, dapat na mataktika at kagalang-galang sa pananamit at pag-aayos ang mga mamamahayag. (2 Cor. 6:3) Kung gayon, dapat maingat na masubaybayan ng tagapangasiwa sa paglilingkod kung gaano kadalas ginagawa at kung sino ang mga gumagawa sa mga teritoryong ito.

Kung Paano Ito Gagawin:

Maghanda ng isang maikling presentasyon. Kung matagal tayong makikipag-usap sa isang empleado, baka hindi na siya makipag-usap sa atin sa ibang pagkakataon.
Dumalaw sa mga lugar ng negosyo sa oras na di-gaanong abala, halimbawa, kapag nagbubukas pa lang sila.
Sikaping makausap muna ang nangangasiwa roon. Maging masigla at palakaibigan. Puwede mong sabihin, “Dumadalaw kami sandali sa mga tao sa lugar na pinagtatrabahuhan nila dahil bihira namin silang madatnan sa kanilang bahay.” Magbigay lang ng maikling presentasyon at mag-alok ng tract, magasin, o iba pang publikasyon. Para hindi tayo mapagkamalang salesman, huwag banggitin ang tungkol sa donasyon malibang tanungin tayo kung paano tinutustusan ang ating gawain.
Kung mabait ang nangangasiwa, humingi ng pahintulot na makausap sandali ang iba pang empleado. Sa ilang lugar ng negosyo, makabubuting magtanong kung puwedeng mag-iwan ng ilang babasahin sa lugar na pinagpapahingahan nila.
Maging mataktika at handang makibagay. Halimbawa, kapag may kausap o abala ang isang empleado, maghintay muna bago siya lapitan.

Subukan Ito Ngayong Buwan:

Sa susunod ninyong Pampamilyang Pagsamba, praktisin ang isang maikling presentasyon na puwede ninyong gamitin kapag gumagawa kayo sa lugar ng negosyo.