Mga Limitasyon ng Siyensiya

Kamakailan, lumaganap ang maraming aklat na nagpapaliwanag sa mga pananaw ng diumano’y mga bagong ateista. Ang mga publikasyong ito ay nakatawag-pansin sa marami at pinagmulan ng maraming diskusyon at debate. Isinulat ng neuroscientist na si David Eagleman: “Naiisip ng ilang mambabasa . . . na nalalaman ng mga siyentipiko ang lahat ng bagay.” Idinagdag pa niya: “Pero ang magagaling na siyentipiko ay laging bukás ang isip, at ang kanilang mga isinulat ay may kaugnayan sa mga bago at di-inaasahang mga tuklas.”

Sa nakalipas na mga panahon, ang matatalinong siyentipiko ay nakagawa ng malalaking tagumpay sa kanilang paghahanap ng sagot sa nakalilitong mga tanong tungkol sa kalikasan. Pero ang ilan naman ay nakagawa ng malalaking pagkakamali. Si Isaac Newton ang isa sa pinakamagaling na siyentipiko kailanman. Ipinakita niya kung paano napananatili ng puwersa ng grabidad ang mga planeta, bituin, at galaksi sa uniberso. Inimbento niya ang calculus, isang sangay sa matematika na ginagamit sa computer design, paglalakbay sa kalawakan, at nuclear physics. Pero nagsagawa rin si Newton ng huwad na siyensiya na gumagamit ng astrolohiya at mahiwagang mga pormula para gawing ginto ang tingga at iba pang metal.

Mahigit 1,500 taon bago si Newton, pinag-aralan ng Griegong astronomo na si Ptolemy ang kalangitan sa pamamagitan lang ng pagtingin dito. Tinunton niya ang mga planeta sa langit kung gabi at may-kahusayan niyang ginawan ng mapa ang mga ito. Pero naniniwala siya na ang lupa ang sentro ng uniberso. Isinulat ng astrophysicist na si Carl Sagan tungkol kay Ptolemy: “Ang kaniyang ideya na ang Lupa ang sentro ng uniberso ay pinaniwalaan sa loob ng 1,500 taon. Pinatutunayan nito na kahit napakatalino ng isa, maaari pa rin siyang magkamali.”

Ganiyan din ang problema ng mga siyentipiko ngayon. Masumpungan kaya nila ang lubos na paliwanag tungkol sa uniberso? Bagaman angkop na kilalanin ang pagsulong na nagawa ng siyensiya at ang mga pakinabang na naidulot nito sa atin, mahalaga ring isaisip ang mga limitasyon nito. Sinabi ng physicist na si Paul Davies: “Imposibleng makakita ng paliwanag tungkol sa uniberso na tama sa bawat sitwasyon at lubos na magkakasuwato.” Ipinakikita ng mga pananalitang iyan ang di-maikakailang katotohanan: Hindi lubusang mauunawaan ng mga tao ang kalikasan. Kaya kapag may magsasabi na kayang ipaliwanag ng siyensiya ang lahat ng bagay na umiiral, makatuwiran lang na huwag agad maniwala roon.

Ganito ang binabanggit ng Bibliya tungkol sa kahanga-hangang mga bagay sa kalikasan: “Narito! Ito ang mga gilid ng . . . mga daan [ng Diyos], at bulong lamang ng isang bagay ang narinig tungkol sa kaniya!” (Job 26:14) Napakarami pa ring kaalaman ang hindi kayang unawain ng tao. Walang alinlangan, totoo pa rin ang mga pananalita ni apostol Pablo na naisulat halos 2,000 taon na ang nakalipas: “O ang lalim ng kayamanan at karunungan at kaalaman ng Diyos! Totoong di-masaliksik ang kaniyang mga hatol at di-matalunton ang kaniyang mga daan!”—Roma 11:33.