ETOMBELO

1 Nkombo y’ana w’apami wa Isariyɛlɛ, mbuta ate Jakɔbɔ, wakatshu l’Edjibito yɔ nyɛ. Onto l’onto akatshu la nkumbo kande:+ 2 Rubɛna, Simɛyɔna, Lɛwi, Juda,+ 3 Isakara, Zebuluna, Bɛnjamina, 4 Danɛ, Nafɛtali, Ngada ndo Ashɛrɛ.+ 5 Anto* tshɛ wakotɔ oma le Jakɔbɔ waki anto* 70, koko Yɔsɛfu akatshu ntondo l’Edjibito.+ 6 L’edjedja ka wonya, Yɔsɛfu akayovɔ+ ndo anango tshɛ ndo lɔlɔnga lɔsɔ tshɛ. 7 Ase Isariyɛlɛ* wakotanɛ ndo wakatatɛ fulanɛ lo yɛdikɔ y’efula. Vɔ wakatetemala fulanɛ ndo wakatalekaka monga la wolo woho w’anyanya, ndo nto vɔ wakakokanɛ lo wodja w’otondo.+

8 L’edjedja ka wonya, nkumekanga k’oyoyo kaki kombeyaka Yɔsɛfu akayolɛka l’Edjibito. 9 Nde akatɛ anto ande ate: “Ohonyenda, ase Isariyɛlɛ toleka efula ndo toleka wolo.+ 10 Nyɛsɔ tosale dui dimɔtshi la mayɛlɛ. Naka hatosadi ngasɔ, kete vɔ wayotetemala fulanɛ ndo naka ta ntomba, vɔ wayeta lo wedi w’atunyi aso dia tɔlɔsha ko vɔ ntomba oma lo wodja aso.”

11 Ko vɔ wakasɔnɛ ewandji dia mbakambisha elimu la wolo ndo mbahɛnyɔla la elimu wa wolo.+ Vɔ wakakɛ Farawɔ esomba wa mombaka diangɔ, mbuta ate osomba wa Pitɔmɛ la wa Ramɛsɛ.+ 12 Koko lo yɛdikɔ yakawatalekaka mbahɛnyahɛnya mbakawatalekaka mfula ndo pandjɔnɛ, ko ase Edjibito wakoke ase Isariyɛlɛ wɔma.+ 13 Ɔnkɔnɛ, ase Edjibito wakakandjaka ase Isariyɛlɛ ntumu ya wolo oko mfumbe.+ 14 Vɔ waketɛ lɔsɛnɔ l’ase Isariyɛlɛ ololo lo mbadjangɛ dia vɔ sɔhaka nkɛtɛ ko salaka atafadi ndo lo mbakambishaka elimu wa wolo lo dikambɔ. Eelo, ase Edjibito wakaahɛnyahɛnya lo toho tshɛ tahɛnyahɛnyawɔ waa mfumbe.+

15 L’ɔkɔngɔ diko, nkumekanga k’Edjibito akayosawolaka la Shifira nde la Pua wamato w’ase Hɛbɛru wakotshanyaka, 16 ndo akawatɛ ate: “Etena kayonyotshaka wamato w’ase Hɛbɛru, ko nyambowɛna lo ehomɔ ka mbota,+ nyu pombaka ndjaka ɔnakɔ naka ɔna pami, koko naka ɔna womoto, ko nyu mbotshika la lɔsɛnɔ.” 17 Koko ambotshotshi akɔ wakokaka Nzambi ka mɛtɛ wɔma, ko vɔ kosala kɛnɛ kakawatɛ nkumekanga k’Edjibito. Vɔ wakatshikaka ana w’apami la lɔsɛnɔ.+ 18 L’ɔkɔngɔ diko, nkumekanga k’Edjibito akayelɛka ambotshotshi asɔ ko akawatɛ ate: “Lande na katshikanyu ana w’apami la lɔsɛnɔ?” 19 Ambotshotshi wakatɛ Farawɔ vate: “Wamato w’ase Hɛbɛru ntshikitana la wamato w’ase Edjibito. Vɔ wekɔ la wolo w’efula ndo vɔ mbotaka la ntondo ka ombotshotshi nkoma lalewɔ.”

20 Ɔnkɔnɛ, Nzambi akasalɛ ambotshotshi asɔ ɔlɔlɔ. Ko ase Isariyɛlɛ wakatetemala fulanɛ ndo wakaleke monga la wolo. 21 Lam’ele ambotshotshi asɔ wakokaka Nzambi ka mɛtɛ wɔma, nde akayowashaka nkumbo. 22 Ko Farawɔ akayodjangɛ anto ande tshɛ ate: “Kanyokashake ɔna pami tshɛ l’ose Hɛbɛru layotɔka lo Ɔkɛdi wa Nilɛ, koko kanyotshikake ana wa wamato la lɔsɛnɔ.”+

2 L’etena kɛsɔ, pami kɛmɔtshi ka lo nkumbo ka Lɛwi akatshuke ɔna Lɛwi+ ɔmɔtshi la womoto. 2 Womoto akɔ akatshu diemi ko akote ɔna pami. Lam’akandɛnyi dia ɔna aki olangala efula, nde akawoshɛ l’edja ka ngɔndɔ 3.+ 3 Lam’akandɛnyi dia nde hayokoka ntetemala mboshɛ,+ nde akɔshi kisaka* ka papirusɛ, akakikite elongo la tshɔ ko akadje ɔna lɔkɔ ndo akatokikitsha lo lɔlɛngɛ laki l’omamu wa Ɔkɛdi wa Nilɛ. 4 Koko kadiyɔ+ aki ɔna ɔsɔ akemala lo tshalola dia menda kɛnɛ kayowokomɛ.

5 Lam’akaholɔ ɔna Farawɔ la womoto dia tɔka lo Nilɛ, ekambi ande wa wamato waketetaka l’omamu wa Nilɛ. Ko nde akɛnyi kisaka l’atei wa lɔlɛngɛ. Mbala kakɔ ɔtɔi nde akatome okambi ande wa womoto dia tokiɔsa.+ 6 Lam’akandakidihola, nde akɛnyi ɔna alela lɔkɔ. Ko nde akawoke kɛtshi, koko akate ate: “Ɔnɛ ekɔ ɔnaki ose Hɛbɛru.” 7 Ko kadiyɔ aki ɔnakɔ akatɛ ɔna Farawɔ la womoto ate: “Onde dimi kokaka telɛ womoto ɔmɔtshi l’ose Hɛbɛru dia nde kɔlɔnyɛka ɔna ɔnɛ?” 8 Ɔna Farawɔ la womoto akawotɛ ate: “Kawɔ, tshɔka!” Ko ɔna womoto ɔsɔ akatshu telɛ nyango ɔna.+ 9 Ɔna Farawɔ la womoto akatɛ nyango ɔna ate: “Ɔsa ɔna ɔnɛ tɔnɔnyɛkende ko dimi layokofuta.” Ko womoto akɔ akɔshi ɔna ndo akɔɔlɔnyaka. 10 Lam’akole ɔnakɔ, nde akɔɔtɔlɛ le ɔna Farawɔ la womoto ko ɔnakɔ akakome ɔnande.+ Nde akawɔlɛ Mɔsɛ* ko akate ate: “Nɛ dia lakawɔshi oma l’ashi.”+

11 Lo nshi shɔ, lam’akayala Mɔsɛ opalanga,* nde akatshu le anango dia tenda elimu wa wolo wakawakambaka,+ ko nde akɛnyi ose Edjibito ɔmɔtshi akɔmɔla ɔnango ɔmɔtshi l’ose Hɛbɛru. 12 Nde akɛwɛwa ko lam’akandɛnyi dia ndooko onto lawɛna, nde akadiake ose Edjibito ko nde mboshɛ lo ditshu.+

13 Koko la wedi a pindju, nde akatshu le wɔ ko akatotana apami 2 w’ase Hɛbɛru walɔ. Ko nde akatɛ ɔnɛ lakasale kɔlɔ ate: “Lande na kakɔmɔlayɛ osekayɛ?”+ 14 Nde akookadimola ate: “Akakɔsɔnɛ owandji ndo shushi yaso? Onde wɛ olanga ndjakami woho wakayadiake ose Edjibito?”+ Ko Mɔsɛ akoke wɔma ndo akate l’otema ande ate: “Ndooko onyake dikambo nɛ diambeyama!”

15 Oma laasɔ, Farawɔ akayoka dikambo diakɔ ko nde akayange ndjaka Mɔsɛ, koko Mɔsɛ akalawɔ oma laka Farawɔ ko akatshu otsha l’ɛtshi ka nkɛtɛ ka Midiyana.+ Nde akatodjasɛ suke la ɛtɛkɔ k’ashi. 16 Ɔlɔmbɛdi wa la Midiyana+ aki l’ana wa wamato 7, ko vɔ wakaye dia ndjotahola ashi ndo ndjolodia diangɔ diadjɛwɔ dongalonga ashi dia nɔsha dongalonga dia shɛwɔ ashi. 17 Koko tena tshɛ alami w’ɛkɔkɔ wakayaka ndjowatshanya. Ko Mɔsɛ akemala, akakimanyiya wamato akɔ ndo akanɔsha dongalonga diawɔ ashi. 18 Lam’akawakalola la ngelo le Ruɛlɛ*+ wa shɛwɔ, nde akawambola la diambo tshɛ ate: “Ambotomba kambonyokalola la ngelo esadi nganɛ ɛlɔ?” 19 Vɔ wakakadimola vate: “Ose Edjibito+ ɔmɔtshi akatotshisha oma l’anya w’alami w’ɛkɔkɔ ndo nde akatotahole ashi ndo akanɔshisha dongalonga.” 20 Nde akambola anande wa wamato ate: “Ko lende eende? Lande na kakanyootshiki? Nyotowete kele toyole kaamɛ la nde.” 21 L’ɔkɔngɔ wa laasɔ, Mɔsɛ aketawɔ dia mbidjasɛ kaamɛ la pami kakɔ, ko pami kakɔ akasha Mɔsɛ Zipɔra+ k’ɔnande wadi. 22 L’ɔkɔngɔ diko, womoto akɔ akote ɔna pami ko Mɔsɛ akawɔlɛ Ngɛrɛshɔmɛ,*+ nɛ dia nde akate ate: “Dimi laya ɔngɛndangɛnda lo wodja okina.”+

23 L’ɔkɔngɔ w’etena k’otale,* nkumekanga k’Edjibito akavu,+ koko ase Isariyɛlɛ wakatetemala nkuma akumu l’ɔtɛ wa lɔhɔmbɔ, wakakawanaka, ndo alelo awɔ wa nyanga ekimanyielo l’ɔtɛ wa shɔkɔ ya lɔhɔmbɔ wakadɛka polo le Nzambi ka mɛtɛ.+ 24 L’edjedja ka wonya, Nzambi akayoka akumu awɔ+ ko Nzambi akohɔ sheke yakandadje la Abrahama, Isaka ndo Jakɔbɔ.+ 25 Ko Nzambi akadje ase Isariyɛlɛ yimba ndo nde akɛnyi asui awɔ.

3 Mɔsɛ akayala olami w’ɛkɔkɔ waki Jɛtɛro*+ okilo ande laki ɔlɔmbɛdi wa la Midiyana. Etena kakandatatshɔka la ɛkɔkɔ otsha lo owɛstɛ l’oswe, nde akatokoma la Hɔrɛbɛ,+ dikona dia Nzambi ka mɛtɛ. 2 Ko ondjelo waki Jehowa akɛnama le nde lo loombe la dja l’atei wa dikombokombo di’atɛndɛ.+ Lam’akandendaka, nde akɛnyi dia dja yakahɛtaka lo dikombokombo di’atɛndɛ koko dikombokombo diakɔ konongola. 3 Ko Mɔsɛ akate ate: “Tokosukana kele tende dikambo dia diambo diɛnami dingo kele mbeye lande na kele dikombokombo di’atɛndɛ hadiolongola.” 4 Lam’akɛnyi Jehowa dia Mɔsɛ oyasukana dia ndjenda, Nzambi akawelɛ oma lo dikombokombo di’atɛndɛ ate: “Mɔsɛ! Mɔsɛ!” Ko nde akate ate: “Dimi ɔnɛ.” 5 Oma laasɔ, nde akate ate: “Tosukanake lanɛ. Kolola sabata yele l’ekolo ayɛ, nɛ dia dihole diemadiyɛ diekɔ nkɛtɛ y’ekila.”

6 Nde akawotɛ nto ate: “Dimi kele Nzambi ka shɔ, Nzambi ka Abrahama,+ Nzambi ka Isaka+ ndo Nzambi ka Jakɔbɔ.”+ Ko Mɔsɛ akashɛ elungi kande, nɛ dia nde akoke wɔma menda Nzambi ka mɛtɛ. 7 Jehowa akakotsha ate: “Dimi mɛtɛ lambɛna asui wa wodja ami wele l’Edjibito ndo lamboka alelo walelawɔ l’ɔtɛ waakandjawɔ elimu la wolo. Dimi mbeyaka dimɛna dia wekɔ lo nsowa efula.+ 8 Dimi layanga mpolɔ dia taatshungola oma l’anya w’ase Edjibito+ ndo mbatondja oma lo wodja akɔ, ko mbatɔla otsha lo wodja wa dimɛna ndo wa woke, wodja wakɛlanɛ abɛlɛ la osanga,+ lo ɛtshi ka nkɛtɛ k’ase Kanana, k’ase Hiti, k’ase Amɔra, k’ase Perizi, k’ase Hivi ndo k’ase Jɛbusɛ.+ 9 Alelo w’ase Isariyɛlɛ wambokoma polo le mi, ndo dimi lambɛna asui wa wolo waasoya+ ase Edjibito. 10 Ɔnkɔnɛ yaka, dimi layanga kotoma le Farawɔ kele totondja wodja ami, mbuta ate ase Isariyɛlɛ oma l’Edjibito.”+

11 Koko Mɔsɛ akatɛ Nzambi ka mɛtɛ ate: “Dimi eemi katomotshɔ le Farawɔ ndo katomotondja ase Isariyɛlɛ oma l’Edjibito?” 12 Ko nde akate ate: “Dimi layonga kaamɛ la yɛ+ ndo djembetelo ya wɛ mɛna wate dimi kokotomi yɔ nyɛ: L’ɔkɔngɔ wa wɛ ntondja wodja ami oma l’Edjibito, nyu nyayokambɛ* Nzambi ka mɛtɛ lo dikona nɛ.”+

13 Koko Mɔsɛ akatɛ Nzambi ka mɛtɛ ate: “Tɔshi dia dimi lambotshɔ le ase Isariyɛlɛ ko lambotowatɛ nte: ‘Nzambi ka watshɛnyu kontomi le nyu,’ ko vɔ wambotomimbola vate: ‘Lokombo lande?’+ Ngande wayomaakadimola?” 14 Ko Nzambi akatɛ Mɔsɛ ate: “Dimi layoyala kɛnɛ kayomɔsɔna* dia ndjaala.”*+ Nde akakotsha ate: “Kotote ase Isariyɛlɛ wate: ‘Dimi layoyala kontomi le nyu.’”+ 15 Oma laasɔ, Nzambi akatɛ Mɔsɛ nto ate:

“Kotote ase Isariyɛlɛ wate: ‘Jehowa Nzambi ka watshɛnyu, Nzambi ka Abrahama,+ Nzambi ka Isaka+ ndo Nzambi ka Jakɔbɔ+ kontomi le nyu.’ Ɔsɔ kele lokombo lami la pondjo+ ndo lo lokombo lɔsɔ mbayomoohɔmaka lo lɔlɔnga la lɔlɔnga. 16 Ɔnkɔnɛ, tshɔka totshumanya dikumanyi dia l’Isariyɛlɛ kele towate wate: ‘Jehowa Nzambi ka watshɛnyu, Nzambi ka Abrahama, ka Isaka ndo ka Jakɔbɔ akɛnama le mi ndo akambutɛ ate: “Dimi mɛtɛ lambonyodja yimba+ ndo lambɛna kɛnɛ kanyosalɛwɔ l’Edjibito. 17 Diakɔ diatami nte: Dimi layonyonya oma lo asui+ wanyosoya ase Edjibito ko nyɔtɔla l’ɛtshi ka nkɛtɛ k’ase Kanana, k’ase Hiti, k’ase Amɔra,+ k’ase Perizi, k’ase Hivi ndo k’ase Jɛbusɛ,+ lo wodja wakɛlanɛ abɛlɛ la osanga.”’+

18 “Ndooko onyake vɔ wayetawɔ kɛnɛ kayoyowatɛ,+ ko wɛ ayotshɔ wɛ la dikumanyi dia l’Isariyɛlɛ le nkumekanga k’Edjibito ndo nyayotowotɛ nyate: ‘Jehowa Nzambi k’ase Hɛbɛru+ akasawola la so. Ɔnkɔnɛ lam’alangayɛ, otokimɔ dia sho ntshɔ lɔkɛndɔ la nshi 3 otsha l’oswe wa shɛnga dia sho tolambola Jehowa Nzambi+ kaso olambo.’ 19 Koko dimɛ mbeyaka dia nkumekanga k’Edjibito hatetawɔ dia nyu ntshɔ, naka nde hatshutshuyami la wolo.+ 20 Ɔnkɔnɛ, dimi layohomba nsembola lonya lami ko nkɔmɔla ase Edjibito la akambo wa diambo wayomosala lo wodja akɔ. Oma laasɔ kayondonyokimɔ.+ 21 Dimi layonyohomuya lokolo l’ɔlɔ lo washo w’ase Edjibito. Lam’ayonyotomba, ndooko onyake nyu hanyototomba anyanya.+ 22 Womoto tshɛ kalɔmbɛ osukanyi ande kana womoto lodjashi lo luudu lande diangɔ dia mfɛsa, dia paonyi ndo ahɔndɔ, kele kanyɔlɔtsha ananyu w’apami la ananyu wa wamato. Ngasɔ mbayonyotambi ɛngɔnyi w’ase Edjibito.”+

4 Koko Mɔsɛ akakadimola ate: “Ko tɔshi dia vɔ hawombetawe ndo hawetawe kɛnɛ kayomowatɛ,+ nɛ dia vɔ wayota vate: ‘Jehowa kɔmɛnama le yɛ.’” 2 Ko Jehowa akawombola ate: “Ele lo lonya layɛ?” Nde akakadimola ate: “Danga.” 3 Nde akate ate: “Okɛdiɔ la nkɛtɛ.” Nde akadiokɛ la nkɛtɛ ko diɔ diakakadimɔ oloyi,+ ko Mɔsɛ akoolawɔ. 4 Jehowa akatɛ Mɔsɛ ate: “Sembola lonya layɛ kele kimɛwɔ lo wela.” Ko nde akasembola lonya lande ndo akookimɛ, ko vɔ wakakadimɔ danga lo lonya lande. 5 Oma laasɔ, Nzambi akate ate: “Ongo ele dia vɔ mbetawɔ dia Jehowa Nzambi ka watshɛwɔ, Nzambi ka Abrahama, Nzambi ka Isaka ndo Nzambi ka Jakɔbɔ+ akɛnama le yɛ.”+

6 Jehowa akawotɛ nto ate: “Lam’alangayɛ, dja lonya layɛ lo lɔsɔsɔ lanama lo dihɔndɔ diɔlɔtshiyɛ lo ntolo.” Ko nde akadje lonya lande lo lɔsɔsɔ lakɔ la lo dihɔndɔ diande. Lam’akandalitondja, ɛnyinde ko lonya lande laya la sudi ndo laya wɛma oko loonge!+ 7 Ko nde akate ate: “Kaloya lonya layɛ lo lɔsɔsɔ lanama lo dihɔndɔ diɔlɔtshiyɛ lo ntolo.” Ko Mɔsɛ akakaloya lonya lande lo dihɔndɔ diande. Lam’akandalitondja oma lo dihɔndɔ diande, lɔ lakakɔnɔ! 8 Nde akate ate: “Naka vɔ hawoketawe kana hawetawe dihindo dia ntondo, kete ndooko onyake wayetawɔ dihindo dia 2.+ 9 Ko naka polo laasɔ vɔ hawetawe ahindo asɔ 2 ndo wambotona mbetawɔ kɛnɛ kayoyowatɛ, kɔshi yema y’ashi oma lo Ɔkɛdi wa Nilɛ ko wɛ mbitɛ lo nkɛtɛ y’ofumbo. Ashi wayoyɔsa oma lo Nilɛ wayokadimɔ dikila lo nkɛtɛ y’ofumbo.”+

10 Mɔsɛ akatɛ Jehowa ate: “Jehowa le, onkimwe. Dimi bu la akoka wa ntɛkɛta dimɛna, oyadi oma ko edjedja kana wonya watɛkɛtayɛ la okambi ayɛ, nɛ dia dimi haladja ntɛkɛta* ndo lolemi lami wotsho.”+ 11 Jehowa akawotɛ ate: “Akɔna akasha onto onyɔ ndo eetɛ* onto lomi, ehoke, ndo asala di’onto mɛna dimɛna kana monga tshungu? Aha dimi Jehowa? 12 Ɔnkɔnɛ tshɔka, dimi layonga kaamɛ la yɛ etena kayoyɔtɛkɛtaka* ndo layokolakanya kɛnɛ kahombayɛ mbuta.”+ 13 Koko nde akate ate: “Jehowa le, okimwe. Lam’alangayɛ, toma onto tshɛ lalangayɛ ntoma.” 14 Ko Jehowa akomalɛ Mɔsɛ efula ndo akawotɛ ate: “Ko ɔnanyɔ Arɔna,+ onde nde bu ose Lɛwi? Dimi mbeyaka dia nde tɛkɛtaka dimɛna. Nde ekɔ lo ndjaye dia ndjohomana la yɛ. Lam’ayondokɛna, otema ande wayɔngɛnangɛna.+ 15 Ɔnkɔnɛ kosawole la nde ndo kodje ɛtɛkɛta ami l’onyɔ ande.+ Dimi layonga kaamɛ la yɛ ndo kaamɛ la nde etena kayonyosawola+ ndo dimi layonyotɛ kɛnɛ kahombanyu nsala. 16 Nde ayotɛka anto akambo w’oma le yɛ ndo ayonga yɛmba awui yayɛ, ko wɛ ayonga oko Nzambi le nde.*+ 17 Kokime danga nɛ lo lonya layɛ kele kosalake ahindo la diɔ.”+

18 Ko Mɔsɛ akakalola le okilo ande+ Jɛtɛro ndo akawotɛ ate: “Lam’alangayɛ, dimi lolanga nkalola le analengo wele l’Edjibito dia towaenda kana weke la lɔsɛnɔ.” Jɛtɛro akatɛ Mɔsɛ ate: “Kotshu la wolo.” 19 L’ɔkɔngɔ wa laasɔ, Jehowa akatɛ Mɔsɛ lam’akinde la Midiyana ate: “Kalola l’Edjibito, nɛ dia wanɛ tshɛ wakayangaka dia kodiaka* wambovɔ.”+

20 Ko Mɔsɛ akɔshi wadɛnde la anande, akawawahenya lo mponda, ko akatatɛ nkalola otsha lo wodja w’Edjibito. Ndo nto, Mɔsɛ akakimɛ danga dia Nzambi ka mɛtɛ lo lonya lande. 21 Ko Jehowa akatɛ Mɔsɛ ate: “Lam’ayoyokalola l’Edjibito, kosale la ntondo ka Farawɔ ahindo tshɛ wakamakosha wolo dia nsala.+ Koko dimi layokeketsha otema+ ande ndo nde hatetawɔ nkimɔ anto ami.+ 22 Kote Farawɔ wate: ‘Jehowa kata ate: “Isariyɛlɛ ekɔ ɔnami l’enondo.+ 23 Lambokotɛ nte: Kimɔ ɔnami dia nde tonkambɛ olimu. Naka wɛ ntona mbokimɔ, dimi layodiaka ɔnayɛ l’enondo.”’”+

24 Lam’akandatakalolaka, Jehowa*+ akahomana la nde lo dihole diakawatohanga ko akalange mbodiaka.+ 25 Ko Zipɔra+ akɔshi ɛtshi ka dive ka mpɛmɔ, akanya ɔnande mpota ndo akasakanya lokoho lakandanya lo ekolo ande ndo akate ate: “Nɛ dia wɛ ekɔ omi la dikila le mi.” 26 Ko Nde akootshike. L’etena kɛsɔ Zipɔra akate ate: “Omi la dikila le mi,” l’ɔtɛ wa wonyelo wa mpota.

27 Oma laasɔ, Jehowa akatɛ Arɔna ate: “Tshɔka l’oswe tohomane la Mɔsɛ.”+ Ko nde akatshu, akatohomana la nde lo dikona dia Nzambi ka mɛtɛ+ ndo nde akawosha mɔyɔ lo mbosha bizɛ. 28 Ko Mɔsɛ akatɛ Arɔna kɛnɛ tshɛ kakawotɛ Jehowa, ɔnɛ lakootome+ ndo ahindo tshɛ wakandawotɛ dia nsala.+ 29 Oma laasɔ, Mɔsɛ la Arɔna wakatshu ko wakatotshumanya dikumanyi dia l’Isariyɛlɛ+ tshɛ. 30 Arɔna akawatɛ kɛnɛ tshɛ kakatɛ Jehowa Mɔsɛ ndo nde akasale ahindo+ lo washo w’anto. 31 Ko anto waketawɔ.+ Lam’akawoke dia Jehowa ambodja ase Isariyɛlɛ yimba+ ndo ɔnɛ nde ambɛna asui awɔ,+ vɔ wakakɔlama ndo wakakusama.

5 Oma laasɔ, Mɔsɛ la Arɔna wakatshu le Farawɔ ko wakatowotɛ vate: “Jehowa Nzambi k’Isariyɛlɛ kata ate: ‘Kimɔ anto ami dia vɔ tonsalɛ difɛstɔ dimɔtshi l’oswe.’” 2 Koko Farawɔ akate ate: “Akɔna ele Jehowa+ dia dimi nkitanyiya dui diande ndo nkimɔ ase Isariyɛlɛ?+ Dimi handeye Jehowa, ndo nto, dimi hatokimɔ Isariyɛlɛ.”+ 3 Koko vɔ wakate vate: “Nzambi k’ase Hɛbɛru akasawola la so. Lam’alangayɛ, sho nangaka ntshɔ lɔkɛndɔ la nshi 3 otsha l’oswe dia tolambola Jehowa Nzambi kaso olambo.+ Naka bu kete nde ayotodiaka la hemɔ kana la lokuwa la ta.” 4 Nkumekanga k’Edjibito akaakadimola ate: “Mɔsɛ la Arɔna, lande na konyolanga nsala dia anto anɛ ntshika elimu awɔ? Nyokalole nyotokambe elimu anyu!”+ 5 Farawɔ akatetemala mbuta ate: “Anto anyu wambofulanɛ lo wodja ɔnɛ, ko nyu nyolanga dia vɔ ntshika nkamba elimu awɔ?”

6 Lushi lɔsɔ Farawɔ akadjangɛ ewandji w’elimu la topita ate: 7 “Tanyoshake anto anɛ nɛngɛsɛ* nto dia vɔ nsala atafadi.+ Vɔamɛ watshɔke dia toyanga nɛngɛsɛ. 8 Koko nyowadjange dia vɔ salaka lofulo la atafadi lakawasalaka ntondo. Tanyaakitshɛkitshɛke, nɛ dia vɔ wodja dɛwɔlɛwɔ.* Diakɔ diadjawɔ londjo vate: ‘Sho nangaka ntshɔ! Sho nangaka tolambola Nzambi kaso olambo!’ 9 Nyaakandja elimu woleki wolo ndo tanyowashake etena ka vɔ momuya diaha vɔ mbidja yimba lo akambo wa kashi.”

10 Ko ewandji w’elimu+ la topita tawɔ wakatshu ndo wakatotɛ anto asɔ vate: “Farawɔ kata ate: ‘Handjonyosha nɛngɛsɛ nto. 11 Nyotoyangake nɛngɛsɛ nyuamɛ dihole tshɛ diakokanyu ndjitana, koko olimu anyu hawotokitakita ndooko yema.’” 12 Ko anto asɔ wakahandjɔnɛ lo wodja w’Edjibito w’otondo dia tayangaka nɛngɛsɛ y’oma lo dikambɔ lo dihole dia nyɛ yambɔtɛtshatɛtshama. 13 Ko ewandji w’olimu wakaatshutshuyaka vate: “Onto l’onto pombaka shidiyaka olimu ande lushi tshɛ, oko etena kakawanyoshaka nɛngɛsɛ.” 14 Ndo nto, topita t’ase Isariyɛlɛ takasɔnama oma le ewandji w’olimu waki Farawɔ wakakɔmama.+ Wakawambola vate: “Lande na kahanyasadi lofulo la atafadi lahombanyu nsala? Loyi ndo ɛlɔ nyu hanyokotshisha.”

15 Ko topita t’ase Isariyɛlɛ wakatshu le Farawɔ dia towɛnya lonyangu lawɔ vate: “Lande na kasalɛyɛ ekambi ayɛ nganɛ? 16 Hawoyosha ekambi ayɛ nɛngɛsɛ, koko wekɔ lo totɛ vate: ‘Nyosale atafadi!’ Sho ekambi ayɛ tekɔ lo kɔmama etena kele anto ayɛ mbele la munga.” 17 Koko nde akaakadimola ate: “Nyekɔ lo ntɛwɔla alemba!* Nyekɔ lo ntɛwɔla alemba!*+ Diakɔ diatanyu nyate: ‘Sho nangaka ntshɔ, sho nangaka tolambola Jehowa olambo.’+ 18 Nyokalole nyotokambe olimu! Hawotonyosha nɛngɛsɛ, koko nyayotetemala nsala lofulo lakɔ laamɛ la atafadi.”

19 Ko topita t’ase Isariyɛlɛ wakɛnyi dia wambɔtɔ lo okakatanu wa wolo l’ɔtɛ wa didjango di’ɔnɛ: “Hanyohombe nkitshakitsha lofulo la atafadi wa lushi la lushi.” 20 L’ɔkɔngɔ wa laasɔ, vɔ wakatshu tohomana la Mɔsɛ nde la Arɔna, wanɛ wakaakongaka dia mɛnana la wɔ etena kakawayatombaka oma le Farawɔ. 21 Mbala kakɔ ɔtɔi vɔ wakawatɛ vate: “Jehowa endane la nyu ndo anyolombosha, nɛ dia nyambotoyangɛ nkɛlɛ ka Farawɔ nde la ekambi ande ndo nyambowasha lokuwa la ta dia vɔ todiaka.”+ 22 Ko Mɔsɛ akakadimɔ le Jehowa ndo akate ate: “Jehowa le, lande na kamboyosoya anto anɛ? Lande na kakayantome? 23 Ntatɛ oma ko lushi lakamatosawola la Farawɔ lo lokombo layɛ,+ nde amboleka mpɛnyahɛnya anto anɛ,+ koko wɛ atatshungola anto ayɛ.”+

6 Ko Jehowa akatɛ Mɔsɛ ate: “Wɛ ayɛna kɛnɛ kayomosalɛ Farawɔ.+ Lonya la wolo layowotshutshuya dia nde mbakimɔ ndo lonya la wolo layowotshutshuya dia nde mbatondja oma lo wodja ande.”+

2 Oma laasɔ, Nzambi akatɛ Mɔsɛ ate: “Dimi kele Jehowa. 3 Dimi lakɛnamaka le Abrahama, Isaka ndo Jakɔbɔ oko Nzambi Kanga-Wolo-Tshɛ,+ koko lo kɛnɛ kendana la lokombo lami Jehowa,+ dimi kondjaeyanya le wɔ.+ 4 Ndo nto, dimi lakadje sheke kaamɛ la wɔ dia mbasha wodja wa Kanana, wodja wakawadjasɛ lɔkɔ oko angɛndangɛnda.+ 5 Dimɛ lamboka akumu wakuma ase Isariyɛlɛ wahɛnyahɛnyama lo lɔhɔmbɔ le ase Edjibito, ko lambohɔ sheke yami.+

6 “Ɔnkɔnɛ, tɛ ase Isariyɛlɛ wate: ‘Dimi kele Jehowa. Dimi layonyonya oma l’asui wanyosoya ase Edjibito ndo layonyotshungola oma lo lɔhɔmbɔ lawɔ.+ Dimi layonyotshungola la lonya losembwe tɔɔ* ndo la alanya wa wolo.+ 7 Dimi layonyɔsa oko wodja ami ndo dimi layoyala Nzambi kanyu,+ ko nyu nyayeya mɛtɛ dia dimi kele Jehowa Nzambi kanyu kayonyotshungola oma l’Edjibito ndo oma l’elimu awɔ wa wolo. 8 Dimi layonyɔtɔla otsha lo ɛtshi ka nkɛtɛ kakamatshibe* dia mbisha Abrahama, Isaka la Jakɔbɔ ndo layonyoshatɔ.+ Dimi kele Jehowa.’”+

9 L’ɔkɔngɔ wa laasɔ, Mɔsɛ akatɛ ase Isariyɛlɛ awui asɔ, koko vɔ kopokamɛ Mɔsɛ l’ɔtɛ wakawakɔmɔ ndo l’ɔtɛ wa lɔsɛnɔ la wolo la lo lɔhɔmbɔ.+

10 Oma laasɔ, Jehowa akatɛ Mɔsɛ ate: 11 “Tshɔka tote Farawɔ, nkumekanga k’Edjibito dia nde pombaka ntondja ase Isariyɛlɛ oma lo wodja ande.” 12 Koko Mɔsɛ akakadimola Jehowa ate: “Lam’ele ase Isariyɛlɛ hawompokame,+ onde Farawɔ kayotompokamɛ, dimi onto lahadja ntɛkɛta?”+ 13 Ko Jehowa akatɛ Mɔsɛ la Arɔna nto kɛnɛ kahombawɔ totɛ ase Isariyɛlɛ ndo kɛnɛ kahombawɔ totɛ Farawɔ, nkumekanga k’Edjibito dia ntondja ase Isariyɛlɛ oma lo wodja w’Edjibito.

14 Ewandji wa nkumbo ya washɛwɔ vɔ ɛnɛ: Ana w’apami wa Rubɛna ɔna Isariyɛlɛ l’enondo+ vɔ anɛ: Hanɔka, Palu, Hɛzɛrɔna ndo Karami.+ Wasɔ mbele nkumbo ya lo dioho dia Rubɛna.

15 Ana w’apami wa Simɛyɔna vɔ anɛ: Jemuɛlɛ, Jamina, Ɔhadɛ, Jakina, Zɔhara ndo Shaolo ɔnaki womoto ɔmɔtshi l’ose Kanana.+ Wasɔ mbele nkumbo ya lo dioho dia Simɛyɔna.

16 Nkombo y’ana w’apami wa Lɛwi+ lo ndjela ɛlɔndji wa nkumbo yawɔ yɔ nyɛ: Ngɛrɛshɔna, Kɔhata ndo Merari.+ Lɛwi akasɛnɛ ɛnɔnyi 137.

17 Ana w’apami wa Ngɛrɛshɔna lo ndjela nkumbo yawɔ+ vɔ anɛ: Libini nde la Shimei.

18 Ana w’apami wa Kɔhata vɔ anɛ: Amurama, Izɛhara, Hɛbɛrɔna ndo Uziyɛlɛ.+ Kɔhata akasɛnɛ ɛnɔnyi 133.

19 Ana w’apami wa Merari vɔ anɛ: Mahili nde la Mushi.

Wasɔ mbele nkumbo ya lo dioho dia Lɛwi lo ndjela ɛlɔndji wa nkumbo yawɔ.+

20 Amurama akatshuke+ Jɔkɛbɛdɛ ya she kadi. Nde akayota Arɔna nde la Mɔsɛ.+ Amurama akasɛnɛ ɛnɔnyi 137.

21 Ana w’apami wa Izɛhara vɔ anɛ: Kɔra,+ Nɛfɛngɛ ndo Zikiri.

22 Ana w’apami wa Uziyɛlɛ vɔ anɛ: Mishaɛlɛ, Elizafana+ ndo Sitiri.

23 Arɔna akatshuke Elishɛba ɔna Aminadaba, kadiyɔ aki Nashɔna.+ Nde akote la nde Nadaba, Abihu, Eleazara ndo Itamara.+

24 Ana w’apami wa Kɔra vɔ anɛ: Asira, Elekana ndo Abiyasafu.+ Wasɔ mbele nkumbo ya lo dioho dia Kɔra.+

25 Eleazara+ ɔna Arɔna akatshuke ɔna Putiɛlɛ. Nde akote la nde Finehasi.+

Wasɔ mbele ɛtɛ wa nkumbo ya washɛwɔ ya lo dioho dia Lɛwi lo ndjela nkumbo yawɔ.+

26 Arɔna ɔsɔ la Mɔsɛ mbele Jehowa akawatɛ ate: “Nyotondja ase Isariyɛlɛ oma lo wodja w’Edjibito elui la elui.”*+ 27 Mɔsɛ la Arɔna+ ɔsɔ mbakatɛkɛta la Farawɔ, nkumekanga k’Edjibito dia ntondja ase Isariyɛlɛ oma l’Edjibito.

28 Lushi lɔsɔ, lam’akatɛkɛta Jehowa la Mɔsɛ lo wodja w’Edjibito, 29 Jehowa akatɛ Mɔsɛ ate: “Dimi kele Jehowa. Tote Farawɔ, nkumekanga k’Edjibito akambo tshɛ wakotɛmi.” 30 Ko Mɔsɛ akate la ntondo ka Jehowa ate: “Onde Farawɔ ayompokamɛ+ lam’ele dimi haladja ntɛkɛta?”

7 Ko Jehowa akatɛ Mɔsɛ ate: “Dimi lamboketɛ oko Nzambi* le Farawɔ ndo ɔnanyɔ Arɔna ayonga omvutshi ayɛ.+ 2 Wɛ ayowotɛka kɛnɛ tshɛ kayomokotɛka. Ɔnanyɔ Arɔna ayokitɛka Farawɔ, ko nde ayokimɔ ase Isariyɛlɛ oma lo wodja ande. 3 Dimi layotshika di’otema waki Farawɔ nkeketala+ ndo layosala tolembetelo tami ndo ahindo ami efula lo wodja w’Edjibito.+ 4 Koko Farawɔ hatonyohokamɛ. Dimi layosembola lonya lami lo wodja w’Edjibito, ko layotondja leemba l’anto ami,* mbuta ate ase Isariyɛlɛ oma lo wodja w’Edjibito lo mbisha ase Edjibito alanya wa wolo.+ 5 Ko ase Edjibito wayeya mɛtɛ dia dimi kele Jehowa+ lam’ayomosembola lonya lami dia mbisha ase Edjibito dilanya ndo lam’ayomotondja ase Isariyɛlɛ oma l’atei awɔ.” 6 Mɔsɛ nde la Arɔna wakasale kɛnɛ kakawadjangɛ Jehowa. Vɔ wakasale kɛnɛ kakandawatɛ tshɛ lo tshɛ. 7 Mɔsɛ aki la ɛnɔnyi 80 ndo Arɔna aki la ɛnɔnyi 83 etena kakawatɛkɛtaka la Farawɔ.+

8 Oma laasɔ, Jehowa akatɛ Mɔsɛ nde la Arɔna ate: 9 “Naka Farawɔ ambonyotɛ ate: ‘Nyosale dihindo,’ kote Arɔna wate: ‘Ɔsa danga diayɛ kele okɛdiɔ la ntondo ka Farawɔ.’ Diɔ diayokadimɔ oloyi wa shaka.”+ 10 Ko Mɔsɛ nde la Arɔna wakatshu le Farawɔ ndo wakatosala akambo tshɛ oko wakadjanga Jehowa. Arɔna akokɛ danga diande la nkɛtɛ la ntondo ka Farawɔ la ekambi ande, ko diɔ diakakadimɔ oloyi wa shaka. 11 Koko Farawɔ akelɛ akanga wa tomba ndo akanga w’alɔka. Ɛlɔmbɛdi wakasalaka awui wa maji l’Edjibito+ vɔ lawɔ wakasale woho akɔ waamɛ la maji yawɔ.+ 12 Vɔ tshɛ onto l’onto akokɛ danga diande, ko alanga awɔ wakakadimɔ eloyi wa tosaka. Koko danga diaki Arɔna diakamɛnɛ alanga awɔ. 13 Polo laasɔ tshɛ, Farawɔ akakeketsha otema+ ndo nde kombahokamɛ, oko wakate Jehowa.

14 Oma laasɔ, Jehowa akatɛ Mɔsɛ ate: “Farawɔ ekɔ la otema wa lonyu.+ Nde ambotona nkimɔ wodja ami. 15 Kotshu le Farawɔ la pindju. Nde ayotshɔ otsha l’ashi. Laasɔ, kotemale l’omamu wa Ɔkɛdi wa Nilɛ dia wɛ mpomana la nde. Kotshu la danga diayɛ diakakadimɔ oloyi.+ 16 Kowote wate: ‘Jehowa Nzambi k’ase Hɛbɛru akantomi le yɛ+ dia ndjokotɛ ɔnɛ: “Kimɔ anto ami dia vɔ tonkambɛ l’oswe,” koko wɛ halange nkitanyiya polo ndo kakianɛ. 17 Jehowa kata ate: “Oma lo dikambo nɛ, wɛ ayanga mbeya dia dimi kele Jehowa.+ Dimi layanga nkɔmɔla danga diele lo lonya lami lo ashi wa Nilɛ, ko vɔ wayokadimɔ dikila. 18 Ndo nse yele lo Nilɛ yayovɔ ndo ashi wa Nilɛ wayonga nsolo, ko ase Edjibito wayɛna dia hawoyokoka nnɔ ashi wa Nilɛ.”’”

19 Oma laasɔ, Jehowa akatɛ Mɔsɛ ate: “Tɛ Arɔna wate: ‘Ɔsa danga diayɛ kele tshumadiɔ otsha lo nkushi ya l’Edjibito,+ lo ɛkɛdi, lo ashi wɛtɔyawɔ oma lo Nilɛ, lo eduwa* awɔ+ ndo lo diangɔ diawɔ tshɛ diombawɔ ashi dia vɔ nkadimɔ dikila.’ Dikila diayoyala l’ahole tshɛ wa lo wodja w’Edjibito, oyadi lo diangɔ di’esongo kana di’ave diadjawɔ ashi.” 20 Aha la ntshimbatshimba, Mɔsɛ nde la Arɔna wakasale kɛnɛ kakawadjangɛ Jehowa. Arɔna akedia danga diande, akadikɔmɔla l’ashi wa ɔkɛdi wa Nilɛ lo washo wa Farawɔ la ekambi ande, ko ashi tshɛ wa lo ɔkɛdi wakakadimɔ dikila.+ 21 Nse yaki lo ndjale kakɔ yakavu+ ndo ndjale kakɔ kakatatɛ mbipɔ nsolo, ko ase Edjibito kokoka nnɔ ashi w’oma lo Nilɛ.+ Dikila diakayala lo wodja w’Edjibito w’otondo.

22 Koko ɛlɔmbɛdi wakasalaka awui wa maji l’Edjibito wakasale woho akɔ waamɛ la maji yawɔ.+ Ko Farawɔ akatetemala nkeketsha otema ndo nde kombahokamɛ, oko wakate Jehowa.+ 23 Oma laasɔ, Farawɔ akakalola lo luudu lande ndo nde kombidja yimba lo dikambo sɔ. 24 Ɔnkɔnɛ, ase Edjibito tshɛ wakatshime afuku l’omamu wa Nilɛ dia vɔ nkondja ashi wa nnɔ, nɛ dia vɔ kokoka nnɔ ashi w’oma lo Nilɛ. 25 Ko nshi 7 y’etondo yakete l’ɔkɔngɔ wa Jehowa nkadimola ashi wa Nilɛ dikila.

8 Ko Jehowa akatɛ Mɔsɛ ate: “Tshɔka le Farawɔ towote wate: ‘Jehowa kata ate: “Kimɔ anto ami dia vɔ tonkambɛ.+ 2 Naka wɛ ntetemala ntona mbakimɔ, kete dimi layotoma sui dia ɛkɔlɛ+ lo wodja ayɛ w’otondo. 3 Ndo Ɔkɛdi wa Nilɛ kayololanɛ la ɛkɔlɛ, ko ɛkɔlɛ wayotomba ndo wayɔtɔ lo luudu layɛ, lo luudu layɛ la ndala, lo mbeto kayɛ, lo mvudu y’ekambi ayɛ, le anto ayɛ, lo atshuka ayɛ ndo lo diangɔ diayɛ diasɔhawɔ ofushi.*+ 4 Ɛkɔlɛ wayololanɛ le yɛ, le anto ayɛ ndo le ekambi ayɛ tshɛ.”’”

5 L’ɔkɔngɔ diko, Jehowa akatɛ Mɔsɛ ate: “Tɛ Arɔna wate: ‘Onyiya danga diele lo lonya layɛ, tshumadiɔ otsha lo nkushi, lo ɛkɛdi w’ashi wɛtɔyawɔ oma lo Nilɛ ndo l’eduwa awɔ kele ɛkɔlɛ walolane lo wodja w’Edjibito.’” 6 Ko Arɔna akasembola lonya lande otsha lo nkushi ya l’Edjibito, ko ɛkɔlɛ wakatatɛ ntomba ndo wakalolanɛ lo wodja w’Edjibito. 7 Koko ɛlɔmbɛdi wakasalaka awui wa maji wakasale woho akɔ waamɛ la maji yawɔ ndo wakasale dia ɛkɔlɛ monga lo wodja w’Edjibito.+ 8 Ko Farawɔ akayelɛ Mɔsɛ nde la Arɔna ko akawatɛ ate: “Nyɔsɛngɛsɛngɛ Jehowa dia nde minyɛmi dimi l’anto ami+ ɛkɔlɛ, nɛ dia dimi lambolanga nkimɔ anto anyu dia vɔ ntshɔ tolambola Jehowa olambo.” 9 Mɔsɛ akatɛ Farawɔ ate: “Dimi lambokosha kɛnɛmɔ dia wɛ mbutɛmi etena kahombami nsɛngasɛnga Nzambi dia nde minya ɛkɔlɛ le yɛ, le ekambi ayɛ, le anto ayɛ ndo oma lo mvudu yayɛ. Paka lo Ɔkɛdi wa Nilɛ oto mbayowotshikala.” 10 Ko nde akate ate: “Loyi.” Mɔsɛ akate ate: “Diayosalema oko wotshiyɛ, dia wɛ mbeya wate ndooko onto lɛdimi la Jehowa Nzambi kaso.+ 11 Ɛkɔlɛ wayomɔ oma le yɛ, oma lo mvudu yayɛ, oma le ekambi ayɛ ndo oma le anto ayɛ. Vɔ wayotshikala paka lo Nilɛ.”+

12 Mɔsɛ nde la Arɔna wakamɔ oma lale Farawɔ ko Mɔsɛ akatɔsɛngasɛnga Jehowa lo dikambo di’ɛkɔlɛ wakandatomɛ Farawɔ.+ 13 Ko Jehowa akasale oko wakɔɔlɔmbɛ Mɔsɛ ndo ɛkɔlɛ wakatatɛ mvɔ lo mvudu, lo asɛkɛ ndo lo eswe. 14 Wakaatshumanyaka elui elui, ko wodja w’Edjibito wakatatɛ mbipɔ nsolo. 15 Lam’akɛnyi Farawɔ dia akambo wambɔlɔngɔsɔma, nde akakeketsha otema+ ndo akatone mbahokamɛ, oko wakate Jehowa.

16 Jehowa akatɛ Mɔsɛ ate: “Tɛ Arɔna wate: ‘Onyiya danga diayɛ kele kɔmɔladiɔ lo ditshu, ko ditshu diayokadimɔ mɛmbɛlɛ* lo wodja w’Edjibito w’otondo.’” 17 Ko vɔ wakasale ngasɔ. Arɔna akonyiya danga diaki lo lonya lande, akadikɔmɔla lo ditshu, ko mɛmbɛlɛ yakatombe ndo yakalumataka anto la nyama. Ditshu tshɛ dia nkɛtɛ diakakadimɔ mɛmbɛlɛ lo wodja w’Edjibito w’otondo.+ 18 Ɛlɔmbɛdi wakasalaka awui wa maji wakahembe nsala woho akɔ waamɛ dia ntondja mɛmbɛlɛ lo maji yawɔ,+ koko vɔ kokoka ndjitondja. Mɛmbɛlɛ yakalumataka anto la nyama. 19 Ko ɛlɔmbɛdi wakasalaka awui wa maji wakatɛ Farawɔ vate: “Ɔnɛ lohita la Nzambi!”+ Koko Farawɔ akatetemala nkeketsha otema ndo nde kombahokamɛ, oko wakate Jehowa.

20 Oma laasɔ, Jehowa akatɛ Mɔsɛ ate: “Ketɔ la pindju ka pɛɛ, kele kotemale la ntondo ka Farawɔ. Nde ayotshɔ otsha l’ashi. Kowote wate: ‘Jehowa kata ate: “Kimɔ anto ami dia vɔ tonkambɛ. 21 Naka wɛ hakimwe anto ami, dimi layanga kotomɛ wɛ la ekambi ayɛ, anto ayɛ ndo ase luudu layɛ ntshingo.* Mvudu ya l’Edjibito yayololanɛ la ntshingo ndo nkɛtɛ yawɔ* tshɛ yayokombama la yɔ. 22 Lushi lɔsɔ, dimi layokakitola ɛtshi ka nkɛtɛ ka Ngɔshɛnɛ kodjashi anto ami. Ndooko lotshingo layonga lɛkɔ.+ Ko oma lo dikambo sɔ, wɛ ayeya dia dimi Jehowa lekɔ lo wodja ɔnɛ.+ 23 Dimi layosala otshikitanu lam’asa anto ami l’anto ayɛ. Djembetelo shɔ yayosalema loyi.”’”

24 Kɛsɔ mbakasale Jehowa. Ndo elui wa ntshingo wakatatɛ ndolanɛ lo luudu la Farawɔ ndo lo mvudu y’ekambi ande lo wodja w’Edjibito w’otondo.+ Wodja w’otondo wakalolanɛ la ntshingo.+ 25 Ko Farawɔ akelɛ Mɔsɛ nde la Arɔna ndo akawatɛ ate: “Nyotshu nyotolambole Nzambi kanyu olambo lo wodja ɔnɛ w’Edjibito.” 26 Koko Mɔsɛ akate ate: “Hatokoke nsala ngasɔ, nɛ dia kɛnɛ kayotolambola Jehowa Nzambi kaso ayonga ɛngɔ ka wɔnɔnyi le ase Edjibito.+ Naka sho nambola olambo wele wɔnɔnyi le ase Edjibito lo washo awɔ, onde vɔ hawototoka ave? 27 Sho tayotshɔ lɔkɛndɔ la nshi 3 l’oswe ndo lɛkɔ mbayototolambola Jehowa Nzambi kaso olambo oko wakandatotɛ.”+

28 Ko Farawɔ akate ate: “Layonyokimɔ dia nyu tolambola Jehowa Nzambi kanyu olambo l’oswe. Koko hanyohombe ntshɔ etale. Nyɔnɔmbɛ+ Nzambi kanyu.” 29 Ko Mɔsɛ akate ate: “Layanga nkakitɔna la yɛ ndo layanga tɔlɔmba Jehowa, ko loyi ntshingo yayomɔ oma le Farawɔ, oma le ekambi ande ndo oma le anto ande. Koko Farawɔ atotokesake nto lo ntona dia nkimɔ anto aso dia vɔ tolambola Jehowa olambo.”+ 30 Oma laasɔ, Mɔsɛ akamɔ oma lale Farawɔ ndo akatɔlɔmba Jehowa.+ 31 Ko Jehowa akasale oko wakɔɔlɔmbɛ Mɔsɛ ndo ntshingo yakamɔ oma le Farawɔ, oma le ekambi ande ndo oma le anto ande. Ndooko lotshingo lakatshikala. 32 Koko Farawɔ akakeketsha otema nto ndo nde kokimɔ ase Isariyɛlɛ.

9 Ko Jehowa akatɛ Mɔsɛ ate: “Tshɔka le Farawɔ kele towote wate: ‘Jehowa Nzambi k’ase Hɛbɛru kata ate: “Kimɔ anto ami dia vɔ tonkambɛ.+ 2 Ko naka wɛ halange mbakimɔ ndo ambotetemala mbakimɛ, 3 kete lonya la Jehowa+ layolanya dongalonga diayɛ diele l’oswe. Mpokoso ka wolo+ kayoya le mfalasa yayɛ, mponda yayɛ, kamɛlɔ yayɛ, ngɔmbɛ yayɛ ndo ɛkɔkɔ ayɛ. 4 Jehowa ayosala otshikitanu lam’asa dongalonga di’ase Isariyɛlɛ la dongalonga di’ase Edjibito, ko ndooko elongalonga k’ose Isariyɛlɛ kayovɔ.”’”+ 5 Ndo nto, Jehowa akashikikɛ etena, ata ate: “Dimi Jehowa layosala dikambo sɔ lo wodja ɔnɛ loyi.”

6 La wedi a pindju, Jehowa akasale dikambo diakɔ, ko weho tshɛ wa dongalonga dia l’Edjibito diakatatɛ mvɔ.+ Koko ndooko elongalonga k’ase Isariyɛlɛ kakavu. 7 Lam’akambola Farawɔ, wakawotɛ dia ndooko kaanga elongalonga 1 k’ose Isariyɛlɛ kakavu. Koko Farawɔ akatetemala nkeketsha otema ndo nde kokimɔ ase Isariyɛlɛ.+

8 Oma laasɔ, Jehowa akatɛ Mɔsɛ nde la Arɔna ate: “Nyolodia otoko w’oma l’atshuka l’anya anyu kele Mɔsɛ koke otoko akɔ otsha l’olongo la ntondo ka Farawɔ. 9 Ko vɔ wayokadimɔ ditshu, wayokokanɛ lo wodja w’Edjibito w’otondo ndo wayosala dia anto la nyama monga la atshutshu watondɔtondɔ lo wodja w’Edjibito w’otondo.”

10 Ko vɔ wakɔshi otoko w’oma l’atshuka, wakatemala la wɔ la ntondo ka Farawɔ ndo Mɔsɛ akawokɛ otsha l’olongo, ko vɔ wakakadimɔ atshutshu wakatondɔka l’alemba w’anto ndo wa nyama. 11 Ɛlɔmbɛdi wakasalaka awui wa maji kokoka memala la ntondo ka Mɔsɛ, nɛ dia ɛlɔmbɛdi wakasalaka awui wa maji ndo ase Edjibito tshɛ+ wakade atshutshu. 12 Koko Jehowa akatshike dia Farawɔ nkeketsha otema, ko Farawɔ kombahokamɛ, oko wakatɛ Jehowa Mɔsɛ.+

13 Oma laasɔ, Jehowa akatɛ Mɔsɛ ate: “Ketɔ la pindju ka pɛɛ kele kotemale la ntondo ka Farawɔ kele kowote wate: ‘Jehowa Nzambi k’ase Hɛbɛru kata ate: “Kimɔ anto ami dia vɔ tonkambɛ. 14 Nɛ dia oma ko kakianɛ, dimi layanga kotomɛ wɛ l’ekambi ayɛ l’anto ayɛ asui dia wɛ mbeya dia ndooko onto lɛdimi la mi lo nkɛtɛ k’otondo.+ 15 Nɛ dia otondongaka lakasembola lonya lami dia kɔkɔmɔla wɛ l’anto ayɛ lo nyotomɛ mpokoso ka wolo, tshike wɛ amboshishɔka* oma la nkɛtɛ. 16 Koko l’ɔtɛ wa dikambo nɛ mbakamakotshike la lɔsɛnɔ: Dia kɛnya wolo ami ndo dia lokombo lami mbewoyama lo nkɛtɛ k’otondo.+ 17 Onde wɛ ekɔ lo ntetemala salɛ anto ami akambo la lotamanya tshɛ lo ntona dia mbakimɔ? 18 Dimi layɔlɔsha mvula ka mbɔkɔ ya weke loyi lo wonya wa nganɛ woho wahatasalemaka ndooko lushi lo wodja w’Edjibito. 19 Ɔnkɔnɛ, toma dui dia vɔ todja dongalonga diayɛ tshɛ ndo diangɔ diayɛ tshɛ diele l’oswe lo dihole di’ekokelo. Onto tshɛ kana nyama tshɛ kele l’oswe kahatɔtɔ lo luudu ayovɔ lam’ayowakwɛka mbɔkɔ yakɔ.”’”

20 Ko okambi wa Farawɔ tshɛ wakoke ɔtɛkɛta wa Jehowa wɔma akɔtshiya ekambi ande la dongalonga diande lo luudu aha la ntshimbatshimba. 21 Koko onto tshɛ laki kokitanyiya ɔtɛkɛta wa Jehowa akatshike ekambi ande la dongalonga diande l’oswe.

22 Oma laasɔ, Jehowa akatɛ Mɔsɛ ate: “Edia lonya layɛ otsha l’olongo kele mbɔkɔ yakite lo wodja w’Edjibito w’otondo.+ Yɔ yakwɛ anto la nyama ndo tombatomba tshɛ diele lo wodja w’Edjibito.”+ 23 Mɔsɛ akedia danga diande otsha l’olongo, ko Jehowa akatome akungola ndo mbɔkɔ ndo dja* yakakɔka la nkɛtɛ, ko Jehowa akatshike dia mbɔkɔ yakɔ ndɔ oko mvula lo wodja w’Edjibito. 24 Mbɔkɔ yakakitaka ndo angadimu wa dja waki l’atei wa mbɔkɔ yakɔ. Mbɔkɔ yakɔ yaki wetsho wa mamba. Mbɔkɔ ya ngasɔ yatayalaka ndooko lushi lo wodja w’Edjibito ntatɛ lam’akawayala wodja.+ 25 Mbɔkɔ yakɔ yakatɛtaka ɛngɔ tshɛ kaki l’oswe lo wodja w’Edjibito w’otondo, oyadi anto kana nyama. Yɔ yakatɛtaka ndo tombatomba tshɛ, ko yakawɛdiawɛdia esongo tshɛ.+ 26 Paka lo ɛtshi ka nkɛtɛ ka Ngɔshɛnɛ, lɛnɛ aki ase Isariyɛlɛ mbele mbɔkɔ shɔ kokita.+

27 Ko Farawɔ akatome dui le Mɔsɛ nde la Arɔna dia towatɛ ɔnɛ: “Mbala kɛnɛ dimi kambosala pɛkato. Jehowa kambɔsɔ ndo dimi l’anto ami tambondja. 28 Nyɔsɛngɛsɛngɛ Jehowa kele akungola ndo mbɔkɔ yakome. Oma laasɔ, dimi layetawɔ nyokimɔ ndo hanyototshikala edja nto lanɛ.” 29 Ko Mɔsɛ akawotɛ ate: “Kam’ayomotomba l’andja w’osomba, dimi layemɛ anya ami dia nɔmba Jehowa. Akungola wayoshila ndo mbɔkɔ hayotokita nto, dia wɛ mbeya wate Jehowa mbakanga nkɛtɛ.+ 30 Koko dimi mbeyaka dia polo ndo laasɔ, wɛ la ekambi ayɛ hanyotoka Jehowa Nzambi wɔma.”

31 Linɛnɛ* la asami wakalanyema l’etena kɛsɔ, nɛ dia laasɔ ko asami wambodja nɔnɔ ndo linɛnɛ lambotondja alɛmbɔlɛmbɔ. 32 Koko eponga la waanya kondanyema, nɛ dia l’etena kɛsɔ ko weke totshitshɛ.* 33 Ko Mɔsɛ akatombe oma lale Farawɔ ndo oma l’osomba, akemɛ anya ande dia nɔmba Jehowa, ko akungola wakashile, mbɔkɔ yakakɔka yakakomɛ ndo mvula kakahembɔ.+ 34 Lam’akɛnyi Farawɔ dia mvula kambohembɔ ndo mbɔkɔ la akungola wamboshila, nde akasale pɛkato nto lo nkeketsha otema ande+ nde la ekambi ande. 35 Farawɔ akatetemala nkeketsha otema ndo nde kokimɔ ase Isariyɛlɛ dia vɔ ntshɔ, oko wakate Jehowa lo tshimbo ya Mɔsɛ.+

10 Oma laasɔ Jehowa akatɛ Mɔsɛ ate: “Tshɔka le Farawɔ, nɛ dia dimi lambotshika dia otema ande ndo etema w’ekambi ande monga lonyu,+ la oyango wa dimi nsala ahindo ami anɛ la ntondo kande,+ 2 dia nyu ndjotɛka ananyu la ekana anyu alanya wa wolo wamomosha ase Edjibito ndo ahindo wamomosala l’atei awɔ,+ ko nyayeya mɛtɛ dia dimi kele Jehowa.”

3 Ko Mɔsɛ nde la Arɔna wakatshu le Farawɔ ndo wakatowotɛ vate: “Jehowa Nzambi k’ase Hɛbɛru kata ate: ‘Polo l’etena kakɔna kayoyotona ndjakitshakitsha la ntondo kami?+ Kimɔ anto ami dia vɔ tonkambɛ. 4 Nɛ dia naka wɛ ntetemala ntona dia nkimɔ anto ami, dimi layotoma akata w’ɛndjɔ loyi lo wodja ayɛ w’otondo. 5 Ko vɔ wayokomba nkɛtɛ ndo onto hatokoka mɛna nkɛtɛ. Vɔ wayɔlɛ diangɔ dianyu diakatshikala diele mbɔkɔ kodilanya ndo vɔ wayɔlɛ esongo anyu tshɛ wayole l’okonda.+ 6 Vɔ wayololanɛ lo mvudu yayɛ, lo mvudu y’ekambi ayɛ ndo lo mvudu y’ase Edjibito tshɛ woho wele washɔ ndo watshɛyɛ kɔmɛna ndooko lushi oma ko lushi lakatɔngɔ wodja ɔnɛ polo ndo ɛlɔ.’”+ Ko nde akakadimɔ ndo akamɔ oma lale Farawɔ.

7 Oma laasɔ, ekambi wa Farawɔ wakawotɛ vate: “Edja ndo etena kakɔna kayotetemala pami kɛnɛ tanɛ?* Kimɔ anto anɛ watokambe Jehowa Nzambi kawɔ. Onde wɛ hɛnyi dia wodja w’Edjibito wambolanyema?” 8 Ko wakelɛ Mɔsɛ nde la Arɔna dia vɔ nkalola le Farawɔ ko nde akawatɛ ate: “Nyotshu, nyotokambe Jehowa Nzambi kanyu. Ko waa na mɛtɛ watatshu?” 9 Mɔsɛ akate ate: “Sho tayotshɔ kaamɛ la anaso w’akɛnda, esombe aso, anaso w’apami, anaso wa wamato, ɛkɔkɔ aso ndo ngɔmbɛ yaso,+ nɛ dia tayotosalɛ Jehowa fɛtɛ.”+ 10 Farawɔ akawatɛ ate: “Naka dimi nyokimɔ dia nyu ntshɔ kaamɛ la ananyu, kete wate mɛtɛ Jehowa ekɔ kaamɛ la nyu!+ Mɛnamaka hwe dia nyekɔ lo nanga nsala dui dimɔtshi dia kɔlɔ. 11 Keema! Apami anyu ato mbakoka ntshɔ dia tokambɛ Jehowa, nɛ dia kɛsɔ mbakanyalɔmbɛ.” Ko wakaatondja oma lale Farawɔ.

12 Oma laasɔ Jehowa akatɛ Mɔsɛ ate: “Sembola lonya layɛ otsha lo wodja w’Edjibito kele akata w’ɛndjɔ wayale lo wodja w’Edjibito, wale tombatomba tshɛ diele lo wodja ndo ɛngɔ tshɛ kakahandɔ oma lo mvula ka mbɔkɔ.” 13 Mbala kakɔ ɔtɔi, Mɔsɛ akatshume danga diande otsha lo wodja w’Edjibito, ko Jehowa akasale dia lɔpɛpɛ l’oma lo ɛstɛ mpɛpa lo wodja akɔ yanyi y’otondo la otsho w’otondo. La wedi a pindju, lɔpɛpɛ l’oma lo ɛstɛ lakela akata w’ɛndjɔ. 14 Ko akata w’ɛndjɔ wakalolanɛ lo wodja w’Edjibito w’otondo ndo wakatshikala lo ɛtshi ka nkɛtɛ k’otondo ka wodja w’Edjibito.+ Vɔ waki efula ka mamba+ ndo akata w’ɛndjɔ watongaka efula ka ngasɔ ndooko lushi ndo hawongaki ngasɔ nto pondjo. 15 Vɔ wakakombe nkɛtɛ lo wodja w’otondo ndo wodjima wakayala lo wodja l’ɔtɛ awɔ. Vɔ wakalɛka tombatomba tshɛ diaki lo wodja ndo elowa tshɛ waki l’esongo wakatshikala oma lo mvula ka mbɔkɔ. Ndooko dikatshi diakatshikala l’esongo kana lo tombatomba diaki lo wodja w’Edjibito w’otondo.

16 Ko Farawɔ akelɛ Mɔsɛ nde la Arɔna esadi eto ndo akate ate: “Dimi lambonyosalɛ nyu la Jehowa Nzambi kanyu pɛkato nto. 17 Lam’alanganyu, nyonimanyiya pɛkato kami kaanga mbala kɛnɛ keto ndo nyɔsɛngɛsɛngɛ Jehowa Nzambi kanyu dia nde minyɛmi sui nɛ.” 18 Ko nde* akamɔ oma lale Farawɔ ndo akatɔsɛngasɛnga Jehowa.+ 19 Oma laasɔ, Jehowa akasale dia lɔpɛpɛ mpɛpa, ko lɔpɛpɛ la wolo l’oma lo owɛstɛ lakapɛpɛ ndo lakɛmbɛ akata w’ɛndjɔ, ko lakatowadjaka lo Ndjale ka Beela. Ndooko dikata di’ɔndjɔ diakatshikala lo ɛtshi ka nkɛtɛ k’Edjibito k’otondo. 20 Koko Jehowa akatshike dia Farawɔ nkeketsha otema,+ ko nde kokimɔ ase Isariyɛlɛ.

21 Ko Jehowa akatɛ Mɔsɛ ate: “Edia lonya layɛ otsha l’olongo kele wodjima wonge lo wodja w’Edjibito w’otondo, wodjima wa tshududu wakoka minandema.” 22 Mbala kakɔ ɔtɔi, Mɔsɛ akedia lonya lande otsha l’olongo, ko wodjima wa tshududu wakayala lo wodja w’Edjibito w’otondo l’edja ka nshi 3.+ 23 Anto kɔmɛnanaka lam’asawɔ ndo ndooko onto lakamɔ oma lo dihole diakinde l’edja ka nshi 3, koko ase Isariyɛlɛ tshɛ waki la osase lawakawɔ.+ 24 Ko Farawɔ akelɛ Mɔsɛ ndo akawotɛ ate: “Nyotshu, nyotokambe Jehowa.+ Onyake ɛkɔkɔ anyu la ngɔmbɛ yanyu tsho mbayotshikala. Nyu mbeyaka ntshɔ ndo la ananyu.” 25 Koko Mɔsɛ akate ate: “Wɛmɛ ayotosha ndo diangɔ dia sho tolambola elambo ndo elambo wa lotshumba dia sho tolambola Jehowa Nzambi kaso.+ 26 Tayotshɔ ndo la dongalonga diaso. Ndooko nyama kayotshikala, nɛ dia tayotokamba la mɔtshi l’atei ayɔ dia ntɛmɔla Jehowa Nzambi kaso ndo sho hateye kɛnɛ kayototolambola dia ntɛmɔla Jehowa, paka tambokoma lɛkɔ.” 27 Jehowa akatshike dia Farawɔ nkeketsha otema, ko nde kombetawɔ mbakimɔ.+ 28 Ɔnkɔnɛ Farawɔ akatɛ Mɔsɛ ate: “Omimwe lango. Sala tshɛ diaha wɛ nyanga dia mɛna elungi kami nto, nɛ dia lushi layoyɛna elungi kami, wɛ ayovɔ.” 29 Ko Mɔsɛ akate ate: “Lam’ele wɛ ambota ngasɔ, dimi hantoyanga dia mɛna elungi kayɛ nto.”

11 Ko Jehowa akatɛ Mɔsɛ ate: “Dimi layanga tomɛ Farawɔ nde l’ase Edjibito sui dikina nto. L’ɔkɔngɔ wa laasɔ mbayondonyokimɔ dia nyu mimɔ oma lanɛ.+ Lam’ayondonyokimɔ, nde ayonyotshanya lotshanya oma lanɛ.+ 2 Ɔnkɔnɛ, tɛ wodja dia apami tshɛ ndo wamato tshɛ pombaka nɔmba asukanyi awɔ diangɔ dia mfɛsa ndo dia paonyi.”+ 3 Ko Jehowa akahomuya anto ande lokolo l’ɔlɔ lo washo w’ase Edjibito. Mɔsɛ nde lawɔ akɔsamaka la nɛmɔ di’efula lo wodja w’Edjibito, le ekambi wa Farawɔ ndo le ase Isariyɛlɛ.

4 Mɔsɛ akate ate: “Jehowa kata ate: ‘Oya lo midi k’otsho dimi layeteta lo wodja w’Edjibito,+ 5 ko ɔna tshɛ l’enondo la lo wodja w’Edjibito ayovɔ,+ ntatɛ oma le ɔna l’enondo laki Farawɔ kodjashi lo kiti kande ka lowandji polo le ɔna l’enondo laki mfumbe ka womoto kahɛla lo dive di’ɔhɛlɔ dia l’anya. Ndo ana wa nondo tshɛ wa dongalonga wayovɔ.+ 6 Ekoko w’alelo wa wolo wayonga lo wodja w’Edjibito w’otondo woho wahatongaka ndo woho wahongaki nto pondjo.+ 7 Koko le ase Isariyɛlɛ, ndooko kaanga mfɔ kayawana,* oyadi anto kana nyama, dia nyu mbeya dia Jehowa kokaka nsala otshikitanu lam’asa ase Edjibito l’ase Isariyɛlɛ.’+ 8 Ekambi ayɛ tshɛ wayoholɔ oya le mi ndo wayonkusamɛ, wata vate: ‘Tshɔka wɛ l’anto ayɛ tshɛ.’ Ko dimi layokoyela.”+ Oma laasɔ, nde akamɔ oma lale Farawɔ ele la nkɛlɛ ka wolo.

9 Oma laasɔ, Jehowa akatɛ Mɔsɛ ate: “Farawɔ hatonyohokamɛ+ dia ahindo ami nyomofula lo wodja w’Edjibito.”+ 10 Mɔsɛ nde la Arɔna wakasale ahindo asɔ tshɛ la ntondo ka Farawɔ.+ Koko Jehowa akatshike dia Farawɔ nkeketsha otema, ko nde kokimɔ ase Isariyɛlɛ dia vɔ ntomba oma lo wodja ande.+

12 Jehowa akatɛ Mɔsɛ nde la Arɔna lo wodja w’Edjibito ate: 2 “Ngɔndɔ kɛnɛ kayonga ngɔndɔ k’etatelo le nyu. Tɔ kayonga ngɔndɔ ka ntondo ka l’ɔnɔnyi le nyu.+ 3 Tɛ olui w’otondo w’ase Isariyɛlɛ wate: ‘Ngɔndɔ kɛnɛ nshi 10, onto l’onto pombaka nyanga ɔkɔkɔ+ dikambo dia luudu la she, ɔkɔkɔ 1 lo luudu la luudu. 4 Naka anto wele lo luudu wekɔ yema tshitshɛ ndo hawotomana ɔkɔkɔ w’otondo, kete vɔ* la asukanyi awɔ pombaka mbokahana lam’asawɔ lo luudu lawɔ, lo ndjela lofulo l’anto.* Etena kayowokahana, kawodje yimba lo yɛdikɔ ya nyama yakoka onto l’onto ndɛ. 5 Vɔ kawoyale ɔsɔngɔ w’ɔkɔkɔ w’omi waha la ɛkɔmɔ+ ndo wele la ɔnɔnyi 1. Nyu mbeyaka nsɔna ɔsɔngɔ w’ɔkɔkɔ kana ɔsɔngɔ wa mbudi. 6 Nyu pombaka mbolama polo ngɔndɔ kɛnɛ+ nshi 14, ko etshumanelo k’otondo k’olui w’ase Isariyɛlɛ wayodiaka ɔkɔkɔ akɔ la tosho ta shimba.*+ 7 Kawɔshi yema ya dikila ko vɔ dikita lo dikundji 2 dia la soko ndo la diko dia soko dia luudu layowɔlɛ ɔkɔkɔ akɔ.+

8 “‘Kawole nyama kakɔ l’otsho ɔsɔ.+ Kawokifumbe lofumba lo dja ko vɔ kilɛ la mapa waha la wodoya+ ndo la akatshi w’ololo.+ 9 Tanyokilɛke kaanga yema oyoyo kana lokatɛ la ashi, koko kanyokifumbe la otondo lo dja, ɔtɛ atɔ, nsanga yatɔ ndo mbo y’etema yatɔ. 10 Tanyetɛke ndooko yema polo la pindju. Ko naka yema mɔtshi yambotshikala polo la pindju, kanyoyitshumbe lo dja.+ 11 Nganɛ mbahombanyu kilɛ: Kanyɔlɔtɛ onto l’onto oya lo lokende, sabata l’ekolo ndo kanyokime onto l’onto danga lo lonya lande. Ndo nto, nyu pombaka kilɛ la shamanya. Ɔsɔ ekɔ Elekanelo ka Jehowa. 12 Nɛ dia dimi layeta lo wodja w’Edjibito w’otondo l’otsho akɔ, ko layodiaka ana tshɛ wa nondo wa lo wodja w’Edjibito, oma le ana w’anto polo le ana wa nyama.+ Ndo dimi layela dilanya le tozambizambi tshɛ ta l’Edjibito.+ Dimi kele Jehowa. 13 Dikila diayonga djembetelo lo mvudu yenyu. Lam’ayomɛna dikila, dimi layonyolekana, ko dilanya hadiotokoma le nyu dia nyodiaka etena kayomɔkɔmɔla wodja w’Edjibito.+

14 “‘Lushi lakɔ layonga lushi la eohwelo le nyu ndo nyu nyayoliohɔka oko lushi la fɛtɛ ka Jehowa lo nɔnga yanyu tshɛ. Ɔsɔ ayonga didjango dia pondjo dia nyu mbohɔka. 15 L’edja ka nshi 7, nyu nyayɔlɛka mapa waha la wodoya.+ Eelo, lushi la ntondo, kanyonya wodoya oma lo mvudu yanyu nɛ dia onto tshɛ layɔlɛ ɛngɔ kele la wodoya ntatɛ oma lo lushi la ntondo polo lushi la 7, onto* ɔsɔ pombaka ndjakema. 16 Lushi la ntondo, kanyosalake losanganya la woke l’ekila ndo kanyosalake losanganya lokina la woke l’ekila lushi la 7. Ndooko olimu wahomba kambema lo nshi shɔ,+ onyake onto l’onto* nkatɛ kɛnɛ kakokande ndɛ.

17 “‘Kanyosalake Fɛtɛ ka mapa waha la wodoya,+ nɛ dia lushi lɔsɔ mbayomotondja leemba lami l’anto* oma lo wodja w’Edjibito. Kanyohɔke lushi lɔsɔ lo nɔnga yanyu tshɛ oko didjango dia pondjo. 18 Ngɔndɔ ka ntondo nshi 14 la dikɔlɔ mbayonyɔlɛka mapa waha la wodoya polo ngɔndɔ nshi 21 la dikɔlɔ.+ 19 Wodoya hawohombe tanema lo mvudu yanyu l’edja ka nshi 7, nɛ dia naka onto ndɛ ɛngɔ kele la wodoya, oyadi ɔngɛndangɛnda kende kana ose Isariyɛlɛ la lootɔ,+ onto* ɔsɔ pombaka minyɛma oma l’atei w’ase Isariyɛlɛ.+ 20 Hanyohombe ndɛ ɛngɔ tshɛ kele la wodoya. Lo mvudu yanyu tshɛ, nyayɔlɛka mapa waha la wodoya.’”

21 Aha la ntshimbatshimba, Mɔsɛ akelɛ dikumanyi tshɛ dia l’Isariyɛlɛ,+ ko akawatɛ ate: “Nyotshu, onto l’onto atoyange ɛsɔngɔ wa nyama* dikambo dia nkumbo kande, kele kanyodiake nyama k’olambo w’Elekanelo. 22 Oma laasɔ, kanyɔshi tshahetahe ya diyo dia izɔpɛ, ko nyu ntambiya lo dikila diayonyodja lo dɔnga ko nyu nkita dikila la diko dia soko ndo lo dikundji 2 dia la soko. Ndooko onto l’atei anyu lahomba ntomba oma lo luudu lande polo la pindju. 23 Laasɔ lam’ayeteta Jehowa dia mbela mpokoso le ase Edjibito, nde ayɛna dikila la diko dia soko ndo lo dikundji 2 dia la soko, ko aha la taamu Jehowa ayolekana soko diakɔ ndo nde hatetawɔ mpokoso ka nyɔi* mbɔtɔ lo mvudu yanyu.+

24 “Kanyosalake dikambo sɔ oko didjango dia pondjo le nyu ndo le ananyu.+ 25 Lam’ayonyokoma lo nkɛtɛ yayonyosha Jehowa oko wakandate, kanyotetemalake nsala dikambo nɛ.+ 26 Lam’ayonyombola ananyu vate: ‘Dikambo diasalanyu nɛ alembetshiyadiɔ?’+ 27 Kanyowate nyate: ‘Ɔnɛ ekɔ olambo w’Elekanelo dikambo dia Jehowa lakalekana mvudu y’ase Isariyɛlɛ l’Edjibito etena kakandela mpokoso le ase Edjibito, ko nde akalekana mvudu yaso.’”

Ko wodja wakakɔlama ndo wakakusama. 28 Ase Isariyɛlɛ wakatshu ko wakatosala oko wakadjangɛ Jehowa Mɔsɛ nde la Arɔna.+ Vɔ wakasale kɛnɛ kakandawatɛ tshɛ lo tshɛ.

29 Oma laasɔ la midi k’otsho, Jehowa akadiake ana wa nondo tshɛ wa lo wodja w’Edjibito,+ ntatɛ oma le ɔna l’enondo laki Farawɔ lakadjasɛka lo kiti kande ka lowandji polo le ɔna l’enondo laki mfumbe kaki lo lokanu,* mbidja ndo ana wa nondo wa nyama.+ 30 Farawɔ aketɔ l’otsho akɔ kaamɛ la ekambi ande tshɛ ndo ase Edjibito akina tshɛ, ko ekoko w’alelo wa wolo wakayala l’Edjibito, nɛ dia ndooko luudu laki komonga la odo.+ 31 Ɔnkɔnɛ, nde akelɛ Mɔsɛ nde la Arɔna+ l’otsho akɔ ko akawatɛ ate: “Nyonee, nyotombe oma lo wodja ami nyu l’ase Isariyɛlɛ akina. Nyotshu nyotokambe Jehowa oko wakanyate.+ 32 Nyɔshi ndo ɛkɔkɔ anyu la ngɔmbɛ yanyu, kele nyotshu oko wakanyate.+ Koko nyu pombaka tantshɔkɔdi.”

33 Ko ase Edjibito wakatatɛ ntshutshuya ase Isariyɛlɛ dia vɔ ntomba oma lo wodja awɔ aha la ntshimbatshimba,+ nɛ dia vɔ wakate vate: “Sho tshɛ taya oko anto wambovɔ!”+ 34 Ɔnkɔnɛ, ase Isariyɛlɛ wakadje ofushi awɔ wa lɔsɔha lo diangɔ diatowɔsɔhaka* la ntondo ka vɔ mbida, ko wakɔmbɛ la ahɔndɔ awɔ ndo wakɛmbɛ lo ahɛka. 35 Ase Isariyɛlɛ wakasale kɛnɛ kakawatɛ Mɔsɛ ndo vɔ wakalɔmbɛ ase Edjibito diangɔ dia mfɛsa, dia paonyi ndo ahɔndɔ.+ 36 Jehowa akahomuya ase Isariyɛlɛ lokolo l’ɔlɔ lo washo w’ase Edjibito, ɔnkɔnɛ vɔ wakawasha kɛnɛ kakawaalɔmbɛ. Ngasɔ mbakawatshu la ɛngɔnyi w’ase Edjibito.+

37 Oma laasɔ, ase Isariyɛlɛ wakonɛɛ oma la Ramɛsɛ+ otsha la Sukɔta.+ Vɔ waki apami oko nunu nkama shamalo (600 000) wakatakɛndakɛndaka l’ekolo, aha la mbadia ana.+ 38 Ko anto akina efula wakasɔhana*+ la wɔ ndo wakatshu kaamɛ la wɔ, mbidja ndo ɛkɔkɔ la ngɔmbɛ, mbuta ate leemba la woke la dongalonga. 39 Vɔ wakatatɛ nkatɛ mapa w’ebolonga waha la wodoya la ofushi wa lɔsɔha wakaye la wɔ oma l’Edjibito. Vɔ komonga la wodoya nɛ dia wakawatshanya oma l’Edjibito la shashimoya, diakɔ diele vɔ kɔnɔngɔsɔla mpamba ya talɛka lo mboka lo dikambo diawɔ vɔamɛ.+

40 Ase Isariyɛlɛ wakadjasɛ l’Edjibito+ ɛnɔnyi 430.+ 41 L’ekomelo k’ɛnɔnyi 430, ko lushi lɔsɔ, nyemba tshɛ y’anto* wa Jehowa yakatombe oma lo wodja w’Edjibito. 42 Ɔsɔ ekɔ otsho wayowohɔka woho wakaatondja Jehowa oma lo wodja w’Edjibito. Ase Isariyɛlɛ tshɛ lo nɔnga yawɔ tshɛ+ wayohɔka otsho ɔsɔ lo dikambo dia Jehowa.

43 Oma laasɔ, Jehowa akatɛ Mɔsɛ nde la Arɔna ate: “Didjango diendana la fɛtɛ k’Elekanelo dɔ nɛ: Ndooko ɔngɛndangɛnda wahomba ndɛ nyama k’olambo w’Elekanelo.+ 44 Ko naka onto ɔmɔtshi ekɔ la mfumbe kakandasombe la falanga, kete nyu pombaka mbonya mpota.+ Oma laasɔ mbakokande ndjokilɛ. 45 Ose wodja okina ndo ose olimu hakoke kilɛ. 46 Lo luudu 1 mbahombatɔ ndɛmaka. Hanyohombe ntondja kaanga munyi l’andja ndo hanyohombe ntɛta weka atɔ.+ 47 Olui w’ase Isariyɛlɛ tshɛ pombaka nsala fɛtɛ kɛsɔ. 48 Naka ɔngɛndangɛnda ɔmɔtshi wodjashi kaamɛ lanyu nangaka nsala fɛtɛ k’Elekanelo dikambo dia Jehowa, kete apami tshɛ wa lo luudu lande pombaka minya mpota. Oma laasɔ mbakokande ndja dia ndjokisala ndo nde ayonga oko ose Isariyɛlɛ la lootɔ. Koko ndooko pami kahatanya mpota kakoka kilɛ.+ 49 Ɔlɛmbɛ akɔ waamɛ mbayokambemaka le akanga wa ngelo ndo le ɔngɛndangɛnda wodjashi l’atei anyu.”+

50 Ko ase Isariyɛlɛ tshɛ wakasale oko wakatɛ Jehowa Mɔsɛ nde la Arɔna. Vɔ wakasale kɛnɛ kakandawatɛ tshɛ lo tshɛ. 51 Paka lushi lɔsɔ mbakatondja Jehowa ase Isariyɛlɛ kaamɛ la nyemba yawɔ y’anto* oma lo wodja w’Edjibito.

13 Jehowa akatɛ Mɔsɛ nto ate: 2 “Kidia* ana wa nondo w’apami* tshɛ w’ase Isariyɛlɛ dikambo diami. Ɔna pami tshɛ lootɔ ntondo, kana nyama tshɛ k’omi kotɔ ntondo kekɔ kakimi.”+

3 Ko Mɔsɛ akatɛ wodja ate: “Nyohɔke lushi lɔnɛ lambonyotomba oma l’Edjibito,+ oma lo luudu la lɔhɔmbɔ, nɛ dia la lonya la wolo kambonyotondja Jehowa oma lo dihole nɛ.+ Ɔnkɔnɛ tanyɔlɛke ndooko ɛngɔ kele la wodoya. 4 Nyu nyambotomba lushi l’ɛlɔ lo ngɔndɔ ka Abiba.*+ 5 Lam’ayonyokonya Jehowa lo nkɛtɛ y’ase Kanana, y’ase Hiti, y’ase Amɔra, y’ase Hivi ndo y’ase Jɛbusɛ+ yakandatshibɛ watshɛnyu dia nyosha,+ nkɛtɛ yakɛlanɛ abɛlɛ la osanga,+ kanyosalake fɛtɛ kɛnɛ lo ngɔndɔ kɛnɛ. 6 L’edja ka nshi 7 nyayɔlɛka mapa+ waha la wodoya, ndo lushi la 7 fɛtɛ kayosalemaka dikambo dia Jehowa. 7 Nyayɔlɛka mapa waha la wodoya l’edja ka nshi 7.+ Ndooko ɛngɔ kele la wodoya kahomba tanema le nyu+ ndo wodoya hawohombe tanema le nyu lo ɛtshi kanyu ka nkɛtɛ* k’otondo. 8 Kanyote ananyu lushi lakɔ nyate: ‘Tekɔ lo nsala fɛtɛ kɛnɛ l’ɔtɛ wa kɛnɛ kakatosalɛ Jehowa etena kakatatombe oma l’Edjibito.’+ 9 Tɔ kayonga oko djembetelo le nyu lo anya anyu ndo oko eohwelo* lo ekoko*+ anyu, dia ɛlɛmbɛ wa Jehowa monga lo enyɔ anyu, nɛ dia Jehowa akanyotondja oma l’Edjibito la lonya la wolo. 10 Kanyokitanyiyake didjango sɔ l’etena kadiɔ kakashikikɛma ɔnɔnyi l’ɔnɔnyi.+

11 “Lam’ayonyɔtɔla Jehowa lo wodja wa Kanana wakandatshibe dia nyosha nyu la watshɛnyu,+ 12 kanyoshake Jehowa ɔna pami tshɛ l’enondo,* mbidja ndo yata nkondo tshɛ y’omi ya nyama yele la nyu. Waomi wekɔ waki Jehowa.+ 13 Kanyokimɔke ɔkɔkɔ dia ntshungola mponda kotɔ ntondo. Ko naka hanyokitshungodi, ko nyu kiɔkɔla nkingo. Ndo nyu pombaka ntshungola+ ana w’apami wa nondo tshɛ w’ananyu.

14 “Ko naka ananyu wamboyonyombola vate: ‘Dikambo diasalanyu nɛ alembetshiyadiɔ?’ Kanyowate nyate: ‘Jehowa akatotondja oma l’Edjibito, oma lo luudu la lɔhɔmbɔ+ la lonya la wolo. 15 Etena kakatshininalaka Farawɔ diaha tokimɔ,+ Jehowa akadiake ana wa nondo tshɛ wa lo wodja w’Edjibito, oyadi ana wa nondo w’anto kana wa nyama.+ Diakɔ dialambolaso Jehowa anaso w’apami wa nondo, nyama yaso ya nondo ya waomi,* ndo diakɔ diatshungolaso anaso w’apami wa nondo.’ 16 Dikambo nɛ diayoyala oko djembetelo lo anya anyu ndo oko yɛtshi ya dihɔndɔ yakelekawɔ l’ɔtɛ lo ekoko*+ anyu, nɛ dia Jehowa akatotondja oma l’Edjibito la lonya la wolo.”

17 Lam’akakimɔ Farawɔ ase Isariyɛlɛ, Nzambi kombalɔmbɔla lo mboka k’otsha lo nkɛtɛ y’ase Filistiya kaanga mbakitɔ hiembola, nɛ dia Nzambi akate ate: “Anto mbeyaka ndjotshikitanya kanyi yawɔ lam’ayowɔlɔshama, ko vɔ ndjokalola l’Edjibito.” 18 Ɔnkɔnɛ, Nzambi akaalɔmbɔla dia vɔ mbeta lo mboka k’otsha l’oswe wa shɛnga wele suke la Ndjale ka Beela.+ Ase Isariyɛlɛ wakatombe oma lo wodja w’Edjibito oko elui w’asɔlayi. 19 Mɔsɛ akɔshi ndo weka wa Yɔsɛfu, ko akatshu la wɔ, nɛ dia Yɔsɛfu akatshibia ana w’Isariyɛlɛ ate: “Ndooko onyake Nzambi ayonyodja yimba. Ɔnkɔnɛ kanyɛmbɛ weka ami oma lo dihole nɛ.”+ 20 Vɔ wakonɛɛ oma la Sukɔta ko wakatohanga la Etama l’omamu w’oswe wa shɛnga.

21 Jehowa akatatshɔka la ntondo kawɔ ndo nde akatawalɔmbɔlaka lo mboka+ la yanyi lo ekundji ka dinge ndo l’otsho lo ekundji ka dja dia mbasha osase la oyango wa vɔ ntetemala la lɔkɛndɔ la yanyi ndo l’otsho.+ 22 Ekundji ka dinge komimɔka la ntondo ka wodja la yanyi ndo ekundji ka dja komimɔka l’otsho.+

14 Oma laasɔ, Jehowa akatɛ Mɔsɛ ate: 2 “Tɛ ase Isariyɛlɛ dia vɔ nkalola kele watohange la ntondo ka Pihahirɔtɛ lam’asa Mingidɔlɛ la ndjale, mbɛlanɛ la Baala-Zefɔna.+ Nyotohange l’omamu wa ndjale, mbɛlanɛ la tɔ. 3 Ko Farawɔ ayota lo dikambo di’ase Isariyɛlɛ ate: ‘Vɔ wekɔ lo tekekɔ ndo wambonganɛ. Vɔ hawoyɛna mboka l’oswe wa shɛnga.’ 4 Dimi layotshika dia Farawɔ ntetemala nkeketsha otema+ ndo nde ayonyotshanya, ko dimi layoyatombola lo tshimbo ya Farawɔ la asɔlayi+ ande tshɛ ndo ase Edjibito wayeya mɛtɛ dia dimi kele Jehowa.”+ Ko vɔ wakasale ngasɔ.

5 L’ɔkɔngɔ diko, wakatotɛka nkumekanga k’Edjibito ɔnɛ anto anɛ wambolawɔ. Mbala kakɔ ɔtɔi, Farawɔ la ekambi ande wakatshikitanya kanyi yawɔ lo kɛnɛ kendana la anto+ asɔ, ko wakate vate: “Lande na kambotosala nganɛ ndo kambototshungola ase Isariyɛlɛ diaha vɔ tokambɛ oko mfumbe?” 6 Ko nde akalɔngɔsɔla pusupusu yande ya ta ndo akɔshi asɔlayi ande.+ 7 Oma laasɔ, nde akɔshi pusupusu 600 y’amɛna ndo pusupusu nkina tshɛ ya l’Edjibito kaamɛ la asɔlayi wakatahemaka onto l’onto lo pusupusu. 8 Jehowa akatshike dia Farawɔ, nkumekanga k’Edjibito nkeketsha otema, ko nde akatshanya ase Isariyɛlɛ etena kakatatshɔka ase Isariyɛlɛ aha la mboka wɔma.*+ 9 Ase Edjibito wakawatshanya+ la mfalasa tshɛ ya Farawɔ la pusupusu yayɔ ndo ambahemi wa mfalasa la asɔlayi ande, ko wakatowanda wohangi l’omamu wa ndjale, suke la Pihahirɔtɛ, mbɛlanɛ la Baala-Zefɔna.

10 Lam’akakome Farawɔ suke la wɔ, ase Isariyɛlɛ wakende, ko wakɛnyi ase Edjibito wayaayele. Ase Isariyɛlɛ wakoke wɔma ndo wakatatɛ ndelɛ Jehowa.+ 11 Vɔ wakatɛ Mɔsɛ vate: “Onde laasɔ waombo bu l’Edjibito kamboyotela lanɛ dia sho ndjovɔ l’oswe wa shɛnga?+ Lande na kamboyotosalɛ nganɛ lo totondja oma l’Edjibito? 12 Shi dikambo nɛ mbakatakotɛka l’Edjibito shate: ‘Ototshike tokambe ase Edjibito’? Nɛ dia ndeka dimɛna sho kambɛ ase Edjibito lo dihole dia sho ndjovɔ l’oswe wa shɛnga.”+ 13 Ko Mɔsɛ akatɛ wodja ate: “Tanyokake wɔma!+ Nyemale ki kele nyende panda ka Jehowa kayangande nyosha ɛlɔ.+ Dikambo ase Edjibito wɛnanyu ɛlɔ anɛ, hanyotowaɛna nto pondjo.+ 14 Jehowa ndamɛ ayonyɔlwɛ ta,+ ko nyu nyayotshikala tsho ki.”

15 Ko Jehowa akatɛ Mɔsɛ ate: “Lande na kandelɛyɛ? Tɛ ase Isariyɛlɛ watetemale la lɔkɛndɔ. 16 Onyiya danga diayɛ ndo sembola lonya layɛ otsha lo ndjale, kele ashi wakakitɔne dia ase Isariyɛlɛ mbeta l’atei wa ndjale lo nkɛtɛ y’ofumbo. 17 Koko dimi lo wedi ami, lekɔ lo ntshika dia ase Edjibito nkeketsha etema awɔ dia vɔ ndjelana la wɔ dia dimi ndjatombola lo tshimbo ya Farawɔ, y’asɔlayi ande, ya pusupusu yande ya ta ndo ambahemi ande wa mfalasa.+ 18 Ko ase Edjibito wayeya mɛtɛ dia dimi kele Jehowa etena kayomoyatombola lo tshimbo ya Farawɔ, ya pusupusu yande ya ta ndo ambahemi ande wa mfalasa.”+

19 Oma laasɔ, ondjelo wa Nzambi ka mɛtɛ+ wakatatshɔka la ntondo k’ase Isariyɛlɛ akamɔ oma la ntondo, ko akatshu l’ɔkɔngɔ awɔ ndo ekundji ka dinge kaki la ntondo kawɔ kakamɔ la ntondo, ko kakatemala l’ɔkɔngɔ awɔ.+ 20 Tɔ kakemala lam’asa ase Edjibito l’ase Isariyɛlɛ.+ Lo wedi ɔmɔtshi, tɔ kaki dinge dia wodjima ndo lo wedi okina, tɔ kaki osase wakahɛtaka l’otsho.+ Ko ase Edjibito kokoka nsukana l’ase Isariyɛlɛ otsho w’otondo.

21 Mɔsɛ akasembola lonya lande laadiko dia ndjale.+ Ko Jehowa akatome lɔpɛpɛ la wolo l’oma lo ɛstɛ otsho w’otondo, ko ashi wa ndjale wakatɔna l’ahende,+ ko dihole diaki ashi wa ndjale diakayala nkɛtɛ y’ofumbo+. 22 Ase Isariyɛlɛ wakete l’atei wa ndjale lo nkɛtɛ y’ofumbo+ etena kakemala ashi oko ehele lo lonya lawɔ l’omi ndo lo lonya lawɔ la lɔmɔsɔ.+ 23 Ase Edjibito wakaayele kaamɛ la mfalasa tshɛ ya Farawɔ la pusupusu yande ya ta ndo ambahemi ande wa mfalasa wakaayele l’atei wa ndjale.+ 24 Wonya aya suke la mpotɔ,* Jehowa akende mpango k’ase Edjibito oma lo ekundji ka dja ndo ka dinge,+ ko nde akadje mpango k’ase Edjibito lo lofunge. 25 Nde akongolaka etshimbi wa pusupusu yawɔ, ko vɔ wakatayikɛndjakɛndjaka la okakatanu w’efula. Ase Edjibito wakate vate: “Nyɛsɔ tolawɔ oma lale ase Isariyɛlɛ, nɛ dia Jehowa ekɔ lo wedi awɔ dia ndɔsha ase Edjibito.”+

26 Ko Jehowa akatɛ Mɔsɛ ate: “Sembola lonya layɛ laadiko dia ndjale dia ashi mimbwɛ ase Edjibito la pusupusu yawɔ ya ta ndo ambahemi awɔ wa mfalasa.” 27 Mbala kakɔ ɔtɔi, Mɔsɛ akasembola lonya lande laadiko dia ndjale, ko lam’aki wonya suke la mpotɔ, ndjale kakakalola woho wakitɔ ntondo. Lam’akatalawɔka ase Edjibito, Jehowa akadindja ase Edjibito l’atei wa ndjale.+ 28 Ashi wakakukumɛ pusupusu ya ta, ambahemi wa mfalasa ndo asɔlayi tshɛ wa Farawɔ wakayele ase Isariyɛlɛ+ lo ndjale. Ndooko kaanga ɔtɔi l’atei awɔ lakatshikala la lɔsɛnɔ.+

29 Ase Isariyɛlɛ wakakɛndakɛnda lo nkɛtɛ y’ofumbo l’atei wa ndjale+ ndo ashi wakemala oko ehele lo lonya lawɔ l’omi ndo lo lonya lawɔ la lɔmɔsɔ.+ 30 Ɔnkɔnɛ lushi lɔsɔ, Jehowa akashimbɛ ase Isariyɛlɛ oma l’anya w’ase Edjibito+ ndo ase Isariyɛlɛ wakɛnyi edo w’ase Edjibito l’omamu wa ndjale. 31 Ndo nto, ase Isariyɛlɛ wakɛnyi wolo w’efula* wakakambe la Jehowa otsha le ase Edjibito, ko wodja wakatatɛ mboka Jehowa wɔma ndo wakonge la mbetawɔ le Jehowa ndo le okambi ande Mɔsɛ.+

15 L’etena kɛsɔ, Mɔsɛ nde l’ase Isariyɛlɛ wakembɛ Jehowa+ osambo ɔnɛ:

“Dimi layembɛ Jehowa, nɛ dia nde ambodja otshumba la lotombo.+

Nde ambodindja mfalasa la ombahemi atɔ lo ndjale.+

 2 Jah* kele wolo ami la nkudu kami, nɛ dia nde kele panda kami.+

Nde kele Nzambi kami, dimi layowotombolaka.+ Nde kele Nzambi ka shɔmi,+ ndo dimi layowandolaka.+

 3 Jehowa ekɔ ɔndɔshi wa ta wa wolo.+ Jehowa kele lokombo lande.+

 5 Ashi wambɔmbɔ wambaakukumɛ. Vɔ wambodinda lo dingunda oko dive.+

Ashi wambɔmbɔ wakakami l’atei wa ndjale.

 9 Otunyi akate ate: ‘Layowatshanya! Layowanda!

Layɔsa diangɔ dia dimbo polo lam’ayomohekɔ!*

Layɔsɔmɔla lokuwa lami la ta! Lonya lami layowalanya!’+

11 Jehowa+ le, jambizambi yakɔna yɛdimi la yɛ?

Ɛdimi la yɛ, wɛ lɛnya ekila kayɛ lo yɛdikɔ y’efula?+

Wɛ lahomba mbokama wɔma la esambo wa lotombo, wɛ lasala akambo wa mamba.+

12 Wɛ akasembodi lonya layɛ l’omi, ko nkɛtɛ yakaamɛnyi.+

Ase Kanana tshɛ wayatɛ asolo.+

16 Vɔ+ wayondama la wɔma ndo la sase.

18 Jehowa ayongaka nkumekanga pondjo pondjo.+

20 Miriyama laki omvutshi wa womoto ndo kadiyɔ aki Arɔna akahome ngɔmɔ la anya ande ndo wamato tshɛ wakooyele wayahome ngɔmɔ ndo wayanɔ lokombe. 21 Ko Miriyama akaakolaka osambo wakembaka apami, ata ate:

“Nyembee Jehowa, nɛ dia nde ambodja otshumba la lotombo.+

Nde ambodindja mfalasa la ombahemi atɔ lo ndjale.”+

22 L’ɔkɔngɔ diko, Mɔsɛ akamɔ nde la ase Isariyɛlɛ oma lo Ndjale ka Beela, ko akatshu la wɔ l’oswe wa Shura ndo wakatshu l’edja ka nshi 3 l’oswe, koko vɔ kɔmɛna ashi. 23 Vɔ wakatokoma la Mara,*+ koko vɔ kokoka nnɔ ashi wa la Mara, nɛ dia ashi akɔ waki ololo. Diakɔ diakandɔlɛ dihole sɔ ɔnɛ Mara. 24 Ko anto wakatatɛ ngunɛngunɛ Mɔsɛ,+ wata vate: “Ayotɔnɔ?” 25 Nde akalelɛ Jehowa,+ ko Jehowa akɔɔlɔmbɔla otsha lo shongosongo mɔtshi. Lam’akandayitambiya lo ashi, ashi wakashile ololo.

Nde akawadjɛ didjango ndo ɔlɛmbɛ laawɔ, ko Nde akawadje l’ohemba.+ 26 Nde akate ate: “Naka wɛ ayohokamɛ dui dia Jehowa Nzambi kayɛ tshɛ lo tshɛ ndo ayosala kɛnɛ kele ɔlɔlɔ lo washo ande, ayodja yimba lo wadjango ande ndo ayokitanyiya ɛlɛmbɛ ande tshɛ,+ kete dimi hantokotatsha ndooko hemɔ kakamatatsha ase Edjibito,+ nɛ dia dimi Jehowa lekɔ ɔkɔnɔdi ayɛ.”+

27 L’ɔkɔngɔ wa laasɔ, vɔ wakakome la Elimɛ, lɛnɛ aki tɛkɔ 12 di’ashi ndo atoko 70. Ko wakahange laawɔ suke la ashi.

16 L’ɔkɔngɔ wa vɔ mimɔ oma la Elimɛ, olui w’otondo w’ase Isariyɛlɛ wakatokomaka l’oswe wa Sinɛ+ wele lam’asa Elimɛ la Sinayi lo ngɔndɔ ka 2 nshi 15 l’ɔkɔngɔ wa vɔ ntomba oma lo wodja w’Edjibito.

2 Ko olui w’otondo w’ase Isariyɛlɛ wakatatɛ ngunɛngunɛ Mɔsɛ nde la Arɔna l’oswe.+ 3 Ase Isariyɛlɛ wakawatɛka vate: “Otoleka dimɛna Jehowa todiaka lo wodja w’Edjibito lɛnɛ akatalɛka onatshi,+ lɛnɛ akatalɛka mbo ya ndɛ ko ndota. Kakianɛ, nyambotela l’oswe ɔnɛ dia nyu ndjodiaka olui w’anto ɔnɛ tshɛ la ndjala.”+

4 Oma laasɔ, Jehowa akatɛ Mɔsɛ ate: “Dimi layanga nyɔkɔshɛka mbo ya ndɛ oma l’olongo,+ ndo lushi la lushi+ onto l’onto kaatombake dia tɔtɔngɔna yɛdikɔ yahombande ndɛ, dia dimi mbadja l’ohemba dia menda kana wayokitanyiya ɛlɛmbɛ ami kana bu.+ 5 Koko lushi la 6,+ etena kayowokatɛka kɛnɛ kayowɔtɔngɔnaka, onto l’onto kakatɛke yɛdikɔ yatondɔtɔngɔnaka nshi+ nkina ndodia lo 2.”

6 Ko Mɔsɛ nde la Arɔna wakatɛ ase Isariyɛlɛ tshɛ vate: “La dikɔlɔ, nyayeya mɛtɛ dia Jehowa mbakanyotondja oma lo wodja w’Edjibito.+ 7 La pindju, nyayɛna lotombo la Jehowa, nɛ dia Jehowa amboka woho woongunɛngunɛnyu. Sho eeso katonyotongunɛngunɛ?” 8 Mɔsɛ akakotsha ate: “Lam’ayonyosha Jehowa onatshi dia nyu ndɛ la dikɔlɔ ndo lam’ayondonyolotsha la mbo ya ndɛ la pindju, nyayɛna dia Jehowa amboka woho woongunɛngunɛnyu. Sho eeso katonyotongunɛngunɛ? Aha sho mbangunɛngunɛnyu, koko Jehowa+ mbangunɛngunɛnyu.”

9 Oma laasɔ, Mɔsɛ akatɛ Arɔna ate: “Tɛ olui w’otondo w’ase Isariyɛlɛ wate: ‘Nyosukane la ntondo ka Jehowa, nɛ dia nde amboka engunungunu anyu.’”+ 10 Kam’akatɛ Arɔna olui w’otondo w’ase Isariyɛlɛ awui asɔ, vɔ wakakadimɔ ko wakɛlɛ otsha l’oswe wa shɛnga. Wɛnyi ko lotombo la Jehowa lambɛnama lo dinge.+

11 Jehowa akatɛ Mɔsɛ nto ate: 12 “Dimi lamboka engunungunu w’ase Isariyɛlɛ.+ Tɛwɔ wate: ‘La tosho ta shimba,* nyayɔlɛ onatshi, ndo la pindju nyayɔlɛ mbo ya ndɛ+ ko ndota, ko nyayeya mɛtɛ dia dimi kele Jehowa Nzambi kanyu.’”+

13 Ɔnkɔnɛ, la dikɔlɔ sɔ tofudu ta toloho takakite ndo takalolanɛ lo mpango.+ La pindju, lɔpɔpɔ lele oko loonge l’ekama lakadinge mpango k’otondo. 14 Lam’akome lɔpɔpɔ lakɔ, tangangɔ ta wɛma tele oko sukadi ya wɛma takɛnama laadiko dia nkɛtɛ ya l’oswe wa shɛnga.+ 15 Lam’akɛnyi ase Isariyɛlɛ tangangɔ takɔ, vɔ wakatatɛ mimbɔna lam’asawɔ vate: “Diangɔ diakɔna nɛ?” Nɛ dia vɔ kodieyaka. Ko Mɔsɛ akawatɛ ate: “Ɔnɛ ekɔ mbo ya ndɛ+ yambonyosha Jehowa dia nyu ndɛ. 16 Jehowa akadjangi ate: ‘Onto l’onto kaatɔngɔnake yɛdikɔ yakokande ndɛ. Onto l’onto kaatɔngɔnake yɛdikɔ ya ɔmɛra*+ 1 lo ndjela lofulo l’anto* wele lo luudu lande la dipɛma.’” 17 Ko ase Isariyɛlɛ wakatatɛ nsala ngasɔ. Vɔ wakatɔngɔna, amɔtshi efula ndo akina yema tshitshɛ. 18 Lam’akawɛdika tangangɔ takɔ lo ɔmɛra, ɔnɛ lakatɔngɔna efula kondekanya yɛdikɔ ndo ɔnɛ lakatɔngɔna yema tshitshɛ komonga tshitshɛ yamboleka.+ Vɔ tshɛ onto l’onto akatɔngɔna yɛdikɔ yakandakoke ndɛ.

19 Oma laasɔ Mɔsɛ akawatɛ ate: “Onto atetɛke ndooko yema polo la wedi a pindju.”+ 20 Koko vɔ kopokamɛ Mɔsɛ. Lam’akatshike anto amɔtshi yema polo la wedi a pindju, tangangɔ takɔ takɔtɔ nkuso ndo takahɔndɛ, ko Mɔsɛ akawaomalɛ. 21 Onto l’onto akahombe tɔngɔnaka la pindju tshɛ yɛdikɔ yakandakoke ndɛ. Etena kakawalɛka yanyi wolo, tangangɔ takɔ takalɛlɔka.

22 Lushi la 6, vɔ wakatɔngɔna yɛdikɔ ya mbo ya ndɛ+ yakɔ ndodia lo 2, mbuta ate onto l’onto ɔmɛra 2. Ko ewandji w’elui tshɛ wakaye ndo wakayotɛ Mɔsɛ dui sɔ. 23 Ko nde akawatɛ ate: “Ngasɔ mbakate Jehowa. Loyi ayonga lushi la momuya keto, sabato k’ekila dikambo dia Jehowa.+ Nyokatɛ kɛnɛ kahombanyu nkatɛ ndo nyɔtɔkutsha kɛnɛ kahombanyu ntɔkutsha+ kele kanyetɛ kɛnɛ tshɛ kayotshikala, kanyombe polo la wedi a pindju.” 24 Ko vɔ wakalame polo la wedi a pindju oko akawatɛ Mɔsɛ, ndo kɛnɛ kakawalame kɔpɔnda ndo kɔmbɔtɔ nkuso. 25 Ko Mɔsɛ akawatɛ ate: “Nyoyile ɛlɔ, nɛ dia ɛlɔ ekɔ sabato dikambo dia Jehowa. Ɛlɔ nyu hanyotoyitana la nkɛtɛ. 26 Nyayoyitɔngɔnaka l’edja ka nshi 6, koko lushi la 7, lushi la Sabato+ yɔ hayotongaka.” 27 Koko lushi la 7, anto amɔtshi wakatombe dia tɔtɔngɔna, ko vɔ kotana ndooko ɛngɔ.

28 Ko Jehowa akatɛ Mɔsɛ ate: “Polo l’etena kakɔna kayotona anto anɛ nkitanyiya wadjango la ɛlɛmbɛ ami?+ 29 Nyeye dia Jehowa ambonyosha lushi la Sabato.+ Diakɔ dianyoshande mbo ya ndɛ ya nshi 2 lushi la 6. Onto tshɛ pombaka ntshikala lɛnɛ eende. Ndooko onto lahomba mimɔ oma lo dihole diende lushi la 7.” 30 Ko anto wakakitanyiya awui wendana la lushi la Sabato* lushi la 7.+

31 Ase Isariyɛlɛ wakɔlɛ mapa ɛsɔ ɔnɛ: “Mana.”* Vɔ waki wɛma oko ntɔngɔ ya totshitshɛ ya wɛma ndo waki mpɛ oko ekate wɔsɔhanyemi la osanga.+ 32 Ko Mɔsɛ akate ate: “Jehowa akadjangi ate: ‘Lodia ɔmɛra 1 dia momba lo nɔnga yanyu tshɛ, dia anto wa lo nɔnga+ yakɔ ndjɛnaka mbo ya ndɛ yakamanyosha l’oswe wa shɛnga dia nyu ndɛ lam’akamanyotondja oma lo wodja w’Edjibito.’” 33 Ɔnkɔnɛ Mɔsɛ akatɛ Arɔna ate: “Ɔsa mbidika ka diwomba kele dja yɛdikɔ ya ɔmɛra 1 ya mana lɔkɔ kele kitshatɔ la ntondo ka Jehowa ndo tɔ kayombama lo nɔnga yanyu tshɛ.”+ 34 Oko wakadjangɛ Jehowa Mɔsɛ, Arɔna akakikitsha la ntondo k’ɔshɛtɛ w’Ɔmɛnyi+ dia tɔ mombama. 35 Ase Isariyɛlɛ wakale mana l’edja k’ɛnɔnyi 40+ polo lam’akawakome lo ɛtshi ka nkɛtɛ kaki anto kombidjasɛ.+ Vɔ wakale mana polo lam’akawakome l’olelo wa wodja wa Kanana.+ 36 Ɔmɛra 1 ekɔ etenyi ka dikumi ɔtɔi ka yɛdikɔ ya efa.*

17 Olui w’otondo w’ase Isariyɛlɛ wakonɛɛ oma l’oswe wa Sinɛ+ ndo wakatatshɔka oma lo dihole dimɔtshi otsha lo dikina oko wakadjanga Jehowa,+ ko wakatohanga la Rɛfidimɛ.+ Koko vɔ komonga la ashi wa nnɔ.

2 Ko anto wakatatɛ mbidjɛ Mɔsɛ+ londjo, wata vate: “Otosha ashi wa nnɔ.” Mɔsɛ akawatɛ ate: “Lande na kambidjɛnyu londjo? Lande na katetemalanyu mbidja Jehowa l’ohemba?”+ 3 Koko anto wakome wodi la mposa k’ashi laawɔ ndo wakatetemala ngunɛngunɛ Mɔsɛ,+ wata vate: “Lande na kakayatotondja oma l’Edjibito dia ndjotodiaka sho la anaso ndo la dongalonga diaso la mposa k’ashi?” 4 Ko Mɔsɛ akalelɛ Jehowa ate: “Ayomosala la anto anɛ? Keema edja vɔ wayomboka ave.”

5 Ɔnkɔnɛ Jehowa akatɛ Mɔsɛ ate: “Eta la ntondo ka wodja ndo ɔsa dikumanyi dimɔtshi dia l’Isariyɛlɛ kaamɛ la danga diayɛ diakayakɔmɔla lo Ɔkɛdi wa Nilɛ.+ Kimɛdiɔ lo lonya kele tshɔka. 6 Dimi layemala la ntondo kayɛ la dive diele la Hɔrɛbɛ.* Kɔkɔmɔlɛ lo dive, ko ashi wayotomba dia anto nnɔ.”+ Mɔsɛ akasale ngasɔ lo washo wa dikumanyi dia l’Isariyɛlɛ. 7 Ko nde akɔlɛ dihole diakɔ ɔnɛ Masa*+ ndo Meriba*+ l’ɔtɛ wa londjo lakawodjɛ ase Isariyɛlɛ ndo nɛ dia vɔ wakadje Jehowa l’ohemba+ lo mbuta ɔnɛ: “Onde Jehowa ekɔ l’atei aso, kana bu?”

8 Oma laasɔ, ase Amalɛka+ wakaye ko wakayɔlɔsha ase Isariyɛlɛ ta la Rɛfidimɛ.+ 9 Ko Mɔsɛ akatɛ Jashua+ ate: “Sɔna apami walangayɛ, kele nyotshu nyotɔlɔsha ase Amalɛka. Loyi dimi layemala lo shɔdi ya dikona lokime danga dia Nzambi ka mɛtɛ lo lonya lami.” 10 Jashua akasale oko wakawotɛ Mɔsɛ+ ndo nde akatɔlɔsha ase Amalɛka. Mɔsɛ, Arɔna la Hura+ wakadɛ lo shɔdi ya dikona.

11 Edja tshɛ kakemɛka Mɔsɛ anya ande l’olongo, ase Isariyɛlɛ wakalɛndjaka. Koko kam’akandaholoyaka anya ande, ase Amalɛka wakalɛndjaka. 12 Lam’akoke Mɔsɛ anya dɔkɔkɔ, vɔ wakɔshi dive ko wakadikitsha lalende, ko nde akadjasɛ lɔkɔ. Ɔnkɔnɛ Arɔna la Hura wakasukɛ anya ande ɔnɛ wedi ɔnɛ, ɔnɛ wedi okina, dia anya ande ntshikala l’olongo polo la dikɔlɔ. 13 Lo nsala ngasɔ, Jashua akalɛndja ase Amalɛka la anto awɔ la tokuwa ta ta.+

14 Ko Jehowa akatɛ Mɔsɛ ate: “Funda awui anɛ lo dibuku dia vɔ mbohɔmaka* ndo nyomowatɛ Jashua wate: ‘Dimi layoshila Amalɛka oshiki woho wahawohɔmaki nto pondjo l’ɛse olongo.’”+ 15 Ko Mɔsɛ akasale elambwelo ndo akakiɔlɛ ɔnɛ Jehowa-Nisi,* 16 ata ate: “Lam’ele lonya lande lekɔ lo ndɔshana la kiti ka lowandji kaki Jah,+ Jehowa ayɔlɔsha Amalɛka lo lɔlɔnga la lɔlɔnga.”+

18 L’etena kɛsɔ, Jɛtɛro laki ɔlɔmbɛdi wa la Midiyana ndo laki okilo+ wa Mɔsɛ akoke akambo tshɛ wakasalɛ Nzambi Mɔsɛ la wodja ande w’Isariyɛlɛ ndo woho wakatondja Jehowa ase Isariyɛlɛ oma l’Edjibito.+ 2 Jɛtɛro okilo wa Mɔsɛ akalongola Zipɔra ka wadi aki Mɔsɛ etena kakandookaloya otsha le nde, 3 kaamɛ la anande 2+ w’apami. Ɔmɔtshi lokombo lande Ngɛrɛshɔmɛ,*+ nɛ dia Mɔsɛ akate ate: “Dimi lekɔ ɔngɛndangɛnda lo wodja ɔnɛ,” 4 ndo okina lokombo lande Eliɛzɛrɛ,* nɛ dia nde akate ate: “Nzambi ka papa kele okimanyedi ami, ɔnɛ lakantshungola oma lo lokuwa la ta+ laki Farawɔ.”

5 Ko Jɛtɛro okilo wa Mɔsɛ akatɔlɛ Mɔsɛ anande la wadɛnde l’oswe lɛnɛ akandahange lo dikona dia Nzambi ka mɛtɛ.+ 6 Nde akatomɛ Mɔsɛ dui ate: “Dimi Jɛtɛro+ okilo ayɛ lamboya le yɛ kaamɛ la wadɛyɛ la anande 2.” 7 Ko Mɔsɛ akatshu dia tolongola okilo ande ko nde akakusama, akashana la nde bizɛ. Vɔ wakambɔna dia mbeya kana wekɔ alemba ki, ko oma laasɔ, wakatshu otsha lo luudu la dipɛma.

8 Mɔsɛ akakɔndɔlɛ okilo ande akambo tshɛ wakasalɛ Jehowa Farawɔ l’ase Edjibito lo wahɔ w’ase Isariyɛlɛ,+ asui tshɛ wakaakomɛ lo mboka+ ndo woho wakaatshungola Jehowa. 9 Jɛtɛro akangɛnangɛna akambo tshɛ w’ɛlɔlɔ wakasalɛ Jehowa ase Isariyɛlɛ lo mbatshungola oma l’Edjibito.* 10 Ko Jɛtɛro akate ate: “Jehowa atombɔme, nde lakanyotshungola oma l’Edjibito ndo oma le Farawɔ. Nde lakatshungola wodja oma lo ɛlɔmbwɛlɔ k’ase Edjibito. 11 Kakianɛ, dimi lambeya dia Jehowa ndeka nzambi+ nkina tshɛ woke l’ɔtɛ wa kɛnɛ kakandasalɛ wanɛ wakasalɛ wodja ande akambo la otako tshɛ.” 12 Ko Jɛtɛro okilo wa Mɔsɛ akela olambo wa lotshumba ndo elambo ekina dia nambola Nzambi. Arɔna nde la dikumanyi tshɛ dia l’Isariyɛlɛ wakaye dia ndjɔlɛ diangɔ kaamɛ la okilo wa Mɔsɛ la ntondo ka Nzambi ka mɛtɛ.

13 La wedi a pindju, Mɔsɛ akadjasɛ oko waki mbekelo kande dia nombosha anto ndo anto wakemala la ntondo ka Mɔsɛ oma ko pindju polo dikɔlɔ. 14 Lam’akɛnyi okilo wa Mɔsɛ kɛnɛ tshɛ kakasalɛka Mɔsɛ anto, nde akate ate: “Asalɛyɛ anto anɛ nganɛ? Lande na kasalayɛ olimu ɔnɛ wɛmɛ ko anto anɛ tshɛ memalaka la ntondo kayɛ oma ko pindju polo dikɔlɔ?” 15 Mɔsɛ akatɛ okilo ande ate: “Nɛ dia anto wekɔ lo ndja le mi dia ndjombola kanyi ya Nzambi. 16 Etena katomba dikambo lam’asa anto 2, vɔ ndjaka la diɔ le mi, dikambo dimi kahomba mbalombosha ndo dimi kahomba mbaewoya tɛdikɔ taki Nzambi ka mɛtɛ ndo ɛlɛmbɛ ande.”+

17 Okilo wa Mɔsɛ akawotɛ ate: “Kɛnɛ kasalayɛ bu dimɛna. 18 Ndooko onyake wɛ ayɔlɛmba wɛ l’anto wele kaamɛ la yɛ, nɛ dia ɔkɛndɛ ɔsɔ wekɔ wotsho efula le yɛ ndo wɛ hakoke mbɛmba wɛmɛ. 19 Ɔnkɔnɛ, ompokame. Dimi layanga kosha dako ndo Nzambi ayonga kaamɛ la yɛ.+ Wɛ onga onyimpala waki anto la ntondo ka Nzambi+ ka mɛtɛ dia wɛ mbutɛka Nzambi+ ka mɛtɛ akambo. 20 Kowaetshake wadjango la ɛlɛmbɛ+ ndo kowaewoyake woho wahombawɔ nkɛndakɛnda ndo olimu wahombawɔ nsala. 21 Sɔna apami+ wele la akoka, woka Nzambi wɔma, wakokawɔ mbɛkɛ otema, watohetshaka wahɔ wa lo yoho ya lokeso+ kele kitshawɔ ewandji wa nunu nunu, ewandji wa nkama nkama, ewandji wa akumi atanu akumi atanu ndo ewandji wa dikumi dikumi.+ 22 Vɔ kawolomboshake anto etena katomba akambo.* Kawoshidiyake akambo tshɛ wa totshitshɛ, koko dikambo tshɛ dia wolo, vɔ wayoyaka la diɔ le yɛ.+ Yakitshɛkitshɛ olimu lo mbetawɔ dia vɔ kamuya+ wotsho. 23 Naka wɛ nsala ngasɔ, lo mbɔsa oko Nzambi kambokodjangɛ, wɛ ayokoka ntondoya ndo onto tshɛ ayokalolaka lakande ele l’ɔngɛnɔngɛnɔ.”

24 Mbala kakɔ ɔtɔi Mɔsɛ akoke kɛnɛ kakawotɛ okilo ande, ko nde akasale kɛnɛ tshɛ kakandawotɛ. 25 Mɔsɛ akasɔnɛ apami wele la akoka oma l’atei w’ase Isariyɛlɛ tshɛ, ko nde akawaetɛ ɛtɛ wa wodja oko ewandji wa nunu nunu, ewandji wa nkama nkama, ewandji wa akumi atanu akumi atanu ndo ewandji wa dikumi dikumi. 26 Ko vɔ wakalomboshaka anto naka dikambo diambotomba. Vɔ wakakandolaka dikambo tshɛ dia tshitshɛ vɔamɛ, koko dikambo dia wolo, vɔ wakadielaka le Mɔsɛ.+ 27 L’ɔkɔngɔ wa laasɔ, Mɔsɛ akakɛndja okilo+ ande, ko nde akakalola otsha lo wodja awɔ.

19 Lo ngɔndɔ ka 3 l’ɔkɔngɔ w’ase Isariyɛlɛ ntomba oma lo wodja w’Edjibito, lo lushi lakɔ laamɛ, vɔ wakakome l’oswe wa Sinayi. 2 Vɔ wakamɔ oma la Rɛfidimɛ+ ko wakakome l’oswe wa Sinayi ko wakahange l’oswe akɔ. Ase Isariyɛlɛ wakahange laawɔ mbɛlanɛ la dikona.+

3 Ko Mɔsɛ akadɛ lo dikona otsha le Nzambi ka mɛtɛ ndo Jehowa akoowelɛ oma lo dikona,+ ata ate: “Tote ase luudu la Jakɔbɔ ndo ase Isariyɛlɛ wate: 4 ‘Nyuamɛ nyakɛnyi akambo wakamasalɛ ase Edjibito+ dia nyɛmba lo ahafu wa mpongo, ko nyela le mi.+ 5 Ɔnkɔnɛ, naka nyayokitanyiya dui diami tshɛ lo tshɛ ndo nyayolama sheke yami, kete nyayoyala ɛngɔ kami ka laande* l’atei w’anto+ tshɛ, nɛ dia nkɛtɛ k’otondo kekɔ kakimi.+ 6 Nyu nyayoyala diolelo di’ɛlɔmbɛdi ndo wodja+ w’ekila le mi.’ Ngasɔ kayoyototɛ ase Isariyɛlɛ.”

7 Ko Mɔsɛ akatshu, akatelɛ dikumanyi dia lo wodja ndo akawatɛ awui asɔ tshɛ wakawotɛ+ Jehowa. 8 Ko anto tshɛ wakakadimola vate: “Tambetawɔ nsala+ kɛnɛ tshɛ kakatshi Jehowa.” Aha la ntshimbatshimba, Mɔsɛ akatotɛ Jehowa okadimwelo wakasha anto. 9 Ko Jehowa akatɛ Mɔsɛ ate: “Dimi layanga ndja le yɛ lo dinge di’odima kele anto wahokame lam’ayangami ntɛkɛta la yɛ dia vɔ mongaka nshi tshɛ la mbetawɔ ndo le yɛ.” Oma laasɔ, Mɔsɛ akatɛ Jehowa kɛnɛ kakawotɛ anto.

10 Jehowa akatɛ Mɔsɛ ate: “Tshɔka le wodja kele towakidia ɛlɔ la loyi ndo vɔ pombaka nsola ahɔndɔ awɔ. 11 Vɔ pombaka ndjalɔngɔsɔla dikambo dia lushi la 3, nɛ dia lushi la 3, Jehowa ayoya lo Dikona dia Sinayi lo washo w’anto tshɛ. 12 Kodje anto olelo lam’asawɔ la dikona ndo kowate wate: ‘Tanyodɛke lo dikona kana nsakanya kaanga olelo adiɔ. Onto tshɛ layosakanya dikona ayodiakema ndooko onyake. 13 Ndooko onto lahomba minanda onto akɔ, koko nde pombaka mbokama ave kana tshietama.* Oyadi onto kana nyama, nde ayodiakema.’+ Koko paka lam’ayodama dimama+ mbayowokoka mbidɛ lo dikona.”

14 Oma laasɔ, Mɔsɛ akaholɔ oma lo dikona ko akatshu le wodja ndo akakidia wodja. Vɔ wakasole ahɔndɔ+ awɔ. 15 Nde akatɛ wodja ate: “Nyoyalɔngɔsɔlɛ dikambo dia lushi la 3. Tanyosalake dieyanelo.”*

16 La pindju ka lushi lakɔ la 3, akungola ndo angadimu wakayala, ko dinge+ dia woke diakayala laadiko dia dikona ndo londjo la wolo la dimama lakokɛma, ko anto tshɛ waki lo mpango wakatatɛ nsaka lokomba.+ 17 Ɔnkɔnɛ, Mɔsɛ akatondja anto tshɛ waki lo mpango dia tohomana la Nzambi ka mɛtɛ, ko vɔ wakemala l’ɛse ka dikona. 18 Dikona dia Sinayi di’otondo diakatatɛ ntutɔ edinga, nɛ dia Jehowa akaholɔ lɔkɔ lo dja,+ ko edinga adiɔ wakadɛka oko edinga w’oma lo nkuka ka dja ndo dikona di’otondo diakadidimaka la wolo tshɛ.+ 19 Lam’akatalekaka londjo la dimama mbidɛ, Mɔsɛ akatɛkɛtaka ndo dui dia Nzambi ka mɛtɛ diakookadimolaka.

20 Ɔnkɔnɛ, Jehowa akaholɔ lo shɔdi ya Dikona dia Sinayi. Oma laasɔ, Jehowa akelɛ Mɔsɛ lo shɔdi ya dikona, ko Mɔsɛ akadɛ.+ 21 Jehowa akatɛ Mɔsɛ ate: “Holɔ tote wodja diaha vɔ mpemba ntamba olelo dia menda Jehowa diaha efula l’atei awɔ mvɔ. 22 Ndo ɛlɔmbɛdi watosukanaka la Jehowa mbala la mbala wayakidia diaha Jehowa mbakɔmɔla.”+ 23 Ko Mɔsɛ akatɛ Jehowa ate: “Wodja hawokoke mbidɛ lo Dikona dia Sinayi, dikambo wɛmɛ amboshilaka tɔhɛmɔla wate: ‘Dja olelo l’omamu wa dikona ndo kidiadiɔ.’”+ 24 Koko Jehowa akawotɛ ate: “Tshɔka, holɔ kele toye wɛ la Arɔna. Tetawɔke dia ɛlɔmbɛdi kana wodja mpemba ntamba olelo, ko mbidɛ oya le Jehowa diaha nde mbakɔmɔla.”+ 25 Ko Mɔsɛ akaholɔ otsha le wodja ndo akatowatɛ awui asɔ.

20 Nzambi akate akambo anɛ tshɛ ate:+

2 “Dimi kele Jehowa Nzambi kayɛ lakakotondja oma lo wodja w’Edjibito, oma lo luudu la lɔhɔmbɔ.+ 3 Toyalake la nzambi nkina laadiko diami.*+

4 “Toyasalɛke ekishi kana efanelo* ka ɛngɔ kɛmɔtshi kele l’olongo la diko kana kele la nkɛtɛ l’ɛse kana kele lo ashi l’ɛse ka nkɛtɛ.+ 5 Todikusamɛke ndo todikambɛke,+ nɛ dia dimi Jehowa Nzambi kayɛ lekɔ Nzambi kalɔmba dia mamemami+ paka dimɛ oto. Dimi mbishaka ana dilanya l’ɔtɛ wa munga k’ambutshi awɔ polo lo lɔlɔnga la 3 ndo lo lɔlɔnga la 4 la wanɛ wampetsha. 6 Koko dimi mɛnyaka ngandji kami ka kɔlamelo polo ndo le lɔlɔnga la kinunu (1000) la wanɛ wamboka ngandji ndo wakitanyiya wadjango+ ami.

7 “Tokambake la lokombo la Jehowa Nzambi kayɛ lo yoho+ ya kɔlɔ, nɛ dia Jehowa hatotshika ɔnɛ lakamba la lokombo Lande lo yoho+ ya kɔlɔ aha la mbosha dilanya.

8 “Ohɔka lushi la Sabato ndo kolietɛke ekila.+ 9 Kosalake akambo ayɛ ndo kokambake elimu ayɛ tshɛ l’edja ka nshi 6,+ 10 koko lushi la 7 lekɔ sabato dikambo dia Jehowa Nzambi kayɛ. Tokambake ndooko olimu oyadi wɛ kana ɔnayɛ la pami kana ɔnayɛ la womoto kana mfumbe kayɛ ka pami kana mfumbe kayɛ ka womoto, kana dongalonga diayɛ kana ɔngɛndangɛnda wodjashi lo luudu+ layɛ.* 11 Nɛ dia l’edja ka nshi 6 mbakatonge Jehowa olongo la nkɛtɛ la ndjale la ɛngɔ tshɛ kele lɔkɔ, ko nde akatatɛ momuya lushi la 7.+ Diakɔ diele Jehowa akatshɔkɔla lushi la Sabato ndo akalikidia.

12 “Lɛmiya shɔ la nyɔ,+ dia wɛ nsɛna edja lo nkɛtɛ yayanga kosha+ Jehowa Nzambi kayɛ.

13 “Todiakake.+

14 “Tosalake loseka.+

15 “Tovake.+

16 “Toyalake ɔmɛnyi wa kashi lo dikambo dia osekayɛ onto.+

17 “Tɔkɔmiyake luudu laki osekayɛ onto. Tɔkɔmiyake wadi+ aki osekayɛ onto kana mfumbe kande ka pami kana mfumbe kande ka womoto kana ngɔmbɛ kande kana mponda kande kana ɛngɔ tshɛ ka osekayɛ onto.”+

18 Wodja w’otondo wakɛnaka angadimu ndo wakokaka akungola la londjo la dimama, ndo dikona diakatutɔka edinga. Woho wakawɛnyi akambo asɔ akaasatsha lokomba, ko wakemala lo tshalola.+ 19 Ɔnkɔnɛ vɔ wakatɛ Mɔsɛ vate: “Wɛ ototɛke akambo, ko sho tayokohokamɛka. Koko Nzambi atɔtɛkɛtake la so, nɛ dia sho mbeyaka ndjovɔ.”+ 20 Ko Mɔsɛ akatɛ wodja ate: “Tanyokake wɔma, nɛ dia Nzambi ka mɛtɛ amboya dia ndjonyodja l’ohemba+ dia nyu ntetemala mbooka wɔma ndo diaha nyu nsala pɛkato.”+ 21 Ko wodja wakemala paka lo tshalola, koko Mɔsɛ akatshu suke la dinge di’odima lɛnɛ aki+ Nzambi ka mɛtɛ.

22 Ko Jehowa akatɛ Mɔsɛ ate: “Tote ase Isariyɛlɛ wate: ‘Nyuamɛ nyambɛna dia dimi lakatɛkɛtshi la nyu oma l’olongo.+ 23 Tanyosalake tozambizambi ta mfɛsa dia titɛmɔla kaamɛ la mi ndo tanyoyasalɛke+ tozambizambi ta paonyi. 24 Kosale elambwelo ka nkɛtɛ dikambo diami kele konambolake elambo wa lotshumba, elambo w’osanga,* ɛkɔkɔ ayɛ ndo ngɔmbɛ yayɛ laawɔ. Lo dihole tshɛ diayomɔsɔna dia lokombo lami mbohɔmaka,+ dimi layoya le yɛ ndo layokɔtshɔkɔla. 25 Naka wɛ ambonsalɛ elambwelo ka la ave, kete tokisalake lo nkamba la ave wɔkɔlɔngami la dihomɔ+ dimɔtshi. Dikambo naka wɛ nkamba la otshimɔ, kete wɛ ambokietɛ ɛngɔ k’anyanya. 26 Todɛke otsha lo elambwelo kami lo kibandola diaha tenyi diayɛ dia demba dia nsɔnyi* mɛnama.’

21 “Towaewoya tɛdikɔ ta dombo tɔnɛ:+

2 “Naka wɛ ambosomba mfumbe+ k’ose Hɛbɛru, kete nde ayokokambɛ oko mfumbe l’edja k’ɛnɔnyi 6, ko l’ɔnɔnyi wa 7, nde ayotshungɔ aha la mfuta ndooko ɛngɔ.+ 3 Naka ndamɛ kakaye, kete nde ayokalola ndamɛ. Ko naka nde akaye la wadi, kete nde pombaka ntshɔ la wadɛnde. 4 Naka nkumɛnde akawosha wadi, ko nde akote la nde ana w’apami kana ana wa wamato, kete wadi la anande wayoyala waki nkumɛnde, ndo nde ayotshɔ ndamɛ.+ 5 Ko naka mfumbe kakɔ ambotshininala lo mbuta ate: ‘Dimi nangaka nkumɛmi la wadɛmi la anami, dimi haalange ntshungɔ,’+ 6 kete nkumɛnde pombaka mbɔtɔla la ntondo ka Nzambi ka mɛtɛ. Ko nde mbɔtɔla la soko kana la ekundji ka la soko. Nkumɛnde kawotondole toyi la lowolo la shɔdi, ko nde ayotshikala mfumbe kande lɔsɛnɔ lande l’otondo.

7 “Naka onto ambosondja ɔnande la womoto oko mfumbe, ɔnakɔ hatotshungɔ woho watotshungɔka mfumbe ka pami. 8 Naka nkumɛnde hayowɔngɛnangɛna ko nde kombɔɔsa oko wadi, koko ambolanga mbosondja le onto okina,* nde hahombe mbosondja le angɛndangɛnda, nɛ dia nde ambookesa. 9 Naka nde ambowɔsɛ ɔnande oko wadi, nde pombaka mbosalɛ kɛnɛ katowosalɛka ɔna womoto. 10 Naka ɔnande ambotshuka wadi okina, kete nde hatokitshɛkitshɛ wadɛnde la ntondo mbo ya ndɛ, ahɔndɔ kana waɛsɛ+ akina wa lo diwala.* 11 Naka nde hawosha diangɔ 3 sɔ, kete womoto akɔ pombaka ntshungɔ aha la mfuta kaanga mpata.

12 “Onto tshɛ layɔkɔmɔla onto ko nde ambovɔ, onto ɔsɔ pombaka ndjakema.+ 13 Ko naka aha la okonda kosadinde, ko Nzambi ka mɛtɛ ambetawɔ dia dui sɔ salema, dimi layonyɛnya dihole diakokande ndawɔ.+ 14 Naka onto amboka osekande nkɛlɛ k’efula ko nde amboodiaka la okonda,+ onto ɔsɔ pombaka ndjakema oyadi kaanga lo elambwelo+ kami kolawende. 15 Onto tshɛ lakɔmɔla she kana nyango pombaka ndjakema.+

16 “Naka onto ɔmɔtshi ambonda onto+ dia ntshɔ la nde la wolo ko toosondja, kana wambowonda+ owokime, nde pombaka ndjakema.+

17 “Onto tshɛ ladja she kana nyango mananu* pombaka ndjakema.+

18 “Naka anto wekɔ lo mana, ko ɔmɔtshi ambɔkɔmɔla osekande onto dibanga kana dikɔfi* ko nde havwe, koko ambotshikala baka lo mbeto, kanyosale nganɛ: 19 Naka nde kokaka mbetɔ ndo nkɛndakɛnda l’andja la ɔkɔmba, kete ɔnɛ lakɔɔkɔmɔla hahombe nongola dilanya. Nde pombaka tsho mfuta ɔnɛ lohomwe l’etena kamondooshishɛ dia nkamba elimu ande polo lam’ayondɔkɔnɔ tshɛ lo tshɛ.

20 “Naka onto ambɔkɔmɔla mfumbe kande ka pami kana mfumbe kande ka womoto okalemba ko nde ambovɔ lo anya ande, onto ɔsɔ pombaka sɔmbɔyama.+ 21 Ko naka nde ambotshikala la lɔsɛnɔ l’ɔkɔngɔ wa lushi 1 kana nshi 2, kete hawotokoka mbɔsɔmbɔya, nɛ dia nkumɛnde akoosombe losomba.

22 “Naka apami walɔ ta ko ɔmɔtshi ambosakanya womoto lele la diemi ko ɔna ambotomba osondjo,*+ koko ndooko onto lokadi waale,* kete nde pombaka mfuta kɛnɛ kayɔlɔmba omi aki womoto akɔ, ndo nde pombaka kifuta lo tshimbo ya toshushi.+ 23 Ko naka onto ambokala waale, kete wɛ pombaka nsɔmbɔya lɔsɛnɔ lo lɔsɛnɔ,*+ 24 sso lo sso, nnu lo nnu, lonya lo lonya, lokolo lo lokolo,+ 25 otshumbelo lo otshumbelo, mpota lo mpota, dikɔfi lo dikɔfi.

26 “Naka onto ambɔkɔmɔla mfumbe kande ka pami kana mfumbe kande ka womoto lo sso ko ambowoladiɔ, nde pombaka mbotshungola l’ɔtɛ wambondowola sso.+ 27 Naka nde ambongola mfumbe kande ka pami kana mfumbe kande ka womoto nnu, nde pombaka mbotshungola l’ɔtɛ wambondowongola nnu.

28 “Naka ngɔmbɛ amboka pami kana womoto ɔmɔtshi nseke ko onto akɔ ambovɔ, ngɔmbɛ kakɔ pombaka mbokama ave polo tɔ mvɔ+ ndo hawotokilɛ. Kanga ngɔmbɛ hatoyala la onongo. 29 Ko naka ngɔmbɛ kakɔ kaki la mbekelo ka mbikanaka nseke ko wakahɛmɔla kangatɔ, koko nde kokilama ko kambodiaka pami kana womoto, ngɔmbɛ kakɔ pombaka mbokama ave ndo kangatɔ pombaka ndjakema. 30 Naka wambɔɔlɔmba dia mfuta oshinga w’etshungwelo, nde pombaka mfuta kɛnɛ tshɛ kayowɔɔlɔmba dia ntshungola lɔsɛnɔ lande. 31 Oyadi ɔna pami kana ɔna womoto mbokitɔ nseke, pombaka salɛ kanga ngɔmbɛ kakɔ lo ndjela yɛdikɔ nyɛ. 32 Naka ngɔmbɛ kamboka mfumbe ka pami kana mfumbe ka womoto nseke, kanga ngɔmbɛ pombaka mbisha kanga mfumbe tɔshɛkɛlɛ* 30 ndo ngɔmbɛ kakɔ pombaka mbokama ave polo tɔ mvɔ.

33 “Naka onto ɔmɔtshi ambotshika difuku hwe kana ambotshima difuku ko hadife, ko ngɔmbɛ kana mponda kambɔkɔ lɔkɔ, 34 kanga difuku pombaka kifuta. Nde pombaka nkimɔ kɛnɛ kayɔlɔmba+ kangatɔ, ko nde mbɔsa odo wa nyama kakɔ. 35 Naka ngɔmbɛ k’onto ɔmɔtshi kambohomuya ngɔmbɛ k’onto okina ko tɔ kambovɔ, kete vɔ pombaka nsondja ngɔmbɛ kasɛna ko nkahana falanga y’oma lɔkɔ ndo vɔ pombaka nto nkahana nyama kovwe. 36 Ko naka akeyama dia ngɔmbɛ kakɔ kaki la mbekelo ka mbikanaka nseke ko kangatɔ kokilama, nde pombaka mfuta ngɔmbɛ lo ngɔmbɛ ndo ngɔmbɛ kambovɔ kayonga kande.

22 “Naka onto ambova ngɔmbɛ kana ɔkɔkɔ ko nde amboodiaka kana amboosondja, nde pombaka mfuta ngɔmbɛ 5 lo dihole dia ngɔmbɛ kovinde ndo ɛkɔkɔ 4 lo dihole di’ɔkɔkɔ+ wovinde.

2 (“Naka wambonda wovi+ tshu ava ko wambɔɔkɔmɔla ko nde ambovɔ, ndooko onto lele la onongo wa nyɔi kande. 3 Ko naka la yanyi kovinde, kete onto layowodiaka ayonga la onongo wa nyɔi kande.)

“Wovi pombaka mfuta. Naka nde ndooko la ɛngɔ, kete nde pombaka sondjama l’ɔtɛ wa diangɔ diakandave. 4 Naka wambotana nyama kakandave keke la lɔsɛnɔ, oyadi ngɔmbɛ kana mponda kana ɔkɔkɔ, nde pombaka mfuta kɛnɛ kakandave ndodia lo 2.

5 “Naka onto ntshika nyama yande dia yɔ talɛka l’oswe kana lo ekambɔ ka vinyɔ ko amboyitshika dia yɔ tɔlɛ polo lo ekambɔ kakana, nde pombaka mfuta diangɔ dioleki tshɛ amɛna dia lo ekambɔ kande kana dia lo ekambɔ kande ka vinyɔ.

6 “Naka onto ambodja dja ndo yambolalɔ lo adiyo, ko yambolongoya diangɔ diambowona kana diewɔ watane kana ekambɔ k’otondo kambolongola, ɔnɛ lakadji dja pombaka mfuta kɛnɛ kambolongola.

7 “Naka onto ɔmɔtshi ambosha osekande falanga kana diangɔ dimɔtshi dia nde mbolamɛ ko diamboyovama lo luudu l’osekande akɔ, wovi pombaka mfuta+ kɛnɛ kovinde ndodia lo 2 naka vɔ mbonda. 8 Naka hawondji wovi akɔ, kete kanga luudu loviwɔ pombaka tɔlama la ntondo ka Nzambi ka mɛtɛ+ dia toshikikɛ kana ndamɛ kambodja anya lo diangɔ di’osekande kana bu. 9 Etena tshɛ kɔsa onto diangɔ diele bu diande, ɛnyɛlɔ oko ngɔmbɛ, mponda, ɔkɔkɔ, dihɔndɔ kana ɛngɔ tshɛ kakashishɔ ko onto ɔmɔtshi ambota ate: ‘Ɛngɔ kɛnɛ kami!’ anto akɔ 2 pombaka ntshɔ la ntondo ka Nzambi+ ka mɛtɛ. Onto lele Nzambi ayota dia nde kele la onongo ayofuta osekande+ ndodia lo 2.

10 “Naka onto ɔmɔtshi ambosha osekande mponda, ngɔmbɛ, ɔkɔkɔ kana elongalonga kɛmɔtshi dia nde mbolamɛ ko tɔ kambovɔ kana kaya etshumbe kana kamboshishɔ aha l’onto mɛna lam’oshishwetɔ, 11 ɔnɛ lakakilamaka pombaka ntshiba la ntondo ka Jehowa dia nde kombidja anya lo ɛngɔ k’osekande, ndo kangatɔ pombaka mbetawɔ. Osekande hatofuta.+ 12 Ko naka nyama kakɔ kamboyovama le nde, kete nde pombaka mfuta kangatɔ. 13 Naka nyama kakɔ kakandama oma le nyama ka ngala, nde pombaka mbela bɛtshi diatɔ dia mɛnya mɛtɛ ka dui sɔ. Nde hahombe mfuta ɛngɔ kondami oma le nyama ka ngala.

14 “Naka onto ambɔsɔmba nyama k’osekande ko tɔ kaya etshumbe kana kambovɔ le nde, aha la kangatɔ monga laawɔ, ɔnɛ lakakisɔmbɛ pombaka kifuta. 15 Naka kangatɔ ekɔ laawɔ, kete nde hatofuta. Naka wakakimɔ falanga dia nkamba la tɔ, kete falanga yakakimɔma pombaka kaloyama.

16 “Naka pami kɛmɔtshi ambolanga osekaseka w’emuma wahatambemɛ ko ambeyana la nde, nde pombaka nkimɔ okundji dia womoto akɔ monga wadɛnde.+ 17 Naka kaanga she halange mboshande wadi, nde pombaka mfuta falanga yɛdimi la okundji.

18 “Totshikake womoto kanga dɔka la lɔsɛnɔ.+

19 “Onto tshɛ leyana la nyama pombaka ndjakema.+

20 “Onto tshɛ lalambola nzambi kekina olambo lo dihole dia nambola paka Jehowa ndamɛ, pombaka ndjakema.+

21 “Tɔhɛnyahɛnyake ɔngɛndangɛnda ndo toosoyake,+ nɛ dia nyu nyaki angɛndangɛnda lo wodja w’Edjibito.+

22 “Tanyosoyake wadi aki odo kana ɔna+ etshike.* 23 Naka wɛ mbosoya ko nde ndelɛmi, ndooko onyake dimi layoka delo+ diande, 24 ndo nkɛlɛ kami kayodɔdɔ, ko dimi layonyodiaka la lokuwa la ta ndo wadiɛnyu wayotshikala wadi waki edo ndo ananyu wayotshikala tshike.

25 “Naka wɛ ambɔsɔndja ose wola* la lo wodja ami lodjashi kaamɛ la yɛ falanga, tongake le nde oko onto lasɔndjana dia nkondja wahɔ. Toyangake dia nde kokaloya la wahɔ.+

26 “Naka wɛ ambɔsa dihɔndɔ di’osekayɛ ɔkɔlɛ,+ wɛ pombaka mbokaloyadiɔ la dikɔlɔ. 27 Nɛ dia dɔ to mbele la nde dia ndɔta dia nkomba demba* diande. Lo na ayondetama dia ndala?+ Lam’ayondondelɛ, ndooko onyake dimi layoka, nɛ dia dimi mbokanaka kandji.*+

28 “Todjake Nzambi+ mananu* ndo todjake owandji* wele l’atei w’anto+ anyu mananu.

29 “Tengengake dia nkimɔ weshasha oma lo lokema la diangɔ diayoyɔngɔnya ndo lo kɛnɛ katshulɔtshulɔ oma lo wamula*+ ayɛ. Kombishake+ anayɛ w’apami wa nondo. 30 Nganɛ kahombayɛ salaka la ngɔmbɛ kayɛ ndo la ɔkɔkɔ+ ayɛ wotɔ ntondo: Ɔna ayotshikalaka la nyango nshi 7 l’ɔkɔngɔ wa eotwelo kande, ko lushi la 8 wɛ mbishaminde.+

31 “Nyɛnya dia nyekɔ anto w’ekila le mi+ ndo tanyɔlɛke nyama+ tshɛ ka l’okonda kondami oma le nyama ka ngala. Nyu pombaka kiokɛ mfɔ.

23 “Todianganyake akambo wa kashi.+ Tokanake la kanga kɔlɔ lo monga ɔmɛnyi+ wayanga dia salɛ onto kɔlɔ. 2 Toyelake olui w’anto dia nsala akambo wa kɔlɔ ndo toyelake olui w’anto* lo mɛnganya kilombo etena kakelɛwɔ oko ɔmɛnyi lo dikambo dimɔtshi. 3 Tongake la shɔnɔdi lo dikambo di’ose wola.+

4 “Naka wɛ ambohomana la ngɔmbɛ kana mponda k’otunyi ayɛ kambonganɛ, wɛ pombaka kikaloya le nde.+ 5 Naka wɛ ambɛna mponda k’onto ɔmɔtshi lakohetsha kakakwɛ la oshikɔ atɔ, tokinyake yimba ndo tokitshikake. Wɛ pombaka mbokimanyiya dia minya wotsho wele laadiko dia nyama+ kakɔ.

6 “Tohembolake kilombo+ k’ose wola lele l’atei anyu wɛngɛngɛ.

7 “Tohindɛke onto onongo* ndo todiakake onto laha la onongo kana onto ɔlɔlɔ, nɛ dia dimi hantɔsa kanga kɔlɔ oko onto ɔlɔlɔ.*+

8 “Tolongolake etshimba, nɛ dia etshimba konyaka anto diaha vɔ nsala akambo la losembwe ndo vɔ koka nkonya onto ɔlɔlɔ+ dia nde ntshikitanya ɛtɛkɛta ande.

9 “Tosoyake ɔngɛndangɛnda. Nyu mbeyaka elɛwɔ monga ɔngɛndangɛnda,* nɛ dia nyaki angɛndangɛnda lo wodja w’Edjibito.+

10 “Konɛke woho lo ekambɔ kayɛ ndo konake diangɔ dia lɔkɔ l’edja k’ɛnɔnyi 6.+ 11 Koko ɔnɔnyi wa 7 tokambake ekambɔ kayɛ dia tɔ momuya, ko ase wola wele kaamɛ la yɛ wayɔlɛ diangɔ di’oma lɔkɔ ndo nyama ya l’okonda yayɔlɛka kɛnɛ kayowotshika. Ngasɔ kahombayɛ salaka la ekambɔ kayɛ ka vinyɔ ndo la ekambɔ kayɛ k’ɔlivɛ.

12 “Kokambake elimu ayɛ nshi 6. Koko lushi la 7, wɛ pombaka ntshika olimu ayɛ wa wolo kele ngɔmbɛ kayɛ kana mponda kayɛ komuyake ndo dia mfumbe kayɛ kana ɔngɛndangɛnda momuya.+

13 “Nyodje yimba dia nsala kɛnɛ tshɛ kamomonyotɛ+ ndo tanyodimolake nkombo ya nzambi nkina. Yɔ hayohombe mbokɛma oma l’ɛlɔmɔ*+ anyu.

14 “Konsalɛke+ fɛtɛ 3 ɔnɔnyi tshɛ. 15 Kosalake Fɛtɛ ka mapa+ waha la wodoya. Kɔlɛke mapa waha la wodoya l’edja ka nshi 7 oko wamomokodjangɛ, l’etena kakashikikɛma, lo ngɔndɔ k’Abiba,*+ nɛ dia l’etena kɛsɔ kakayatombe oma l’Edjibito. Ndooko onto lahomba mɛnama la ntondo kami anya hwe.+ 16 Ndo nto, kosalake Fɛtɛ ka Dinela* dia ɔlɔnga w’oma l’ekambɔ+ kayɛ kakayɛnyi paa la monɛ. Kosalake nto Fɛtɛ ka Eombelo* l’ekomelo k’ɔnɔnyi etena kayoyombaka diangɔ di’oma l’ekambɔ kayɛ diakayɛnyi paa.+ 17 Mbala 3 l’ɔnɔnyi, anto* tshɛ wele kaamɛ la yɛ kawɛnamake la ntondo ka Jehowa+ Nkumadiɔndjɔ ka mɛtɛ.

18 “Tolambolake dikila dia nyama kami k’olambo kaamɛ la ɛngɔ kɛmɔtshi kele la wodoya. Ndo elambo wa wata walambɔma lo fɛtɛ yami hawohombe ntshikala polo la pindju.

19 “Kelake diangɔ dioleki amɛna dia ɔlɔnga w’oma lo dikambɔ diayɛ lo luudu la Jehowa Nzambi+ kayɛ.

“Tokatɛke ɔsɔngɔ wa mbudi lo awɛlɛ+ wa nyangɛtɔ.

20 “Dimi layanga ntoma ondjelo la ntondo kayɛ+ dia nde takolamaka lo mboka ndo dia nde kɔtɔla otsha lo dihole diamomɔlɔngɔsɔla.+ 21 Kodje yimba lo kɛnɛ kayondokotɛ ndo kokitanyiya dui diande. Tɔɔtɔmbɔkwɛke, nɛ dia nde hatodimanyiya kɔlɔ+ yanyu, dikambo lokombo lami lekɔ le nde. 22 Ko naka wɛ nkitanyiya dui diande tshɛ lo tshɛ ndo naka wɛ nsala kɛnɛ tshɛ kakotɛmi, kete dimi layohetsha atunyi ayɛ ndo layosoya wanɛ wakosoya. 23 Nɛ dia ondjelo ami ayeta la ntondo kayɛ ndo ayokɔtɔla otsha laka ase Amɔra, ase Hiti, ase Perizi, ase Kanana, ase Hivi ndo ase Jɛbusɛ, ko dimi layowashila+ oshiki. 24 Tokusamɛke tozambizambi tawɔ, tetawɔke dia tikambɛ ndo tokoyake ditshelo+ diawɔ. Koko wɛ pombaka tilanya ndo mpandjola dimɛta+ diawɔ dia l’ave. 25 Kanyokambɛke Jehowa Nzambi+ kanyu, ko nde ayonyɔtshɔkɔla lo nyosha mbo ya ndɛ ndo ashi.+ Dimi layonya hemɔ oma l’atei anyu.+ 26 Wamato wa lo wodja ayɛ hawototombaka waemi ndo hawotonga dikomba,+ dimi layokosha lolombe.*

27 “Dimi layotoma wɔma ami le anto wele la ntondo kayɛ+ ndo dimi layodja anto tshɛ wayohomana la yɛ l’okandokando. Dimi layosala dia wɛ mbidja atunyi ayɛ tshɛ otshumba ko vɔ kolawɔ.*+ 28 Dimi layotoma ɔkɔmwɛlɔ la ntondo kayɛ,+ ko ase Hivi, ase Kanana ndo ase Hiti wayolawɔ oma la ntondo kayɛ.+ 29 Dimi hantowatshanya oma la ntondo kayɛ lo ɔnɔnyi 1, diaha wodja ntshikala tɔngɔ to, ko nyama ya ngala ya l’okonda ndjofulanɛ ndo ndjokosalɛ+ kɔlɔ. 30 Dimi layotawatshanyaka oma la ntondo kanyu yema yema polo ndo lam’ayonyofulanɛ ndo lam’ayonyɔsa ɛtshi ka nkɛtɛ+ kakɔ.

31 “Dimi layodja olelo anyu oma lo Ndjale ka Beela polo ndo lo ndjale k’ase Filistiya, oma l’oswe wa shɛnga polo ndo lo Ɔkɛdi,*+ nɛ dia dimi layokimɔ ase wodja akɔ lo anya anyu ko nyayowatshanya oma la ntondo kanyu.+ 32 Tanyodjake sheke la wɔ kana la tozambizambi+ tawɔ. 33 Vɔ hawohombe mbidjasɛ lo wodja anyu diaha vɔ ndjonyokonya dia nyu salɛmi pɛkato. Naka nyu kambɛ tozambizambi tawɔ, kete mɛtɛ ɔsɔ ayonga djonga le nyu.”+

24 Nde akatɛ Mɔsɛ ate: “Dɛ le Jehowa wɛ la Arɔna, Nadaba, Abihu+ kaamɛ ndo dikumanyi 70 dia l’Isariyɛlɛ kele nyotokusame lo tshalola. 2 Mɔsɛ ndamɛ kayosukana le Jehowa, koko anto akina watosukanake ndo wodja watodɛke kaamɛ la nde.”+

3 Mɔsɛ akaye, akayotɛ wodja awui tshɛ ndo tɛdikɔ+ tshɛ ta dombo takawotɛ Jehowa, ko wodja w’otondo wakakadimola kaamɛ vate: “Tambetawɔ dia nsala+ kɛnɛ tshɛ kakatshi Jehowa.” 4 Ko Mɔsɛ akafunde kɛnɛ tshɛ kakate Jehowa.+ Ko nde aketɔ la pindju ka pɛɛ, akasale elambwelo l’ɛse ka dikona ndo akake dikundji 12 laawɔ lo ndjela waoho 12 w’Isariyɛlɛ. 5 Oma laasɔ, nde akatome ɛlɔngɔ w’apami wa l’Isariyɛlɛ, ko vɔ wakalambola elambo wa lotshumba ndo wakalambola Jehowa ngɔmbɛ oko elambo+ w’osanga. 6 Ko Mɔsɛ akɔshi k’ahende ɔtɔi ka dikila ko akadje lo alɔnga, ndo akɔshi k’ahende ɔtɔi kekina ka dikila ko akamɔngɛ lo elambwelo. 7 Ko nde akayɔsaka dibuku dia sheke ko akadiadiyɛ wodja+ la dui dia wolo. Ko vɔ wakate vate: “Tambetawɔ dia nsala ndo nkitanyiya+ kɛnɛ tshɛ kakatshi Jehowa.” 8 Ɔnkɔnɛ Mɔsɛ akɔshi dikila ko akadimɔngɛ anto+ ndo akate ate: “Ɔnɛ ekɔ dikila dia sheke yambodja Jehowa la nyu lo ndjela ɛtɛkɛta+ ande ɛsɔ tshɛ.”

9 Mɔsɛ, Arɔna, Nadaba, Abihu la dikumanyi 70 dia l’Isariyɛlɛ wakadɛ, 10 ko vɔ wakɛnyi* Nzambi k’Isariyɛlɛ.+ Ɛngɔ kele oko odihe wakasalema la mbɔkɔ ya safirɛ ndo kele pudipudi oko olongo kakikɔ lo ekolo ande.+ 11 Nde kosalɛ anto wa lokumu wa l’Isariyɛlɛ+ kɔlɔ ndo vɔ wakɛnyi ɛnɛlɔ ka Nzambi ka mɛtɛ ndo wakale, wakanɔ.

12 Ko Jehowa akatɛ Mɔsɛ ate: “Dɛ le mi lo dikona kele yodjasɛ lɛkɔ. Dimi layokosha pase di’ave diele la ɛlɛmbɛ la wadjango wayomofunda dia mbaetsha.”+ 13 Ɔnkɔnɛ Mɔsɛ la Jashua+ okambi ande wakemala, ko Mɔsɛ akadɛ lo dikona dia Nzambi+ ka mɛtɛ. 14 Koko nde akatɛ dikumanyi ate: “Nyotokonge lanɛ polo lam’ayotokalola le nyu.+ Arɔna nde la Hura+ wekɔ kaamɛ la nyu. Naka onto ekɔ la dikambo, ko nde ntshɔ le wɔ.”+ 15 Ko Mɔsɛ akadɛ lo dikona kaanga mbakadiakombama+ la dinge.

16 Lotombo+ la Jehowa lakatshikala lo dikona dia Sinayi+ ndo dinge diakadikombe l’edja ka nshi 6. Lushi la 7, nde akelɛ Mɔsɛ oma lo dinge. 17 Le ase Isariyɛlɛ wakendaka, ɛnamelo ka lotombo la Jehowa kaki oko dja yalombalomba lo shɔdi ya dikona. 18 Ko Mɔsɛ akɔtɔ lo dinge diakɔ ndo akadɛ lo dikona.+ Mɔsɛ akatshikala lo dikona tanyi 40 la etsho 40.+

25 Oma laasɔ, Jehowa akatɛ Mɔsɛ ate: 2 “Tɛ ase Isariyɛlɛ dia vɔ mbelakami weshasha. Kanyɔsake weshasha oma le onto tshɛ lo ndjela kɛnɛ kawotshutshuya otema ande dia mbishami.+ 3 Weshasha ɛnɛ mbayonyɔsaka oma le wɔ: Paonyi,+ mfɛsa,+ nkonga,+ 4 eshinga wa bule, eshinga wosalemi la wɛɔsa w’ebelabela, eshinga wa beela k’efula, dihɔndɔ dia linɛnɛ la dimɛna, wɛɔsa wa mbudi, 5 dikoho di’ɛkɔkɔ diambowodja dangi dia beela, dikoho dia nyama ka fɔkɛ, abaya+ w’osongo wa akasia, 6 esɔ ka tala,+ balasama dikambo dia esɔ+ k’okitelo, tshɔ+ y’opumu, 7 mbɔkɔ ya ɔniksɛ ndo mbɔkɔ nkina ya mbidja lo efodɛ*+ ndo lo ɛngɔ kalɔtawɔ lo ntolo.+ 8 Vɔ kawonsale tɛmpɛlɔ k’ekila, ko dimi layodjasɛ l’atei awɔ.+ 9 Kanyosale tabɛrnaklɛ la dihomɔ tshɛ dia lɔkɔ lo ndjela dimɛna dimɛna ɛnyɛlɔ* kakɛnyami.+

10 “Kawosale Ɔshɛtɛ la abaya w’osongo wa akasia, kawoyale la otale wa kubita* hiende l’etenyi, woke wa kubita ɔtɔi l’etenyi ndo tanga+ dia kubita ɔtɔi l’etenyi. 11 Kokite paonyi+ ka pudipudi lɔkɔ. Kokikite l’etei ndo l’andja ndo kosale ohembo wa paonyi l’otshimbedi awɔ+ tshɛ. 12 Kɔkɔhɛ ashingo 4 wa paonyi lɔkɔ ndo kowakɔhɛ la diko di’ekolo awɔ 4, wedi ɔnɛ ashingo 2 ndo wedi okina ashingo 2. 13 Kosale ndo esembe la osongo wa akasia ndo kokite paonyi+ lɔkɔ. 14 Kodje esembe akɔ lo ashingo wele l’omamu w’Ɔshɛtɛ dia mɛmbaka Ɔshɛtɛ lɔkɔ. 15 Esembe akɔ wayotshikalaka lo ashingo wele l’Ɔshɛtɛ, vɔ hawohombe minyɛma oma lɔkɔ.+ 16 Kodje pase di’Ɔmɛnyi diayomokosha+ lo Ɔshɛtɛ akɔ.

17 “Kosale ofidi la paonyi ka pudipudi ndo kawonge la otale wa kubita hiende l’etenyi ndo woke+ wa kubita ɔtɔi l’etenyi. 18 Kosale akɛruba 2 la paonyi. Kowatshule lotshula ndo kowakitsha lo tokoma takɔ tohende t’ofidi.+ 19 Kosale akɛruba lo tokoma takɔ tohende, ɔkɛruba 1 lo koma la koma y’ofidi. 20 Akɛruba kawosandjole ahafu awɔ 2 la diko, kele dɛdi di’ahafu+ awɔ kadiokombake ofidi ndo vɔ kawɛlane. Dungi di’akɛruba akɔ kadiɛlɛ otsha l’ofidi. 21 Kofe ofidi+ laadiko di’Ɔshɛtɛ ndo kodje pase di’Ɔmɛnyi diayomokosha lo Ɔshɛtɛ akɔ. 22 Dimi layɛnama le yɛ laawɔ ndo layɔtɛkɛta la yɛ oma la diko di’ofidi+ akɔ. Dimi layonga lam’asa akɛruba 2 wele laadiko di’ɔshɛtɛ w’Ɔmɛnyi ndo layokewoya kɛnɛ tshɛ kayomokodjangɛ dikambo di’ase Isariyɛlɛ.

23 “Kosale ndo mɛsa+ la abaya w’osongo wa akasia ndo kawonge la otale wa kubita 2, woke wa kubita 1 ndo tanga+ dia k’ahende ɔtɔi ka kubita. 24 Kokite paonyi ka pudipudi lɔkɔ ndo kodje ohembo wa paonyi l’otshimbedi awɔ. 25 Komame dibaya diele la woke w’etambe ka lonya* l’otshimbedi wa mɛsa ndo kodje ohembo wa paonyi l’otshimbedi wa dibaya diakɔ. 26 Kosale ashingo 4 wa paonyi ndo kohakɛ ashingo akɔ lo atshuku 4 lam’ɔsɔngami ekolo 4 wa mɛsa. 27 Ashingo akɔ kawoyale suke la dibaya dia l’omamu ndo esembe wayɔtɔ lɔkɔ dia mɛmbaka mɛsa. 28 Kosale esembe la osongo wa akasia ndo kokite paonyi lɔkɔ kele kawɛmbake mɛsa lɔkɔ.

29 “Kosale ndo diangɔ dia la mɛsa nɛ: Alɔnga w’akale, akɔhɔ, mbidika y’awomba ndo alɔnga w’afuku wayowodjaka elambo wa lotɛ lɔkɔ. Kosale diangɔ sɔ la paonyi+ ka pudipudi. 30 Kokitshake mapa wa lɛɛnya la mɛsa la ntondo kami tena tshɛ.+

31 “Kosale ekundji+ ka tala la paonyi ka pudipudi. Ekundji kakɔ ka tala kayale ka lotshula. Edjaselo katɔ, okendeka atɔ, ntahe yatɔ, akɔhɔ atɔ, ambɔkɔ atɔ ndo alɛmbɔlɛmbɔ atɔ kawonge ɛngɔ+ 1. 32 Ntahe 6 kayonge lo wedi akɔ ehende w’ekundji ka tala, ntahe 3 wedi ɔnɛ ndo ntahe 3 wedi okina. 33 Akɔhɔ 3 wele oko alɛmbɔlɛmbɔ w’osongo w’amandɛ wayoyala lo etenyi l’etenyi ka lotahe, dɛmbɔlɛmbɔ ndjelana la dimbɔkɔ ko akɔhɔ 3 wele oko alɛmbɔlɛmbɔ w’osongo w’amandɛ la diko dia dimbɔkɔ la dɛmbɔlɛmbɔ lo tenyi dikina dia lotahe la lotahe. Ngasɔ mbayonga ntahe 6 yayotomba oma l’okendeka w’ekundji ka tala. 34 Akɔhɔ 4 wele oko alɛmbɔlɛmbɔ w’osongo w’amandɛ wayonga l’okendeka w’ekundji ka tala kaamɛ la ambɔkɔ awɔ woyelanyi la alɛmbɔlɛmbɔ awɔ. 35 Dimbɔkɔ diayonga l’ɛse ka ntahe 2 ya ntondo yatomba oma l’okendeka ndo dimbɔkɔ dikina diayonga l’ɛse ka ntahe 2 yayela, ko dimbɔkɔ dikina nto l’ɛse ka ntahe nkina 2, dikambo ntahe 6 mbayotomba oma l’okendeka. 36 Ambɔkɔ, ntahe ndo ekundji ka tala k’otondo pombaka monga okama 1 wa paonyi+ ka pudipudi ka lotshula. 37 Kosale atala 7 lɔkɔ. Lam’ayɔhɛtaka atala akɔ, vɔ kawɛnyake osase lo dihole diele la ntondo kawɔ.+ 38 Kosale manu ndo diangɔ dia mɛmbaka dja la paonyi ka pudipudi. 39 Ekundji ka tala la diangɔ diatɔ pombaka salema oma lo lotalata* 1 la paonyi ka pudipudi. 40 Kodje yimba dia disala lo ndjela ɛnyɛlɔ* kawɔ kakamakɛnya lo dikona.+

26 “Kosale tabɛrnaklɛ+ la ahɔndɔ w’apɛma 10 wosalemi la linɛnɛ la dimɛna la lɛla, eshinga wa bule, eshinga w’ebelabela ndo eshinga wa beela k’efula. Kodje ndo asango+ w’akɛruba+ lɔkɔ. 2 Dihɔndɔ tshɛ dia dipɛma kadionge la otale wa kubita* 28 ndo woke wa kubita 4. Ahɔndɔ tshɛ w’apɛma pombaka monga popo.+ 3 Ahɔndɔ 5 w’apɛma wayokakatanyema kaamɛ lo wedi ɔmɔtshi ndo ahɔndɔ akina 5 w’apɛma wayokakatanyema kaamɛ lo wedi okina. 4 Kosale ɛkɔdi la eshinga wa bule l’ohembo wa dihɔndɔ 1 dia dipɛma diele l’ekomelo ka wedi ɔmɔtshi. Kosale ngasɔ ndo l’ohembo wa dihɔndɔ dia dipɛma dia lo wedi okina lo dihole diayodiokakatanyema. 5 Kosale ɛkɔdi 50 lo dihɔndɔ dimɔtshi dia dipɛma ndo ɛkɔdi 50 lo ohembo wa dihɔndɔ dikina dia dipɛma dia vɔ mbɛlanɛ lɛnɛ ahomba apɛma akɔ kakatanyema. 6 Kosale ɛkɔhi 50 wa paonyi ndo kokakatanya ahɔndɔ akɔ w’apɛma la ɛkɔhi, dia tabɛrnaklɛ monga ɔtɔi.+

7 “Kosale ndo ahɔndɔ w’apɛma wa la wɛɔsa+ wa mbudi dia mbahɛ laadiko dia tabɛrnaklɛ. Kosale ahɔndɔ+ w’apɛma 11. 8 Dihɔndɔ tshɛ dia dipɛma kadionge la otale wa kubita 30 ndo woke wa kubita 4. Ahɔndɔ w’apɛma akɔ 11 pombaka monga popo. 9 Kokakatanya ahɔndɔ 5 w’apɛma wedi ɔmɔtshi ndo kokakatanya ahɔndɔ akina 6 w’apɛma wedi okina ko wɛ minɛ dihɔndɔ dia dipɛma dia 6 la ntondo ka tabɛrnaklɛ. 10 Kosale ɛkɔdi 50 l’ohembo wa dihɔndɔ dimɔtshi dia dipɛma dia lo koma ya lo wedi ɔmɔtshi ndo ɛkɔdi 50 l’ohembo wa dihɔndɔ dia dipɛma dia lo wedi okina lam’ahombadiɔ kakatanyema la dikina. 11 Kosale ɛkɔhi wa nkonga 50 ndo kodje ɛkɔdi lo ɛkɔhi akɔ kele kokakatanya ahɔndɔ akɔ w’apɛma dia monga dihɔndɔ 1 dia dipɛma. 12 Etenyi ka dihɔndɔ dia dipɛma kalekana kayonga oko dɛfu. K’ahende ɔtɔi ka dihɔndɔ dia dipɛma dialekana kayonga oko dɛfu l’otshimba wa tabɛrnaklɛ. 13 Etenyi k’otale kalekana k’ahɔndɔ w’apɛma kayonga oko dɛfu dia tabɛrnaklɛ diele la otale wa kubita 1 lo wedi la wedi dia kikomba.

14 “Kosale ndo okombɔ wa tabɛrnaklɛ la dikoho di’ɛkɔkɔ diambowodja dangi dia beela ndo kahɛ okombɔ wa la dikoho+ dia nyama ka fɔkɛ laadiko.

15 “Kosale kadrɛma+ ya tabɛrnaklɛ la abaya w’osongo wa akasia ndo koyiemɛ+ lemɛ. 16 Kadrɛma tshɛ pombaka monga la tanga dia kubita 10 ndo woke wa kubita ɔtɔi l’etenyi. 17 Kadrɛma tshɛ pombaka monga la nsɔdi hiende yokakatanyemi l’ɛse katɔ. Ngasɔ mbahombayɛ nsala kadrɛma tshɛ ya lo tabɛrnaklɛ. 18 Kosale kadrɛma 20 lo lɛkɛ la sidɛ ka tabɛrnaklɛ, mbɛlanɛ la sidɛ.

19 “Kosale dikitshelo dia mfɛsa 40 diele l’afuku dia dikitsha+ l’ɛse ka kadrɛma yakɔ 20: Dikitshelo 2 diele l’afuku l’ɛse ka kadrɛma 1 lo nsɔdi yatɔ hiende ndo dikitshelo pende pende diele l’afuku l’ɛse ka kadrɛma tshɛ yayela lo nsɔdi+ yayɔ hiende hiende. 20 Lo wedi okina wa tabɛrnaklɛ lo nɔrdɛ, kosale kadrɛma 20 21 kaamɛ la dikitshelo diayɔ dia mfɛsa 40 diele l’afuku, dikitshelo 2 diele l’afuku l’ɛse ka kadrɛma 1 ndo dikitshelo pende pende diele l’afuku l’ɛse ka kadrɛma tshɛ yayela. 22 Lo wedi wa l’otshimba wa tabɛrnaklɛ lo owɛstɛ, kosale kadrɛma 6.+ 23 Kosale kadrɛma 2 oko dikundji 2 dia l’atshuku wa tabɛrnaklɛ. 24 Kawokakatanya dikundji 2 oma l’ɛse polo la diko, polo lo shingo dia ntondo. Ngasɔ mbayowosala lo dikundji diakɔ 2 ndo diɔ diayonga dikundji 2 dia l’atshuku. 25 Kosale kadrɛma 8 kaamɛ la dikitshelo diayɔ 16 dia mfɛsa diele l’afuku, dikitshelo 2 diele l’afuku l’ɛse ka kadrɛma 1 ndo dikitshelo pende pende diele l’afuku l’ɛse ka kadrɛma tshɛ yayela.

26 “Kosale esembe la osongo wa akasia, esembe 5 lo kadrɛma ya lo wedi ɔmɔtshi wa tabɛrnaklɛ,+ 27 esembe 5 lo kadrɛma ya lo wedi okina wa tabɛrnaklɛ ndo esembe 5 lo kadrɛma ya lo tabɛrnaklɛ lo lɛkɛ la owɛstɛ, lo wedi wa l’otshimba. 28 Osembe wa l’atei wahomba monga l’atei atei wa kadrɛma pombaka mbeta oma lo koma nyɛ polo lo koma kina.

29 “Kokite paonyi+ lo kadrɛma yakɔ ndo kosale ashingo ayɔ wa paonyi dia vɔ kimɛka esembe. Kokite paonyi lo esembe akɔ. 30 Kemɛ tabɛrnaklɛ lo ndjela woho wakamakɛnya lo dikona.+

31 “Kosale dihɔndɔ di’okombɔ+ la eshinga wa bule, eshinga w’ebelabela, eshinga wa beela k’efula ndo la linɛnɛ la dimɛna la lɛla. Kosange akɛruba lɔkɔ. 32 Kodihanɛ lo dikundji 4 di’osongo wa akasia diayoyokita paonyi lɔkɔ. Kosale tɔkɔhɔ tadiɔ la paonyi. Kemɛ dikundji lo dikitshelo 4 dia mfɛsa diele l’afuku. 33 Kohanɛ dihɔndɔ di’okombɔ l’ɛse k’ɛkɔhi ndo kodje ɔshɛtɛ w’Ɔmɛnyi+ l’etei ka dihɔndɔ di’okombɔ. Dihɔndɔ di’okombɔ diayokakitola Dihole di’Ekila+ la Dihole dioleki Ekila.+ 34 Kofe ofidi laadiko di’ɔshɛtɛ w’Ɔmɛnyi ndo kowodje lo Dihole dioleki Ekila.

35 “Kokitsha mɛsa l’andja wa dihɔndɔ di’okombɔ lo nɔrdɛ ndo ekundji+ ka tala lo lɛkɛ la sidɛ ka tabɛrnaklɛ mbɛlanɛ la mɛsa. 36 Kosale dihɔndɔ di’okombɔ dikambo dia soko dia luudu la dipɛma la eshinga wa bule, eshinga w’ebelabela, eshinga wa beela k’efula ndo la linɛnɛ la dimɛna la lɛla.+ 37 Kosale dikundji 5 la osongo wa akasia dia mpanɛ dihɔndɔ di’okombɔ ndo kokite paonyi lɔkɔ. Kosale tɔkɔhɔ tadiɔ la paonyi ndo kosale dikitshelo 5 dia nkonga diele l’afuku dikambo diadiɔ.

27 “Kosale elambwelo la abaya+ w’osongo wa akasia. Tɔ kayale l’otale wa kubita* 5 ndo woke wa kubita 5. Elambwelo kakɔ kayale la atshuku 4 wɛdimi ndo la tanga+ dia kubita 3. 2 Kosale nseke+ lo atshuku atɔ 4. Nseke yakɔ kayonge etenyi kɛmɔtshi ka lo elambwelo ndo kokite nkonga+ lo elambwelo kakɔ. 3 Kosale mpoke ya minyaka otoko* wa lɔkɔ, kaamɛ ndo mpawo, alɔnga w’afuku, nsɔmɔ ndo diangɔ dia mɛmbaka dja. Kosale diangɔ sɔ tshɛ la nkonga.+ 4 Kosale lokala la nkonga ndo lɔ kalonge oko ɔtɛyi. Kodje ashingo 4 wa nkonga suke la lokala lakɔ lo atshuku 4 wa elambwelo. 5 Koliholoya l’ɛse k’ohembo wa elambwelo ndo ɔtɛyi akɔ kawoholɔ yema. 6 Kosale esembe wa elambwelo la osongo wa akasia ndo kokite nkonga lɔkɔ. 7 Esembe kawɔtɔ lo ashingo kele esembe kawoyale wedi akɔ 2 wa elambwelo etena kayodiɛmbamaka.+ 8 Kosale elambwelo oko ɔshɛtɛ wele hwe l’etei. Kokisale paka woho wakandakɛnya lo dikona.+

9 “Kosale lokombo+ la tabɛrnaklɛ. Lo lɛkɛ la sidɛ, mbɛlanɛ la sidɛ, lokombo kalodingame la ahɔndɔ w’okombɔ wahanema wakasalema la linɛnɛ la dimɛna la lɛla ndo kalonge la otale wa kubita 100 lo lɛkɛ+ lɔmɔtshi. 10 Lɔ layonga la dikundji 20 ndo la dikitshelo dia nkonga 20 diele l’afuku. Tɔkɔhɔ ta dikundji la diangɔ diadiɔ diakakatanya* kadiosaleme la mfɛsa. 11 Ahɔndɔ w’okombɔ wayohanemaka lo nɔrdɛ kawonge vɔ lawɔ otale wa kubita 100, kaamɛ la dikundji diadiɔ 20 la dikitshelo 20 dia nkonga diele l’afuku ndo tɔkɔhɔ ta mfɛsa la diangɔ diakakatanya* dia mfɛsa. 12 Ahɔndɔ w’okombɔ wayohanema lo owɛstɛ kawonge la otale wa kubita 50 lo wekeke wa lokombo kaamɛ la dikundji 10 ndo dikitshelo 10 diele l’afuku. 13 Wekeke wa lokombo wa lo ɛstɛ, otsha lɛnɛ atomba wonya kawoyale kubita 50. 14 Kohanɛ ahɔndɔ w’okombɔ ndo kawonge la otale wa kubita 15 lo lɛkɛ la lonya l’omi la soko ndo koke dikundji 3 diayonga la dikitshelo 3 diele l’afuku.+ 15 Lo lɛkɛ la lonya la lɔmɔsɔ la soko, kohanɛ ahɔndɔ w’okombɔ wa otale wa kubita 15 ndo koke dikundji 3 lɛkɔ diayonga la dikitshelo 3 diele l’afuku.

16 “Soko dia lokombo lakɔ pombaka monga la dihɔndɔ di’okombɔ diele la otale wa kubita 20 diakasalema la eshinga wa bule, eshinga w’ebelabela, eshinga wa beela k’efula ndo la linɛnɛ la dimɛna la lɛla,+ kaamɛ la dikundji 4 ndo la dikitshelo 4 diele l’afuku.+ 17 Dikundji tshɛ diayodinga lokombo pombaka monga la diangɔ diakakatanya dia mfɛsa ndo tɔkɔhɔ ta mfɛsa, koko dikitshelo diele l’afuku diayosalema la nkonga.+ 18 Lokombo lakɔ pombaka monga la otale+ wa kubita 100, woke wa kubita 50 ndo tanga dia kubita 5. Lokombo lakɔ layosalema la ahɔndɔ wa linɛnɛ la dimɛna la lɛla ndo lɔ pombaka monga la dikitshelo diele l’afuku diosalemi la nkonga. 19 Diangɔ tshɛ ndo dihomɔ tshɛ diakambema olimu lo tabɛrnaklɛ, mbidja ndo wekɔ wa luudu la dipɛma la wekɔ wa lokombo pombaka salema la nkonga.+

20 “Kodjange ase Isariyɛlɛ dia vɔ kelaka esɔ ka pudipudi k’ɔlivɛ dia pɛtshaka atala, kele atala kawɔhɛtake wonya tshɛ.+ 21 Lo luudu la dipɛma l’esanganelo, l’andja wa dihɔndɔ di’okombɔ diele suke la ɔshɛtɛ w’Ɔmɛnyi,+ Arɔna nde l’anande wayosala dia atala pɛtaka oma ko dikɔlɔ polo la pindju la ntondo ka Jehowa.+ Ɔsɔ ekɔ didjango dia pondjo diahomba ase Isariyɛlɛ+ kitanyiyaka lo nɔnga yawɔ tshɛ.

28 “Kɔshi ɔnanyɔ Arɔna nde l’anande w’apami oma l’atei w’ase Isariyɛlɛ dia vɔ kambɛmi+ oko ɛlɔmbɛdi. Arɔna+ nde l’anande w’apami+ anɛ: Nadaba, Abihu,+ Eleazara ndo Itamara.+ 2 Kosale ɔnanyɔ Arɔna ahɔndɔ w’ekila dikambo dia lotombo ndo dia olangala.+ 3 Kosawole la wanɛ tshɛ wele la diewo* wakamalodia la lomba,+ kele kawosale ahɔndɔ wa Arɔna dia nde kidiama woho wa nde kambɛmi oko ɔlɔmbɛdi.

4 “Ahɔndɔ anɛ mbayowosala: Ɛngɔ kalɔtawɔ lo ntolo,+ efodɛ,+ okutu+ wele bu l’anya, okutu wa karokaro, dihɔndɔ diadingawɔ l’ɔtɛ+ ndo ohele.+ Ahɔndɔ w’ekila asɔ mbayowosalɛ ɔnanyɔ Arɔna nde l’anande w’apami dia vɔ kambɛmi oko ɛlɔmbɛdi. 5 Ekambi wele la diewo kawokambe la paonyi, eshinga wa bule, eshinga w’ebelabela, eshinga wa beela k’efula ndo linɛnɛ la dimɛna.

6 “Kawosale efodɛ wa paonyi, eshinga wa bule, eshinga w’ebelabela, eshinga wa beela k’efula ndo la linɛnɛ la dimɛna la lɛla, ko vɔ mbidja asango.+ 7 Vɔ pombaka monga la diangɔ 2 dia l’ahɛka diokakatanyi la diko di’ehembo 2. 8 Ohele*+ wa efodɛ wayokelekamaka lo efodɛ dia mbokeketsha lo demba pombaka salema la diangɔ diakɔ diamɛ: Eshinga wa paonyi, eshinga wa bule, eshinga w’ebelabela, eshinga wa beela k’efula ndo linɛnɛ la dimɛna la lɛla.

9 “Kɔshi mbɔkɔ+ 2 ya ɔniksɛ, ko wɛ mfunda nkombo y’ana w’Isariyɛlɛ+ lɔkɔ, 10 nkombo 6 lo lɔwɔkɔ lɔmɔtshi ndo nkombo nkina 6 lo lɔwɔkɔ lokina lo ndjela woho wakawotɔ. 11 Ɔnɛ lafunda nkombo lo mbɔkɔ kafunde nkombo y’ana w’Isariyɛlɛ lo mbɔkɔ 2 oko onto ladja ohomɔ.+ Oma laasɔ ko wɛ ndjikɔhɛ lo ekimedi wa paonyi. 12 Kodje mbɔkɔ yakɔ 2 laadiko dia diangɔ dia l’ahɛka dia lo efodɛ dia yɔ monga mbɔkɔ ya eohwelo le ana w’Isariyɛlɛ.+ Arɔna ayɛmbaka nkombo yawɔ la ntondo ka Jehowa laadiko dia diangɔ 2 dia l’ahɛka oko eohwelo. 13 Kosale ekimedi wa paonyi, 14 ndo eshinga 2 wa loshinga la paonyi ka pudipudi dia vɔ monga oko ɛkɔdi,+ ko wɛ nkeleka eshinga akɔ lo ekimedi.+

15 “Koyange onto leya dia nde nsala ɛngɔ kalɔtawɔ lo ntolo ka kilombo.+ Tɔ pombaka salema la diangɔ diakɔ diamɛ oko efodɛ: Eshinga wa paonyi, eshinga wa bule, eshinga w’ebelabela, eshinga wa beela k’efula ndo linɛnɛ la dimɛna la lɛla.+ 16 Naka wambokinɛ lo 2, tɔ pombaka monga la atshuku 4 wɛdimi, otale wa nana* dia lonya 1 ndo woke wa nana dia lonya 1. 17 Kohakɛ mbɔkɔ ya lohakɛ lɔkɔ, ɛnɔngɔ 4 wa mbɔkɔ. Ɔnɔngɔ wa ntondo wayonga la lɔwɔkɔ la rubi, la topazɛ ndo la emɛrɔdɛ. 18 Ɔnɔngɔ wa 2 la lɔwɔkɔ la tirikwazɛ, la safirɛ ndo la jaspɛ. 19 Ɔnɔngɔ wa 3 la lɔwɔkɔ la lɛshɛmɛ,* la agatɛ ndo la ametistɛ. 20 Ɔnɔngɔ wa 4 la lɔwɔkɔ la krizɔlitɛ, la ɔniksɛ ndo la jadɛ. Yɔ pombaka mamema lo ekimedi wa paonyi. 21 Mbɔkɔ yakɔ yayɔtɔnɛ la nkombo y’ana w’Isariyɛlɛ 12. Lɔwɔkɔ la lɔwɔkɔ layofundama lokombo lɔmɔtshi oko ohomɔ, lokombo tshɛ layɔtɔnɛka la dioho dimɔtshi dia lo waoho 12.

22 “Kosale oshinga wa loshinga lo ɛngɔ kalɔtawɔ lo ntolo, oko ɛkɔdi wa paonyi ka pudipudi.+ 23 Kosale ashingo 2 wa paonyi dikambo dia ɛngɔ kalɔtawɔ lo ntolo ndo kɔkɔhɛ ashingo akɔ 2 lo tokoma 2 wa lo ɛngɔ kalɔtawɔ lo ntolo. 24 Kodje eshinga akɔ 2 wa paonyi lo ashingo 2 wa lo tokoma t’ɛngɔ kalɔtawɔ lo ntolo. 25 Kodje tokoma takɔ 2 t’eshinga akɔ 2 lo ekimedi 2 ndo kowakeleke lo diangɔ dia l’ahɛka dia lo efodɛ oma la ntondo. 26 Kosale ashingo 2 wa paonyi ndo kowadje lo tokoma takɔ 2 oma l’etei ka ɛngɔ kalɔtawɔ lo ntolo mbɛlanɛ la efodɛ.+ 27 Kosale ashingo akina 2 wa paonyi la ntondo ka efodɛ, l’ɛse ka diangɔ 2 dia l’ahɛka, suke la lɛnɛ okakatanyidiɔ, yema la diko dia ohele* wa efodɛ.+ 28 Ɛngɔ kalɔtawɔ lo ntolo kayokimamɛ la oshinga wa bule oma l’ashingo awɔ polo l’ashingo wa efodɛ. Ngasɔ mbayokimamɛ ɛngɔ kalɔtawɔ lo ntolo lo dihole diatɔ lo efodɛ yema la diko dia ohele.*

29 “Arɔna kɛmbake nshi tshɛ nkombo y’ana w’Isariyɛlɛ lo ɛngɔ kalɔtawɔ lo ntolo ka kilombo laadiko di’otema ande etena kayondɔtɔka lo dihole di’ekila oko eohwelo la ntondo ka Jehowa. 30 Kodje Urimɛ la Tumimɛ*+ lo ɛngɔ kalɔtawɔ lo ntolo ka kilombo ndo diangɔ sɔ kadioyalake laadiko di’otema waki Arɔna etena kayondemalaka la ntondo ka Jehowa. Arɔna kɛmbake diangɔ diakimanyiya lo dombo di’ana w’ase Isariyɛlɛ laadiko di’otema ande la ntondo ka Jehowa tena tshɛ.

31 “Kosale ndo okutu wele bu l’anya la eshinga wa bule+ eto dia ndɔtaka l’ɛse ka efodɛ. 32 Vɔ kawoyale la nkingo la diko l’atei atei. Nkingo kawɔ k’otondo pombaka monga l’ohembo l’otshimbedi atɔ wɔtɛlami oma le atɛdi w’ahɔndɔ. Ndo tɔ pombaka monga oko nkingo ka dikɔti dia mbolo diaha tɔ mbatɛ. 33 Kodje l’ohembo awɔ wa l’ɛse tangangɔ tele oko elowa wa pɔmɛgranatɛ tosalemi la eshinga wa bule, eshinga w’ebelabela, eshinga wa beela k’efula kaamɛ ndo tongungangunga ta paonyi lam’asatɔ. 34 Kodje ngungangunga ya paonyi lam’asa yangɔ yele oko olowa wa pɔmɛgranatɛ, ngungangunga ko yangɔ yele oko olowa wa pɔmɛgranatɛ, l’otshimbedi w’otondo w’ohembo wa l’ɛse w’okutu wele bu l’anya. 35 Arɔna pombaka mbɔlɔtaka dia nde nkamba olimu ande ndo londjo la tongungangunga pombaka mbokɛmaka etena kayondotshɔka otsha lo tɛmpɛlɔ k’ekila la ntondo ka Jehowa ndo etena kayondotombaka oma lɛkɔ diaha nde mvɔ.+

36 “Kosale lokaka la ngaingai la paonyi ka pudipudi ndo kofunde lɔkɔ oko onto ladja ohomɔ ɔnɛ: ‘Jehowa ekɔ kanga ekila.’+ 37 Kolihakɛ lo dihɔndɔ diadingawɔ l’ɔtɛ+ la oshinga wa bule ndo lɔ la dia tshikalaka la ntondo ka dihɔndɔ diadingawɔ l’ɔtɛ. 38 Lokaka lakɔ kaloyalake l’okoko wa Arɔna ndo Arɔna ayongaka l’onongo etena kayosalaka onto ɔmɔtshi munga lo kɛnɛ kendana la diangɔ+ di’ekila diakidia ase Isariyɛlɛ etena kadikimɔwɔ oko weshasha w’ekila. Lɔ pombaka tshikalaka tena tshɛ l’okoko ande dia vɔ mbetawɔma le Jehowa.

39 “Kosale okutu wa karokaro la linɛnɛ la dimɛna, kosale dihɔndɔ diadingawɔ l’ɔtɛ la linɛnɛ la dimɛna ndo kosale ohele.+

40 “Kosale ndo ekutu, ehele, ndo ahɔndɔ wa l’ɔtɛ dikambo di’ana w’apami+ w’Arɔna dia vɔ tombɔma ndo monga elangala.+ 41 Kɔlɔtsha ɔnanyɔ Arɔna nde l’anande w’apami ɛlɔtɔ ɛsɔ, kowakite esɔ+ dia mbasɔna,+ kowalowole ndo kowakidia kele kawonkambɛke oko ɛlɔmbɛdi. 42 Ndo nto, kowasale kupe* ya linɛnɛ dia vɔ nkomba tenyi diawɔ di’alemba+ dia nsɔnyi. Kupe yakɔ pombaka monga l’otale w’oma lo lokende polo lo pɛlɔhɛlɔ. 43 Arɔna nde l’anande w’apami kawoyilɔtake etena kɔtɔwɔ lo luudu la dipɛma l’esanganelo kana etena kasukanawɔ lo elambwelo dia ndjokamba olimu lo dihole di’ekila diaha vɔ monga la onongo ndo mvɔ. Ɔsɔ ekɔ didjango dia pondjo le nde ndo le ana la tokanula* tande.

29 “Dia wɛ mbakidia dia vɔ kambɛmi oko ɛlɔmbɛdi, kosale nganɛ: Kɔshi ɔsɔngɔ wa ngɔmbɛ, ɛkɔkɔ wa waomi+ 2 waha la ɛkɔmɔ, 2 mapa waha la wodoya, mapa w’ebolonga waha la wodoya wɔsɔhanyemi la esɔ ndo mapa wa tɔlɛwɛlɛwɛ waha la wodoya wokitshiwɔ esɔ.+ Kosale diangɔ sɔ la ofushi w’eponga wa dimɛna, 3 kele kodidje lo saka ko wɛ diela lo saka+ kaamɛ la ngɔmbɛ ndo la ɛkɔkɔ wa waomi 2.

4 “Kela Arɔna nde l’anande w’apami la soko dia luudu la dipɛma l’esanganelo+ ndo kowaɔtsha la ashi.+ 5 Oma laasɔ, kɔshi ahɔndɔ+ kele kɔlɔtsha Arɔna okutu wa karokaro, okutu wele bu l’anya wa l’ɛse ka efodɛ, efodɛ ndo ɛngɔ kalɔtawɔ lo ntolo. Kowokeleke ndo ohele* wakakatanya efodɛ lo lokende la nde.+ 6 Kowɔlɔtsha dihɔndɔ diadingawɔ l’ɔtɛ ndo kodje djembetelo y’ekila ya woho wamondoyakimɔ* le Nzambi laadiko dia dihɔndɔ diadingawɔ l’ɔtɛ.+ 7 Kɔshi esɔ+ k’okitelo kele kote l’ɔtɛ ande dia wɛ mbokita esɔ.+

8 “Oma laasɔ, koye la anande w’apami ndo kowalɔtsha ekutu,+ 9 kowakeleke ehele, Arɔna nde l’anande w’apami, ko wɛ mbalɔtsha ndo ahɔndɔ wa l’ɔtɛ. Vɔ wayonga dioho di’ɛlɔmbɛdi pondjo pondjo.+ Ngasɔ mbayoyolowola Arɔna nde l’anande w’apami dia vɔ nkamba oko ɛlɔmbɛdi.*+

10 “Oma laasɔ, kela ngɔmbɛ la ntondo ka luudu la dipɛma l’esanganelo ndo Arɔna nde l’anande w’apami kawahɛ anya awɔ l’ɔtɛ wa ngɔmbɛ kakɔ.+ 11 Kodiake ngɔmbɛ kakɔ la ntondo ka Jehowa, la soko dia luudu la dipɛma l’esanganelo.+ 12 Kɔshi yema ya dikila dia ngɔmbɛ kakɔ lo lohita, kele kokite lo nseke yele lo elambwelo+ ndo kotshole dikila diayotshikala lo elambwelo.+ 13 Oma laasɔ, kɔshi wata+ tshɛ wakomba ɛsɔhi, wata wa l’ovɔ ndo awondo akɔ 2 kaamɛ la wata wele laadiko diawɔ, ko wɛ mbatshumba dia ntutola edinga lo elambwelo.+ 14 Koko emunyi wa ngɔmbɛ kakɔ kaamɛ la lokoho latɔ ndo tumi yatɔ, kotshumbe lo dja l’andja wa mpango. Ɔsɔ ekɔ olambo wa pɛkato.

15 “Oma laasɔ, kɔshi ɔkɔkɔ w’omi ɔmɔtshi kele Arɔna nde l’anande w’apami kawahɛ anya awɔ l’ɔtɛ+ w’ɔkɔkɔ akɔ. 16 Kodiake ɔkɔkɔ akɔ ndo kɔshi dikila diawɔ kele kodimɔngɛ lo wedi akɔ tshɛ wa elambwelo.+ 17 Kɔsɛsɛ ɔkɔkɔ akɔ w’omi ndo kosole ɛsɔhi+ awɔ la nsanga yawɔ, ko wɛ nkitsha kaamɛ la ɔtɛ. 18 Kotshumbe otondo w’ɔkɔkɔ akɔ w’omi dia ntutola edinga lo elambwelo. Ɔsɔ ekɔ olambo wa lotshumba dikambo dia Jehowa, olambo wele l’opumu+ wa dimɛna.* Ɔsɔ ekɔ olambo watshumbama lo dja dikambo dia Jehowa.

19 “Oma laasɔ, kɔshi ɔkɔkɔ okina w’omi kele Arɔna nde l’anande w’apami kawahɛ anya awɔ l’ɔtɛ w’ɔkɔkɔ akɔ.+ 20 Kodiake ɔkɔkɔ akɔ ndo kɔshi yema ya dikila, kele kokite lo toyi dia lonya l’omi diaki Arɔna ndo lo atoyi wa lonya l’omi laki anande w’apami ndo lo lohita l’omi la lonya lawɔ l’omi ndo lo lohita la woke la lo lokolo lawɔ l’omi ndo kɔmɔngɛ dikila lo wedi akɔ tshɛ wa elambwelo. 21 Oma laasɔ, kɔshi yema ya dikila diele lo elambwelo ndo yema y’esɔ+ k’okitelo kele kokite Arɔna, ahɔndɔ ande, anande w’apami ndo lo ahɔndɔ w’anande w’apami, dia nde l’ahɔndɔ ande ndo anande w’apami l’ahɔndɔ awɔ monga ekila.+

22 “Oma laasɔ, kɔshi wata w’ɔkɔkɔ akɔ w’omi: Wela wele la wata, wata wa lo ɛsɔhi, wata wa l’ovɔ, awondo akɔ 2 la wata wa lɔkɔ+ ndo elemba ka lokolo l’omi, nɛ dia ɔsɔ ekɔ ɔkɔkɔ w’olowelo.+ 23 Kɔshi ndo mapa 1 w’obolonga, mapa 1 w’obolonga wɔsɔhanyemi la esɔ ndo mapa wa djɛwɛlɛwɛ 1 oma lo saka diele la mapa waha la wodoya wele la ntondo ka Jehowa. 24 Kodje diangɔ sɔ tshɛ lo anya wa Arɔna ndo lo anya w’anande w’apami, ndo kodietshetsha oko olambo wa letshetsha la ntondo ka Jehowa. 25 Oma laasɔ, kodiɔshi oma l’anya awɔ kele koditshumbe lo elambwelo, laadiko dia olambo wa lotshumba oko olambo wele la opumu wa dimɛna* la ntondo ka Jehowa. Ɔsɔ ekɔ olambo watshumbama lo dja dikambo dia Jehowa.

26 “Oma laasɔ, kɔshi ntolo k’ɔkɔkɔ w’omi w’olowelo+ wayolambɔma lo wahɔ wa Arɔna, kele kokietshetsha oko olambo wa letshetsha la ntondo ka Jehowa ndo tɔ kayoyala etenyi kayɛ. 27 Kokidia ntolo k’olambo wa letshetsha ndo elemba k’etenyi k’ekila kaketshetshama ndo kakɔsama oma lo ɔkɔkɔ w’omi w’olowelo,+ oma lo kɛnɛ kakalambɔma dikambo dia Arɔna nde l’anande w’apami. 28 Tenyi sɔ diayoyala diaki Arɔna ndo diaki anande w’apami oko didjango dia pondjo diayokitanyiyaka ase Isariyɛlɛ, nɛ dia ɔsɔ ekɔ tenyi di’ekila. Ɔsɔ ayoyala tenyi di’ekila diayokimɔka ase Isariyɛlɛ.+ Ɔsɔ ekɔ tenyi di’ekila dikambo dia Jehowa diayɔsamaka oma l’elambo+ awɔ w’osanga.

29 “L’ɔkɔngɔ wa Arɔna, anande w’apami+ wayɔlɔtaka ahɔndɔ+ ande w’ekila etena kayowokitamaka esɔ ndo kayowolowɔmaka oko ɛlɔmbɛdi. 30 Ɔlɔmbɛdi ɔmɔtshi oma l’atei w’anande w’apami wayowɔhɛna ndo wayɔtɔka lo luudu la dipɛma l’esanganelo dia nkamba olimu lo dihole di’ekila kalɔtake ahɔndɔ akɔ l’edja ka nshi+ 7.

31 “Kɔshi ɔkɔkɔ w’omi w’olowelo, ko wɛ nkatɛ emunyi awɔ lo dihole di’ekila.+ 32 Arɔna nde l’anande w’apami kawole+ emunyi w’ɔkɔkɔ akɔ ndo mapa wele lo saka diele la soko dia luudu la dipɛma l’esanganelo. 33 Kawole olambo wakakimɔma dia nkomba pɛkato yawɔ etena kakawalowɔma oko ɛlɔmbɛdi* ndo kakawakidiama. Koko ndooko onto lele bu la lotshungɔ* lahomba ndɛ diangɔ sɔ, nɛ dia diangɔ sɔ diekɔ ekila.+ 34 Naka nyama k’olambo w’olowelo kana mapa wambotshikala polo la pindju, ko wɛ ntshumba kɛnɛ kotshikadi lo dja.+ Kɛnɛ kotshikadi hahombe ndɛma dikambo ɔsɔ ekɔ ɛngɔ k’ekila.

35 “Ngasɔ kahombayɛ salɛ Arɔna nde l’anande w’apami lo ndjela kɛnɛ tshɛ kakamakodjangɛ. Kɔshi nshi 7 dia mbalowola oko ɛlɔmbɛdi.*+ 36 Kolambolake ngɔmbɛ k’olambo wa pɛkato lushi la lushi dia nkomba pɛkato ndo nkidia elambwelo oma lo pɛkato lo nsala ekombelo ka pɛkato dikambo diatɔ ndo kokikite esɔ dia kikidia.+ 37 Kɔshi nshi 7 dia nkomba pɛkato lo elambwelo ndo kokikidia dia tɔ monga elambwelo koleki ekila.+ Onto tshɛ lakamba lo elambwelo pombaka monga ekila.

38 “Kɛnɛ kayoyolambolaka lo elambwelo tɔ kɛnɛ: Ɛsɔngɔ 2 w’ɛkɔkɔ wa waomi wele la ɔnɔnyi 1 mbayoyolambolaka lushi la lushi tena tshɛ.+ 39 Kolambolake ɔsɔngɔ ɔmɔtshi w’ɔkɔkɔ w’omi la pindju ndo ɔkɔkɔ okina w’omi la dikɔlɔ dia tosho ta shimba.*+ 40 Etenyi ka dikumi ka yɛdikɔ ya efa* w’ofushi wa dimɛna nsanganya la k’anɛi ɔtɔi ka yɛdikɔ ya hina* k’esɔ k’ɔlivɛ wa lɔtɔ kaamɛ ndo olambo wa lotɛ wa k’anɛi ɔtɔi ka yɛdikɔ ya hina ka wanu. Kɛsɔ kayoyolambolaka la ɔsɔngɔ w’ɔkɔkɔ w’omi wa ntondo. 41 Kolambolake ɔsɔngɔ w’ɔkɔkɔ w’omi wa 2 la dikɔlɔ dia tosho ta shimba* kaamɛ la ofushi wa ntɔngɔ yakɔ yaamɛ ndo la olambo wa lotɛ oko wa la pindju. Kolambolake diangɔ sɔ oko olambo w’opumu wa dimɛna,* olambo watshumbama lo dja dikambo dia Jehowa. 42 Ɔsɔ ayonga olambo wa lotshumba wayolambɔmaka lo nɔnga yanyu tshɛ la soko dia luudu la dipɛma l’esanganelo la ntondo ka Jehowa, lɛnɛ ayomɛnama la ntondo kanyu dia nsawola la nyu laawɔ.+

43 “Dimi layɛnama le ase Isariyɛlɛ laawɔ ndo lotombo+ lami layokidia dihole sɔ. 44 Dimi layokidia luudu la dipɛma l’esanganelo ndo elambwelo. Dimi layokidia Arɔna nde l’anande w’apami+ dia vɔ kambɛmi oko ɛlɔmbɛdi. 45 Dimi layodjasɛ l’atei w’ase Isariyɛlɛ ndo dimi layonga Nzambi+ kawɔ. 46 Ndo lo weho akɔ tshɛ, vɔ wayeya dia dimi kele Jehowa Nzambi kawɔ, lakaatondja oma lo wodja w’Edjibito dia dimi mbidjasɛ l’atei awɔ.+ Dimi kele Jehowa Nzambi kawɔ.

30 “Kosale elambwelo dia tshumbaka tshɔ.+ Kokisale la abaya+ w’osongo wa akasia. 2 Tɔ pombaka monga la atshuku 4 wɛdimi, otale wa kubita* 1, woke wa kubita 1 ndo tanga dia kubita 2. Tɔ la nseke yatɔ+ kawonge ɛngɔ 1. 3 Kokite paonyi ka pudipudi laadiko diatɔ, l’emamu atɔ tshɛ ndo lo nseke yatɔ. Kosale ndo ohembo wa paonyi l’otshimbedi atɔ. 4 Kosale ndo ashingo wa paonyi lɔkɔ l’ɛse k’ohembo atɔ, 2 wedi ɔnɛ ndo 2 wedi okina dia mbidjaka esembe lɔkɔ dia kiɛmbaka. 5 Kosale esembe la osongo wa akasia ndo kokite paonyi lɔkɔ. 6 Kokikitsha la ntondo ka dihɔndɔ di’okombɔ diele suke la ɔshɛtɛ w’Ɔmɛnyi+ la ntondo ka ofidi wele laadiko dia ɔshɛtɛ akɔ, lɛnɛ ayomɛnama le yɛ.+

7 “Arɔna+ katshumbake tshɔ+ y’opumu lɔkɔ,+ katutolake edinga lo elambwelo ndo kalɔngɔsɔlake atala+ pindju tshɛ. 8 Ndo nto, lam’ayɔhɛtshaka Arɔna atala la dikɔlɔ dia tosho ta shimba,* nde katshumbake tshɔ. Ɔsɔ ekɔ tshɔ yayolambɔmaka la ntondo ka Jehowa mbala la mbala lo nɔnga yanyu tshɛ. 9 Tolambolake lɔkɔ tshɔ+ kana olambo wa lotshumba kana olambo wa ntɔngɔ wahayalongodi lotshungɔ la nambola. Ndo totɛke olambo wa lotɛ lɔkɔ. 10 Arɔna kakite yema ya dikila y’oma lo nyama k’olambo wa pɛkato lo nseke ya lo elambwelo dia kiɛdia.+ Nde kasalake dikambo sɔ mbala 1 l’ɔnɔnyi+ lo nɔnga yanyu tshɛ dia nde nkomba pɛkato yatɔ. Ɔsɔ ekɔ ɛngɔ koleki ekila le Jehowa.”

11 Oma laasɔ, Jehowa akatɛ Mɔsɛ ate: 12 “Etena tshɛ kayoyadiaka ana w’Isariyɛlɛ+ dia mbeya lofulo lawɔ, onto tshɛ pombaka nkimɔ oshinga w’etshungwelo le Jehowa dia ntshungola lɔsɛnɔ* lande etena kasalema wadielo. Kawosalake ngasɔ diaha sui dimɔtshi mbakomɛ etena kayowofundjaka nkombo. 13 Wanɛ tshɛ wayofundjaka nkombo wayokimɔka diangɔ nɛ: K’ahende ɔtɔi ka shɛkɛlɛ* lo ndjela yɛdikɔ ya shɛkɛlɛ ya lo dihole di’ekila.*+ Ngera* 20 ekɔ yɛdikɔ ya shɛkɛlɛ 1. K’ahende ɔtɔi ka shɛkɛlɛ ekɔ woshasha wa Jehowa.+ 14 Onto tshɛ lele la ɛnɔnyi oma lo 20 otsha la diko layofundjaka lokombo ayokimɔka woshasha wa Jehowa.+ 15 Kanga ɔngɔnyi hahombe nkimɔ efula ndo ose wola hahombe nkimɔ l’ɛse ka k’ahende ɔtɔi ka shɛkɛlɛ* oko woshasha le Jehowa dia ntshungola nsɛnɔ* yanyu. 16 Kɔsake falanga ya mfɛsa y’olambo w’ekombelo ka pɛkato oma le ase Isariyɛlɛ, ko wɛ ndjikimɔ l’olimu wa lo luudu la dipɛma l’esanganelo dia yɔ monga oko eohwelo la ntondo ka Jehowa le ase Isariyɛlɛ oko oshinga w’etshungwelo dikambo dia nsɛnɔ* yanyu.”

17 Jehowa akatɛ Mɔsɛ nto ate: 18 “Kosale dɔnga dia woke dia nkonga la ekitshelo kadiɔ dikambo di’osolelo+ kele kodikitsha lam’asa luudu la dipɛma l’esanganelo la elambwelo ndo kodje ashi lɔkɔ.+ 19 Arɔna nde l’anande w’apami kawosolake anya awɔ la ekolo awɔ laawɔ.+ 20 Lam’ayowɔtɔka lo luudu la dipɛma l’esanganelo kana lam’ayowosukanaka la elambwelo dia nkamba olimu ndo dia ntshumba olambo ndo ntutola edinga otsha le Jehowa, vɔ kawɔkake diaha vɔ mvɔ. 21 Vɔ pombaka nsola anya awɔ la ekolo awɔ diaha vɔ mvɔ ndo ɔsɔ ayonga didjango dia pondjo le wɔ, le nde, le anande ndo le tokanula tande lo nɔnga+ yawɔ tshɛ.”

22 Jehowa akatetemala mbutɛ Mɔsɛ ate: 23 “Oma laasɔ, kɔshi diangɔ di’opumu dioleki amɛna nɛ: Tɔshɛkɛlɛ 500 ta mirɛ y’ekama, k’ahende ɔtɔi ka yɛdikɔ shɔ, tɔshɛkɛlɛ 250 ta kinamɔna k’opumu, tɔshɛkɛlɛ 250 ta kalamusu k’opumu, 24 tɔshɛkɛlɛ 500 ta kasia, lo ndjela yɛdikɔ ya shɛkɛlɛ ya lo dihole di’ekila,*+ kaamɛ la hina* 1 k’esɔ k’ɔlivɛ. 25 Oma laasɔ, kosale esɔ k’ekila k’okitelo la diangɔ sɔ. Diɔ pombaka sɔhanyema+ dimɛna.* Ɔsɔ ayonga esɔ k’ekila k’okitelo.

26 “Kote esɔ k’okitelo lo luudu la dipɛma l’esanganelo+ ndo lo ɔshɛtɛ w’Ɔmɛnyi, 27 ndo lo mɛsa la diangɔ diawɔ tshɛ, lo ekundji ka tala la diangɔ diatɔ tshɛ, lo elambwelo dia tshumbaka tshɔ, 28 lo elambwelo k’olambo wa lotshumba la diangɔ diatɔ tshɛ ndo lo dɔnga dia woke la ekitshelo kadiɔ. 29 Kodikidia dia diɔ monga diangɔ dioleki ekila.+ Onto tshɛ lakamba la diɔ pombaka monga ekila.+ 30 Kokite Arɔna+ la anande w’apami+ esɔ ndo kowakidia dia vɔ kambɛmi+ oko ɛlɔmbɛdi.

31 “Kote ase Isariyɛlɛ wate: ‘Ɔnɛ ayotetemala monga esɔ k’ekila k’okitelo le mi lo nɔnga+ yanyu tshɛ. 32 Tanyokikitake lo demba di’onto ndo tanyosalake ɛngɔ kekina la diangɔ diasalema esɔ kakɔ. Ɔsɔ ekɔ ɛngɔ k’ekila. Ɔsɔ ayotetemala monga ɛngɔ k’ekila le nyu. 33 Onto tshɛ layosala esɔ ka woho akɔ ndo layokitɛ onto lele bu la lotshungɔ* la kitama esɔ kakɔ pombaka ndjakema.’”+

34 Oma laasɔ, Jehowa akatɛ Mɔsɛ ate: “Ɔsa yɛdikɔ yɛdimi ya diangɔ di’opumu+ nɛ: Apɔpɔ wa stakitɛ, ɔnika, ngalabanumɛ k’opumu ndo tshɔ ya wɛma ya pudipudi, 35 ko wɛ disala tshɔ.+ Osanganyelo wa diangɔ di’opumu sɔ pombaka salema dimɛna,* mbidjama lɛɛhɔ,+ monga pudipudi ndo ekila. 36 Kɔtɔ yema mɔtshi dia wɛ nsala ofushi wa dimɛna, ko wɛ mbitɛ yema la ntondo k’ɔshɛtɛ w’Ɔmɛnyi lo luudu la dipɛma l’esanganelo lɛnɛ ayomɛnama le yɛ. Tshɔ shɔ pombaka monga ɛngɔ koleki ekila le nyu. 37 Tosalake tshɔ yosanganyemi+ la diangɔ sɔ dia wɛ nkamba la yɔ wɛmɛ. Wɛ pombaka ndjiɔsa oko ɛngɔ k’ekila dikambo dia Jehowa. 38 Onto tshɛ layosala tshɔ ya ngasɔ dia nde nɔna opumu ayɔ pombaka ndjakema.”

31 Jehowa akatetemala mbutɛ Mɔsɛ ate: 2 “Eenda, dimi lambɔsɔna Bɛzalɛlɛ+ ɔna Uri ɔna Hura wa lo dioho dia Juda.+ 3 Dimi layowolodia la nyuma ka Nzambi, layowosha lomba, shɛnɔdi ndo diewo dia weho tshɛ w’elimu w’etshudi, 4 dia nsala dikongelo dia sɛlasɛla, dia nkamba la paonyi, la mfɛsa ndo la nkonga, 5 dia mbata ndo nkɔlɔnga mbɔkɔ+ ndo dia nsɛla sɛlasɛla+ dia weho tshɛ w’esongo. 6 Ndo nto, dia mbokimanyiya, dimi lambɔsɔna Ɔhɔliabɛ+ ɔna Ahisamakɛ wa lo dioho dia Danɛ ndo layanga mbidja lomba l’etema w’anto tshɛ wele la diewo,* dia vɔ mbeya nsala ɛngɔ tshɛ kakamakodjangɛ:+ 7 Luudu la dipɛma l’esanganelo,+ ɔshɛtɛ w’Ɔmɛnyi+ la ofidi+ wa laadiko diawɔ, diangɔ tshɛ dia lo tabɛrnaklɛ, 8 mɛsa+ la diangɔ diawɔ, ekundji ka tala ka paonyi ka pudipudi la diangɔ+ diatɔ tshɛ, elambwelo ka tshumbaka tshɔ,+ 9 elambwelo k’olambo+ wa lotshumba la diangɔ diatɔ tshɛ, dɔnga dia woke la ekitshelo+ kadiɔ, 10 ahɔndɔ w’amɛna wa lɛla, ahɔndɔ w’ekila dikambo dia ɔlɔmbɛdi Arɔna, ahɔndɔ w’anande w’apami dia nkamba oko ɛlɔmbɛdi,+ 11 esɔ k’okitelo ndo tshɔ y’opumu dikambo dia tɛmpɛlɔ k’ekila.+ Vɔ wayosala oseka ɛngɔ tshɛ kakamakodjangɛ.”

12 Jehowa akatɛ Mɔsɛ nto ate: 13 “Sawola l’ase Isariyɛlɛ kele tɛwɔ wate: ‘Kanyɔlɛmiyake djekoleko sabato+ yami, nɛ dia ɔsɔ ekɔ djembetelo lam’asami la nyu lo nɔnga yanyu tshɛ, dia nyu mbeya nyate dimi Jehowa mbanyetɛ ekila. 14 Kanyɔlɛmiyake Sabato, nɛ dia tɔ kekɔ ekila le nyu.+ Onto tshɛ lakiɔnyɔla pombaka ndjakema. Naka onto ɔmɔtshi ambokamba olimu lushi lakɔ, onto akɔ pombaka ndjakema.+ 15 Nyu mbeyaka nkamba olimu nshi 6, koko lushi la 7 lekɔ sabato, lushi la momuya tshɛ lo tshɛ.+ Tɔ kekɔ ekila dikambo dia Jehowa. Onto tshɛ layokamba olimu lushi la Sabato pombaka ndjakema. 16 Ase Isariyɛlɛ pombaka nɛmiya Sabato. Vɔ pombaka nɛmiya Sabato lo nɔnga yawɔ tshɛ. Ɔsɔ ekɔ sheke ya pondjo. 17 Ɔsɔ ekɔ djembetelo ya pondjo le ase Isariyɛlɛ,+ nɛ dia l’edja ka nshi 6, Jehowa akatonge olongo la nkɛtɛ, ko lushi la 7 nde akatshike nkamba ndo akomuya.’”+

18 Kam’akashidiya Nzambi mbotɛ awui asɔ lo Dikona dia Sinayi, nde akasha Mɔsɛ pase 2 di’Ɔmɛnyi,+ pase di’ave diakafundama la lohita+ la Nzambi.

32 L’etena kɛsɔ, wodja wakɛnyi dia Mɔsɛ ambotoviya, nde haholɔ oma lo dikona.+ Ɔnkɔnɛ wodja wakatshumana lale Arɔna ko wakawotɛ vate: “Otosale nzambi kɛmɔtshi kahomba tatshɔka la ntondo kaso,+ nɛ dia hateye kɛnɛ kambotokomɛ Mɔsɛ, pami kakatotondja oma lo wodja w’Edjibito.” 2 Ko Arɔna akawatɛ ate: “Nyokolole azama+ wa paonyi oma lo atoyi wa wadiɛnyu, w’ananyu w’apami ndo w’ananyu wa wamato kele nyombishawɔ.” 3 Ko anto tshɛ wakakolola azama wa paonyi waki lo atoyi awɔ ko wakasha Arɔna. 4 Arɔna akɔshi paonyi oma le wɔ, akayitshule ko akasale lohingu* la yana ya ngɔmbɛ.+ Ko vɔ wakate vate: “Isariyɛlɛ le, ɔnɛ kele Nzambi kayɛ kakakotondja oma lo wodja w’Edjibito.”+

5 Lam’akɛnyi Arɔna ngasɔ, nde akasale elambwelo la ntondo kayɔ. Ko Arɔna akawelɛ ate: “Loyi ayonga fɛtɛ dikambo dia Jehowa.” 6 La wedi a pindju, vɔ waketɔ la pindju ka pɛɛ ndo wakatatɛ nambola elambo wa lotshumba ndo elambo w’osanga. Oma laasɔ, anto wakadjasɛ dia ndɛ ndo nnɔ. Ko vɔ wakemala dia ngɛnangɛna.+

7 Ko Jehowa akatɛ Mɔsɛ ate: “Holɔ, tshɔka, nɛ dia anto ayɛ wakayatondja oma lo wodja w’Edjibito wambosala kɔlɔ k’efula.+ 8 Vɔ wambomɔ esadi eto oma lo mboka kakamawadjangɛ dia vɔ mbidjɛ.+ Vɔ wamboyasalɛ lohingu* la yana ya ngɔmbɛ ndo wekɔ lo ntetemala likusamɛ ndo lilambola elambo, wata vate: ‘Isariyɛlɛ le, ɔnɛ kele Nzambi kayɛ kakakotondja oma lo wodja w’Edjibito.’” 9 Jehowa akatɛ Mɔsɛ ate: “Dimi lambɛna dia anto anɛ wekɔ ɛtɛ wolo.+ 10 Ɔnkɔnɛ, tshika mbashile oshiki la nkɛlɛ kami kadɔdɔ, ndo etawɔ dia dimi ntondja wodja okina wa woke oma le yɛ.”+

11 Ko Mɔsɛ akasɛngasɛnga Jehowa Nzambi+ kande ate: “Jehowa le, lande na kambodɔdɔ nkɛlɛ kayɛ otsha le wodja ayɛ l’ɔkɔngɔ wa wɛ mbatondja oma lo wodja w’Edjibito la wolo w’efula ndo la lonya la wolo?+ 12 Lande na kahomba ase Edjibito ndjota ɔnɛ: ‘L’ɔtɛ w’eyango wa kɔlɔ waki la nde mbakandaatondja? Shi nde akalange taadiaka lo akona ndo mbashila oshiki oma la nkɛtɛ?’+ Nkɛlɛ kayɛ kadɔdɔ katute ndo nyomenda* yɛdikɔ yayɛ ya mbokadia anto ayɛ waale. 13 Ohɔ Abrahama, Isaka ndo Isariyɛlɛ, ekambi ayɛ wakayatshibe lo lokombo layɛ ndo wakayatɛ wate: ‘Dimi layofudia tokanula* tayɛ oko tɔɔtɔ ta l’olongo+ ndo layosha tokanula* tayɛ wodja ɔnɛ wakamanyɛnya dia vɔ mbidjasɛ+ lɔkɔ pondjo pondjo.’”

14 Ko Jehowa akanyomenda* mpokoso kakandate dia mbela anto+ ande.

15 Oma laasɔ, Mɔsɛ akakadimɔ, ko akaholɔ oma lo dikona ele la pase 2 di’Ɔmɛnyi+ lo anya ande.+ Pase diakɔ diakafundama lo wedi akɔ 2, fundama la ntondo ndo l’ɔkɔngɔ. 16 Nzambi mbakasale pase sɔ ndo Nzambi mbakamate efundelo waki lo pase+ diakɔ. 17 Lam’akatatɛ Jashua mboka londjo l’anto nɛ dia vɔ wakadaka ekoko, nde akatɛ Mɔsɛ ate: “Lekɔ lo mboka londjo la ta lo mpango.” 18 Koko Mɔsɛ akate ate:

“Ɔsɔ bu londjo l’esambo w’anto wambodja otshumba,

Ndo ɔsɔ bu londjo l’anto walela l’ɔtɛ wambowɔlɛndjama lo ta.

Lekɔ lo mboka londjo la woho okina w’esambo.”

19 Kam’akasukana Mɔsɛ la mpango ndo kam’akandɛnyi ekishi ka yana ya ngɔmbɛ+ ndo woho wakanɔka anto lokombe, nkɛlɛ kande kakadɔdɔ, ko nde akakasha pase di’ave diaki l’anya ande ndo akadiatshatsha l’ɛse ka dikona.+ 20 Nde akɔshi ekishi ka yana ya ngɔmbɛ yakawasale, ko akakitshumbe lo dja ndo akakietɛ otoko+ oto. Oma laasɔ, nde akahandjola otoko akɔ lo ashi ndo akanɔsha ase Isariyɛlɛ ashi akɔ.+ 21 Ko Mɔsɛ akambola Arɔna ate: “Kakɔna kakakosalɛ anto anɛ dia wɛ mbakonya lo pɛkato ka woke nganɛ?” 22 Arɔna akakadimola ate: “Nkumɛmi le, tomalake. Wɛ mbeyaka dimɛna dia etema w’anto anɛ mbɛlɛka paka lo kɔlɔ.+ 23 Ɔnkɔnɛ vɔ wakambutɛ vate: ‘Otosale nzambi kɛmɔtshi kahomba tatshɔka la ntondo kaso, nɛ dia hateye kɛnɛ kambotokomɛ Mɔsɛ, pami kakatotondja oma lo wodja w’Edjibito.’+ 24 Diakɔ diakamawatɛ nte: ‘Onto tshɛ lele la paonyi akikolole kele ambishatɔ.’ Ko dimi lakayidje lo dja ndo oma lɔkɔ mbakatombe ekishi ka yana ya ngɔmbɛ.”

25 Mɔsɛ akɛnyi dia anto wakatambe olelo, nɛ dia Arɔna akaatshike dia vɔ ntamba olelo, diakɔ diakiwɔ ɛngɔ ka diɔnyɔ lo washo w’atunyi awɔ. 26 Ɔnkɔnɛ Mɔsɛ akatemala la soko dia mpango ko akate ate: “Akɔna ele lo wedi wa Jehowa? Nde aye le mi!”+ Ko Ase Lɛwi tshɛ wakatshumana lalende. 27 Nde akawatɛ ate: “Jehowa Nzambi k’Isariyɛlɛ kata ate: ‘Onto l’onto asɔmɛ lokuwa lande la ta lo lokende kele nyetete soko la soko dia lo mpango k’otondo dia onto l’onto ndjaka ɔnango, osukanyi ande ndo ɔngɛnyi+ ande wa ma ma.’” 28 Ase Lɛwi wakasale kɛnɛ kakate Mɔsɛ. Ɔnkɔnɛ lushi lɔsɔ, apami oko nunu sato (3 000) wakadiakema. 29 Ko Mɔsɛ akate ate: “Nyoyakitsha laande* ɛlɔ dikambo dia Jehowa, nɛ dia onto l’onto l’atei anyu akadiaki ɔnande kana ɔnango.+ Ɛlɔ, nde ayonyɔtshɔkɔla.”+

30 La wedi a pindju, Mɔsɛ akatɛ wodja ate: “Nyakasale pɛkato ka woke efula ndo kakianɛ dimi layanga mbidɛ otsha le Jehowa dia tɔlɔmba dia nde dimanyiya pɛkato+ kanyu.” 31 Ko Mɔsɛ akakalola le Jehowa ndo akate ate: “Ande pɛkato ka woke kambosala anto anɛ! Vɔ wamboyasalɛ jambizambi ya paonyi!+ 32 Koko naka wɛ nangaka, dimanyiyawɔ pɛkato+ kawɔ. Ko naka keema, kete lam’alangayɛ, odimole oma lo dibuku diayɛ.”+ 33 Koko Jehowa akatɛ Mɔsɛ ate: “Onto lakansalɛ pɛkato kayomodimola oma lo dibuku diami. 34 Kakianɛ tshɔka, tɔlɔmbɔlɛ anto otsha lo dihole diakamakotɛ. Ondjelo ami ayeta la ntondo kayɛ+ ndo lushi layomoyokoya la wɔ, dimi layowasha dilanya l’ɔtɛ wa pɛkato kawɔ.” 35 Ko Jehowa akatatɛ nkɔmɔla anto akɔ, nɛ dia vɔ wakasale ekishi ka yana ya ngɔmbɛ, ekishi kakasale Arɔna.

33 Jehowa akatɛ Mɔsɛ nto ate: “Mɔ oma lanɛ, tshɔka wɛ la anto wakayatondja oma lo wodja w’Edjibito otsha l’ɛtshi ka nkɛtɛ kakamatshibɛ Abrahama, Isaka la Jakɔbɔ nte: ‘Layokisha tokanula* tanyu.’+ 2 Dimi layotoma ondjelo la ntondo kanyu+ ndo layotshanya ase Kanana, ase Amɔra, ase Hiti, ase Perizi, ase Hivi ndo ase Jɛbusɛ.+ 3 Nyotshu otsha lo wodja wakɛlanɛ abɛlɛ la osanga.+ Koko dimi hantotshɔ kaamɛ la nyu, nɛ dia nyekɔ ɛtɛ wolo,+ diaha dimi nyoshila oshiki lo mboka.”+

4 Lam’akoke anto ɛtɛkɛta wa kɔlɔ ɛsɔ, vɔ wakatatɛ ndela ndo ndooko onto l’atei awɔ lakalɔtɛ dɛngalɛnga. 5 Jehowa akatɛ Mɔsɛ ate: “Tɛ ase Isariyɛlɛ wate: ‘Nyu nyekɔ ɛtɛ wolo.+ L’etena kɛmɔtshi dimi koka ndja l’atei anyu ndo nyoshila+ oshiki. Ɔnkɔnɛ, nyokolole dɛngalɛnga dianyu etena kaakamakanyiya kɛnɛ kayomonyosalɛ.’” 6 Ɔnkɔnɛ ntatɛ oma lo Dikona dia Hɔrɛbɛ, ase Isariyɛlɛ kɔndɔta dɛngalɛnga nto lo lɔkɛndɔ lawɔ l’otondo.

7 Ko Mɔsɛ akɔshi luudu lande la dipɛma ndo akatolika l’andja wa mpango, mangana yema la mpango ndo nde akaliɔlɛ ɔnɛ luudu la dipɛma l’esanganelo. Onto tshɛ laki la ohomba wa mimbola Jehowa+ kanyi akahombaka ntshɔ lo luudu la dipɛma l’esanganelo laki l’andja wa mpango. 8 Kam’akatshɔka Mɔsɛ otsha lo luudu lakɔ la dipɛma, anto tshɛ wakemalaka onto l’onto la soko dia luudu lande la dipɛma ndo wakalengɛka Mɔsɛ polo ndo lam’akandɔtɔka lo luudu lakɔ la dipɛma. 9 Kam’akɔtɔka Mɔsɛ lo luudu la dipɛma l’esanganelo, ekundji ka dinge+ kakaholɔka ko kakemalaka la soko dia luudu lakɔ la dipɛma etena kakatɛkɛtaka Nzambi la Mɔsɛ.+ 10 Lam’akɛnaka anto tshɛ dia ekundji ka dinge kambemala la soko dia luudu lakɔ la dipɛma, onto l’onto akemalaka ko akakusamaka la soko dia luudu lande la dipɛma. 11 Jehowa akasawolaka la Mɔsɛ elungi l’elungi+ oko onto kasawola la osekande onto. Lam’akandakawolaka lo mpango, Jashua+ ɔna Nuna laki okimanyedi ndo okambi+ ande akatshikalaka lo luudu lakɔ la dipɛma.

12 Oma laasɔ, Mɔsɛ akatɛ Jehowa ate: “Ohenda, wɛ ekɔ lo mbutɛmi wate: ‘Lɔmbɔla wodja ɔnɛ,’ koko wɛ hambute onto layoyotoma kaamɛ la mi. Ndo nto, wɛ akate wate: ‘Dimi keyaka lo lokombo* ndo wɛ ambohomɔ lokolo l’ɔlɔ lo washo ami.’ 13 Lam’alangayɛ, naka lambohomɔ lokolo l’ɔlɔ lo washo ayɛ, ombetsha mboka+ yayɛ dia dimi keya ndo ntetemala mpomɔ lokolo l’ɔlɔ lo washo ayɛ. Ndo nto, tohɛke dia wodja ɔnɛ wekɔ wodja+ ayɛ.” 14 Ko nde akate ate: “Dimɛ* layotshɔ la yɛ+ ndo layokosha momuya.”+ 15 Ko Mɔsɛ akawotɛ ate: “Naka wɛ* hatotshɔ la so, kete ototshike lanɛ. 16 Ngande wayoteya dimi la wodja ayɛ dia tambohomɔ lokolo l’ɔlɔ lo washo ayɛ? Shi lo wɛ ntshɔ kaamɛ la so+ dia dimi la wodja ayɛ ntshikitana la wedja ekina tshɛ wele laadiko dia nkɛtɛ?”+

17 Jehowa akatɛ Mɔsɛ ate: “Dimi layosala ndo kɛnɛ kamboyɔlɔmba kɛsɔ, nɛ dia wɛ ambohomɔ lokolo l’ɔlɔ lo washo ami ndo dimi keyaka dimɛna.” 18 Ko nde akate ate: “Lam’alangayɛ, ɔmɛnya lotombo layɛ.” 19 Koko nde akawotɛ ate: “Dimi layanga kɛnya ɔlɔlɔ ami tshɛ ndo layanga mbewoya lokombo la Jehowa+ la ntondo kayɛ. Onto tshɛ lalangami salɛ ɔlɔlɔ, dimi layowosalɛ ɔlɔlɔ ndo onto tshɛ lalangami mboka kɛtshi, dimi layowoka kɛtshi.”+ 20 Koko nde akakotsha ate: “Wɛ hakoke mɛna elungi kami, nɛ dia ndooko onto lakoka mɛnami ko nde ntshikala la lɔsɛnɔ.”

21 Jehowa akate nto ate: “Dihole dimɔtshi nɛ suke la mi. Emala laadiko dia dive. 22 Lam’ayeta lotombo lami, dimi layokodja lo wooko wa dive ndo dimi layokodiha washo la lonya lami polo ndo lam’ayometa. 23 Oma laasɔ, dimi layonya lonya lami, ko wɛ ayoyɛna ɔkɔngɔ ami. Koko wɛ hatɛna+ elungi kami.”

34 Oma laasɔ Jehowa akatɛ Mɔsɛ ate: “Sala pase 2 di’ave diele oko dia ntondo,+ ko dimi layofunda lo pase diakɔ ɛtɛkɛta waki lo pase+ dia ntondo diakayatshatsha.+ 2 Koyalɔngɔsɔlɛ la pindju lam’ayoyodɛ la pindju otsha lo Dikona dia Sinayi ndo lam’ayoyotemala la ntondo kami lɛkɔ lo shɔdi ya dikona.+ 3 Koko ndooko onto lahomba ntshɔ kaamɛ la yɛ ndo ndooko onto okina lahomba mɛnama dihole dimɔtshi lo dikona. Ndooko ɔkɔkɔ kana ngɔmbɛ kahomba ndɛ mbɛlanɛ la dikona+ diakɔ.”

4 Ɔnkɔnɛ, Mɔsɛ akasale pase 2 di’ave oko dia ntondo ko aketɔ la pindju ka pɛɛ ko akadɛ otsha lo Dikona dia Sinayi, oko akawodjangɛ Jehowa ndo nde akatshu la pase diakɔ 2 di’ave l’anya. 5 Ko Jehowa akaholɔ+ lo dinge, akayemala kaamɛ la nde laawɔ ndo akewoya awui wendana la lokombo la Jehowa.+ 6 Jehowa aketetaka la ntondo kande ndo akataka ate: “Jehowa, Jehowa, Nzambi ka kɛtshi+ ndo kokana kandji,*+ kahoke nkɛlɛ+ esadi ndo koludi tɔɔ la ngandji ka kɔlamelo+ ndo la mɛtɛ,*+ 7 katɛnyaka ngandji kande ka kɔlamelo le nunu+ dia nɔnga, katodimanyiyaka munga, kɔlɔ ndo pɛkato,+ koko lo weho akɔ tshɛ, nde hatshike onto lele la onongo aha la mbosha dilanya.+ Nde mbishaka ana ndo ekana dilanya l’ɔtɛ wa munga y’ambutshi awɔ polo lo lɔlɔnga la 3 ndo lɔlɔnga+ la 4.”

8 Mɔsɛ akakɔlama esadi eto polo la nkɛtɛ ndo akakusama. 9 Oma laasɔ nde akate ate: “Jehowa le, naka lambohomɔ lokolo l’ɔlɔ lo washo ayɛ, lam’alangayɛ, Jehowa le, etawɔ dia ntshɔ kaamɛ la so+ kaanga mbeso akanga w’ɛtɛ wolo+ ndo otodimanyiya munga yaso la pɛkato+ yaso ndo otɔshi oko anto ayɛ hita.” 10 Nde akookadimola ate: “Dimi layanga mbidja la nyu sheke nyɛ: Dimi layosala akambo wa diambo wahatasalemaka* lo nkɛtɛ k’otondo kana le wedja+ ekina tshɛ la ntondo ka wodja ayɛ w’otondo. Wodja w’otondo wasɛna kaamɛ la yɛ wayɛna olimu wa Jehowa, nɛ dia dimi layanga nyosalɛ+ dikambo dia wɔma efula.

11 “Dja yimba lo kɛnɛ kayangami kodjangɛ ɛlɔ.+ Dimi layanga mbitshanya ase Amɔra, ase Kanana, ase Hiti, ase Perizi, ase Hivi ndo ase Jɛbusɛ+ oma la ntondo kanyu. 12 Nyosale tshɛ diaha nyu mbidja sheke nyu l’anto wodjashi l’ɛtshi ka nkɛtɛ katanyatshu,+ nɛ dia ɔsɔ mbeyaka ndjonga tshondo ya djonga le nyu.+ 13 Kanyohandjole dilambwelo diawɔ, kanyatshatsha dimɛta diawɔ dia l’ave ndo kanyohendjahendja+ dimɛta diawɔ dia l’esongo.* 14 Nyu hanyokoke kusamɛ jambizambi+ kina, dikambo Jehowa mbeyamaka oko* ɔnɛ lalɔmba dia mbomamema paka ndamɛ oto.* Lo mɛtɛ, nde ekɔ Nzambi kalɔmba dia mbomamema paka ndamɛ oto.+ 15 Nyosale tshɛ diaha nyu mbidja sheke nyu l’anto wodjashi l’ɛtshi ka nkɛtɛ kakɔ, nɛ dia lam’ayowosalaka kinumba vɔ la tozambizambi tawɔ ndo lam’ayowolambolaka tozambizambi+ tawɔ elambo, amɔtshi l’atei awɔ wayonyɔlɔmba dia nyu ndɛ diangɔ dialambolawɔ.+ 16 Ndo oma laasɔ, ndooko onyake nyayoyotshukɛ ananyu w’apami+ anawɔ wa wamato ndo anawɔ wa wamato wayoyosala kinumba la tozambizambi tawɔ, ko wayoyokonya ananyu w’apami dia vɔ nsala kinumba la tozambizambi+ tawɔ.

17 “Tanyosalake tozambizambi ta mbolo+ ya lɔlɛlɔla.

18 “Kanyosalake Fɛtɛ ka mapa+ waha la wodoya. Kanyɔlɛke mapa waha la wodoya oko wamomonyodjangɛ. Kanyosalake dikambo sɔ l’edja ka nshi 7 l’etena kakashikikɛma lo ngɔndɔ k’Abiba,*+ nɛ dia lo ngɔndɔ k’Abiba mbakanyatombe oma l’Edjibito.

19 “Ana wa nondo w’apami* tshɛ wekɔ wami,+ mbidja ndo wa dongalonga dianyu tshɛ, oyadi waomi wa nondo wa ngɔmbɛ kana w’ɛkɔkɔ.+ 20 Kanyokimɔke ɔkɔkɔ dia ntshungola mponda kotɔ ntondo. Ko naka hanyokitshungodi, ko nyu kiɔkɔla nkingo. Kanyotshungolake ananyu w’apami+ wa nondo tshɛ. Ndooko onto lahomba mɛnama la ntondo kami anya hwe.

21 “Kanyokambake olimu l’edja ka nshi 6, koko lushi la 7 kanyomuyake.*+ Kanyomuyake oyadi kaanga lo nshi ya monɛ kana lo nshi ya dinela.

22 “Kanyosalake Fɛtɛ ka Mingu la ɔlɔnga w’oma lo dinela dianyu di’eponga ndo Fɛtɛ ka Eombelo* ka diangɔ l’ekomelo k’ɔnɔnyi.+

23 “Mbala 3 l’ɔnɔnyi, anto tshɛ wele kaamɛ la nyu kawɛnamake la ntondo ka Jehowa Nkumadiɔndjɔ ka mɛtɛ, Nzambi k’Isariyɛlɛ.+ 24 Nɛ dia dimi layotshanya wedja oma la ntondo kanyu+ ndo layonanula elelo w’ɛtshi kanyu ka nkɛtɛ. Ndooko onto layokombola nkɛtɛ yanyu etena kayonyotshɔka dia tɛna elungi ka Jehowa Nzambi kanyu mbala 3 l’ɔnɔnyi.

25 “Tanyolambolake dikila dia nyama kami k’olambo kaamɛ la ɛngɔ kɛmɔtshi kele la wodoya.+ Olambo wa fɛtɛ k’Elekanelo hawohombe namema polo la pindju.+

26 “Kanyelake diangɔ dioleki amɛna dia ɔlɔnga w’oma lo dikambɔ dianyu lo luudu la Jehowa Nzambi+ kanyu.

“Tanyokatɛke ɔsɔngɔ wa mbudi lo awɛlɛ+ wa nyangɛtɔ.”

27 Jehowa akatɛ Mɔsɛ nto ate: “Funda awui asɔ,+ nɛ dia lo ndjela awui akɔ kayangami mbidja sheke la yɛ ndo la Isariyɛlɛ.”+ 28 Ko nde akatshikala lɛkɔ nde la Jehowa tanyi 40 ndo etsho 40. Nde kɔndɛka ndooko ɛngɔ ndo kɔnɔka ashi.+ Nde* akafunde ɛtɛkɛta wendana la sheke, mbuta ate Ɛlɛmbɛ+ 10 lo pase diakɔ.

29 Oma laasɔ, Mɔsɛ akaholɔ oma lo Dikona dia Sinayi okime pase 2 di’Ɔmɛnyi lo anya+ ande. Lam’akandaholɔ oma lo dikona, Mɔsɛ kombeyaka dia elungi kande kakatondjaka esase, nɛ dia nde aki oma la tɔtɛkɛta la Nzambi. 30 Lam’akɛnyi Arɔna nde l’ase Isariyɛlɛ tshɛ Mɔsɛ, vɔ wakɛnyi dia elungi kande kakatondjaka esase, ko vɔ wakoke wɔma dia nsukana lalende.+

31 Mɔsɛ akawaelɛ, ko Arɔna nde la ewandji wa nkumbo tshɛ w’ase Isariyɛlɛ wakaye le nde, ko Mɔsɛ akasawola la wɔ. 32 L’ɔkɔngɔ wa laasɔ, ase Isariyɛlɛ tshɛ wakaye lalende, ko nde akawasha ɛlɛmbɛ tshɛ wakawosha Jehowa lo Dikona dia Sinayi.+ 33 Lam’akashidiyaka Mɔsɛ nsawola la wɔ, nde akafɛka dihɔndɔ di’okombɔ lo elungi+ kande. 34 Koko lam’akatshɔka Mɔsɛ dia tɛnama la ntondo ka Jehowa dia tosawola la nde, nde akanyaka dihɔndɔ di’okombɔ polo lam’akandatombaka.+ Oma laasɔ, nde akatombaka ndo akatɛka ase Isariyɛlɛ ɛlɛmbɛ wakandalongolaka.+ 35 Ase Isariyɛlɛ wakɛnyi dia elungi kaki Mɔsɛ kakatondjaka esase. Ko Mɔsɛ akakombaka elungi kande polo ndo lam’akandatshɔka dia tosawola la Nzambi.*+

35 L’ɔkɔngɔ diko, Mɔsɛ akasanganya olui tshɛ w’ase Isariyɛlɛ ko akawatɛ ate: “Jehowa akadjanga ate:+ 2 Kanyokambake olimu l’edja ka nshi 6, koko lushi la 7 layonga ekila le nyu, lushi la momuya tshɛ lo tshɛ dikambo dia Jehowa.+ Onto tshɛ layokamba olimu lushi lakɔ ayodiakema.+ 3 Lushi la Sabato, tanyɔhɛtshake kaanga dja lo ahole wadjasɛnyu.”

4 Oma laasɔ, Mɔsɛ akatɛ olui w’otondo w’ase Isariyɛlɛ ate: “Jehowa akadjanga ate: 5 ‘Kanyɔsake woshasha wa Jehowa oma lo kɛnɛ kele la nyu.+ Onto tshɛ lele l’otema w’ɔlɔlɔ+ ela weshasha ɛnɛ dikambo dia Jehowa: Paonyi, mfɛsa, nkonga, 6 eshinga wa bule, eshinga w’ebelabela, eshinga wa beela k’efula, linɛnɛ la dimɛna, wɛɔsa+ wa mbudi, 7 dikoho di’ɛkɔkɔ diambowodja dangi dia beela, dikoho dia nyama ka fɔkɛ, abaya w’osongo wa akasia, 8 esɔ ka tala, balasama dikambo dia esɔ k’okitelo, tshɔ+ y’opumu, 9 mbɔkɔ ya ɔniksɛ ndo mbɔkɔ nkina dia mbidja lo efodɛ+ ndo lo ɛngɔ kalɔtawɔ lo ntolo.+

10 “‘Wanɛ tshɛ wele la diewo*+ l’atei anyu waye dia ndjosala diangɔ tshɛ diakadjanga Jehowa, 11 mbuta ate tabɛrnaklɛ la tenyi diatɔ tshɛ ndo okombɔ atɔ, ɛkɔhi atɔ, kadrɛma yatɔ, esembe atɔ, dikundji diatɔ ndo dikitshelo diatɔ diele l’afuku, 12 Ɔshɛtɛ+ la esembe+ awɔ, ofidi+ la dihɔndɔ di’okombɔ,+ 13 mɛsa+ la esembe awɔ ndo la diangɔ diawɔ tshɛ ndo mapa wa lɛɛnya,+ 14 ekundji ka tala+ dia pɛtshaka osase la diangɔ diatɔ ndo atala la esɔ ka tala dia pɛtshaka osase,+ 15 elambwelo ka tshumbaka tshɔ+ la esembe atɔ, esɔ k’okitelo la tshɔ+ y’opumu, dihɔndɔ di’okombɔ dia la soko dia tabɛrnaklɛ, 16 elambwelo ka elambo+ wa lotshumba, lokala latɔ la nkonga, esembe atɔ ndo diangɔ diatɔ tshɛ, dɔnga dia woke la ekitshelo+ kadiɔ, 17 ahɔndɔ w’okombɔ wahanema lo lokombo,+ dikundji diawɔ ndo dikitshelo diawɔ diele l’afuku, dihɔndɔ di’okombɔ dia la soko dia lokombo, 18 wekɔ wa lo tabɛrnaklɛ, wekɔ wa lo lokombo la ɛkɔdi+ awɔ, 19 ahɔndɔ+ w’amɛna wa lɛla dikambo dia olimu wa lo tɛmpɛlɔ k’ekila, ahɔndɔ w’ekila dikambo dia ɔlɔmbɛdi Arɔna+ ndo ahɔndɔ w’anande w’apami dia nkamba oko ɛlɔmbɛdi.’”

20 Ko olui w’otondo w’ase Isariyɛlɛ wakamɔ oma lale Mɔsɛ. 21 Oma laasɔ, onto tshɛ lele otema ande akootshutshuyaka+ ndo onto tshɛ lele yimba yande yakootshutshuyaka akaye la woshasha wa Jehowa dia vɔ ndjokambaka la wɔ lo luudu la dipɛma l’esanganelo dikambo di’elimu alɔ tshɛ ndo dikambo dia ahɔndɔ w’ekila. 22 Vɔ wakayaka, apami la wamato, onto l’onto akelaka la lolango lande diangɔ diakawamataka lo ahɔndɔ, azama, mpɛtɛ, dɛngalɛnga dikina ndo weho tshɛ wa diangɔ dia paonyi. Vɔ tshɛ wakelaka weshasha* awɔ wa paonyi le Jehowa.+ 23 Ndo wanɛ tshɛ waki la eshinga wa bule, eshinga w’ebelabela, eshinga wa beela k’efula, linɛnɛ la dimɛna, wɛɔsa wa mbudi, dikoho di’ɛkɔkɔ diambowodja dangi dia beela, dikoho dia nyama ka fɔkɛ wakaye la diɔ. 24 Wanɛ tshɛ wakakimɔka mfɛsa la nkonga wakelaka woshasha wa Jehowa ndo wanɛ tshɛ waki la abaya w’osongo wa akasia wakoka nsala olimu ɔmɔtshi wakaye la wɔ.

25 Wamato+ tshɛ waki la diewo dia mbɛla wakɛlaka diangɔ l’anya awɔ ndo wakelaka kɛnɛ kakawɛlaka: Eshinga wa bule, eshinga w’ebelabela, eshinga wa beela k’efula ndo linɛnɛ la dimɛna. 26 Ndo wamato tshɛ waki la diewo wele etema awɔ wakaatshutshuyaka wakɛlaka wɛɔsa wa mbudi.

27 Ewandji wa nkumbo wakelaka mbɔkɔ ya ɔniksɛ ndo mbɔkɔ nkina dia ndjodja lo efodɛ ndo lo ɛngɔ kalɔtawɔ lo ntolo,+ 28 balasama ndo esɔ ka tala, dikambo dia esɔ+ k’okitelo ndo tshɔ+ y’opumu. 29 Apami la wamato tshɛ wele etema awɔ wakaatshutshuyaka wakelaka ɛngɔ kɛmɔtshi dikambo dia olimu wakadjanga Jehowa lo tshimbo ya Mɔsɛ dia vɔ salema. Ase Isariyɛlɛ wakelaka diangɔ sɔ le Jehowa+ oko woshasha wa la lolango.

30 Oma laasɔ, Mɔsɛ akatɛ ase Isariyɛlɛ ate: “Jehowa ambɔsɔna Bɛzalɛlɛ ɔna Uri ɔna Hura wa lo dioho dia Juda.+ 31 Nde amboolodia la nyuma ka Nzambi, ambowosha lomba, yimba ndo ewo ka weho tshɛ w’elimu w’etshudi 32 dia nsala dikongelo dia sɛlasɛla, dia nkamba la paonyi, la mfɛsa ndo la nkonga, 33 dia mbata ndo nkɔlɔnga mbɔkɔ ndo dia nsɛla sɛlasɛla dia weho tshɛ w’esongo. 34 Ndo nde ambodja dikoka dia mbetsha l’otema ande ndo l’otema wa Ɔhɔliabɛ+ ɔna Ahisamakɛ wa lo dioho dia Danɛ. 35 Nde ambaalodia la diewo*+ dia nsala elimu tshɛ w’etshudi, w’asangi w’asango, w’ambidji wa nsɔsɔ lo nkamba la eshinga wa bule, eshinga w’ebelabela, eshinga wa beela k’efula ndo linɛnɛ la dimɛna ndo dia mbɛla eshinga. Vɔ wayosala weho tshɛ w’elimu ndo wayosala weho tshɛ wa dikongelo.

36 “Bɛzalɛlɛ ayokamba nde la Ɔhɔliabɛ kaamɛ la pami tshɛ kele la diewo* kele Jehowa akawosha lomba ndo yimba dia mbeya woho wa nsala oseka olimu tshɛ w’ekila, oko wakadjanga+ Jehowa.”

2 Ko Mɔsɛ akelɛ Bɛzalɛlɛ nde la Ɔhɔliabɛ kaamɛ ndo pami tshɛ kaki la diewo kele Jehowa akadje lomba+ l’otema ande, onto tshɛ lele otema ande wakootshutshuya dia ndjakimɔ la lolango l’olimu.+ 3 Oma laasɔ, vɔ wakɔshi oma le Mɔsɛ weshasha+ tshɛ wakela ase Isariyɛlɛ dikambo di’olimu w’ekila. Koko vɔ wakatetemalaka mbeela weshasha wa la lolango pindju tshɛ.

4 L’ɔkɔngɔ wa vɔ ntatɛ olimu w’ekila, anto tshɛ waki la diewo wakayaka onto l’onto mbala kande, 5 ko wakatɛ Mɔsɛ vate: “Anto wekɔ lo mbela weshasha efula oleki kɛnɛ kahombama l’olimu wakadjanga Jehowa.” 6 Ko Mɔsɛ akate dia diewoyelo mbishama lo mpango k’otondo ɔnɛ: “Apami la wamato le, tanyelake diangɔ nto dikambo dia woshasha w’ekila.” Ko wakashimbe anto diaha vɔ mbela diangɔ nto. 7 Diangɔ diakakoke dia elimu tshɛ kambema, ndo diakalekana.

8 Ɔnkɔnɛ, anto tshɛ waki la diewo+ wakasale tabɛrnaklɛ+ ka ahɔndɔ w’apɛma 10 wa linɛnɛ la dimɛna la lɛla, eshinga wa bule, eshinga w’ebelabela ndo eshinga wa beela k’efula. Nde* akasale la wɔ akɛruba wa losanga lɔkɔ.+ 9 Dihɔndɔ tshɛ dia dipɛma diaki l’otale wa kubita* 28 ndo woke wa kubita 4. Ahɔndɔ tshɛ w’apɛma waki popo. 10 Oma laasɔ, nde akakakatanya ahɔndɔ w’apɛma 5 kaamɛ, ndo 5 akina kaamɛ. 11 L’ɔkɔngɔ wa laasɔ, nde akasale ɛkɔdi la eshinga wa bule l’ohembo wa dihɔndɔ 1 dia dipɛma, lɛnɛ ayondodikakatanya la dikina. Nde akasale ngasɔ ndo l’ohembo wa dihɔndɔ dia dipɛma dia lo wedi okina, lo dihole diɔtɔnɛ dia lam’ahombadiɔ kakatanyema. 12 Nde akasale ɛkɔdi 50 lo dihɔndɔ dimɔtshi dia dipɛma ndo ɛkɔdi 50 l’ohembo wa dihɔndɔ dikina dia dipɛma lɛnɛ ahomba apɛma akɔ mpomana, dia ɛkɔdi wa wedi akɔ 2 mbɛlanɛ. 13 L’ekomelo, nde akasale ɛkɔhi 50 wa paonyi ndo akakakatanya ahɔndɔ akɔ w’apɛma la ɛkɔhi, dia tabɛrnaklɛ monga ɔtɔi.

14 Oma laasɔ, nde akasale ahɔndɔ w’apɛma wa la wɛɔsa wa mbudi dia mbahɛ laadiko dia tabɛrnaklɛ. Nde akasale ahɔndɔ+ w’apɛma 11. 15 Dihɔndɔ tshɛ dia dipɛma diaki la otale wa kubita 30 ndo woke wa kubita 4. Ahɔndɔ w’apɛma akɔ 11 waki popo. 16 Oma laasɔ, nde akakakatanya ahɔndɔ 5 w’apɛma wedi ɔmɔtshi ndo akakakatanya ahɔndɔ akina 6 w’apɛma wedi okina. 17 Nde akayosala nto ɛkɔdi 50 l’ohembo wa dihɔndɔ dia dipɛma lɛnɛ akadiahombe ndjokakatanyema, ndo nde akasale ɛkɔdi 50 l’ohembo wa dihɔndɔ dikina dia dipɛma lɛnɛ akadiahombe ndjokakatanyema la dikina. 18 Nde akasale ɛkɔhi 50 wa nkonga dia nkakatanya apɛma akɔ kaamɛ.

19 Nde akasale okombɔ wa tabɛrnaklɛ la dikoho di’ɛkɔkɔ diambowodja dangi dia beela ndo okombɔ wa la dikoho dia nyama ka fɔkɛ dia diɔ mbahema laadiko.+

20 L’ɔkɔngɔ wa laasɔ, nde akasale kadrɛma ya tabɛrnaklɛ la abaya+ w’osongo wa akasia ndo akayiemadia lemadia.+ 21 Kadrɛma tshɛ kaki la tanga dia kubita 10 ndo woke wa kubita ɔtɔi l’etenyi. 22 Kadrɛma tshɛ kaki la nsɔdi hiende yokakatanyemi l’ɛse katɔ. Ngasɔ mbakandasale kadrɛma tshɛ ya lo tabɛrnaklɛ. 23 Ɔnkɔnɛ nde akasale kadrɛma ya lo lɛkɛ la sidɛ ka tabɛrnaklɛ, kadrɛma 20 mbɛlanɛ la sidɛ. 24 Oma laasɔ, nde akasale dikitshelo dia mfɛsa 40 diele l’afuku dia dikitsha l’ɛse ka kadrɛma yakɔ 20, dikitshelo 2 diele l’afuku l’ɛse ka kadrɛma 1 lo nsɔdi yatɔ hiende ndo dikitshelo pende pende diele l’afuku l’ɛse ka kadrɛma tshɛ yakayele lo nsɔdi+ yayɔ hiende hiende. 25 Lo wedi okina wa tabɛrnaklɛ lo nɔrdɛ, nde akasale kadrɛma 20 26 kaamɛ la dikitshelo diayɔ dia mfɛsa 40 diele l’afuku, dikitshelo 2 diele l’afuku l’ɛse ka kadrɛma 1 ndo dikitshelo pende pende diele l’afuku l’ɛse ka kadrɛma nkina tshɛ.

27 Lo wedi wa l’otshimba wa tabɛrnaklɛ lo owɛstɛ, nde akasale kadrɛma+ 6. 28 Nde akasale kadrɛma 2 oko dikundji dia l’atshuku wa tabɛrnaklɛ lo atshuku 2 wa l’otshimba. 29 Wakakakatanya dikundji 2 oma l’ɛse polo la diko, polo lo shingo dia ntondo. Ngasɔ mbakandasale la dikundji diakɔ 2 dia l’atshuku. 30 Ɔnkɔnɛ, kadrɛma tshɛ tshɛ ya lo wedi akɔ yaki 8 kaamɛ la dikitshelo diayɔ dia mfɛsa 16 diele l’afuku, dikitshelo 2 diele l’afuku l’ɛse ka kadrɛma tshɛ.

31 Oma laasɔ, nde akasale esembe la osongo wa akasia, esembe 5 lo kadrɛma ya lo wedi ɔmɔtshi wa tabɛrnaklɛ,+ 32 esembe 5 lo kadrɛma ya lo wedi okina wa tabɛrnaklɛ ndo 5 lo kadrɛma ya lo tabɛrnaklɛ lo wedi wa l’otshimba lo owɛstɛ. 33 Nde akasale osembe wa l’atei dia vɔ monga l’atei atei wa kadrɛma oma lo koma nyɛ polo lo koma kina. 34 Nde akakite paonyi lo kadrɛma yakɔ ndo akasale ashingo wa paonyi dia vɔ kimɛka esembe akɔ. Nde akakite paonyi+ lo esembe akɔ.

35 Oma laasɔ, nde akasale dihɔndɔ di’okombɔ+ la eshinga wa bule, eshinga w’ebelabela, eshinga wa beela k’efula ndo la linɛnɛ la dimɛna la lɛla. Nde akasange akɛruba+ lɔkɔ.+ 36 L’ɔkɔngɔ wa laasɔ, nde akasale dikundji 4 la osongo wa akasia ndo akakite paonyi lɔkɔ. Nde akasale ndo tɔkɔhɔ ta paonyi ndo dikitshelo 4 dia mfɛsa diele l’afuku dikambo diatɔ. 37 Oma laasɔ, nde akasale dihɔndɔ di’okombɔ dikambo dia soko dia luudu la dipɛma la eshinga wa bule, eshinga w’ebelabela, eshinga wa beela k’efula ndo la linɛnɛ la dimɛna la lɛla,+ 38 kaamɛ la dikundji diadiɔ 5 ndo tɔkɔhɔ tadiɔ. Nde akakite paonyi lo tɔsɔdi tadiɔ ndo lo diangɔ diadiɔ diakakatanya,* koko dikitshelo diadiɔ 5 diele l’afuku diakasalema la nkonga.

37 Bɛzalɛlɛ+ akasale Ɔshɛtɛ+ la abaya w’osongo wa akasia. Vɔ waki la otale wa kubita* hiende l’etenyi, woke wa kubita ɔtɔi l’etenyi ndo tanga dia kubita ɔtɔi l’etenyi.+ 2 Ko nde akakite paonyi ka pudipudi lɔkɔ l’etei ndo l’andja ndo akasale ohembo wa paonyi l’otshimbedi awɔ.+ 3 L’ɔkɔngɔ wa laasɔ, nde akasale ashingo 4 wa paonyi lɔkɔ la diko di’ekolo awɔ, wedi ɔnɛ ashingo 2 ndo wedi okina ashingo 2. 4 Oma laasɔ, nde akasale esembe la osongo wa akasia ndo akakite paonyi lɔkɔ.+ 5 Ko nde akadje esembe akɔ lo ashingo wele l’emamu w’Ɔshɛtɛ dia mɛmbaka Ɔshɛtɛ lɔkɔ.+

6 Nde akasale ofidi la paonyi ka pudipudi.+ Vɔ waki la otale wa kubita hiende l’etenyi ndo woke wa kubita ɔtɔi l’etenyi.+ 7 Oma laasɔ, nde akasale akɛruba 2+ la paonyi ka lotshula lo tokoma takɔ tohende t’ofidi.+ 8 Ɔkɛruba 1 lo koma mɔtshi y’ofidi ndo ɔkɛruba okina lo koma kina. Nde akasale akɛruba lo tokoma takɔ tohende t’ofidi. 9 Akɛruba akɔ 2 wakasandjola ahafu awɔ la diko ndo dɛdi di’ahafu awɔ diakakombaka ofidi.+ Vɔ wakɛlanɛ, wakakusama ndo dungi diawɔ diakɛlɛ otsha l’ofidi.+

10 Ko nde akasale mɛsa la abaya w’osongo wa akasia.+ Vɔ waki la otale wa kubita 2, woke wa kubita 1 ndo tanga dia kubita ɔtɔi l’etenyi.+ 11 Nde akakite paonyi ka pudipudi lɔkɔ ndo akasale ohembo wa paonyi l’otshimbedi awɔ. 12 Oma laasɔ, nde akamame dibaya diele la woke w’etambe ka lonya* l’otshimbedi wa mɛsa ndo akadje ohembo wa paonyi l’otshimbedi wa dibaya diakɔ. 13 Ndo nto, nde akadje ashingo 4 wa paonyi lɔkɔ ndo akadje ashingo akɔ lo atshuku 4 lam’ɔsɔngami ekolo 4 wa mɛsa. 14 Ashingo akɔ waki suke la dibaya diakandamame l’omamu dia nsukɛ esembe wakakambaka la wɔ dia mɛmba mɛsa. 15 Oma laasɔ, nde akasale esembe la osongo wa akasia ndo akakite paonyi lɔkɔ dia mɛmbaka mɛsa lɔkɔ. 16 L’ɔkɔngɔ wa laasɔ, nde akɔshi paonyi ka pudipudi ko akasale diangɔ dia la mɛsa, mbuta ate alɔnga w’akale, akɔhɔ, alɔnga w’afuku ndo mbidika yakawadjaka elambo wa lotɛ.+

17 Oma laasɔ, nde akasale ekundji ka tala+ la paonyi ka pudipudi. Nde akatshule ekundji ka tala lotshula. Edjaselo katɔ, okendeka atɔ, akɔhɔ atɔ, ambɔkɔ atɔ ndo alɛmbɔlɛmbɔ atɔ waki ɛngɔ 1.+ 18 Ntahe 6 yakatombaka oma l’okendeka, ntahe 3 ya ekundji ka tala lo wedi ɔmɔtshi ndo ntahe 3 lo wedi okina. 19 Akɔhɔ 3 wele oko alɛmbɔlɛmbɔ w’osongo w’amandɛ waki lo etenyi l’etenyi ka lotahe, dɛmbɔlɛmbɔ ndjelana la dimbɔkɔ, ko akɔhɔ 3 wele oko alɛmbɔlɛmbɔ w’osongo w’amandɛ la diko dia dimbɔkɔ la dɛmbɔlɛmbɔ lo tenyi dikina dia lotahe la lotahe. Ngasɔ mbakandasale lo ntahe yakɔ 6 yakatombaka oma lo okendeka w’ekundji ka tala. 20 Okendeka w’ekundji ka tala waki la akɔhɔ 4 wele oko alɛmbɔlɛmbɔ w’osongo w’amandɛ ndo waki la ambɔkɔ wakayelana la alɛmbɔlɛmbɔ. 21 Dimbɔkɔ diaki l’ɛse ka ntahe 2 ya ntondo yakatombaka oma l’okendeka ndo dimbɔkɔ dikina diaki l’ɛse ka ntahe 2 yayela, ko dimbɔkɔ dikina nto l’ɛse ka ntahe nkina 2, dikambo ntahe 6 mbakatombaka oma l’okendeka w’ekundji ka tala. 22 Ambɔkɔ, ntahe ndo ekundji ka tala k’otondo kakasalema la okama 1 wa paonyi ka pudipudi ka lotshula. 23 Oma laasɔ, nde akasale atala atɔ 7,+ manu yatɔ ndo diangɔ diatɔ dia mɛmbaka dja la paonyi ka pudipudi. 24 Nde akasale ekundji ka tala la diangɔ diatɔ tshɛ oma lo lotalata* 1 la paonyi ka pudipudi.

25 Nde akasale elambwelo ka tshumbaka tshɔ+ la abaya w’osongo wa akasia. Tɔ kaki la atshuku 4 wɛdimi, otale wa kubita 1, woke wa kubita 1 ndo tanga dia kubita 2. Tɔ la nseke yatɔ aki ɛngɔ 1.+ 26 Nde akakite paonyi ka pudipudi laadiko diatɔ, l’emamu atɔ tshɛ ndo lo nseke yatɔ. Nde akasale ndo ohembo wa paonyi l’otshimbedi atɔ. 27 Nde akasale ashingo wa paonyi lɔkɔ l’ɛse k’ohembo atɔ, 2 wedi ɔnɛ ndo 2 wedi okina dia mbidjaka esembe lɔkɔ dia kiɛmbaka. 28 L’ɔkɔngɔ wa laasɔ, nde akasale esembe la osongo wa akasia ndo akakite paonyi lɔkɔ. 29 Nde akasale ndo esɔ k’ekila k’okitelo+ ndo tshɔ y’opumu+ ya pudipudi yɔsɔhanyemi dimɛna.*

38 Nde akasale elambwelo k’olambo wa lotshumba ndo abaya w’osongo wa akasia. Tɔ kaki la atshuku 4 wɛdimi, otale wa kubita* 5, woke wa kubita 5 ndo tanga dia kubita 3.+ 2 L’ɔkɔngɔ wa laasɔ, nde akasale nseke yatɔ lo atshuku atɔ 4. Tɔ la nseke yatɔ aki ɛngɔ 1. Ko nde akakite nkonga lɔkɔ.+ 3 L’ɔkɔngɔ diko, nde akasale diangɔ tshɛ diendana la elambwelo, mpoke ya mbidjaka otoko, mpawo, alɔnga w’afuku, nsɔmɔ ndo diangɔ dia mɛmbaka dja. Nde akasale diangɔ sɔ tshɛ la nkonga. 4 Nde akasale ndo lokala la lo elambwelo lele oko ɔtɛyi la nkonga, l’ɛse ka dibaya diele l’ohembo yema l’ɛse otsha l’atei atei. 5 Nde akasale ashingo 4 lo atshuku 4 suke la lokala la nkonga dia mbidjaka esembe. 6 L’ɔkɔngɔ wa laasɔ, nde akasale esembe la osongo wa akasia ndo akakite nkonga lɔkɔ. 7 Nde akadje esembe lo ashingo lo wedi 2 wa elambwelo dia kiɛmbaka lɔkɔ. Nde akasale elambwelo oko ɔshɛtɛ wa hwe w’abaya.

8 Ko nde akasale dɔnga dia woke dia nkonga+ la ekitshelo kadiɔ ka nkonga. Nde akakambe la talatala yaki wamato wakayalɔngɔsɔlaka dia nkamba la soko dia luudu la dipɛma l’esanganelo.

9 Oma laasɔ, nde akasale lokombo.+ Lo lɛkɛ la sidɛ la lokombo, mbɛlanɛ la sidɛ, nde akahanɛ ahɔndɔ w’okombɔ wakasalema la linɛnɛ la dimɛna la lɛla waki la otale wa kubita 100.+ 10 Nde akasale dikundji 20 la dikitshelo 20 diele l’afuku diakasalema la nkonga ndo tɔkɔhɔ ta dikundji la diangɔ diadiɔ diakakatanya* diakasalema la mfɛsa. 11 Ndo nto, nde akahanɛ ahɔndɔ w’okombɔ waki la otale wa kubita 100 lo nɔrdɛ. Dikundji 20 ndo dikitshelo 20 diele l’afuku diaki lo wedi akɔ diakasalema la nkonga. Tɔkɔhɔ ta dikundji la diangɔ diatɔ diakakatanya* diakasalema la mfɛsa. 12 Koko nde akahanɛ ahɔndɔ w’okombɔ waki la otale wa kubita 50 lo owɛstɛ. Dikundji 10 ndo dikitshelo 10 diele l’afuku diaki lo wedi akɔ ndo tɔkɔhɔ ta lo dikundji la diangɔ diatɔ diakakatanya* diakasalema la mfɛsa. 13 Wekeke wa lo ɛstɛ, otsha lɛnɛ atomba wonya aki kubita 50. 14 Nde akahanɛ ahɔndɔ w’okombɔ waki la otale wa kubita 15 lo wedi ɔmɔtshi wa soko kaamɛ la dikundji 3 ndo dikitshelo 3 diele l’afuku. 15 Nde akahanɛ ahɔndɔ w’okombɔ waki la otale wa kubita 15 ndo lo wedi okina wa soko dia lokombo kaamɛ la dikundji 3 ndo dikitshelo 3 diele l’afuku. 16 Ahɔndɔ w’okombɔ tshɛ wakahanema lo lokombo l’otondo wakasalema la linɛnɛ la dimɛna la lɛla. 17 Dikitshelo diele l’afuku dia dikundji diakasalema la nkonga, tɔkɔhɔ ta dikundji ndo diangɔ diatɔ diakakatanya diakasalema la mfɛsa, nde akakite mfɛsa lo tɔsɔdi ndo diangɔ diakakatanya* dia lo dikundji tshɛ dia lo lokombo diakasalema la mfɛsa.+

18 Dihɔndɔ di’okombɔ dia la soko dia lokombo diakasalema la eshinga wa bule, eshinga w’ebelabela, eshinga wa beela k’efula ndo la linɛnɛ la dimɛna la lɛla. Diɔ diaki la otale wa kubita 20 ndo tanga dia kubita 5, tanga diakɔ diamɛ diaki la ahɔndɔ w’okombɔ wakahanema lo lokombo.+ 19 Dikundji diadiɔ 4 ndo dikitshelo diadiɔ 4 diele l’afuku diakasalema la nkonga. Tɔkɔhɔ tadiɔ la diangɔ diadiɔ diakakatanya* diakasalema la mfɛsa ndo tɔsɔdi tadiɔ takakitama mfɛsa. 20 Wekɔ tshɛ wa tabɛrnaklɛ ndo wa lo lokombo wakasalema la nkonga.+

21 Nganɛ mbakɛdikama diangɔ dia lo tabɛrnaklɛ, tabɛrnaklɛ k’Ɔmɛnyi+ etena kakadjanga Mɔsɛ dia vɔ diɛdika, lo ndjela ɔkɛndɛ w’ase Lɛwi+ lo ɛlɔmbwɛlɔ kaki Itamara+ ɔna ɔlɔmbɛdi Arɔna. 22 Bɛzalɛlɛ+ ɔna Uri ɔna Hura wa lo dioho dia Juda akasale kɛnɛ tshɛ kakadjangɛ Jehowa Mɔsɛ. 23 Nde akakambe la Ɔhɔliabɛ+ ɔna Ahisamakɛ wa lo dioho dia Danɛ, ɔnɛ laki otshudi, osangi w’asango ndo ombidji wa nsɔsɔ lo ahɔndɔ wakasalema l’eshinga wa bule, eshinga w’ebelabela, eshinga wa beela k’efula ndo la linɛnɛ la dimɛna.

24 Paonyi tshɛ yakakambe la wɔ dia nsala elimu tshɛ wa lo dihole di’ekila yakɛdima la yɛdikɔ ya paonyi y’olambo wa letshetsha,+ mbuta ate talata* 29 ndo tɔshɛkɛlɛ* 730 lo ndjela yɛdikɔ ya shɛkɛlɛ ya lo dihole di’ekila.* 25 Mfɛsa y’oma le olui w’anto wakadiema yaki talata 100 ndo tɔshɛkɛlɛ kinunu la nkama esambele l’akumi esambele l’atanu (1 775) lo ndjela yɛdikɔ ya shɛkɛlɛ ya lo dihole di’ekila.* 26 K’ahende ɔtɔi ka shɛkɛlɛ le onto l’onto aki k’ahende ɔtɔi ka shɛkɛlɛ lo ndjela yɛdikɔ ya shɛkɛlɛ ya lo dihole di’ekila* le pami tshɛ kaki l’atei w’anto wakadiema ntatɛ oma l’ɛnɔnyi 20 otsha la diko+ aki nunu nkama shamalo la sato la nkama tshanu l’akumi atanu (603 550).+

27 Dia nsala dikitshelo diele l’afuku dia lo dihole di’ekila ndo dikitshelo diele l’afuku dia lo ahɔndɔ w’okombɔ, akahombama talata 100. Dikitshelo 100 diele l’afuku diekɔ la talata 100, ekitshelo 1 lotalata 1.+ 28 Nde akakambe la tɔshɛkɛlɛ kinunu la nkama esambele l’akumi esambele la atanu (1 775) dia nsala tɔkɔhɔ ta dikundji ndo dia nkita mfɛsa lo tɔsɔdi tadiɔ ndo dia dikakatanya.

29 Nkonga y’olambo* yaki talata 70 ndo tɔshɛkɛlɛ nunu pende la nkama nyɛi (2 400). 30 La diangɔ sɔ mbakandasale dikitshelo diele l’afuku dia la soko dia luudu la dipɛma l’esanganelo, elambwelo ka nkonga, lokala latɔ la nkonga ndo diangɔ tshɛ diendana la elambwelo kakɔ, 31 dikitshelo diele l’afuku dia lo lokombo, dikitshelo diele l’afuku dia la soko dia lokombo, wekɔ+ tshɛ wa lo tabɛrnaklɛ ndo wekɔ tshɛ wa lo lokombo.

39 Vɔ wakasale ahɔndɔ wakɛlama dimɛna dia kambaka olimu wa lo dihole di’ekila la eshinga wa bule, eshinga w’ebelabela ndo eshinga wa beela k’efula.+ Vɔ wakasale ahɔndɔ w’ekila dikambo dia Arɔna,+ oko wakadjangɛ Jehowa Mɔsɛ.

2 Nde akasale efodɛ+ wa paonyi, eshinga wa bule, eshinga w’ebelabela, eshinga wa beela k’efula ndo la linɛnɛ la dimɛna la lɛla. 3 Vɔ wakatshule pase dia paonyi dia diɔ monga tɔlɛwɛlɛwɛ ko nde akadiate dia disala eshinga dia mbasanganya la eshinga wa bule, eshinga w’ebelabela, eshinga wa beela k’efula ndo linɛnɛ la dimɛna, ndo vɔ wakadjama asango. 4 Vɔ wakasale diangɔ dia l’ahɛka dikambo dia efodɛ diakakakatanyema la diko di’ehembo adiɔ ehende. 5 Ohele* wa efodɛ wakakelekamaka lo efodɛ dia mbokeketsha lo demba wakasalema la diangɔ diakɔ diamɛ,+ mbuta ate paonyi, eshinga wa bule, eshinga w’ebelabela, eshinga wa beela k’efula ndo linɛnɛ la dimɛna la lɛla, oko wakadjangɛ Jehowa Mɔsɛ.

6 Oma laasɔ, vɔ wakadje mbɔkɔ ya ɔniksɛ lo ekimedi wa paonyi ndo vɔ wakafunde nkombo y’ana w’Isariyɛlɛ lɔkɔ, oko onto ladja ohomɔ.+ 7 Nde akayidje lo diangɔ dia l’ahɛka dia lo efodɛ dia yɔ monga mbɔkɔ ya eohwelo le ana w’Isariyɛlɛ,+ oko wakadjangɛ Jehowa Mɔsɛ. 8 Oma laasɔ, nde akasale ɛngɔ kalɔtawɔ lo ntolo+ la diangɔ diakɔ diamɛ ndo yoho yakɔ yaamɛ yakasalema efodɛ, mbuta ate paonyi, eshinga wa bule, eshinga w’ebelabela, eshinga wa beela k’efula ndo linɛnɛ+ la dimɛna la lɛla. 9 Lam’akawakinɛka lo 2, tɔ kakongaka la atshuku 4 wɛdimi. Vɔ wakasale ɛngɔ kalɔtawɔ lo ntolo kaki la otale wa nana* dia lonya 1 ndo woke wa nana dia lonya 1 naka wambokinɛ. 10 Vɔ wakasale ɛnɔngɔ 4 wa mbɔkɔ lɔkɔ. Ɔnɔngɔ wa ntondo waki la lɔwɔkɔ la rubi, la topazɛ ndo la emɛrɔdɛ. 11 Ɔnɔngɔ wa 2 waki la lɔwɔkɔ la tirikwazɛ, la safirɛ ndo la jaspɛ. 12 Ɔnɔngɔ wa 3 waki la lɔwɔkɔ la lɛshɛmɛ,* la agatɛ ndo la ametistɛ. 13 Ndo ɔnɔngɔ wa 4 waki la lɔwɔkɔ la krizɔlitɛ, la ɔniksɛ ndo la jadɛ. Yɔ yakamamema lo ekimedi wa paonyi. 14 Mbɔkɔ yakɔ yakɔtɔnɛ la nkombo y’ana w’Isariyɛlɛ 12, ndo nkombo yakɔ yakafundama oko ohomɔ, lokombo tshɛ lakɔtɔnɛka la dioho dimɔtshi dia lo waoho 12.

15 Oma laasɔ, vɔ wakasale eshinga wa loshinga lo ɛngɔ kalɔtawɔ lo ntolo, oko ɛkɔdi wa paonyi+ ka pudipudi. 16 Ndo vɔ wakasale ekimedi 2 wa paonyi ndo ashingo 2 wa paonyi ko vɔ nkɔhɛ ashingo akɔ 2 lo atshuku 2 wa lo ɛngɔ kalɔtawɔ lo ntolo. 17 L’ɔkɔngɔ wa laasɔ, vɔ wakadje eshinga akɔ 2 wa paonyi lo ashingo 2 wa l’atshuku wa lo ɛngɔ kalɔtawɔ lo ntolo. 18 Oma laasɔ, vɔ wakadje tokoma takɔ 2 t’eshinga akɔ 2 lo ekimedi 2 ndo wakakeleka lo diangɔ dia l’ahɛka dia lo efodɛ oma la ntondo. 19 Ko vɔ wakasale ashingo 2 wa paonyi ndo wakawadje lo tokoma takɔ 2 oma l’etei ka ɛngɔ kalɔtawɔ lo ntolo mbɛlanɛ la efodɛ.+ 20 Oma laasɔ, vɔ wakasale ashingo akina 2 wa paonyi ndo wakawadje la ntondo ka efodɛ l’ɛse ka diangɔ 2 dia l’ahɛka, suke la lɛnɛ okakatanyidiɔ la diko dia ohele* wa efɔdɛ. 21 L’ekomelo, vɔ wakakeleka ɛngɔ kalɔtawɔ lo ntolo la oshinga wa bule oma l’ashingo awɔ polo lo ashingo wa efodɛ dia nkimɛ ɛngɔ kalɔtawɔ lo ntolo lo dihole diatɔ lo efodɛ yema la diko dia ohele,* oko wakadjangɛ Jehowa Mɔsɛ.

22 Oma laasɔ, nde akasale okutu wele bu l’anya la eshinga+ wa bule eto dia ndɔtaka l’ɛse ka efodɛ. 23 Nkingo k’okutu wele bu l’anya kaki l’atei atei awɔ oko nkingo ka dikɔti dia mbolo. Tɔ kaki la ohembo l’otshimbedi atɔ diaha tɔ mbatɛ. 24 Oma laasɔ, vɔ wakadje l’ohembo w’okutu wele bu l’anya tangangɔ tele oko elowa wa pɔmɛgranatɛ takasalema la eshinga wa bule, eshinga w’ebelabela ndo eshinga wa beela k’efula wakawɛlɛ kaamɛ. 25 Vɔ wakasale tongunga la paonyi ka pudipudi ndo wakadje tongunga takɔ lam’asa tangangɔ tele oko elowa wa pɔmɛgranatɛ l’otshimbedi w’otondo w’ohembo w’okutu wele bu l’anya, lam’asa tangangɔ tele oko elowa wa pɔmɛgranatɛ. 26 Vɔ wakadjaka ngungangunga ko yangangɔ yele oko olowa wa pɔmɛgranatɛ, ngungangunga ko yangangɔ yele oko olowa wa pɔmɛgranatɛ l’otshimbedi w’otondo w’ohembo wa l’ɛse w’okutu wele bu l’anya wakawakambaka la wɔ olimu, oko wakadjangɛ Jehowa Mɔsɛ.

27 Vɔ wakasale ndo ekutu wakatɛlama oma le ɔtɛdi la linɛnɛ la dimɛna dikambo dia Arɔna nde l’anande w’apami,+ 28 dihɔndɔ diadingawɔ l’ɔtɛ+ diakasalema la linɛnɛ la dimɛna la lɛla, dihɔndɔ dialɔtawɔ l’ɔtɛ+ dia ndjalɛnga diakasalema la linɛnɛ la dimɛna, kupe*+ yakasalema la linɛnɛ la dimɛna la lɛla, 29 ohele wakasalema la linɛnɛ la dimɛna la lɛla, eshinga wa bule, eshinga w’ebelabela ndo eshinga wa beela k’efula wa lɛla, oko wakadjangɛ Jehowa Mɔsɛ.

30 L’ekomelo, vɔ wakakambe la paonyi ka pudipudi dia nsala lokaka la ngaingai, djembetelo y’ekila ya ndjakimɔ* ndo laki la efundelo wakawamame lɔkɔ oko onto ladja ohomɔ ɔnɛ: “Jehowa+ ekɔ kanga ekila.” 31 Vɔ wakahakɛ ɔkɔdi wakasalema la eshinga wa bule lɔkɔ dia lɔ monga laadiko dia dihɔndɔ diadingawɔ l’ɔtɛ, oko wakadjangɛ Jehowa Mɔsɛ.

32 Ɔnkɔnɛ, elimu tshɛ wa lo tabɛrnaklɛ, mbuta ate luudu la dipɛma l’esanganelo wakashile ndo ase Isariyɛlɛ wakasale kɛnɛ tshɛ kakadjangɛ Jehowa Mɔsɛ.+ Vɔ wakasale kɛnɛ kakandawatɛ tshɛ lo tshɛ.

33 Ko vɔ wakela tabɛrnaklɛ+ kakɔ le Mɔsɛ, mbuta ate luudu la dipɛma+ la diangɔ dialɔ tshɛ: Ɛkɔhi+ alɔ, kadrɛma+ yalɔ, esembe+ alɔ ndo dikundji dialɔ la dikitshelo+ diadiɔ diele l’afuku, 34 okombɔ alɔ wa la dikoho di’ɛkɔkɔ diambowodja dangi dia beela,+ okombɔ alɔ wa la dikoho dia nyama ka fɔkɛ, ahɔndɔ w’okombɔ,+ 35 ɔshɛtɛ w’Ɔmɛnyi la esembe+ awɔ ndo ofidi+ awɔ, 36 mɛsa la diangɔ+ diawɔ tshɛ ndo mapa wa lɛɛnya, 37 ekundji ka tala kakasalema la paonyi ka pudipudi la atala+ atɔ, mbuta ate ɔnɔngɔ w’atala ndo diangɔ+ diatɔ tshɛ kaamɛ la esɔ ka tala,+ 38 elambwelo+ ka paonyi, esɔ+ k’okitelo, tshɔ+ y’opumu, okombɔ+ wa la soko dia luudu la dipɛma, 39 elambwelo ka nkonga+ la lokala latɔ la nkonga, esembe+ atɔ ndo diangɔ+ diatɔ tshɛ mbidja ndo dɔnga dia woke la ekitshelo+ kadiɔ, 40 ahɔndɔ w’okombɔ wa mpanɛ lo lokombo, dikundji dia lokombo la dikitshelo+ diadiɔ diele l’afuku, dihɔndɔ di’okombɔ+ dia la soko dia lokombo, ɛkɔdi+ wa dipɛma, wekɔ adiɔ kaamɛ la diangɔ tshɛ di’olimu wa lo tabɛrnaklɛ, mbuta ate luudu la dipɛma l’esanganelo, 41 ahɔndɔ w’amɛna wa lɛla dikambo dia olimu wa lo tɛmpɛlɔ k’ekila, ahɔndɔ w’ekila dikambo di’ɔlɔmbɛdi+ Arɔna ndo ahɔndɔ w’anande w’apami dia nkamba oko ɛlɔmbɛdi.

42 Ase Isariyɛlɛ wakasale elimu+ tshɛ lo ndjela kɛnɛ tshɛ kakadjangɛ Jehowa Mɔsɛ. 43 Lam’akasɛdingola Mɔsɛ olimu awɔ tshɛ, nde akɛnyi dia vɔ wakasale oko wakadjanga Jehowa. Ko Mɔsɛ akaatshɔkɔla.

40 Oma laasɔ, Jehowa akatɛ Mɔsɛ ate: 2 “Lo ngɔndɔ ka ntondo lushi 1 mbahombanyu memɛ tabɛrnaklɛ, mbuta ate luudu la dipɛma l’esanganelo.+ 3 Kodje ɔshɛtɛ w’Ɔmɛnyi lɔkɔ+ ndo kokombe Ɔshɛtɛ akɔ la dihɔndɔ di’okombɔ.+ 4 Kodje mɛsa+ lɔkɔ ndo kɔlɔngɛ diangɔ dia lɔkɔ, kodje ekundji ka tala+ ndo kɔhɛtsha atala+ atɔ. 5 Oma laasɔ, kodje elambwelo ka paonyi dia tshumbaka tshɔ+ la ntondo k’ɔshɛtɛ w’Ɔmɛnyi ndo kohanɛ+ dihɔndɔ di’okombɔ dia la soko dia tabɛrnaklɛ.

6 “Kokitsha elambwelo k’olambo+ wa lotshumba la ntondo ka soko dia tabɛrnaklɛ, mbuta ate soko dia luudu la dipɛma l’esanganelo. 7 Kokitsha ndo dɔnga dia woke lam’asa luudu la dipɛma l’esanganelo la elambwelo ndo kodje ashi lɔkɔ.+ 8 Oma laasɔ, kokidinge la lokombo+ ndo kohanɛ dihɔndɔ di’okombɔ+ la soko dia lokombo. 9 L’ɔkɔngɔ wa laasɔ, kɔshi esɔ+ k’okitelo kele kote lo tabɛrnaklɛ ndo lo diangɔ tshɛ diele lɔkɔ+ ndo kokikidia, kokidia diangɔ dia lɔkɔ tshɛ, ko tɔ kayoyala ekila. 10 Kote esɔ kakɔ lo elambwelo k’olambo wa lotshumba ndo lo diangɔ tshɛ dia lɔkɔ kele kokikidia, ko tɔ kayoyala elambwelo+ koleki ekila. 11 Kote esɔ kakɔ lo dɔnga dia woke ndo lo ekitshelo kadiɔ kele kodikidia.

12 “Oma laasɔ, koye la Arɔna nde l’anande w’apami suke la soko dia luudu la dipɛma l’esanganelo kele kowaɔtsha la ashi.+ 13 Kɔlɔtsha Arɔna ahɔndɔ+ w’ekila ndo kowokite+ esɔ kele kowokidia, ko nde ayonkambɛka oko ɔlɔmbɛdi. 14 L’ɔkɔngɔ wa laasɔ, kosukanya anande w’apami ndo kowalɔtsha ekutu.+ 15 Kowakite esɔ woho wayoyokita shɛwɔ,+ ko vɔ wayonkambɛka oko ɛlɔmbɛdi ndo l’ɔtɛ w’okitamelo awɔ w’esɔ, vɔ wayongaka ɛlɔmbɛdi pondjo pondjo lo nɔnga+ yawɔ tshɛ.”

16 Mɔsɛ akasale akambo tshɛ wakawodjangɛ+ Jehowa. Nde akasale kɛnɛ kakandawotɛ tshɛ lo tshɛ.

17 Lo Ngɔndɔ ka ntondo lushi 1, lo ɔnɔnyi wa 2, vɔ wakemɛ+ tabɛrnaklɛ. 18 Etena kakemɛ Mɔsɛ tabɛrnaklɛ, nde akakitsha dikitshelo+ diele l’afuku l’ɛse ko akemɛ kadrɛma,+ akadje esembe+ ndo akemɛ dikundji diatɔ. 19 Nde akasandjola dihɔndɔ dia dipɛma+ laadiko dia tabɛrnaklɛ ndo akafɛ+ okombɔ laadiko diadiɔ, oko wakadjangɛ Jehowa Mɔsɛ.

20 L’ɔkɔngɔ wa laasɔ, nde akɔshi pase di’Ɔmɛnyi,+ ko akadidje lo Ɔshɛtɛ+ ndo nde akadje esembe+ lo Ɔshɛtɛ, ko akafɛ ofidi+ laadiko di’Ɔshɛtɛ.+ 21 Nde akadje Ɔshɛtɛ lo tabɛrnaklɛ, ko akahanɛ dihɔndɔ di’okombɔ+ ndo akakombɛ ɔshɛtɛ w’Ɔmɛnyi,+ oko wakadjangɛ Jehowa Mɔsɛ.

22 L’ɔkɔngɔ wa laasɔ, nde akadje mɛsa+ lo luudu la dipɛma l’esanganelo lo nɔrdɛ ka tabɛrnaklɛ, l’andja wa dihɔndɔ di’okombɔ, 23 ndo nde akalɔngɛ mapa+ laadiko diawɔ la ntondo ka Jehowa, oko wakadjangɛ Jehowa Mɔsɛ.

24 Nde akadje ekundji ka tala+ lo luudu la dipɛma l’esanganelo mbɛlanɛ la mɛsa, lo lɛkɛ la sidɛ ka tabɛrnaklɛ. 25 Nde akahɛtsha atala+ la ntondo ka Jehowa, oko wakadjangɛ Jehowa Mɔsɛ.

26 L’ɔkɔngɔ wa laasɔ, nde akadje nto elambwelo+ ka paonyi lo luudu la dipɛma l’esanganelo la ntondo ka dihɔndɔ di’okombɔ, 27 dia tshumbaka tshɔ+ y’opumu lɔkɔ,+ oko wakadjangɛ Jehowa Mɔsɛ.

28 Oma laasɔ, nde akahanɛ dihɔndɔ di’okombɔ+ la soko dia tabɛrnaklɛ.

29 Nde akakitsha elambwelo k’olambo+ wa lotshumba la soko dia tabɛrnaklɛ, mbuta ate luudu la dipɛma l’esanganelo dia nde nambola olambo+ wa lotshumba ndo olambo wa ntɔngɔ lɔkɔ, oko wakadjangɛ Jehowa Mɔsɛ.

30 Oma laasɔ, nde akakitsha dɔnga dia woke lam’asa luudu la dipɛma l’esanganelo la elambwelo ndo akadje ashi lɔkɔ dia solaka+ anya la ekolo. 31 Mɔsɛ ndo Arɔna la anande w’apami wakasolaka anya la ekolo lɔkɔ. 32 Mbala tshɛ kakawɔtɔka lo luudu la dipɛma l’esanganelo kana kakawasukanaka la elambwelo, vɔ wakahombaka nsola+ anya la ekolo, oko wakadjangɛ Jehowa Mɔsɛ.

33 L’ekomelo, nde akadinge lokombo+ lo tabɛrnaklɛ la elambwelo ndo akahanɛ dihɔndɔ di’okombɔ la soko dia lokombo.+

Ɔnkɔnɛ Mɔsɛ akashidiya olimu. 34 Ko dinge diakakombe luudu la dipɛma l’esanganelo ndo lotombo la Jehowa lakalole lo tabɛrnaklɛ.+ 35 Mɔsɛ kokoka mbɔtɔ lo luudu la dipɛma l’esanganelo, nɛ dia dinge diakatshikala laadiko dialɔ ndo lotombo la Jehowa lakalole lo tabɛrnaklɛ.+

36 Lam’akamɔka dinge oma lo tabɛrnaklɛ, ase Isariyɛlɛ wakonɛɛka oma l’ahole tshɛ wakawahangaka lo lɔkɛndɔ+ lawɔ. 37 Koko naka dinge diatamɔ, vɔ wakatshikalaka laawɔ polo ndo lushi layomɔ+ dinge. 38 Dikambo dinge dia Jehowa diaki laadiko dia tabɛrnaklɛ la yanyi ndo dja yaki laadiko diatɔ l’otsho lo washo w’ase Isariyɛlɛ tshɛ lo ahole tshɛ wakawatahangaka lo lɔkɛndɔ+ lawɔ.