AKAMBO W’ASE LƐWI

1 Jehowa akelɛ Mɔsɛ ko akatɛkɛta la nde oma lo luudu la dipɛma l’esanganelo,+ ata ate: 2 “Sawola l’ase Isariyɛlɛ* kele tɛwɔ wate: ‘Naka onto ɔmɔtshi l’atei anyu nangaka nambola Jehowa olambo oma lo dongalonga dianyu, kanyolambolake ngɔmbɛ, ɛkɔkɔ kana mbudi.+

3 “‘Naka ngɔmbɛ mbalangande nambola oko olambo wa lotshumba, kete nde pombaka nambola ngɔmbɛ k’omi kaha la ɛkɔmɔ.+ Nde pombaka kikimɔ la lolango+ lande la ntondo ka Jehowa la soko dia luudu la dipɛma l’esanganelo. 4 Nde kahɛ lonya lande l’ɔtɛ wa nyama k’olambo wa lotshumba, ko vɔ wayetawɔma lo wahɔ ande dia nkomba pɛkato kande.

5 “‘Oma laasɔ, ɔsɔngɔ akɔ wa ngɔmbɛ pombaka ndjakema la ntondo ka Jehowa. Ana w’apami w’Arɔna wele ɛlɔmbɛdi+ wayela dikila, ko wayɔmɔnga dikila diakɔ lo wedi akɔ tshɛ wa elambwelo+ kele la soko dia luudu la dipɛma l’esanganelo. 6 Pombaka mbowola lokoho la nyama k’olambo wa lotshumba ndo kisɛsa.+ 7 Ana w’apami w’Arɔna wele ɛlɔmbɛdi kawɔhɛtsha dja lo elambwelo+ ndo kawɔlɔngɛ nkunyi lo dja. 8 Ana w’apami w’Arɔna wele ɛlɔmbɛdi kawɔlɔngɛ tenyi di’olambo+ kaamɛ ndo ɔtɛ la wata* laadiko dia nkunyi yele lo dja lo elambwelo. 9 Ɛsɔhi atɔ la nsanga yatɔ pombaka solama la ashi. Ɔlɔmbɛdi katshumbe diangɔ sɔ tshɛ lo elambwelo oko olambo wa lotshumba, olambo watshumbama lo dja wele l’opumu wa dimɛna* le Jehowa.+

10 “‘Naka ɔsɔngɔ w’ɔkɔkɔ kana wa mbudi kalangande nambola+ oko olambo wa lotshumba, kete nde pombaka nambola nyama k’omi kele bu la ɛkɔmɔ.+ 11 Tɔ pombaka ndjakema lo lɛkɛ la nɔrdɛ la elambwelo la ntondo ka Jehowa ndo ana w’apami w’Arɔna wele ɛlɔmbɛdi kawɔmɔngɛ dikila diatɔ lo wedi akɔ tshɛ wa elambwelo.+ 12 Nde ayɔsɛsa nyama kakɔ ndo ɔlɔmbɛdi kalɔngɛ emunyi akɔ laadiko dia nkunyi yele lo dja lo elambwelo kaamɛ la ɔtɛ atɔ ndo wata* atɔ. 13 Nde kasole ɛsɔhi ndo nsanga la ashi. Ɔlɔmbɛdi kela tshondo yatɔ ko kitshumba lo elambwelo. Ɔsɔ ekɔ olambo wa lotshumba, olambo watshumbama lo dja wele l’opumu wa dimɛna* le Jehowa.

14 “‘Ko naka tofudu kalangande nambola Jehowa oko olambo wa lotshumba, kete nde kalambole benga kana ana wa tokudumba.+ 15 Ɔlɔmbɛdi ayolambola fudu kakɔ lo elambwelo ndo nde ayokihembola* ɔtɛ ko kitshumba lo elambwelo, koko dikila diatɔ pombaka sediama l’omamu wa elambwelo. 16 Nde pombaka minya dikele diatɔ la nsala yatɔ, ko mbikasha l’omamu wa elambwelo lo ɛstɛ, otsha lɛnɛ ele otoko.*+ 17 Nde ayata fudu kakɔ lo ahafu aha la kikakitola lo tenyi 2. Oma laasɔ, ɔlɔmbɛdi ayokitshumba lo elambwelo laadiko dia nkunyi yele lo dja. Ɔsɔ ekɔ olambo wa lotshumba, olambo watshumbama lo dja wele l’opumu wa dimɛna* le Jehowa.

2 “‘Naka onto* ɔmɔtshi ambolanga nambola Jehowa olambo wa ntɔngɔ,+ kete olambo ande pombaka monga ofushi wa dimɛna. Nde pombaka mbitɛ esɔ lɔkɔ ndo nsanganya la tshɔ ya wɛma.+ 2 Oma laasɔ, ko nde mbela le ana w’apami w’Arɔna wele ɛlɔmbɛdi ndo ɔlɔmbɛdi kɔshi diwambo di’ofushi awɔ wa dimɛna ndo di’esɔ kaamɛ la tshɔ yawɔ tshɛ ya wɛma. Nde katshumbe diangɔ diakɔ lo elambwelo oko didjidji di’olambo w’otondo,+ oko olambo watshumbama lo dja wele l’opumu wa dimɛna* le Jehowa. 3 Kɛnɛ tshɛ kayotshikala oma l’olambo wa ntɔngɔ ayonga dikambo diaki Arɔna nde l’anande w’apami+ oko ɛngɔ koleki ekila+ k’oma l’elambo watshumbama lo dja dikambo dia Jehowa.

4 “‘Naka wɛ ambolanga nambola olambo wa ntɔngɔ oko ekate wokatemi lo nkuka, kete vɔ pombaka monga ofushi wa dimɛna, mapa w’ebolonga waha la wodoya wɔsɔhanyemi la esɔ kana mapa wa tɔlɛwɛlɛwɛ waha la wodoya wokitshiwɔ esɔ.+

5 “‘Naka wɛ ambolanga nambola olambo wa ntɔngɔ wa lokanga lo mpanu,+ kete vɔ pombaka monga ofushi wa dimɛna, waha la wodoya wɔsɔhanyemi la esɔ. 6 Vɔ pombaka mbatshatshema ko wɛ mbitɛ esɔ lɔkɔ.+ Ɔsɔ ekɔ olambo wa ntɔngɔ.

7 “‘Naka wɛ ambolanga nambola olambo wa ntɔngɔ wokatemi lo mpoke, kete vɔ pombaka salema la ofushi wa dimɛna ndo la esɔ. 8 Kela Jehowa olambo wa ntɔngɔ wosalemi la diangɔ sɔ. Kawokimɔme le ɔlɔmbɛdi dia nde ntɔla suke la elambwelo. 9 Ko ɔlɔmbɛdi ayɔsa yema y’olambo wa ntɔngɔ wokimɔmi oko didjidji di’olambo w’otondo+ ndo ayoyitshumba lo elambwelo oko olambo watshumbama lo dja wele l’opumu wa dimɛna* le Jehowa.+ 10 Kɛnɛ kayotshikala oma l’olambo wa ntɔngɔ ayonga dikambo diaki Arɔna nde l’anande w’apami oko ɛngɔ koleki ekila k’oma l’elambo watshumbama lo dja+ dikambo dia Jehowa.

11 “‘Tanyodjake wodoya+ lo olambo wa ntɔngɔ wayonyolambolaka Jehowa, nɛ dia hanyohombe ntshumba ɛngɔ kele la wodoya kana osanga oko olambo watshumbama lo dja dikambo dia Jehowa.

12 “‘Kanyolambolake Jehowa diangɔ sɔ oko olambo w’oma l’ɔlɔnga,+ koko hanyohombe ntshumba diangɔ sɔ lo elambwelo oko ɛngɔ kele l’opumu wa dimɛna.*

13 “‘Olambo tshɛ wa ntɔngɔ wayoyolambolaka pombaka mbidjama lɛɛhɔ. Lɛɛhɔ la sheke ya Nzambi kayɛ latohombamake l’olambo ayɛ wa ntɔngɔ. Koyake la lɛɛhɔ+ kaamɛ la elambo ayɛ tshɛ.

14 “‘Naka wɛ ambolanga nambola Jehowa olambo wa ntɔngɔ w’ɔlɔnga, kete wɛ pombaka mbela ntɔngɔ y’eyoyo ya lofumba lo dja, ndo ntɔngɔ y’eyoyo yakawatɔ aha la mbeshesha oko olambo wa ntɔngɔ w’oma l’ɔlɔnga ayɛ.+ 15 Kodje esɔ lɔkɔ ndo kodje tshɔ ya wɛma lɔkɔ. Ɔsɔ ekɔ olambo wa ntɔngɔ. 16 Ɔlɔmbɛdi katshumbe yema yawɔ yele didjidji di’olambo w’otondo,+ mbuta ate yema ya ntɔngɔ yahesheshwe ndo esɔ kaamɛ la tshɔ yawɔ tshɛ ya wɛma oko olambo watshumbama lo dja dikambo dia Jehowa.

3 “‘Naka onto ambolanga nambola olambo w’osanga*+ ndo naka nde ambolanga nkimɔ ngɔmbɛ, oyadi k’omi kana ka wadi, kete nde pombaka nkimɔ nyama kaha la ɛkɔmɔ la ntondo ka Jehowa. 2 Nde kahɛ lonya lande laadiko di’ɔtɛ wa nyama kande k’olambo, ko tɔ kayodiakema la soko dia luudu la dipɛma l’esanganelo ndo ana w’apami w’Arɔna wele ɛlɔmbɛdi kawɔmɔngɛ dikila lo wedi akɔ tshɛ wa elambwelo. 3 Nde kakimɔ etenyi kɛmɔtshi k’olambo w’osanga oko olambo watshumbama lo dja dikambo dia Jehowa:+ Wata+ wakomba ɛsɔhi, wata tshɛ wadinga mbo y’etema, 4 ndo awondo akɔ 2 la wata wa lɔkɔ wele suke la lokende. Nde kanya ndo okombɔ w’ovɔ kaamɛ la awondo.+ 5 Ana w’apami w’Arɔna kawoditshumbe lo elambwelo laadiko di’olambo wa lotshumba wele laadiko dia nkunyi yele lo dja.+ Ɔsɔ ekɔ olambo watshumbama lo dja wele l’opumu wa dimɛna* le Jehowa.+

6 “‘Naka onto ambolanga nambola Jehowa ɔkɔkɔ kana mbudi dikambo di’olambo w’osanga, kete nde kakimɔ nyama k’omi kana ka wadi kaha la ɛkɔmɔ.+ 7 Naka nde ambela ɔsɔngɔ w’ɔkɔkɔ w’omi oko olambo, kete nde kaye la wɔ la ntondo ka Jehowa. 8 Nde kahɛ lonya lande l’ɔtɛ wa nyama kande k’olambo, ko tɔ kayodiakema la ntondo ka luudu la dipɛma l’esanganelo. Ana w’apami w’Arɔna kawɔmɔngɛ dikila diatɔ lo wedi akɔ tshɛ wa elambwelo. 9 Nde kakimɔ wata w’oma lo nyama k’olambo w’osanga oko olambo watshumbama lo dja dikambo dia Jehowa.+ Nde kanya wela w’otondo wa wata wele suke la weka wa l’ɔkɔngɔ, wata wakomba ɛsɔhi, wata tshɛ wadinga mbo y’etema, 10 ndo awondo akɔ 2 kaamɛ la wata wele lɔkɔ wele suke la lokende. Nde kanya ndo okombɔ w’ovɔ kaamɛ la awondo.+ 11 Ɔlɔmbɛdi kaditshumbe lo elambwelo oko mbo ya ndɛ,* olambo watshumbama lo dja dikambo dia Jehowa.+

12 “‘Naka onto ambolanga nambola mbudi, kete nde kaye la tɔ la ntondo ka Jehowa. 13 Nde kahɛ lonya lande l’ɔtɛ atɔ, ko tɔ kayodiakema la ntondo ka luudu la dipɛma l’esanganelo. Ana w’apami w’Arɔna kawɔmɔngɛ dikila diatɔ lo wedi akɔ tshɛ wa elambwelo. 14 Etenyi kayondokimɔ oko olambo ande watshumbama lo dja dikambo dia Jehowa ele wata wakomba ɛsɔhi, wata tshɛ wadinga mbo y’etema,+ 15 ndo awondo akɔ 2 kaamɛ la wata wa lɔkɔ wele suke la lokende. Nde kanya ndo okombɔ w’ovɔ kaamɛ la awondo. 16 Ɔlɔmbɛdi kaditshumbe lo elambwelo oko mbo ya ndɛ,* olambo watshumbama lo dja dia monga l’opumu wa dimɛna.* Wata tshɛ wekɔ waki Jehowa.+

17 “‘Ɔnɛ ele didjango dia pondjo le nɔnga yanyu lo ahole tshɛ wayonyodjasɛka: Hanyohombe ndɛ weho tshɛ wa wata kana weho tshɛ wa dikila.’”+

4 Jehowa akatɛ Mɔsɛ ate: 2 “Tɛ ase Isariyɛlɛ wate: ‘Naka onto* ɔmɔtshi ambosala pɛkato k’aha la okonda+ lo woho wamondosala dui dimɔtshi diakadjanga Jehowa diaha diɔ salema:

3 “‘Naka ɔlɔmbɛdi wele okitami w’esɔ+ ambosala pɛkato+ ko amboyangɛ wodja onongo, kete nde pombaka mbela ɔsɔngɔ wa ngɔmbɛ k’omi k’aha la ɛkɔmɔ le Jehowa oko olambo wa pɛkato l’ɔtɛ wa pɛkato kakandasale.+ 4 Nde kaye la ngɔmbɛ kakɔ la soko dia luudu la dipɛma l’esanganelo+ la ntondo ka Jehowa, ko nde mbahɛ lonya lande l’ɔtɛ wa ngɔmbɛ kakɔ. Nde kadiake ngɔmbɛ kakɔ la ntondo ka Jehowa.+ 5 Oma laasɔ, ɔlɔmbɛdi wele okitami w’esɔ+ kɔshi yema ya dikila dia ngɔmbɛ ko nde mbɔtɔ la diɔ lo luudu la dipɛma l’esanganelo. 6 Ɔlɔmbɛdi katambiya lohita lande lo dikila+ ko nde ntɔngiya yema ya dikila mbala 7+ la ntondo ka Jehowa mbɛlanɛ la dihɔndɔ di’okombɔ dia lo dihole di’ekila. 7 Ɔlɔmbɛdi kakite yema ya dikila diakɔ ndo lo nseke ya lo elambwelo ka tshɔ y’opumu+ kele la ntondo ka Jehowa lo luudu la dipɛma l’esanganelo. Nde kate dikila tshɛ dia ngɔmbɛ diotshikadi l’ɛse ka elambwelo k’olambo wa lotshumba+ kele la soko dia luudu la dipɛma l’esanganelo.

8 “‘Oma laasɔ, nde kanya wata tshɛ wa ngɔmbɛ k’olambo wa pɛkato, mbidja ndo wata wakomba ɛsɔhi, wata wadinga mbo y’etema, 9 ndo awondo akɔ 2 la wata wa lɔkɔ wele suke la lokende. Nde kanya ndo okombɔ w’ovɔ kaamɛ la awondo.+ 10 Nde kanya kɛnɛ katowonyaka lo ngɔmbɛ k’olambo w’osanga.+ Ko ɔlɔmbɛdi ayotshumba diangɔ sɔ lo elambwelo k’olambo wa lotshumba.

11 “‘Koko lokoho la ngɔmbɛ k’omi ndo emunyi atɔ tshɛ kaamɛ la ɔtɛ atɔ, nsanga yatɔ, ɛsɔhi atɔ ndo tumi yatɔ,+ 12 kɛnɛ tshɛ katshikala lo ngɔmbɛ kakɔ, nde katshu la tɔ l’omamu wa mpango lo dihole dia pudipudi lɛnɛ atowokashaka otoko,* ko nde kitshumba laadiko dia nkunyi yele lo dja.+ Tɔ pombaka tshumbama lɛnɛ atowokashaka otoko.

13 “‘Ko naka olui w’otondo w’ase Isariyɛlɛ wambonga la onongo wa pɛkato kosadiwɔ aha la okonda,+ ko etshumanelo haweyi dia wambosala dui dimɔtshi diakawadjangɛ Jehowa diaha nsala,+ 14 ko pɛkato kakɔ kamboyeyama, kete etshumanelo pombaka mbela ɔsɔngɔ wa ngɔmbɛ k’omi oko olambo wa pɛkato ndo mbela ngɔmbɛ kakɔ la ntondo ka luudu la dipɛma l’esanganelo. 15 Dikumanyi dia l’olui w’ase Isariyɛlɛ kawahɛ anya awɔ l’ɔtɛ wa ngɔmbɛ kakɔ la ntondo ka Jehowa, ko ngɔmbɛ kakɔ kayodiakema la ntondo ka Jehowa.

16 “‘Oma laasɔ, ɔlɔmbɛdi wele okitami w’esɔ kɔtɔ la yema ya dikila dia ngɔmbɛ kakɔ lo luudu la dipɛma l’esanganelo. 17 Ɔlɔmbɛdi akɔ katambiya lohita lande lo dikila ko nde ntɔngiya yema mbala 7 la ntondo ka Jehowa mbɛlanɛ la dihɔndɔ di’okombɔ.+ 18 L’ɔkɔngɔ wa laasɔ, nde kakite yema ya dikila lo nseke yele lo elambwelo+ kele la ntondo ka Jehowa, mbuta ate kele lo luudu la dipɛma l’esanganelo. Nde katshole dikila tshɛ diotshikadi l’ɛse ka elambwelo k’olambo wa lotshumba kele la soko dia luudu la dipɛma l’esanganelo.+ 19 Nde kanya wata atɔ tshɛ ko nde mbatshumba lo elambwelo.+ 20 Nde pombaka nsala la ngɔmbɛ kakɔ woho wayondosala la ngɔmbɛ kekina k’olambo wa pɛkato. Ngasɔ mbayondosala la tɔ. Ɔlɔmbɛdi kasale ekombelo ka pɛkato ka wodja,+ ko vɔ wayodimanyiyama. 21 Nde katshu la ngɔmbɛ kakɔ l’omamu wa mpango ko nde kitshumba woho wakandatshumbe ngɔmbɛ ka ntondo.+ Ɔsɔ ekɔ olambo wa pɛkato dikambo di’etshumanelo.+

22 “‘Naka owandji+ ambosala pɛkato k’aha la okonda lo nsala dui dimɔtshi l’atei w’awui tshɛ wakadjanga Jehowa Nzambi kande diaha vɔ salema ko nde aya la onongo, 23 kana naka nde amboyeya dia nde akasale pɛkato lo mɔnyɔla didjango dimɔtshi, kete nde pombaka mbela ɔsɔngɔ wa mbudi k’omi waha la ɛkɔmɔ oko olambo ande. 24 Nde kahɛ lonya lande l’ɔtɛ w’ɔsɔngɔ wa mbudi ko kidiaka lo dihole diadiakema nyama y’olambo wa lotshumba la ntondo ka Jehowa.+ Ɔsɔ ekɔ olambo wa pɛkato. 25 Ɔlɔmbɛdi kɔshi yema ya dikila di’olambo wa pɛkato la lohita lande ko dikita lo nseke+ ya lo elambwelo k’olambo wa lotshumba ndo nde katshole dikila tshɛ diotshikadi l’ɛse ka elambwelo k’olambo wa lotshumba.+ 26 Nde katshumbe wata atɔ tshɛ lo elambwelo oko wata w’olambo w’osanga.+ Ɔlɔmbɛdi kasale ekombelo ka pɛkato kande, ko nde ayodimanyiyama.

27 “‘Naka onto* ambosala pɛkato k’aha la okonda ko ambonga la onongo lo woho wamondosala dui dimɔtshi l’atei w’awui wakadjanga Jehowa diaha vɔ salema,+ 28 kana naka nde amboyeya pɛkato kakandasale, kete nde pombaka mbela ɔsɔngɔ wa mbudi ka wadi oko olambo dikambo dia pɛkato kakandasale. 29 Nde kahɛ lonya lande l’ɔtɛ wa nyama k’olambo wa pɛkato ndo kadiake nyama k’olambo wa pɛkato lo dihole diakɔ diamɛ diadiakema nyama k’olambo wa lotshumba.+ 30 Ɔlɔmbɛdi kɔshi yema ya dikila dia nyama kakɔ la lohita lande ko nde dikita lo nseke yele lo elambwelo k’olambo wa lotshumba ndo katshole dikila tshɛ diotshikadi l’ɛse ka elambwelo.+ 31 Nde kanya wata+ atɔ tshɛ woho wanyɛma wata wa l’olambo w’osanga.+ Ɔlɔmbɛdi katshumbe wata akɔ lo elambwelo oko olambo wele l’opumu wa dimɛna* le Jehowa. Ɔlɔmbɛdi kasale ekombelo ka pɛkato kande, ko nde ayodimanyiyama.

32 “‘Ko naka ɔsɔngɔ w’ɔkɔkɔ mbalangande nkimɔ oko olambo wa pɛkato, kete nde pombaka mbela ɔsɔngɔ w’ɔkɔkɔ wa wadi waha la ɛkɔmɔ. 33 Nde kahɛ lonya lande l’ɔtɛ wa nyama k’olambo wa pɛkato, ko nde kidiaka oko olambo wa pɛkato lo dihole diadiakema nyama k’olambo wa lotshumba.+ 34 Ɔlɔmbɛdi kɔshi yema ya dikila di’olambo wa pɛkato la lohita lande ndo kadikite lo nseke yele lo elambwelo k’olambo wa lotshumba+ ndo katshole dikila tshɛ diotshikadi l’ɛse ka elambwelo. 35 Nde kanya wata tshɛ woho wanyɛma wata w’ɔsɔngɔ w’ɔkɔkɔ w’omi w’olambo w’osanga ndo ɔlɔmbɛdi katshumbe wata akɔ lo elambwelo laadiko di’elambo wa Jehowa watshumbama lo dja.+ Ɔlɔmbɛdi kasale ekombelo ka pɛkato kakandasale, ko nde ayodimanyiyama.+

5 “‘Naka onto* ɔmɔtshi akeye kana akɛnyi kana akoke dikambo diewɔ l’ohomba w’ɔmɛnyi*+ koko nde haditshi, nde ambosala pɛkato ndo ayolongola dilanya l’ɔtɛ wa munga kande.

2 “‘Kana naka onto* ɔmɔtshi ambosakanya ɛngɔ tshɛ ka mindo, oyadi odo wa nyama ka l’okonda ka mindo, odo w’elongalonga ka mindo, kana odo wa ditongami diele elui elui dia mindo,+ nde ayoyala mindo ndo ayonga la onongo oyadi kaanga nde heye. 3 Kana naka onto ɔmɔtshi ambosakanya mindo y’onto+ aha la mbeya, kana ɛngɔ tshɛ kele mindo kakoka mbowetɛ mindo ko nde amboyeya dui sɔ, kete nde aya la onongo.

4 “‘Kana naka onto* ɔmɔtshi ambotshiba la esasesase dia nsala dui dimɔtshi, oyadi di’ɔlɔlɔ kana dia kɔlɔ, oyadi woho akɔna wele dui diakɔ ndo nde kodieyaka, koko nde amboyeya dia akatshibe la esasesase, nde ayonga la onongo.*+

5 “‘Naka nde aya la onongo wa dui dimɔtshi lo akambo asɔ, kete nde pombaka mbishola+ pɛkato kande lo mbuta woho wakandakisale. 6 Nde kela ndo olambo ande w’onongo le Jehowa l’ɔtɛ wa pɛkato kakandasale,+ mbuta ate nyama ka wadi oma lo dongalonga diande, oyadi ɔsɔngɔ w’ɔkɔkɔ wa wadi kana ɔsɔngɔ wa mbudi ka wadi l’ɔtɛ wa pɛkato kande. Oma laasɔ, ɔlɔmbɛdi ayokomba pɛkato kande.

7 “‘Ko naka nde bu la akoka wa nkondja ɔkɔkɔ, nde pombaka mbela benga 2 kana ana 2 wa tokudumba+ le Jehowa oko olambo w’onongo l’ɔtɛ wa pɛkato, fudu kɛmɔtshi dikambo di’olambo wa pɛkato ndo kekina dikambo di’olambo wa lotshumba.+ 8 Nde ayoya la tɔ le ɔlɔmbɛdi wayokimɔ fudu ka ntondo dikambo di’olambo wa pɛkato lo kihembola ɔtɛ oma la ntondo ka wodi, aha la mpembola tshɛ tshɛ. 9 Nde katɔngiya yema ya dikila di’olambo wa pɛkato l’omamu wa elambwelo, koko dikila diatshikala diayotshulɔma l’ɛse ka elambwelo.+ Ɔsɔ ekɔ olambo wa pɛkato. 10 Nde kasale la fudu kina woho watowosalaka+ la olambo wa lotshumba. Ndo ɔlɔmbɛdi kakombe pɛkato kande kakandasale, ko nde ayodimanyiyama.+

11 “‘Ko naka nde bu la akoka wa nkondja benga 2 kana ana 2 wa tokudumba, kete l’ɔtɛ wa pɛkato kande nde pombaka mbela etenyi ka dikumi ka yɛdikɔ ya efa*+ y’ofushi wa dimɛna oko olambo wa pɛkato. Nde hahombe mbidja esɔ kana tshɔ ya wɛma lɔkɔ, nɛ dia ɔsɔ ekɔ olambo wa pɛkato. 12 Nde kela le ɔlɔmbɛdi, ko ɔlɔmbɛdi ayɔsa yema lo diwambo yele didjidji di’olambo w’otondo ndo ayotshumba lo elambwelo laadiko di’olambo watshumbama lo dja dikambo dia Jehowa. Ɔsɔ ekɔ olambo wa pɛkato. 13 Ɔlɔmbɛdi ayokomba pɛkato kande kakandasale, mbuta ate pɛkato kɛmɔtshi l’atei wa pɛkato shɔ tshɛ, ko nde ayodimanyiyama.+ Kɛnɛ kayotshikala oma l’olambo ayonga dikambo di’ɔlɔmbɛdi+ oko wasalemadiɔ la olambo wa ntɔngɔ.’”+

14 Jehowa akatetemala mbutɛ Mɔsɛ ate: 15 “Naka onto* ɔmɔtshi amboshisha kɔlamelo yande lo nsekola ɔlɛmbɛ wendana la diangɔ di’ekila diaki Jehowa+ aha la okonda, nde pombaka mbela ɔkɔkɔ w’omi waha la ɛkɔmɔ oma lo dongalonga diande le Jehowa oko olambo w’onongo.+ Oshinga wa nyama kakɔ lo tɔshɛkɛlɛ* ta mfɛsa wayoshikikɛma lo ndjela yɛdikɔ ya shɛkɛlɛ ya lo dihole di’ekila.*+ 16 Nde pombaka nkimɔ oshinga wa pɛkato kosadinde dikambo dia dihole di’ekila ndo nde ayokotshanya k’atanu ɔtɔi k’oshinga akɔ.+ Nde kakisha ɔlɔmbɛdi dia ɔlɔmbɛdi nkomba pɛkato+ kande la ɔkɔkɔ w’omi w’olambo w’onongo, ko nde ayodimanyiyama.+

17 “Naka onto* ɔmɔtshi ambosala pɛkato lo nsala dui dimɔtshi l’atei w’awui wakasekɛ Jehowa, oyadi kaanga nde hasadi la okonda, nde ekɔ paka la onongo ndo nde ayolongola dilanya l’ɔtɛ wa munga kande.+ 18 Nde pombaka mbela ɔkɔkɔ w’omi waha la ɛkɔmɔ oma lo dongalonga diande le ɔlɔmbɛdi lo ndjela oshinga awɔ oko olambo w’onongo.+ Oma laasɔ, ɔlɔmbɛdi ayokomba pɛkato kande l’ɔtɛ wa munga kakandasale aha la okonda ndo aha la mbeya, ko nde ayodimanyiyama. 19 Ɔsɔ ekɔ olambo w’onongo. Nde ekɔ la onongo lo woho wakandasalɛ Jehowa pɛkato.”

6 Jehowa akatɛ Mɔsɛ ate: 2 “Naka onto* ɔmɔtshi ambosala pɛkato ko amboshisha kɔlamelo le Jehowa+ lo nkesa osekande lo kɛnɛ kendana la ɛngɔ kɛmɔtshi kakandawosha+ kana ɛngɔ kakandombe le nde kana nde ambova kana ambokesa osekande, 3 kana nde ambɛna ɛngɔ kɛmɔtshi kakashishɔ ko ambokesa lo dikambo di’ɛngɔ kakɔ ndo naka nde ambotshiba lo kashi lo kɛnɛ kendana la pɛkato ka ngasɔ kakandasale,+ kete nde pombaka nsala nganɛ: 4 Naka nde akasale pɛkato ndo ekɔ la onongo, kete nde pombaka nkaloya kɛnɛ kakandave, kɛnɛ kakandahɔtɔla, kɛnɛ kakandɔshi la lokeso, kɛnɛ kakawawosha kana ɛngɔ kakashishɔ kakandɛnyi, 5 kana ɛngɔ tshɛ kakandatshibe lo lokeso dikambo diatɔ, nde pombaka nsɔmbɔla kɛnɛ tshɛ kɛdimi la tɔ+ ndo nde ayokotsha k’atanu ɔtɔi k’oshinga w’ɛngɔ kakɔ. Nde ayokisha kangatɔ lushi lashikikɛma dia nde ekɔ la onongo. 6 Nde ayɔtɔla ɔkɔkɔ w’omi waha la ɛkɔmɔ w’oma lo dongalonga diande le ɔlɔmbɛdi oko olambo w’onongo ande le Jehowa lo ndjela nɛmɔ diakashikikɛma dikambo di’olambo w’onongo.+ 7 Ɔlɔmbɛdi ayokomba pɛkato kande la ntondo ka Jehowa, ko nde ayodimanyiyama lo dui tshɛ diakandasale diende la onongo.”+

8 Jehowa akatetemala mbutɛ Mɔsɛ ate: 9 “Tɛ Arɔna nde l’anande w’apami wate: ‘Ɔlɛmbɛ wendana la olambo wa lotshumba vɔ ɔnɛ:+ Olambo wa lotshumba kawotshikalake laadiko dia dja yele lo elambwelo otsho w’otondo polo la pindju ndo dja kayɔhɛtake wonya tshɛ lo elambwelo. 10 Ɔlɔmbɛdi kalɔtɛ ahɔndɔ ande wa linɛnɛ+ w’olimu ndo nde kalɔtɛ kupe*+ ya linɛnɛ l’ɛse. Oma laasɔ, nde kanya otoko w’olambo wa lotshumba wakalongola la dja lo elambwelo ko nde nkitsha otoko*+ akɔ l’omamu wa elambwelo. 11 Oma laasɔ, nde kakolole ahɔndɔ+ akɔ ko nde ndɔta ahɔndɔ akina, ko nde ntɔla otoko otsha lo dihole dia pudipudi l’andja wa mpango.+ 12 Dja kayɔhɛtake wonya tshɛ lo elambwelo. Yɔ hayohombe nimala. Ɔlɔmbɛdi pombaka mbidjaka nkunyi+ lɔkɔ pindju tshɛ ndo nɔngɔsɔlaka olambo wa lotshumba laadiko diayɔ ndo nde katshumbake wata w’oma l’elambo w’osanga lɔkɔ.+ 13 Dja kayɔhɛtake wonya tshɛ lo elambwelo. Yɔ hayohombe nimala.

14 “‘Ɔlɛmbɛ wendana la olambo wa ntɔngɔ+ vɔ ɔnɛ: Nyu ana w’apami w’Arɔna mbahomba mbelaka olambo akɔ la ntondo ka Jehowa mbɛlanɛ la elambwelo. 15 Ɔmɔtshi l’atei awɔ kɔsake diwambo di’ofushi wa dimɛna di’olambo wa ntɔngɔ ndo yema y’esɔ ndo tshɔ tshɛ ya wɛma yele laadiko di’olambo akɔ wa ntɔngɔ, ko nde ditshumba lo elambwelo oko opumu wa dimɛna* dikambo dia didjidji di’olambo w’otondo le Jehowa.+ 16 Arɔna nde l’anande w’apami kawɔlɛke kɛnɛ katshikala.+ Kawosalake mapa waha la wodoya la tɔ, kele kawɔlɛke lo dihole di’ekila. Kawɔlɛke lo sɛkɛ dia luudu la dipɛma l’esanganelo.+ 17 Vɔ hawohombe kisɔhanya la wodoya.+ Dimi lambowashatɔ oko yema yawɔ oma l’elambo ami watshumbama lo dja.+ Ɔsɔ ekɔ ɛngɔ koleki ekila+ oko olambo wa pɛkato ndo oko olambo w’onongo. 18 Ana w’apami tshɛ wa Arɔna wayokilɛka.+ Vɔ mbayɔsaka diangɔ sɔ di’oma l’elambo wa Jehowa watshumbama lo dja+ pondjo pondjo lo nɔnga yanyu tshɛ. Kɛnɛ tshɛ kasakana la diɔ* kayonga ekila.’”

19 Jehowa akatɛ Mɔsɛ nto ate: 20 “Olambo wayelaka Arɔna nde l’anande w’apami la ntondo ka Jehowa lushi layowokitamaka esɔ+ vɔ ɔnɛ: Etenyi ka dikumi ka efa*+ w’ofushi wa dimɛna oko olambo+ wa ntɔngɔ wakimɔma mbala la mbala, k’ahende ɔtɔi kawɔ la pindju ndo k’ahende ɔtɔi kawɔ la dikɔlɔ. 21 Vɔ wayokatemaka la esɔ lo mpanu.+ Koyake la wɔ l’ɔkɔngɔ wa wɛ mbɔsɔhanya dimɛna la esɔ ko wɛ mbowela lo bɛtshi bɛtshi oko ɛngɔ ka lokatɛ k’oma l’olambo wa ntɔngɔ oko opumu wa dimɛna* le Jehowa. 22 Ɔlɔmbɛdi wele okitami w’esɔ wayowɔhɛna oma l’atei w’anande w’apami+ kayosala dui sɔ. Ɔnɛ ele ɔlɛmbɛ wa pondjo: Olambo w’otondo wayotshumbamaka dikambo dia Jehowa. 23 Olambo wa ntɔngɔ tshɛ w’oma le ɔlɔmbɛdi pombaka tshumbama tshɛ. Vɔ hawohombe ndɛma.”

24 Jehowa akatɛ Mɔsɛ nto ate: 25 “Tɛ Arɔna nde l’anande w’apami wate: ‘Ɔlɛmbɛ wendana l’olambo wa pɛkato+ vɔ ɔnɛ: Lo dihole diadiakema+ nyama k’olambo wa lotshumba mbayodiakemaka ndo nyama k’olambo wa pɛkato la ntondo ka Jehowa. Ɔsɔ ekɔ ɛngɔ koleki ekila. 26 Ɔlɔmbɛdi wakilambola dikambo dia pɛkato mbayokilɛ.+ Nde ayokilɛ lo dihole di’ekila, lo sɛkɛ dia luudu la dipɛma l’esanganelo.+

27 “‘Ɛngɔ tshɛ kayosakana la emunyi atɔ kayoyala ekila ndo naka yema ya dikila diatɔ yambotamɛ lo dihɔndɔ di’onto ɔmɔtshi, wɛ pombaka nsola kɛnɛ kakatamɛ dikila diakɔ lo dihole di’ekila. 28 Mpoke ka diwomba kakakatema nyama kakɔ pombaka mbolama. Ko naka tɔ kakakatema lo mpoke ka nkonga, kete mpoke kakɔ pombaka pokama dinyuka ndo solama la ashi.

29 “‘Pami tshɛ kele ɔlɔmbɛdi ayokilɛka.+ Ɔsɔ ekɔ ɛngɔ koleki ekila.+ 30 Koko ndooko nyama k’olambo wa pɛkato kakoka ndɛma naka yema mɔtshi ya dikila diatɔ yambɔtɔlama lo luudu la dipɛma l’esanganelo dia tokomba pɛkato lo dihole di’ekila.+ Tɔ pombaka tshumbama lo dja.

7 “‘Ɔlɛmbɛ wendana l’olambo w’onongo+ vɔ ɔnɛ: Ɔsɔ ekɔ ɛngɔ koleki ekila. 2 Vɔ kawodiake nyama k’olambo w’onongo lo dihole diatowodiakaka nyama k’olambo wa lotshumba ndo dikila diatɔ+ pombaka mɔngama lo wedi akɔ tshɛ wa elambwelo.+ 3 Nde kakimɔ wata atɔ+ tshɛ mbidja ndo wata wa lo wela, wata wakomba ɛsɔhi, 4 ndo awondo akɔ 2 kaamɛ la wata wele suke la lokende. Nde kanya ndo okombɔ w’ovɔ kaamɛ la awondo.+ 5 Ɔlɔmbɛdi kawatshumbe lo elambwelo oko olambo watshumbama lo dja dikambo dia Jehowa.+ Ɔsɔ ekɔ olambo w’onongo. 6 Pami tshɛ kele ɔlɔmbɛdi ayokilɛka+ ndo tɔ pombaka ndɛma lo dihole di’ekila. Ɔsɔ ekɔ ɛngɔ koleki ekila.+ 7 Ɔlɛmbɛ wendana l’olambo wa pɛkato mendanaka nto l’olambo w’onongo. Nyama k’olambo akɔ kekɔ kaki ɔlɔmbɛdi wakomba pɛkato la tɔ.+

8 “‘Etena kela ɔlɔmbɛdi olambo wa lotshumba dikambo di’onto ɔmɔtshi, lokoho+ la nyama k’olambo wa lotshumba kakawela le ɔlɔmbɛdi layoyala lande.

9 “‘Olambo tshɛ wa ntɔngɔ wokatemi lo nkuka kana lo mpoke kana lo mpanu+ wekɔ waki ɔlɔmbɛdi walambola. Vɔ wayonga wande.+ 10 Koko olambo tshɛ wa ntɔngɔ wɔsɔhanyemi la esɔ+ kana wa womu+ wayongaka dikambo dia ana w’apami tshɛ w’Arɔna. Vɔ tshɛ wayokahanaka popo.

11 “‘Ɔlɛmbɛ wendana la olambo w’osanga+ wakoka onto mbela le Jehowa vɔ ɔnɛ: 12 Naka nde ambolanga nkimɔ olambo akɔ oko djembetelo ya eokelo ka losaka,+ kete nde kela ndo mapa w’ebolonga waha la wodoya wɔsɔhanyemi la esɔ, mapa wa tɔlɛwɛlɛwɛ waha la wodoya wokitami esɔ ndo mapa w’ebolonga wosalemi la ofushi wa dimɛna, wɔsɔhanyemi dimɛna wokitami esɔ kaamɛ la olambo ande wa eokelo ka losaka. 13 Nde kakimɔ olambo ande kaamɛ la mapa w’ebolonga wele la wodoya ndo olambo wa eokelo ka losaka w’oma lo elambo ande w’osanga. 14 Oma lo diangɔ sɔ kayondela yema mɔtshi oma l’olambo la olambo oko yema y’ekila dikambo dia Jehowa. Yema shɔ yayonga yaki ɔlɔmbɛdi wamɔnga dikila dia nyama y’elambo w’osanga.+ 15 Nyama k’olambo wa eokelo ka losaka k’oma l’elambo ande w’osanga pombaka ndɛma lushi lakilambolande. Nde hahombe mbetɛ ndooko yema polo la pindju.+

16 “‘Naka nde ambolanga nkimɔ woshasha wakandatshike dɔkɔlɔkɔ+ kana woshasha wa la lolango,+ kete vɔ pombaka ndɛma lushi lalambolande woshasha ande ndo kɛnɛ katshikala kokaka ndɛma la wedi a pindju. 17 Koko kɛnɛ tshɛ katshikala oma lo nyama k’olambo lushi la 3 pombaka tshumbama lo dja.+ 18 Ko naka nyama k’oma l’olambo ande w’osanga kambɔlɛma lushi la 3, kete ɔnɛ lakikimɔ hatetawɔma le Nzambi. Vɔ hawotowohomuya lokolo l’ɔlɔ. Ɔsɔ ekɔ ɛngɔ ka kɔlɔ ndo onto* layɔlɛ yema ya nyama kakɔ ayolongola dilanya l’ɔtɛ wa munga kande.+ 19 Yema ya nyama yasakana la ɛngɔ tshɛ kele mindo hayohombe ndɛma. Yɔ la dia tshumbama lo dja. Onto tshɛ lele pudipudi kokaka ndɛ nyama ka pudipudi.

20 “‘Koko onto* tshɛ lele mindo lalɛ nyama k’olambo w’osanga wa Jehowa, onto* ɔsɔ pombaka ndjakema.+ 21 Naka onto* ambonanda ɛngɔ kɛmɔtshi ka mindo, oyadi mindo k’onto,+ nyama ka mindo+ kana ɛngɔ tshɛ ka nyɛtɛɛtɛ+ kele mindo ko nde ambɔlɛ yema ya nyama k’olambo w’osanga wa Jehowa, onto* ɔsɔ la dia ndjakema.’”

22 Jehowa akatetemala mbutɛ Mɔsɛ ate: 23 “Tɛ ase Isariyɛlɛ wate: ‘Hanyohombe ndɛ weho tshɛ wa wata+ wa ngɔmbɛ kana w’ɔsɔngɔ w’ɔkɔkɔ kana wa mbudi. 24 Nyu koka nkamba la wata wa nyama kambotanema odo ndo wata wa nyama kodiakemi oma le nyama kekina lo eyango ekina tshɛ, koko hanyohombe pondjo mbalɛ.+ 25 Nɛ dia onto tshɛ lalɛ wata wa nyama kelande oko olambo watshumbama lo dja dikambo dia Jehowa pombaka ndjakema.

26 “‘Hanyohombe ndɛ weho tshɛ wa dikila,+ oyadi dia fudu kana dia nyama lo ahole tshɛ wadjasɛnyu. 27 Onto* tshɛ lalɛ woho tshɛ wa dikila pombaka ndjakema.’”+

28 Jehowa akatɛ Mɔsɛ ate: 29 “Tɛ ase Isariyɛlɛ wate: ‘Onto tshɛ lalanga mbela olambo ande w’osanga le Jehowa kela etenyi k’oma l’olambo ande w’osanga le Jehowa.+ 30 Nde kɛmbɛ wata+ kaamɛ la ntolo lo anya oko olambo watshumbama lo dja dikambo dia Jehowa. Nde kawetshetsha lɛnɛ la lɛnɛ oko olambo wa letshetsha+ la ntondo ka Jehowa. 31 Ɔlɔmbɛdi katshumbe wata lo elambwelo,+ koko Arɔna nde l’anande w’apami+ kawɔshi ntolo.

32 “‘Kanyoshake ɔlɔmbɛdi elemba ka lokolo l’omi k’oma l’elambo anyu w’osanga+ oko etenyi k’ekila. 33 Ɔna Arɔna lela dikila di’elambo w’osanga la wata kayɔsaka elemba ka lokolo l’omi oko etenyi kande.+ 34 Nɛ dia dimi lambɔsa ntolo ka l’olambo wa letshetsha ndo elemba ka lokolo l’omi ka lo etenyi k’ekila k’oma l’elambo w’osanga w’ase Isariyɛlɛ ndo lambosha ɔlɔmbɛdi Arɔna nde l’anande w’apami. Ɔsɔ ekɔ didjango dia pondjo le ase Isariyɛlɛ.+

35 “‘Ɔsɔ mbaki etenyi k’oma l’olambo wa Jehowa watshumbama lo dja kakahombaka kitshama laande dikambo di’ɛlɔmbɛdi, dikambo dia Arɔna nde l’anande w’apami oma ko lushi lakandaalowola dia vɔ kambɛ Jehowa+ oko ɛlɔmbɛdi. 36 Jehowa akadjanga dia mbasha etenyi kɛsɔ oma le ase Isariyɛlɛ lo lushi lakandaakite esɔ.+ Ɔsɔ ekɔ didjango dia pondjo lo nɔnga yawɔ tshɛ.’”

37 Ɔsɔ kele ɔlɛmbɛ wendana l’olambo wa lotshumba,+ olambo wa ntɔngɔ,+ olambo wa pɛkato,+ olambo w’onongo,+ olambo w’olowelo+ ndo olambo w’osanga,+ 38 oko wakadjangɛ Jehowa Mɔsɛ lo Dikona dia Sinayi+ lo lushi lakandadjangɛ ase Isariyɛlɛ dia vɔ mbelaka elambo awɔ le Jehowa l’oswe wa Sinayi.+

8 Jehowa akatetemala mbutɛ Mɔsɛ ate: 2 “Ɔsa Arɔna nde l’anande w’apami+ la ahɔndɔ,+ esɔ k’okitelo,+ ngɔmbɛ k’olambo wa pɛkato, ɛkɔkɔ 2 ndo saka diele la mapa waha la wodoya,+ 3 kele tshumanya olui w’otondo w’ase Isariyɛlɛ la soko dia luudu la dipɛma l’esanganelo.”

4 Oma laasɔ, Mɔsɛ akasale oko wakawodjangɛ Jehowa ndo nde akatshumanya olui w’ase Isariyɛlɛ la soko dia luudu la dipɛma l’esanganelo. 5 Ko Mɔsɛ akatɛ olui akɔ ate: “Jehowa ambodjanga dia sho nsala nganɛ.” 6 Ɔnkɔnɛ Mɔsɛ akasukanya Arɔna nde l’anande w’apami ndo akawaɔtsha.+ 7 L’ɔkɔngɔ wa laasɔ, nde akalɔtsha Arɔna okutu,+ akoodinge ohele,+ akɔɔlɔtsha okutu wele bu l’anya,+ efodɛ+ ndo akasunɛ ohele*+ dimɛna laadiko dia efodɛ dia mbokeketsha lo demba. 8 Oma laasɔ, nde akɔɔlɔtsha ɛngɔ kalɔtawɔ lo ntolo+ ndo akadje Urimɛ la Tumimɛ+ lo ɛngɔ kalɔtawɔ lo ntolo. 9 Ko nde akɔɔlɔtsha dihɔndɔ diadingawɔ l’ɔtɛ+ ndo akadje lokaka la ngaingai la paonyi lele djembetelo y’ekila ya ndjakimɔ*+ laadiko dia dihɔndɔ diadingawɔ l’ɔtɛ, oko wakadjangɛ Jehowa Mɔsɛ.

10 Oma laasɔ, Mɔsɛ akɔshi esɔ k’okitelo ko akakite lo tabɛrnaklɛ ndo lo diangɔ tshɛ diaki lɔkɔ,+ ko akadikidia. 11 L’ɔkɔngɔ wa laasɔ, nde akatɔngiya yema y’esɔ kakɔ mbala 7 laadiko dia elambwelo, akakikite lo elambwelo la diangɔ tshɛ dia lɔkɔ ndo lo dɔnga dia woke la ekitshelo kadiɔ dia nde dikidia. 12 L’ekomelo, nde akatɛ yema y’esɔ k’okitelo l’ɔtɛ w’Arɔna ndo akookite esɔ dia mbokidia.+

13 Oma laasɔ, Mɔsɛ akasukanya ana w’apami w’Arɔna ko akaalɔtsha ekutu, ehele ndo ahɔndɔ wa l’ɔtɛ,+ oko wakadjangɛ Jehowa Mɔsɛ.

14 L’ɔkɔngɔ wa laasɔ, nde akaye la ngɔmbɛ k’olambo wa pɛkato, ko Arɔna nde l’anande w’apami wakahɛ anya awɔ l’ɔtɛ wa ngɔmbɛ kakɔ k’olambo wa pɛkato.+ 15 Mɔsɛ akakidiake ndo akɔshi yema ya dikila+ lo lohita lande ko akakite lo nseke ya lo elambwelo lo wedi akɔ tshɛ, ko nde akɛdia elambwelo oma lo pɛkato, koko nde akatshola dikila diakatshikala l’ɛse ka elambwelo dia nde kikidia ndo dia nkomba pɛkato laadiko diatɔ. 16 L’ɔkɔngɔ wa laasɔ, nde akɔshi wata tshɛ waki laadiko di’ɛsɔhi, okombɔ w’ovɔ ndo awondo akɔ 2 la wata wa lɔkɔ, ko Mɔsɛ akaatshumbe lo elambwelo.+ 17 Oma laasɔ, nde akɔshi kɛnɛ tshɛ kakatshikala oma lo ngɔmbɛ kakɔ, lokoho latɔ, emunyi atɔ ndo tumi yatɔ, ko akatshumbe lo dja l’andja wa mpango,+ oko wakadjangɛ Jehowa Mɔsɛ.

18 Ko nde akasukanya ɔkɔkɔ w’omi w’olambo wa lotshumba, ko Arɔna la anande w’apami wakahɛ anya awɔ l’ɔtɛ w’ɔkɔkɔ akɔ.+ 19 Oma laasɔ, Mɔsɛ akoodiake ndo akamɔngɛ dikila lo wedi akɔ tshɛ wa elambwelo. 20 Nde akasɛsɛ ɔkɔkɔ akɔ, ko Mɔsɛ akatshumbe ɔtɛ, tenyi diakandasɛsɛ ndo wata.* 21 Nde akasole ɛsɔhi la nsanga la ashi. Mɔsɛ akatshumbe ɔkɔkɔ w’otondo lo elambwelo. Ɔsɔ aki olambo wa lotshumba wele l’opumu wa dimɛna.* Ɔsɔ aki olambo watshumbama lo dja dikambo dia Jehowa, oko wakadjangɛ Jehowa Mɔsɛ.

22 Oma laasɔ, nde akaye la ɔkɔkɔ w’omi wa 2, ɔkɔkɔ w’olowelo,+ ko Arɔna nde l’anande w’apami wakahɛ anya awɔ l’ɔtɛ w’ɔkɔkɔ akɔ.+ 23 Mɔsɛ akɔshi yema ya dikila diawɔ, ko akakite lo toyi dia lonya l’omi dia Arɔna ndo lo omalohita la lo lonya lande l’omi ndo lo lohita la woke la lo lokolo lande l’omi. 24 Oma laasɔ, Mɔsɛ akasukanya ana w’Arɔna, ko nde akaakite yema ya dikila onto l’onto lo toyi diande dia lonya l’omi ndo lo omalohita la lo lonya lande l’omi ndo lo lohita la woke la lo lokolo lande l’omi. Koko Mɔsɛ akamɔngɛ dikila diakatshikala lo wedi akɔ tshɛ wa elambwelo.+

25 L’ɔkɔngɔ wa laasɔ, nde akɔshi wata, wela wele la wata, wata tshɛ waki laadiko di’ɛsɔhi, okombɔ w’ovɔ, awondo akɔ 2 la wata wa lɔkɔ ndo elemba ka lokolo l’omi.+ 26 Nde akɔshi mapa 1 w’obolonga waha la wodoya,+ mapa 1 w’obolonga wosanganyemi la esɔ+ ndo mapa 1 wa djɛwɛlɛwɛ oma lo saka dia mapa waha la wodoya diaki la ntondo ka Jehowa. Oma laasɔ, nde akakitsha diangɔ sɔ laadiko dia wata la elemba ka lokolo l’omi. 27 L’ɔkɔngɔ wa laasɔ, nde akadje diangɔ sɔ tshɛ lo awambo w’Arɔna ndo lo awambo w’anande w’apami, ko akatatɛ dietshetsha lɛnɛ la lɛnɛ oko olambo wa letshetsha la ntondo ka Jehowa. 28 Oma laasɔ, Mɔsɛ akɔshi diangɔ diakɔ oma l’anya awɔ, ko akaditshumbe lo elambwelo laadiko di’olambo wa lotshumba. Ɔsɔ aki olambo w’olowelo oko opumu wa dimɛna.* Ɔsɔ aki olambo watshumbama lo dja dikambo dia Jehowa.

29 Ko Mɔsɛ akɔshi ntolo ndo akakietshetsha lɛnɛ la lɛnɛ oko olambo wa letshetsha la ntondo ka Jehowa.+ Ntolo k’oma l’ɔkɔkɔ w’omi w’olowelo kakayala etenyi kaki Mɔsɛ, oko wakadjangɛ Jehowa Mɔsɛ.+

30 Mɔsɛ akɔshi yema y’esɔ k’okitelo+ ndo yema ya dikila diaki lo elambwelo, ko akatɔngiya le Arɔna la lo ahɔndɔ ande ndo le anande w’apami la lo ahɔndɔ w’anande. Lo nsala ngasɔ, nde akakidia Arɔna la ahɔndɔ ande ndo anande w’apami+ la ahɔndɔ awɔ.+

31 Oma laasɔ, Mɔsɛ akatɛ Arɔna nde l’anande w’apami ate: “Nyokatɛ+ nyama kɛnɛ la soko dia luudu la dipɛma l’esanganelo ndo kanyokile laawɔ kaamɛ la mapa wele lo saka di’olowelo, oko wakawambidjangɛ ɔnɛ: ‘Arɔna nde l’anande w’apami mbayokilɛ.’+ 32 Kanyotshumbe nyama ndo mapa wayotshikala lo dja.+ 33 Hanyohombe mimɔ oma la soko dia luudu la dipɛma l’esanganelo l’edja ka nshi 7 polo ndo lam’ayoshila nshi y’olowelo anyu, nɛ dia ayohombama nshi 7 dia nyolowola oko ɛlɔmbɛdi.*+ 34 Jehowa akadjanga dia sho nsala kɛnɛ kambotosala ɛlɔ dia nkomba pɛkato yanyu.+ 35 Nyayotshikala la soko dia luudu la dipɛma l’esanganelo yanyi oko yanyi, otsho oko otsho l’edja ka nshi 7+ ndo nyayokotshaka ɔkɛndɛ anyu le Jehowa+ diaha nyu mvɔ, nɛ dia ngasɔ kakawambidjangɛ.”

36 Ko Arɔna nde l’anande w’apami wakasale kɛnɛ tshɛ kakadjanga Jehowa lo tshimbo ya Mɔsɛ.

9 Lushi la 8,+ Mɔsɛ akelɛ Arɔna nde l’anande w’apami ndo dikumanyi dia l’Isariyɛlɛ. 2 Nde akatɛ Arɔna ate: “Ɔsa ɔsɔngɔ wa ngɔmbɛ waha la ɛkɔmɔ dikambo di’olambo wa pɛkato+ yayɛ ndo ɔkɔkɔ w’omi waha la ɛkɔmɔ dikambo di’olambo wa lotshumba, kele elawɔ la ntondo ka Jehowa. 3 Koko kote ase Isariyɛlɛ wate: ‘Nyɔshi wombe wa mbudi dikambo di’olambo wa pɛkato ndo ngɔmbɛ kele la ɔnɔnyi 1 kaha la ɛkɔmɔ la ɔsɔngɔ w’ɔkɔkɔ w’omi wele la ɔnɔnyi 1 waha la ɛkɔmɔ dikambo di’olambo wa lotshumba, 4 ndo ngɔmbɛ 1 la ɔkɔkɔ 1 w’omi dikambo di’elambo w’osanga+ dia towalambola la ntondo ka Jehowa ndo olambo wa ntɔngɔ+ wɔsɔhanyemi la esɔ, nɛ dia Jehowa ayɛnama le nyu ɛlɔ.’”+

5 Ko vɔ wakɔshi kɛnɛ kakawadjangɛ Mɔsɛ la ntondo ka luudu la dipɛma l’esanganelo. Oma laasɔ, olui w’otondo w’ase Isariyɛlɛ wakasukana ko wakemala la ntondo ka Jehowa. 6 Ko Mɔsɛ akate ate: “Kɛnɛ mbakadjangi Jehowa dia nyu nsala, dia lotombo la Jehowa mɛnama le nyu.”+ 7 Oma laasɔ, Mɔsɛ akatɛ Arɔna ate: “Sukana la elambwelo ndo ela olambo ayɛ wa pɛkato+ la olambo ayɛ wa lotshumba kele komba pɛkato yayɛ+ ndo y’ase luudu layɛ, kele yokimɔ olambo wa wodja+ ndo yokombe pɛkato yawɔ,+ oko wakadjanga Jehowa.”

8 Mbala kakɔ ɔtɔi, Arɔna akasukana la elambwelo ndo akadiake ngɔmbɛ k’olambo wa pɛkato yande.+ 9 Oma laasɔ, ana w’apami w’Arɔna wakawela dikila,+ ko nde akadje lohita lande lo dikila diakɔ ko akadikite lo nseke ya lo elambwelo ndo nde akatshola dikila diakatshikala l’ɛse ka elambwelo.+ 10 Nde akatshumbe wata, awondo ndo okombɔ w’ovɔ w’oma l’olambo wa pɛkato lo elambwelo, oko wakadjangɛ Jehowa Mɔsɛ.+ 11 Nde akatshumbe ndo emunyi la lokoho lo dja l’andja wa mpango.+

12 Oma laasɔ, nde akadiake nyama k’olambo wa lotshumba ndo ana w’apami w’Arɔna wakawela dikila, ko nde akadimɔngɛ lo wedi akɔ tshɛ wa elambwelo.+ 13 Vɔ wakawosha tenyi di’olambo wa lotshumba kaamɛ la ɔtɛ, ko nde akaditshumbe lo elambwelo. 14 Ndo nto, nde akasole ɛsɔhi la nsanga ko akatshumbe laadiko di’olambo wa lotshumba lo elambwelo.

15 Oma laasɔ, nde akela olambo wendana la wodja ndo akɔshi mbudi k’olambo wa pɛkato kaki oma le wodja ndo akakidiake, ko akakilambola olambo wa pɛkato oko wakandasale la wa ntondo. 16 Nde akalambola olambo wa lotshumba ndo akasale lo ndjela woho watosalemaka.+

17 L’ɔkɔngɔ wa laasɔ, nde akela olambo wa ntɔngɔ,+ akalodia yema lo diwambo diande ndo akatshumbe lo elambwelo kaamɛ la olambo wa lotshumba wa la pindju.+

18 L’ɔkɔngɔ diko, nde akadiake ngɔmbɛ ndo ɔkɔkɔ w’omi w’olambo w’osanga dikambo dia wodja. Ko ana w’apami w’Arɔna wakawosha dikila ko nde akadimɔngɛ lo wedi akɔ tshɛ wa elambwelo.+ 19 Lo kɛnɛ kendana la diangɔ dia wata di’oma lo ngɔmbɛ,+ wela wele la wata w’ɔkɔkɔ, wata wakomba mbo y’etema, awondo ndo okombɔ w’ovɔ,+ 20 vɔ wakakitsha diangɔ dia wata sɔ tshɛ laadiko dia ntolo ndo oma laasɔ, nde akatshumbe diangɔ diakɔ dia wata lo elambwelo.+ 21 Koko Arɔna akɔshi ntolo la elemba ka lokolo l’omi, ko aketshetsha lɛnɛ la lɛnɛ oko olambo wa letshetsha la ntondo ka Jehowa, oko wakadjanga Mɔsɛ.+

22 Oma laasɔ, Arɔna akawedia anya ande otsha le wodja ndo akaatshɔkɔla,+ ko nde akaholɔ oma lɛnɛ akandalambola olambo wa pɛkato, olambo wa lotshumba ndo elambo w’osanga. 23 L’ekomelo, Mɔsɛ nde la Arɔna wakɔtɔ lo luudu la dipɛma l’esanganelo, ko wakatombe oma lɔkɔ ndo wakatshɔkɔla wodja.+

Ko lotombo la Jehowa lakɛnama le anto tshɛ,+ 24 ndo dja yakatombe oma le Jehowa,+ ko yakatshumbe olambo wa lotshumba la diangɔ dia wata diaki lo elambwelo. Lam’akɛnyi anto tshɛ dui sɔ, vɔ wakangɛnangɛna ko wakayakɔsha ekukumadi.+

10 L’ɔkɔngɔ wa laasɔ, ana w’apami w’Arɔna, Nadaba nde la Abihu,+ onto l’onto akɔshi ɛngɔ kande ka mɛmbaka dja, akadje dja lɔkɔ ndo akadje tshɔ+ lɔkɔ. Ko vɔ wakalambola olambo* wakiwɔ komonga la lotshungɔ la nambola+ la ntondo ka Jehowa, dui diakinde kombadjangɛ dia vɔ nsala. 2 Ko dja yakatombe oma la ntondo ka Jehowa ndo yakaatshumbe,+ ɔnkɔnɛ vɔ wakavu la ntondo ka Jehowa.+ 3 Ko Mɔsɛ akatɛ Arɔna ate: “Jehowa akatshi ate: ‘Dimi layokidiama l’atei wa wanɛ wele suke la mi+ ndo dimi layotombɔma la ntondo k’anto tshɛ.’” Ko Arɔna akatshikala ki.

4 Ɔnkɔnɛ Mɔsɛ akelɛ Mishaɛlɛ nde la Elizafana, ana w’apami wa Uziyɛlɛ+ wa kose aki she Arɔna, ko nde akawatɛ ate: “Nyoye lanɛ, nyonya anangɛnyu oma la ntondo ka dihole di’ekila kele nyaatɔlɛ dihole dimɔtshi l’andja wa mpango.” 5 Ko vɔ wakaye ko wakɛmbɛ apami akɔ la ekutu awɔ otsha lo dihole dimɔtshi l’andja wa mpango, oko wakawatɛ Mɔsɛ.

6 Ko Mɔsɛ akatɛ Arɔna la Eleazara ndo Itamara, anande akina w’apami ate: “Tanyotshikake divo esakalaka l’ɛtɛ anyu ndo tanyatshatshake ahɔndɔ anyu+ diaha nyu mvɔ ndo diaha Nzambi momalɛ wodja w’otondo. Anangɛnyu wa lo nkumbo k’otondo k’Isariyɛlɛ wayolela wanɛ wele Jehowa ambadiaka la dja. 7 Tanyomɔke oma la soko dia luudu la dipɛma l’esanganelo diaha nyu mvɔ, nɛ dia nyakakitama esɔ ka Jehowa k’okitelo.”+ Ɔnkɔnɛ vɔ wakasale oko wakawatɛ Mɔsɛ.

8 Oma laasɔ, Jehowa akatɛ Arɔna ate: 9 “Tɔnɔke vinyɔ kana wanu akina wadjoya wɛ la anayɛ w’apami etena kayanyu lo luudu la dipɛma l’esanganelo+ diaha nyu mvɔ. Ɔsɔ ekɔ didjango dia pondjo lo nɔnga yanyu. 10 Dia nyu nsala otshikitanu lam’asa ɛngɔ k’ekila la ɛngɔ k’anyanya ndo lam’asa ɛngɔ ka mindo la ɛngɔ ka pudipudi,+ 11 ndo dia nyu mbetsha ase Isariyɛlɛ ɛlɛmbɛ tshɛ wakawadjɛ Jehowa lo tshimbo ya Mɔsɛ.”+

12 Ko Mɔsɛ akatɛ Arɔna la Eleazara ndo Itamara, anande w’apami wakatshikala ate: “Nyɔshi kɛnɛ kakatshikadi oma l’olambo wa ntɔngɔ oma l’olambo wa Jehowa watshumbama lo dja kele nyosale mapa waha la wodoya ko nyu ndɛ suke la elambwelo,+ nɛ dia ɔsɔ ekɔ ɛngɔ koleki ekila.+ 13 Kole diangɔ sɔ lo dihole di’ekila,+ nɛ dia ɔsɔ ekɔ etenyi kayɛ ndo etenyi k’anayɛ w’apami oma l’olambo wa Jehowa watshumbama lo dja, nɛ dia ngasɔ mbakawambidjangɛ. 14 Kole ndo ntolo k’olambo wa letshetsha la elemba k’etenyi k’ekila+ lo dihole dia pudipudi wɛ la anayɛ w’apami la anayɛ wa wamato,+ nɛ dia wambonyosha diangɔ sɔ oko etenyi kayɛ ndo etenyi k’anayɛ w’apami oma l’elambo w’osanga w’ase Isariyɛlɛ. 15 Kawela elemba k’etenyi k’ekila la ntolo k’olambo wa letshetsha kaamɛ l’elambo wa wata watshumbama lo dja dia mbetshetsha olambo wa letshetsha lɛnɛ la lɛnɛ la ntondo ka Jehowa. Ɔsɔ ayongaka etenyi kayɛ wɛ la anayɛ w’apami pondjo,+ oko wakadjanga Jehowa.”

16 Ko Mɔsɛ akayange mbudi k’olambo wa pɛkato+ dimɛna dimɛna, ko nde akatoshola dia wakakitshumbi. Ɔnkɔnɛ nde akomalɛ Eleazara nde la Itamara, ana w’apami w’Arɔna wakatshikala ko akate ate: 17 “Lande na kahanyalee nyama k’olambo wa pɛkato lo dihole di’ekila,+ lam’ele ɔsɔ ekɔ ɛngɔ koleki ekila ndo wakanyoshatɔ dia nyu mɛmba pɛkato ya wodja ndo nkomba pɛkato yawɔ la ntondo ka Jehowa? 18 Ohonyenda, dikila diatɔ hadiɔtɔlami lo dihole di’ekila.+ Nyakahombi paka kilɛ lo dihole di’ekila oko wakawambidjangɛ.” 19 Arɔna akakadimola Mɔsɛ ate: “Ohenda, vɔ wakela olambo awɔ wa pɛkato ndo olambo awɔ wa lotshumba la ntondo ka Jehowa+ ɛlɔ kaanga mbakankome awui anɛ tshɛ. Otomɔlɛ nyama k’olambo wa pɛkato ɛlɔ, onde dui sɔ diotɔngɛnyangɛnya Jehowa?” 20 Lam’akoke Mɔsɛ ngasɔ, nde aketawɔ.

11 Oma laasɔ, Jehowa akatɛ Mɔsɛ nde l’Arɔna ate: 2 “Tɛ ase Isariyɛlɛ wate: ‘Ditongami diasɛna diele la nkɛtɛ diakokanyu ndɛ+ dɔ nɛ: 3 Nyu kokaka ndɛ nyama tshɛ kele la losabɔ latɔnyi ndo kele la nsabɔ yokakitɔnyi tshɛ lo tshɛ ndo katɔmɔla.

4 “‘Koko tanyɔlɛke nyama yatɔmɔla tsho kana yele la losabɔ latɔnyi tsho nyɛ: Kamɛlɔ katɔmɔla koko bu la losabɔ latɔnyi. Tɔ kekɔ mindo le nyu.+ 5 Ndo eshidi ka lo ave,+ nɛ dia tɔ tɔmɔlaka, koko bu la losabɔ latɔnyi. Tɔ kekɔ mindo le nyu. 6 Ndo otomba, nɛ dia vɔ tɔmɔlaka, koko bu la losabɔ latɔnyi. Vɔ wekɔ mindo le nyu. 7 Ndo nsombo,+ nɛ dia tɔ kekɔ la losabɔ latɔnyi ndo lokakitɔnyi tshɛ lo tshɛ, koko hatɔmɔla. Tɔ kekɔ mindo le nyu. 8 Tanyɔlɛke emunyi wa nyama shɔ kaanga yema ndo tanyonandake edo ayɔ. Yɔ yekɔ mindo le nyu.+

9 “‘L’atei wa diangɔ tshɛ diele lo ashi, nɛ mbakokanyu ndɛ: Ɛngɔ tshɛ kele lo ashi kele la mpakuhaku ndo la mposo, oyadi lo ndjale kana lo ɛkɛdi, nyu mbeyaka ndɛ.+ 10 Koko ɛngɔ tshɛ kele lo ndjale kana lo ɛkɛdi kele bu la mpakuhaku ndo la mposo l’atei wa ditongami tshɛ diele elui elui ndo l’atei wa ditongami tshɛ diasɛna* lo ashi kekɔ wɔnɔnyi le nyu. 11 Diɔ pombaka monga mɛtɛ wɔnɔnyi le nyu ndo hanyohombe ndɛ emunyi adiɔ+ kaanga yema ndo nyu pombaka mbɔsa edo adiɔ oko ɛngɔ ka wɔnɔnyi. 12 Ɛngɔ tshɛ kele lo ashi kele bu la mpakuhaku ndo la mposo kekɔ ɛngɔ ka wɔnɔnyi le nyu.

13 “‘Ditongami diafumbɔ diele wɔnɔnyi le nyu diahanyahombe ndɛ l’ɔtɛ wediɔ diangɔ dia wɔnɔnyi diɔ nɛ: Mpongo,+ mpongo kanda nse, eeke k’odima,+ 14 lɔdi la beela ndo woho tshɛ wa lɔdi l’odima, 15 woho tshɛ wa dingwangwa, 16 teke, esukula, yembe, woho tshɛ wa djɛla, 17 esukula ka tshitshɛ, diwata di’ashi, esukula k’atoyi etale, 18 ɔkɔndɛkɔndɛ, diata, eeke, 19 kiombe, woho tshɛ wa yɔnga akoke, momboko ndo lolema. 20 Ndo nto, ditongami tshɛ diele elui elui diele la nsala* diakɛndakɛnda la ekolo akɔ 4 diekɔ wɔnɔnyi le nyu.

21 “‘L’atei wa tofumbɔfumbɔ tele la nsala ndo takɛndakɛnda la ekolo akɔ 4, onyake tɔnɛ tele l’ekolo ekina 2 watikimanyiya dia tɔ nembɔ oma la nkɛtɛ mbakokanyu ndɛ. 22 L’atei wa tofumbɔfumbɔ tɔsɔ, tɔnɛ mbakokanyu ndɛ: Weho wotshikitanyi w’akata w’ɛndjɔ+ wononɔ, nyunyu, akelele ndo akata akina. 23 Tofumbɔfumbɔ tokina tshɛ tele la nsala ndo tele elui elui takɛndakɛnda l’ekolo 4 tekɔ wɔnɔnyi le nyu. 24 La diangɔ sɔ mbakokanyu ndjadja mindo. Onto tshɛ lananda edo adiɔ ayonga mindo polo la dikɔlɔ.+ 25 Onto tshɛ lɛmba edo adiɔ pombaka nsola ahɔndɔ ande.+ Nde ayonga mindo polo la dikɔlɔ.

26 “‘Nyama tshɛ kele la losabɔ latɔnyi koko halokakitɔnyi tshɛ lo tshɛ ndo kahatɔmɔla kekɔ mindo le nyu. Onto tshɛ lananda edo ayɔ ayonga mindo.+ 27 Etongami tshɛ kasɛna kakɛndakɛnda l’ekolo atɔ l’atei wa ditongami diakɛndakɛnda l’ekolo akɔ 4 kekɔ mindo le nyu. Onto tshɛ lananda edo adiɔ ayonga mindo polo la dikɔlɔ. 28 Onto lɛmba edo adiɔ pombaka nsola ahɔndɔ ande+ ndo nde ayonga mindo polo la dikɔlɔ.+ Diɔ diekɔ mindo le nyu.

29 “‘Ditongami diayakotola la nkɛtɛ diele mindo le nyu diɔ nɛ: Ɛngɔlanyɔi, edji,+ woho tshɛ wa lokudi, 30 jeko, dikalanga, lɔɔmbɛ, lokudi la lo ditshu ndo lɔnganya. 31 Ditongami diele elui elui sɔ mbele mindo le nyu.+ Onto tshɛ lananda edo adiɔ ayonga mindo polo la dikɔlɔ.+

32 “‘Naka diɔ diambovɔ ko diambɔkɔ lo ɛngɔ kɛmɔtshi, oyadi ɛngɔ k’osongo, dihɔndɔ, ekoho kana ɛtshi ka dikoto, ɛngɔ kakɔ kayonga mindo. Ɛngɔ tshɛ kayowokamba la tɔ pombaka tambiyama lo ashi ndo tɔ kayonga mindo polo la dikɔlɔ, ko oma laasɔ tɔ kayonga pudipudi. 33 Naka diɔ diambɔkɔ lo ɛngɔ ka diwomba, kete nyu pombaka kiola ndo kɛnɛ tshɛ kaki lɔkɔ kayonga mindo.+ 34 Ɛngɔ ka ndɛ tshɛ kasakana la ashi w’oma l’ɛngɔ kakɔ ka diwomba kayonga mindo ndo ɛnɔnɔ tshɛ kele lo ɛngɔ ka ngasɔ kayonga mindo. 35 Naka edo adiɔ wambɔkɔ lo ɛngɔ kɛmɔtshi, tɔ kayonga mindo. Oyadi lo nkuka kana lo tshuka dia tshitshɛ, tɔ pombaka mbolama. Diɔ diekɔ mindo ndo diayongaka mindo le nyu. 36 Ko naka edo adiɔ wambɔkɔ l’ɛtɛkɔ kana lo ɛngɔ kombawɔ ashi, ɛtɛkɔ kana ɛngɔ kakɔ kayotetemala monga pudipudi. Koko onto tshɛ layonanda edo adiɔ ayonga mindo. 37 Naka edo adiɔ wambɔkɔ lo woho wahomba monɛma, kete woho akɔ wekɔ pudipudi. 38 Ko naka wambodja ashi lo woho akɔ ndo etenyi k’odo adiɔ kambɔkɔ lɔkɔ, kete woho akɔ waya mindo le nyu.

39 “‘Naka nyama kakokanyu ndɛ kambovɔ tɔamɛ, onto tshɛ lananda odo atɔ ayonga mindo polo la dikɔlɔ.+ 40 Onto tshɛ lalɛ yema y’odo wa nyama kakɔ pombaka nsola ahɔndɔ ande ndo nde ayonga mindo polo la dikɔlɔ.+ Onto tshɛ lɛmba odo wa nyama kakɔ pombaka nsola ahɔndɔ ande ndo nde ayonga mindo polo la dikɔlɔ. 41 Ditongami tshɛ diele elui elui la nkɛtɛ diekɔ wɔnɔnyi.+ Diɔ hadiohombe ndɛma. 42 Tanyɔlɛke etongami tshɛ kayakotola lo dikundju ndo etongami tshɛ kakɛndakɛnda la ekolo akɔ 4 kana ditongami tshɛ diele elui elui diele la ekolo efula, nɛ dia diɔ diekɔ wɔnɔnyi.+ 43 Tanyoyaetɛke* wɔnɔnyi lo tshimbo ya ditongami tshɛ diele elui elui ndo tanyoyasanyake la mindo ndo tanyoyaetɛke mindo lo dilɛ.+ 44 Dikambo dimi kele Jehowa Nzambi kanyu.+ Nyu pombaka ndjakidia ndo monga ekila+ nɛ dia dimi lekɔ ekila.+ Ɔnkɔnɛ, tanyoyadjake* mindo lo ndɛ ditongami diele elui elui diakɛndakɛnda la nkɛtɛ. 45 Nɛ dia dimi kele Jehowa lakanyotondja oma lo wodja w’Edjibito dia dimi monga Nzambi kanyu.+ Nyu pombaka monga ekila+ nɛ dia dimi lekɔ ekila.+

46 “‘Ɔsɔ kele ɔlɛmbɛ wendana la nyama, ditongami diafumbɔ, ditongami tshɛ diasɛna* diakɛndakɛnda lo ashi ndo ditongami* tshɛ diele elui elui la nkɛtɛ, 47 dia nyu ntshikitanya kɛnɛ kele pudipudi la kɛnɛ kele mindo ndo ditongami diasɛna diakoka ndɛma la nɛ diahakoke ndɛma.’”+

12 Jehowa akatɛ Mɔsɛ ate: 2 “Tɛ ase Isariyɛlɛ wate: ‘Naka womoto ambotshɔ diemi ko ambota ɔna pami, nde ayonga mindo l’edja ka nshi 7 oko watondongaka mindo lo nshi yɛnande dikila.+ 3 Kawonya ɔnakɔ ɔpɔpɔ+ lushi la 8. 4 L’edja ka nshi 33 yayela, womoto akɔ ayotetemala ndjaɛdia oma lo dikila diande. Nde hahombe minanda ndooko ɛngɔ k’ekila ndo nde hahombe ndja lo dihole di’ekila polo lam’ayoshila nshi ya wɛdiamelo ande.

5 “‘Naka ɔna womoto kotshinde, kete nde ayonga mindo l’edja ka nshi 14 oko watondongaka mindo lo nshi yɛnande dikila. L’edja ka nshi 66 yayela, nde ayotetemala ndjaɛdia oma lo dikila diande. 6 Lam’ayoshila nshi ya wɛdiamelo ande dikambo di’ɔna pami kana ɔna womoto, nde kela ɔsɔngɔ w’ɔkɔkɔ w’omi wele la ɔnɔnyi 1 dikambo di’olambo wa lotshumba+ ndo ɔna kudumba kana enga dikambo di’olambo wa pɛkato la soko dia luudu la dipɛma l’esanganelo le ɔlɔmbɛdi. 7 Ɔlɔmbɛdi kela elambo akɔ la ntondo ka Jehowa ndo kakombe pɛkato ka womoto akɔ, ko womoto akɔ ayɛla oma lo ɛkɛlɛlɔ kande ka dikila. Ɔsɔ kele ɔlɛmbɛ wendana la womoto lota oyadi ɔna pami kana ɔna womoto. 8 Ko naka womoto akɔ hakoke nkondja ɔkɔkɔ, ko nde mbela benga 2 kana ana 2 wa tokudumba,+ mɔtshi dikambo di’olambo wa lotshumba ndo kina dikambo di’olambo wa pɛkato, ko ɔlɔmbɛdi ayokomba pɛkato ka womoto akɔ, ko nde ayonga pudipudi.’”

13 Jehowa akatetemala mbutɛ Mɔsɛ nde la Arɔna ate: 2 “Naka onto ɔmɔtshi ambonga la edada, tɔkɔlɔkɔ kana diwadi lo lokoho lande ko ɛngɔ kɛsɔ koka nkoma hemɔ ka sudi*+ lo lokoho lande, kete nde pombaka tɔlama le ɔlɔmbɛdi Arɔna kana le ɔnande ɔmɔtshi lele ɔlɔmbɛdi.+ 3 Ɔlɔmbɛdi ayɔsɛdingola hemɔ kele lo lokoho lande. Naka wɛɔsa wa lo dihole diakɔ waya wɛma ndo mɛnamaka dia hemɔ kakɔ kambɔnyɔngɔmɛ etale polo l’emunyi, kete ɔsɔ ekɔ hemɔ ka sudi. Ɔlɔmbɛdi ayokisɛdingola ndo ayota dia onto akɔ ekɔ mindo. 4 Naka diwadi diele lo lokoho lande diekɔ wɛma ndo mɛnamaka dia diɔ diatanyɔngɔmɛ polo l’emunyi ndo wɛɔsa wa laawɔ hawokadimwe wɛma, kete ɔlɔmbɛdi ayokakitola onto lele la hemɔ kakɔ l’anto akina l’edja ka nshi 7.+ 5 Oma laasɔ, ɔlɔmbɛdi ayoyɔɔsɛdingola lushi la 7 ndo naka mɛnamaka dia hemɔ kakɔ kambemala ndo hakokane lo lokoho, kete ɔlɔmbɛdi ayowokakitola l’anto akina l’edja ka nshi nkina 7.

6 “Ɔlɔmbɛdi pombaka nyomɔɔsɛdingola nto lushi la 7 ndo naka hemɔ kotashile ndo hakokane lo lokoho, kete ɔlɔmbɛdi ayota dia nde ekɔ pudipudi.+ Ɔsɔ aki tɔkɔlɔkɔ di’anyanya. Oma laasɔ, onto akɔ ayosola ahɔndɔ ande ko nde ayonga pudipudi. 7 Naka tɔkɔlɔkɔ diakɔ diambokokanɛ lo lokoho l’ɔkɔngɔ wa nde mɛnama le ɔlɔmbɛdi dia nshikikɛ wɛdiamelo ande, kete nde ayɛnama nto* la ntondo k’ɔlɔmbɛdi. 8 Ɔlɔmbɛdi ayodisɛdingola ko naka tɔkɔlɔkɔ diakɔ diambokokanɛ lo lokoho, kete ɔlɔmbɛdi ayota dia onto akɔ ekɔ mindo. Ɔsɔ ekɔ sudi.+

9 “Naka onto ɔmɔtshi aya la hemɔ ka sudi, kete nde pombaka tɔlama le ɔlɔmbɛdi, 10 ko ɔlɔmbɛdi ayowɔsɛdingola.+ Naka ekɔ edada ka wɛma kele lo lokoho, ko tɔ kambetɛ wɛɔsa wɛma ndo edada kakɔ kambotondɔ,+ 11 kete ɔsɔ ekɔ sudi kahakɔnɔ esadi kele lo lokoho lande. Ɔlɔmbɛdi ayota dia nde ekɔ mindo. Nde hatowokakitola l’anto akina,+ nɛ dia nde ekɔ mindo. 12 Ko naka sudi kakɔ kambotomba lo lokoho l’otondo, ko tɔ kambokomba onto akɔ demba di’otondo oma l’ɔtɛ polo l’ekolo l’ahole tshɛ wakoka ɔlɔmbɛdi mɛna, 13 ko ɔlɔmbɛdi ambɔsɛdingola ndo ambɛna dia sudi kambokomba lokoho lande tshɛ, nde ayota dia onto lele la hemɔ ɔsɔ ekɔ pudipudi.* Ahole tshɛ wende la tɔ waya wɛma ndo nde ekɔ pudipudi. 14 Koko lushi tshɛ layɛnama mpota lɔkɔ, nde ayonga mindo. 15 Lam’ayɛna ɔlɔmbɛdi mpota kakɔ, nde ayota dia onto ɔsɔ ekɔ mindo.+ Mpota kɛsɔ kekɔ mindo. Ɔsɔ ekɔ sudi.+ 16 Ko naka mpota kakɔ kaya wɛma nto, kete nde ayoya le ɔlɔmbɛdi. 17 Ɔlɔmbɛdi ayowɔsɛdingola+ ndo naka mpota kakɔ kaya wɛma, kete ɔlɔmbɛdi ayota dia onto lele la hemɔ ɔsɔ ekɔ pudipudi. Nde ekɔ pudipudi.

18 “Naka onto ambotomba tshutshu lo lokoho lande, ko diɔ diambɔkɔnɔ, 19 koko edada ka wɛma kana diwadi di’ɔkɛsɛ w’ebelabela diambotomba lo dihole diaki tshutshu, kete nde pombaka toyaɛnya le ɔlɔmbɛdi. 20 Ɔlɔmbɛdi ayodisɛdingola+ ndo naka ambɛnama dia diɔ diambɔnyɔngɔmɛ polo l’emunyi ndo wɛɔsa wa laawɔ waya wɛma, kete ɔlɔmbɛdi ayota dia nde ekɔ mindo. Ɔsɔ ekɔ hemɔ ka sudi kambotomba lam’aki tshutshu. 21 Ko naka ɔlɔmbɛdi ambɔsɛdingola ko ambɛna dia ndooko wɛɔsa wa wɛma laawɔ ndo diɔ hadiɔnyɔngɔmɛ polo l’emunyi ndo mɛnamaka dia diɔ diotashile, kete ɔlɔmbɛdi ayowokakitola l’anto akina l’edja ka nshi 7.+ 22 Ko naka ambɛnama dia tɔ kambokokanɛ lo lokoho, kete ɔlɔmbɛdi ayota dia nde ekɔ mindo. Ɔsɔ ekɔ hemɔ kɛmɔtshi. 23 Koko naka diwadi diambotshikala lo dihole diakɔ ɔtɔi ndo hadiokokane, kete ɔsɔ ekɔ tsho edada k’oma lo tshutshu ndo ɔlɔmbɛdi ayota dia nde ekɔ pudipudi.+

24 “Ko naka onto ɔmɔtshi ekɔ la lofuu la mpota ka dja ko dihole diele lofuu lakɔ laya diwadi di’ɔkɛsɛ w’ebelabela kana dia wɛma, 25 kete ɔlɔmbɛdi ayodisɛdingola. Naka wɛɔsa wa la diwadi diakɔ waya wɛma ndo mɛnamaka dia tɔ kaya ɔhɔngɔ polo l’emunyi, kete ɔsɔ ekɔ sudi kambotomba la lofuu ndo ɔlɔmbɛdi ayota dia onto ɔsɔ ekɔ mindo. Ɔsɔ ekɔ hemɔ ka sudi. 26 Ko naka ɔlɔmbɛdi ambokisɛdingola ko ambɛna dia ndooko wɛɔsa wa wɛma la lofuu ndo tɔ bu ɔhɔngɔ polo l’emunyi ko tɔ koyome, kete ɔlɔmbɛdi ayowokakitola l’anto akina l’edja ka nshi 7.+ 27 Ɔlɔmbɛdi ayowɔsɛdingola lushi la 7 ko naka ambɛnama dia tɔ kambokokanɛ lo lokoho, kete ɔlɔmbɛdi ayota dia nde ekɔ mindo. Ɔsɔ ekɔ hemɔ ka sudi. 28 Ko naka diwadi diakɔ tshikala paka dihole diamɛ ndo hadiokokane lo lokoho, koko diɔ diotome, ɔsɔ ekɔ tsho edada ka lofuu. Ɔlɔmbɛdi ayota dia nde ekɔ pudipudi dikambo ɔsɔ ekɔ wodelo wa lofuu.

29 “Naka pami kana womoto ambonga la hemɔ l’ɔtɛ kana lo lowanga, 30 ɔlɔmbɛdi ayɔsɛdingola hemɔ kakɔ.+ Naka ambɛnama dia tɔ kambɔnyɔngɔmɛ polo l’emunyi ndo wɛɔsa wa laawɔ wekɔ ɛnɔndɔ ndo tɔlɛwɛlɛwɛ, kete ɔlɔmbɛdi ayota dia onto akɔ ekɔ mindo. Ɔsɔ ekɔ hemɔ ka lam’ele divo kana ndɛdu. Ɔsɔ ekɔ sudi ka l’ɔtɛ kana ka lo lowanga. 31 Koko naka ɔlɔmbɛdi ambɛna dia hemɔ hanyɔngɔme polo l’emunyi ndo wɛɔsa w’edima bu laawɔ, kete ɔlɔmbɛdi ayokakitola onto lele la hemɔ kakɔ l’anto akina l’edja ka nshi 7.+ 32 Ɔlɔmbɛdi ayoyɔsɛdingola hemɔ kakɔ lushi la 7. Naka hemɔ kakɔ hakokane ndo wɛɔsa w’ɛnɔndɔ hawongi laawɔ, ko mɛnamaka dia hemɔ kakɔ hanyɔngɔmɛ polo l’emunyi, 33 kete onto akɔ pombaka minya divo kana ndɛdu yande, koko nde hatonya lam’ele hemɔ. Oma laasɔ, ɔlɔmbɛdi ayokakitola onto akɔ lele la hemɔ l’anto akina l’edja ka nshi 7.

34 “Ɔlɔmbɛdi ayonyomoyɔsɛdingola hemɔ kakɔ lushi la 7. Naka hemɔ kakɔ ka lam’ele divo kana ndɛdu hakokane lo lokoho ndo mɛnamaka dia tɔ hanyɔngɔmɛ polo l’emunyi, kete ɔlɔmbɛdi ayota dia nde ekɔ pudipudi ndo nde ayohomba nsola ahɔndɔ ande, ko nde ayonga pudipudi. 35 Ko naka ambɛnama hwe dia hemɔ kakɔ kambokokanɛ lo lokoho l’ɔkɔngɔ wa wɛdiamelo ande, 36 kete ɔlɔmbɛdi ayowɔsɛdingola. Naka hemɔ kakɔ kambokokanɛ lo lokoho, kete ɔlɔmbɛdi hatonga la ohomba wa menda wɛɔsa w’ɛnɔndɔ. Onto akɔ ekɔ mindo. 37 Koko naka l’ɔkɔngɔ wa nde nsɛdingola ko ambɛnama dia hemɔ hakokane ndo wɛɔsa w’edima wambotomba lɔkɔ, kete hemɔ kakɔ kambɔkɔnɔ. Nde ekɔ pudipudi ndo ɔlɔmbɛdi ayota dia nde ekɔ pudipudi.+

38 “Naka pami kana womoto ambonga l’awadi lo lokoho, ko awadi akɔ wekɔ wɛma, 39 kete ɔlɔmbɛdi ayowasɛdingola.+ Naka awadi wele lo lokoho wekɔ ɛkɛsɛkɛsɛ, kete ɔsɔ ekɔ tsho diowo di’anyanya diambowɔ lo lokoho. Onto akɔ ekɔ pudipudi.

40 “Naka onto ɔmɔtshi amboshila divo l’ɔtɛ ande ko aya la diwandji, kete nde ekɔ pudipudi. 41 Naka nde amboshila divo di’oma la ntondo, ko nde aya la diwandji laawɔ, nde ekɔ pudipudi. 42 Koko naka nde aya la mpota k’ɔkɛsɛ w’ebelabela lo diwandji lam’aki divo kana l’okoko, kete ɔsɔ ekɔ sudi kambotomba lam’aki divo kana l’okoko. 43 Ɔlɔmbɛdi ayowɔsɛdingola ndo naka edada k’oma lo hemɔ kekɔ ɔkɛsɛ w’ebelabela ka lo diwandji kamboyala l’ɔtɛ ande kana l’okoko ande, ko tɔ mɛnamaka oko sudi lo lokoho lande, 44 kete nde ekɔ kanga sudi. Nde ekɔ mindo ndo ɔlɔmbɛdi ayota dia nde ekɔ mindo l’ɔtɛ wa hemɔ kele l’ɔtɛ ande. 45 Kanga sudi lele la hemɔ pombaka ndɔta ahɔndɔ wambatatɛ ndo nde pombaka tshikaka divo dia l’ɔtɛ ande esakalaka ndo nde pombaka kombaka ndɛdu yande, ko nde mbutaka la dui dia wolo ate: ‘Mindo, mindo!’ 46 Nde ayonga mindo l’edja tshɛ kende la hemɔ kakɔ. Lam’ele nde ekɔ mindo, nde pombaka mangana l’anto akina. Nde pombaka todjasɛ l’andja wa mpango.+

47 “Naka hemɔ ka sudi* kambosambemɛ lo dihɔndɔ, oyadi dihɔndɔ diakasalema la wɛɔsa wa nyama kana dihɔndɔ dia linɛnɛ, 48 kana lo eshinga wa wemema wa lo dihɔndɔ, kana lo eshinga wa wekeke wa linɛnɛ, kana lo dihɔndɔ diakasalema la wɛɔsa wa nyama, kana lo ekoho ka nyama, kana lo ɛngɔ tshɛ kakasalema la ekoho ka nyama, 49 ndo naka diwadi di’ɛnɔndɔ k’otsha lo ashi wa djɛsɛ kana di’ebelabela di’oma lo hemɔ diambosambemɛ lo dihɔndɔ, kana lo ekoho ka nyama, kana lo eshinga wa wemema wa lo dihɔndɔ, kana lo eshinga wa wekeke wa lo dihɔndɔ, kana lo ɛngɔ kekina tshɛ kakasalema l’ekoho ka nyama, ɔsɔ ekɔ sudi kambosambemɛ ndo ɛngɔ kakɔ pombaka tɔlama le ɔlɔmbɛdi. 50 Ɔlɔmbɛdi ayɔsɛdingola ɛngɔ kele la hemɔ kakɔ ndo nde ayokikakitola l’anto l’edja ka nshi 7.+ 51 Lam’ayondɔsɛdingola ɛngɔ kakɔ lushi la 7 ko nde ambɛna dia hemɔ kakɔ kambokokanɛ lo dihɔndɔ, lo eshinga wa wemema, lo eshinga wa wekeke, kana lo ekoho ka nyama (oyadi ekoho kakɔna tshɛ ketɔ), kete ɔsɔ ekɔ hemɔ ka sudi kasambemɛ ndo ɛngɔ kakɔ kekɔ mindo.+ 52 Nde pombaka ntshumba dihɔndɔ diakɔ, kana eshinga akɔ wa wemema, kana wa wekeke wa lo dihɔndɔ diakasalema la wɛɔsa wa nyama, kana wa lo dihɔndɔ dia l’eshinga wa linɛnɛ, kana ɛngɔ tshɛ kakasalema la ekoho ka nyama ko hemɔ kakɔ kambosambemɛ lɔkɔ, nɛ dia ɔsɔ ekɔ sudi kasambemɛ. Ɛngɔ kakɔ pombaka tshumbama lo dja.

53 “Ko naka ɔlɔmbɛdi ambɔsɛdingola ɛngɔ kakɔ ko hemɔ kakɔ hakokane lo dihɔndɔ, kana lo eshinga wa wemema, kana lo eshinga wa wekeke, kana lo ɛngɔ tshɛ kakasalema la ekoho ka nyama, 54 kete ɔlɔmbɛdi ayodjanga dia vɔ nsola ɛngɔ kakasambemɛ hemɔ, ko nde ayokianganya l’anto l’edja ka nshi 7. 55 Oma laasɔ, ɔlɔmbɛdi ayoyɔsɛdingola ɛngɔ kakasambemɛ hemɔ l’ɔkɔngɔ wa tɔ solama dimɛna. Naka otshikitanu hongi lo dihole diakasambemɛ hemɔ, oyadi kaanga hemɔ kakɔ hakokane, ɛngɔ kakɔ kekɔ mindo. Nyu pombaka kitshumba lo dja, nɛ dia tɔ kambɔlɛma oyadi l’etei kana l’andja.

56 “Ko naka l’ɔkɔngɔ w’ɔlɔmbɛdi kisɛdingola ko etenyi kakasambemɛ hemɔ kambɛla l’ɔkɔngɔ wa tɔ solama dimɛna, kete nde ayokiata oma lo dihɔndɔ diakɔ, kana ekoho ka nyama, kana eshinga wa wemema, kana eshinga wa wekeke. 57 Koko naka hemɔ kakɔ kamboyɛnama l’ɛtshi kekina ka dihɔndɔ, lo eshinga wa wemema, kana lo eshinga wa wekeke, kana l’ɛngɔ tshɛ kakasalema la ekoho ka nyama, kete tɔ kekɔ lo takokanɛ ndo nyu pombaka ntshumba ɛngɔ kakɔ kakasambemɛ hemɔ lo dja.+ 58 Ko naka diwadi diakasambemɛ hadioyɛnama lo dihɔndɔ, kana lo eshinga wa wemema, kana lo eshinga wa wekeke, kana lo ekoho ka nyama l’ɔkɔngɔ wa kisola, kete tɔ pombaka solama mbala ka 2, ko tɔ kayonga pudipudi.

59 “Ɔsɔ kele ɔlɛmbɛ wendana la hemɔ ka sudi lo dihɔndɔ diakasalema la wɛɔsa wa nyama kana dia la eshinga wa linɛnɛ, kana lo eshinga wa wemema kana wa wekeke, kana lo ɛngɔ tshɛ kakasalema la ekoho ka nyama dia mbuta ɔnɛ tɔ kekɔ pudipudi kana mindo.”

14 Jehowa akatetemala mbutɛ Mɔsɛ ate: 2 “Ɔnɛ mbele ɔlɛmbɛ wendana la kanga sudi lo lushi lashikikɛma wɛdiamelo ande lam’atɔlamande le ɔlɔmbɛdi.+ 3 Ɔlɔmbɛdi ayotomba l’andja wa mpango ndo ayowɔsɛdingola. Naka kanga sudi ambɔkɔnɔ oma lo sudi kande, 4 kete ɔlɔmbɛdi ayowodjangɛ dia nde mbela tofudu 2 ta pudipudi tasɛna, tshenyi ya shongo y’olondo, dihɔndɔ dia beela k’efula ndo diyo dia izɔpɛ dikambo dia wɛdiamelo ande.+ 5 Ɔlɔmbɛdi ayodjanga dia ndjaka fudu 1 lo ɛngɔ ka diwomba kele la ashi wakawatahola oma lo lushi lakɛla. 6 Koko nde pombaka mbɔsa fudu kasɛna kaamɛ la tshenyi ya shongo y’olondo, dihɔndɔ dia beela k’efula ndo diyo dia izɔpɛ ko nde dindja diangɔ sɔ tshɛ lo dikila dia fudu kakandadiaki laadiko dia ashi wakawatahola oma lo lushi lakɛla. 7 Oma laasɔ, nde katɔngiya dikila diakɔ mbala 7 le ɔnɛ layaɛdia oma lo hemɔ ka sudi ndo nde mbuta dia onto akɔ aya pudipudi ndo nde ayokimɔ fudu kasɛna otsha l’oswe.+

8 “Ɔnɛ layaɛdia pombaka nsola ahɔndɔ ande ndo minya hiɔlɔ la ndɛdu ndo nde pombaka mbɔka, ko nde ayonga pudipudi. Oma laasɔ, nde mbeyaka ndjoya lo mpango, koko nde ayodjasɛ l’andja wa luudu la dipɛma l’edja ka nshi 7. 9 Lushi la 7, nde pombaka minya hiɔlɔ, minya ndɛdu ndo nkɔngi yande. L’ɔkɔngɔ wa nde minya hiɔlɔ la ndɛdu, nde kasole ahɔndɔ ande ndo ndamɛ mbɔka, ko nde ayonga pudipudi.

10 “Lushi la 8, nde kɔshi ɛsɔngɔ 2 w’ɛkɔkɔ wa waomi waha la ɛkɔmɔ,+ ɔsɔngɔ w’ɔkɔkɔ wa wadi wele la ɔnɔnyi 1, tenyi 3 dia dikumi dia efa* 1 w’ofushi wa dimɛna wɔsɔhanyemi la esɔ oko olambo wa ntɔngɔ+ ndo yɛdikɔ 1 ya lɔngi* l’esɔ.+ 11 Ɔlɔmbɛdi wata dia nde aya pudipudi ayoya l’onto akɔ layaɛdia kaamɛ la elambo akɔ la ntondo ka Jehowa la soko dia luudu la dipɛma l’esanganelo. 12 Ɔlɔmbɛdi ayɔsa ɔsɔngɔ ɔmɔtshi w’ɔkɔkɔ w’omi ko ayowolambola oko olambo w’onongo+ kaamɛ la yɛdikɔ ya lɔngi l’esɔ, ko nde ayetshetsha diangɔ diakɔ lɛnɛ la lɛnɛ oko olambo wa letshetsha la ntondo ka Jehowa.+ 13 Oma laasɔ, nde ayodiaka ɔsɔngɔ akɔ w’ɔkɔkɔ lo dihole di’ekila, lɛnɛ atowodiakaka nyama k’olambo wa pɛkato+ ndo nyama k’olambo wa lotshumba, nɛ dia oko olambo wa pɛkato, olambo w’onongo wekɔ waki ɔlɔmbɛdi.+ Ɔsɔ ekɔ ɛngɔ koleki ekila.+

14 “Oma laasɔ, ɔlɔmbɛdi ayɔsa yema ya dikila dia nyama k’olambo w’onongo ko ɔlɔmbɛdi ayodikita lo toyi dia lonya l’omi laki ɔnɛ layaɛdia ndo lo omalohita la lonya lande l’omi ndo lo lohita la woke la lokolo lande l’omi. 15 Ɔlɔmbɛdi ayɔsa yɛdikɔ 1 ya lɔngi l’esɔ+ ko nde mbidja yema lo diwambo diande dia lonya la lɔmɔsɔ. 16 Oma laasɔ, ɔlɔmbɛdi ayodindja lohita lande la lonya l’omi lo esɔ kele lo diwambo diande dia lonya la lɔmɔsɔ, ko nde ntɔngiya yema y’esɔ kakɔ la lohita lande mbala 7 la ntondo ka Jehowa. 17 L’ɔkɔngɔ wa laasɔ, ɔlɔmbɛdi ayɔsa yema y’esɔ kakatshikadi lo diwambo diande, ko nde nkita lo toyi dia lonya l’omi laki ɔnɛ layaɛdia ndo lo omalohita la lonya lande l’omi ndo lo lohita la woke la lokolo lande l’omi laadiko dia dikila di’olambo w’onongo. 18 Ɔlɔmbɛdi ayotɛ esɔ katshikala lo diwambo diande l’ɔtɛ waki ɔnɛ layaɛdia ndo ɔlɔmbɛdi ayokomba pɛkato yande la ntondo ka Jehowa.+

19 “Ɔlɔmbɛdi ayolambola olambo wa pɛkato+ ndo ayokomba pɛkato yaki ɔnɛ layaɛdia ndo l’ɔkɔngɔ wa laasɔ, nde ayodiaka nyama k’olambo wa lotshumba. 20 Ɔlɔmbɛdi ayolambola olambo wa lotshumba la olambo wa ntɔngɔ+ lo elambwelo ndo ɔlɔmbɛdi ayokomba pɛkato yande,+ ko onto akɔ ayonga pudipudi.+

21 “Ko naka nde ekɔ ose wola ndo bu l’ekondjelo ka kambe, kete nde ayɔsa ɔsɔngɔ w’ɔkɔkɔ w’omi oko olambo w’onongo dikambo di’olambo wa letshetsha dia nkomba pɛkato yande, kaamɛ la etenyi ka dikumi ka efa* 1 w’ofushi wa dimɛna wɔsɔhanyemi la esɔ oko olambo wa ntɔngɔ, yɛdikɔ 1 ya lɔngi l’esɔ, 22 ndo benga 2 kana ana wa tokudumba 2 lo ndjela ekondjelo kande. Mɔtshi oko olambo wa pɛkato ndo kina oko olambo wa lotshumba.+ 23 Lushi la 8,+ nde ayela diangɔ sɔ dia ndjoshikikɛ wɛdiamelo ande le ɔlɔmbɛdi la soko dia luudu la dipɛma l’esanganelo la ntondo ka Jehowa.+

24 “Ɔlɔmbɛdi ayɔsa ɔsɔngɔ w’ɔkɔkɔ w’olambo w’onongo+ la yɛdikɔ ya lɔngi l’esɔ, ko ɔlɔmbɛdi ayetshetsha diangɔ sɔ lɛnɛ la lɛnɛ oko olambo wa letshetsha la ntondo ka Jehowa.+ 25 Oma laasɔ, nde ayodiaka ɔsɔngɔ akɔ w’ɔkɔkɔ w’olambo w’onongo ndo ɔlɔmbɛdi ayɔsa yema ya dikila di’oma lo nyama k’olambo w’onongo, ko nde nkita lo toyi dia lonya l’omi laki ɔnɛ layaɛdia ndo lo omalohita la lonya lande l’omi ndo lo lohita la woke la lokolo lande l’omi.+ 26 Ɔlɔmbɛdi ayodja yema y’esɔ lo diwambo diande dia lonya la lɔmɔsɔ,+ 27 ko oma laasɔ, nde ntɔngiya yema y’esɔ y’oma lo diwambo diande dia lonya la lɔmɔsɔ la lohita lande la lonya l’omi mbala 7 la ntondo ka Jehowa. 28 Ɔlɔmbɛdi ayokita yema y’esɔ kele lo diwambo diande lo toyi dia lonya l’omi laki ɔnɛ layaɛdia ndo lo omalohita la lonya lande l’omi ndo lo lohita la woke la lokolo lande l’omi lo dihole diakɔ diamɛ diakandakitshi dikila di’oma lo nyama k’olambo w’onongo. 29 Oma laasɔ, ɔlɔmbɛdi ayotɛ esɔ katshikala lo diwambo diande l’ɔtɛ waki ɔnɛ layaɛdia dia nkomba pɛkato yande la ntondo ka Jehowa.

30 “Nde ayolambola enga kana ɔna kudumba lo ndjela ekondjelo kande,+ 31 lo ndjela kɛnɛ kakokande nkondja. Nde ayolambola mɔtshi oko olambo wa pɛkato ndo kina oko olambo wa lotshumba+ kaamɛ la olambo wa ntɔngɔ. Ɔlɔmbɛdi ayokomba pɛkato yaki ɔnɛ layaɛdia la ntondo ka Jehowa.+

32 “Ɔsɔ kele ɔlɛmbɛ wendana la onto laki la hemɔ ka sudi, koko bu l’ekondjelo etena kashikikɛma wɛdiamelo ande.”

33 Oma laasɔ, Jehowa akatɛ Mɔsɛ nde l’Arɔna ate: 34 “Lam’ayonyokoma lo wodja wa Kanana+ wayomonyosha,+ naka lambodja hemɔ ka sudi+ lo luudu lɔmɔtshi lo wodja anyu, 35 kanga luudu pombaka totɛ ɔlɔmbɛdi ate: ‘Woho ɔmɔtshi wa hemɔ kasambemɛ wambotomba lo luudu lami.’ 36 Ɔlɔmbɛdi ayota dia vɔ ntondja diangɔ tshɛ oma lo luudu lakɔ la ntondo ka nde ndjɔsɛdingola hemɔ kakɔ kasambemɛ, diaha nde ndjota dia ɛngɔ tshɛ kele lo luudu lakɔ kekɔ mindo. L’ɔkɔngɔ wa laasɔ, ɔlɔmbɛdi ayoyɔtɔ dia tenda luudu lakɔ. 37 Nde ayɔsɛdingola dihole diele diwadi diakɔ ndo naka diwadi di’ɛnɔndɔ k’otsha lo ashi wa djɛsɛ kana di’ebelabela diambosambemɛ lo mpele dia luudu lakɔ ko diaya difuku dia yema ɔhɔngɔ lo ehele, 38 kete ɔlɔmbɛdi ayotomba oma lo luudu lakɔ ndo nde ayodiha luudu lakɔ l’edja ka nshi 7.+

39 “Oma laasɔ, ɔlɔmbɛdi ayokalola lushi la 7 dia nde tolienda. Naka diwadi diakɔ diambosambemɛ lo mpele dia luudu, 40 kete ɔlɔmbɛdi ayota dia vɔ minya ave wa lɔkɔ wambosambemɛ, ko vɔ towakasha l’andja w’osomba lɛnɛ akashawɔ mindo. 41 L’ɔkɔngɔ wa laasɔ, nde ayota dia vɔ mpɛlɔla luudu lakɔ dimɛna l’etei, ko vɔ tokasha ditshu la mindo yayowɔhɛlɔla l’andja w’osomba lɛnɛ akashawɔ mindo. 42 Ko vɔ wayodja ave akina lo dihole diaki ave wakawanyisha. Nde pombaka nkamba la nkɛtɛ nkina dia nshingola luudu lakɔ.

43 “Ko naka diwadi diakɔ diambokalola ndo diambɛnama lo luudu lakɔ l’ɔkɔngɔ wa vɔ mongola ave, mpɛlɔla luudu lakɔ ndo lishingola nto, 44 kete ɔlɔmbɛdi ayɔtɔ lɔkɔ dia lienda. Naka diwadi diambokokanɛ lo luudu, kete ɔsɔ ekɔ sudi+ ka lo luudu kasambemɛ. Luudu lakɔ lekɔ mindo. 45 Oma laasɔ, nde ayota dia vɔ mbitola luudu lakɔ, mbuta ate ave wa lɔkɔ, esongo ndo nkɛtɛ tshɛ yakawashingola luudu lakɔ, ko vɔ mɛmba dia tokasha l’andja w’osomba lɛnɛ akashawɔ mindo.+ 46 Koko onto tshɛ layɔtɔ lo luudu lakɔ lo nshi yayowolidiha+ ayonga mindo polo la dikɔlɔ.+ 47 Onto tshɛ layolala lo luudu lakɔ pombaka nsola ahɔndɔ ande ndo onto tshɛ layɔlɛ lo luudu lakɔ pombaka nsola ahɔndɔ ande.

48 “Ko naka ɔlɔmbɛdi amboya ko amboyɛna dia diwadi diakɔ hadiokokane lo luudu lakɔ l’ɔkɔngɔ wa vɔ lishingola nto, kete ɔlɔmbɛdi ayota dia luudu lakɔ lekɔ pudipudi, nɛ dia diwadi diakɔ diamboshila. 49 Dia mbɛdia luudu lakɔ oma lo mindo* tshɛ, nde ayɔsa tofudu 2, tshenyi ya shongo y’olondo, ɛtshi ka dihɔndɔ dia beela k’efula ndo diyo dia izɔpɛ.+ 50 Nde ayodiaka fudu kɛmɔtshi lo ɛngɔ ka diwomba kele la ashi wakawatahola oma lo lushi lakɛla. 51 Oma laasɔ, nde ayɔsa tshenyi ya shongo y’olondo, diyo dia izɔpɛ, ɛtshi ka dihɔndɔ dia beela k’efula ndo fudu kasɛna, ko nde dindja diangɔ sɔ tshɛ lo dikila dia fudu kakandadiaki laadiko dia ashi wakawatahola oma lo lushi lakɛla, ko nde mɔnga dikila diakɔ otsha lo luudu lakɔ mbala 7.+ 52 Nde ayɛdia luudu lakɔ oma lo mindo* tshɛ la dikila dia fudu kakɔ, ashi wakawatahola oma lo lushi lakɛla, fudu kasɛna, tshenyi ya shongo y’olondo, diyo dia izɔpɛ ndo yɛtshi ya dihɔndɔ dia beela k’efula. 53 Oma laasɔ, nde ayokimɔ fudu kasɛna l’andja w’osomba l’oswe ndo ayɛdia luudu lakɔ, ko lɔ layonga pudipudi.

54 “Ɔsɔ kele ɔlɛmbɛ wendana la woho tshɛ wa sudi, wa hemɔ ka lo dihole diaki divo kana ndɛdu,+ 55 sudi ka lo dihɔndɔ+ kana ka lo luudu,+ 56 ndo wendana la wadada, atɔkɔlɔkɔ ndo awadi,+ 57 dia nshikikɛ etena kele ɛngɔ kɛmɔtshi mindo ndo etena kele ɛngɔ kɛmɔtshi pudipudi.+ Ɔsɔ kele ɔlɛmbɛ wendana la sudi.”+

15 Jehowa akatetemala mbutɛ Mɔsɛ nde l’Arɔna ate: 2 “Sawola l’ase Isariyɛlɛ kele tɛwɔ wate: ‘Naka pami kɛmɔtshi ekɔ la hemɔ ka ɛkɛlɛlɔ oma lo etenyi kande ka demba ka diwutshi, kete ɛkɛlɛlɔ kande mbowetɛka mindo.+ 3 Nde ekɔ mindo l’ɔtɛ wa ɛkɛlɛlɔ kande, oyadi ɛkɛlɛlɔ kakɔ kekɔ lo ntetemala nkɛla lo tenyi diande dia demba dia diwutshi kana kambodiha, nde ekɔ paka mindo.

4 “‘Mbeto tshɛ kayetama onto lele la ɛkɛlɛlɔ kayonga mindo ndo ɛngɔ tshɛ kayondodjasɛ kayonga mindo. 5 Onto tshɛ layosakanya mbeto kande pombaka nsola ahɔndɔ ande ndo nde pombaka mbɔka. Nde ayonga mindo polo la dikɔlɔ.+ 6 Onto tshɛ layodjasɛ lo ɛngɔ kakadjashi onto lele la ɛkɛlɛlɔ pombaka nsola ahɔndɔ ande ndo mbɔka. Nde ayonga mindo polo la dikɔlɔ. 7 Onto tshɛ lasakanya onto lele la ɛkɛlɛlɔ pombaka nsola ahɔndɔ ande ndo mbɔka. Nde ayonga mindo polo la dikɔlɔ. 8 Naka onto lele la ɛkɛlɛlɔ ambotɛ onto lele pudipudi nsɔyi, onto ɔsɔ pombaka nsola ahɔndɔ ande ndo mbɔka. Nde ayonga mindo polo la dikɔlɔ. 9 Edee tshɛ kakadjashi onto lele la ɛkɛlɛlɔ kayonga mindo. 10 Onto tshɛ lananda ɛngɔ tshɛ kakandadjashi ayonga mindo polo la dikɔlɔ ndo onto tshɛ layɛmba diangɔ diakɔ pombaka nsola ahɔndɔ ande ndo mbɔka. Nde ayonga mindo polo la dikɔlɔ. 11 Naka onto lele la ɛkɛlɛlɔ+ hasodi anya ande ko nde ambonanda onto ɔmɔtshi, onto ɔsɔ pombaka nsola ahɔndɔ ande ndo mbɔka. Nde ayonga mindo polo la dikɔlɔ. 12 Ɛngɔ ka diwomba tshɛ kayonanda onto lele la ɛkɛlɛlɔ pombaka mbolama. Ko naka ɛngɔ k’osongo, kete tɔ pombaka solama la ashi.+

13 “‘Ko naka ɛkɛlɛlɔ kande kambokomɛ ko onto akɔ ambɔkɔnɔ, kete nde ayetsha nshi 7 dikambo dia wɛdiamelo ande ndo nde pombaka nsola ahɔndɔ ande ndo mbɔka lo ashi wakɛla, ko nde ayonga pudipudi.+ 14 Lushi la 8, nde kɔshi benga 2 kana ana 2 wa tokudumba+ ko nde ntshɔ la tɔ la ntondo ka Jehowa la soko dia luudu la dipɛma l’esanganelo ko nde totisha ɔlɔmbɛdi. 15 Ɔlɔmbɛdi ayolambola tofudu takɔ, mɔtshi oko olambo wa pɛkato ndo kina oko olambo wa lotshumba. Ɔlɔmbɛdi ayowɛdia* oma lo mindo kande la ntondo ka Jehowa lo kɛnɛ kendana la ɛkɛlɛlɔ kande.

16 “‘Naka pami kɛmɔtshi ambɔkɔsha alɔmi, nde pombaka mbɔka demba di’otondo ndo nde ayonga mindo polo la dikɔlɔ.+ 17 Nde pombaka nsola dihɔndɔ tshɛ ndo ekoho tshɛ kele la alɔmi, ndo tɔ kayonga mindo polo la dikɔlɔ.

18 “‘Naka pami ambeyana la womoto ko nde ambɔkɔsha alɔmi, vɔ pombaka mbɔka ndo monga mindo polo la dikɔlɔ.+

19 “‘Naka womoto ɔmɔtshi ekɔ la ɛkɛlɛlɔ ka dikila oma lo demba diande, nde ayonga mindo l’edja ka nshi 7 l’ɔtɛ wɛnande dikila.+ Onto tshɛ layowosakanya ayonga mindo polo la dikɔlɔ.+ 20 Ɛngɔ tshɛ kayondetama lɔkɔ lo nshi yɛnande dikila kayonga mindo ndo ɛngɔ tshɛ kayondodjasɛ kayonga mindo.+ 21 Onto tshɛ layosakanya mbeto kande pombaka nsola ahɔndɔ ande ndo mbɔka. Nde ayonga mindo polo la dikɔlɔ. 22 Onto tshɛ layosakanya ɛngɔ tshɛ kakandadjashi pombaka nsola ahɔndɔ ande ndo mbɔka. Nde ayonga mindo polo la dikɔlɔ. 23 Naka womoto akɔ akadjashi lo mbeto kana lo ɛngɔ kekina, onto tshɛ layosakanya ɛngɔ kakɔ ayonga mindo polo la dikɔlɔ.+ 24 Naka pami kɛmɔtshi ambeyana la nde ko pami kakɔ ambosana la mindo ya dikila diande,+ pami kakɔ ayonga mindo l’edja ka nshi 7 ndo mbeto tshɛ kayondetama kayonga mindo.

25 “‘Naka womoto ambɛna dikila l’edja ka nshi efula+ aha l’etena katondɛnaka kana naka nde ambɛna dikila+ l’etena k’otale oleki woho watondɛnaka, nde ayonga mindo l’edja ka nshi tshɛ yakɛla dikila oko watondongaka mindo lo nshi yɛnande dikila. 26 Mbeto tshɛ kayondetama lo nshi yakɛlande dikila kayonga mindo+ oko mbeto ka lo nshi yatondɛnaka dikila ndo ɛngɔ tshɛ kayondodjasɛ kayonga mindo oko mindo ya lo nshi yatondɛnaka dikila. 27 Onto tshɛ layosakanya diangɔ sɔ ayonga mindo ndo nde pombaka nsola ahɔndɔ ande ndo mbɔka. Nde ayonga mindo polo la dikɔlɔ.+

28 “‘Koko naka ɛkɛlɛlɔ kande ka dikila kamboshila, nde ayetsha nshi 7. Oma laasɔ, nde ayonga pudipudi.+ 29 Lushi la 8, nde kɔshi benga 2 kana ana 2 wa tokudumba+ ko nde titɔla le ɔlɔmbɛdi la soko dia luudu la dipɛma l’esanganelo.+ 30 Ɔlɔmbɛdi ayolambola mɔtshi oko olambo wa pɛkato ndo kina oko olambo wa lotshumba. Ɔlɔmbɛdi ayowɛdia* oma lo mindo kande+ la ntondo ka Jehowa.

31 “‘Lo nsala ngasɔ mbahombanyu nkakitola ase Isariyɛlɛ oma lo mindo yawɔ, diaha vɔ mvɔ l’ɔtɛ wa mindo yawɔ lo mbidja tabɛrnaklɛ kami kele l’atei awɔ+ mindo.

32 “‘Ɔsɔ kele ɔlɛmbɛ wendana la pami kele la ɛkɛlɛlɔ, pami kele mindo l’ɔtɛ wambondɔkɔsha alɔmi,+ 33 womoto lele mindo lo nshi yɛnande dikila,+ pami tshɛ kana womoto tshɛ lele la ɛkɛlɛlɔ kɛmɔtshi lo demba diande+ ndo pami keyana la womoto lele mindo.’”

16 Jehowa akasawola la Mɔsɛ l’ɔkɔngɔ wa nyɔi k’ana w’apami w’Arɔna wakavu l’ɔtɛ wakawayasukanya la Jehowa+ lo yoho ya kɔlɔ. 2 Jehowa akatɛ Mɔsɛ ate: “Tɛ ɔnanyɔ Arɔna diaha nde mbɔtɔka wonya tshɛ lo dihole di’ekila+ la wedi wa dihɔndɔ di’okombɔ,+ mbɛlanɛ la ofidi wele laadiko di’Ɔshɛtɛ diaha nde mvɔ.+ Nɛ dia dimi layɛnama lo dinge+ laadiko di’ofidi+ akɔ.

3 “Arɔna kaye la diangɔ nɛ lam’ayondɔtɔ lo dihole di’ekila: Ɔsɔngɔ wa ngɔmbɛ dikambo di’olambo wa pɛkato+ ndo ɔkɔkɔ w’omi dikambo di’olambo wa lotshumba.+ 4 Nde kalɔtɛ okutu+ w’ekila wa linɛnɛ, kupe*+ ya linɛnɛ dia nkomba demba diande ndo nde kayadinge ohele wa linɛnɛ+ ndo kadinge l’ɔtɛ ande dihɔndɔ dia linɛnɛ diadingawɔ l’ɔtɛ.+ Ɔsɔ ekɔ ahɔndɔ w’ekila.+ Nde kɔkɛ+ ko nde ndjowalɔta.

5 “Nde kɔshi ɛsɔngɔ 2 wa mbudi ya waomi oma le olui w’ase Isariyɛlɛ+ dikambo di’olambo wa pɛkato ndo ɔkɔkɔ 1 w’omi dikambo di’olambo wa lotshumba.

6 “Oma laasɔ, Arɔna kela ngɔmbɛ k’olambo wa pɛkato yande, ko nde nkomba pɛkato yande+ ndo y’ase luudu lande.

7 “L’ɔkɔngɔ wa laasɔ, nde kɔshi mbudi 2 ko nde ndjiemadia la ntondo ka Jehowa la soko dia luudu la dipɛma l’esanganelo. 8 Arɔna koke owale la mbudi yakɔ 2 dia nshikikɛ mbudi kele dikambo dia Jehowa la kɛnɛ kele dikambo dia Azazɛlɛ.* 9 Arɔna kela mbudi kakashikikɛmi oma l’owale+ dikambo dia Jehowa ko nde kilambola olambo wa pɛkato. 10 Koko mbudi kakashikikɛmi oma l’owale dikambo dia Azazɛlɛ pombaka tɔlama kasɛna ndo tokiemɛ la ntondo ka Jehowa dikambo di’ekombelo ka pɛkato, dia tɔ kimɔma otsha l’oswe+ dikambo dia Azazɛlɛ.

11 “Arɔna kela ngɔmbɛ k’olambo wa pɛkato yande, ko nde nkomba pɛkato yande la y’ase luudu lande. L’ɔkɔngɔ wa laasɔ, nde kadiake ngɔmbɛ k’olambo wa pɛkato yande.+

12 “Oma laasɔ, nde kɔshi ɛngɔ ka mɛmbaka dja+ la akalanga wahɛta tɔɔ lɔkɔ oma lo elambwelo+ la ntondo ka Jehowa ndo awambo 2 wa tshɔ+ ya dimɛna y’opumu, ko nde ntɔla diangɔ sɔ la wedi wa dihɔndɔ di’okombɔ.+ 13 Nde kadje ndo tshɔ lo dja la ntondo ka Jehowa+ kele edinga wa tshɔ yakɔ kawokombe ofidi+ wele laadiko di’ɔshɛtɛ w’Ɔmɛnyi+ diaha nde mvɔ.

14 “Nde kɔshi yema ya dikila+ dia ngɔmbɛ ko nde ditɔngiya la lohita lande la ntondo k’ofidi lo ɛstɛ ndo nde katɔngiya yema ya dikila la lohita lande mbala 7 la ntondo k’ofidi.+

15 “Oma laasɔ, nde kadiake mbudi k’olambo wa pɛkato ya wodja+ ko nde mbela dikila diatɔ la wedi wa dihɔndɔ di’okombɔ+ ndo nde kasale la dikila+ diakɔ woho wayondosala la dikila dia ngɔmbɛ. Nde kaditɔngiya la ntondo k’ofidi.

16 “Nde kakombe pɛkato dikambo dia dihole di’ekila lo kɛnɛ kendana l’awui wa mindo w’ase Isariyɛlɛ ndo lo kɛnɛ kendana la kɔlɔ yawɔ ndo pɛkato yawɔ.+ Kɛsɔ kahombande nsala dikambo dia luudu la dipɛma l’esanganelo lele l’atei awɔ ndo l’atei w’awui awɔ wa mindo.

17 “Ndooko onto okina lahomba monga l’etei ka luudu la dipɛma l’esanganelo ntatɛ oma ko etena kayondɔtɔ dia tokomba pɛkato lo dihole di’ekila polo ndo lam’ayondotomba. Nde ayokomba pɛkato yande, y’ase luudu+ lande ndo y’ase etshumanelo k’otondo k’Isariyɛlɛ.+

18 “Oma laasɔ nde katombe, ko nde ntshɔ otsha lo elambwelo+ kele la ntondo ka Jehowa, ko nde tokomba pɛkato dikambo diatɔ ndo nde kɔshi yema ya dikila dia ngɔmbɛ la yema ya dikila dia mbudi ko nde nkita lo nseke ya lo elambwelo lo wedi akɔ tshɛ. 19 Ndo nto, nde katɔngiya yema ya dikila lɔkɔ la lohita lande mbala 7 dia nde kiɛdia oma l’awui wa mindo tshɛ w’ase Isariyɛlɛ ndo dia nde kikidia.

20 “Lam’ayondoshidiya nkomba pɛkato+ dikambo dia dihole di’ekila ndo dikambo dia luudu la dipɛma l’esanganelo la elambwelo,+ nde kela ndo mbudi kasɛna.+ 21 Arɔna kahɛ anya ande akɔ 2 l’ɔtɛ wa mbudi kakɔ kasɛna ndo nde kashole munga tshɛ y’ase Isariyɛlɛ, kɔlɔ yawɔ tshɛ ndo pɛkato yawɔ tshɛ laletɔ, ko nde ndjiahɛ l’ɔtɛ wa mbudi+ kakɔ ndo kikimɔ otsha l’oswe lo anya w’onto lakasɔnama dia nsala dui sɔ.* 22 Nde kakimɔ mbudi kakɔ, ko tɔ kayɛmba munga yawɔ+ otsha l’oswe+ ndo nde ayokimɔ mbudi kakɔ otsha l’oswe.+

23 “Oma laasɔ, Arɔna ayɔtɔ lo luudu la dipɛma l’esanganelo ko nde nkolola ahɔndɔ wa linɛnɛ wakandalɔtshi etena kakandɔtwɛ lo dihole di’ekila ndo nde ayowakitsha laawɔ. 24 Nde kɔkɛ la ashi+ wele lo dihole di’ekila ndo kalɔtɛ ahɔndɔ+ ande, katombe l’andja ndo kalambole olambo wa lotshumba,+ olambo wa lotshumba+ wa wodja ko nde nkomba pɛkato dikambo diande ndo dikambo dia wodja.+ 25 Nde katshumbe wata w’olambo wa pɛkato lo elambwelo.

26 “Onto layokimɔ mbudi otsha l’oswe dikambo dia Azazɛlɛ+ pombaka nsola ahɔndɔ ande ndo mbɔka. Oma laasɔ mbakokande ndja lo mpango.

27 “Ngɔmbɛ k’olambo wa pɛkato la mbudi k’olambo wa pɛkato kele dikila diatɔ diakatɔlami lo dihole di’ekila dia tokomba pɛkato pombaka tɔlama l’andja wa mpango. Nkoho yayɔ, emunyi ayɔ ndo tumi yayɔ pombaka tshumbama lo dja.+ 28 Ɔnɛ latshumba diangɔ sɔ pombaka nsola ahɔndɔ ande ndo mbɔka. Oma laasɔ mbakokande ndja lo mpango.

29 “Ɔnɛ ekɔ didjango dia pondjo le nyu: Lo Ngɔndɔ ka 7 nshi 10, kanyoyasoyake* ndo tanyokambake ndooko olimu,+ oyadi nyu kana ɔngɛndangɛnda wodjashi l’atei anyu. 30 Lushi lɔsɔ mbayokombamaka pɛkato+ yanyu dia nyu mbɔsama oko anto wele pudipudi. Nyayɛdiamaka oma lo pɛkato yanyu tshɛ la ntondo ka Jehowa.+ 31 Ɔsɔ ekɔ sabato, lushi la laande la momuya le nyu ndo nyu pombaka ndjasoya.*+ Ɔsɔ ekɔ didjango dia pondjo.

32 “Ɔlɔmbɛdi wambokitama esɔ+ ndo wambolowɔma* dia nkamba oko ɔlɔmbɛdi+ lo dihole dia she+ ayokomba pɛkato ndo nde ayɔlɔta ahɔndɔ wa linɛnɛ,+ ahɔndɔ w’ekila.+ 33 Nde ayokomba pɛkato dikambo dia dihole dioleki ekila,+ dia luudu la dipɛma l’esanganelo+ ndo dia elambwelo.+ Nde ayokomba pɛkato y’ɛlɔmbɛdi ndo y’anto tshɛ wa lo etshumanelo.+ 34 Ɔsɔ ayonga didjango dia pondjo le nyu+ dia kombaka pɛkato tshɛ y’ase Isariyɛlɛ mbala 1 l’ɔnɔnyi.”+

Ko nde akasale kɛnɛ tshɛ kakadjangɛ Jehowa Mɔsɛ.

17 Jehowa akatɛ Mɔsɛ ate: 2 “Sawola l’Arɔna nde l’anande w’apami kaamɛ l’ase Isariyɛlɛ tshɛ kele tɛwɔ wate: ‘Jehowa ambodjanga ate:

3 “‘“Naka ose Isariyɛlɛ ɔmɔtshi ambodiaka ngɔmbɛ, ɔsɔngɔ w’ɔkɔkɔ w’omi kana wa mbudi lo mpango kana naka nde ambokidiaka l’andja wa mpango 4 lo dihole dia nde kiela la soko dia luudu la dipɛma l’esanganelo dia ndjokikimɔ oko olambo le Jehowa la ntondo ka tabɛrnaklɛ ka Jehowa, onto ɔsɔ ayonga la onongo wa dikila. Nde ambɔkɛdia dikila ndo onto ɔsɔ pombaka ndjakema, 5 diaha ase Isariyɛlɛ ndjaka nyama yawɔ y’elambo nto l’oswe, koko wayielake le Jehowa la soko dia luudu la dipɛma l’esanganelo le ɔlɔmbɛdi. Vɔ wayohombaka nambola nyama shɔ oko elambo w’osanga le Jehowa.+ 6 Ko ɔlɔmbɛdi ayɔmɔnga dikila lo elambwelo kaki Jehowa la soko dia luudu la dipɛma l’esanganelo ndo ayotshumba wata oko opumu wa dimɛna* le Jehowa.+ 7 Ɔnkɔnɛ, watolambolake elambo awɔ nto le ɛdiɛngɛ wele oko mbudi*+ yasala la wɔ kinumba.+ Ɔsɔ ayonga didjango dia pondjo le nyu lo nɔnga yanyu tshɛ.”’

8 “Kowate wate: ‘Onto tshɛ la lo nkumbo k’Isariyɛlɛ kana ɔngɛndangɛnda wodjashi l’atei anyu lalambola olambo wa lotshumba kana woshasha ɔmɔtshi, 9 koko haye la wɔ la soko dia luudu la dipɛma l’esanganelo dia mbolambola Jehowa, onto ɔsɔ pombaka ndjakema.+

10 “‘Onto tshɛ la lo nkumbo k’Isariyɛlɛ kana ɔngɛndangɛnda wodjashi l’atei anyu layɔlɛ woho tshɛ wa dikila,+ ndooko onyake dimi layendana la onto* ɔsɔ lalɛ dikila ndo layowodiaka. 11 Nɛ dia lɔsɛnɔ* la etongami tshɛ kasɛna lekɔ lo dikila+ ndo dimi lakanyoshadiɔ dikambo dia elambwelo+ dia nkomba pɛkato yanyu,* nɛ dia dikila mbakomba pɛkato+ lo tshimbo ya lɔsɛnɔ* lele lɔkɔ. 12 Diakɔ diakamatɛ ase Isariyɛlɛ nte: “Ndooko onto* l’atei anyu lahomba ndɛ dikila ndo ndooko ɔngɛndangɛnda wodjashi l’atei anyu+ lahomba ndɛ dikila.”+

13 “‘Naka ose Isariyɛlɛ ɔmɔtshi kana ɔngɛndangɛnda wodjashi l’atei anyu ambotshɔ lo wenga ko ambotonda nyama kana fudu katowɔlɛka, nde pombaka nsedia dikila+ ndo difɛ nkɛtɛ. 14 Nɛ dia dikila mbele lɔsɛnɔ* la etongami tshɛ kasɛna dikambo lɔsɛnɔ* lekɔ lɔkɔ. Ɔnkɔnɛ, dimi lakatɛ ase Isariyɛlɛ nte: “Tanyɔlɛke dikila di’etongami tshɛ kasɛna, nɛ dia dikila mbele lɔsɛnɔ* la etongami tshɛ kasɛna. Onto tshɛ ladilɛ ayodiakema.”+ 15 Naka onto* ɔmɔtshi, oyadi ɔngɛndangɛnda kana ose Isariyɛlɛ ambɔlɛ nyama k’osena kana nyama kakadiakema oma le nyama ka ngala,+ onto ɔsɔ pombaka nsola ahɔndɔ ande ndo mbɔka. Nde ayonga mindo polo la dikɔlɔ,+ ko oma laasɔ nde ayonga pudipudi. 16 Ko naka nde hawasodi ndo hɔki, kete nde ayolongola dilanya l’ɔtɛ wa munga kande.’”+

18 Jehowa akatetemala mbutɛ Mɔsɛ ate: 2 “Sawola l’ase Isariyɛlɛ kele tɛwɔ wate: ‘Dimi kele Jehowa Nzambi kanyu.+ 3 Tanyosalake kɛnɛ kasalawɔ lo wodja w’Edjibito lɛnɛ akanyadjasɛka ndo tanyosalake kɛnɛ kasalawɔ lo wodja wa Kanana lɛnɛ atamanyɔtɔlɛ.+ Tanyoyelake ditshelo diawɔ. 4 Kanyoyelake tɛdikɔ tami, kanyolamake wadjango ami ndo kanyowakitanyiyake.+ Dimi kele Jehowa Nzambi kanyu. 5 Kanyolamake wadjango ami ndo tɛdikɔ tami. Onto tshɛ lasala akambo asɔ ayonga la lɔsɛnɔ lo tshimbo yawɔ.+ Dimi kele Jehowa.

6 “‘Ndooko onto l’atei anyu lahomba nsukana la owotɔ ande wa suke suke dia mbeyana* la nde.+ Dimi kele Jehowa. 7 Teyanake la shɔ ndo teyanake la nyɔ. Nde ekɔ nyɔ ndo wɛ hahombe mbeyana la nde.

8 “‘Teyanake la wadi a shɔ.+ Dui sɔ diayosha shɔ nsɔnyi.*

9 “‘Teyanake la kadiyɛyɛ, oyadi nde ekɔ la yɛ shɛnyu 1 kana nyangɛnyu 1, oyadi nyakotɔ dihole 1 kana bu.+

10 “‘Teyanake la okana ayɛ wa womoto kana okana ayɛ wa pami, nɛ dia nde ekɔ otakataka ayɛ hita.

11 “‘Teyanake la ɔna womoto laki wadi a shɔ, ɔna shɔ, nɛ dia nde ekɔ kadiyɛyɛ.

12 “‘Teyanake la shɔ kadi. Nde ekɔ owotɔ wa shɔ wa lo dikila.+

13 “‘Teyanake la kadiyɔ aki nyɔ, nɛ dia nde ekɔ owotɔ wa nyɔ wa lo dikila.

14 “‘Toshake ɔnango shɔ nsɔnyi* lo mbeyana la wadɛnde. Nde ekɔ shɔ kadi.+

15 “‘Teyanake la wadi aki ɔnayɛ.+ Nde ekɔ okilo ayɛ ndo wɛ hahombe mbeyana la nde.

16 “‘Teyanake la wadi aki ɔnanyɔ,+ nɛ dia dui sɔ diayosha ɔnanyɔ nsɔnyi.*

17 “‘Teyanake la ɔna womoto laki wadɛyɛ. Tɔsake ɔna ɔnande la pami kana ɔna ɔnande la womoto+ dia mbeyana la nde. Vɔ wekɔ ewotɔ ande wa suke suke. Ɔsɔ ekɔ dui dia mindo.*

18 “‘Totshukake kadiyɔ aki wadɛyɛ dia nde monga waladɛnde+ ndo teyanake la nde etena keke kadiyɛnde la lɔsɛnɔ.

19 “‘Tosukanake la womoto dia mbeyana la nde+ lo nshi yende mindo l’ɔtɛ wɛnande dikila.

20 “‘Teyanake la wadi aki osekayɛ onto* diaha wɛ ndjadja mindo.+

21 “‘Tetawɔke dia ɔnayɛ kimɔma* le Mɔlɛka.+ Tɔnyɔlake lokombo la Nzambi kayɛ lo yoho shɔ.+ Dimi kele Jehowa.

22 “‘Teyanake la pami woho watoweyanaka la womoto.+ Ɔsɔ ekɔ dui dia wɔnɔnyi.

23 “‘Pami hahombe mbeyana la nyama ndo ndjadja mindo l’ɔtɛ wa dui sɔ; ndo womoto hahombe mbeyana la nyama.+ Ɔsɔ ekɔ mɔnyɔla kɛnɛ kakalɔngɔsɔla Nzambi.

24 “‘Tanyoyadjake mindo lo nsala akambo asɔ, nɛ dia l’ɔtɛ w’akambo asɔ tshɛ mbakayadje wedja wayangami mbitshanya oma la ntondo kanyu mindo.+ 25 Ɔnkɔnɛ, naka wodja waya mindo, kete dimi layosha anto wodjashi lɔkɔ dilanya l’ɔtɛ wa munga yawɔ, ko wodja wayowatowɔ.+ 26 Koko nyu pombaka ndjela wadjango ami la tɛdikɔ+ tami ndo tanyotshake kaanga dikambo 1 l’atei w’akambo wa wɔnɔnyi asɔ, oyadi nyu kana ɔngɛndangɛnda wodjashi l’atei anyu.+ 27 Nɛ dia akambo wa wɔnɔnyi asɔ mbakasale anto wakasɛnaka lo wodja la ntondo kanyu,+ diakɔ diele wodja waya mindo. 28 Ko naka hanyotodja wodja mindo, vɔ hawotonyotowɔ woho wayowotowɔ wedja waki la ntondo kanyu. 29 Naka onto ɔmɔtshi nsala dui dimɔtshi l’atei w’akambo wa wɔnɔnyi asɔ, wanɛ* tshɛ wasala dui sɔ pombaka ndjakema. 30 Nyu pombaka nkotsha ɔkɛndɛ anyu le mi lo mbewɔ mbekelo tshɛ ya wɔnɔnyi yaki la ntondo kanyu+ diaha nyu ndjadja mindo lo ndjiyela. Dimi kele Jehowa Nzambi kanyu.’”

19 Jehowa akatɛ Mɔsɛ nto ate: 2 “Sawola l’olui w’otondo w’ase Isariyɛlɛ kele tɛwɔ wate: ‘Nyu pombaka monga ekila, nɛ dia dimi Jehowa Nzambi kanyu lekɔ ekila.+

3 “‘Onto tshɛ l’atei anyu pombaka nɛmiya* nyango la she+ ndo nyu pombaka mbohɔka sabato+ yami. Dimi kele Jehowa Nzambi kanyu. 4 Tanyoyelake tozambizambi t’anyanya+ ndo tanyoyasalɛke tozambizambi ta mbolo ya lɔlɛlɔla.+ Dimi kele Jehowa Nzambi kanyu.

5 “‘Naka nyambolambola Jehowa+ olambo w’osanga, nyu pombaka mbolambola lo yoho yakokanyu mbetawɔma+ le Nzambi. 6 Vɔ pombaka ndɛma lushi lalambolanyu ndo la wedi a pindju. Koko kɛnɛ katshikala polo lushi la 3 pombaka tshumbama lo dja.+ 7 Ko naka yema mɔtshi yambɔlɛma lushi la 3, kete vɔ waya ɛngɔ ka kɔlɔ kahatetawɔma. 8 Onto lawɔlɛ ayolongola dilanya l’ɔtɛ wa munga kande, nɛ dia nde ambɔnyɔla ɛngɔ k’ekila ka Jehowa. Onto* ɔsɔ pombaka ndjakema.

9 “‘Lam’ayonyonaka diangɔ dia dinela dia lo dikambɔ dianyu, tanyonake atshuku tshɛ wa lo dikambɔ dianyu ndo tanyɔkɔdiakɔdiake kɛnɛ katshikala lo dinela dianyu.+ 10 Ndo nto, tanyɔsake kɛnɛ katshikala lo dikambɔ dianyu dia vinyɔ ndo tanyɔtɔngɔnake elowa wakɔ lo dikambɔ dianyu dia vinyɔ. Nyu pombaka mbatshikɛ ose wola*+ ndo ɔngɛndangɛnda. Dimi kele Jehowa Nzambi kanyu.

11 “‘Tanyovake,+ tanyokesake+ ndo tanyotanɛke kashi. 12 Tanyotshibake lo lokombo lami+ lo kashi dia nyu mɔnyɔla lokombo la Nzambi kanyu. Dimi kele Jehowa. 13 Tokesake wonyayɛ onto+ ndo tɔhɔtɔlake onto ɛngɔ.+ Totshikalake la difuto di’ose olimu otsho w’otondo polo la pindju.+

14 “‘Todjake kanga ehoke mananu* ndo tokitshɛke kanga tshungu+ otamba wa ntakanya. Kokake Nzambi kayɛ wɔma.+ Dimi kele Jehowa.

15 “‘Kanyolomboshake la losembwe. Tongake la shɔnɔdi otsha le ose wola kana ndeka ndjasha le kanga ɔngɔnyi.+ Kolomboshake wonyayɛ onto la losembwe.

16 “‘Tetetake l’atei w’ase wodja ayɛ+ dia mpandjola awui w’emamatanya. Toyangake dia nshisha lɔsɛnɔ* la wonyayɛ onto.*+ Dimi kele Jehowa.

17 “‘Tohetshake ɔnanyɔ l’otema ayɛ.+ Lo weho akɔ tshɛ, kongolake wonyayɛ onto+ diaha wɛ ndjotambɛ lo pɛkato kande.

18 “‘Tokaloyake kɔlɔ lo kɔlɔ+ kana mombɛ ose wodja ayɛ kumbɛkumbɛ. Langa wonyayɛ onto oko wayalangayɛ.+ Dimi kele Jehowa.

19 “‘Nyu pombaka nkitanyiya wadjango ami anɛ: Teyanyake weho wa nyama 2 wotshikitanyi. Tonɛke weho wa diangɔ 2+ l’ekambɔ kayɛ ndo tɔlɔtake dihɔndɔ diakasalema la weho 2 w’eshinga.+

20 “‘Naka pami kɛmɔtshi ambetama la womoto ndo ambeyana la nde ko womoto akɔ ekɔ okambi wakambemɛ le pami kekina, koko pami kakɔ atakimɔ kɛnɛ kahombama dia mbowɔsa kana atawosha lotshungɔ, kete vɔ pombaka nongola dilanya. Koko vɔ hawohombe ndjakema nɛ dia womoto akɔ atatshungɔma. 21 Pami kakɔ pombaka mbela olambo w’onongo le Jehowa la soko dia luudu la dipɛma l’esanganelo, mbuta ate ɔkɔkɔ w’omi w’olambo w’onongo.+ 22 Ɔlɔmbɛdi ayokomba pɛkato kakandasale la ɔkɔkɔ akɔ w’olambo w’onongo la ntondo ka Jehowa. Nde ayodimanyiyama pɛkato kakandasale.

23 “‘Lam’ayonyokoma lo wodja wayangami nyosha ko nyambotonɛ esongo watɔ elowa walɛma, oma l’etatelo nyu pombaka mbɔsa dia elowa awɔ wekɔ mindo ndo wayoshimbama. Vɔ wayoshimbama le nyu l’edja k’ɛnɔnyi 3. Vɔ hawohombe ndɛma. 24 Koko l’ɔnɔnyi wa 4, elowa awɔ tshɛ wayonga ekila dia nyu ngɛnangɛnaka la ntondo ka Jehowa.+ 25 Oma laasɔ, l’ɔnɔnyi wa 5 mbakokanyu ndjɔlɛ elowa akɔ dia vɔ ndeka ntɔ. Dimi kele Jehowa Nzambi kanyu.

26 “‘Hanyohombe ndɛ ndooko ɛngɔ kele la dikila.+

“‘Tanyosalake diendja kana awui wa maji.+

27 “‘Tanyonyake* divo dia l’emamu w’ɛtɛ anyu ndo tanyohembolake* tokoma ta ndɛdu yanyu.+

28 “‘Tanyoyakɔtshakɔtshake mpota dikambo di’onto*+ lambovɔ ndo tanyoyasangake asango l’alemba anyu. Dimi kele Jehowa.

29 “‘Tɔnyɔlake ɔnayɛ la womoto lo mbeetɛ numba, diaha wodja ndjosala kinumba+ ko ndjolola la lɔkɛwɔ la mindo.+

30 “‘Kanyɔlɛmiyake sabato+ yami ndo kanyɛnyake wɔma wɔsɔhanyemi la dilɛmiɛlɔ dikambo dia tɛmpɛlɔ kami k’ekila. Dimi kele Jehowa.

31 “‘Tanyotshɔke le wanɛ watɛkɛtsha dimu+ ndo tanyoyangake waa wetshi+ dia nyu ndjadja mindo la wɔ. Dimi kele Jehowa Nzambi kanyu.

32 “‘Kemalake+ la ntondo k’onto lele la ndjwe, koshake osombe w’onto+ kɛnɛmɔ ndo kokake Nzambi kayɛ wɔma.+ Dimi kele Jehowa.

33 “‘Naka ɔngɛndangɛnda ɔmɔtshi ambodjasɛ kaamɛ la nyu lo wodja anyu, tanyowɛngiyake.+ 34 Ɔngɛndangɛnda wodjashi kaamɛ la nyu pombaka monga le nyu oko ose ngelo l’atei anyu.+ Nyu pombaka mbooka ngandji woho wayaokanyu, nɛ dia nyu nyaki angɛndangɛnda lo wodja w’Edjibito.+ Dimi kele Jehowa Nzambi kanyu.

35 “‘Tanyokambake la tɛdikɔ ta lokeso dia mbɛdika diangɔ di’etale, dia wotsho ndo di’ɔkɛlɛngɔ.+ 36 Kanyokambake la kilɔ yele kokele, tɛdikɔ ta wotsho tele kokele, tɛdikɔ ta diangɔ dia womu* tele kokele ndo tɛdikɔ ta diangɔ di’ɔkɛlɛngɔ*+ tele kokele. Dimi kele Jehowa Nzambi kanyu lakanyotondja oma lo wodja w’Edjibito. 37 Ɔnkɔnɛ, nyu pombaka nkitanyiya wadjango ami tshɛ la tɛdikɔ tami tshɛ ndo nyu pombaka mbayela.+ Dimi kele Jehowa.’”

20 Jehowa akatɛ Mɔsɛ ate: 2 “Tote ase Isariyɛlɛ wate: ‘Ose Isariyɛlɛ tshɛ kana ɔngɛndangɛnda wodjashi l’atei anyu l’Isariyɛlɛ lakimɔ ɔnande le Mɔlɛka pombaka ndjakema ndooko onyake.+ Anto wa lo wodja pombaka mbooka ave polo nde mvɔ. 3 Dimi dimɛ layendana l’onto ɔsɔ ndo layowodiaka, nɛ dia nde ambokimɔ ɔnande ɔmɔtshi le Mɔlɛka, ambodja dihole diami di’ekila mindo+ ndo ambɔnyɔla lokombo lami l’ekila. 4 Naka anto wa lo wodja mbetawɔ dia ndjiha washo lo kɛnɛ kosadi onto ɔsɔ lo nkimɔ ɔnande le Mɔlɛka ko hawoodiaki,+ 5 ndooko onyake dimɛ layendana l’onto ɔsɔ ndo la nkumbo kande.+ Dimi layodiaka onto ɔsɔ nde l’anto tshɛ wakayasha kaamɛ la nde lo nsala kinumba la Mɔlɛka.

6 “‘Lo kɛnɛ kendana l’onto* latshɔ le wanɛ watɛkɛtsha dimu+ kana le waa wetshi+ dia tosala kinumba ka lo nyuma* la wɔ, ndooko onyake dimi layendana l’onto* ɔsɔ ndo layowodiaka.+

7 “‘Nyu pombaka ndjakidia ndo monga ekila,+ nɛ dia dimi kele Jehowa Nzambi kanyu. 8 Nyu pombaka ndjela wadjango ami ndo mbakitanyiya.+ Dimi kele Jehowa ɔnɛ lanyetɛ ekila.+

9 “‘Naka onto ɔmɔtshi ambodja she kana nyango mananu,* nde pombaka ndjakema ndooko onyake.+ Lam’ele nde ambodja she kana nyango mananu, dikila diande diekɔ l’ɔtɛ ande.

10 “‘Nganɛ mbahombanyu salɛ pami kasala loseka la wadi a kana: Pami kasala loseka la wadi a kana pombaka ndjakema ndooko onyake. Ndo pami ndo womoto pombaka ndjakema.+ 11 Pami keyana la wadi aki she ambosha she nsɔnyi.*+ Vɔ akɔ 2 pombaka ndjakema ndooko onyake. Dikila diawɔ diekɔ l’ɛtɛ awɔ. 12 Naka pami kɛmɔtshi ambeyana la wadi aki ɔnande, vɔ akɔ 2 pombaka ndjakema ndooko onyake. Vɔ wambɔnyɔla kɛnɛ kakalɔngɔsɔla Nzambi. Dikila diawɔ diekɔ l’ɛtɛ awɔ.+

13 “‘Naka pami ambeyana la pami woho watoweyanaka la womoto, vɔ akɔ 2 wambosala dui dia wɔnɔnyi.+ Vɔ pombaka ndjakema ndooko onyake. Dikila diawɔ diekɔ l’ɛtɛ awɔ.

14 “‘Naka pami ambotshuka ɔna womoto ko ambeyana la nyango ɔna womoto akɔ, ɔsɔ ekɔ dui dia mindo.*+ Vɔ pombaka mbotshumba lo dja+ ndo nde ndo vɔ akɔ 2, diaha lɔkɛwɔ la mindo ntetemala monga l’atei anyu.

15 “‘Naka pami ambeyana la nyama, nde pombaka ndjakema ndooko onyake ndo nyu pombaka ndjaka nyama kakɔ.+ 16 Naka womoto ambeyana la nyama,+ nyu pombaka ndjaka womoto akɔ ndo nyama kakɔ. Vɔ pombaka ndjakema ndooko onyake. Dikila diawɔ diekɔ l’ɛtɛ awɔ.

17 “‘Naka pami ambeyana la kadiyɛnde, ɔna she la womoto kana ɔna nyango la womoto ko vɔ akɔ 2 onto l’onto ambɛna otakataka w’osekande, ɔsɔ ekɔ dui dia nsɔnyi.+ Vɔ pombaka ndjakema lo washo w’anto tshɛ. Nde ambosha kadiyɛnde nsɔnyi.* Nde pombaka nongola dilanya l’ɔtɛ wa munga kande.

18 “‘Naka pami ambetama la womoto lɛna dikila ko ambeyana la nde, vɔ akɔ 2 wambɔnyɔla ɛkɛlɛlɔ kande ka dikila.+ Ɔnkɔnɛ vɔ akɔ 2 pombaka ndjakema.

19 “‘Teyanake la kadiyɔ aki nyɔ kana shɔ kadi, nɛ dia ɔsɔ ekɔ mbisha owotɔ wa lo dikila nsɔnyi.+ Vɔ pombaka nongola dilanya l’ɔtɛ wa munga kawɔ. 20 Pami keyana la wadi aki ɔnango she ambosha ɔnango she nsɔnyi.*+ Vɔ pombaka nongola dilanya l’ɔtɛ wa pɛkato kawɔ. Vɔ pombaka mvɔ aha la mbota. 21 Naka pami ambɔsa wadi aki ɔnango, ɔsɔ ekɔ dui dia kɔlɔ efula.+ Nde ambosha ɔnango nsɔnyi.* Vɔ hawohombe mbota.

22 “‘Nyu pombaka nkitanyiya wadjango ami tshɛ la tɛdikɔ+ tami ta dombo tshɛ ndo nyu pombaka mbayela+ diaha wodja watamanyɔtɔlɛ dia nyu todjasɛ lɛkɔ nyotowɔ.+ 23 Tanyɔkɛndakɛndake lo ndjela wadjango w’ase wedja wamomotshanya oma la ntondo kanyu,+ nɛ dia vɔ wakasale akambo asɔ tshɛ ndo dimi lambaahetsha.+ 24 Diakɔ diakamanyotɛ nte: “Nyayɔsa wodja awɔ ndo dimi layonyoshawɔ dia vɔ monga wanyu pondjo, wodja wakɛlanɛ abɛlɛ la osanga.+ Dimi kele Jehowa Nzambi kanyu lakanyokakitola la wedja ekina.”+ 25 Nyu pombaka nsala otshikitanu lam’asa nyama ka pudipudi la nyama ka mindo ndo fudu ka mindo la fudu ka pudipudi.+ Tanyoyaetɛke* wɔnɔnyi lo tshimbo ya nyama kana fudu kana ɛngɔ tshɛ kayakotola la nkɛtɛ kakamanganya la nyu lo nyotɛ dia kekɔ mindo.+ 26 Nyu pombaka monga ekila le mi, nɛ dia dimi Jehowa lekɔ ekila.+ Dimi lambonyokakitola la wedja ekina dia nyu monga wodja ami.+

27 “‘Pami tshɛ kana womoto tshɛ latɛkɛtsha dimu kana lele wetshi* pombaka ndjakema ndooko onyake. Anto pombaka mbooka ave polo nde mvɔ.+ Dikila diande diekɔ l’ɔtɛ ande.’”

21 Jehowa akatɛ Mɔsɛ ate: “Sawola l’ana w’apami w’Arɔna wele ɛlɔmbɛdi kele tɛwɔ wate: ‘Ndooko onto lahomba ndjadja mindo lo minanda odo w’onto* l’atei w’ase wodja ande.+ 2 Koko nde koka mbonanda naka ekɔ owotɔ ande wa suke wa lo dikila, nyango, she, ɔnande la pami, ɔnande la womoto, ɔnango, 3 ndo nde koka ndjadja mindo dikambo dia kadiyɛnde naka kadiyɛnde kodjashi kaamɛ la nde eke emuma ndo atatshukama. 4 Nde hakoke ndjadja mindo ndo nsuwola ekila kande dikambo dia wadi aki ose wodja ande. 5 Vɔ hawohombe minya ɛhɔlɔ+ kana mpembola tokoma ta ndɛdu yawɔ kana ndjakɔtshakɔtsha mpota l’alemba awɔ.+ 6 Vɔ pombaka monga ekila le Nzambi kawɔ+ ndo hawohombe nsuwola ekila ka lokombo la Nzambi kawɔ,+ nɛ dia vɔ wekɔ lo nambola olambo watshumbama lo dja dikambo dia Jehowa ndo mapa* wa Nzambi kawɔ. Vɔ pombaka monga ekila.+ 7 Vɔ hawohombe ntshuka womoto la numba,+ womoto lakayadje mindo kana womoto lakadiake diwala la omɛnde,+ nɛ dia ɔlɔmbɛdi ekɔ ekila le Nzambi kande. 8 Wɛ pombaka mbokidia,+ nɛ dia nde kalambola mapa wa Nzambi kayɛ. Nde pombaka monga ekila le yɛ, nɛ dia dimi Jehowa ɔnɛ lanyetɛ ekila lekɔ ekila.+

9 “‘Naka ɔna ɔlɔmbɛdi la womoto ambosuwola ekila kande lo nsala kinumba, nde ekɔ lo nsuwola ekila ka she. Nde pombaka tshumbama lo dja.+

10 “‘Ɔlɔmbɛdi a laadiko wakakitama esɔ k’okitelo+ wele l’atei w’anango ndo wakalowɔma* dia ndɔta ahɔndɔ w’ɔlɔmbɛdi+ hahombe ntshika divo diande esakalaka kana mbatshatsha ahɔndɔ ande.+ 11 Nde hahombe nsukana la odo w’onto,*+ oyadi wa she kana wa nyango diaha nde ndjadja mindo. 12 Nde hahombe mimɔ oma lo dihole di’ekila ndo nde hahombe nsuwola ekila ka dihole di’ekila dia Nzambi kande,+ nɛ dia djembetelo ya ndjakimɔ, esɔ k’okitelo ka Nzambi kande+ kekɔ le nde. Dimi kele Jehowa.

13 “‘Wadi layondotshuka pombaka monga womoto leke emuma.+ 14 Nde hakoke ntshuka wadi aki odo, womoto lakadiake diwala, lakayadje mindo kana womoto la numba, koko nde pombaka ntshuka womoto leke emuma oma l’atei a wodja ande. 15 Nde hahombe nsuwola ekila k’ɔnande* l’atei wa wodja ande,+ nɛ dia dimi kele Jehowa lawetɛ ekila.’”

16 Jehowa akatetemala mbutɛ Mɔsɛ ate: 17 “Tɛ Arɔna wate: ‘Ndooko pami l’atei w’anayɛ* kele la ɛkɔmɔ lo nɔnga yawɔ tshɛ kahomba nsukana dia ndjolambola mapa wa Nzambi kande. 18 Naka pami kɛmɔtshi ekɔ la ɛkɔmɔ, nde hakoke nsukana la dihole di’ekila: Kanga tshungu kana kanga etshumbe kana onto lele la ɛkɔmɔ l’elungi* kana onto lele la lonya kana lokolo lɔmɔtshi otale efula, 19 kana onto lakɔkɔ lokolo kana lonya, 20 kana pami kele la dimbɔkɔ l’ɔkɔngɔ kana kele yɔnyɔndju* kana kele la ɛkɔmɔ lo sso kana kele la mpote kana kele la ahaka kana kele la tokundju tambominɔ.+ 21 Pami tshɛ l’atei w’ana* w’ɔlɔmbɛdi Arɔna kele la ɛkɔmɔ hakoke nsukana dia nambola Jehowa olambo watshumbama lo dja. Lam’ele nde ekɔ la ɛkɔmɔ, nde hakoke nsukana dia nambola mapa wa Nzambi kande. 22 Nde mbeyaka ndɛ mapa wa Nzambi kande w’oma lo diangɔ dioleki ekila+ ndo w’oma lo diangɔ di’ekila.+ 23 Koko nde hakoke nsukana la dihɔndɔ di’okombɔ+ ndo nde hakoke nsukana la elambwelo,+ nɛ dia nde ekɔ la ɛkɔmɔ. Nde hahombe nsuwola ekila ka tɛmpɛlɔ kami k’ekila,+ dikambo dimi kele Jehowa lawaetɛ ekila.’”+

24 Ko Mɔsɛ akasawola la Arɔna nde l’anande w’apami ndo l’ase Isariyɛlɛ tshɛ.

22 Jehowa akatɛ Mɔsɛ nto ate: 2 “Tɛ Arɔna nde l’anande w’apami dia vɔ monga la yewo lo woho wakambawɔ* la diangɔ di’ekila diakimɔ ase Isariyɛlɛ diaha vɔ nsuwola ekila ka lokombo lami l’ekila+ lo kɛnɛ kendana la diangɔ diakidiawɔ dikambo diami.+ Dimi kele Jehowa. 3 Tɛwɔ wate: ‘Lo nɔnga yanyu tshɛ, kanula yanyu tshɛ yayosukanaka la diangɔ di’ekila diakidia ase Isariyɛlɛ dikambo dia Jehowa etena kende mindo, onto* ɔsɔ pombaka ndjakema.+ Dimi kele Jehowa. 4 Ndooko pami kele kanula ya lo dioho dia Arɔna kele la sudi+ kana kele la ɛkɛlɛlɔ kɛmɔtshi+ kakoka ndɛ diangɔ di’ekila polo lam’ayondonga pudipudi,+ oyadi ɔnɛ lasakanya onto lamboyadja mindo lo minanda odo w’onto*+ kana pami kakɔsha alɔmi,+ 5 kana pami kasakanya ditongami+ diele elui elui dia mindo kana ɔnɛ lasakanya onto lele mindo l’ɔtɛ w’ɔkɔkɔ ɔmɔtshi wakoka mbeetɛ mindo.+ 6 Onto* lasakanya diangɔ sɔ ayonga mindo polo la dikɔlɔ ndo nde hakoke ndɛ ɛngɔ k’ekila tshɛ, koko nde pombaka mbɔka.+ 7 Lam’ayodja wonya, nde ayonga pudipudi ndo oma laasɔ mbakokande ndjɔlɛ yema ya diangɔ di’ekila, nɛ dia ɔsɔ ekɔ mbo ya ndɛ yande.+ 8 Ndo nto, nde hahombe ndɛ ndooko nyama k’osena kana kakadiakema oma le nyama ka ngala dia nde ndjadja mindo la tɔ.+ Dimi kele Jehowa.

9 “‘Vɔ pombaka nkotsha ɔkɛndɛ awɔ la ntondo kami diaha vɔ mɛmba onongo wa pɛkato l’ɔtɛ wa dikambo sɔ ko vɔ ndjovɔ, nɛ dia wambosuwola ekila ka diangɔ di’ekila. Dimi kele Jehowa lawaetɛ ekila.

10 “‘Ndooko onto lele bu la lotshungɔ* lakoka ndɛ ɛngɔ k’ekila.+ Oyadi ɔngɛndangɛnda wele laka ɔlɔmbɛdi kana ose olimu hakoke ndɛ ɛngɔ k’ekila. 11 Ko naka ɔlɔmbɛdi ambosomba onto* ɔmɔtshi la falanga yande, onto ɔsɔ kokaka kilɛ. Ndo mfumbe yotwe lo luudu lande mbeyaka ndɛ ɛngɔ kɛsɔ.+ 12 Naka ɔna ɔlɔmbɛdi la womoto ambotshukama la pami kele bu ɔlɔmbɛdi,* nde hakoke ndɛ woshasha wa diangɔ di’ekila. 13 Naka ɔna ɔlɔmbɛdi la womoto aya wadi aki odo kana ambodiaka diwala ko nde bu ndooko la ɔna ndo ambokalola lo luudu la she oko wakinde lo nshi ya dikɛnda, nde mbeyaka ndɛ yema ya diangɔ dialɛ she.+ Koko ndooko onto lele bu la lotshungɔ* lakoka dilɛ.

14 “‘Naka onto ɔmɔtshi ambɔlɛ ɛngɔ k’ekila aha la mbeya, nde pombaka nkimɔ woshasha le ɔlɔmbɛdi+ ndo nkotsha k’atanu ɔtɔi k’oshinga w’ɛngɔ kakɔ. 15 Ɔnkɔnɛ, vɔ hawohombe nsuwola ekila ka diangɔ di’ekila di’ase Isariyɛlɛ diakimɔwɔ le Jehowa,+ 16 ko vɔ ndjoyanga dilanya l’ɔtɛ w’onongo wele la wɔ, nɛ dia wambɔlɛ diangɔ diawɔ di’ekila. Dimi kele Jehowa lawaetɛ ekila.’”

17 Jehowa akatetemala mbutɛ Mɔsɛ ate: 18 “Sawola l’Arɔna nde l’anande w’apami l’ase Isariyɛlɛ tshɛ kele tɛwɔ wate: ‘Naka ose Isariyɛlɛ kana ɔngɛndangɛnda wodjashi l’Isariyɛlɛ ambela olambo wa lotshumba+ wakandatshike dɔkɔlɔkɔ kana wamondokimɔ oko woshasha wa la lolango+ le Jehowa, 19 nde pombaka mbela nyama k’omi+ kaha la ɛkɔmɔ oma lo dongalonga diande, ɔsɔngɔ w’ɔkɔkɔ kana wa mbudi dia nde mbetawɔma. 20 Hanyohombe mbela ɛngɔ kele la ɛkɔmɔ,+ nɛ dia tɔ hatokimanyiya dia nyu mbetawɔma.

21 “‘Naka onto ɔmɔtshi ambela olambo w’osanga+ le Jehowa dia nkotsha dɔkɔlɔkɔ diakandatshike kana oko woshasha wa la lolango, nde pombaka mbela nyama kaha la ɛkɔmɔ oma lo dongalonga diande, mbuta ate ngɔmbɛ, mbudi kana ɔkɔkɔ dia nde mbetawɔma. Nde hahombe mbela kɛnɛ kele la ɛkɔmɔ. 22 Ndooko nyama k’olambo kahomba monga tshungu, kakɔkɔ lokolo, kele la mpota, kele la edada, kele la lokoko kana kele la longudi. Hanyohombe mbela diangɔ dia ngasɔ le Jehowa kana nambola Jehowa olambo wa ngasɔ lo elambwelo. 23 Wɛ mbeyaka mbela ngɔmbɛ kana ɔkɔkɔ wele lokolo lɔmɔtshi otale efula kana mondo efula oko woshasha wa la lolango. Koko naka wɛ ambokimɔ nyama kakɔ dia nkotsha dɔkɔlɔkɔ, tɔ hatetawɔma. 24 Hanyohombe mbela Jehowa nyama kele la tokundju tambolana kana tambominɔ kana tambɔtɛtɛ kana nyama kambowonya tokundju ndo hanyohombe nambola nyama ya ngasɔ lo wodja anyu. 25 Ndo hanyohombe nambola nyama ya ngasɔ tshɛ y’oma le ɔngɛndangɛnda oko mapa walambolanyu Nzambi kanyu, nɛ dia yɔ yekɔ mindo ndo yekɔ la dikɔmɔ. Yɔ hayotetawɔma dikambo dianyu.’”

26 Jehowa akatɛ Mɔsɛ nto ate: 27 “Naka ngɔmbɛ k’omi kana ɔkɔkɔ w’omi kana wombe a mbudi ambotɔ, tɔ kayotshikala kaamɛ la nyangɛtɔ polo lushi la 7.+ Koko oma lo lushi la 8, tɔ koka mbetawɔma oko olambo watshumbama lo dja dikambo dia Jehowa. 28 Tanyodiakake onyango wa ngɔmbɛ kana w’ɔkɔkɔ kaamɛ la yana yawɔ lushi lakɔ 1.+

29 “Naka nyambolambola Jehowa+ olambo wa eokelo ka losaka, nyu pombaka mbolambola dia nyu mbetawɔma. 30 Vɔ pombaka ndɛma lushi lakɔ. Hanyohombe mbetɛ yema polo la pindju.+ Dimi kele Jehowa.

31 “Nyu pombaka nkitanyiya wadjango ami ndo mbayela.+ Dimi kele Jehowa. 32 Hanyohombe nsuwola ekila ka lokombo lami l’ekila+ ndo dimi pombaka kidiama l’atei w’ase Isariyɛlɛ.+ Dimi kele Jehowa lanyetɛ ekila,+ 33 ɔnɛ lakanyotondja oma lo wodja w’Edjibito dia dimi monga Nzambi kanyu.+ Dimi kele Jehowa.”

23 Jehowa akatetemala mbutɛ Mɔsɛ ate: 2 “Sawola l’ase Isariyɛlɛ kele tɛwɔ wate: ‘Fɛtɛ ya Jehowa ya lo eleko l’eleko+ mbahombanyu mbidaka ombeka+ dia mbewoya oko nsanganya y’ekila. Fɛtɛ yami ya lo eleko l’eleko yɔ nyɛ:

3 “‘Nyu mbeyaka nkamba elimu l’edja ka nshi 6, koko lushi la 7 lekɔ sabato, lushi la laande la momuya,+ losanganya l’ekila. Tanyokambake ndooko olimu. Ɔsɔ ayonga sabato dikambo dia Jehowa lo ahole tshɛ wadjasɛnyu.+

4 “‘Fɛtɛ ya Jehowa ya lo eleko l’eleko, mbuta ate nsanganya y’ekila yahombanyu mbidaka ombeka dia mbewoya lo tena diakashikikɛma dikambo diayɔ yɔ nyɛ: 5 Ngɔndɔ ka ntondo nshi 14,+ la dikɔlɔ dia tosho ta shimba* ekɔ fɛtɛ k’Elekanelo+ dikambo dia Jehowa.

6 “‘Ngɔndɔ kakɔ nshi 15 ekɔ Fɛtɛ ka mapa waha la wodoya dikambo dia Jehowa.+ Nyayɔlɛka mapa waha la wodoya+ l’edja ka nshi 7. 7 Lushi la ntondo, nyayosalaka losanganya l’ekila.+ Hanyohombe nkamba ndooko olimu wa wolo. 8 Koko l’edja ka nshi 7, nyu pombaka nambolaka Jehowa olambo wa lotshumba lo dja. Lushi la 7 layongaka losanganya l’ekila. Hanyohombe nkamba ndooko olimu wa wolo.’”

9 Jehowa akatetemala mbutɛ Mɔsɛ ate: 10 “Sawola l’ase Isariyɛlɛ kele tɛwɔ wate: ‘Lam’ayonyokoma lo wodja watamanyɔtɔlɛ ndo lam’ayonyotona diangɔ lo dikambɔ dianyu, kanyelake ndo ekanda k’oma lo ɛlɔnga+ wa dinela dianyu le ɔlɔmbɛdi.+ 11 Nde ayetshetshaka ekanda kakɔ lɛnɛ la lɛnɛ la ntondo ka Jehowa dia nyu mbetawɔma. Ɔlɔmbɛdi pombaka kietshetsha la wedi a pindju wa lushi la Sabato. 12 Lushi layetshetshamaka ekanda kakɔ mbahombanyu nambolaka Jehowa ɔsɔngɔ w’ɔkɔkɔ w’omi waha la ɛkɔmɔ wele la ɔnɔnyi 1 oko olambo wa lotshumba. 13 Olambo awɔ wa ntɔngɔ wayonga tenyi pende dia dikumi dia efa* w’ofushi wa dimɛna wɔsɔhanyemi la esɔ oko olambo watshumbama lo dja dikambo dia Jehowa wele l’opumu wa dimɛna.* Olambo awɔ wa lotɛ pombaka monga k’anɛi ɔtɔi ka hina* ka wanu. 14 Tɔlɛke ndooko mapa kana lɔtɔngɔ la lofumba kana lɔtɔngɔ l’oyoyo polo lushi lɔsɔ, polo lam’ayonyela olambo wa Nzambi kanyu. Ɔsɔ ekɔ didjango dia pondjo lo nɔnga yanyu tshɛ lo ahole tshɛ wadjasɛnyu.

15 “‘Nyu pombaka mbadia sabato 7 l’ɔkɔngɔ wa lushi la Sabato, ntatɛ oma ko lushi layonyela ekanda k’olambo wa letshetsha.+ Yɔ pombaka monga mingu y’etondo. 16 Kanyadiake nshi 50,+ mbuta ate polo lushi 1 l’ɔkɔngɔ wa Sabato ka 7, oma laasɔ ko nyu ndjeela olambo okina wa ntɔngɔ le Jehowa.+ 17 Kanyelake mapa 2 oko olambo wa letshetsha oma lo ahole wadjasɛnyu. Vɔ pombaka salema la tenyi pende dia dikumi dia efa* w’ofushi wa dimɛna. Vɔ pombaka salema la wodoya+ oko ɔlɔnga le Jehowa.+ 18 Kanyela kaamɛ la mapa ɛsɔ, ɛsɔngɔ 7 w’ɛkɔkɔ wa waomi waha la ɛkɔmɔ wele la ɔnɔnyi ɔtɔi ɔtɔi, ɔsɔngɔ 1 wa ngɔmbɛ k’omi ndo ɛkɔkɔ 2 wa waomi.+ Nyayokamba la wɔ dia nambola Jehowa olambo wa lotshumba kaamɛ la olambo wa ntɔngɔ wɔtɔnɛ la wɔ la elambo wa lotɛ oko olambo watshumbama lo dja wele l’opumu wa dimɛna* le Jehowa. 19 Nyu pombaka nambola ɔsɔngɔ 1 wa mbudi oko olambo wa pɛkato+ ndo ɛkɔkɔ 2 wele la ɔnɔnyi ɔtɔi ɔtɔi oko olambo w’osanga.+ 20 Ɔlɔmbɛdi ayetshetsha diangɔ sɔ lɛnɛ la lɛnɛ kaamɛ la mapa w’ɔlɔnga oko olambo wa letshetsha la ntondo ka Jehowa, kaamɛ l’ɛsɔngɔ 2 w’ɛkɔkɔ wa waomi. Vɔ wayonga oko ɛngɔ k’ekila dikambo dia Jehowa lo wahɔ w’ɔlɔmbɛdi.+ 21 Lushi lɔsɔ kanyodake ombeka+ dia mbewoya losanganya l’ekila. Hanyohombe nkamba ndooko olimu wa wolo. Ɔsɔ ekɔ didjango dia pondjo lo ahole tshɛ wadjasɛnyu lo nɔnga yanyu tshɛ.

22 “‘Lam’ayonyonaka diangɔ di’oma lo dikambɔ dianyu, tanyonake atshuku tshɛ wa lo dikambɔ dianyu ndo tanyɔtɔngɔnake kɛnɛ tshɛ katshikala lo dinela.+ Kanyokitshikɛke ose wola*+ kana ɔngɛndangɛnda.+ Dimi kele Jehowa Nzambi kanyu.’”

23 Jehowa akatɛ Mɔsɛ ate: 24 “Tɛ ase Isariyɛlɛ wate: ‘Ngɔndɔ ka 7 lushi 1, nyu pombaka momuya tshɛ lo tshɛ. Ɔsɔ ekɔ lushi la eohwelo layodamaka dimama,+ mbuta ate losanganya l’ekila. 25 Hanyohombe nkamba ndooko olimu wa wolo ndo kanyolambolake Jehowa olambo watshumbama lo dja.’”

26 Jehowa akatɛ Mɔsɛ nto ate: 27 “Koko ngɔndɔ kakɔ ka 7 nshi 10 ekɔ Lushi l’Ekombelo ka pɛkato.+ Nyu pombaka nsala losanganya l’ekila ndo nyu pombaka ndjasoya*+ ndo nambola Jehowa olambo watshumbama lo dja. 28 Hanyohombe nkamba ndooko olimu lushi la laande lɔsɔ, nɛ dia lɔ lekɔ lushi l’ekombelo ka pɛkato dia nkomba pɛkato+ yanyu la ntondo ka Jehowa Nzambi kanyu. 29 Onto* tshɛ lahatoyasoya* lushi lɔsɔ pombaka ndjakema.+ 30 Dimi layodiaka onto* tshɛ la l’atei anyu layokamba woho tshɛ w’olimu lushi lɔsɔ. 31 Hanyohombe nkamba ndooko olimu. Ɔsɔ ekɔ didjango dia pondjo lo nɔnga yanyu tshɛ lo ahole tshɛ wadjasɛnyu. 32 Ɔsɔ ekɔ sabato, lushi la laande la momuya le nyu ndo ngɔndɔ kakɔ nshi 9 la dikɔlɔ, nyayoyasoyaka.*+ Nyu pombaka kitanyiyaka sabato yanyu oma ko dikɔlɔ polo dikɔlɔ dikina.”

33 Jehowa akatetemala mbutɛ Mɔsɛ ate: 34 “Tɛ ase Isariyɛlɛ wate: ‘Ngɔndɔ ka 7 nshi 15 ekɔ Fɛtɛ ka Totombotombo* l’edja ka nshi 7 dikambo dia Jehowa.+ 35 Lushi la ntondo ayongaka losanganya l’ekila ndo hanyohombe nkamba ndooko olimu wa wolo. 36 Kanyolambolake Jehowa olambo watshumbama lo dja l’edja ka nshi 7. Lushi la 8, kanyosalake losanganya l’ekila+ ndo kanyelake olambo watshumbama lo dja dikambo dia Jehowa. Ɔsɔ ekɔ losanganya la laande. Hanyohombe nkamba ndooko olimu wa wolo.

37 “‘Ɔsɔ kele fɛtɛ ya Jehowa ya lo eleko l’eleko+ yahombanyu mbidaka ombeka dia mbewoya oko nsanganya y’ekila+ dia mbelaka Jehowa olambo watshumbama lo dja: Olambo wa lotshumba,+ olambo wa ntɔngɔ+ ndo olambo wa lotɛ+ lo ndjela ekongelo ka lushi la lushi. 38 Nyayokimɔka diangɔ sɔ laadiko dia kɛnɛ kakimɔnyu lo sabato ya Jehowa,+ weshasha anyu,+ weshasha wakanyatshike alɔkɔlɔkɔ+ ndo weshasha wa la lolango+ wahombanyu mbisha Jehowa. 39 Koko ngɔndɔ ka 7 nshi 15, lam’ombanyu diangɔ dia lo dikambɔ dianyu, kanyosalake fɛtɛ dikambo dia Jehowa l’edja ka nshi 7.+ Lushi la ntondo, nyayomuyaka tshɛ lo tshɛ ndo lushi la 8, nyayomuyaka tshɛ lo tshɛ.+ 40 Lushi la ntondo, nyayɔsaka elowa w’oma l’esongo woleki amɛna, waanga w’atoko,+ avundja w’esongo wele l’akatshi efula ndo w’esongo w’eduwola wa l’okidi, ko nyayɔngɛnangɛnaka+ la ntondo ka Jehowa Nzambi kanyu l’edja ka nshi 7.+ 41 Nyayokisalaka oko fɛtɛ dikambo dia Jehowa nshi 7 lo ɔnɔnyi.+ Kanyokisalake lo ngɔndɔ ka 7 ndo ɔsɔ ekɔ didjango dia pondjo lo nɔnga yanyu tshɛ. 42 Nyu pombaka mbidjasɛka lo totombotombo l’edja ka nshi 7.+ Ase Isariyɛlɛ tshɛ pombaka mbidjasɛ lo totombotombo, 43 dia anto anyu wa lo nɔnga yayaye mbeya+ dia dimi lakadjashiya ase Isariyɛlɛ lo totombotombo lam’akamayawatondjaka oma lo wodja w’Edjibito.+ Dimi kele Jehowa Nzambi kanyu.’”

44 Ko Mɔsɛ akatɛ ase Isariyɛlɛ dikambo dia fɛtɛ yaki Jehowa ya lo eleko l’eleko.

24 Jehowa akatetemala mbutɛ Mɔsɛ ate: 2 “Djangɛ ase Isariyɛlɛ dia vɔ kelaka esɔ ka pudipudi k’ɔlivɛ wa lɔtɔ dia pɛtshaka atala, kele atala kawɔhɛtake wonya tshɛ.+ 3 Dikɔlɔ tshɛ, Arɔna kasalake dia atala ntetemala mpɛta la ntondo ka Jehowa polo la pindju, mbɛlanɛ la dihɔndɔ di’okombɔ diele suke l’ɔshɛtɛ w’Ɔmɛnyi, l’etei ka luudu la dipɛma l’esanganelo. Ɔsɔ ekɔ didjango dia pondjo lo nɔnga yanyu tshɛ. 4 Nde kasale dia atala akɔ mongaka wonya tshɛ l’ɔnɔngɔ laadiko di’ekundji ka tala+ kakasalema la paonyi ka pudipudi la ntondo ka Jehowa.

5 “Kɔshi ofushi wa dimɛna ko wɛ nsala mapa 12 w’ebolonga. Mapa la mapa pombaka salema la tenyi pende dia dikumi dia efa* w’ofushi. 6 Kowalɔngɛ ɛnɔngɔ 2, mapa 6 lo ɔnɔngɔ l’ɔnɔngɔ,+ laadiko dia mɛsa wakasalema la paonyi ka pudipudi wele la ntondo ka Jehowa.+ 7 Kodje tshɔ ya wɛma ya pudipudi lo ɔnɔngɔ l’ɔnɔngɔ ndo yɔ yayonga oko didjidji di’olambo w’otondo+ wa mapa, olambo watshumbama lo dja dikambo dia Jehowa. 8 Lushi la Sabato tshɛ, nde ayohombaka mbalɔnga la ntondo ka Jehowa.+ Ɔsɔ ekɔ sheke ya pondjo yamomodja l’ase Isariyɛlɛ. 9 Vɔ wayoyala wa Arɔna nde l’anande w’apami+ ndo vɔ wayowɔlɛka lo dihole di’ekila,+ nɛ dia ɔsɔ ekɔ ɛngɔ koleki ekila le ɔlɔmbɛdi oma lo elambo watshumbama lo dja dikambo dia Jehowa. Ɔsɔ ekɔ didjango dia pondjo.”

10 L’atei w’ase Isariyɛlɛ mbaki ɔna ɔmɔtshi laki womoto ɔmɔtshi l’ose Isariyɛlɛ, koko she aki ose Edjibito.+ Nde akalɔ la ose Isariyɛlɛ ɔmɔtshi lo mpango. 11 Ɔnaki womoto l’ose Isariyɛlɛ akɔ akatatɛ nkamba la lokombo* laki Nzambi lo yoho ya kɔlɔ ndo akalidje mananu.*+ Ko wakɔɔtɔlɛ le Mɔsɛ.+ Lokombo la nyango laki Shelomita, ɔna Dibiri la womoto la lo dioho dia Danɛ. 12 Ko wakawodje lo lokanu polo lam’akawaɛnya Jehowa kɛnɛ kakawahombe nsala.+

13 Ko Jehowa akatɛ Mɔsɛ ate: 14 “Nyotondja ɔnɛ lakadje mananu l’andja wa mpango. Anto tshɛ wakoke lam’akandatɛkɛtaka pombaka mbahɛ anya awɔ l’ɔtɛ ande, ko oma laasɔ olui w’otondo w’ase Isariyɛlɛ mbooka ave.+ 15 Kote ase Isariyɛlɛ wate: ‘Naka onto ambodja Nzambi kande mananu, nde ayolongola dilanya l’ɔtɛ wa pɛkato kande. 16 Ɔnkɔnɛ onto lakamba la lokombo la Jehowa lo yoho ya kɔlɔ pombaka ndjakema ndooko onyake.+ Olui w’otondo w’ase Isariyɛlɛ pombaka mbooka ave ndooko onyake. Ɔngɛndangɛnda pombaka ndjakema woho wadiakema ose Isariyɛlɛ lakamba la lokombo laki Nzambi lo yoho ya kɔlɔ.

17 “‘Naka onto ɔmɔtshi ambodiaka onto,* nde pombaka ndjakema ndooko onyake.+ 18 Naka onto ambɔkɔmɔla elongalonga kɛmɔtshi ko ambokidiaka,* nde pombaka kifuta, lɔsɛnɔ lo lɔsɛnɔ.* 19 Naka onto ambohomuya wonyande onto, kete vɔ pombaka mbosalɛ kɛnɛ kambondosala.+ 20 Wɔkwɛlɔ lo wɔkwɛlɔ, sso lo sso, nnu lo nnu. Woho wohomuyishande onto mbahombawɔ mbohomuya.+ 21 Naka onto ambɔkɔmɔla elongalonga kɛmɔtshi ko ambokidiaka, nde pombaka kifuta.+ Ko naka onto ambɔkɔmɔla onto ɔmɔtshi ko amboodiaka, nde pombaka ndjakema.+

22 “‘Yɛdikɔ yakɔ 1 mbayokambaka la nyu oyadi le ɔngɛndangɛnda kana le ose Isariyɛlɛ,+ nɛ dia dimi kele Jehowa Nzambi kanyu.’”

23 Oma laasɔ, Mɔsɛ akatɛ ase Isariyɛlɛ, ko vɔ wakatondja ɔnɛ lakadje mananu l’andja wa mpango ko wakawoke ave.+ Ɔnkɔnɛ, ase Isariyɛlɛ wakasale oko wakadjangɛ Jehowa Mɔsɛ.

25 Jehowa akatɛ Mɔsɛ nto lo Dikona dia Sinayi ate: 2 “Sawola l’ase Isariyɛlɛ kele tɛwɔ wate: ‘Lam’ayonyokoma lo wodja wayangami nyosha,+ ekambɔ kayongaka la sabato dikambo dia Jehowa.+ 3 Konɛke woho l’ekambɔ kayɛ l’edja k’ɛnɔnyi 6 ndo kokandjolake ekambɔ kayɛ ka vinyɔ l’edja k’ɛnɔnyi 6, ko wɛ ayonaka diangɔ di’oma lɔkɔ.+ 4 Koko ɔnɔnyi wa 7 wayongaka sabato, ɔnɔnyi wa laande wayomuyaka ekambɔ, mbuta ate sabato dikambo dia Jehowa. Tonɛke ndooko woho l’ekambɔ kayɛ ndo tokandjolake ekambɔ kayɛ ka vinyɔ. 5 Tonake kɛnɛ katomba oma lo ntɔngɔ yakakɔ lo dinela ndo tombake elowa w’oma lo ekambɔ kayɛ ka vinyɔ kakiyɛ kokandjola. Ɔsɔ ayonga ɔnɔnyi wayomuyaka ekambɔ kayɛ tshɛ lo tshɛ. 6 Koko nyu mbeyaka ndɛ diangɔ diatomba dɔamɛ l’ekambɔ l’ɔnɔnyi wa sabato, wɛ la mfumbe kayɛ ka pami la mfumbe kayɛ ka womoto, ose olimu ayɛ ndo ɔngɛndangɛnda wodjashi kaamɛ la yɛ mbeyaka dilɛ, 7 kaamɛ ndo dongalonga diayɛ la nyama ya l’okonda yele lo wodja ayɛ. Nyu mbeyaka ndɛ ɛngɔ tshɛ kayotomba tɔamɛ oma lo nkɛtɛ.

8 “‘Wɛ ayadia sabato 7 y’ɛnɔnyi, mbuta ate ɛnɔnyi 7 ndodia lo 7. Nshi ya sabato 7 y’ɛnɔnyi yayonga tshɛ tshɛ ɛnɔnyi 49. 9 Oma laasɔ, lo ngɔndɔ ka 7 nshi 10, Lushi l’Ekombelo ka pɛkato,+ kode dimama la wolo. Kanyosale dia londjo la dimama diakɔ mbokɛma lo wodja anyu w’otondo. 10 Kanyokidia ɔnɔnyi wa 50 ndo kanyewoya etshungwelo le anto tshɛ wa lo wodja.+ Ɔsɔ ayonga Ɔnɔnyi w’ɔngɛnɔngɛnɔ le nyu ndo onto tshɛ l’atei anyu ayokalola l’ɛtshi kande ka nkɛtɛ ndo onto tshɛ l’atei anyu ayokalola lo nkumbo kande.+ 11 Ɔnɔnyi wa 50 ɔsɔ wayonga Ɔnɔnyi w’ɔngɛnɔngɛnɔ le nyu. Nyu hanyotonɛ diangɔ ndo hanyotona diangɔ diatomba dɔamɛ oma lo ntɔngɔ yakɔkɔ kana mimba elowa wa vinyɔ w’oma lo dikambɔ diakinyu kokandjola.+ 12 Nɛ dia ɔsɔ ekɔ Ɔnɔnyi w’ɔngɛnɔngɛnɔ. Vɔ pombaka monga ekila le nyu. Nyayɔlɛka paka diangɔ diatondja nkɛtɛ yɔamɛ.+

13 “‘Lo Ɔnɔnyi w’ɔngɛnɔngɛnɔ ɔsɔ, onto tshɛ l’atei anyu ayokalolaka otsha l’ɛtshi kande ka nkɛtɛ.+ 14 Naka wɛ ambosondja osekayɛ ɛngɔ kɛmɔtshi kana naka wɛ ambosomba ɛngɔ kɛmɔtshi oma le nde, tanyokesanake.+ 15 Lam’ayoyosombaka ekambɔ oma le osekayɛ, kadiake lofulo l’ɛnɔnyi wambeta l’ɔkɔngɔ w’Ɔnɔnyi w’ɔngɛnɔngɛnɔ ndo nde pombaka kosondja lo ndjela ɛnɔnyi wa dinela wambotshikala.+ 16 Naka ɛnɔnyi efula weke la ntondo, kete nde koka mbidiya oshinga ndo naka ambotshikala ɛnɔnyi engana eto, kete nde pombaka mpoloya oshinga, nɛ dia lofulo l’ɛnɔnyi wa dinela kakosondjande. 17 Ndooko onto l’atei anyu lahomba nkesa osekande+ ndo wɛ pombaka mboka Nzambi kayɛ wɔma,+ nɛ dia dimi kele Jehowa Nzambi kanyu.+ 18 Nyayodjasɛ lo lotui tshitshi lo wodja+ akɔ naka nyu nkitanyiya wadjango ami ndo naka nyu ndjela tɛdikɔ tami. 19 Nkɛtɛ yayɔngɔnyaka diangɔ+ ko nyayɔlɛka, nyayolotaka ndo nyayodjasɛka lo lotui tshitshi.+

20 “‘Ko naka nyu mbuta nyate: “Kakɔna kayotɔlɛ ɔnɔnyi wa 7 naka hatotonɛ ndo hatotona?”+ 21 Dimi layonyɔtshɔkɔla ɔnɔnyi wa 6 ndo nkɛtɛ yayɔngɔnya diangɔ diakokanyu ndɛ l’edja k’ɛnɔnyi 3.+ 22 Ko nyu nyayoyonɛ ɔnɔnyi wa 8 ndo nyayɔlɛka diangɔ diakanyombe polo lo ɔnɔnyi wa 9. Polo lam’ayonyona diangɔ diakɔ, nyayɔlɛka diangɔ di’edjedja diakanyombe.

23 “‘Nkɛtɛ hayohombe sondjama lo pondjo,+ nɛ dia nkɛtɛ yekɔ yami.+ Le mi, nyu nyekɔ angɛndangɛnda ndo ambetshi a mboka.+ 24 Lo wodja wayonyotodjasɛ lɔkɔ, onto lasondja ɛtshi kande ka nkɛtɛ pombaka monga la lotshungɔ la kitshungola.

25 “‘Naka ɔnanyɔ aya ose wola ko nde ambosondja ɛtshi kande ka nkɛtɛ, otshungodi lele owotɔ ande wa suke pombaka ndjotshungola kɛnɛ kakasondja ɔnango.+ 26 Naka onto bu la otshungodi ko nde amboyɔngɔna ndo aya la akoka wa nde kitshungola, 27 nde pombaka nkamba akumi w’oshinga atɔ lo ndjela ɛnɔnyi ntatɛ oma ko etena kakandakisondja, ko nde nkaloya ɔnɛ lakakisombe falanga yatshikala. Oma laasɔ mbakokande ndjokalola l’ɛtshi kande ka nkɛtɛ.+

28 “‘Ko naka nde bu la akoka wa kitshungola oma le nde, kɛnɛ kakandasondja kayotshikala le ɔnɛ lakakisombe polo lo Ɔnɔnyi w’ɔngɛnɔngɛnɔ.+ Tɔ kayoyonga kande lo Ɔnɔnyi w’ɔngɛnɔngɛnɔ, ko nde ayoyokalola l’ɛtshi kande ka nkɛtɛ.+

29 “‘Naka onto ambosondja luudu lele l’osomba wodingami lokombo, nde ayotetemala monga la lotshungɔ la litshungola polo lam’ayokoka ɔnɔnyi ntatɛ oma ko etena kakandalisondja. Nde ayonga la lotshungɔ la litshungola+ l’edja k’ɔnɔnyi w’otondo. 30 Ko naka nde halitshungodi l’ekomelo k’ɔnɔnyi w’otondo, kete luudu lakɔ lele l’osomba wodingami lokombo layonga laki osombi pondjo pondjo lo nɔnga yande tshɛ. Lɔ halototshungɔma lo Ɔnɔnyi w’ɔngɛnɔngɛnɔ. 31 Koko luudu lele lo ngelo kahadingami lokombo layɔsama oko ɛtshi ka nkɛtɛ ka lo wodja. Onto ayotetemala monga la lotshungɔ la litshungola ndo lɔ pombaka tshungɔma lo Ɔnɔnyi w’ɔngɛnɔngɛnɔ.

32 “‘Lo kɛnɛ kendana la mvudu y’ase Lɛwi yele lo esomba awɔ,+ ase Lɛwi wayongaka pondjo pondjo la lotshungɔ la ndjitshungola. 33 Naka ase Lɛwi hawotshungodi luudu lakasondjama lo osomba awɔ, lɔ layotshungɔ lo Ɔnɔnyi w’ɔngɛnɔngɛnɔ,+ nɛ dia mvudu ya lo esomba w’ase Lɛwi yekɔ yawɔ l’atei w’ase Isariyɛlɛ.+ 34 Ndo nto, ɛtshi ka nkɛtɛ ka ndesha nyama+ kodingi esomba awɔ hakoke sondjama, nɛ dia tɔ kekɔ kakiwɔ pondjo.

35 “‘Naka ɔnanyɔ lodjashi suke la yɛ aya ose wola ndo hayokoka ndjasɛnya, wɛ pombaka mbokimanyiya+ woho wotoyokimanyiya ɔngɛndangɛnda kana ombetshi a mboka dia nde ntshikala la lɔsɛnɔ l’atei anyu.+ 36 Toyangake dia nkondja wahɔ oma le nde.+ Wɛ pombaka mboka Nzambi kayɛ+ wɔma ndo ɔnanyɔ pombaka ntshikala la lɔsɛnɔ l’atei anyu. 37 Tɔɔsɔndjake falanga yayɛ la wahɔ+ ndo towoshake mbo ya ndɛ yayɛ dia ndjokondja wahɔ. 38 Dimi kele Jehowa Nzambi kanyu lakanyotondja oma lo wodja w’Edjibito+ dia nyosha wodja wa Kanana dia dimi monga Nzambi kanyu.+

39 “‘Naka ɔnanyɔ lodjashi suke la yɛ aya ose wola ndo nde amboyasondja le yɛ,+ tookandjake elimu la wolo oko mfumbe.+ 40 Wɛ pombaka mbosalɛ akambo oko ose olimu,+ oko ombetshi a mboka. Nde pombaka kokambɛ polo lo Ɔnɔnyi w’ɔngɛnɔngɛnɔ. 41 Ko nde ayoyotshungɔ nde l’anande* ndo ayokalola lo nkumbo kande. Nde pombaka nkalola l’ɛtshi ka nkɛtɛ ka watshɛnde.+ 42 Dikambo vɔ wekɔ ekambi ami wakamatondja oma lo wodja w’Edjibito.+ Vɔ hawohombe ndjasondja oko mfumbe. 43 Towɔhɛnyahɛnyake+ ndo wɛ pombaka mboka Nzambi kayɛ wɔma.+ 44 Kanyɔsake mfumbe ka pami kana ka womoto oma lo wedja wosukanyi la nyu. Oma lo wedja ɛsɔ mbakokanyu nsomba mfumbe ka pami kana ka womoto. 45 Ndo nto, oma le ana w’angɛndangɛnda wodjashi l’atei anyu+ ndo oma le nkumbo yawɔ yakayotɔka lo wodja anyu mbakokanyu nsomba mfumbe. Vɔ wayonga mfumbe yanyu. 46 Nyu koka mbatshikɛ ananyu oko okitɔ wa pondjo. Nyu koka nkamba la wɔ oko ase olimu, koko hanyohombe mpɛnyahɛnya anangɛnyu w’ase Isariyɛlɛ.+

47 “‘Ko naka ɔngɛndangɛnda kana ombetshi a mboka wele l’atei anyu ambɔngɔna ko ɔnanyɔ, ose Isariyɛlɛ aya ose wola ndo ohomba ndjasondja le ɔngɛndangɛnda kana le ombetshi a mboka wodjashi l’atei anyu kana le ose nkumbo kaki ɔngɛndangɛnda akɔ, 48 nde ayotetemala monga la lotshungɔ la tshungɔma l’ɔkɔngɔ wa nde ndjasondja. Ɔnango ɔmɔtshi kokaka mbotshungola,+ 49 kana ɔnango she kana ɔna ɔnango she kokaka mbotshungola kana owotɔ wa suke suke* wa lo nkumbo kande kokaka mbotshungola.

“‘Ko naka ndamɛ ambɔngɔna, nde kokaka ndjatshungola.+ 50 Nde pombaka nkamba akumi l’onto lakoosombe ntatɛ lo ɔnɔnyi wakandayasondja polo lo Ɔnɔnyi w’ɔngɛnɔngɛnɔ.+ Falanga yakandasombama pombaka mbɛdima la lofulo l’ɛnɔnyi.+ L’etena kɛsɔ, nde ayowokambɛka oko ose olimu.+ 51 Naka eke ɛnɔnyi efula la ntondo k’Ɔnɔnyi w’ɔngɛnɔngɛnɔ, kete nde pombaka mfuta oshinga w’etshungwelo kande lo ndjela yɛdikɔ y’ɛnɔnyi wambotshikala. 52 Ko naka ɛnɔnyi engana eto kambotshikala la ntondo k’Ɔnɔnyi w’ɔngɛnɔngɛnɔ, kete ndamɛ pombaka nkamba akumi ko nde mfuta oshinga w’etshungwelo kande lo ndjela yɛdikɔ y’ɛnɔnyi wambotshikala. 53 Nde pombaka ntetemala mbokambɛ ɔnɔnyi l’ɔnɔnyi oko ose olimu ndo wɛ pombaka menda diaha nde mbɔhɛnyahɛnya.+ 54 Koko naka nde bu la akoka wa ndjatshungola lo ndjela awui asɔ, kete nde l’anande* wayoyotshungɔ paka lo Ɔnɔnyi w’ɔngɛnɔngɛnɔ.+

55 “‘Nɛ dia ase Isariyɛlɛ wekɔ ekambi ami. Vɔ wekɔ ekambi ami wakamatondja oma lo wodja w’Edjibito.+ Dimi kele Jehowa Nzambi kanyu.

26 “‘Tanyoyasalɛke tozambizambi t’anyanya,+ tanyoyasalɛke ekishi+ kana kimɛta ka l’ave ndo tanyoyakitshɛke dive diele la efanelo+ k’ɛngɔ kɛmɔtshi lo wodja anyu dia nyu dikusamɛ.+ Nɛ dia dimi kele Jehowa Nzambi kanyu. 2 Kanyɔlɛmiyake sabato yami ndo kanyongake la wɔma wɔsɔhanyemi la dilɛmiɛlɔ dikambo dia tɛmpɛlɔ kami k’ekila. Dimi kele Jehowa.

3 “‘Naka nyu ntetemala ndjela ɛlɛmbɛ ami, nkitanyiya wadjango ami ndo nyu nkamba la wɔ,+ 4 kete dimi layonyɔlɔshɛ avula lo tena diahombama,+ ko nkɛtɛ yayɔngɔnya diangɔ+ ndo esongo wa lo wodja anyu wayɔtɔ elowa awɔ. 5 Eleko kanyu k’esuswelo kayotshɔ polo lo nshi ya dinela dianyu di’elowa ndo dinela di’elowa diayotshɔ polo lo eleko ka monɛ. Nyayɔlɛ diangɔ ko nyayolota ndo nyayodjasɛ lo lotui tshitshi lo wodja anyu.+ 6 Dimi layodja wɔladi lo wodja+ ndo nyayetama, ko ndooko onto layonyotsha wɔma.+ Dimi layonya nyama ya ngala oma lo wodja ndo ndooko onto layonyɔlɔsha la lokuwa la ta lo wodja anyu. 7 Aha la taamu, nyayotshanya atunyi anyu ndo nyayowadiaka la lokuwa la ta. 8 Anto 5 wa l’atei anyu wayotshanya anto 100 ndo anto 100 wa l’atei anyu wayotshanya anto nunu dikumi (10 000), ko nyayodiaka atunyi anyu la lokuwa la ta.+

9 “‘Dimi layonyohomuya lokolo l’ɔlɔ,* layonyosha diwutshi, layonyofudia+ ndo layolama sheke yakamadje la nyu.+ 10 Dimi layosala dia etena kaakanyale diangɔ dia ɔnɔnyi wetshi ko nyaya l’ohomba wa minya diangɔ di’edjedja ko mbidja diangɔ di’eyoyo. 11 Dimi* layokitsha tabɛrnaklɛ kami l’atei anyu+ ndo hantonyokasha. 12 Dimi layɔkɛndakɛnda l’atei anyu ndo layonga Nzambi kanyu,+ ko nyu lo wedi anyu, nyayonga anto ami.+ 13 Dimi kele Jehowa Nzambi kanyu lakanyotondja oma lo wodja w’Edjibito diaha nyu monga nto mfumbe yawɔ ndo dimi lakɔkɔla esembe anyu ndo lakanyɔkɛndjakɛndja ɛtɛ l’olongo.*

14 “‘Ko naka hanyompokamɛ kana hanyokitanyiya wadjango ami asɔ tshɛ,+ 15 naka nyambotona wadjango ami+ ndo naka nyu* nyambohetsha tɛdikɔ tami ta dombo diaha nyu nkitanyiya wadjango ami tshɛ, ko nyambɔnyɔla sheke yami,+ 16 kete dimi lo wedi ami layonyosalɛ akambo wayela anɛ: Layonyosha dilanya lo nyosoya la lɔkɔsu la lohondja ndo la demba dja dia wolo, ko washo anyu wayolana ndo nyayoshisha lɔsɛnɔ.* Nyayonɛka diangɔ wononɛ, nɛ dia atunyi anyu mbayodilɛka.+ 17 Dimi layonyoka ɔkɔngɔ, ko atunyi anyu wayonyɔlɛndja.+ Wanɛ wanyohetsha wayonyɔhɔtshahɔtsha+ ndo nyayolawɔ aha la onto nyotshanya.+

18 “‘Naka kaanga l’ɔtɛ w’awui asɔ hanyompokame, dimi layonyosha dilanya mbala 7 nto l’ɔtɛ wa pɛkato yanyu. 19 Dimi layoshidiya lotamanya lanyu l’efula ndo layetɛ olongo anyu oko lowolo+ ndo nkɛtɛ yanyu oko nkonga. 20 Nyayokamba la wolo anyu okambakamba, nɛ dia nkɛtɛ yanyu hayotɔngɔnya diangɔ+ ndo esongo wa lo wodja anyu hawotɔtɔ elowa.

21 “‘Ko naka nyambotetemala ndɔshana la mi ndo ntona dia mpokamɛmi, kete layonyɔkɔmɔla mbala nkina 7 lo ndjela pɛkato yanyu. 22 Layonyotomɛ nyama ya ngala,+ ko yɔ yayɔlɛ ananyu,+ yayomana dongalonga dianyu ndo yayokitshakitsha lofulo lanyu, ko toshinga tanyu tayotshikala hwe.+

23 “‘Naka kaanga l’ɔtɛ w’awui asɔ nyu hanyetawɔ engwelo kami+ ndo nyambotetemala ndɔshana la mi, 24 kete dimi lawɔ layɔlɔshana la nyu. Dimi layonyɔkɔmɔla tena 7 l’ɔtɛ wa pɛkato yanyu. 25 Dimi layonyɔsɔmbɔya la lokuwa la ta lo woho wamonyɔnyɔla sheke.+ Lam’ayonyotshumana l’esomba anyu,+ dimi layonyotomɛ elando, ko nyayokimɔma l’anya w’atunyi anyu.+ 26 Lam’ayomolanya ahole wombanyu mapa,*+ wamato 10 wayokatɛka mapa lo tshuka 1, ko wayonyɛdikɛka mapa lɛdikɛ+ ndo nyayɔlɛka, koko hanyotolota.+

27 “‘Ko naka kaanga l’ɔtɛ w’awui asɔ hanyompokame ndo nyambotshininala lo ndɔshana la mi, 28 kete dimi layoleka nyɔlɔsha+ ndo layonyosha dilanya mbala 7 l’ɔtɛ wa pɛkato yanyu. 29 Ko nyu nyayɔlɛ emunyi w’ananyu w’apami ndo w’ananyu wa wamato.+ 30 Dimi layotola ahole anyu w’ɔtɛmwɛlɔ,+ layohandjola dilambwelo dianyu dia tshɔ ndo edo anyu wayokalema laadiko dia edo wa dikishi dianyu dia nyɛtɛɛtɛ*+ ndo dimi* layonyoka ɔkɔngɔ oko ɛngɔ ka wɔnɔnyi.+ 31 Dimi layolanya esomba anyu+ ndo layetɛ ahole anyu w’ekila tɔngɔ to. Dimi hantombɛ opumu wa dimɛna* w’elambo anyu. 32 Dimi layetɛ wodja anyu tɔngɔ to+ ndo atunyi anyu wayodjasɛ lɔkɔ wayamba.+ 33 Dimi layonyodianganya lo wedja+ ndo layɔsɔmɔla lokuwa la ta dia nyotshanya,+ ko wodja anyu wayotshikala tɔngɔ to+ ndo esomba anyu wayolanyema.

34 “‘L’etena kɛsɔ, nkɛtɛ yayonga la sabato edja tshɛ kayoyotshikala tɔngɔ to lam’ayonyonga lo wodja w’atunyi anyu. L’etena kɛsɔ nkɛtɛ yayomuya,* yayonga la sabato yakayahandja.+ 35 Nshi tshɛ yayoyotshikala tɔngɔ to, yɔ yayomuya nɛ dia yɔ komomuya lo tena dia sabato yanyu lam’akanyadjasɛka lɔkɔ.

36 “‘Le wanɛ wayohandɔ,+ dimi layolodia etema awɔ la wɔma lo wedja w’atunyi awɔ ndo vɔ wayolawɔ londjo la dikatshi diayakɔ, ko vɔ wayolawɔ oko onto mbatawatshanya la lokuwa la ta ndo wayɔkɔ aha la onto mbatshanya.+ 37 Vɔ wayotakanyana onto la wonyande oko wanɛ watalawɔ lokuwa la ta kaanga mbele ndooko onto latawatshanya. Hanyotokoka nshika ekolo la ntondo k’atunyi anyu.+ 38 Nyayovɔ lo wedja+ ekina ndo wodja w’atunyi anyu wayonyoshila oshiki. 39 Atshikadi wa l’atei anyu wayɔhɔnda lo wedja w’atunyi anyu+ l’ɔtɛ wa kɔlɔ kanyu. Ɛɛ, vɔ wayɔhɔnda tshɛ l’ɔtɛ wa munga ya watshɛwɔ.+ 40 Ko vɔ wayoshola munga yawɔ+ ndo munga la ohedia wa washɛwɔ ndo wayosuya dia vɔ komonga la kɔlamelo lo woho wakawalɔshana la mi.+ 41 Ko dimi lawɔ layɔlɔshana la wɔ+ lo mbatɔla lo wodja w’atunyi awɔ.+

“‘Ondo oma laasɔ, etema awɔ wahatanya mpota* wayonga l’okitshakitsha,+ ko vɔ wayofutama l’ɔtɛ wa munga kawɔ. 42 Dimi layohɔ sheke yakamadje la Jakɔbɔ,+ sheke yakamadje la Isaka+ ndo layohɔ sheke yakamadje la Abrahama+ ndo layohɔ wodja. 43 Etena kayowotshika wodja, nkɛtɛ yayonga lo sabato+ ndo yayotshikala tɔngɔ to aha la wɔ, ko vɔ wayofutama l’ɔtɛ wa munga kawɔ, nɛ dia vɔ wakanya tɛdikɔ tami ta dombo yimba ndo vɔ* wakɔnyɔla wadjango ami.+ 44 Kaanga mbayowohomana l’akambo asɔ tshɛ lo wodja w’atunyi awɔ, dimi hambakashaki pondjo tshɛ lo tshɛ+ kana mbashila oshiki dia mɔnyɔla sheke yami+ yakamadje la wɔ. Nɛ dia dimi kele Jehowa Nzambi kawɔ. 45 Lo dikambo diawɔ, dimi layohɔ sheke yakamadje la watshɛwɔ+ wakamatondja oma lo wodja w’Edjibito lo washo wa wedja,+ dia dimi monga Nzambi kawɔ. Dimi kele Jehowa.’”

46 Ɔsɔ mbele awui, wadjango, tɛdikɔ ta dombo ndo ɛlɛmbɛ wa Jehowa wakandasha ase Isariyɛlɛ lo Dikona dia Sinayi lo tshimbo ya Mɔsɛ.+

27 Jehowa akatetemala mbutɛ Mɔsɛ ate: 2 “Sawola l’ase Isariyɛlɛ kele tɛwɔ wate: ‘Naka onto ambotshika dɔkɔlɔkɔ dia laande+ dia nambola Jehowa olambo wele la nɛmɔ di’onto,* 3 oshinga wa pami kele l’ɛnɔnyi oma lo 20 polo 60 wayonga tɔshɛkɛlɛ* 50 ta mfɛsa lo ndjela yɛdikɔ ya shɛkɛlɛ ya lo dihole di’ekila.* 4 Ko naka nde ekɔ womoto, kete oshinga ande wayonga tɔshɛkɛlɛ 30. 5 Naka nde ekɔ la ɛnɔnyi oma lo 5 polo 20, kete oshinga wa pami wayonga tɔshɛkɛlɛ 20 ndo womoto tɔshɛkɛlɛ 10. 6 Naka nde ekɔ la ngɔndɔ 1 polo ɛnɔnyi 5, kete oshinga wa pami wayonga tɔshɛkɛlɛ 5 ta mfɛsa ndo womoto tɔshɛkɛlɛ 3 ta mfɛsa.

7 “‘Naka nde ekɔ la ɛnɔnyi 60 otsha la diko, kete oshinga wa pami wayonga tɔshɛkɛlɛ 15 ndo wa womoto tɔshɛkɛlɛ 10. 8 Ko naka nde ekɔ wola efula dia mfuta oshinga wahombama,+ kete onto akɔ ayemala la ntondo k’ɔlɔmbɛdi, ko ɔlɔmbɛdi ayodja oshinga ande. Ɔlɔmbɛdi ayodja oshinga lo ndjela kɛnɛ kakoka ɔnɛ lotshiki dɔkɔlɔkɔ nkondja.+

9 “‘Naka dɔkɔlɔkɔ mendanaka la nyama kakoka dia nambola Jehowa, kɛnɛ tshɛ kayondokimɔ le Jehowa kayonga ɛngɔ k’ekila. 10 Nde hahombe kihɛnya kana mengola ka dimɛna la ka kɔlɔ kana ka kɔlɔ la ka dimɛna. Ko naka nde pombaka mengola nyama kakɔ la kekina, kete nyama yakɔ 2 yayonga ekila, oyadi ka ntondo kana kɛnɛ kengodinde la tɔ. 11 Naka ekɔ nyama ka mindo+ kahakoke kilambola Jehowa, kete nde pombaka mbela nyama kakɔ la ntondo k’ɔlɔmbɛdi. 12 Ko ɔlɔmbɛdi ayoshikikɛ nɛmɔ dia nyama kakɔ kana kekɔ dimɛna kana kɔlɔ. Oshinga atɔ wayonga lo ndjela woho wayoshikikɛ ɔlɔmbɛdi. 13 Ko naka nde nangaka kitshungola, kete nde pombaka nkotsha k’atanu ɔtɔi laadiko dia oshinga atɔ.+

14 “‘Naka onto ɔmɔtshi ambolanga nkidia luudu lande oko ɛngɔ k’ekila dikambo dia Jehowa, ɔlɔmbɛdi ayoshikikɛ oshinga alɔ lo ndjela woho welɔ kana lekɔ dimɛna kana lekɔ kɔlɔ. Oshinga alɔ+ wayonga lo ndjela woho wayoshikikɛ ɔlɔmbɛdi. 15 Ko naka onto lakakidia luudu lande olanga litshungola, kete nde pombaka nkotsha k’atanu ɔtɔi ka falanga y’oshinga alɔ, ko lɔ layonga lande.

16 “‘Naka onto ambokidia ɛtshi kande k’ekambɔ dikambo dia Jehowa, oshinga atɔ wayoshikikɛma lo ndjela kɛnɛ kahomba monɛma lɔkɔ: Hɔmɛra* 1 w’asami wayonga la tɔshɛkɛlɛ 50 ta mfɛsa. 17 Naka nde ambokidia ekambɔ kande ntatɛ lo Ɔnɔnyi w’ɔngɛnɔngɛnɔ,+ oshinga atɔ hatotshikitana. 18 Naka nde ambokidia ekambɔ kande l’ɔkɔngɔ w’Ɔnɔnyi w’ɔngɛnɔngɛnɔ, ɔlɔmbɛdi ayokamba akumi w’oshinga atɔ lo ndjela ɛnɔnyi wambotshikala polo lo Ɔnɔnyi w’ɔngɛnɔngɛnɔ wayaye ndo oshinga atɔ+ wayohomba kitshakitshama. 19 Ko naka ɔnɛ lakakikidia ambolanga ntshungola ekambɔ kakɔ, kete nde pombaka nkotsha k’atanu ɔtɔi ka falanga laadiko dia oshinga atɔ, ko tɔ kayonga kande. 20 Naka nde hatshungodi ekambɔ kakɔ, ko onto okina ambokisomba, kete tɔ hayokoka tshungɔma nto. 21 Lam’ayotshungɔma ekambɔ lo Ɔnɔnyi w’ɔngɛnɔngɛnɔ, tɔ kayonga ɛngɔ k’ekila dikambo dia Jehowa, oko ekambɔ kambokimɔma dikambo diande. Tɔ kayonga kaki ɛlɔmbɛdi.+

22 “‘Naka onto ambokidia ekambɔ dikambo dia Jehowa, ekambɔ kakandasombe losomba aha la kikondja oko etenyi k’okitɔ,+ 23 kete ɔlɔmbɛdi ayowokambɛ akumi w’oshinga atɔ polo lo Ɔnɔnyi w’ɔngɛnɔngɛnɔ, ko lushi lɔsɔ nde ayokimɔ oshinga akɔ.+ Tɔ kekɔ ɛngɔ k’ekila dikambo dia Jehowa. 24 Ekambɔ kayokalola le ɔnɛ lakandakisombe, mbuta ate le kanga ɛtshi kakɔ ka nkɛtɛ+ lo Ɔnɔnyi w’ɔngɛnɔngɛnɔ.

25 “‘Oshinga w’ɛngɔ tshɛ pombaka mbɛdikama lo ndjela yɛdikɔ ya shɛkɛlɛ ya lo dihole di’ekila. Shɛkɛlɛ ɔtɔi ekɔ la ngera* 20.

26 “‘Koko ndooko onto lahomba nkidia nyama kotɔ ntondo, nɛ dia tɔ mbotɔka ntondo dikambo dia Jehowa.+ Oyadi ngɔmbɛ kana ɔkɔkɔ, vɔ wamboshilaka monga waki Jehowa.+ 27 Naka tɔ kekɔ l’atei wa nyama yele mindo, ko nde ambolanga kitshungola lo ndjela oshinga wakashikikɛma, kete nde pombaka nkotsha k’atanu ɔtɔi k’oshinga atɔ.+ Ko naka tɔ hatshungɔmi, kete tɔ kayosondjama lo ndjela oshinga wakashikikɛma.

28 “‘Koko ndooko ɛngɔ kakakimɔ onto lo pondjo* dikambo dia Jehowa oma lo kɛnɛ kele la nde kakoka sondjama kana tshungɔma, oyadi onto kana nyama kana ekambɔ. Ɛngɔ tshɛ kakakimɔma kekɔ ɛngɔ koleki ekila dikambo dia Jehowa.+ 29 Ndo nto, ndooko onto lambanyema* lambokitshama laande dia ndanyema lakoka tshungɔma.+ Nde pombaka ndjakema ndooko onyake.+

30 “‘Etenyi tshɛ ka dikumi+ ka lo wodja, oyadi ka diangɔ di’oma lo dikambɔ kana elowa w’oma l’esongo kekɔ kaki Jehowa. Ɔsɔ ekɔ ɛngɔ k’ekila dikambo dia Jehowa. 31 Naka onto nangaka ntshungola etenyi kande ka dikumi, kete nde pombaka nkotsha k’atanu ɔtɔi k’oshinga atɔ laadiko diatɔ. 32 Lo kɛnɛ kendana la nyama ka 10 ka l’atei wa ngɔmbɛ la ɛkɔkɔ, kɛnɛ tshɛ keta l’ɛse k’ɔkɔmba w’olami, mbuta ate nyama* ka 10 pombaka monga ɛngɔ k’ekila dikambo dia Jehowa. 33 Nde hahombe kisɛdingola dia menda kana kekɔ dimɛna kana kɔlɔ ndo nde hahombe kiengola. Ko naka nde nyanga dia kiengola, kete nyama yakɔ 2 yayonga ɛngɔ k’ekila,+ oyadi ka ntondo kana kɛnɛ kengodinde la tɔ. Yɔ hayokoke tshungɔma.’”

34 Ɔsɔ mbele wadjango wakasha Jehowa Mɔsɛ dikambo di’ase Isariyɛlɛ lo Dikona dia Sinayi.+