Sangwelo dia Nzambi Diaya Suke la Kotshama Etena Kɛnɛ

Sangwelo dia Nzambi lam’akandatonge kɛtɛ aki dia anto wele l’ɔngɛnɔngɛnɔ wasɛna la losembwe mbidjasɛ lɔkɔ. Dia vɔ tshikala la lɔsɛnɔ, anto wakahombe kitanyiya ɛlɛmbɛ wa Nzambi, koko atshukanyi ahende wa ntondo wakayala l’ohedia ndo wakayoyalaka atshi wa pɛkato wakanyema dia mvɔ. Ɔsɔku mbakayodianganaka pɛkato la nyɔi le tokanula tawɔ.​—⁠Etatelo 1:​27, 28; 2:​16, 17; 3: 1-19; Romo 5:⁠12.

Nzambi, ɔnɛ l’etama ɔnɛ: Jehowa, akɔshi tɛdikɔ dia minya etombelo w’oma l’ohedia ndo w’oma lo pɛkato oma la kɛtɛ. Etena kɛmɔtshi nde akadje anto washo ko l’atei awɔ, nde akɛnyi Abarama, onto la kɔlamelo, lakandayɔlɛka Abarahama. Nzambi akalake Abarahama dia tokanula tande tayoyala wodja a woke, ndo ɔnɛ oma lo wodja akɔ kayotondja Nzambi lɔtɔngɔ lɔmɔtshi la daka, nkumbo tshɛ ya lo kɛtɛ yayɔtshɔkɔma oma lo tshimbo yande.​—⁠Etatelo 12:​1-3; 18:​18, 19; 22:18; Osambu 83:18; Heberu 11:​8-16.

Oya l’ekomelo k’eleko ka 16 N.T.D., ana waki okana w’Abarahama, Jakɔbɔ kana Isariyɛlɛ, wakayoyalaka waoho 12 wanɛ wakasɛnaka lo lɔhɔmbɔ l’Edjibito. Jehowa akatshungola ase Isariyɛlɛ asɔ oma l’Edjibito ndo akawaetɛ wodja ɔmɔtshi. L’Okongo wa Sinai, oma lo tshimbo ya Mɔsɛ, nde akawasha Ɛlɛmbɛ waki oko dibuku di’ɛlɛmbɛ a wodja. Jehowa kaki Nkumekanga kawɔ, Ombadi awɔ ndo Ombidji awɔ w’Ɛlɛmbɛ. Wodja w’Isariyɛlɛ wakayala wodja wakasɔnwama oma le Nzambi, ɛmɛnyi ande wɔlɔngɔswami dia kotsha sangwelo diande. Oma le wɔ kakahombe mbotɔ Mɛsiya laki l’ɔkɛndɛ wa mpika Diolelo dia pondjo dia ɔlɔlɔ w’anto wa lo wedja tshɛ.​—⁠Etombelo 19:​5, 6; 1 Ekondo 17:​7-14; 1 Khumi ya Dikanga 4:​20, 25; Isaya 33:22; 43:​10-12; Romo 9:​4, 5.

Ay’oko yɛdikɔ y’ɛnɔnyi 2 000, mbut’ate deko dikumi la tanu l’ɔkɔngɔ diko, Nzambi akatome Ɔn’ande ɛtɔi oma l’olongo oya la kɛtɛ, dia nde ndjotɔ le osekaseka w’emuma w’ose Juda wakawelɛka Mariya. Nde akɔlamɛ Yeso ndo nde akahombe kita Diolelo diakalake Nzambi tshɛnde Davidi. Lam’akandayala l’ɛnɔnyi 30, Yeso akabatizama oma le Joani Obatizanyi ndo akatatɛ la sambisha Diolelo dia Nzambi. Oma lo ɛkɔnwɛlɔ wa hemɔ wakandasalaka, nde akɛnya yoho yayɔtshɔkɔla Diolelo diayaye anto. Oma l’ekimanyielo ka wɛla, nde akalembetshiya kɛnɛ kalɔmbama le wanɛ wakombola monga la lɔsɛnɔ la pondjo. L’ɔkɔngɔ diko, Yeso akayodiakema lâdiko di’otamba, lɔsɛnɔ lande l’onto la kokele mbaki oshinga w’etshungwelo k’anto.​—⁠Mateu 1:​18-24; 3:​13-16; 4:​17-23; 6:​9, 10; tshapita 13; 20:28; Luka 1:​26-37; 2:14; 4:​43, 44; 8:1; Joani 3:16; Etsha 10:​37-39.

Yeso akate ate: Diolelo dia Mɛsiya diayoyohomba mpikama lo nshi yayaye y’etale efula, l’ekomelo ka dikongɛ di’akambo nɛ. L’etena kakɔ kɛsɔ, nde ayoyala Nkumekanga kambotatɛ la mbolɛ l’elongo lo yoho yahɛnama, ndo nde ayewoya wôngelo ande lo kotola yâmbalo yande oya la kɛtɛ. Akambo wasalema l’andja ɔnɛ mɛnyaka ɔnɛ takɔ̂tɔ l’etena kakɔ tatɛ mako 1914. Oko akadilake Yeso, lokumu l’ɔlɔlɔ la Diolelo lambosambishama lo kɛtɛ k’otondo oko ɔmɛnyi le wedja tshɛ. Omalɔkɔ, l’andja w’otondo, anto wekɔ lo tshumana lo wedi wa Diolelo dia Nzambi. Vɔ wayoka lo ekomelo ka dikongɛ di’akambo di’etena kɛnɛ ndo wayokondja lɔsɛnɔ la pondjo la kɛtɛ lo Diolelo dia Mɛsiya.​—⁠Mateu tshapita 24 la 25; Enyelo 7:​9-17.

Ɛlɔ kɛnɛ, Tɛmwɛlɔ efula sɛmaka dia vɔ wekɔ lo kotsha lolango la Nzambi. Ko woho akɔna wakokayɛ mbeya etshumanelo k’Akristo wa mɛtɛ na? Lam’ayɔ̂sɛdingolaka Afundelo wakɔndɔla di’etshumanelo k’Akristo wa lo eleko ka ntondo ndo lam’ayɛ̂naka wanɛ wele lo tayele ɛnyɛlɔ kɛsɔ lo nshi yaso nyɛ.

• Naa ɔkɛndɛ waki l’Abarahama ndo Isariyɛlɛ lo okotshamelo wa sangwelo dia Nzambi na?

• Kakɔna kakakotsha Yeso oma l’olimu ndo oma lo nyɔi kande na?

• Lo ndjela pɔlɔfɛsi, akambo akɔna wakahombe salema l’etena kaso kɛnɛ na?