Teye ɔkɛndɛ wele la Kristo lo okongamelo wa Nzambi

“LO ETATELO, Nzambi akatonge olongo la nkɛtɛ,” ndo diangɔ tshɛ diakandasale diaki “amɛna efula.” (Eta. 1:1, 31) Jehowa akatonge anto la elongamelo ka dimɛna efula ka nshi yayaye. Koko, ɔtɔmbɔkwɛlɔ wa lo Ɛdɛna wakayohembola ɔngɛnɔngɛnɔ waki l’anto lo tshanda mɔtshi. Kaanga mbakidiɔ ngasɔ, sangwelo dia Jehowa lo dikambo dia nkɛtɛ ndo di’anto kotshikitana. Nzambi akɛnya dia etshungwelo kayonga le tokanula ta Adama tayonga l’okitanyiya. Ɔtɛmwɛlɔ wa mɛtɛ wakahombe kaloyama ndo Nzambi ayolanya kanga kɔlɔ kaamɛ ndo etsha ande wa kɔlɔ tshɛ. (Eta. 3:15) Ko diangɔ diayonga nto “amɛna efula.” Jehowa ayosala awui asɔ lo tshimbo ya Ɔnande Yeso Kristo. (1 Jn. 3:8) Ɔnkɔnɛ, ekɔ ohomba efula sho mbeya ɔkɛndɛ wele la Kristo lo okongamelo wa Nzambi.​—Ets. 4:12; Flpɛ. 2:9, 11.

ƆKƐNDƐ WELE LA KRISTO

² Etena kakanyiyaso dikambo dia ɔkɛndɛ wele la Kristo lo okongamelo wa Nzambi, sho pombaka mbeya dia ɔkɛndɛ ande mendanaka la awui efula. Yeso kambaka oko Otshungodi w’anto, Ɔlɔmbɛdi a Laadiko, Ɔtɛ w’etshumanelo ka Akristo, ndo kakianɛ oko Nkumekanga ka Diolelo dia Nzambi. Naka sho nkana yimba la ɛkɛndɛ ɛsɔ, kete tayoleka monga la lowando lo okongamelo wa Nzambi ndo tayoleka nanga Kristo Yeso. Bible mɛnyaka ɛkɛndɛ ande ɛmɔtshi wotshikitanyi.

³ Lo nshi yakakambaka Kristo olimu ande la nkɛtɛ, akɛnama hwe di’anto w’okitanyiya wakahombe mbokana nto la Nzambi lo tshimbo ya Yeso. (Jni. 14:6) Oko wende Otshungodi w’anto, Yeso akayakimɔ oko oshinga w’etshungwelo dikambo di’anto efula. (Mat. 20:28) Ɔnkɔnɛ, ɔkɛndɛ waki Yeso bu tsho wa mbisha ɛnyɛlɔ k’onto lele la dionga dietawɔma le Nzambi. Nde ekɔ onto loleki ohomba lo okotshamelo wa sangwelo dia Jehowa diendana la anto. Paka lo tshimbo yande ndamɛ oto mbakokaso mbetawɔma nto le Nzambi. (Ets. 5:31; 2 Kɔr. 5:18, 19) Nyɔi kakavu Yeso oko olambo ndo eolwelo kande akadiholɛ anto w’okitanyiya mboka k’otsha lo ɛtshɔkɔ wa pondjo lo ɛlɔmbwɛlɔ ka Diolelo dia Nzambi dia l’olongo.

⁴ Oko wende Ɔlɔmbɛdi a Laadiko, Yeso ekɔ l’akoka wa “toka kɛtshi lo wɛɔdu aso” ndo nsala dia pɛkato y’ambeki ande wa lanɛ la nkɛtɛ kombama. Ɔpɔstɔlɔ Pɔɔlɔ akalembetshiya ate: “Sho bu la ɔlɔmbɛdi a laadiko wahakoke toka kɛtshi lo wɛɔdu aso, koko tekɔ la ɔlɔmbɛdi a laadiko wakahembama l’akambo tshɛ oko sho, koko nde kosala pɛkato.” Oma laasɔ, Pɔɔlɔ akakeketsha wanɛ wele la mbetawɔ le Yeso Kristo dia nkondja wahɔ w’efula oma lo yɛdikɔ shɔ ya mbokana nto la Nzambi lo mbuta ate: “Ɔnkɔnɛ, nyɛsɔ toyasukanya la kiti ka lowandji ka ɔlɔlɔ waheyama mbɛdika la dihonga tshɛ dia sho mbokama kɛtshi ndo dia ɔlɔlɔ waheyama mbɛdika tokimanyiya lo etena kahombama.”​—Hɛb. 4:14-16; 1 Jn. 2:2.

⁵ Yeso ekɔ nto Ɔtɛ w’etshumanelo ka Akristo. Oko wakidiɔ lo dikambo dia ambeki ande wa lo ntambe ka ntondo, sho lawɔ ɛlɔ kɛnɛ bu la ohomba w’ɔnɔmbɔdi w’onto. Yeso nɔmbɔlaka lo tshimbo ya nyuma k’ekila, ndo lo tshimbo ya dikumanyi diele l’akoka, diayoyokoya la nde ndo la She lele l’olongo lo woho walamawɔ ɛkɔkɔ wa Nzambi. (Hɛb. 13:17; 1 Pe. 5:2, 3) Lo ntɛkɛta lo yoho ya prɔfɛsiya dikambo dia Yeso, Jehowa akate ate: “Nyende, dimi lakawetɛ ɔmɛnyi le wedja, Ɔnɔmbɔdi ndo kɔmanda le wedja.” (Isa. 55:4) Yeso akashikikɛ ekotshamelo ka prɔfɛsiya kɛsɔ etena kakandatɛ ambeki ande ate: “Tanyelamɛke ɛnɔmbɔdi, nɛ dia nyekɔ la Ɔnɔmbɔdi 1, Kristo.”​—Mat. 23:10.

⁶ Dia mɛnya mposa ndo lolango lele la nde la tokimanyiya, Yeso akasha leeta lɔnɛ: “Nyoye le mi, nyu wanɛ tshɛ wele la paa ndo wele la wetsho, ko dimi layonyokeketsha. Nyɛmbɛ osembe ami ndo nyeke akambo oma le mi, nɛ dia dimi lekɔ la memakana ndo la otema w’okitshakitsha, ko nyu nyayoyakondjɛ ekeketshelo. Nɛ dia osembe ami wekɔ dimɛna ndo oshikɔ ami wekɔ osadi.” (Mat. 11:28-30) Oko walɔmbɔlande akambo wa lo etshumanelo k’Akristo la memakana ndo lo yoho yatokeketsha, Yeso Kristo mɛnyaka dia nde ekɔ “olami w’ɔlɔlɔ w’ɛkɔkɔ” lo mbokoya Jehowa Nzambi, She lele l’olongo.​—Jni. 10:11; Isa. 40:11.

⁷ Lo mukanda wa ntondo wakandafundɛ ase Kɔrɛtɔ, Pɔɔlɔ akalembetshiya dui dikina diendana la ɔkɛndɛ wa Yeso Kristo lo ɛtɛkɛta ɛnɛ: “Nde pombaka monga Nkumekanga polo lam’ayokitsha Nzambi atunyi tshɛ l’ɛse k’ekolo ande. Koko, lam’ayɔlɛndjama diangɔ tshɛ le nde, Ɔna ndamɛ nde lawɔ ayɔlɛmbɛ Ɔnɛ lakɔɔlɛndjɛ diangɔ tshɛ, dia Nzambi monga laadiko dia tshɛ.” (1 Kɔr. 15:25, 28) La ntondo ka nde ndja la nkɛtɛ, Yeso aki “okambi wa kɔmba” wa Nzambi, oko wende etongami ka ntondo ka Nzambi. (Tok. 8:22-31) Etena kakatome Nzambi Yeso la nkɛtɛ, nde akasalaka lolango la Nzambi tena tshɛ. Nde akakikɛ ohemba woleki tshɛ wolo ndo akavu ele la kɔlamelo otsha le She. (Jni. 4:34; 15:10) Lam’ele Ɔna aki la kɔlamelo polo lo nyɔi, Nzambi akawolola dia tɔsɛna l’olongo ndo akawosha lotshungɔ la monga Nkumekanga ka Diolelo dia l’olongo. (Ets. 2:32-36) Oko wende lo dihole sɔ, Kristo Yeso ekɔ l’ɔkɛndɛ wa diambo wakawosha Nzambi wa nɔmbɔla nunu dia ditongami dia lo nyuma dia wolo dia minya ɛlɔmbwɛlɔ ka ana w’anto ndo akambo wa kɔlɔ tshɛ oma la nkɛtɛ. (Tok. 2:21, 22; 2 Tɛs. 1:6-9; Ɛny. 19:11-21; 20:1-3) Oma laasɔ, Diolelo dia Nzambi dia l’olongo diele Kristo Nkumekanga mbayonga tshɔi ya lowandji layolɛ nkɛtɛ k’otondo.​—Ɛny. 11:15.

KƐNƐ KALEMBETSHIYA MBEYA ƆKƐNDƐ WELE LA NDE

⁸ Yeso Kristo lele Ɛnyɛlɔ kaso, ekɔ kokele. Wakawosha ɔkɛndɛ wa tokokɛ. Dia nkondja wahɔ oma lo ekokelo kande koludi la ngandji, sho pombaka ntshikala la kɔlamelo le Jehowa ndo ntetemala nkɛndakɛnda kaamɛ la okongamelo wa Jehowa watatshu otsha la ntondo.

⁹ Ambeki wa Yeso wa lo ntambe ka ntondo wakeye dimɛna dimɛna ɔkɛndɛ wele la Kristo lo okongamelo wa Nzambi. Vɔ wakɛnya dikambo sɔ lo nkamba vɔ tshɛ kaamɛ lo ɛlɔmbwɛlɔ ka Kristo, lo ndjakitshakitsha l’ɛse ka ɛlɔmbwɛlɔ kande kakashama lo tshimbo ya nyuma k’ekila. (Ets. 15:12-21) Ɔpɔstɔlɔ Pɔɔlɔ akatɛkɛta dikambo dia kaamɛ ka lo etshumanelo k’Akristo w’akitami etena kakandafunde ate: “Lo mbutaka mɛtɛ, la ngandji tshɛ, nyɛsɔ tohame l’akambo tshɛ lo yoho yɔtɔnɛ la ɔnɛ lele ɔtɛ, Kristo. Oma le nde mbokakatanyi tenyi dia demba tshɛ kaamɛ lo yoho ya dimɛna ndo diɔ diekɔ lo nkamba kaamɛ l’ekimanyielo k’asɔnga tshɛ wakimɔ kɛnɛ kele ohomba. Etena kakamba etenyi ka demba tshɛ olimu atɔ dimɛna, dui sɔ kimanyiyaka dia demba mbola etena kayahikadiɔ lo ngandji.”​—Ɛf. 4:15, 16.

¹⁰ Etena kakamba onto tshɛ la lo etshumanelo kaamɛ la anto akina ndo kakambawɔ vɔ tshɛ lo ndjela ɛlɔmbwɛlɔ ka Kristo, ohamelo mongaka ndo yimba ya ngandji pɛtahɛtaka nɛ dia ngandji mbele “dimama dia kokele.”​—Jni. 10:16; Kɔl. 3:14; 1 Kɔr. 12:14-26.

¹¹ Awui weta l’andja wakotsha prɔfɛsiya ya lo Bible mɛnyaka hwe dia ntatɛ oma ko 1914 mbakawasha Yeso Kristo lowandji la Diolelo. Nde ekɔ lo mbolɛ nshi nyɛ l’atei w’atunyi ande. (Os. 2:1-12; 110:1, 2) Kɛsɔ alembetshiyatɔ le wanɛ wasɛna la nkɛtɛ nshi nyɛ? Keem’edja Yeso ayanga mɛnya ɔkɛndɛ ande wa Nkumekanga ka waa nkumi ya dikanga ndo Nkumi ka waa nkumi etena kayangande mbela kilombo ka Nzambi le atunyi ande. (Ɛny. 11:15; 12:10; 19:16) Oma laasɔ, daka dia Jehowa dia etshungwelo diakashama lo etatelo ka ɔtɔmbɔkwɛlɔ w’anto diayokotshama le wanɛ wele lo lonya l’omi la Kristo, wetawɔma le nde. (Mat. 25:34) Tekɔ mɛtɛ la ɔngɛnɔngɛnɔ w’efula dia mbeya ɔkɛndɛ wele la Kristo lo okongamelo wa Nzambi! Nyɛsɔ tonge kaamɛ dia nkamba olimu wakambema l’andja w’otondo lo ɛlɔmbwɛlɔ ka Kristo lo nshi nyɛ y’ekomelo.