Ngɔndɔ ka sato

Anango Jafɛta wakawokaka kandjema ndo wakohetshaka, vɔ wakotshutshuyaka la wolo dia nde ntshika nkɛtɛ yande y’okitɔ. (Emb. 11:1-3) Koko, etena kakawɔsɛngasɛnga, dia mbakimanyiya, nde akasale dui sɔ. (Emb. 11:4-11) Ndɔ ta dia mamɛ lokombo la Jehowa aki dui dioleki ohomba le Jafɛta ndeka ata walɔ anto lo wahɔ awɔ. Nde akayashikikɛ dia monga la kɔlamelo le Jehowa ndo dui sɔ diaki la etombelo w’ɛlɔlɔ le nde ndo le anto akina. (Hɛb. 11:32, 33) Onde tayokondja wetshelo oma lo ɛnyɛlɔ ka Jafɛta? Ayotosala naka anangɛso w’Akristo wambotonyangiya kana tambɛna dia hawotosalɛ akambo lo yoho ya dimɛna? Hatohombe mbetawɔ dia tokanyi taso ta kɔlɔ toshimba dia sho kambɛ Jehowa ndo hatohombe pondjo ntshika dia ntshɔ lo nsanganya y’Akristo kana ntshika dia mbetsha wenya kaamɛ l’ase etshumanelo. Nyɛsɔ tokoya Jafɛta ndo tokitanyiya Jehowa. Dui sɔ diayotokimanyiya dia ntondoya ekakatanu wa wolo l’oyango wa sho lawɔ monga ɛnyɛlɔ k’ɔlɔlɔ.​—Rɔmɔ 12:20, 21; Kɔl. 3:13. w16.04 1:7, 9, 10

Sho la dia mbikikɛ, aha paka lo tshanda mɔtshi tsho, koko polo l’ekomelo. Ohokanyiya dia masuwa wotadinde. Dia mbika, wanɛ wele lɔkɔ pombaka nsala osale otsha l’okongo. Onto layohekɔ etena katandasale osale ayodinda. Woho akɔ waamɛ mbele, onto layohekɔ paka yema tshitshɛ la ntondo ka nkoma l’okongo nde lawɔ nto ayodinda. Naka sho nangaka dia tɔsɛna l’andja w’oyoyo, kete sho pombaka ntetemala mbikikɛ. Nyɛsɔ tonge l’ekanelo ka woho waki la ɔpɔstɔlɔ Pɔɔlɔ, lakate ate: “Sho hatohekɔ.” (2 Kɔr. 4:1, 16) L’ɛnyɛlɔ ka Pɔɔlɔ, tekɔ l’eshikikelo k’efula ɔnɛ Jehowa ayotokimanyiya dia sho mbikikɛ polo l’ekomelo. Pɔɔlɔ akafunde ate: “Ɔnɛ latoka ngandji ayotokimanyiya dia sho ntondoya wekamu tshɛ. Nɛ dia dimi lekɔ la eshikikelo dia oyadi nyɔi kana lɔsɛnɔ kana andjelo kana mandji kana akambo wa kakianɛ kana akambo wokoya kana wolo kana wemema kana ɔhɔngɔ kana ɛngɔ kɛmɔtshi kakatongama, ndooko ɛngɔ kayotokakitola oma lo ngandji ka Nzambi kɛnama lo tshimbo ya Kristo Yeso Nkumɛso.”​—Rɔmɔ 8:37-39. w16.04 2:17, 18

Lɔmba Jehowa lomba dia nshihodia dikambo dimɔ diakoka monga wolo le yɛ dia ntshikala lomangemange. Wɛ koka tomama lo lokanu kana mbishama dilanya dimɔ l’ɔtɛ weyɛ la kɔlamelo le Jehowa. Naka ngaasɔ mbediɔ, lɔmba dihonga l’oyango wa wɛ nembetshiya anto akina lo yoho yokɛma hwe bonde keso la lomangemange. Wɛ koka monga l’eshikikelo ɔnɛ Jehowa ayokokimanyiya dia wɛ mbikikɛ. (Ets. 4:27-31) Jehowa akatosha Bible dia tokeketsha. Kana yimba la avɛsa wakoka kokimanyiya dia wɛ nama lomangemange. Hemba dia nkondja wetshelo oma lo avɛsa akɔ ndo ohɔkawɔ nɛ dia vɔ wayokokimanyiya kaanga etena keyɛ bu la Bible l’anya. Bible koka nto nkeketsha elongamelo kayɛ lo kɛnɛ kata Nzambi lo dikambo dia nshi yayaye. Tekɔ l’ohomba w’elongamelo kɛsɔ dia mbikikɛ ɛhɛnyɔhɛnyɔ. (Rɔmɔ 8:25) Sɔna avɛsa walembetshiya awui wa laande wangɛnangɛnayɛ l’andja w’oyoyo ndo yaɛna dia wɛ aya lɛkɔ. w16.04 4:14, 15

Ewandji w’ɛtɛmwɛlɔ wa Lokristokristo hawosambisha awui wendana la Diolelo diaki Nzambi. Naka vɔ wekɔ lo ntɛkɛta awui wendana la Diolelo, efula ka l’atei awɔ mbutaka ɔnɛ diɔ diekɔ nsaki ka l’otema w’onto. (Luka 17:21) Vɔ hawetsha anto ɔnɛ Diolelo mbele lowandji la l’olongo lalɔmbwama oma le Yeso. Koko, mbala efula vɔ mbutaka awui wendana la Yeso lo fɛtɛ ka Nɔɛlɛ kana ka Pasaka. Vɔ hawolembetshiya dia Diolelo mbayokandola ekakatanu tshɛ wele l’anto ndo ɔnɛ keema edja diɔ diayonya awui wa kɔlɔ tshɛ oma la nkɛtɛ. (Ɛny. 19:11-21) Mbokɛmaka hwe dia, ɛnɔmbɔdi wa lo Lokristokristo haweye kɛnɛ kayosala Yeso oko Nkumekanga ka Diolelo dia Nzambi. Ndo l’ɔtɛ wewɔ hawoshihodia losango la Yeso, mbahawashihodia lande na kahombawɔ nsambisha. Ambeki wa Yeso hawohombe nsambisha dia nkondja falanga kana mbika mvudu ya mambiya anto. Ɔnkɔnɛ, olimu w’esambishelo hahombe monga okanda. (2 Kɔr. 2:17) Ambeki wa Yeso hawohombe nyanga difuto l’olimu awɔ w’esambishelo.​—Ets. 20:33-35. w16.05 2:7, 8

Tɔshi ɛnyɛlɔ kɛnɛ: Wɛ nangaka yoho mɔ y’ahɔndɔ, koko wɛ mbeyaka di’anto amɔ wa l’etshumanelo koka nyanga naka wɛ ndɔta ahɔndɔ asɔ. Bible hate oseka dui tshɛ diendana la toho tɔmɔ t’ɔlɔtɔ shikaa. Ko ngande wakokayɛ mbeya woho wakanyiya Jehowa? Bible totɛka ɔnɛ: “Woho akɔ waamɛ mbele dimi kombolaka dia wamato ndjalɛnga la ɔlɔtɔ wa kɔmba, wele la wɛdimo ndo la yimba y’ɔlɔlɔ, aha la tosambo ta laande ta mbɛla divo, la paonyi kana la adidi kana la ahɔndɔ w’oshinga wolo efula, koko lo yoho yɔtɔnɛ la wamato wata dia wekɔ lo mamema Nzambi.” (1 Tim. 2:9, 10) Lo mɛtɛ, ekambi wa Jehowa tshɛ mbidja ndo apami koka nkondja wahɔ oma l’ɛtɛkɛta ɛsɔ. Etena keso la wɛdimo, sho mbidjaka yimba lo woho wakoka anto akina ndjaoka lo kɛnɛ kendana l’ahɔndɔ wasɔnaso dia ndɔta. Ndo lam’ele sho mbokaka anangɛso ngandji, sho mbewɔka dia mbanyangiya kana mbakiyanya.​—1 Kɔr. 10:23; Flpɛ. 3:17.w16.05 3:14

Etena kakatɔmbɔkwɛ Adama Otungi ande, nde kondjonga nto ɔna Nzambi. Koko, tokanula efula taki Adama wakayɔsɔna Jehowa oko Ɔnɔmbɔdi awɔ. (Hɛb. 12:1) Lo nkitanyiya Otungi awɔ l’okitshakitsha tshɛ, vɔ wakɛnya dia vɔ nangaka dia nde monga Shɛwɔ ndo Okengi awɔ, koko aha Satana. (Jni. 8:44) Kɔlamelo yawɔ otsha le Nzambi toholaka kɛnɛ kakate ase Isariyɛlɛ wakayatshumoya l’ɛtɛkɛta wa lo divɛsa diaso d’ɛlɔ. Ɛlɔ kɛnɛ, atɛmɔdi wa mɛtɛ wa Jehowa salaka la wolo dia monga l’okitshakitsha ndo l’okitanyiya. Vɔ mbɔsaka dia ekɔ tshondo ya diɛsɛ dia mbelɛ Jehowa Shɛwɔ ndo vɔ nangaka nde monga Okengi awɔ. Onde sho mbetawɔka la lolango tshɛ dia monga diwomba dia wɔdu diakoka Nzambi nkenga ko dikonya ɛngɔ kɛmɔ ka nɛmɔ? Onde wɛ mɛnaka anangɛso l’akadiyɛso tshɛ oko olimu ɔmɔ watatetemala kengama oma le Nzambi? w16.06 1:2, 3

Ɛlɔ kɛnɛ, taya suke l’andja w’oyoyo ndo mbetawɔ kaso kekɔ lo pembama. Diakɔ diele, ekɔ ohomba sho sɛdingolaka woho wele mbetawɔ kaso. Ngande wakokaso ndjashikikɛ dia tɔ kekɔ wolo? Sho koka nsɛdingola ɛtɛkɛta wa Yeso watanema lo Mateo 6:33. Yambola wate: ‘Onde eyango ndo tɛdikɔ tami mɛnyaka dia dimi mɛtɛ mbetawɔka ɛtɛkɛta wa Yeso? Onde layetsha nsanganya kana olimu w’esambishelo l’oyango wa nyomokondja falanga? Kakɔna kayomosala naka olimu ami wɔlɔmba dia dimi nshisha wenya ndo wolo efula? Onde dimi layotshika andja ɔnɛ kengami ndo kaanga shimbami dia ntshika kambɛ Jehowa?’ Naka hatoyele kɛnɛ kata Bible lo kɛnɛ kendana la lɔngɛnyi la kɔlɔ, wotshanyelo w’onto oma l’etshumanelo kana tɔkɛnyɔ, kete etema aso wayotshuna. Kakɔna kakokayɛ nsala naka wɛ aya la dionga dia ngasɔ? Aha la ntshimbatshimba wɛ pombaka nsɛdingola mbetawɔ kayɛ. Onga la losembwe ndo kambaka mbala la mbala la Ɔtɛkɛta wa Nzambi dia nɔngɔsɔla tokanyi tayɛ. w16.06 2:8, 9

Lo andja w’otondo, ekɔ okongamelo ɔmɔ wokengami l’anto woka Jehowa ngandji ndo walanga mbokambɛ. Anto asɔ ko Ɛmɛnyi wa Jehowa. Kaanga mbewɔ la wandja ndo la munga, Jehowa nɔmbɔlaka ekambi ande la nyuma kande k’ekila. Nyɛsɔ tende toho tɔmɔ taatshɔkɔlande. Lo 1914, anto yema tshitshɛ tsho mbakatɛmɔlaka Jehowa. Koko Jehowa akatshɔkɔla olimu w’esambishelo. Etombelo waki la dui sɔ ele, miliyɔ y’anto wakeke akambo wa mɛtɛ w’oma lo Bible ndo wakakome Ɛmɛnyi ande. Jehowa akalembetshiya ohamelo wa diambo ɔsɔ etena kakandate ɛtɛkɛta wa lo divɛsa di’ɛlɔ ndo kakandakotsha ate: “Dimi Jehowa dimɛ layosala dia dui sɔ salema esadi esadi lo etena kadiɔ.” Ɛlɔ kɛnɛ sho koka mɛna mɛtɛ dia prɔfɛsiya kɛsɔ kambokotshama. Ekambi wa Jehowa wekɔ oko wodja ɔmɔ wa woke. Koko, l’andja w’otondo ekɔ wedja efula wele la lofulo la tshitshɛ l’anto oleki lofulo la tshɛ tshɛ l’ekambi wa Jehowa. w16.06 4:1, 2

Yeso komonga la taamu dia naka She kokɛka tofudu, kete nde ayokokɛ ndo anto. (1 Pet. 5:6, 7) Diakɔ diele, l’ɛnyɛlɔ ka tofudu sho hatohombe monga akanga wa nɛndɛ. Sho pombaka nkamba oyadi dia nkondja mbo yaso ya ndɛ kana dia nkondja falanga ya ndjisomba. Jehowa koka ntshɔkɔla welo aso. Ndo etena keso bu la falanga efula kana mbo ya ndɛ, nde koka ntetemala tosha kɛnɛ kele la so ohomba. Ɛnyɛlɔ, anto akina koka nkahana la so kɛnɛ kele la wɔ. Jehowa mbishaka nto tofudu dihole dia mbidjasɛ. Nde mbakatisha dikoka dia nsala tokefu ndo nde mbakasale diangɔ diakamba la tofudu dia nsala tokefu. Woho akɔ waamɛ mbele, Jehowa koka tokimanyiya dia ntana dihole dia dimɛna dia sho l’ase nkumbo kaso mbidjasɛ. Etena kakandate ɛtɛkɛta wa lo divɛsa di’ɛlɔ, ondo Yeso akakanyiyaka dia woho wakinde suke la nkimɔ lɔsɛnɔ lande dikambo di’anto tshɛ. (Ɛdika la Luka 12:6, 7.) Lo mɛtɛ, Yeso komvɔ dikambo dia tofudu kana dikambo dia nyama, koko nde akavu dikambo diaso, dia sho nkondja lɔsɛnɔ la pondjo.​—Mat. 20:28. w16.07 1:11-13

Lande na kasalaso pɛkato ndo kavɔso? Bible mbutaka dia “oma lo pɛkato k’onto 1 nyɔi kakolɛ anto oko nkumekanga.” Diakɔ diele, l’ɔtɛ weso tokanula ta Adama, sho tekɔ anto wele keema kokele ndo tekɔ lo mvɔ. (Rɔmɔ 5:12, 14, 17) Koko, taakakoke nsɔna diaha nɔmbwama kana sɛngiyama oma lo pɛkato. (Rɔmɔ 5:20, 21) Kaanga mbekeso atshi wa pɛkato, hatokoke mbetawɔ dia pɛkato tahemɛ. Diakɔ diele, etena kasalaso dui dimɔ dia kɔlɔ, sho nɔmbaka Jehowa edimanyielo. Ko, ngande wakokaso nkondja wahɔ oma lo ɔlɔlɔ waheyama mbɛdika wa Nzambi? Pɔɔlɔ akate ate: “Ɔlɔlɔ waheyama mbɛdika waki Nzambi . . . tetshaka dia ntona akambo wa kɔlɔ ndo nsaki y’andja ɔnɛ ndo dia nsɛna la yimba y’ɔlɔlɔ, la losembwe ndo omamemelo le Nzambi l’atei wa dikongɛ nɛ di’akambo.”—Tito 2:11, 12. w16.07 3:5, 6

Diwala dia ntondo diakalana etena kakahindolɛ Adama la Eva Jehowa. Satana Diabolo “oloyi akɔ w’edjedja,” akakese Eva lo mbotɛ ɔnɛ naka nde ndɛ olowa w’oma lo ‘osongo w’ewo ka kɛnɛ kele ɔlɔlɔ la kɛnɛ kele kɔlɔ,’ kete nde ayokondja ewo ka laande. Satana akɛnya dia naka nde ndɛ elowa w’oma l’osongo akɔ, kete dui sɔ diotookimanyiya dia mbeya kɛnɛ kaki ɔlɔlɔ la kɛnɛ kaki kɔlɔ. Eva kɔnɛmiya Adama oko owandji wa nkumbo etena kakandɔshi yɛdikɔ ya ndɛ olowa aha la tasawodi la omɛnde ntondo. Adama akahindolɛ Nzambi etena kakandetawɔ ndɛ olowa wakawosha wadɛnde. (Ɛny. 12:9; Eta. 2:9, 16, 17; 3:1-6) Etena kakawambola Jehowa, Adama akɛndja wadɛnde onongo. Eva nde la wɔ akɛndja oloyi onongo ate vɔ mbakayonkesa. (Eta. 3:12, 13) Adama nde la Eva wakasha tɛkɛ nɛndɛ lo dikambo di’ohindodi awɔ ndo Jehowa akalombosha atɔmbɔki asɔ. Lo mɛtɛ, ɛnyɛlɔ kawɔ kekɔ ɔhɛmwɛlɔ le so. Dia ntondoya lo diwala, waomi la waa wadi pombaka nkitanyiya Jehowa ndo mɛmba wotsho w’etsha awɔ. w16.08 1:1, 4, 5

Lande na konga atshukanyi amɔ la ekakatanu wa wolo? Le amɔ, aha kɛnɛ kambowoyotana lo awala awɔ mbakawalongamɛka ndo vɔ kɔmɔka kana mongaka la nkɛlɛ. Mbala efula, ekakatanu tombaka oma lo woho wakodiama anto kana woho wasalawɔ akambo. Woho wa nsɛna la akilo, woho wa nkamba la falanga kana woho wa mbodia ana koka monga nto lo kiɔkɔ y’ekakatanu. Koko, ekɔ ɔngɛnɔngɛnɔ dia mɛna woho wele atshukanyi w’Akristo efula l’akoka wa nkandola ekakatanu awɔ, nɛ dia vɔ mbetawɔka dia Nzambi mbalɔmbɔla. Etena konga ekakatanu wa wolo, atshukanyi pombaka nɔmba dikumanyi dia mbakimanyiya. Apami asɔ wekɔ la diewo di’efula ndo vɔ koka nkimanyiya wadi l’omi dia nkamba la alako wa Nzambi lo lɔsɛnɔ lawɔ. Ndo naka atshukanyi nɔmba Jehowa nyuma kande k’ekila, tɔ koka mbakimanyiya dia nkamba l’atɔndɔ wa lo Bible ndo nkɛnɛmɔla waonga w’Akristo.​—Ngal. 5:22, 23. w16.08 2:11-13

Yeso aki l’awui efula wa nsala. Koko etena kakalangaka anto mbohokamɛ, nde akɔsaka etena ka nsawola la wɔ ndo akawaetshaka awui efula. Ɛnyɛlɔ, lushi lɔmɔ Yeso akɔtɔ lo waato ndo akatatɛ mbetsha anto oma lɔkɔ. L’ɔkɔngɔ wa laasɔ, nde akayange dia mbisha Petero wetshelo ɔmɔ. Yeso akasale dihindo dimɔ lo nkimanyiya Petero dia munda nse ya mamba. Oma laasɔ, nde akatɛ Petero ɛtɛkɛta watanema lo divɛsa di’ɛlɔ. Mbala kakɔ ɔtɔi, Petero nde la wanɛ waki la nde “wakatshike diangɔ tshɛ” ko wakayele Yeso. (Luka 5:1-11) Nikɔdɛmɔ nde lawɔ akalange mbeya awui efula oma le Yeso. Koko, lam’ele Nikɔdɛmɔ aki ose tominadi ta laadiko t’ase Juda, nde akoke wɔma wa kɛnɛ kakahombe anto mbuta naka wambowɛna asawola la Yeso. Ɔnkɔnɛ, nde akatshu dia tenda Yeso l’otsho. Yeso kombotshanya, koko nde akɔshi etena ka nsawola la nde ndo akawolembetshiya akambo wa mɛtɛ w’ohomba. (Jni. 3:1, 2) Mbala tshɛ, Yeso akalangaka nkamba la wenya ande dia mbetsha anto akambo wa mɛtɛ ndo nkeketsha mbetawɔ kawɔ. Woho akɔ waamɛ mbele, sho pombaka monga suke dia membola anto wenya wele amɛna le wɔ ndo sho pombaka mbɔsa etena ka mbakimanyiya dia nshihodia Bible. w16.08 4:10, 11

Sho mbetawɔka l’okitshakitsha tshɛ ɔnɛ Jehowa ekɔ pudipudi ndo ekila ndo ɔnɛ atɔndɔ ande mboleki amɛna dia tɔlɔmbɔla. Naka sho nangaka monga la wɛdimo ndo l’okitshakitsha, kete tayoyela atɔndɔ ande lo lɔsɛnɔ laso. Wɛdimo wayotokimanyiya nto dia nɛmiya nsaki ndo tokanyi t’anto akina. Ahɔndɔ aso pombaka mɛnya hwe ɔnɛ sho tekɔ ekambi wa Jehowa. Anangɛso l’akadiyɛso lo tshɛ kawɔ sunganaka mandɔma l’ɔtɛ wa ɛnamelo ndo lɔkɛwɔ lawɔ la dimɛna, lakutola anto w’etema ɛlɔlɔ oya lo losango la lo Bible lashimbɛ nsɛnɔ ndo wekɔ lo ntombola Jehowa ndo mbɔngɛnyangɛnya. Naka sho mbɔsa tɛdikɔ ta lomba lo kɛnɛ kendana la ɔlɔtɔ, kete tayotetemala ntombola Ɔnɛ layalɔtsha la “lɔnɛnɛ ndo la lotombo.” w16.09 3:18-20

Jakɔbɔ pami ka kɔlamelo akalɔsha ndo akakikɛ, nɛ dia nde akokaka Jehowa ngandji ndo akɔsaka diɔtɔnganelo diaki lam’asande la Jehowa la nɛmɔ. (Eta. 32:24-26) Jehowa akatshɔkɔla Jakɔbɔ l’ɔtɛ w’etete kande ndo akawɔlɛ lokombo Isariyɛlɛ, mbuta ate “ɔnɛ lalɔsha kana latetemala la Nzambi.” Jakɔbɔ akakondja difuto diatatayange ndo sho la wɔ, mbuta ate mbetawɔma ndo tshɔkwama oma le Jehowa. Rashɛlɛ wadi aki Jakɔbɔ la ngandji efula nde la wɔ akalomɔlomɔka dia mɛna woho wakahombe Jehowa ntshɔkɔla kanula y’omɛnde. Koko Rashɛlɛ aki ekomba, dui sɔ diakashaka wamato waki lo nshi yakafundamaka Bible paa efula. Ngande wakatetemala Rashɛlɛ ndɔsha kaanga mbakinde la dui diakawɔkɔmɔlaka? Ndooko lushi lakandashisha elongamelo. Lo dihole dia nsala ngasɔ, nde akatetemala ndɔsha lo nɔmbaka Jehowa mbala la mbala. Jehowa akoke alɔmbɛlɔ waki Rashɛlɛ wa l’otema ɔtɔi ndo nde akatshɔkwama etena kakandayota ana.​—Eta. 30:8, 20-24. w16.09 2:6, 7

Ekɔ nto ohomba dia wɛ mbetsha anayɛ ɔnɛ vɔ wayonga l’ɔngɛnɔngɛnɔ naka vɔ nkitanyiya kɛnɛ kata Bible. (Os. 1:1-3) Ɛnyɛlɔ, wɛ koka nɔmba anayɛ dia vɔ mbɔsa oko vɔ wotatshu todjasɛ lo disɛnga dimɔ. Vɔ pombaka nsɔna anto amɔ wakoka todjasɛ la wɔ lɛkɔ. Oma laasɔ, wɛ koka mbambola ɔnɛ: “Weho akɔna w’anto wayonyɔsɔna naka nyu nangaka di’anto tshɛ tɔsɛnaka dimɛna lɛkɔ?” L’ekomelo, wɛ koka mbadia Ngalatiya 5:19-23 dia mɛna weho w’anto walanga Jehowa dia vɔ nsɛna l’andja w’oyoyo. Lo yoho shɔ, wɛ koka mbetsha anayɛ wetshelo ehende w’ohomba. Ntondotondo, Jehowa tetshaka woho wa monga la lɔsɛnɔ l’ɔngɛnɔngɛnɔ oma ko kakianɛ ndo nsɛna lo wɔladi l’anto akina. Dui dia hende ele, nde tetshaka woho wa tɔsɛna l’andja w’oyoyo. (Isa. 54:13; Jni. 17:3) Wɛ koka nto mɛnya anayɛ woho wakakimanyiya Bible anangɛso. Ɛnyɛlɔ, yanga ɔkɔndɔ wa lɔsɛnɔ w’ɔnangɛso ɔmɔ wele lo ekanda aso, ɛnyɛlɔ lo asawo wele l’ɔtɛ a dui ɔnɛ: “Bible tshikitanyaka nsɛnɔ y’anto” lo Tshoto y’Etangelo. w16.09 5:13, 14

Kaanga mbakokaso monga l’ɛkɛndɛ efula, sho tshɛ pombaka ndjatshungwɛ etena ka salaka wekelo w’onto ndamɛ ndo ɔtɛmwɛlɔ wa lo nkumbo. (Ɛf. 5:15) Oyango aso hawohombe monga tsho wa mbadia ndjɛkɛ efula kana nɔngɔsɔla kɔmatɛrɛ ka tosha lo losanganya. Koko, oyango aso pombaka monga wa mbetawɔ di’Ɔtɛkɛta wa Nzambi monga la shɛngiya le so ndo nkeketsha mbetawɔ kaso. Dia nkotsha oyango aso, sho pombaka monga la wɛdimo. Etena kasalaso wekelo, hatohombe nkanyiya tsho dikambo di’ehomba w’anto akina, koko ndo di’ehomba aso hita. (Flpɛ. 1:9, 10) Sho pombaka mbeya ɔnɛ etena kayalɔngɔsɔlaso dikambo di’esambishelo, dia nsanganya kana dia tosha sawo, ondo shoamɛ hatotokamba la kɛnɛ kadiaso. Ɛnyɛlɔ, kaanga mbele okatshi nongaka mbo ya ndɛ yakatɛnde la ntondo ka tosha anto, nde hokoka nsɛna la kɛnɛ kalongande keto. Naka nde nangaka monga la demba dia dimɛna, nde pombaka ndjoyakatɛka mbala la mbala diangɔ diayowokimanyiya dia monga la yoonge ya dimɛna. Woho akɔ waamɛ mbele, naka sho nangaka nkeketsha diɔtɔnganelo diasaso la Jehowa, kete sho pombaka mbekaka Bible mbala la mbala. Wekelo wa lotshimola wa ngasɔ, mbayokotsha ehomba aso hita. w16.10 2:10, 11

Lo Hɛbɛru 11:1, Bible nembetshiyaka elɛwɔ mbetawɔ. 1) Mbetawɔ ekɔ “okongelo wa la eshikikelo tshɛ wa kɛnɛ kalongamɛ onto.” Lo akambo “walongamɛ[so]” mbele ndo alaka wa Nzambi wendana la nshi yayaye. Ɛnyɛlɔ, tekɔ l’eshikikelo ɔnɛ akambo wa kɔlɔ wayokomɛ ndo andja w’oyoyo wayoya. 2) Mbetawɔ ekɔ “wɛnyɛlɔ wa lo sɛkɛ,” kana djembetelo yetawoya “y’akambo wa mɛtɛ wahɛnama.” Sho mbeyaka ɔnɛ Jehowa Nzambi, Yeso Kristo, Diolelo ndo andjelo wekɔ l’olongo kaanga mbahatakoke mbaɛna. Ngande wakokaso mɛnya ɔnɛ tekɔ mɛtɛ la mbetawɔ l’alaka wa Nzambi ndo lo diangɔ diahatakoke mɛna? Sho mɛnyaka dui sɔ oma lo yoho yaso ya lɔsɛnɔ, kɛnɛ katɛkɛtaso ndo kasalaso. w16.10 4:6

Jehowa ndo Yeso mbɔsaka oseka dui tshɛ diasalaso lo dikambo diawɔ la nɛmɔ kaanga naka hatokoke nsala awui efula walangaso nsala. (Luka 21:1-4; 2 Kɔr. 8:12) Ɛnyɛlɔ, sho mbeyaka di’anangɛso wa ngandji w’esombe mbidjaka welo efula dia ndja lo nsanganya ndo ntshɔ l’olimu w’esambishelo mbala la mbala. Onde sho mbakeketshaka ndo mbawaandolaka l’ɔtɛ wa kɛnɛ tshɛ kasalawɔ? Keketshaka anto akina mbala tshɛ kakokayɛ nsala dui sɔ. Etena tshɛ kɛnayɛ onto ɔmɔ ambosala dui dia dimɛna, andolande. Etena kaki Pɔɔlɔ nde la Barnabasɛ l’Atiyɔka wa la Pisidiya, ɛnɔmbɔdi wa shinangɔnga wa lɛkɔ wakawatɛ ɔnɛ: “Anangɛso le, naka nyekɔ la dui dimɔtshi dia nkeketsha anto, nyodite.” Pɔɔlɔ akakambe la diaaso sɔ dia nkeketsha anto. (Ets. 13:13-16, 42-44) Naka sho keketshaka anto akina, kete ondo wayotokeketsha ndo sho.​—Luka 6:38. w16.11 1:3, 15, 16

Ande diɛsɛ dia monga anto wa l’okongamelo wa Jehowa ndo mbeya kɛnɛ katɔlɔmbande lee! Koko lam’ele tekɔ lo mbeya kɛnɛ kangɛnyangɛnya Nzambi, tekɔ l’ɔkɛndɛ wa mbokitanyiya ndo nsala kɛnɛ kele ɔlɔlɔ. Ndo oyadi kaanga anto efula nangaka nsala awui wa kɔlɔ, sho pombaka “[mpe]tsha kɛnɛ kele kɔlɔ,” oko wasala Jehowa. (Os. 97:10) Hatohombe monga pondjo oko wanɛ wafɔnya ɔnɛ “ɔlɔlɔ ekɔ kɔlɔ ndo kɔlɔ ekɔ ɔlɔlɔ.” (Isa. 5:20) Sho nangaka ngɛnyangɛnya Jehowa, diakɔ diele tamboyashikikɛ dia monga pudipudi lo toho tshɛ. (1 Kɔr. 6:9-11) Kɛnɛ katotɛ Jehowa lo Bible ekɔ dia ɔlɔlɔ aso hita. Sho mbookaka ngandji ndo nangaka monga la kɔlamelo le nde. Diakɔ diele sho ndjelaka ɛlɔmbwɛlɔ kande etena keso la ngelo, l’etshumanelo, l’olimu, la kalasa, kana dihole tshɛ dieso. w16.11 3:13

Ambeki wa Bible waki l’otema w’ɔlɔlɔ. Koko l’etena kɛmɔ aki dui dimɔ diakahombe Ambeki wa Bible mingɔma lɔkɔ. Vɔ koshihodiaka tshɛ lo tshɛ kɛnɛ kakalange Jehowa mbuta etena kakandate dia nkitanyiya emboledi. Diakɔ diele oko olui, aki tena dimɔ diakiwɔ konamaka lomangemange lawɔ etena kakalɔmaka ta. Ɛnyɛlɔ, etena kakatɛ presida ka l’États-Unis anto dia nɔmba lo dikambo dia wɔladi lo Ngɔndɔ ka tanu 30, 1918, Tshoto y’Etangelo yakakeketsha Ambeki wa Bible dia vɔ lawɔ nɔmba. Anangɛso amɔ wakasukɛ ta lo nkimɔ falanga ndo yema tshitshɛ l’atei awɔ wakakome polo lo monga asɔlayi ndo wakatshu lo ta. Koko kaanga mbakiwɔ l’ohomba wa yema y’engwelo, hatokoke mfɔnya ɔnɛ ɔsɔ mbaki ɔkɔkɔ wakawonge lo lɔhɔmbɔ lo Babilɔna ka Woke. Kɛnɛ kele mɛtɛ ele, vɔ wakayakakitola suke la tshɛ la tshunda di’ɛtɛmwɛlɔ wa kashi wa l’andja w’otondo etena kakalɔmaka Ta dia ntondo dia l’andja w’otondo.​—Luka 12:47, 48. w16.11 5:9

Lande na kakahɛmɔla Pɔɔlɔ Akristo w’akitami lo kɛnɛ kendana la nsɛna “lo ndjela demba”? Ndo lande na kele ɛlɔ kɛnɛ Akristo tshɛ wekɔ l’ohomba w’ɔhɛmwɛlɔ ɔsɔ? Nɛ dia oseka okambi wa Nzambi tshɛ wa kɔlamelo koka ntatɛ mbetsha nsaki yande hita oko dikambo dioleki ohomba lo lɔsɛnɔ lande. Ɛnyɛlɔ, Pɔɔlɔ akafunde ɔnɛ anangɛso amɔ wa la Rɔmɔ waki mfumbe “ya nsaki yawɔ hita.” Diakɔ diele vɔ wakɔsaka dia awui wa dieyanelo, mbo ya ndɛ kana ɛngɛnɔngɛnɔ ekina mbaki awui wakaleke ohomba lo nsɛnɔ yawɔ. (Rɔmɔ 16:17, 18; Flpɛ. 3:18, 19; Judɛ 4, 8, 12) Ndo l’etena kɛmɔ, okakatanu ɔmɔ waki l’etshumanelo ka la Kɔrɛtɔ, ɔnangɛso ɔmɔ akasalaka awui wa mindo wa dieyanelo la “wadi a she.” (1 Kɔr. 5:1) Mbokɛmaka hwe di’Akristo wa lo ntambe ka ntondo asɔ waki l’ohomba w’ɔhɛmwɛlɔ wa Pɔɔlɔ wendana la nsɛna “lo ndjela demba.” (Rɔmɔ 8:5, 6) Ɔhɛmwɛlɔ ɔsɔ wekɔ ohomba polo nshi nyɛ. w16.12 2:5, 8, 9

Sawola la Nzambi oma k’ɛse otema koka kokimanyiya dia ntondoya ekakatanu. Nsawola la onto ɔmɔ lɛkɛyɛ otema lo mbotɛ akambo hwe hwe, olonganyi ayɛ, ɔngɛnyi ayɛ wa ma ma kana ekumanyi ka l’etshumanelo koka kokimanyiya dia wɛ ndeka nshihodia okakatanu ayɛ dimɛna. Bible mbutaka nto ɔnɛ: “Sangwelo ndanaka lam’aha ɔkɛtshanyelo, koko dikambo ndowanaka lam’ele andaki efula.” (Tok. 15:22) Nsanganya yaso ya l’etshumanelo koka tokimanyiya efula dia nkitshakitsha ekiyanu. Naka wɛ mbɔtɔka lo nsanganya lomingu tshɛ, wɛ ayonga kaamɛ l’ananyɔ ndo l’akadiyɛyɛ wayakiyanya lo dikambo diayɛ ndo walanga kokeketsha. (Hɛb. 10:24, 25) ‘Keketshana onto l’onto’ ngasɔ ayokokeketsha ndo ayetɛ awui wɔdu le yɛ dia ntondoya oseka okiyanu tshɛ.—Rɔmɔ 1:12. w16.12 3:17, 18

Etena keso l’ekakatanu wendana la yoonge kana ekakatanu ekina wahatakoke ntshikitanya, sho pombaka nkitsha okiyanu aso le Jehowa ndo monga l’eshikikelo dia nde ayotokokɛ. (1 Pet. 5:6, 7) Ndo sho pombaka nsala kɛnɛ kakokaso nsala dia nkondja wahɔ oma lo nsanganya y’Akristo ndo dikongelo dikina dialɔngɔsɔla okongamelo wa Jehowa. (Hɛb. 10:24, 25) Kayotota lo dikambo di’ambutshi wele la kɔlamelo wele anawɔ hawoyokambɛ Jehowa? Omvutshi Samuɛlɛ kokoka ntshutshuya anande w’apami w’epalanga dia ntetemala monga la kɔlamelo le Nzambi. (1 Sam. 8:1-3) Nde akahombe ntshika dui sɔ l’anya wa Jehowa. Koko, Samuɛlɛ akasale kɛnɛ kakandakoke nsala dia ntetemala monga la kɔlamelo le Nzambi ndo ngɛnyangɛnya She ka l’olongo. (Tok. 27:11) Ɛlɔ kɛnɛ, ambutshi w’Akristo efula wekɔ l’okakatanu akɔ waamɛ. Vɔ wekɔ l’elongamelo ɔnɛ l’ɛnyɛlɔ ka ombutshi wa pami wɔtɛkɛtami lo wɛɛla wa Yeso wendana la ɔna la lotshito, mbala tshɛ Jehowa ekɔ suke dia nongola atshi wa pɛkato wayatshumoya. (Luka 15:20) Etena kakongawɔ dui sɔ, ambutshi koka ndjasha tshɛ dia ntetemala monga la kɔlamelo le Jehowa, wele l’elongamelo ɔnɛ ɛnyɛlɔ kawɔ ayotshutshuya anawɔ dia nkalola le nde. w17.01 1:15, 16

Mbala efula onto lele l’okitshakitsha mbeyaka nto elelo ande. Ndo l’okitshakitsha tshɛ nde mbetawɔka wandja ande. Nde nangaka mpokamɛ tokanyi t’anto akina ndo nkondja wetshelo oma le wɔ. Onto lele l’okitshakitsha ngɛnyangɛnyaka Jehowa efula. Bible mɛnyaka dia onto leya elelo ande ndjaeyaka ndamɛ ndo nde shihodiaka ɔnɛ ekɔ awui amɔ wende bu l’akoka wa nsala kana wende la lotshungɔ la nsala. Dui sɔ mbokimanyiyaka dia nde nɛmiya anto akina ndo mbasalɛ akambo la ngandji tshɛ. Koko sho koka ntatɛ nkanyiya l’otako tshɛ aha la sho mbeya. Ngande wakoka dui sɔ salema? Sho koka ntatɛ mfɔnya dia tekɔ ohomba efula ndeka anto akina nɛ dia sho kana anto weyaso dimɛna wekɔ l’ɛkɛndɛ ɛmɔ l’etshumanelo. (Rɔmɔ 12:16) Kana sho koka ntatɛ nkotola yambalo y’anto amboleka efula oya le so. (1 Tim. 2:9, 10) Sho koka ndjotatɛ kaanga mbutɛ anto akina awui wahombawɔ kana wahawahombe nsala.​—1 Kɔr. 4:6. w17.01 3:6-8

Ɛlɔ kɛnɛ, olimu w’esambishelo wekɔ lo tatetemala mpama ndo okongamelo wa Jehowa wekɔ lo nkamba la dihomɔ dia tshulatshula dia nshi nyɛ dia nkimanyiya dia lokumu l’ɔlɔlɔ nkoma le anto efula. Koko lo tena dimɔ, epalanga koka monga l’okakatanu dia mbeka toho t’eyoyo ta nsala akambo. (Luka 5:39) Diakɔ diele, ekɔ djembetelo ya ngandji ndo ekɔ ohomba di’epalanga ndowanya ɛlɔngɔlɔngɔ dia mɛmba ɛkɛndɛ efula l’okongamelo wa Jehowa (Os. 71:18) Aha tena tshɛ mbongadiɔ dui dia wɔdu dia wanɛ wele la lowandji mbisha ɛlɔngɔlɔngɔ ɛkɛndɛ. Anangɛso asɔ koka ndjakiyanya etena kakanyiyawɔ dia wayanga nshisha ɛkɛndɛ walangawɔ efula. Vɔ koka monga la paa etena kakanyiyawɔ dia wayanga ntshika ɔkɛndɛ wa laande wangɛnangɛnawɔ efula. Kana vɔ koka ndjakiyanya ɔnɛ naka vɔ hawɔlɔmbɔdi olimu akɔ, kete vɔ hawotosalema dimɛna. Ondo vɔ fɔnyaka ɔnɛ vɔ bu l’etena ka ndowanya anto akina. L’etena kɛsɔ, ɛlɔngɔlɔngɔ pombaka monga la solo dia lotutsha naka hawowasha ɛkɛndɛ efula. w17.01 5:3, 4

Yeso akayonga onto la kokele paka oko waki Adama. (Jni. 1:14) Koko otshikitanyi la Adama, Yeso akasale kɛnɛ kakalongamɛka Jehowa oma le onto la kokele. Oyadi la ntondo k’ehemba wakaleke wolo, ndooko lushi lakandasekola kaanga ɔlɛmbɛ ɔtɔi wa Nzambi. Lo mvɔ oko onto la kokele, Yeso akakoke nshimbɛ anto oma lo pɛkato la nyɔi. Nde akɛdima tshɛ lo tshɛ la kɛnɛ tshɛ kakahombe Adama monga. Yeso aki onto la kokele, laki la kɔlamelo ndo la okitanyiya wa tshɛ lo tshɛ le Nzambi. (1 Tim. 2:6) Nde akavu dikambo diaso ndo olambo ande wakasha apami tshɛ, wamato tshɛ ndo ana tshɛ diaaso dia nsɛna pondjo pondjo. (Mat. 20:28) Oshinga w’etshungwelo wekɔ nsapi kadihola lokuke dia sangwelo dia Nzambi kotshama.​—2 Kɔr. 1:19, 20. w17.02 1:15, 16

Ohɔsa dia wɛ ekɔ lo mboka kɛmɔ ka wodjima kakawate l’ɛse ka nkɛtɛ. Wɛ koka ndjambola dia kana wɛ ayonyomɛna osase. Lɔsɛnɔ koka monga oko lɔkɛndɔ lɔsɔ. Wɛ koka monga lo tena dia wolo efula ndo wɛ koka ndjaoka di’awui wambokoleka. Kaanga Yeso akayaoke woho ɔsɔ. Etena kakawodiakaka l’otamba w’asui, nde akotshama nsɔnyi ndo aki la paa k’efula. Etena kɛsɔ kakahombe monga etena kakaleke wolo lo lɔsɛnɔ lande! (Hɛb. 12:3) Yeso akake washo lo difuto diakandahombe nkondja oma lo ekikelo kande, dui diakaleke ohomba le nde ele, okidiamelo wa lokombo la Jehowa ndo oyindjamelo wa lowandji lande. Nde akeyaka di’ehemba waki paka wa lo tshanda mɔtshi tsho, koko difuto diande dia l’olongo diayotshikala pondjo pondjo. Ɛlɔ kɛnɛ, ehemba wahomana la so koka tɔtɛwɔla ndo koka tosha paa efula, koko tohɔ ɔnɛ vɔ wekɔ paka wa lo tshanda mɔtshi tsho. w16.04 2:10

Ɛlɔ kɛnɛ, anto efula hawɔsɛ dia wekɔ l’onongo etena kasalawɔ pɛkato, diakɔ diahawashihodia lande na kele anto l’ohomba w’oshinga w’etshungwelo. Vɔ haweye kɛnɛ kelɛwɔ pɛkato, woho wongatɔ la shɛngiya le so ndo kɛnɛ kahombaso nsala dia ntshungɔ oma lo lɔhɔmbɔ la pɛkato. Kam’ashihodiawɔ kɛnɛ kelɛwɔ pɛkato, anto w’etema ɛlɔlɔ ngɛnangɛnaka dia mbeya ɔnɛ Jehowa akatome Ɔnande la nkɛtɛ dia ndjototshungola oma lo pɛkato la nyɔi. Jehowa akasale dui sɔ l’ɔtɛ wa ngandji kande k’efula ndo ɔlɔlɔ ande waheyama mbɛdika. (1 Jni. 4:9, 10) Olambo w’oshinga w’etshungwelo wa Kristo wekɔ djembetelo yoleki woke ya ngandji ka Nzambi le so ndo mɛnyaka woke woke w’ɔlɔlɔ Ande waheyama mbɛdika. Ande ɔlɔ dia mbeya ɔnɛ naka sho monga la mbetawɔ l’olambo waki Yeso, kete pɛkato yaso yayodimanyiyama ndo tayonga la nkum’otema ka pudipudi lee! (Hɛb. 9:14) Ɔsɔ mɛtɛ ekɔ lokumu l’ɔlɔlɔ la nkahana l’anto akina. w16.07 4:6, 7

Jehowa toshikikɛka ɔnɛ, lam’ele tekɔ la mbetawɔ lo oshinga w’etshungwelo, pɛkato yaso ‘yayodimɔ.’ Nde koka todimanyiya pɛkato yaso tshɛ lo tshɛ. (Ets. 3:19-21) Oshinga w’etshungwelo mbakimanyiya dia Jehowa nsɔna anto amɔ dia vɔ monga anande wa l’olongo. Anto asɔ mbele akitami. (Rɔmɔ 8:15-17) Nde mbelɛka wanɛ wele “ɛkɔkɔ ekina” dia monga ase nkumbo kande ka la nkɛtɛ. L’ɔkɔngɔ wa vɔ nkoma kokele, mbayonga ohemba w’ekomelo. Naka wayonga la kɔlamelo le Jehowa, kete nde ayowaɔsa vɔ lawɔ oko anande. (Rɔmɔ 8:20,21; Ɛny. 20:7-9) Jehowa ayolangaka anande lushi tshɛ. Anto wayotetemala nkondja ɛtshɔkɔ pondjo pondjo diɛsɛ l’oshinga w’etshungwelo. Jehowa akatosha woshasha wa nɛmɔ efula ɔsɔ ndo ndooko onto lakoka tɔhɔtɔlawɔ. w17.02 2:15, 16

Jehowa mbaki Onto lakɛnyi dui dimɔ di’ɔlɔlɔ le yɛ ndo mbakalange wɛ mbeeya. Nde akeye nto dia wɛ ekɔ la munga ndo la wɛɔdu wakotshutshuya dia nsala wandja. Koko, Jehowa akatetemala nkombola dia wɛ monga ɔngɛnyi ande. Jehowa akatolange woho w’anyanya diakɔ diakandatosha woshasha ɔmɔtshi wa nɛmɔ efula. Nde akatome Ɔnande lanɛ la nkɛtɛ dia nde ndjokimɔ lɔsɛnɔ lande oko oshinga w’etshungwelo lo dikambo dia pɛkato yaso. (Jni. 3:16) Etena kasalaso munga kɛmɔtshi, sho koka nɔmba Jehowa edimanyielo. Ndo l’ɔtɛ w’oshinga w’etshungwelo, sho koka monga l’eshikikelo ɔnɛ nde ayotodimanyiya ndo ayotetemala monga ɔngɛnyi aso kaanga mbeso keema kokele.​—1 Tim. 1:15. w16.05 4:6, 7