Nkumekanga K’ɔngɔnyi Ndo Ka Lomba

Onde wɛ fɔnyaka di’ɔngɔnyi wayokosha ɔngɛnɔngɛnɔ oka? Naka onto ɔmɔtshi kosha falanga y’efula, onde wɛ hatɔngɛnangɛna? Mɛtɛ, wɛ ayɔngɛnangɛna. Ondo wɛ ayomɛ kanyiya woho wayoyotsha la falanga yakɔ.

MƐTƐ, diangɔ dia somba diayonga efula dia wɛ sɛna dimɛna ndo dia ndjangɛnyangɛnya. Falanga kokaka monga nto dihombo dia ‘kokɛ’ onto lam’atomba ekakatanu wa wanyandja, ɛnyɛlɔ oko: hemɔ kana ohombelo w’olimu.​—⁠Undaki 7:⁠12.

Ko diɔtɔnganelo diakɔna diele lam’asa falanga l’ɔngɛnɔngɛnɔ na? Oko wafɔnya anto efula, onde ndo wɛ lawɔ mbafɔnya ɔnɛ ɔngɛnɔngɛnɔ ndjaka oma lo lomombo? Mbeyaka monga yema wolo tana ekadimwelo lo wembola ɛsɔ nɛ dia onto kokaka mbɛdika kana mbadia falanga yande, koko aha ɔngɛnɔngɛnɔ. Wɛ hakoke mbɛdika ɔngɛnɔngɛnɔ kana mbodja lo kilɔ.

Oma lâsɔ nto, mɛnamaka di’akanga w’ɛngɔnyi amɔtshi wekɔ l’ɔngɛnɔngɛnɔ, koko akina wekɔ lo sowa. Ngasɔ mbele ndo ase wola, amɔtshi wekɔ l’ɔlɔ akina la shɔkɔ. Koko, anto efula​—⁠oyadi wanɛ wokongaka l’ɔngɔnyi, fɔnyaka ɔnɛ: monga la falanga efula mbishaka ɔngɛnɔngɛnɔ w’efula.

Onto ɔmɔtshi lakafunde lo kɛnɛ kendana l’akambo asɔ aki Nkumekanga Sɔlɔmɔna ka l’Isariyɛlɛ w’edjedja. Nde aki ɔtɔi ɔmɔtshi l’atei w’anto wakaleke ɔngɔnyi l’andja w’otondo. Wɛ kokaka mbadia kɛnɛ kakɔndɔla tshapita 10 ya dibuku dia lo Bible dielɛwɔ Khumi ya Dikanga ka Ntundu lo kɛnɛ kendana l’ɔngɔnyi w’efula waki la nde. Oko ɛnyɛlɔ, enda kɛnɛ kata divɛsa 14 ɔnɛ: “Efula ka paunyi kakalungulaka Solomona lu eleku ɔtɔi, kaki ya talata kama shamalu la akumi asamalu.” (Sho mbɛnganyisha alɛta ango.) Lofulo lɔsɔ mbɛdima la tɔnɛ 25 ya paunyi. Ɛlɔ kɛnɛ, lofulo la paunyi lɔsɔ ekɔ la nɛmɔ dioleki dɔlara y’Ase États-Unis 200000000!

Sɔlɔmɔna komonga tsho ɔngɔnyi; Nzambi akɔtshɔkɔla ndo akawosha lomba. Bible kɔndɔlaka ɔnɛ: ‘Nkumekanga Sɔlɔmɔna akaleke nkumi ya dikanga tshɛ ya la nkɛtɛ ɔngɔnyi ndo lomba. Anto wa lo nkɛtɛ k’otondo wakalangaka mɛna Sɔlɔmɔna la mboka lomba lakadje Nzambi l’otema ande.’ (1 Khumi ya Dikanga 10:​23, 24) Sho lawɔ kokaka kondja wahɔ oma lo lomba laki Sɔlɔmɔna, nɛ dia efundelo ande wekɔ l’atei w’ɛkɔndɔ wa lo Bible. Nyɛsɔ tende kɛnɛ kakandate lo dikambo dia diɔtɔnganelo diele lam’asa ɔngɔnyi l’ɔngɛnɔngɛnɔ.

[Caption on page 3]

[Caption on page 3]

Tondjama nto oma lo Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart