Ngande Wakokayɛ Kokɛ Anayɛ?

L’ƆKƆNGƆ wa nde shidiya kalasa ka sekɔndɛrɛ kaki suke la lakawɔ, Wernera akatshu dia totetemala la kalasa ya lâdiko kâmɛ l’ana akina oko 3000 l’osomba wa São Paulo, lo wodja wa Brésil. Mbala ka ntondo, nde akɛnyi anyande ambeki wasondja ndo wanɔ didjoyadjoya. Lam’ele nde aki êke kiɛndakɛnda, ambiki akina w’epalanga wakôkonya lo nde ntshâka awɔ awui asɔ wa sɔnyi ndo wa wâle.

Ndo Eva, kadiy’aki Werner mbaki l’ekakatanu. Lam’ele nde akalangaka minda pwɛ efula, nde akekaka hakoke ko akayɔlɛmba efula ndo ndjonga oko onto lambohalɔ yimba. Oko ana akina, Werner la Eva waki l’ohomba w’ekokelo ka l’emunyi ndo ka lo yimba. Anayɛ wekɔ l’ohomba w’ekimanyielo ka woho akɔna? Ngande wakokayɛ mbâkimanyiya dia vɔ ndjɔsɛna dimɛna lam’ayowokoma epalanga? Ko lâsɔ, yoho yakɔna ya lɔsɛnɔ yalangɛ anayɛ ndjɔsɛna lo nshi yayaye na?

Aha Diangɔ dia Ndɛ to Mbahombawɔ

Ohokanyiya okakatanu wele l’ambutshi ɛlɔ kɛnɛ dia kokɛ anawɔ. Lɔsɛnɔ la nkumbo lambolana ndo wola amboleka, lo wedja efula, ana efula wôtekekɔka lo toshinga ndo tɔ mbaya ngelo yawɔ. Lam’ele vɔ kombakokɛ, wekɔ lo mɛnya ɛlɔngɔlɔngɔ efula pâ hakoke. Akɛnda efula wambeketana tomba l’ɔkɔkɔ wa didjoyadjoya. Ɛnyɛlɔ, lam’akayokomaka ɔlɔng’apami ɔmɔtshi wa la Brésil fumbe ya didjoyadjoya, ki kondjala nto lo nkumbo kawɔ. Lâdiko wa pâ kaki l’ambutshi ande, ndo wolo wakawadjaka dia tana falanga ya mbôsakɛ, akanga w’abasa a didjoyadjoya wakayaka a ndjowaotsha falanga aha la mbaoka kɛtshi.

Kânga l’atei w’ɛhɛnyɔhɛnyɔ wa lo lɔsɛnɔ, ambutshi efula tetemalaka ntsha la wolo dia kondjɛ anawɔ aha paka diangɔ dia ndɛ, dia ndɔta, ndo dihole dia ndala to, koko vɔ mbâkokɛka ndo oma l’awui a ngala, didjoyadjoya l’ekakatanu ekina. Ɔsɔ dui di’ɔlɔlɔ mɛtɛ, ko onde lâsɔ mbahombawɔ komɛ? Ko kayotota di’ekokelo ka lo yimba la ka lo nyuma? Ambutshi efula suyaka ɔnɛ: dia mbodja ana dimɛna, vɔ pombaka tondoya mbika washo wolo le wanɛ wɛ̂ngɔla l’anawɔ ndo tɔkɛnyɔ takɛnyawɔ. Ko ngande wakoka ambutshi mbewɔ di’aha ndeka monga awui wolo kana djɔmɔ tɛwɛ? Ekadimwelo wekɔ lo sawo diayela.

[Footnote]