Lande na kahombaso mbetawɔ Yeso Kristo?

“KÂNGA anto efula wele bu Akristo mbetawɔka ɔnɛ Nde aki ombetsha a woke ndo wa lomba. Nde mɛtɛ aki ɔmɔtshi a l’atei w’anto wakaleke monga la shɛngiya ya wolo lo nsɛnɔ y’anto.” (The World Book Encyclopedia) Onto akɔna ɔsɔ na? Toko Yeso Kristo, otungi wa Lokristo.

Koko, kânga mbata ansiklopedi ɔsɔ ngasɔ, nkama ya miliyɔ y’anto wa lo lɛkɛ l’Ehotwelo ka wonya ndo l’ahole akina haweye Yeso Kristo; vɔ mbohɔka lokombo lɔsɔ paka oma lo kɛnɛ kakawadia l’abuku wa lo kalasa ya sɛkɔndɛrɛ. Kânga l’ɛtɛmwɛlɔ wa Lokristokristo, ekɔ ambewi wa teoloji ndo asasɛrdɔsɛ wata ɔnɛ vɔ mɛtɛ haweye Yeso ndo hawetawɔ ɔnɛ ɛkɔndɔ ɛnɛi wa lɔsɛnɔ lande (Evanjiliyɔ) watanema l’atei a Bible wekɔ mɛtɛ.

Onde afundji w’Evanjiliyɔ wakakolonganya kana wakafɔnya ɔkɔndɔ wa lɔsɛnɔ la Yeso lɔfɔnya? Ndoko yema tshitshɛ! L’ɔkɔngɔ wa nde sɛdingola ɛkɔndɔ ɛsɔ w’Evanjiliyɔ, Will Durant, ombewi w’ɛkɔndɔ weyama efula, akafunde ate: “Otondoyala mɛtɛ mbakakoke djui ya tshitshɛ y’anto k’anto, l’edja ka lɔlɔnga ɔtɔi, fɔnya onto la nkudu nganɛ ndo l’ɔlɔlɔ efula, la wetshelo wa dimɛna nganɛ wendana la lɔkɛwɔ ndo ɛnɛlɔ ka diokanelo dia lam’asa anto diasalanganya etema, tshike ɔsɔ otoyala dihindo dia wolo mbetawɔma ndeka ndo ahindo akina tshɛ wofundami l’Evanjiliyɔ. L’ɔkɔngɔ w’ɛnɔnyi nkama hiende w’ɔsɛdingwelo w’ekanda wa Bible, ɛnamelo ka tshena pe ka lɔsɛnɔ, dionga la wetshelo wa Kristo kekɔ nshi tshɛ hwe ndo kekɔ dui dialeka ase lɛkɛ l’Edjelo ka wonya ndjasha lɔkɔ.”

Koko, ekɔ anto amɔtshi wahɛnyi ohomba mbidja yimba lo dikambo dia Yeso Kristo l’ɔtɛ wa kɛnɛ kasala wanɛ wayata ɔnɛ ambeki ande mbewɔ. Ase Japon amɔtshi mbutaka ɔnɛ: ‘Vɔ mbakatɔkɔsha bɔɔmbɛ atɔmikɛ la Nagasaki. Ko la Nagasaki mbaki Akristo efula ndeka ndo l’esomba efula wa lo Japon.’ Ko onde wɛ kokaka ntshumola onganga l’ɔtɛ wa hemɔ k’ɔkɔnyi naka ɔkɔnyi akɔ hayedi awui wakawotɛ dɔkɔtɛlɛ? Aha ɛlɔ la lui mbambɔnyɔla anto efula wayata ɔnɛ Akristo mbewɔ awui wa Yeso dia shidiya pâ y’anto. Koko, Yeso akatɛnya woho wa sho shidiya ekakatanu aso wa lushi la lushi kâmɛ ndo asui wɛna anto wa l’andja w’otondo. Ɔnkɔnɛ, tambokɔlɔmba dia wɛ mbadia sawo diayela nɛ kele ɛ̂nyi wɛmɛ woho w’onto wakinde.