Onde tshɛkɛta “Okristo” yɛkɔ lo tashisha kitshimudi yayɔ?
MONGA Okristo kɛdikɛdi na? Ngande wakokayɛ kadimola dimbola sɔ na? Wakambola anto amɔtshi wa lo wedja wotshikitanyi dimbola sɔ, ko vɔ wakakadimola ɔnɛ monga Okristo kɛdikɛdi:
“Ndjela Yeso ndo mbôkoya.”
“Monga onto l’ɔlɔlɔ ndo monga la lokaho.”
“Mbetawɔ Kristo oko Nkumadiɔndjɔ ndo Oshimbedi.”
“Tshɔ̂ka lo Misa, mbutaka asambɛ wa Emwe Mariya la Shɛso, ndo nongola Kɔminyɔ.”
Kânga adiksiɔnɛrɛ mbishaka dilembetshiyelo diotshikitanyi lo kɛnɛ kendana la dimbola sɔ. Koko, dibuku dimɔtshi diekɔ la mbɔtwɛlɔ dikumi l’ɛse ka tshɛkɛta “Okristo,” mbɔtwɛlɔ yotshwe oma lo “monga la mbetawɔ le Yeso Kristo kana monga l’ɔtɛmwɛlɔ ande” otsha lo monga “onto lele la lɔkɛwɔ l’ɔlɔlɔ ndo letawɔma.” Hatokoke mamba woho ɔnɛ wele anto efula mbokaka wolo nembetshiya elɛwɔ monga Okristo.
Kanyi y’ɛngwɛ la shwe
Ɛlɔ kɛnɛ, l’atei w’Akristo wa l’ɛlɔmɔ—kânga l’atei wa wanɛ wele l’ɔtɛmwɛlɔ ɔtɔi, onto kokaka tana tokanyi efula totshikitanyi lam’asawɔ lo kɛnɛ kendana l’akambo wele oko: woho wakafundama Bible oma lo wolo wa nyuma ka Nzambi, wetshelo w’ohilwelo, woho wayatambiya ɛtɛmwɛlɔ l’awui wa pɔlitikɛ, ndo lo kɛnɛ kendana la mbewoya anto akina akambo wetawɔwɔ. Anto kema la kanyi ɔtɔi lo kɛnɛ kendana l’akambo anɛ: lɔkɛwɔ l’ɔlɔlɔ, otondjelo a waemi, dieyanelo dia pami la pami, ndo di’apami la wamoto wadjasɛ kâmɛ aha l’awala awɔ mbeyama le lɛɛta. Kanyi yamboleka dimɛna le wɔ ele y’onto l’onto ntsha kɛnɛ kalangande.
Jurunalɛ mɔtshi yelɛwɔ Christian Century, mbutaka ɔnɛ: atete ndoko edja, tuminadi tɔmɔtshi t’ase Asɔnyi ma la mbetawɔ dia ɔtɛmwɛlɔ ekɔ la lotshungɔ la “sɔna kânga pami kasala dieyanelo dia lam’asa pami la pami dia monga ekumanyi l’atei a wanɛ walɔmbɔla ɔtɛmwɛlɔ akɔ.” Jurunalɛ kina yelɛwɔ The New York Times, mbutaka ɔnɛ, ambewi amɔtshi wa teoloji wakakomi ndo lo mbuta ɔnɛ bu ohomba efula monga la mbetawɔ le Yeso dia kondja panda. Vɔ mbetawɔka ɔnɛ ase Juda, waa Mizilima, ndo anto akina “mbeyaka ndo vɔ lawɔ mbɔtɔ l’olongo [oko wayɔtɔ Akristo].”
Ohokanyiya yema naka kokaka, dia onto lele communiste ko osukɛ kanyi ya capitalisme kana ɔnɛ latewɔ dia lowandji pombaka monga l’anya wa wodja koko osukɛ lowandji la hiadi kana écologiste, koko mbetawɔka dia vɔ nyukola esongo wa l’okonda kana wa l’ahole wadjasɛ anto. Aha la tamu, wɛ ayota ɔnɛ “onto ɔsɔ mɛtɛ bu communiste, kana hetawɔ dia lowandji monga l’anya wa wodja, ndo bu écologiste,” ko ndoko layokanya. Koko, naka wɛ sɛdingola tokanyi totshikitanyi tele l’Akristo wa l’ɛlɔmɔ, kete wɛ ayɛna dia mbala efula wetshelo awɔ hɔtɔnɛ la wɔnɛ waketsha Yeso Kristo, ɔnɛ Lakatonge Lokristo. Ko kayotota dia tokanyi totshikitanyi tele lawɔ lo kɛnɛ kendana la Lokristo na?—1 Koreto 1:10.
Weolo wadja anto dia tshikitanya wetshelo w’Akristo dia mbowɔtɔnganyiya la waonga w’anto efula ekɔ ɔkɔndɔ w’otale efula oko wayotɛna. Woho akɔna wayaoka Nzambi nde la Yeso Kristo lo kɛnɛ kendana l’etshikitanu wa ngasɔ ɛsɔ na? Onde ɛtɛmwɛlɔ wakeketsha wetshelo wahaki edio le Kristo kokaka ndjaelɛ vamɛ Akristo? Tayɔsɛdingola wembola ɛsɔ lo sawo diayela.