Lɔkɛwɔ l’ɔlɔlɔ lekɔ lo talana
“TALƐNAKA woho wa dikambo dia nganɛ ndoko lushi,” mbakate Helmut Schmit, ministrɛ ɔmɔtshi w’edjedja wa l’Allemagne. Nde akanyangaka lo menda awui amɔtshi wa lokeso waki ma la sala ewandji ɛmɔtshi wa lɛɛta, wakawafunde lo lɛkɛ la ntondo la dikatshi dia jurunalɛ mɔtshi. Nde akate ate: “Lɔkɛwɔ l’ɔlɔlɔ ambotshikɛ lokaki dihole.”
Anto efula kokaka sanga la nde lolimi. Ɛlɛmbɛ wendana la lɔkɛwɔ l’ɔlɔlɔ wele lo Bible, Ɔtɛkɛta waki Nzambi, ndo waketawɔka anto efula dia mbalɔmbɔla woho wa mbeya tshikitanya ɔlɔlɔ la kɔlɔ hawoyɔsama la nɛmɔ nto. Dikambo sɔ mɛnamaka kânga lo wedja watanema Lokristo.
Onde ɛlɛmbɛ wa lo Bible wendana la lɔkɛwɔ l’ɔlɔlɔ wekɔ ohomba?
Monga la lɔkɛwɔ l’ɔlɔlɔ lɔtɔnganɛ la wetshelo wa lo Bible nembetshiyaka monga la losembwe ndo la kɔlamelo. Koko, wovi, kɔta mishiko, ndo awui w’okadi wambofulanɛ. Jurunalɛ ya la Londres yelɛwɔ The Times yekɔ lo kɔndɔla ɔnɛ: “Wakafunde apulushi amɔtshi dikambo wakave yɛdikɔ ya 149 800 ya dɔlara mbala ɔtɔi dia totshungola dinɔnɔ dia wolo diakande wanyawɔ apulushi l’oyango wa vɔ disha dengalenga dia nyomotodisondja kana l’oyango wa dinyadinya dikambo sɔ.” Mbekelo kɛmɔtshi ka kɔlɔ kambokokanɛ lo wodja w’Australie ele lokeso l’akambo wendana l’ofutelo w’assurance. Ndo l’Allemagne tshunda dia waa nomb’ewo wakandama la wɔma wa mamba lam’akayosholaka anyanginyangi amɔtshi atete ndoko edja dia: “lokeso lɔmɔtshi lakɛnama l’akambo wa siansɛ wa lo wodja ɔsɔ.” Wakafunde ombetsha ɔmɔtshi, wele “l’atei a waa nomb’ewo ya lokumu ya l’Allemagne yeka woho wahowɔna anto kana waa nyama,” l’ɔtɛ w’awui wa kashi wakandate kana lo adatɛ wa kashi efula wakandafɔnya.
L’atei w’ɛlɛmbɛ wa lo Bible wendana la lɔkɛwɔ l’ɔlɔlɔ mbele ndo awui wendana la kɔlamelo ya l’atei wa diwala, mbut’ate onto mbidjasɛ l’olonganyi ande pondjo aha la kakitɔna. Koko lofulo la woke
l’atshukanyi wekɔ lo ndjaka awala awɔ la ntondo ka tuminadi. Jurunalɛ mɔtshi y’aseka Mupɛ yelɛwɔ Christ in der Gegenwart (Akristo wa Nshi Nyɛ) mbutaka ɔnɛ: “Kânga l’atei w’atɛmɔdi w’ase Suisse welɛwɔ waa ‘conservateur,’ awala wekɔ lo ndjakema woho w’anyanya.” Lo Pays-Bas, pursa 33 y’awala wekɔ lo pandjɔ. Osekaseka ɔmɔtshi wakɛnyi etshikitanu wakasalema l’atshunda w’anto l’Allemagne l’ɛnɔnyi engana wêke kambeta ɛnɛ akafunde ate: “Diwala diɔsama kakianɛ oko ɛngɔ kɛmɔtshi k’anyanya kambeta loowe. Anto hawoyotshukana la kanyi ya mbidjasɛ lɔsɛnɔ l’otondo.”
Lo wedi okina, miliyɔ y’anto mbɔsaka ɛlɛmbɛ wendana la lɔkɛwɔ l’ɔlɔlɔ wa lo Bible oko ɛlɛmbɛ wahomba onto ndjela ndo wele ohomba lo lɔsɛnɔ la l’andja ɔnɛ wasɛnaso. Atshukanyi amɔtshi wodjashi l’etenyi ka la Suisse katɛkɛtawɔ Allemand wakayɛnaka dia mbeka woho wa sɛna lo ndjela ɛlɛmbɛ wa lo Bible wendana la lɔkɛwɔ l’ɔlɔlɔ akawaela ɔngɛnɔngɛnɔ. Lo yɛdikɔ yoleki, “ekɔ paka ɛngɔ ɔtɔi mbakoka tɔlɔmbɔla l’akambo tshɛ wa lo lɔsɛnɔ. Ɔnɔmbɔdi akɔ ko Bible.”
Akanyiyayɛ lo dikambo sɔ na? Onde Bible kokaka mbɔsama oko ɔnɔmbɔdi w’oshika? Onde ɛlɛmbɛ wa lo Bible wendana la lɔkɛwɔ l’ɔlɔlɔ wekekɔ ohomba ɛlɔ kɛnɛ?