“Naka [Nzambi] eko la su wedi, ayeya ntahamela na?”
“Kayututa [nto] lu akambu ane? Naka [Nzambi] eko la su wedi ayeya ntahamela na?”—ROMO 8:31.
1. Wana wakatombe kamɛ l’ase Isariyɛlɛ oma l’Edjibito ndo kakɔna kakâtshutshuya dia sala dikambo sɔ?
ETENA kakatshungɔ ase Isariyɛlɛ oma lo lɔhɔmbɔ, l’ɔkɔngɔ wa vɔ mbetsha ɛnɔnyi 215 l’Edjibito, ɛnɔnyi wele efula kawɔ wakawaetsha oko ɛhɔmbɔ, “Ului a wuki w’antu wa wehu la wehu wakatshu kame la wo.” (Etumbelu 12:38) Anto asɔ waki komonga ase Isariyɛlɛ wakɛnyi la washo awɔ asui dikumi wa wɔma wakela elanyelo l’Edjibito ndo mbisha tonzambizambi ta kashi t’ase Edjibito sɔnyi. L’etena kakɔ kamɛ, vɔ wakɛnyi nto wolo wele la Jehowa wa kokɛ anto wakinde ndjekoleko tatɛ oma lo sui dia nɛi. (Etumbelu 8:23, 24) Kânga mbele vɔ komonga l’ewo k’efula k’asangwelo waki Jehowa, vɔ waki l’eshikikelo ka dikambo ɔtɔi nɛ: Tozambizambi ta l’Edjibito kokoka kokɛ ase Edjibito, etena kele Jehowa akɛnya wolo wakinde lo wahɔ w’ase Isariyɛlɛ.
2. Bonde kakakokɛ Rahaba atɔpi w’ase Isariyɛlɛ ndo dikambo kona diaki ndjaɛkɛ kande le Nzambi komonga dikambo dia kɔlɔ?
2 Ɛnɔnyi akumi anɛi l’ɔkɔngɔ wa lasɔ, la ntondo k’ase Isariyɛlɛ mbɔtɔ lo nkɛtɛ ya Daka, Jashua ɔnɛ lakayɔhɛnaka Mɔsɛ akatome apami ahende oko atɔpi dia tokemba nkɛtɛ. Lɛkɔ, vɔ wakɛnana la Rahaba, womoto ɔmɔtshi lakadjasɛka l’osomba wa Jeriko. Oma l’awui wakandoke lo kɛnɛ kendana l’akambo wa wolo wakasale Jehowa dia kokɛ ase Isariyɛlɛ l’edja k’ɛnɔnyi 40 ntatɛ oma lam’akawatombe oma l’Edjibito, nde akeye dia naka nde nangaka kondja ɛtshɔkɔ waki Nzambi, kete nde pombaka kokɛ ekambi ande. Oma lo yɛdikɔ ya lomba yakandɔshi, nde la nkumbo kande wakayohandɔka oma l’elanyelo lam’akayolanyaka ase Isariyɛlɛ osomba. Yoho yakawahandɔ lo dihindo shɔ ekɔ djembetelo yɛnya hwe dia Nzambi aki la wɔ. Diakɔ diele, yoho yakayaɛkɛ Rahaba le Nzambi k’Isariyɛlɛ komonga dikambo dia kɔlɔ.—Joshua 2:1, 9-13; 6:15-17, 25.
3. (a) Dihindo diakɔna diakasale Yeso suke l’osomba wa Jeriko wakayohikama nto, ndo ngande wakasale ewandji w’ɔtɛmwɛlɔ w’ase Juda lam’akawɛnyi dikambo sɔ? (b) Kakɔna kakayɛna ase Juda amɔtshi ndo l’ɔkɔngɔ diko ase wedja?
3 Ntambe dikumi la tshanu l’ɔkɔngɔ wa lasɔ, suke l’osomba wa Jeriko wakayohikama nto, Yeso Kristo akakɔnɔla kanga tshungu laki kanga djɔmbɔ. (Mako 10:46-52; Luka 18:35-43) Pami kɛsɔ akasɛngasɛnga Yeso dia nde mbôka kɛtshi, lo mɛnya dia nde ekɔ l’eshikikelo dia Yeso aketawɔmaka le Nzambi. Lo wedi okina, ewandji w’ɛtɛmwɛlɔ w’ase Juda vɔ l’ambeki awɔ lo tshɛ kawɔ wakatone mbetawɔ ahindo wakasale Yeso oko djembetelo yɛnya dia nde akasalaka olimu waki Nzambi. Lo dihole dia vɔ mbetawɔ, vɔ wakawɔnyɔla. (Mako 2:15, 16; 3:1-6; Luka 7:31-35) Kânga lam’akawoke ɔnɛ Yeso ambolɔ l’ɔkɔngɔ wa vɔ mbôdiaka, vɔ konanga mbetawɔ di’ɔnɛ Nzambi mbosadi dikambo sɔ. Diɔ diakɔ, diakawatatɛ pɛnyahɛnya ambeki waki Yeso, lo nyanga dia shimba olimu awɔ wa “sambisha lukumu l’ololo la Khumadiondjo Jesu.” Koko ase Juda amɔtshi ndo l’ɔkɔngɔ diko ase wedja wakadje yimba l’akambo asɔ ndo wakawaɛdikola la yambalo tshɛ. Le anto asɔ, akɛnama hwe dia Nzambi kotetemala la mbetawɔ ewandji w’ase Juda wanɛ wakayaɛnaka anto w’ɛlɔlɔ lo washo awɔ vamɛ, koko aketawɔ ambeki waki Yeso Kristo waki la ndjakitshakitsha.—Etsha 11:19-21.
Waa na wetawɔma le Nzambi ɛlɔ kɛnɛ?
4, 5. (a) Kakɔna kakanyiya anto amɔtshi lo kɛnɛ kendana l’ɔsɔnwɛlɔ w’ɔtɛmwɛlɔ? (b) Wombola akɔna w’ohomba efula wonyiyama lam’ayangaso dia mbeya ɔtɛmwɛlɔ wa mɛtɛ na?
4 Lo dikambo diendana l’ɔtɛmwɛlɔ wa mɛtɛ, owandji ɔmɔtshi w’ɔtɛmwɛlɔ akate lo ɛkɔnya weke kasalema lo televiziɔ ate: “Dimi koka shikikɛ nte ɔtɛmwɛlɔ wekɔ mɛtɛ naka vɔ mbetɛka lɔkɛwɔ l’onto dimɛna efula etena kayela onto akɔ akambo wa l’ɔtɛmwɛlɔ akɔ.” Aha la tamu, ɔtɛmwɛlɔ wa mɛtɛ pombaka tshikitanya nsɛnɔ y’anto lo yoho ya dimɛna efula. Ko onde naka ɔtɛmwɛlɔ tondjaka anto w’amɛna efula, kete lâsɔ vɔ mbetawɔmaka le Nzambi? Onde kɛsɔ keto mbele tshɔi ya dikambo yakimanyiya dia mbeya kana ɔtɛmwɛlɔ wekɔ mɛtɛ?
5 Onto tshɛ ngɛnangɛnaka dia ndamɛ sɔna kɛnɛ kalangande, oyadi kânga ɔsɔnwɛlɔ w’ɔtɛmwɛlɔ. Koko monga la lotshungɔ la sɔna hɛnya di’ɔnɛ lo weho akɔ tshɛ onto ayosala ɔsɔnwɛlɔ wa dimɛna. Ɛnyɛlɔ, anto amɔtshi sɔnaka ɔtɛmwɛlɔ lo menda efula k’anto wele lɔkɔ, ɔngɔnyi wele lɔkɔ, sɛlɛmɔnyi y’amɛna yasalawɔ lɔkɔ, kana l’ɔtɛ w’ɔnɛ ase nkumbo tshɛ wekɔ lɔkɔ. Awui anɛ tshɛ kema ohomba dia mbeya shikikɛ ɔnɛ ɔtɛmwɛlɔ kapanda wekɔ mɛtɛ kana bu. Wombola w’ohomba efula wendana la dikambo sɔ vɔnɛ: Ɔtɛmwɛlɔ akɔna wakeketsha atɛmɔdi wa lɔkɔ dia sala lolango laki Nzambi ndo washa djembetelo y’oshika yɛnya dia vɔ mbetawɔmaka le Nzambi, woho w’atɛmɔdi wa lɔkɔ koka mbuta l’eshikikelo tshɛ vate “[Nzambi] eko la su wedi”?
6. Ɛtɛkɛta akɔna waki Yeso wɛnya woho wa mbeya ɔtɛmwɛlɔ wa mɛtɛ kana wa kashi?
6 Yeso akɛnya woho wa tshikitanya ɔtɛmwɛlɔ wa mɛtɛ la wa kashi lam’akandate ate: “Nyewo amvutshi wa kashi watuyakaka le nyu, wolotshi dikuhu dia ekoko, keli l’etema awo weli ndjaundu ya ngala. Nyayâlimbitela uma lu elua awo.” (Mateu 7:15, 16; Malaki 3:18, sho mbɛnganyisha alɛta ango.) Nyɛsɔ tɔsɛdingole “elua” ɛmɔtshi kana tolembetelo tɛnya ɔtɛmwɛlɔ wa mɛtɛ, woho ɔnɛ wakokaso mbeya shikaa ka dikambo lo kɛnɛ kendana la wanɛ wetawɔma le Nzambi ɛlɔ kɛnɛ.
Tolembetelo Tɛnya Wanɛ Wetawɔma le Nzambi
7. Ndakanya paka kɛnɛ kele lo Bible alangande nembetshiya na?
7 Wetshelo awɔ tomba oma lo Bible. Yeso akate ate: “Wetshelu ami aha wami, keli wa one lakantumi. Naka untu ayutsha lulangu la [Nzambi], ndi ayeya wetshelu, kana uma li [Nzambi] mbewo, kana dime kayata.” Ndo nto: “Untu a [Nzambi] atukaka akambu a [Nzambi].” (Joani 7:16, 17; 8:47) Diakɔ diele, di’onto mbetawɔma le Nzambi, nde pombaka ndakanyaka paka kɛnɛ kele l’Ɔtɛkɛta waki Nzambi ndo tona wetshelo w’oma lo lomba l’anto kana w’ashidi.—Isaya 29: :13; Mateu 15:3-9; Kolosai 2:8.
8. Bonde kele ekɔ ohomba kamba la lokombo laki Nzambi l’ɔtɛmwɛlɔ na?
8 Vɔ kambaka la lokombo la Nzambi, Jehowa ndo mboliewoyaka lo sɛkɛ. Isaya akatatshi ate: “Lu lushi loso nyayuta nyate: Nyukaki [Jehowa] lusaka, nyetaki lukumbu lande; nyusanyiaki wedja dia etsha andi, nyuwauhulaki dia wuki wa lukumbu landi. Nyembelaki [Jehowa] esambu, ne dia akambu wa mamba wakandatshi. Akambu aku weyami lu kete tshe.” (Isaya 12:4, 5) Yeso aketsha ambeki ande dia vɔ nɔmba ɔnɛ: “Shesu le l’ulungu, lukumbu laye lalemiami.” (Mateu 6:9) Diakɔ mbele, oyadi vɔ wekɔ ase Juda wa lotɔ kana ase wedja, Akristo pombaka kamba oko ‘anto wakasɔnama dikambo dia lokombo [laki Nzambi].’ (Etsha 15:14) Nzambi ngɛnangɛnaka efula dia mbetawɔ wanɛ wayafuna dia vɔ wekɔ ‘anto wakasɔnama dikambo dia lokombo lande.’
9. (a) Bonde kele ase ɔtɛmwɛlɔ wa mɛtɛ wekɔ l’ɔngɛnɔngɛnɔ? (b) Ngande wakatshikitanya Isaya ɔtɛmwɛlɔ wa mɛtɛ la wa kashi?
9 Vɔ mongaka l’ɔngɛnɔngɛnɔ w’oma lo lonto laki Nzambi. Oko wende kiɔkɔ ya “lokumu l’ololo,” Jehowa ekɔ “Nzambi k’ongenongeno.” (1 Timote 1:11) Lâsɔ lande na kakoka atɛmɔdi wakinde monga ase kɛtshi kana mɛnaka akambo paka la sso dia kɔlɔ na? Kânga mbele ekiyanu wekɔ efula l’andja ndo ekakatanu wele l’onto l’onto, Akristo wa mɛtɛ wekɔ nshi tshɛ la yimba y’ɔngɛnɔngɛnɔ nɛ dia wekɔ la dambo dia mbo ya ndɛ ya lo nyuma y’efula ya longolawɔ mbala la mbala. Isaya akɛnya otshikitanu wele lam’asa as’ɔtɛmwɛlɔ wa mɛtɛ la wanɛ wele l’ɔtɛmwɛlɔ wa kashi lam’akandate ate: “Diako mbata Khumadiondjo, [Jehowa] ate: Enda, ekambi ami wayole, keli nyu nyayuvo la ndjala. Ekambi ami wayono, keli nyu nyayuvo la pusa. Ekambi ami wayongenangena, keli nyu nyayutshama sonyi. Ekambi ami wayemba esambu la otema w’ongenongeno, keli nyu nyayulela la etema wa lunyangu, nyayukhuma akhumu la ukiyanu wa l’etema anyu.”—Isaya 65:13, 14.
10. Ngande wewɔ wanɛ wele l’ɔtɛmwɛlɔ wa mɛtɛ diaha vɔ pemba ndjela mboka ya kɔlɔ?
10 Vɔ mbɔtɔnganyiyaka lɔkɛwɔ lawɔ ndo tɛdikɔ tɔsawɔ l’atɔndɔ wa lo Bible. Ofundji wa Tokedi tolakaka ate: “Ekamaki [Jehowa] l’utemaye tshe, tekamaki yimba yaye hita, uwetawoki lu akambu aye tshe, ku ndi ayukolongoswela mbuka yaye.” (Tukedi 3:5, 6) Nzambi mbetawɔka wanɛ wayanga ɛlɔmbwɛlɔ kande lo dihole dia ndjaɛkɛ lo wetshelo wa tamu w’anto wanɛ wahetawɔ lomba laki Nzambi. Naka onto ambetawɔ dia mbɔtɔnganyiya lɔsɛnɔ lande l’Ɔtɛkɛta waki Nzambi, kete nde ayewɔ dia pemba ndjela mboka ya kɔlɔ—Osambu 119:33; 1 Koreto 1:19-21.
11. (a) Bonde kele ase ɔtɛmwɛlɔ wa mɛtɛ hawohombe monga l’olui w’ewandji ndo w’anto k’anto na? (b) Ɛnyɛlɔ kakɔna kasha wanɛ wele l’ɛkɛndɛ wa nɔmbɔla l’atei w’ekambi wa Nzambi le ɛkɔkɔ na?
11 Vɔ wekɔ l’ekongelo kele oko kɛnɛ kaki l’etshumanelo k’Akristo ka lo ntambe ka ntondo. Yeso akate diui nɛ ate: “Keli nyu tanyetamaki umbetsha, ne dia nyu nyeko la umbetsha otoi, ku nyu tshe nyeko anto la onangu. Tanyetaki untu a lu kete nyate: Shesu, ne dia nyu nyeko la [Shɛnyu] otoi, ndi eko l’ulungu. Tanyetamaki ewandji, ne dia nyu nyeko la uwandji otoi, Kristu ndame. Keli one luleki wuki l’atei anyu, [ayale] ukambi anyu.” (Mateu 23:8-11) Etshumanelo k’anangɛso hahombe monga l’olui ɔmɔtshi w’ewandji wayadiya vamɛ ladiko dia ambetawudi lo monga l’ahole kana la nkombo y’ɛnɛnɛ. (Jobo 32:21) Wanɛ walama ɛkɔkɔ waki Nzambi nɔmbamaka dia sala dikambo sɔ “aha la khudu, keli la etema w’ongenongeno, uku eli lulangu la [Nzambi], aha dikambu di’ukundji, keli la yimba yolongoswami. Tanyahamelaki wane weli l’okongo anyu, keli nyuyali tulimbitelu t’ololo le ekoko.” (1 Petero 5:2, 3) Elami w’Akristo wa mɛtɛ ndjalamaka diaha ndjaetɛ ewandji ladiko dia mbetawɔ k’anto akina. Oko wakambawɔ olimu kamɛ la Nzambi, vɔ salaka la wolo dia mbisha ɛnyɛlɔ ka dimɛna.—2 Koreto 1:24.
12. Kanyi yakɔna ya wɛdimo yalɔmba Nzambi anto walanga mbetawɔma lende monga layɔ otsha le lowandji l’anto?
12 Vɔ nɛmiyaka ewandji wa wedja koko vɔ namaka lomangemange. Onto lahalɛmiya “embuledi” hakoke nongamɛ dia mbetawɔma le Nzambi. Lande na? Ne dia “waulelu tshe weli uma le [Nzambi]. Onkone untu tshe lahendwela umbuledi, ambuhedia olembe a [Nzambi].” (Romo 13:1, 2) Koko Yeso akeye dia okakatanu mbeyaka monga lo dikambo sɔ lam’akandate ate: “Nyusha Kayisa diango dia Kayisa. Nyusha [Nzambi] diango dia [Nzambi].” (Mako 12:17) Wanɛ walanga mbetawɔma le Nzambi pombaka “ntundu tayangi diulelu la ololo wa [Nzambi],” ndo l’etena kakɔ kamɛ, nɛnyaka ɛlɛmbɛ wa wodja wɛnɛ wɔtɔnganɛ l’ɛkɛndɛ wa weke wele lawɔ la ntondo ka Nzambi. (Mateu 6:33; Etsha 5:29) Yeso akake epole ɔsɛkɛ lo kɛnɛ kendana la lomangemange lam’akandate dikambo d’ambeki ande ate: “Vo kema wa la kete, uku wemi kema la la kete.” Nde akayokotsha nto ate: “Diulelu diami diaha dia la kete nye.”—Joani 17:16; 18:36.
13. Ohomba akɔna wele la ngandji lo kɛnɛ kendana la mbeya ekambi waki Nzambi?
13 Vɔ kema la shɔnɔdi lam’asalewɔ ‘anto tshɛ ɔlɔlɔ.’ (Ngalatiya 6:10) Ngandji k’Okristo kema la shɔnɔdi, tɔ nangaka anto tshɛ aha la mbidja yimba lo lokoho la demba, ekondjelo, kalasa, wodja, kana ɔtɛkɛta awɔ. Salɛ anto tshɛ ɔlɔlɔ djekoleko ambetawodi kimanyiyaka dia mbeya wanɛ wetawɔma le Nzambi. Yeso akate ate: “Uma lu dikambu ne, anto tshe wayeya vate: Ambeki ami mbenyu, naka nyu nyayukana ngandji.”—Joani 13:35; Etsha 10:34, 35.
14. Onde anto tshɛ mbahomba ngɛnangɛna wanɛ wetawɔma le Nzambi? Lembetshiya.
14 Vɔ mbetawɔka dia mpɛnyahɛnyama l’ɔtɛ wasalawɔ lolango laki Nzambi. Yeso akat’ewodi ambeki ande ate: “Naka vo wakansuya, wayunyusuya ndu nyu. Naka vo wakakitanyia diui diami, wayukitanyia ndu diui dianyu.” (Joani 15:20; Mateu 5:11, 12; 2 Timote 3:12) Wanɛ wetawɔma le Nzambi hawotolangemaka nshi tshɛ oma le anto efula, oko waki Nɔa, ɔnɛ lakânya andja oma lo mbetawɔ kande. (Heberu 11:7) Ɛlɔ kɛnɛ wanɛ walanga mbetawɔma le Nzambi hawotshike ɔtɛkɛta waki Nzambi kana mɔnyɔla atɔndɔ waki Nzambi l’oyango wa mbewɔ ɛhɛnyɔhɛnyɔ. Vɔ mbeyaka ɔnɛ edja tshɛ kayowokambɛka Nzambi la kɔlamelo, anto ‘wayamba ndo wayotetemala la tɛkɛta kɔlɔ’ lo lokombo lawɔ.—1 Petero 2:12; 3:16; 4:4.
Etena ka Mbɛdika Akambo
15, 16. (a) Wembola akɔna wayotokimanyiya dia sho mbeya ɔtɛmwɛlɔ wetawɔma le Nzambi? (b) Lo kitshimudi yakɔna yakakome miliyɔ y’anto, ndo lande na?
15 Yambola wate: ‘Ɔtɛmwɛlɔ akɔna wayela Ɔtɛkɛta waki Nzambi dimɛna dimɛna, oyadi kânga etena konga wetshelo awɔ tshikitana la wɔnɛ w’etawɔ anto efula na? Waa na waleka mɛnya ohomba wa lokombo laki Nzambi polo ndo vɔ kamba lalɔ dia mbeyama lo sɛkɛ na? Waa na wɛnya l’eshikikelo tshɛ dia paka Diolelo diaki Nzambi mbayoyoshidiya pâ yele l’anto? Waa na wetawɔ ɛlɛmbɛ wa lo Bible wendana la lɔkɛwɔ kanga mbele dikambo sɔ mbakonyaka oko anto wambeta loowe? Olui akɔna w’anto weyama dia vɔ kema l’ewandji wafutama koko vɔ tshɛ wekɔ esambisha? Waa na w’andɔma lo woho wewɔ anto walɛnya ɛlɛmbɛ wa wedja kanga mbahawɔtɔ l’akambo wa pɔlitikɛ? Waa na wakamba la wenya ndo la falanga la ngandji tshɛ dia kimanyiya anto akina woho wa vɔ mbeya Nzambi ndo asangwelo ande? Waa na wele kânga mbakɛnɛmɔlawɔ akambo asɔ tshɛ wasungana mandɔma, wekɔ lo mbɔsama oko diangɔ dianyanya, wekɔ lo mɔnyɔma ndo pɛnyahɛnyama?
16 Miliyɔ y’anto l’andja w’otondo wakasɛdingola akambo ndo wakɛnyi dia paka Ɛmɛnyi wa Jehowa ato mbele l’ɔtɛmwɛlɔ wa mɛtɛ. Vɔ wakakome l’eshikikelo kɛsɔ lo menda kɛnɛ ketsha Ɛmɛnyi wa Jehowa ndo woho wele lɔkɛwɔ lakiwɔ mbɔtɔnganɛka dimɛna l’ɔtɛmwɛlɔ awɔ. (Isaya 48:17) Miliyɔ y’anto wekɔ lo mbuta oko wakatatshi Zɛkariya 8:23: “Shu tayutsho kame la nyu, ne dia shu takuki lukumu ati: [Nzambi] eko kame la nyu.”
17. Bonde kele kema dikambo dia lotamanya le Ɛmɛnyi wa Jehowa lam’atawɔ ɔnɛ vɔ mbele l’ɔtɛmwɛlɔ wa mɛtɛ?
17 Onde ekɔ dikambo dia lotamanya naka Ɛmɛnyi wa Jehowa mbuta ɔnɛ paka vamɛ ato mbetawɔma le Nzambi? Ndoko yema, kɛnɛ katawɔ ekɔ oko kɛnɛ kakataka ase Isariyɛlɛ lam’akiwɔ l’Edjibito dia vɔ waketawɔmaka le Nzambi kânga mbakiwɔ l’atei wa dietawɔ di’ase Edjibito, kana oko wakate Akristo wa lo ntambe ka ntondo ɔnɛ vɔ mbetawɔmaka le Nzambi lo dihole di’atɛmɔdi w’ase Juda wakafunaka dia vɔ mbetawɔma le Nzambi. Kɛnɛ keta mɛnyaka akambo hwe. Lo wedja 235, Ɛmɛnyi wa Jehowa wekɔ lo kamba olimu wakatatshi Yeso dia ambeki ande wa mɛtɛ wayokamba lo nshi y’ekomelo: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.”—Mateu 24:14.
18, 19. (a) Kânga mbalɔshamawɔ, bonde kele ndoko ɔkɔkɔ wahomba Ɛmɛnyi wa Jehowa tshika olimu w’esambishelo? (b) Ngande wɛnya Osambu 41:11 mɛtɛ dia Nzambi mbetawɔka l’Ɛmɛnyi wa Jehowa?
18 Ɛmɛnyi wa Jehowa wayotetemala la kamba olimu ɔsɔ, ndo vɔ hawotetawɔ pondjo dia ɛhɛnyɔhɛnyɔ kana wekamu kitshakitsha olimu wakiwɔ. Olimu waki Jehowa pombaka ndo wayotetemala kambema. Welo tshɛ wakadje anto akina lo ntambe ketshi dia shimba Ɛmɛnyi wa Jehowa di’aha vɔ kamba olimu waki Nzambi wakakite tatala nɛ dia Jehowa akalake ate: “Ehumo tshe kambutshulama dia ndo la ye huluwana. Lulimi tshe layukutungela dikambu l’elumbwelu, we ayuludja mananu. Oso eli sangu di’ekambi wa [Jehowa]. Oso eli eyindjamelu kawo uma le mi mbata [Jehowa].”—Isaya 54:17.
19 Woho wele Ɛmɛnyi wa Jehowa la wolo ndo wambowoleka ndjasha efula oleki ntondo kânga mbewɔ l’atei w’ɔlɔshamelo wasalema l’andja w’otondo, ekɔ djembetelo yɛnya dia Jehowa ekɔ lo ngɛnangɛna kɛnɛ kasalawɔ. Nkumekanga Davidi akate ate: ‘Dia dikambo nɛ mbeyami nte wɛ ngɛnangɛnakami, nɛ dia otunyi ami hanɛndjisha.’ (Esambu 41:11; 56:9, 11) Atunyi waki Nzambi hawokokaki nɛndja Ɛmɛnyi wa Jehowa pondjo lam’ele Owandji awɔ Yeso Kristo ekɔ lo tatetemala otsha la ntondo dia shidiya edjelo k’otshumba w’ekomelo!
Onde wɛ kokaka kadimola?
• Naa bɛnyɛlɔ dimɔtshi di’edjedja di’anto waketawɔmaka le Nzambi?
• Naa tolembetelo tɔmɔtshi takimanyiya dia mbeya ɔtɛmwɛlɔ wa mɛtɛ?
• Bonde keyɛ l’eshikikelo ɔnɛ Ɛmɛnyi wa Jehowa mbetawɔmaka le Nzambi?
[Osato wa lo lɛkɛ 24]
Wanɛ wakombola dia mbetawɔma le Nzambi pombaka mbetshaka paka kɛnɛ kele l’Ɔtɛkɛta ande
[Osato wa lo lɛkɛ 26]
Dikumanyi di’Akristo mbishaka ɛnyɛlɔ le ɛkɔkɔ