Ekakatanu w’anto wayanga shila!

JURUNALƐ yelɛwɔ Les réfugiés dans le monde 2000 yakate ɔnɛ: “Ekimanyielo kashawɔ anto hatonga l’etombelo w’ɔlɔlɔ naka ndoko ekongelo k’ɔlɔlɔ kosadimi ndo naka ase pɔlitikɛ hawodjisha lonya dia ndɔshana l’akambo wele lo kiɔkɔ y’ewanu. Mbala la mbala, akambo weta mɛnyaka di’ekimanyielo kashawɔ anto twamɛmɛ hakoke kandola ekakatanu woye oma l’awui wa pɔlitikɛ.”

Ekakatanu w’anto wekɔ lo tatetemala la pama tsho kânga mbakondjawɔ ekimanyielo k’efula. Onde elongamelo k’anto kandola ekakatanu wa pɔlitikɛ lo pondjo kekɔ? Lo mbuta mɛtɛ, ekɔ paka yema y’elongamelo tshitshɛ. Ko lende akokaso mendɛ nto na? Lo divɛsa dimɔtshi dia l’etatelo ka mukanda ande le Akristo wa l’Ɛfɛsɔ, ɔpɔstɔlɔ Paulo nembetshiyaka woho wayokomiya Nzambi ekakatanu tshɛ wele l’anto. Nde mɛnyaka ndo ehomɔ kayokamba la Nzambi dia sala dikambo sɔ, ehomɔ kayonya kiɔkɔ y’ekakatanu tshɛ watɛnya pâ ɛlɔ kɛnɛ. Bonde kahatasɛdingola kɛnɛ kalanga Paulo mbuta na? Sho tanaka awui akɔ l’​Efeso 1:3-10.

“Dia nsanganya diango tshe le Kristu”

Ɔpɔstɔlɔ mbutaka dia sangwelo diaki Nzambi mendanaka la kɛnɛ kelɛnde ɔnɛ ‘ɔlɔmbwɛlɔ ɔmɔtshi [kana ɔlɔngɔswɛlɔ w’akambo] l’ekomelo ka tena diakasɔnama.’ Kakɔna kalembetshiya dikambo sɔ na? Diɔ nembetshiyaka dia Nzambi akasɔnɛ etena kɛmɔtshi dia mona woho wa “nsanganya diango tshe le Kristu, ndu dia l’ulungu, ndu diango dia la kete.” (Efeso 1:10, sho mbɛnganyisha alɛta ango.) Eelo, Nzambi akatatɛ kamba l’ɔlɔngɔswɛlɔ ɔmɔtshi dia nsanganya kamɛ diangɔ dia l’olongo ndo dia la nkɛtɛ nto lo ɛlɔmbwɛlɔ kande. Koko, lo kɛnɛ kendana la tshɛkɛta yokadimwami lanɛ ɔnɛ ‘nsanganya nto kamɛ,’ nomb’ewo ka l’awui wa Bible Henry Thayer mbutaka dia dikambo sɔ nembetshiyaka: “Ndjasanganyɛ nto . . . diangɔ ndo ditongami tshɛ kamɛ (diaki komonga nto kamɛ l’ɔtɛ wa pɛkato) dia diɔ monga la eongelo kamɛ le Kristo.”

Dui sɔ mɛnyaka di’ekɔ ohomba le Nzambi dia sala dikambo sɔ lo menda diatɔnelo diakayongaka lo dihole dia ntondo. L’etatelo k’ɔkɔndɔ w’anto, ambutshi aso wa ntondo wakayele ɛnyɛlɔ kaki Satana Diabolo lo tɔmbɔkwɛ Nzambi. Vɔ wakalange kondja lotshungɔ la vɔ mbɔsaka tɛdikɔ vamɛ lo dikambo dia kɛnɛ kele ɔlɔlɔ la kɛnɛ kele kɔlɔ. (Etatelu 3:1-5) Lo yoho yɔtɔnɛ la losembwe laki Nzambi, vɔ wakatshanyema oma l’atei wa nkumbo kaki Nzambi ndo wakashisha lɔngɛnyi laki lam’asawɔ la nde. Vɔ wakadje anto lo eongelo kele bu kokele ndo l’ekakatanu w’oma lo eongelo kɛsɔ wadiɛnɛ anto lawɔ ɛlɔ kɛnɛ.​—Romo 5:12.

Otshikelo w’akambo wa kɔlɔ lo tshanda mɔtshi

Anto amɔtshi koka mimbola ɔnɛ: ‘Lande na kakatshike Nzambi anto asɔ dia sala dikambo sɔ na? Lande na kakinde kokamba la nkudu kande kaheme tshɛ ndo sala la wolo dia lolango lande salema dia kokɛ anto tshɛ oma lo pâ ndo asui wotodiɛnɛ lawɔ ɛlɔ kɛnɛ na?’ Mbeyaka tokomɛ dia sho kanyiya ngasɔ. Ko otondokamba la nkudu kande koleki tshɛ kɛsɔ, kakɔna kotɛnya mɛtɛ dikambo sɔ na? Onde wɛ koka ngɛnangɛna kana mbetawɔ onto lele dui dia ntondo diasalande dia mɛnya dia nde ambomala ele tsho tɛtshatɛtsha wanɛ wosadi dikambo sɔ nɛ dia nde ekɔ la wolo wa sala dikambo diakɔ? Wɛ mɛtɛ hatɔngɛnangɛna onto la ngasɔ.

Atɔmbɔki asɔ kombidja tâmu lo dikambo dia nkudu koleki tshɛ kele Nzambi. Koko kɛnɛ kakawɔnyɔla lo yoho ya lânde ele lotshungɔ lele lande la nɔmbɔla ndo yoho yande ya nɔmbɔla. Dia kandola dikambo sɔ mbala ɔtɔi lo pondjo, Jehowa akatshike l’etena kɛmɔtshi dia ditongami diande ndjalɔmbɔla vamɛ aha l’ekimanyielo kande. (Undaki 3:1; Luka 21:24) Lam’ayokomɛ etena kɛsɔ, nde ayɔsa yɛdikɔ ya tatɛ nɔmbɔla nto akambo tshɛ wa la nkɛtɛ. Oma l’etena kɛsɔ, ayɛnama hwe dia yoho yande ya nɔmbɔla mbele yoho yamɛ yayela wɔladi, ɔngɛnɔngɛnɔ, ndo ɔngɔnyu lo pondjo pondjo le anto wa la nkɛtɛ. Oma lâsɔ nde ayonya atunyi ande tshɛ wa lanɛ la nkɛtɛ lo pondjo.​—Osambu 72:12-14; Danyele 2:44.

“La Ntundu k’etungelu k’andja”

Jehowa akasangoya dia sala akambo asɔ tshɛ edja efula la ntondo. Paulo tɛkɛtaka dia ‘la ntondo k’etongelo k’andja.’ (Efeso 1:4) Aha la ntondo k’etongelo ka nkɛtɛ kana k’Adama l’Eva mbatawɔ lanɛ nɛ dia andja ɔsɔ waki “kawo,” ndo ɔtɔmbɔkwɛlɔ kotshikitanya dikambo sɔ. (Etatelu 1:31) Ko lâsɔ “andja” akɔna wakatɛkɛta ɔpɔstɔlɔ Paulo lanɛ na? Andja waki ana w’Adama l’Eva, mbut’ate andja w’atshi wa pɛkato wele bu kokele wele l’elongamelo ka tshungwama. La ntondo ka Adama l’Eva mbota , Jehowa akeyaka woho wayondokandola akambo dia tshungola ana w’Adama.​—Romo 8:20.

Dui sɔ hadiɛnya dia Nkum’olongo ayokandola akambo lo yoho yasala anto. Lam’eyawɔ ɔnɛ dikambo dimɔtshi dia wanyandja koka tomba, anto mbɔsaka tɛdikɔ efula totshikitanyi la ntondo dia ndɔshana la dikambo diakɔ. Koko Nzambi kanga nkudu tshɛ mbɔsaka tɛdikɔ ndo tikotshaka. Diakɔ dialembetshiya Paulo woho wakɔshi Jehowa yɛdikɔ ya kandola akambo, mbut’ate dia tshungola anto lo pondjo. Naa tɛdikɔ tɔsɔ takandɔshi na?

Akɔna ayela etshungwelo?

Paulo nembetshiyaka dia ambeki waki Kristo w’akitami w’esɔ wekɔ l’ɔkɛndɛ wa lânde wa minya etombelo wa kɔlɔ w’oma lo pɛkato kaki Adama. Paulo mbutaka ate Jehowa ‘akatɔsɔnɔla dia monga kamɛ la [Kristo],’ mbut’ate dia tolɛ kamɛ la Yeso lo Diolelo diande dia l’olongo. Dia nembetshiya dikambo sɔ dimɛna, Paulo mbutaka ate Jehowa ‘akatɔsɔnɔla la ntondo dia monga oko anande wa yanyi oma lo tshimbo ya Yeso Kristo.’ (Efeso 1:4, 5) Lo mɛtɛ, Jehowa kɔsɔna, kana mbaɔsa la ntondo l’onto ndo l’onto. Koko nde akasɔnɛ la ntondo djui mɔtshi y’anto wele la kɔlamelo ndo wakayakimɔ dia vɔ la Kristo minya etombelo wa kɔlɔ wakela Satana Diabolo nde l’Adama l’Eva nkumbo k’anto.​—Luka 12:32; Heberu 2:14-18.

Ɔsɔ mɛtɛ ekɔ dikambo dia diambo efula mɛtɛ! Lo tɔfwɛfwɛ takandadje ntondo dikambo dia lowandji laki Nzambi, Satana akakanyiya dia lam’ele anto wakatonge Nzambi waya kema kokele, vɔ koka tɔmbɔkwɛ lowandji laki Nzambi naka nde mbahemba kana mbatshutshuya dia sala dikambo sɔ. (Jobo 1:7-12; 2:2-5) Dia kɛnɛmɔla “ngandji kande ka shikaa” lo yoho ya diambo efula, Jehowa Nzambi akɛnya wɛkamu wele lande otsha le anto lo nsɔna anto amɔtshi oma l’atei w’ana waki Adama dia vɔ monga anande wa lo nyuma. Wanɛ wele l’atei wa djui ya tshitshɛ shɔ wayɔsama dia tokamba l’olongo. L’oyango akɔna na?​—Efeso 1:3-6; Joani 14:2, 3; 1 Tesalonika 4:15-17; 1 Petero 1:3, 4.

Ɔpɔstɔlɔ Paulo mbutaka di’ana wa yanyi waki Nzambi asɔ wayonga ‘ekitɔ kamɛ la Kristo’ lo Diolelo diande dia l’olongo. (Romo 8:14-17) Oko nkumi ya dikanga ndo ɛlɔmbɛdi, vɔ wayokamba dia tshungola nkumbo k’anto oma lo pâ ndo oma l’asui wele lawɔ ɛlɔ kɛnɛ. (Enyelo 5:10) Lo mɛtɛ, “ditungatunga tshe diatukhumaka akhumu, ndu diatutataka nyono lu diutelu edja ndu kakiane.” Ɔnkɔnɛ, kema edja, ditongami sɔ, djekoleko ana wakasɔnɛ Nzambi wayoyela Yeso Kristo lo kɛnɛ kayondosala, ndo akanga w’okitanyiya tshɛ ‘wayotshungɔ oma l’ɛhɔndɛlɔ ndo monga la lotshungɔ l’ana wa Nzambi’ nto.​—Romo 8:18-22.

‘Etshungwelo k’oma l’olambo wa tshungo’

Akambo asɔ tshɛ wakasalema oma lo tshimbo ya ngandji kaki Nzambi ka diambo ndo k’otamanya otsha le andja ɔnɛ wasungana tshungɔma, mbut’ate oma l’olambo wa tshungo waki Yeso Kristo. Paulo akafunde ate: “Etshungwelu keso keko le ndi [Yeso Kristo] uma lu dikila, lu edimanyelu ka kolo yasu, uku weli ongonyi wa ngandji kandi ka mamba.”​—Efeso 1:7, sho mbɛnganyisha alɛta ango.

Yeso Kristo ekɔ l’ɔkɛndɛ wa woke l’ekotshamelo ka sangwelo diaki Nzambi. (Heberu 2:10) Olambo ande wa tshungo mbakakimanyiya dia Jehowa sɔna anto amɔtshi oma l’atei w’ana waki Adama otsha lo nkumbo kande ka l’olongo ndo dia vɔ tshungola anto oma lo pɛkato k’Adama, aha la nde sekola ɛlɛmbɛ ndo atɔndɔ Ande. (Mateu 20:28; 1 Timote 2:6) Jehowa akasale akambo lo yoho yɔtɔnɛ la losembwe lande ndo akakotsha kɛnɛ kalɔmba losembwe lande la kokele.​—Romo 3:22-26.

‘Sheke y’ekila’ yaki Nzambi

L’edja k’ɛnɔnyi nunu, Nzambi kombishola shikaa woho wakandahombe kotsha sangwelo diande diendana la nkɛtɛ. Lo ntambe ka ntondo lo tena diaso nɛ, ‘nde akewoya Akristo sheke y’ekila yendana la lolango lande.’ (Efeso 1:9) Paulo nde l’asekande Akristo w’akitami w’esɔ wakashihodia dimɛna ɔkɛndɛ wa diambo wakawasha Yeso lo kɛnɛ kendana l’ekotshamelo ka sangwelo diaki Nzambi. Vɔ lawɔ wakamɛ shihodia ɔkɛndɛ wa lânde wele lawɔ oko wewɔ ekitɔ wa Diolelo dia l’olongo kâmɛ la Kristo. (Efeso 3:5, 6, 8-11) Eelo, lowandji la Diolelo lambokimɔma l’anya wa Yeso Kristo ndo wa wanɛ wayolɛ kâmɛ la nde ekɔ ehomɔ kayokamba la Nzambi dia mbela wɔladi wa pondjo aha tsho l’olongo koko ndo lanɛ la nkɛtɛ. (Mateu 6:9, 10) Lo tshimbo ya lowandji lɔsɔ, Jehowa ayokonya nkɛtɛ paka oko waki sangwelo diande dia l’etatelo lo kɛnɛ kendana latɔ.​—Isaya 45:18; 65:21-23; Etsha 3:21.

Etena kakandashikikɛ dia minya akambo tshɛ wa kɔlɔ ndo wa wɛngiya oma la nkɛtɛ kaya suke. Koko Jehowa akamɛ ɔlɔngɔswɛlɔ ɔsɔ oma ko Pɛntɛkɔsta ka l’ɔnɔnyi 33 T.D. Lo woho akɔna na? Lo tatɛ tshumanya ‘diangɔ dia l’olongo,’ mbut’ate wanɛ wayolɛ kamɛ la Kristo l’olongo. L’atei w’anto asɔ mbele ndo Akristo wa l’Ɛfɛsɔ. (Efeso 2:4-7) Atete edja, lo nshi yaso nyɛ, Jehowa akatshumanya ‘diangɔ dia la nkɛtɛ.’ (Efeso 1:10) Oma l’olimu w’esambishelo wakambema l’andja w’otondo, nde ekɔ lo sala dia wedja tshɛ mboka lokumu l’ɔlɔlɔ lendana la Diolelo diande diambokimɔma l’anya wa Yeso Kristo. Wanɛ wetawɔ lokumu l’ɔlɔlɔ lɔsɔ wekɔ lo tshumanyema ɛlɔ kɛnɛ lo dihole di’ekokelo ndo di’ɛkɔnwɛlɔ ka lo nyuma. (Joani 10:16) Kem’edja, lo paradiso kayonga lo nkɛtɛ kambɛdiama, vɔ wayotshungɔ tshɛ lo tshɛ oma l’awui tshɛ wa wɛngiya ndo oma l’asui.​—2 Petero 3:13; Enyelo 11:18.

“Anto wakasale akambo efula” lo kɛnɛ kendana la kimanyiya anto wele lo sowa. (The State of the World’s Children 2000) Koko Yeso nde la wanɛ wayolɛ kâmɛ la nde lo Diolelo dia l’olongo mbayokonya dikambo sɔ lo dikuma. Vɔ wayonya oseka kiɔkɔ ya dikambo tshɛ diatondja ewanu ndo akambo akina wa kɔlɔ wɛnya anto pâ. Vɔ wayonya ekakatanu tshɛ wele l’anto.​—Enyelo 21:1-4.

[Esato wa lo lɛkɛ 4]

Ekimanyielo kakasha anto kokandola ekakatanu awɔ

[Osato wa lo lɛkɛ 6]

Olambo wa tshungo waki Kristo akatshungola anto oma lo pɛkato k’Adama

[Osato wa lo lɛkɛ 7]

Anto koka tana ekokelo ndo ɛkɔnwɛlɔ ka lo nyuma ɛlɔ kɛnɛ

[Esato wa lo lɛkɛ 7]

Kem’edja, lo tshimbo ya Diolelo dia Mɛsiya anto wayotshungɔ lo pondjo oma l’ekakatanu