‘Didjango diaki Jehowa’ hadiokoke kita tatala
“Dimi layudianganya didjangu [dia Jehowa]. Ndi akamvutela ati: On’ami a pami keye . . . Onombe, ku dimi layukusha wedja ukito.”—OSAMBU 2:7, 8.
1. Otshikitanu akɔna wele lam’asa sangwelo diaki Nzambi la diaki wedja?
JEHOWA NZAMBI ekɔ la sangwelo lo dikambo di’anto ndo dia nkɛtɛ. Wedja vɔ lawɔ wekɔ la sangwelo dimɔtshi. Koko, asangwelo asɔ tshikitana efula! Sho pombaka nongamɛ dikambo sɔ, nɛ dia Nzambi mbutaka ate: “Uku anganyi ulungu la kete etali, wuhu ako mbanganyi ditshelu diami la ditshelu dianyu, ndu tukanyi tami la tukanyi tanyu etali.” Sangwelo diaki Nzambi diayokotshama ndoko onyake nɛ dia nde ekɔ lo mbuta ate: “Uku atolokaka mvula la lungi l’ekama la tshitshi uma l’ulungu, ku yo hayukalula utsha leko edja ndu yo yambutaloyisha kete, edja ndu yo yambutayitemisha, yambutatumbisha tumbatumba, edja ndu yo yambutasha umbuki a wuhu wehu, la undeshi wa ma ma. Osoku mbatuyalaka diui diatutumbaka uma l’unyo ami: Dio hadiutukalulaka le mi ukalulakalula. Keli dio diatutshaka lulangu lami ndu diatushidiyaka kene kakamasanguya.”—Isaya 55:9-11.
2, 3. Kakɔna kɛnyami hwe l’osambo wa hende, ko wembola akɔna wonyiyama?
2 Osambu wa hende mɛnyaka hwe dia sangwelo diaki Nzambi diendana la Mɛsiya Nkumekanga kande diayokotshama. Ofundji w’osambo ɔsɔ, mbut’ate Nkumekanga Davidi ka l’Isariyɛlɛ w’edjedja, akasambiyama oma le Nzambi dia nde mbuta dia ayoyala etena kɛmɔtshi kakashikikɛma kele wedja wayonga l’osukusuku. Nkumi ya dikanga yawɔ wayɔlɔshana la Jehowa Nzambi nde l’Okitami ande w’Esɔ. Koko, omembi w’esambo akembe nto ate: “Dimi layudianganya didjangu [dia Jehowa]. Ndi akamvutela ati: On’ami a pami keye . . . Onombe, ku dimi layukusha wedja ukito, kuma ya kete yayuyala yaye.”—Osambu 2:7, 8.
3 Kakɔna kalembetshiya ‘didjango diaki Jehowa’ otsha le wedja? Ngande wele ‘didjango diaki Jehowa’ ekɔ la shɛngiya le anto tshɛ? Ko etombelo wayonga la didjango diaki Jehowa otsha le wedja ekɔ lo nembetshiya dikambo diakɔna otsha le ambadi tshɛ w’osambo wa hende wanɛ woka Nzambi wɔma?
Wedja waya l’osukusuku
4. Akokayɛ mbuta lo tshena pe lo kɛnɛ kendana l’awui w’ohomba wele l’Osambu 2:1, 2?
4 Lo tɛkɛta dikambo di’owanu wakatama ɔnɛ wayonga lam’asa Nzambi la wedja, omembi w’esambo akatatɛ la memba ɔnɛ: “Okoko wana [“waya wedja l’osukusuku,” NW], ndu watsha [“ase wedja,” NW] fyungi anyanya? Khumi ya dikanga ya la kete wambuyashikike, ndu embuledi wambudja sheki kame la wo, dia nsemanela la [Jehowa] ndu la one lakandakiti iso.”—Osambu 2:1, 2.a
5, 6. Ase wedja wambodja “fyungi” lo dikambo diakɔna di’“anyanya”?
5 Naa ‘fyungi y’anyanya’ yele ase wedja wa nshi nyɛ wekɔ lo mbidja “sheki”? Lo dihole dia vɔ mbetawɔ Okitami w’Esɔ waki Nzambi mbut’ate Mɛsiya kana Kristo, wedja wekɔ lo mbidja “fyungi,” kana wekɔ lo tetemala kana yimba lo yoho yakokawɔ kokɛ lowandji lawɔ. Ɛtɛkɛta ɛsɔ wa l’osambo wa hende wakakotshama nto lo yɛdikɔ mɔtshi lo ntambe ka ntondo lo T.D., etena kakakambe ewandji w’ase Juda ndo w’ase Rɔma kâmɛ dia ndjaka Yeso Kristo, Nkumekanga Kakasɔnwama oma le Nzambi. Koko, ekotshamelo ka woke kakatatɛ lo 1914 etena kakahenyama Yeso l’okudi oko Nkumekanga ka l’olongo. Oma k’etena kɛsɔ, ndoko lowandji ɔtɔi la pɔlitikɛ la lanɛ la nkɛtɛ laketawɔ Nkumekanga kakahenyama l’okudi oma le Nzambi kɛsɔ.
6 Kakɔna kakalange omembi w’esambo mbuta lo mumbola ɔnɛ: ‘Lande na kadja ase wedja fyungi y’anyanya’? Oyango wele lawɔ mbele anyanya; vɔ haweyama ɔtɛ l’ekolo ndo wayokita tatala. Vɔ hawokoke mbela ki ndo mbidja diokanelo l’okama ɔnɛ wa nkɛtɛ. Eelo, vɔ wambodja welo awɔ tshɛ dia ndɔshana l’ɛlɔmbwɛlɔ kaki Nzambi. Lo mɛtɛ, vɔ wambotshumana kâmɛ la kɛlɛ tshɛ dia ndɔshana la Nkum’Olongo ndo la Okitami ande w’Esɔ. Ande dikambo di’enginya lee!
Nkumekanga ka Jehowa ambodja otshumba
7. Lo dɔmbɛlɔ diawɔ, ambeki waki Yeso wa ntondo wakɛnya di’awui wa l’Osambu 2:1, 2 mendanaka l’onto akɔna?
7 Ambeki waki Yeso wakɛnya dia ɛtɛkɛta wa l’Osambu 2:1, 2 wakakotshama le Yeso. Lam’akawasoyama dikambo dia mbetawɔ kawɔ, vɔ wakalɔmbɛ vate: “Khumadiondjo, we kakatungi ulungu la kete, la ashi a waki, la diango tshe dieli loko. We kakati uma le [n]yuma k’[ekila] l’unyo wa tshesu Davidi, ukambi aye, wati: Okoko wana wa[ya] asi wedja [“l’osukusuku,” NW]? Okoko wana wakakani antu akambu w’anyanya? Khumi ya dikanga ya la kete wakashikikala, embuledi wakasangana, dia mbidjela Khumadiondjo sheki, ndu le Ukitami andi w’iso. Mete, l’usumba one, Herode la Potiyo Pilata, la asi wedja, la asi Isariyele wakasangana dia mbidjela ukambi aye w’ekila Jesu, lakayakiti iso, sheki.” (Etsha 4:24-27; Luka 23:1-12)b Eelo, lo ntambe ka ntondo, anto asɔ wakadjɛ Yeso lele okambi ndo okitami w’esɔ waki Nzambi sheke. Koko, osambo ɔnɛ akahombe monga l’ekotshamelo kekina ntambe efula l’ɔkɔngɔ.
8. Ngande wendana Osambu 2:3 la wedja wa nshi nyɛ?
8 Lam’aki Isariyɛlɛ w’edjedja la nkumekanga kɛmɔtshi k’onto, oko Davidi, wedja w’apanganu la ewandji wakasangana kâmɛ dia ndɔsha Nzambi ndo okitami ande w’esɔ wakandahenya l’okudi. Ko kayotota lo dikambo dia nshi yaso nyɛ? Wedja wa nshi nyɛ hawolange ndjaɔtɔnganyiya la kɛnɛ kalɔmba Jehowa nde la Mɛsiya. Ɔnkɔnɛ, vɔ wekɔ oko wanɛ wata ɔnɛ: “Tuhimbuli molola awo, tuyatshunguli uma l’ekodi awo.” (Osambu 2:3) Emboledi la wedja hawotɔlɛnya elelo tshɛ wayowadjɛ Nzambi nde l’Okitami ande w’Esɔ. Ɔnkɔnɛ, welo tshɛ wayowodja dia pembola mɔlɔla ndo ndjatshungola oma l’ɛkɔdi wayoyala anyanya.
Jehowa Ayowaɔla
9, 10. Lande na kele Jehowa ekɔ lo mɔnyɔla wedja?
9 Jehowa hadje yimba lo welo tshɛ wadja ewandji wa wedja dia vɔ ndjalɔmbɔla vɔamɛ aha l’ekimanyielo kande. L’ɛtɛkɛta w’omembi w’esambo, Nzambi ekɔ lo mbuta ate: “One ludjashi l’ulungu ayuwaola, Khumesu ayuwaonyola.” (Osambu 2:4) Nzambi ekɔ lo tatshu la sangwelo diande otsha la ntondo ndo emboledi wekɔ oko tangangɔ t’anyanya lo washo ande. Nde ekɔ lo mbaɔla l’ɔtɛ wa lotamanya lawɔ ndo ayowaɔnyɔla. Nde ambâtshika dia vɔ funa kɛnɛ kambowosangoya dia sala. Le Jehowa vɔ wekɔ ɛngɔ ka tɔla. Nde ekɔ lo mbɔla ɔlɔshamelo awɔ.
10 L’ahole akina wa l’esambo ande, Davidi ekɔ lo tɛkɛta di’atunyi ndo di’ase wedja ndo nde akembe ate: “[Jehowa], we [Nzambi] kanga lulimbilimbi, we keli [Nzambi k]a Isariyele. Uneli dia ndjusuya wedja tshe. Tusambwelaki nduku otoi a wane watutshaka kolo. Vo watukalulaka la dikolo, watundaka engumba uku fo, watutshimbaka usumba. Vo watutaka aui wa lotengo, tombo teko l’elomo awo, ne dia vo watumbwanaka vati: Uka akambu watasu na? Keli we [Jehowa] ayuwaola, ee, we ayonyola wedja tshe.” (Osambu 59:5-8) Jehowa ekɔ lo mbɔla ɔsɛmɔ ndo dionga dia kɔlɔ diele la wedja lo menda yɛdikɔ yele oko akanga w’aladi yambowɔsa lo kɛnɛ kendana la Jehowa.
11. Kakɔna kayotomba etena kayona wedja dia fukutanya sangwelo diaki Nzambi?
11 Ɛtɛkɛta wa l’Osambu 2 keketshaka mbetawɔ kele laso ɔnɛ Nzambi kokaka mbekola oseka wekamu tshɛ. Sho koka monga l’eshikikelo ka wolo ɔnɛ nde kotshaka sangwelo diande mbala tshɛ ndo nde hakalɛki ekambi ande wa kɔlamelo pondjo. (Osambu 94:14) Ko lâsɔ, kakɔna kayotomba lam’ayodja wedja wolo awɔ dia fukutanya sangwelo diaki Jehowa? Lo ndjela osambo ɔnɛ, Nzambi “ayuwateketela la kele,” ndo la londjo la wolo lele oko dikungola dia ndjadi. Ndo nto, ‘l’odudu ande, nde ayowafukutanya wɛɔngɔ’ watekana oko ndjadi ka wolo kambowalɛ.—Osambu 2:5.
Nkumekanga kaki Nzambi ambahenyama l’okudi
12. Osambu 2:6 mendanaka la wahemelo wa l’okudi waki na?
12 Aha la tâmu, kɛnɛ kambota Jehowa nto oma lo tshimbo y’omembi w’esambo ambokiyanya wedja. Nzambi ambota ate: “Dimi lambukitsha khum’ekanga kami la Siona, dikuna diami di’ekila.” (Osambu 2:6) Dikona dia Siɔna akikɔ okongo ɔmɔtshi wa la Jerusalɛma, lɛnɛ akakitshama Davidi oko nkumekanga. Koko, Mɛsiya Nkumekanga hodjasɛ lo kiti ka diolelo ka l’osomba ɔsɔ kana lo dihole dimɔtshi dia lanɛ la nkɛtɛ. Ɔnkɔnɛ, Jehowa amboshilaka mbahenya Yeso Kristo l’okudi oko Nkumekanga l’Okongo wa Siɔna wa l’olongo.—Enyelo 14:1.
13. Sheke yakɔna yakadje Jehowa nde l’Ɔnande?
13 Kakianɛ Mɛsiya Nkumekanga ɔtɛkɛta. Nde ambota ate: “Dimi layudianganya didjangu [dia Jehowa]. Ndi akamvutela ati: On’ami a pami keye, elo kene kukutshimi.” (Osambu 2:7) Yeso akatɛkɛta dikambo dia sheke ya Diolelo lam’akandatɛ apɔstɔlɔ ande ate: “Keli nyu nyambutshikala la mi l’ehimba ami. Dimi lambunyusha diulelu uku akambisha Papa.”—Luka 22:28, 29.
14. Lande na kakokaso mbuta dia Yeso ekɔ la lotshungɔ la monga nkumekanga?
14 Oko wakadiatɛkɛtama l’Osambu 2:7, Jehowa akɛnya dia Yeso ekɔ Ɔnande lo batismu kande ndo lo mbolola otsha lo lɔsɛnɔ la lo nyuma. (Mako 1:9-11; Romo 1:4; Heberu 1:5; 5:5) Eelo, Nkumekanga ka Diolelo dia l’olongo ekɔ Ɔna ɛtɔi laki Nzambi. (Joani 3:16) Lam’ele nde ekɔ oma lo dioho dia Nkumekanga Davidi, Yeso ekɔ la lotshungɔ la monga nkumekanga. (2 Samuele 7:4-17; Mateu 1:6, 16) Lo ndjela osambo ɔnɛ, Nzambi ambotɛ Ɔnande ate: “Onombe, ku dimi layukusha wedja ukito, kuma ya kete yayuyala yaye.”—Osambu 2:8.
15. Lande na kakalɔmbɛ Yeso wedja oko okitɔ?
15 Nkumekanga, mbut’ate Ɔnaki Nzambi hita ekɔ lo dihole dia hende oma lale Jehowa. L’atei w’ehemba, Yeso akatanema onto ɔlɔlɔ, lele la kɔlamelo ndo laha l’onongo lo washo wa Jehowa. Ndo nto, Yeso akalongola okitɔ w’Ɔna enondo laki Nzambi. Lo mɛtɛ, Yeso Kristo “eli efanelu ka [Nzambi] kahenama, enundu a diango tshe diakatungama.” (Kolosai 1:15) Kɛnɛ tshɛ kalangande sala nde kilɔmbaka ndo Nzambi ‘akawosha wedja oko okitɔ ndo tokoma ta nkɛtɛ oko ɛngɔ kande.’ Yeso akalɔmbɛ wedja oko okitɔ nɛ dia nde ‘akayashaka efula l’akambo wendana l’ana w’anto’ ndo nɛ dia nde aki la nsaki k’efula ka kotsha sangwelo diaki She diendana la nkɛtɛ ndo l’anto.—Tukedi 8:30, 31.
Didjango diaki Jehowa otsha le wedja
16, 17. Lo ndjela Osambo 2:9, kakɔna kayokomɛ wedja?
16 Lam’ele osambo wa hende ekɔ lo kotshama kakianɛ, lo wôngelo waki Yeso Kristo wahɛnama, kakɔna kayokomɛ wedja? Nkumekanga ayanga kotsha kema edja ɛtɛkɛta waki Nzambi, wata ɔnɛ: “We ayuwaulela la [“danga dia,” NW] luwulu, ayahandjula uku puki k’ukingi.”—Osambu 2:9.
17 Okalemba wa nkumekanga wa lo nshi y’edjedja waki didjidji dia lowandji laki nkumekanga. Alanga amɔtshi wakasalemaka la lowolo, oko danga diatɛkɛtama l’osambu ɔnɛ. Ɛtɛkɛta wa didjidji wokambi lawɔ lanɛ mɛnyaka woho akɔna wele hatonga wolo le Kristo Nkumekanga dia nde ndanya wedja. Mpoke ka diwomba kaki okengi kayolɛ esadi eto kana koma efushi eto, naka vɔ kikɔmɔla danga dia lowolo la wolo tshɛ.
18, 19. Dia mbetawɔma le Nzambi, kakɔna kahomba nkumi ya dikanga ya la nkɛtɛ sala?
18 Onde emboledi a wedja wayohomba mɛna elanyelo kɛsɔ? Ndoko, nɛ dia omembi w’esambo mbalɔmbaka ate: “Kakiane nyu khumi ya dikanga, nyuyalombole la [“shɛnɔdi,” NW]; nyu embadi wa la kete [“nyetawɔ dia vɔ nyongola,” NW].” (Osambu 2:10) Nkumi ya dikanga wambelamɛ dia vɔ mbidja yimba dimɛna, mbut’ate monga la shɛnɔdi. Vɔ pombaka sɛdingola woho ɔnɛ wele eyango awɔ wekɔ anyanya, otshikitanyi la kɛnɛ kayosala Diolelo diaki Nzambi dia wahɔ w’anto.
19 Dia vɔ mbetawɔma le Nzambi, nkumi ya dikanga ya la nkɛtɛ pombaka tshikitanya ditshelo diawɔ. Vɔ mbalakaka dia ‘kambɛ Jehowa olimu la wɔma ndo monga l’ɔngɛnɔngɛnɔ la lokomba.’ (Osambu 2:11) Kakɔna kayotomba naka vɔ ntsha ngasɔ? Lo dihole dia vɔ monga l’osukusuku kana tshimba wɛɔngɔ, vɔ kokaka ngɛnangɛna lo kɛnɛ kendana l’elongamelo kambâkitshɛ Mɛsiya Nkumekanga la ntondo. Ayonga ohomba le ewandji wa la nkɛtɛ nyɛ dia vɔ tshika dionga diawɔ di’otako ndo dia lotamanya diɛnama lo yoho yalɔmbɔlawɔ. Ndo nto, vɔ pombaka tshikitanya dionga diawɔ aha la tshimbatshimba ndo monga la shɛnɔdi lo kɛnɛ kendana la lowandji laheme tshɛ laki Jehowa ndo la nkudu k’efula kele la Nzambi nde la Mɛsiya Nkumekanga kande.
“Nyonone ona pami”
20, 21. Kakɔna kalembetshiya ‘nɔna ɔna pami’?
20 Osambu 2 ambosha emboledi wa wedja leeta la kɛtshi tshɛ. Lo dihole dia vɔ tshumana kâmɛ dia ndɔshana la Nzambi, vɔ wambowasha dako ɔnɛ: “Nyonone ona pami, ndi atukumala kele, ku nyu nanyema lu mbuka kanyu.” (Osambu 2:12a) Anto tshɛ pombaka kitanyiya Nkumadiɔndjɔ Jehowa lam’adjande didjango dimɔtshi. Etena kakashikikɛ Nzambi Ɔnande l’okudi, emboledi wa la nkɛtɛ wotohomba tshika dia mbidja ‘fyungi y’anyanya.’ Vɔ wotohomba mbetawɔ Nkumekanga aha la tshimbatshimba ndo monga l’okitanyiya wa tshɛ le nde.
21 Lande na kahombawɔ ‘nɔna ɔna pami’? Etena kakafundamaka osambu ɔnɛ, ɔnɔnɛlɔ aki tshelo ya lɔngɛnyi ndo wakakambaka layɔ dia nongola angɛndangɛnda, lɛnɛ akawakokaka nongɔma. Ɔnɔnɛlɔ kokaka monga nto tshelo yɛnya kɔlamelo. (1 Samuele 10:1) Lo divɛsa nɛ di’osambu wa hende, Nzambi ekɔ lo mbidjangɛ wedja dia vɔ nɔna, kana nongola, Ɔnande, mbut’ate Nkumekanga kakakitama esɔ.
22. Ɔhɛmwɛlɔ akɔna wahomba kitanyiya emboledi wa wedja?
22 Wanɛ watona dia mbetawɔ lowandji laki Nkumekanga kakasɔnwama oma le Nzambi wekɔ lo tɛnga Jehowa. Vɔ hawetawɔ lowandji laki Jehowa Nzambi la l’andja w’otondo ndo lotshungɔ la dikoka diele lande dia sɔnɔla Nkumekanga koleki dimɛna kahomba nɔmbɔla anto. Emboledi wa wedja wayɛna dia kɛlɛ kaki Nzambi kayowakomɛ la shashimoya, etena kakawayange dia kotsha asangwelo awɔ. “Kele kandi kayufulanela esadi,” ndo aha l’ɛngɔ kɛmɔtshi kiemadja. Emboledi wa wedja pombaka mbetawɔ ɔhɛmwɛlɔ ɔsɔ la lowando ndo sala akambo lo yoho yɔtɔnɛ l’ɔhɛmwɛlɔ akɔ. Naka vɔ mbetawɔka ndo salaka ngasɔ kete wayokondja lɔsɛnɔ.
23. Etena kekekɔ k’anto ntsha dikambo diakɔna?
23 Osambu ɔnɛ wa diambo efula kumiyaka ɔnɛ: “Wane tshe watekamaka le [Jehowa], wayongenangenaka.” (Osambu 2:12b) Etena kekekɔ k’andja mbidja ndo emboledi wanɛ wakasukɛka asangwelo wa wedja tana ekokelo. Vɔ kokaka ndawɔ otsha le Jehowa lasha anto eshamelo lo ɛlɔmbwɛlɔ ka Diolelo. Koko vɔ pombaka tɔshi yɛdikɔ la ntondo ka Diolelo diaki Mɛsiya ndanya wedja walɔshana la nde.
24. Ngande wakokaso nsɛna lɔsɛnɔ l’ɔngɛnɔngɛnɔ kânga l’andja ɔnɛ w’ofukutanu?
24 Naka sho mbeka Afundelo l’etete tshɛ ndo kamba l’alako w’oma lɔkɔ lo nsɛnɔ yaso, kete sho koka kakianɛ nsɛna lɔsɛnɔ l’ɔngɛnɔngɛnɔ kânga l’andja ɔnɛ w’ofukutanu. Kamba l’alako wa l’Afundelo mbelaka diokanelo di’oshika lo nkumbo ndo lotshungɔ oma l’akambo efula wa lonyangu ndo wa wɔma wa l’andja ɔnɛ. Ndjela ɛlɔmbwɛlɔ k’oma lo Bible toshikikɛka ɔnɛ tekɔ lo ngɛnyangɛnya Otungi. Paka Nkum’Olongo oto mbakoka mbisha eshikikelo ka “lumu leli kakiane, ndu dia lumu layayi” l’ɔkɔngɔ wa nde mbɛdia nkɛtɛ lo minya wanɛ watona kɛnɛ kele dimɛna lo mbikadja ɛlɔmbwɛlɔ ka Diolelo.—1 Timote 4:8.
25. Lam’ele ‘didjango diaki Jehowa’ hakoke kita tatala, kakɔna kakokaso nongamɛ dia mɛna lo nshi yaso nyɛ?
25 ‘Didjango diaki Jehowa’ hakoke kita tatala. Oko wende Otungi aso, Nzambi mbeyaka kɛnɛ koleki ɔlɔlɔ le anto ndo nde ayokotsha sangwelo diande dia tshɔkɔla anto wele l’okitanyiya lo mbasha ki, ɔngɛnɔngɛnɔ ndo lotui tshitshi la pondjo lo Diolelo di’Ɔnande la ngandji. Lo kɛnɛ kendana la nshi yaso nyɛ, omvutshi Danyɛlɛ akafunde ate: “Lu nshi ya khumi ya dikanga yako, [Nzambi] leli l’ulungu ayutundja diulelu diahalanaki pundju. . . . Dio diayulanya waulelu ako tshe, diayâshila ushiki, ku dio diame diayushikikala pundju.” (Danyele 2:44) Omalɔkɔ, ɔnɛ mbele etena ka ‘nɔna ɔna pami’ ndo ka kambɛ Jehowa Nkumadiɔndjɔ olimu!
[Nɔtɛ ya l’ɛse ka dikatshi]
a Lo mɛtɛ, Nkumekanga Davidi mbaki ‘okitami w’esɔ,’ ndo “khumi ya dikanga ya la kete” aki emboledi wa la Filistiya wakasanganya alembe awɔ dia ndɔshana la nde.
b Avɛsa akina wa l’Afundelo w’Akristo wa lo Grɛkɛ mɛnyaka nto dia Yeso mbele Okitami waki Nzambi w’Esɔ, ɔnɛ lakawatɛkɛta dikambo diande l’osambo wa hende. Kɛsɔ kekɔ mɛtɛ naka sho mbɛdika Osambu 2:7 la Etsha 13:32, 33 ndo la Heberu 1:5; 5:5. Enda nto Osambu 2:9 ndo Enyelo 2:27.
Ngande wayoyokadimola?
• Naa ‘fyungi y’anyanya’ yadja ase wedja?
• Lande na kɔnyɔla Jehowa wedja?
• Naa didjango diaki Jehowa
otsha le wedja?
• Kakɔna kalembetshiya ‘nɔna ɔna pami’?
[Osato wa lo lɛkɛ 15]
Emboledi ndo anto wa l’Isariyɛlɛ wakadjɛ Yeso Kristo sheke
[Osato wa lo lɛkɛ 16]
Kristo akahenyama l’okudi oko Nkumekanga ka l’Okongo wa Siɔna wa l’olongo