Ekambi Wa Jehowa wele l’ɔngɛnɔngɛnɔ
‘Wanɛ weya ehomba awɔ wa lo nyuma wekɔ l’ɔngɛnɔngɛnɔ.’—MATEU 5:3. 5:3.
1. Ɔngɛnɔngɛnɔ wa mɛtɛ kɛdikɛdi na ndo kakɔna kakɛnɛmɔlawɔ?
ƆNGƐNƆNGƐNƆ ekɔ ɛngɔ k’oshinga wolo kele la ekambi waki Jehowa. Omembi w’esambo Davidi akembe ate: “Wudja weli [Jehowa] [ekɔ] [Nzambi k]awo, weko la ongenongeno.” (Osambu 144:15) Ɔngɛnɔngɛnɔ ekɔ eongelo k’onto layaoka dia nde ekɔ dimɛna. Ɔngɛnɔngɛnɔ woleki wananda lonto laso la l’etei k’otema ndja oma lo woho weyaso dia tekɔ lo mbetawɔma le Jehowa. (Tukedi 10:22) Ɔngɛnɔngɛnɔ wa ngasɔ ekɔ la diɔtɔnganelo dia ma ma diele lam’asaso la Shɛso lele l’olongo ndo woho weyaso ɔnɛ tekɔ lo sala lolango lande. (Osambu 112:1; 119:1, 2) Lo yoho yakotola yambalo, Yeso akashile ɛkɔkɔ divwa wakokaso monga l’ɔngɛnɔngɛnɔ. Ɔsɛdingwelo wa ɛkɔkɔ divwa ɛsɔ wayosalema lo sawo nɛ ndo diayela wayotokimanyiya dia mbeya woho w’ɔngɛnɔngɛnɔ wakokaso monga lawɔ naka sho kambɛ Jehowa ‘Nzambi k’ɔngɛnɔngɛnɔ’ la kɔlamelo tshɛ.—1 Timote 1:11.
Teye Ehomba Aso wa lo Nyuma
2. Lo diaaso diakɔna diakatɛkɛta Yeso lo kɛnɛ kendana l’ɔngɛnɔngɛnɔ ndo naa ɛtɛkɛta ande wa mbɔtwɛlɔ?
2 L’ɔnɔnyi 31 lo tena diaso nɛ (T.D.), Yeso akasha sawo dimɔtshi diakatshike sango l’ɔkɔndɔ w’anto. Vɔ mbodielɛka ɔnɛ: Dako dia lo Dikona, nɛ dia Yeso akadisha lo shɔdi y’okongo ɔmɔtshi wakɛlanɛ la Ndjale ka Ngalileya. Evanjiliyɔ waki Mateo mbutaka ɔnɛ: ‘Lam’akɛnyi [Yeso] elui w’anto, nde akadɛ l’okongo; ndo l’ɔkɔngɔ wa nde mbidjasɛ, ambeki ande wakaye le nde; nde akafola onyɔ ko akatatɛ mbaetsha ate: Wanɛ weya ehomba awɔ wa lo nyuma wekɔ l’ɔngɛnɔngɛnɔ, nɛ dia diolelo dia l’olongo diele diawɔ.’ Lo ekadimwelo ka tshɛkɛta lo tshɛkɛta, ɛtɛkɛta wa mbɔtwɛlɔ waki Yeso mbadiemaka ɔnkɔnɛ: “Wanɛ wele wola lo nyuma wekɔ l’ɔngɛnɔngɛnɔ,” kana “wanɛ wele tɔlɔmbi lo nyuma wekɔ l’ɔngɛnɔngɛnɔ.” (Mateu 5:1-3; Kingdom Interlinear; nɔtɛ ka l’ɛse ka dikatshi) Lo Dikelemba di’Oyuyu sho mbadiaka ɔnkɔnɛ: “[Ɔngɛnɔngɛnɔ] le ankanga wa wola lu [nyuma].”
3. Ngande watokimanyiya eongelo ka ndjakitshakitsha dia monga l’ɔngɛnɔngɛnɔ?
3 Lo Dako diande dia lo Dikona, Yeso akate dia naka onto ekɔ lo mbeya ehomba ande wa lo nyuma, kete nde ayonga l’ɔngɛnɔngɛnɔ w’efula. Oko weyawɔ eongelo kawɔ k’atshi wa pɛkato, Akristo wele la ndjakitshakitsha nɔmbaka Jehowa edimanyielo ka pɛkato yawɔ l’ekimanyielo k’olambo wa tshungo waki Kristo. (1 Joani 1:9) Ɔnkɔnɛ, vɔ kondjaka wɔladi wa lo yimba ndo ɔngɛnɔngɛnɔ wa mɛtɛ. ‘Kanga ohedia lambodimanyema ohedia ande ndo lele pɛkato yande yambokombama ekɔ l’ɔngɛnɔngɛnɔ.’—Osambu 32:1; 119:165.
4. (a) Lo toho takɔna takokaso mɛnya dia tekɔ lo mbeya ehomba aso wa lo nyuma ndo w’anto akina? (b) Lâdiko dia mbeya ehomba aso wa lo nyuma kakɔna katosha nto ɔngɛnɔngɛnɔ?
4 Mbeya ehomba aso wa lo nyuma totshutshuyaka dia mbadiaka Bible lushi la lushi, dia ndɛka mbo ya lo nyuma yatosha ‘ɔhɔmbɔ wa kɔlamelo ndo wa kɛsɔ’ “lu tena diayo” ndo dia mbɔtɔka lo nsanganya y’Akristo ya l’etshumanelo mbala la mbala. (Mateu 24:45; Osambu 1:1, 2; 119:111; Heberu 10:25) Ngandji kokaso onyaso onto tokimanyiyaka dia mbeya ehomba wa lo nyuma w’anto akina ndo totshutshuyaka dia monga l’ohetoheto l’olimu w’esambishelo ndo wa mbetsha lokumu l’ɔlɔlɔ la Diolelo. (Mako 13:10; Romo 1:14-16) Sambisha anto akina akambo wa mɛtɛ wa lo Bible toshaka ɔngɛnɔngɛnɔ. (Etsha 20:20, 35) Lâdiko dia lâsɔ, sho mongaka l’ɔngɛnɔngɛnɔ etena kakanaso yimba l’elongamelo ka diambo ka Diolelo ndo ɛtshɔkɔ wayotela Diolelo diakɔ. Elongamelo kele la “limba la tshitshe l’ekoko,” mbut’ate Akristo w’akitami w’esɔ ele ka nongola lɔsɛnɔ lahavu l’olongo oko anto amɔtshi wa lo lowandji la Diolelo diaki Kristo. (Luka 12:32; 1 Koreto 15:50, 54) “Ekoko ekina” wekɔ l’elongamelo ka nongola lɔsɛnɔ la pondjo lo paradiso ka la nkɛtɛ l’ɛse ka lowandji la Diolelo sɔ.—Joani 10:16; Osambu 37:11; Mateu 25:34, 46.
Woho Wakoka Anto Walela Monga l’Ɔngɛnɔngɛnɔ
5. (a) Etelo k’ɔnɛ “wane watulelaka,” alembetshiyatɔ? (b) Ngande wasambema anto walela asɔ na?
5 Ɛtɛkɛta wendana l’ɔngɛnɔngɛnɔ okina wakatɛkɛta Yeso dikambo diawɔ mɛnamaka oko hɔtɔnɛ. Nde akate ate: “Wanɛ walela wekɔ l’ɔngɛnɔngɛnɔ, nɛ dia wayowasamba.” (Mateu 5:4, NW) Ngande wakoka onto lalela monga l’ɔngɛnɔngɛnɔ l’etena kakɔ kâmɛ? Dia shihodia kitshimudi y’ɛtɛkɛta waki Yeso, sho pombaka sɛdingola woho akɔna wa delo watɛkɛtande lanɛ. Ombeki Jakɔba nembetshiyaka dia eongelo kaso k’atshi wa pɛkato pombaka monga ɔkɔkɔ wa delo le so. Nde akafunde ate: “Nyu antu wa kolo nyotsha anya anyu; nyedia etema anyu, nyu akanga w’etema ehendi. Nyuyatshumuya, nyunyangi, nyuleli. Tola tanyu takadimo lunyangu, ongenongeno anyu akadimo okei. Nyuyakitshakitsha lu ashu wa Khumadiondjo, ku ndi ayunyumbiya.” (Jakoba 4:8-10) Wanɛ walela l’ɔtɛ wa eongelo kawɔ ka pɛkato kondjaka esambelo etena kekawɔ dia pɛkato yawɔ koka dimanyiema naka vɔ monga la mbetawɔ l’olambo wa tshungo waki Kristo ndo naka vɔ mɛnya ndjatshumoya ka mɛtɛ lo sala lolango laki Jehowa. (Joani 3:16; 2 Koreto 7:9, 10) Etena kɛsɔ, vɔ kokaka monga la diɔtɔnganelo di’oshika lam’asawɛ la Jehowa ndo monga l’elongamelo ka sɛna pondjo pondjo lo mbokambɛka ndo lo mbotombolaka. Dui sɔ mbaelaka ɔngɛnɔngɛnɔ wa mamba wa l’etei k’otema.—Romo 4:7, 8.
6. Lo woho akɔna walela anto amɔtshi ndo ngande wasambemawɔ?
6 Ɛtɛkɛta waki Yeso ɛsɔ mendanaka ndo la wanɛ walela l’ɔtɛ w’akambo wa wɔnɔnyi wambokokanɛ lanɛ la nkɛtɛ. Yeso akɛnya dia prɔfɛsiya k’Isaya 61:1, 2 kambokotshama le nde, tɔ mbutaka ɔnɛ: “Nyuma ka Khumadiondjo, [Jehowa] keli la mi, ne dia [Jehowa] akankiti iso dia dimi nsambisha amenyi fono lukumu l’ololo. Ndi akantumi dia dimi nkonoya akanga w’etema wambate, . . . dia nsamba antu tshe walela.” Ɔkɛndɛ ɔsɔ mendanaka nto l’Akristo w’akitami wanɛ wakotsha olimu ɔsɔ l’ekimanyielo k’asekawɔ “ekoko ekina.” Vɔ tshɛ wekɔ lo kamba olimu wa wodjelo wa djembetelo wa didjidji lo fumu yaki “antu tshe wakhuma akhumu ndu walela, ne dia akambu tshe wa wononyi wambutshama l’atei awo [mbut’ate l’atei wa Jerusalɛma yakatɔmbɔkɔ, yele didjidji dia Lokristokristo].” (Ezekiyele 9:4) Anto walela asɔ wekɔ lo sambema oma lo “lukumu l’ololo . . . la diulelu.” (Mateu 24:14) Vɔ wekɔ l’ɔngɛnɔngɛnɔ dia mbeka dia kema edja dikongɛ di’akambo dia kɔlɔ diaki Satana nɛ diayanga kitanyema l’andja w’oyoyo wa losembwe waki Jehowa.
Ɔngɛnɔngɛnɔ Wekɔ le Wanɛ Wele la Memakana
7. Kakɔna kakalembetshiyaka tshɛkɛta “memakana”?
7 Yeso akatetemala la Dako diande dia lo Dikona lo mbuta ate: ‘Wanɛ wele la memakana wekɔ la ɔngɛnɔngɛnɔ, nɛ dia vɔ wayokita nkɛtɛ.’ (Mateu 5:5) Mbala mɔtshi anto efula mbɔsaka dia monga la memakana ekɔ wɔdu ɔmɔtshi. Ko, tete lee aha ngasɔ mbediɔ. Lam’akandalembetshiyaka kitshimudi ya tshɛkɛta yakadimɔma ɔnɛ “memakana,” nomb’ewo kɛmɔtshi k’akambo wa lo Bible akafunde ate: “Dionga dialeka mbeyama onto lele la [memakana] ele onto ɔsɔ kokaka ndjasukɛ kana ndjakimɛ lo yoho ya kokele. Diɔ kema ohombelo wa lolango, ngandji ka lâdiko w’ɛlɔmɔ kana diki dia kashi. Koko, diɔ diekɔ wolo wahemɛ.” Yeso akate lo kɛnɛ kendana lande ate: “Dimi la memakana la ndjakitshakitsha l’utema.” (Mateu 11:29) Koko, Yeso akâmɛka atɔndɔ wosembwe la dihonga tshɛ.—Mateu 21:12, 13; 23:13-33.
8. Memakana kakatana la dionga diakɔna, ndo lande na keso l’ohomba wa dionga sɔ lo diɔtɔnganelo diasaso l’anto akina?
8 Memakana kakatana efula la ndjakimɛ. Lo mɛtɛ, memakana la ndjakimɛ shilama kâmɛ le ɔpɔstɔlɔ Paulo lam’akandatɛkɛta di’“elua wa nyuma.” (Ngalatiya 5:22, 23) Paka l’ekimanyielo ka nyuma k’ekila mbakoka onto monga la memakana. Ɔsɔ ekɔ dionga di’Okristo diakimanyiya dia sɛna lo wɔladi la wanɛ wele bu ambetawudi ndo la wanɛ wele l’etshumanelo. Paulo akafunde ate: “Nyolote etema wa ketshi, la wa memakana, la wa ndjakitshakitsha, la wa kenemo, la wa kolamelu. Nyukikaneli kolo. Nyudimanyanyia kolo yanyu.” —Kolosai 3:12, 13.
9. (a) Lande na kele monga la memakana hakomɛ tsho lo diɔtɔnganelo diasaso l’anto akina? (b) Ngande ‘wayokita wanɛ wele la memakana nkɛtɛ’?
9 Koko, memakana hakomɛ tsho lo diɔtɔnganelo diasaso l’anto akina. Lo ndjakitshakitsha la lolango tshɛ lo lowandji laki Jehowa, sho mɛnyaka dia tekɔ la memakana. Yeso Kristo lele ɛnyɛlɔ ka ntondo lo kɛnɛ kendana la dikambo sɔ, akakɛnɛmɔla dionga dia memakana ndo akakotsha lolango laki She lo yoho ya kokele lam’akinde lanɛ la nkɛtɛ. (Joani 5:19, 30) Dikambo dia ntondo ndo dioleki ohomba ele Yeso akakite nkɛtɛ, nɛ dia nde ekɔ Owandji atɔ wakasɔnama. (Osambu 2:6-8; Danyele 7:13, 14) Nde kahanaka sango sɔ la “ekito” 144 000 wakasɔnama oma “l’atei w’antu” dia ‘monga nkumi ya dikanga lâdiko dia nkɛtɛ.’ (Romo 8:17; Enyelo 5:9, 10; 14:1, 3, 4; Danyele 7:27) Kristo nde la wanɛ wayolɛ kâmɛ la nde wayɔlɔmbɔla miliyɔ y’apami la wamato wele oko ɛkɔkɔ. Lo dikambo diawɔ mbayokotshama lo yoho ya diambo efula prɔfɛsiya kakembama oko osambo kata ɔnɛ: “Keli akanga a memakana wayukita kete, ndu wayongenangena la etshoko efula wa ki.”—Osambu 37:11; Mateu 25:33, 34, 46.
Ɔngɛnɔngɛnɔ Wekɔ le Wanɛ Wele la Ndjala k’Akambo w’Ɔlɔlɔ
10. Naa yoho mɔtshi yakoka ndotshama wanɛ wele ‘la ndjala ndo la mposa k’akambo w’ɔlɔlɔ’?
10 Ɔkɔkɔ okina watosha ɔngɛnɔngɛnɔ wakashile Yeso lam’akandatɛkɛtaka lo dikona dia la Ngalileya aki w’ɔnɛ: ‘Ɔngɛnɔngɛnɔ le wanɛ wele la ndjala ndo la mposa k’akambo w’ɔlɔlɔ, nɛ dia vɔ wayolotshama.’ (Mateu 5:6) Jehowa akadjɛ Akristo atɔndɔ wendana l’akambo w’ɔlɔlɔ. Omalɔkɔ, wanɛ wele la ndjala ndo la mposa k’akambo w’ɔlɔlɔ wekɔ mɛtɛ la ndjala ndo la mposa k’ɛlɔmbwɛlɔ kaki Nzambi. Anto asɔ mbeyaka pɛkato yawɔ ndo woho wewɔ bu kokele ndo kombolaka efula dia mbetawɔma le Jehowa. Vɔ wekɔ mɛtɛ l’ɔngɛnɔngɛnɔ w’efula lam’ekawɔ oma l’Ɔtɛkɛta wa Nzambi dia naka vɔ ndjatshumoya ndo nyanga edimanyielo ka munga yawɔ oma lo tshimbo y’olambo wa tshungo waki Kristo, kete vɔ wayɔsama oko anto wa losembwe le Nzambi!—Etsha 2:38; 10:43; 13:38, 39; Romo 5:19.
11, 12. (a) Ngande wayokoma Akristo w’akitami w’esɔ akanga wa losembwe? (b) Ngande wayokotshama mposa kaki asekawɔ k’akambo w’ɔlɔlɔ?
11 Yeso akate di’anto asɔ wayonga l’ɔngɛnɔngɛnɔ, nɛ dia “wayolotshama.” (Mateu 5:6, Kingdom Interlinear) Akristo w’akitami w’esɔ wakelamɛ dia ‘tolɛ oko nkumi ya dikanga,’ la Kristo l’olongo wambɔsama oko ‘anto wosembwe wasungana kondja lɔsɛnɔ.’ (Romo 5:1, 9, 16-18) Ɔnkɔnɛ, Jehowa ambowaota ndo ambowaɔsa oko anande wa lo nyuma. Vɔ wambokoma ekitɔ kâmɛ la Kristo, lo mbelamɛ dia koma nkumi ya dikanga ndo ɛlɔmbɛdi lo lowandji la Diolelo dia l’olongo.—Joani 3:3; 1 Petero 2:9.
12 Asekawɔ, mbut’ate ɛkɔkɔ ekina watetama akanga wa losembwe wasungana kondja lɔsɛnɔ. Koko, lo yɛdikɔ mɔtshi vɔ mbɔsamaka oko anto wa losembwe oma le Jehowa l’ɔtɛ wa mbetawɔ kawɔ lo dikila diaki Kristo diakatshulwama. (Jakoba 2:22-25; Enyelo 7:9, 10) Vɔ mbadiemaka oko akanga wa losembwe, mbut’ate vɔ mbɔsamaka oko angɛnyi waki Jehowa wayotshungɔ l’etena ka “fono ka woke.” (Enyelo 7:14) Mposa kawɔ k’akambo w’ɔlɔlɔ kayokotshama etena kele, l’ɛse k’ɛlɔmbwɛlɔ k’“ulungu w’uyuyu,” vɔ wayokoma anto wayɔsɛna lo nkɛtɛ y’oyoyo lɛnɛ “udjashi akambu w’ololo.”—2 Petero 3:13; Osambu 37:29.
Ɔngɛnɔngɛnɔ Wekɔ le Wanɛ Wokana Kɛtshi
13, 14. Lo toho takɔna ta shikaa tahombaso mɛnya dia tekɔ la kɛtshi ndo wahɔ akɔna wayotokondja?
13 Lo tetemala la Dako diande dia lo Dikona, Yeso akate ate: ‘Wanɛ wokana kɛtshi wekɔ l’ɔngɛnɔngɛnɔ, lam’ele wayowaoka kɛtshi.’ (Mateu 5:7) Le ase tuminadi, naka shushi mɔtshi ambotona dia mbisha onto dilanya dia tshɛ diahombande nongola lo ndjela ɛlɛmbɛ, vɔ mbutaka lâsɔ ɔnɛ nde ambowoka kɛtshi. Koko, lo yoho yokambiwɔ layɔ lo Bible, tshɛkɛta ya l’etatelo yokadimɔmi ɔnɛ “kɛtshi” mendanaka tena efula la ɔlɔlɔ kana kɛtshi kasha wanɛ wele lo dihombo kele tɔ mbelaka anto waya oko wambokalema ekimanyielo. Ɔnkɔnɛ, wanɛ wele la kɛtshi mɛnyaka dia vɔ wekɔ lo mbokana kɛtshi. Wɛla waki Yeso wendana l’ose Samariya l’ɔlɔlɔ ekɔ ɛnyɛlɔ ka dimɛna k’onto ‘laki la kɛtshi’ otsha le onto laki lo dihombo.—Luka 10:29-37.
14 Dia kondja ɔngɛnɔngɛnɔ waya lo monga la kɛtshi, sho pombaka kɛnɛmɔla etsha w’ɔlɔlɔ wa ngandji ka shikaa otsha le wanɛ wele lo dihombo. (Ngalatiya 6:10) Yeso akoke anto wakandɛnyi kɛtshi. “Ndi akawauki ketshi, ne dia vo waki uku ekoko waha la ulami; akatatela mbaetsha akambu efula.” (Mako 6:34) Yeso akeyaka dia ehomba wa lo nyuma mbakaleke ohomba le anto. Sho lawɔ koka mɛnya dia tekɔ la kɛtshi lo kahana l’anto akina kɛnɛ kele lawɔ ohomba efula, mbut’ate “lukumu l’ololo la diulelu.” (Mateu 24:14) Sho kokaka mbisha nto asekaso Akristo waya esombe, wadi waki edo ndo ana wa tshike ekimanyielo kahombama ndo ‘tɛkɛta lo yoho yakeketsha otsha le anima wambɔkɔmɔ.’ (1 Tesalonika 5:14; Tukedi 12:25; Jakoba 1:27) Dikambo sɔ hotela paka ɔngɛnɔngɛnɔ oto koko diɔ diayotokimanyiya ndo dia sho mbokama kɛtshi oma le Jehowa.—Etsha 20:35; Jakoba 2:13.
Tônge l’Etema wa Pudipudi ndo Anangi wa Wɔladi
15. Ngande wakokaso monga l’etema wa pudipudi ndo anangi wa wɔladi?
15 Lo kɛnɛ kendana l’ɔkɔkɔ wa samalo ndo w’esambele wɛnya bonde keso l’ɔngɛnɔngɛnɔ, Yeso akate ate: ‘Ɔngɛnɔngɛnɔ le wanɛ wele l’etema wa pudipudi, dikambo wayɛna Nzambi! Ɔngɛnɔngɛnɔ le anangi wa wɔladi, dikambo wayelamɛ ana wa Nzambi.’ (Mateu 5:8, 9) Otema wa pudipudi ekɔ otema aha wele paka pudipudi l’awui wendana la lɔkɛwɔ, koko vɔ wekɔ nto pudipudi l’awui wa lo nyuma ndo otema wele mamemaka paka Jehowa. (1 Ekondo 28:9; Osambu 86:11) Wanɛ walanga wɔladi sɛnaka lo wɔladi l’anangɛwɔ l’akadiyɛwɔ w’Akristo ndo lo yɛdikɔ yɛdimi l’akoka awɔ, vɔ sɛnaka lo wɔladi l’asukanyi awɔ. (Romo 12:17-21) Vɔ ‘nyangaka wɔladi ndo tetemalaka la kiyela.’ —1 Petero 3:11.
16, 17. (a) Lande na kelamɛ akitami w’esɔ ɔnɛ ‘Ana waki Nzambi’ ndo ngande ‘wayowɛna Nzambi’? (b) Ngande wayɛna ‘ɛkɔkɔ ekina Nzambi’? (c) Lo eokelo ka tshɛ, woho akɔna ndo etena kakɔna kayokoma ɛkɔkɔ ekina ‘ana waki Nzambi’?
16 Le wanɛ walanga wɔladi ndo wele l’etema wa pudipudi, wakawasha daka ɔnɛ vɔ “wayuwaeta vati: Ana waki [Nzambi]” ndo “wayena [Nzambi].” Kânga mbekewɔ la nkɛtɛ, Akristo w’akitami w’esɔ wambotɔ lo nyuma ndo wambɔsama oko “ana” a yanyi oma le Jehowa. (Romo 8:14-17) Kam’olɔwɔ dia tonga kâmɛ la Kristo l’olongo, vɔ kambaka olimu la ntondo ka wôngelo wa Jehowa ndo vɔ mbɛnaka mɛtɛ.—1 Joani 3:1, 2; Enyelo 4:9-11.
17 “Ekoko ekina” walanga wɔladi wekɔ lo kambɛ Jehowa olimu l’ɛse k’ɛlɔmbwɛlɔ k’Olami wa Dimɛna, Kristo Yeso, lambokoma ‘Shɛwɔ ka Pondjo.’ (Joani 10:14, 16; Isaya 9:6) Wanɛ wayotondoya ohemba w’ekomelo lo yoho ya dimɛna l’ɔkɔngɔ wa Diolelo diaki Kristo di’Ɛnɔnyi Kinunu wayotama oko ana a yanyi waki Jehowa wa la nkɛtɛ ndo wayɔtɔ “lu ndjadjasela ka lutumbu la ana a [Nzambi].” (Romo 8:21; Enyelo 20:7, 9) Kânga mbakawakongɛ dikambo sɔ, vɔ mbɔsaka Jehowa oko Shɛwɔ, lam’ele vɔ kimɔka nsɛnɔ yawɔ le nde, lo mbeya dia nde ekɔ Ombishi wa Lɔsɛnɔ. (Isaya 64:8) Oko Jɔbɔ ndo Mɔsɛ ka lo nshi y’edjedja, vɔ kokaka ‘mɛna Nzambi’ la washo wa mbetawɔ. (Jobo 42:5; Heberu 11:27) La ‘washo wa l’otema awɔ’ ndo l’ekimanyielo k’ewo ka shikaa ka Nzambi, vɔ mɛnaka waonga wa diambo waki Jehowa ndo vɔ salaka la wolo dia mbôkoya lo sala lolango lande.—Efeso 1:18; Romo 1:19, 20; 3 Joani 11.
18. Lo ndjela akambo esambele wa ntondo wakate Yeso washa ɔngɛnɔngɛnɔ, waa na wakondja ɔngɛnɔngɛnɔ wa mɛtɛ ɛlɔ kɛnɛ?
18 Tambɛna dia wanɛ weya ehomba awɔ wa lo nyuma, wanɛ walela, wanɛ wele la memakana, wele la ndjala ndo la mposa k’akambo w’ɔlɔlɔ, wanɛ wokana kɛtshi, ndo wanɛ walanga wɔladi kondjaka ɔngɛnɔngɛnɔ wa mɛtɛ lo kambɛ Jehowa olimu. Ekɔ mɛtɛ dia anto asɔ pomanaka mbala efula la wekamu, koyanga ndo ɛhɛnyɔhɛnyɔ. Onde dikambo sɔ ndanyaka ɔngɛnɔngɛnɔ awɔ? Wombola ɔsɔ wayɔsɛdingɔma lo sawo diayela.
Ovuswelo
• Ɔngɛnɔngɛnɔ akɔna wele la wanɛ weya ehomba awɔ wa lo nyuma?
• Lo toho takɔna tayosambema wanɛ walela?
• Ngande wayotɛnya memakana?
• Lande na kahombaso mbokana kɛtshi, monga l’etema wa pudipudi ndo monga wanɛ walanga wɔladi?
Study Questions]
[Osato wa lo lɛkɛ 23]
‘Wanɛ weya ehomba awɔ wa lo nyuma wekɔ l’ɔngɛnɔngɛnɔ’
[Osato wa lo lɛkɛ 23]
‘Ɔngɛnɔngɛnɔ wekɔ le wanɛ wokana kɛtshi’
[Osato wa lo lɛkɛ 23]
‘Ɔngɛnɔngɛnɔ wekɔ le wanɛ wele la ndjala ndo la mposa k’akambo w’ɔlɔlɔ’