Wembola w’oma le ambadi

Woho akɔna wɔsa etshumanelo k’Akristo lɔtɔmɔ?

Ɔtɛkɛta wa Nzambi mbɔsaka lɔtɔmɔ ndo wodjwelo a wanu oko waonga wahetawɔma le wanɛ wakambɛ Nzambi. Ɔnkɔnɛ, etshumanelo k’Akristo mbɔsaka onto leyama oko kanga lɔtɔmɔ woho wɔsatɔ onto leyama oko ombidjɔki a wanu. Oyadi ombidjɔki a wanu kana kanga lɔtɔmɔ hawokoke monga l’etshumanelo k’Akristo.

Tukedi 23:20, 21 mbutaka ɔnɛ: “Tuyalaki l’ului wa anoshi a wanu, kuyanga l’ului w’akanga wa deshi di’unatshi. Ne dia umbidjoki la kanga deshi wayuyala la wula. Unyingunyingu wa djo wayolotsha untu emusu w’ahondo.” Lo Euhwelu k’Elembe 21:20, onto laki “ote wulu, kanga uhedia” akasunganaka ndjakema lo ndjela Ɛlɛmbɛ wa Mɔsɛ. Lo ndjela divɛsa sɔ, kanga ohedia ndo onto laki kondjatshumoyaka ɔsɔ aki la waonga ahende mbut’ate, nde aki “kanga deshi ndu umbidjoki.” Mbokɛmaka hwe dia l’Isariyɛlɛ w’edjedja, lɔtɔmɔ akɔsamaka oko etshelo kaki kombetawɔmaka le wanɛ wakalangaka kambɛ Nzambi.

Lâsɔ, elɛwɔ kanga lɔtɔmɔ ndo kakɔna kata Afundelo w’Akristo wa lo Grɛkɛ lo lo dikambo sɔ? Kanga lɔtɔmɔ ko “onto layasha la lokaki tshɛ lo deshi ndo lo nɔshi dia tshambandeko.” Ɔnkɔnɛ, lo wedi ɔmɔtshi lɔtɔmɔ lekɔ yoho mɔtshi ya lokaki ndo Ɔtɛkɛta wa Nzambi totɛka dia ‘akanga a lokaki’ wekɔ weho w’anto wahatokita Diolelo diaki Nzambi. (1 Koreto 6:9, 10; Filipi 3:18, 19; 1 Petero 4:3) Lâdiko dia lâsɔ, lam’akewola Paulo Akristo oma lo “etsha wa dimba,” nde akashile ndo “edjwelu ka wanu, engenongeno wa kolo, la akambu wa wuhu uku.” (Ngalatiya 5:19-21) Tena efula olelo wa tshambandeko ndjelanaka la edjwelo ka wanu, ndo la ɛngɛnɔngɛnɔ wa kɔlɔ. Ndo nto, lo etelo k’ɔnɛ “la akambu wa wuhu uku,” ondo Paulo akadje ndo lɔtɔmɔ. Oko wɔsama ‘etsha ekina wa demba,’ Okristo weyama efula l’ɔtɛ wa lɔtɔmɔ lande ndo latona l’okonda tshɛ dia tshikitanya dionga diande dia lokaki pombaka mbitshanyema oma l’etshumanelo.​—1 Koreto 5:11, 13.a

Kânga mbele Ɔtɛkɛta wa Nzambi mbɔsaka ombidjɔki a wanu la kanga lɔtɔmɔ woho akɔ wâmɛ, ekɔ dikambo dia wɔdu mbeya onto lambodjɔ wanu oleki kanga lɔtɔmɔ. Tolembetelo ta wodjwelo a wanu mɛnamaka esadi eto lo washo. Koko, ekɔ dikambo dia wolo dia mbeya ɔnɛ kapanda aya mɛtɛ kanga lɔtɔmɔ nɛ dia tolembetelo ta lɔtɔmɔ hashikikɛma tsho oma lo kɛnɛ kɛnama la washo. Ɔnkɔnɛ, etena kakandola dikumanyi dia l’etshumanelo ekakatanu wendana la dikambo sɔ, vɔ pombaka monga la yeewo y’efula ndo la shɛnɔdi.

Ɛnyɛlɔ, dikundju dia woke mbeyaka monga djembetelo mɔtshi ya lɔtɔmɔ, koko aha tena tshɛ mbatodiongaka ngasɔ. Dikundju di’onto mbeyaka monga woke l’ɔtɛ wa hemɔ kɛmɔtshi. Akambo wendana l’ohowelo mbeyaka monga nto lo kiɔkɔ y’onunelo wa dikundju. Sho pombaka mbeya nto dia onunelo wa dikundju ekɔ eongelo ka demba, koko lɔtɔmɔ ekɔ eongelo ka lo yimba. Onunelo wa dikundju nembetshiyaka eongelo k’onto lele la wata efula lo demba koko lɔtɔmɔ ekɔ onto lele la lokaki kana onto layasha lo yoho ya tshambandeko l’olelo. Ɔnkɔnɛ, lɔtɔmɔ heyama oma lo woke w’onto koko lo dionga diele l’onto la ntondo ka diangɔ dia ndɛ. Onto mbeyaka monga la demba dia tshitshɛ koko ekɔ kanga lɔtɔmɔ. Ndo nto, kɛnɛ kɔsama oko woke kana diema dia dimɛna tshikitana efula lo ndjela dihole la dihole.

Naa tolembetelo ta lɔtɔmɔ? Kanga lɔtɔmɔ bu la ndjakimɛ mbala la mbala, nde mbeyaka ndɛ la lokaki tshɛ polo ndo lo yoho ya tshambandeko lo yɛdikɔ ya nde ndjaoka kɔlɔ kana tata hemɔ. Ohombelo ande wa ndjakimɛ mɛnyaka dia nde hayakiyanya kânga yema dikambo dia tɛngɔ yatɛngamishande Jehowa ndo lokumu l’ɔlɔlɔ lele l’ekambi Ande. (1 Koreto 10:31) Lo wedi okina, onto lele paka lo waaso angana ato mbatondɔlɛka lo yoho ya tshambandeko hahombe mbɔsama mbala kakɔ ɔtɔi oko ‘kanga lokaki.’ (Efeso 5:5) Koko, lo ndjela kɛnɛ kalembetshiya Ngalatiya 6:1, Okristo ɔsɔ ekɔ l’ohomba w’ekimanyielo. Paulo akate ate: “Anyasu, naka untu ambutakana lu dikambu dia kolo, nyu akanga a [n]yuma nyûkaluya l’etema wa memakana.”

Lande na kele dako dia lo Bible dia mbewɔ olelo wa tshambandeko diekɔ ohomba efula, djekoleko ɛlɔ kɛnɛ? Nɛ dia, djekoleko lo kɛnɛ kendana la nshi yaso nyɛ, mbakate Yeso ate: “Nyuyalamaki, ne dia etema anyu watukuyala wutshu la deshi la edjwelu ka wanu la edinganu wa lumu lone. Lushi loso, latukuya lenyu shashimuya, uku shuni ya djunga.” (Luka 21:34, 35) Mbewɔ olelo wa tshambandeko ekɔ yoho ya dimɛna ya tona la lolango laso toho ta lɔsɛnɔ talanya lonyuma.

Wɛdimo ekɔ dionga di’ɔlɔlɔ le Okristo. (1 Timote 3:2, 11) Ɔnkɔnɛ, Jehowa ayokimanyiya mɛtɛ wanɛ tshɛ wasala la wolo dia kamba l’alako wa lo Bible wendana la monga la wɛdimo l’olelo ndo l’ɔnwɛlɔ a wanu.​—Heberu 4:16.

[Nɔtɛ ka l’ɛse ka dikatshi]