Onde tokônga la lotui tshitshi la mɛtɛ?

AKƆNA ele hangɛnangɛna menda ana wakɛnya l’ɔngɛnɔngɛnɔ tshɛ kâmɛ l’ambutshi awɔ wa ngandji na? Ana ndjaokaka la lotui tshitshi la mamba lam’ewɔ lale ambutshi wâkokɛ. Koko, le ana w’akɛnda efula paka lo pai mongawɔ la tena di’ɔngɛnɔngɛnɔ dia woho ɔsɔ. Ɔnkɔnɛ, ana amɔtshi ndjakiyanyaka lushi tshɛ lo kɛnɛ kendana la tana dihole dia vɔ ndala l’otsho. Onde elongamelo kɛmɔtshi kekɔ le ana asɔ ndo le anto akina wahasɛnɛ lo lotui tshitshi?

Kânga mbakokande mɛnama dia ndoko k’ɔlɔ kayotɛna lo nshi yayaye, Ɔtɛkɛta wa Nzambi mbishaka elongamelo. Omvutshi Isaya akate dia lo nshi yayaye anto tshɛ wayɔsɛna lo lotui tshitshi la tshɛ. Nde akafunde ate: “Vo wayuhika mvudu, wayudjaseka loko; wayune dikambo di’elua, wayolekaka elua w’uma loko. Vo hawuhika mvudu, ku akina ndjudjase loko. Vo hawukamba dikambo di’elua, ku akina ndjole elua uma loko.”​—Isaya 65:21, 22.

Onde elongamelo kɛsɔ kekɔ ka shikaa? Lâdiko dia tshɛ, tshɛkɛta “elongamelo” halembetshiya mbala tshɛ dikambo diele shikaa. Ɛnyɛlɔ, lo wodja wa Brésil, anto mbutaka mbala efula ɔnɛ: “A esperança é a última que morre.” Naka sho kikadimola tshɛkɛta lo tshɛkɛta, kete etelo kɛsɔ nembetshiyaka ɔnɛ: “Elongamelo mbele ɛngɔ ka komelo kayovɔka.” Dui sɔ mɛnyaka di’anto efula tetemalaka monga l’elongamelo kânga lanɛ wewɔ bu l’ɔkɔkɔ wa shikaa wa monga l’elongamelo. Koko, elongamelo katosha Nzambi kasɛna tshikitana la kɛsɔ. Ɔpɔstɔlɔ Paulo akafunde ate: ‘Onto tshɛ layonga la mbetawɔ le Nzambi, hotshama sɔnyi.’ (Romo 10:11) Prɔfɛsiya ya lo Bible yambokotshamaka toshikikɛka di’alaka akina tshɛ wakalake Jehowa Nzambi wayokotshama. Lam’ayokotshama alaka asɔ, akambo watshutshuya ana dia tasɛnaka lo toshinga wayoshila.

Kânga ɛlɔ kɛnɛ, alako w’amɛna watanema lo Bible koka kimanyiya wanɛ wele kema l’elongamelo dia ndowanya nsɛnɔ yawɔ ndo kondja lotui tshitshi la mɛtɛ. Ngande wakoka salema dikambo sɔ? Ɛmɛnyi wa Jehowa wa lo ngelo kanyu wayɔngɛnangɛna kokimanyiya dia wɛ kondja okadimwelo lo wombola ɔsɔ.