Tokambɛke Kristo nkumekanga la kɔlamelo

“Wakawusha luwandji, lutumbu, la diulelu dia antu tshe, wedja, la antu w’eteketa tshe ndjala l’okongo andi.”​—DANYELE 7:14.

1, 2. Ngande weyaso dia Diolelo kokimɔma tshɛ l’anya wa Kristo lo 33 T.D. na?

OWANDJI akɔna wakoka mvwela anto ande ko ndjɔsɛna nto dia mbolɛ oko nkumekanga? Nkumekanga kakɔna kakakoke nsɛna la nkɛtɛ, ko tshutshuya anto ande dia ndjaɛkɛ ndo monga la kɔlamelo le nde, oma lâsɔ ko nde tolɛ oma l’olongo? Onto ɔtɔi lakakoke sala awui asɔ ndo akina aki paka Yeso Kristo. (Luka 1:32, 33) Lo Pɛntɛkɔsta ka lo 33 T.D., l’ɔkɔngɔ wa nyɔi, wa eolwelo ndo wa wodelo wa Kristo otsha l’olongo, Nzambi “akûkitsha ote w’akambu tshe w’ekelizia.” (Efeso 1:20-22; Etsha 2:32-36) Lo yoho shɔ mbakatatɛ Kristo mbolɛ lâdiko dia Akristo w’akitami. Akristo asɔ mbakenga Isariyɛlɛ wa lo nyuma, mbuta ate “Isariyele wa [Nzambi].”​—Ngalatiya 6:16; Kolosai 1:13.

² Suke l’ɛnɔnyi 30 l’ɔkɔngɔ wa Pɛntɛkɔsta 33 T.D., ɔpɔstɔlɔ Paulo akashikikɛ dia polo l’etena kɛsɔ ko Diolelo tshɛ diatonge l’anya wa Kristo, koko nde akadjasɛ “lu lunya la pami la [Nzambi]. Ndi akakungi edja ndu atunyi andi wakayala kihuna k’ekulu andi.” (Heberu 10:12, 13) Oma lâsɔ, oya lo ekomelo ka ntambe ka ntondo T.D., ɔpɔstɔlɔ w’osombe Joani akɛnyi la ntondo l’ɛnɛlɔ Jehowa Nkum’olongo ahenya Kristo Yeso oko Nkumekanga lo Diolelo diaki mala shikikɛma l’olongo. (Enyelo 11:15; 12:1-5) Lo menda kɛnɛ kambotɛna l’ɔkɔndɔ w’anto, sho koka sɛdingola tolembetelo ta shikaa tashikikɛ dia Kristo akatatɛ nɔmbɔla oko Mɛsiya Nkumekanga l’olongo lo 1914.a

3. a) Naa dui di’oyoyo diakakotshama lo kɛnɛ kendana la lokumu l’ɔlɔlɔ tatɛ lo 1914? b) Ambola akɔna wakokaso ndjambola?

³ Tatɛ lo 1914, lokumu l’ɔlɔlɔ la Diolelo lakayongaka la dui dikina di’ɔngɛnɔngɛnɔ diakahombe mbewoyama. Kristo ekɔ mɛtɛ lo mbolɛ oko Nkumekanga ka Diolelo dia Nzambi dia l’olongo, kânga mbolɛndɛ ‘l’atei w’atunyi ande.’ (Osambu 110:1, 2; Mateu 24:14; Enyelo 12:7-12) Ndo nto, lo nkɛtɛ k’otondo, anto ande wa kɔlamelo wekɔ lo kitanyiya l’otema ɔtɔi lowandji lande lo ndjasha l’olimu wa wetshelo wa Bible wasalema l’andja w’otondo lo yoho yewɔ watasalemaka ndoko lushi l’ɔkɔndɔ w’anto. (Danyele 7:13, 14; Mateu 28:18) Akristo w’akitami, mbuta ate, “ana wa diulelu,” wekɔ lo kamba oko “akendji wa Kristu.” Lemba la “ekoko ekina” wa Kristo wakamba oko atomami wa Diolelo diaki Nzambi mbasukɛka la kɔlamelo tshɛ. (Mateu 13:38; 2 Koreto 5:20; Joani 10:16) Koko, sho pombaka ndjasɛdingola onto l’onto dia menda kana tekɔ mɛtɛ lo mbetawɔ lowandji la Kristo. Onde tekɔ la kɔlamelo ya mɛtɛ le nde? Ngande wakokaso monga la kɔlamelo le Nkumekanga kôlɛ l’olongo? Nyɛsɔ tɔsɛdingole ntondo ɛkɔkɔ wele laso wa monga la kɔlamelo le Kristo.

Nkumekanga kele la waonga watshutshuya anto ande dia monga la kɔlamelo le nde

4. Kakɔna kakasale Yeso etena kakandakambaka olimu ande lanɛ la nkɛtɛ oko wende Nkumekanga kakasɔnama?

⁴ Lowando lele laso le Kristo lo kɛnɛ kakandatosalɛ ndo waonga ande w’amɛna mbatotshutshuya dia monga la kɔlamelo le nde. (1 Petero 1:8) Lam’akinde lanɛ la nkɛtɛ, Yeso, mbuta ate Nkumekanga kakasɔnama akɛnya lo yɛdikɔ ya tshitshɛ kɛnɛ kayondosala oko Nkumekanga lo nkɛtɛ k’otondo lo etena kakashikikɛ Nzambi. Nde akalesha anto waki la ndjala. Akakɔnɔla wanɛ waki la hemɔ, akanga wa totshungu, akanga wa dikɔmɔ, akanga wa mpoke, ndo akanga a lomi. Nde akolola anto amɔtshi. (Mateu 15:30, 31; Luka 7:11-16; Joani 6:5-13) Ndo nto, mbeya woho wakasɛnɛ Yeso lanɛ la nkɛtɛ tokimanyiyaka dia mbeya waonga ande oko wende Nkumekanga kayɔlɔmbɔla nkɛtɛ, djekoleko ngandji kande ka ndjahombia. (Mako 1:40-45) Lo kɛnɛ kendana la dikambo sɔ, Napoléon Bonaparte akate ate: “Alexandre, César, Charlemagne, ndo dimɛ takasale waolelo, ko kakɔna kakatokimanyiya dia sala awui wa weke asɔ? Wolo aso. Koko Yeso akahike diolelo diande lo ngandji, ndo nshi nyɛ miliyɔ y’anto wekɔ lo mbetawɔ dia mvɔ lo dikambo diande.”

5. Lande na kakakotwamaka anto oya le Yeso?

⁵ Lam’ele Yeso aki la memakana ndo l’otema w’okitshakitsha, wanɛ tshɛ wakakɔmɔka l’ɔtɛ w’ekakatanu wakakeketshamaka la wetshelo ande wa dimɛna ndo oma lo kɛtshi kande. (Mateu 11:28-30) Ana wakayaokaka dimɛna lalende. Anto waki la okitshakitsha ndo la shɛnɔdi wakakomaka ambeki ande. (Mateu 4:18-22; Mako 10:13-16) Kɛtshi ndo dilɛmiɛlɔ diaki lande akatshutshuya wamato wakokaka Nzambi wɔma dia monga la kɔlamelo le nde. Amɔtshi wakakambe la wenya, la wolo ndo la diangɔ diawɔ dia l’emunyi dia mbokimanyiya etena kakandakambaka olimu ande.​—Luka 8:1-3.

6. Ngande wakakɛnɛmɔla Yeso woho wakandatɛtɛka solo etena kakavu Lazaro?

⁶ Kristo akakɛnɛmɔla woho wakandatɛtɛka solo etena kakavu ɔngɛnyi ande Lazaro. Lɔkɔnyɔ l’efula laki la Mariya ndo Mata akawosha pâ efula woho ɔnɛ wele nde kokoka nto mbikikɛ, nde “akaleli.” Nde “akanyangi wulu.” Nde akayakiyanya efula ndo aki la lɔkɔnyɔ heyama kânga mbakandeyaka dia kema edja nde ayanga mbolola Lazaro. Oma lâsɔ, l’ɔtɛ wa ngandji ndo wa kɛtshi kaki lande, Yeso akakambe la wolo wakawosha Nzambi dia mbolola Lazaro.​—Joani 11:11-15, 33-35, 38-44.

7. Kakɔna ketɛ Yeso onto lahombaso monga la kɔlamelo le nde? (Enda nto kiombo ya lo lɛkɛ 31.)

⁷ Ngandji k’efula kakalangaka Yeso kɛnɛ kele ɔlɔlɔ ndo woho wakandahetshaka lɔkɛwɔ la dungi pende ndo kɛnɛ kele kɔlɔ totshutshuyaka dia monga la wɔma wɔsɔhanyi la dilɛmiɛlɔ le nde. Mbala hiende y’etondo, nde akatshanya amundji w’okanda wa lokaki lo tɛmpɛlɔ. (Mateu 21:12, 13; Joani 2:14-17) Ndo nto, etena kakandasɛnaka oko onto lanɛ la nkɛtɛ, nde akahomana la weho tshɛ w’ekakatanu ndo kɛsɔ akokimanyiya dia nde mbeya dimɛna tohiha ndo ekakatanu wahomana laso. (Heberu 5:7-9) Yeso akeyaka nto kɛnɛ kalembetshiya mpetshama ndo salemɛ akambo aha la losembwe. (Joani 5:15-18; 11:53, 54; 18:38–19:16) L’ekomelo, nde akayetawɔ ndjakema nyɔi ka kɔlɔ dia kotsha lolango la She ndo dia mbisha anto ande lɔsɛnɔ la pondjo. (Joani 3:16) Onde waonga wa Kristo asɔ hawokotshutshuya dia tetemala mbokambɛ la kɔlamelo? (Heberu 13:8; Enyelo 5:6-10) Ko kakɔna kahombama dia monga ɔmɔtshi l’atei wa anto wa Kristo Nkumekanga?

Kɛnɛ kalɔmbama dia monga anto wa Kristo

8. Kakɔna kalɔmbama le anto wa Kristo?

⁸ Ohokana yimba lo wɛdikelo ɔnɛ: Dia onto todjasɛ lo wodja okina, nde pombaka kotsha awui amɔtshi. Wanɛ wakombola todjasɛ lo wodja okina mbeyaka nɔmbama dia monga la dionga dia dimɛna ndo ndjela ɛlɛmbɛ ɛmɔtshi wendana la yonge ya demba. Woho akɔ wâmɛ mbele, anto wa Kristo pombaka ndjela ɛlɛmbɛ wa lâdiko wendana la lɔkɛwɔ ndo monga la lonyuma la dimɛna.​—1 Koreto 6:9-11; Ngalatiya 5:19-23.

9. Ngande wakokaso mɛnya dia tekɔ la kɔlamelo le Kristo?

⁹ Yeso Kristo akalɔmbɛ nto dia anto ande monga la kɔlamelo otsha le nde ndo otsha lo Diolelo diande. Vɔ mɛnyaka kɔlamelo shɔ lo nsɛna lo yoho yɔtɔnɛ la kɛnɛ kaketsha Nkumekanga kakasɔnama etena kakinde lanɛ la nkɛtɛ. Ɛnyɛlɔ, vɔ mbetshaka wahɔ wa Diolelo ndo lolango laki Nzambi la ntondo ka lomombo la l’emunyi. (Mateu 6:31-34) Vɔ salaka nto tshɛ dia kɛnɛmɔla lonto lele oko la Kristo, kânga la ntondo ka ekakatanu woleki wolo. (1 Petero 2:21-23) Ndo nto, anto wa Kristo ndjelaka ɛnyɛlɔ kande lo mbɔsa yɛdikɔ ya salɛ anto akina kɛnɛ kele ɔlɔlɔ.​—Mateu 7:12; Joani 13:3-17.

10. Ngande wakoka onto mɛnya kɔlamelo yande le Kristo a) lo nkumbo ndo b) l’etshumanelo?

¹⁰ Ambeki waki Yeso mɛnyaka nto kɔlamelo yawɔ le nde lo kɛnɛmɔla waonga ande lo nkumbo. Ɛnyɛlɔ, waomi mɛnyaka kɔlamelo otsha le Nkumekanga kawɔ kele l’olongo lo mbokoya waonga waki Kristo lo yoho yasɛnawɔ la wadiɛwɔ ndo l’anawɔ. (Efeso 5:25, 28-30; 6:4; 1 Petero 3:7) Wadi mɛnyaka kɔlamelo yawɔ le Kristo lo monga la lɔkɛwɔ la pudipudi ndo lo monga la “memakana ndo ki.” (1 Petero 3:1-4; Efeso 5:22-24) Ana mɛnyaka kɔlamelo le Kristo etena kayelawɔ ɛnyɛlɔ kande ka okitanyiya. Oma ko dikɛnda, Yeso aki l’okitanyiya otsha le ambutshi ande kânga mbakiwɔ anto wele bu kokele. (Luka 2:51, 52; Efeso 6:1) Anto wa Kristo salaka la wolo dia mbowokoya lo ‘mbokana kɛtshi, lo monga la ngandji k’onto la ɔnango’ ndo la ‘etema wa memakana.’ Vɔ salaka la wolo dia monga oko Kristo, mbuta ate, ‘monga la okitshakitsha, aha kaloya kɔlɔ lo kɔlɔ kana lɔtɛngɔ lo lɔtɛngɔ.’​—1 Petero 3:8, 9; 1 Koreto 11:1.

Anto wa Kristo kitanyiyaka ɛlɛmbɛ ande

11. Ɔlɛmbɛ akɔna wakitanyiya anto wa Kristo?

¹¹ Oko wele anto wakombola todjasɛ lo wodja okina nɔmbamaka dia kitanyiya ɛlɛmbɛ wa wodja akɔ, mbele ndo anto wa Kristo kitanyiyaka “elembe wa Kristu” lo nsɛna lo yoho yɔtɔnɛ la kɛnɛ tshɛ kaketsha ndo kakadjanga Yeso. (Ngalatiya 6:2) Vɔ nsɛnaka lo ndjela “olembe w’uleki ekina,” mbuta ate wa ngandji. (Jakoba 2:8) Kakɔna kalɔmba ɔlɛmbɛ ɔsɔ na?

12, 13. Ngande wakitanyiyaso la kɔlamelo tshɛ “elembe wa Kristu”?

¹² Anto wa Kristo salaka munga ndo mindjaka. (Romo 3:23) Ɔnkɔnɛ, vɔ pombaka tetemala monga la ‘ngandji ka mɛtɛ k’onto la ɔnango’ woho wa vɔ ‘monga la ngandji k’efula k’oma k’ɛse otema lam’asawɔ.’ (1 Petero 1:22) “Naka untu la ukina dikambu,” anto wa Kristo kitanyiyaka la kɔlamelo ɔlɛmbɛ wa Kristo lo ‘mbikikanela kɔlɔ ndo lo nyimanyiyana la lolango.’ Kitanyiya ɔlɛmbɛ ɔsɔ mbakimanyiyaka dia minya yimba lo munga y’asekawɔ ndo tana ɛkɔkɔ wa mbokana ngandji lam’asawɔ. Onde wɛ hangɛnangɛna dia monga kâmɛ l’anto wele l’ɔtɛ w’okitanyiya awɔ le Nkumekanga kaso ka ngandji, wekɔ la ngandji, mbuta ate “dimama dia uluwanyi”?​—Kolosai 3:13, 14.

¹³ Ndo nto, Yeso akɛnya dia ngandji kakandoke anto ndeka la fwa ngandji kokana anto lam’asawɔ. (Joani 13:34, 35) Naka tayolangaka paka wanɛ watolanga, ‘dikambo diakɔna dia lânde’ diasalaso? Naka ngasɔ, kete ngandji kaso hatonga ka kokele. Yeso akatokeketsha dia mbokoya ngandji ka She lo monga la ngandji kohikami lo atɔndɔ kânga otsha le atunyi watohetsha ndo watɔhɛnyahɛnya. (Mateu 5:46-48) Ngandji kɛsɔ tshutshuyaka nto anto wa Kristo dia tetemala la kɔlamelo tshɛ l’olimu awɔ woleki ohomba. Olimu akɔna ɔsɔ?

Kɔlamelo y’anto wa Kristo yambɔtɔ l’ohemba

14. Lande na kele olimu w’esambishelo wekɔ ohomba efula?

¹⁴ Anto wele l’ɛse ka Diolelo diaki Nzambi wekɔ l’olimu w’ohomba efula ‘wa sambisha Diolelo dia Nzambi.’ (Etsha 28:23) Ekɔ ohomba efula sala dikambo sɔ nɛ dia Diolelo dia Mɛsiya diayoyindja lowandji la Jehowa la l’andja w’otondo. (1 Koreto 15:24-28) Etena kasambishaso lokumu l’ɔlɔlɔ, anto watohokamɛ kondjaka diaaso dia koma anto wele l’ɛse ka Diolelo diaki Nzambi. Kristo Nkumekanga ayolombosha anto lo ndjela kɛnɛ kasalawɔ etena kokawɔ lokumu l’ɔlɔlɔ. (Mateu 24:14; 2 Tesalonika 1:6-10) Oma lɔkɔ, yoho yoleki yɛnya anto kɔlamelo yawɔ le Kristo ele lo kitanyiya didjango diande dia mbewoya anto akambo wa Diolelo.​—Mateu 28:18-20.

15. Lande na kɔtɔ kɔlamelo y’Akristo l’ohemba?

¹⁵ Satana ekɔ lo sala tshɛ kakokande sala dia shimba olimu w’esambishelo ndo ewandji wa l’andja ɔnɛ hawetawɔ lowandji lakasha Nzambi Kristo. (Osambu 2:1-3, 6-8) Yeso akahɛmɔla ambeki ande ate: “Ukambi haleki uwandji andi. Naka vo wakansuya, wayunyusuya ndu nyu.” (Joani 15:20) Diakɔ diele, ambeki waki Kristo wekɔ lo ndɔ ta dia lo nyuma diadja kɔlamelo yawɔ l’ohemba.​—2 Koreto 10:3-5; Efeso 6:10-12.

16. Anto wele l’ɛse ka Diolelo ngande washawɔ ‘Nzambi diangɔ dia Nzambi’?

¹⁶ Koko, anto wele l’ɛse ka Diolelo diaki Nzambi tetemalaka monga la kɔlamelo otsha le Nkumekanga kawɔ kahɛnama aha la mɔnyɔla ewandji w’ana w’anto. (Tito 3:1, 2) Yeso akate ate: “Nyusha Kayisa diango dia Kayisa. Nyusha [Nzambi] diango dia [Nzambi].” (Mako 12:13-17) Ɔnkɔnɛ, anto wa Kristo kitanyiyaka ɛlɛmbɛ wa lɛɛta wahalɔshana la ɛlɛmbɛ waki Nzambi. (Romo 13:1-7) Etena kakɔnyɔla ase tuminadi ta lâdiko t’ase Juda ɔlɛmbɛ waki Nzambi lo shimba ambeki waki Yeso diaha vɔ sambisha, vɔ wakate la wolo tshɛ ndo la dilɛmiɛlɔ dia vɔ pombaka ‘kitanyiya Nzambi oko wende nkumekanga, koko aha anto.’​—Etsha 1:8; 5:27-32.

17. Lande na kahombaso tokomɛ ohemba wa kɔlamelo la dihonga?

¹⁷ Lo mɛtɛ, anto wa Kristo pombaka monga la kɔlamelo le Nkumekanga kawɔ etena kahɛnyahɛnyamawɔ. Yeso akate ate: “Lam’ayuwunyotenga, lam’ayuwunyusuya, lam’ayuwunyumamanyia wehu tshe w’akambu wa kolo dia dikambu diami, nyeko la otshoko. Nyongenengene, nyutamanya ngenangena, ne dia difutu dianyu dieko efula l’ulungu.” (Mateu 5:11, 12) Ambeki waki Yeso wa ntondo wakɛnyi mɛtɛ k’ɛtɛkɛta ɛsɔ. Kânga etena kakawâkɔmɔla lo woho wakawatetemalaka la sambisha akambo wa Diolelo, vɔ wakangɛnangɛna “ne dia vo wakakuki dia monywama dia lukumbu loso. La lushi la lushi lu etemwelo ndu la wakawo, vo kumpeko mbetsha antu la nsambisha [l]ukumu l’[o]lolo vati: Jesu keli Kristu.” (Etsha 5:41, 42) Wɛ kokaka mɛtɛ mandɔma lo woho wongayɛ la kɔlamelo oko vɔ etena kakikɛyɛ ekakatanu, hemɔ, asui kana ɔlɔshamelo.​—Romo 5:3-5; Heberu 13:6.

18. Kakɔna kɛnya ɛtɛkɛta wakatɛ Yeso Pɔnsɔ Pilato?

¹⁸ Etena kakinde eke onto lakasɔnama dia ndjonga Nkumekanga, Yeso akewoya Pɔnsɔ Pilato, nguvɛrnɛrɛ k’ose Rɔma ate: “Diulelu diami diaha dia la kete nye. Utunduyala diulelu diami dia la kete nye mbedio, tshiki antu ami wutondwela ta, diaha dimi nkimwama l’anya w’asi Juda. Keli kakiane, diulelu diami diaha dia la kete nye.” (Joani 18:36) Ɔnkɔnɛ, anto wele l’ɛse ka Diolelo dia l’olongo hawɛmbɛ ekoma dia ndɔsha anto kana mbeta lo wedi ɔmɔtshi etena katomba ata. Lo mɛnya kɔlamelo yawɔ le “Uwandji wa ki,” vɔ tshikalaka lomangemange l’awui wa l’andja ɔnɛ.​—Isaya 2:2-4; 9:6, 7.

Ɛtshɔkɔ wa pondjo wayokondja anto wa Kristo wele la kɔlamelo

19. Bonde kakoka anto wa Kristo kongɛ nshi yayaye l’eshikikelo tshɛ?

¹⁹ Anto wele la kɔlamelo le Kristo, “Khumi ka Wakhumi,” wekɔ lo kongɛ nshi yayaye l’eshikikelo tshɛ. Vɔ wekɔ lo kongɛ l’asolo walomɔlomɔ woho wayangande mɛnya lo nkɛtɛ lowandji laki Nzambi laheme tshɛ. (Enyelo 19:11–20:3; Mateu 24:30) Atshikadi wa kɔlamelo wa akitami wa nyuma wa “ana wa diulelu” wekɔ lo kongɛ sango diawɔ di’oshinga wolo dia monga nkumi ya dikanga kâmɛ la Kristo l’olongo. (Mateu 13:38; Luka 12:32) “Ekoko ekina” waki Kristo wele la kɔlamelo wekɔ lo kongɛ l’asolo walomɔlomɔ etena kayowatɛ Nkumenga ate: “Nyuyi, nyu etshokwami wa Papa, nyukiti diulelu diakawanyolongoswela umaka etatelu k’andja.” (Joani 10:16; Mateu 25:34) Ɔnkɔnɛ, tekɔ lo nɔmba wanɛ tshɛ wele l’ɛse ka Diolelo dia vɔ mbɔsa yɛdikɔ ya tetemala kambɛ Kristo Nkumekanga la kɔlamelo tshɛ.

[Nɔte ka l’ɛse ka dikatshi]

Onde wɛ koka nembetshiya?

• Kakɔna kakasale Kristo kahombaso monga la kɔlamelo le nde?

• Ngande wɛnya anto wa Kristo kɔlamelo yawɔ le nde?

• Lande na kalangaso monga la kɔlamelo le Kristo Nkumekanga?

[Kiombo ya lo lɛkɛ 31]

WAONGA AKINA WA WEKE WAKI KRISTO

Kema la shɔnɔdi​—Joani 4:7-30.

Kɛtshi​—Mateu 9:35-38; 12:18-21; Mako 6:30-34.

Ngandji ka ndjahombia​—Joani 13:1; 15:12-15.

Kɔlamelo​—Mateu 4:1-11; 28:20; Mako 11:15-18.

Mbokanaka kandji​—Mako 7:32-35; Luka 7:11-15; Heberu 4:15, 16.

Ekanelo k’ɔlɔlɔ​—Mateu 15:21-28.

[Osato wa lo lɛkɛ 29]

Sho kitanyiyaka “elembe wa Kristu” lo mbokana ngandji lam’asaso

[Esato wa lo lɛkɛ 31]

Onde waonga waki Kristo kotshutshuyaka dia mbokambɛ la kɔlamelo?