‘Lushi la woke la Jehowa laya suke’
“Lushi la wuki la [Jehowa] laya suki, lo lambusukana, lo layuya esadi.”—ZEFANIYA 1:14.
1, 2. a) Naa lushi la lânde lakongɛ Akristo? b) Ambola akɔna wahombaso ndjambola, ndo lande na?
OSEKASEKA ɔmɔtshi wele l’ɔngɛnɔngɛnɔ ekɔ lo kongɛ l’asolo walomɔlomɔ lushi lande la diwala. Mama kɛmɔtshi kele la diemi ekɔ lo kongɛ la ngandji tshɛ eotwelo k’ɔnande. Okambi ɔmɔtshi w’olimu wambɔlɛmba ekɔ lo kongɛ l’asolo walomɔlomɔ lushi layondotatɛ vakashi yande yambondokongɛ edja efula. Dui diakɔna diafɔna anto asɔ na? Vɔ tshɛ wekɔ lo kongɛ lushi lɔmɔtshi la lânde, mbuta ate lushi layonga la shɛngiya lo nsɛnɔ yawɔ. Vɔ tshɛ wekɔ la nsaki ya wolo efula koko yotshikitanyi. Lushi lakongɛwɔ lɔsɔ layoya mɛtɛ ndo etena kayoya lushi lakɔ, vɔ nongamɛka dia wayoyalɔngɔsɔla dikambo dialɔ.
2 Ɛlɔ kɛnɛ, Akristo wa mɛtɛ wekɔ lo kongɛ vɔ lawɔ l’asolo walomɔlomɔ oyelo wa lushi lɔmɔtshi la lânde. Ɔsɔ ekɔ ‘lushi la woke la Jehowa.’ (Isaya 13:9; Joele 2:1; 2 Petero 3:12) Ko oyelo ɔsɔ wa “lushi la [Jehowa],” alembetshiyawɔ ndo vɔ wayonga la shɛngiya yakɔna le anto? Ndo nto, ngande wakokaso ndjashikikɛ dia tamboyalɔngɔsɔla lo dikambo dia oyelo wa lushi lɔsɔ? Ekɔ ohomba efula sho nyanga ekadimwelo wa ambola asɔ kakianɛ nɛ dia awui efula mɛnyaka mɛtɛ ka ɛtɛkɛta wa lo Bible ɛnɛ: “Lushi la wuki la [Jehowa] laya suki, lo lambusukana, lo layuya esadi.”—Zefaniya 1:14.
‘Lushi la woke la Jehowa’
3. Elɛwɔ ‘lushi la woke la Jehowa’?
3 Elɛwɔ ‘lushi la woke la Jehowa’? Lo Afundelo, etelo k’ɔnɛ “lushi la Jehowa” mendanaka la tena dia lânde diakela Jehowa elanyelo le atunyi ande ndo diakandatombola lokombo lande la woke. ‘Nshi ya Jehowa’ yakakomɛ ase Juda ndo ase Jerusalɛma waki komonga la kɔlamelo kâmɛ ndo ase Babilɔna la ase Edjibito w’esehe etena kakaye elombwelo kaki Jehowa le wɔ. (Isaya 2:1, 10-12; 13:1-6; Jeremiya 46:7-10) Koko, “lushi la [Jehowa]” loleki woke lêke la ntondo. Ɔsɔ ekɔ “lushi” layela Jehowa elombwelo kande le wanɛ wɔnyɔla lokombo lande. Lɔ layotatɛ la elanyelo ka “Babilona ka Wuki,” mbuta ate tshunda di’ɛtɛmwɛlɔ wa kashi wa l’andja w’otondo ndo layokoma lo kondoko ya lɔ lo elanyelo ka dikongɛ nɛ di’akambo dia kɔlɔ lo ta dia Aramangɛdɔna.—Enyelo 16:14, 16; 17:5, 15-17; 19:11-21.
4. Lande na kahomba anto efula mboka lushi la Jehowa layasukana esadi esadi lɔsɔ wɔma?
4 Oyadi vɔ shihodiaka dui sɔ kana bu, anto efula pombaka mboka lushi layasukana esadi esadi lɔsɔ wɔma. Lande na? Jehowa kadimolaka lo tshimbo y’ɔprɔfɛta Zɛfaniya ate: “Lushi lako, layuyala lushi l’ududu, lushi l’ohenyohenyo la asui, lushi la dihandju la elanyelu, lushi la udjima la lutshukutshuku, lushi la wangi la udjima a tshududu.” Lushi lɔsɔ lekɔ mɛtɛ lushi la wɔma efula! Ɔprɔfɛta mbutaka nto ate: “Dimi layela asui le antu . . . ne dia wakantshela, . . . [Jehowa], kolo.”—Zefaniya 1:15, 17.
5. Naa kanyi y’ɔlɔlɔ yele la miliyɔ y’anto lo kɛnɛ kendana la lushi la Jehowa, ndo lande na?
5 Koko, miliyɔ nkina y’anto kongɛka l’asolo walomɔlomɔ oyelo wa lushi la Jehowa. Lande na? Nɛ dia vɔ mbeyaka dia ɔsɔ ekɔ etena ka panda ndo k’etshungwelo k’anto w’ɔlɔlɔ, mbuta ate lushi layotombwama Jehowa ndo layokidiama lokombo lande la woke. (Joele 3:16, 17; Zefaniya 3:12-17) Anto koka mboka lushi lɔsɔ wɔma kana likongɛ l’asolo walomɔlomɔ lo ndjela kɛnɛ kasalawɔ la nsɛnɔ yawɔ ɛlɔ kɛnɛ. Ngande wɔsayɛ oyelo wa lushi lɔsɔ? Onde wɛ amboyalɔngɔsɔla dia lushi lɔsɔ? Onde mbeya ɔnɛ lushi la Jehowa laya suke ekɔ la shɛngiya lo lɔsɛnɔ layɛ la lushi la lushi?
“Asoki wayuya la losoko lawo”
6. Ngande wɔsa anto efula “lushi la [Jehowa],” ndo lande na kele dui sɔ hadiambia Akristo wa mɛtɛ?
6 Anto efula hawoleke mbidja yimba lo oyelo wa “lushi la [Jehowa],” kânga mbele dui sɔ ohomba efula. Vɔ mbɔlaka ndo mɔnyɔlaka wanɛ wawaewoya dia oyelo wa lushi lɔsɔ waya kemembe. Akristo wa mɛtɛ hawambe dikambo sɔ. Vɔ mbohɔka ɔhɛmwɛlɔ wakasha ɔpɔstɔlɔ Petero ɔnɛ: “Nyuteyi ntundu nyati: Lu nshi y’ekumelu, asoki wayuya la losoko lawo, wayutshaka uku saki yawo; wayuta vati: Daka dia eyelu kandi, lend’edio? Ne dia umaka lushi lakavu watshesu, diango tshe dieko pupu uku akidio uma l’etatelu k’etungelu.”—2 Petero 3:3, 4.
7. Kakɔna kayotokimanyiya dia sho tetemala sala akambo la shamanya?
7 Kakɔna kayotokimanyiya dia ndɔshana la kanyi ya kɔlɔ shɔ ndo tetemala sala akambo la shamanya? Petero totɛka ate: “Dimi lambangasanya etema anyu w’ololo ne dia nyuhula. Dieli la nyu dia mbuho aui wakati amvutshi w’ekila, ndu elembe wa Khumadiondjo la Ushimbedi, wakandanyutela l’enyo w’atumami anyu.” (2 Petero 3:1, 2) Woho wadjaso yimba lo ɛhɛmwɛlɔ wa prɔfɛsiya ayotokimanyiya dia ‘memula akoka aso w’ekanelo ka yimba.’ Ondo tamboka ɛhɛmwɛlɔ ɛsɔ mbala ko mbala, koko nshi nyɛ mbamboleka monga ohomba dia sho tetemala mbidja yimba lo ɛhɛmwɛlɔ akɔ.—Isaya 34:1-4; Luka 21:34-36.
8. Lande na kɔnyɔla anto efula waohwelo wa lo Bible?
8 Lande na kɔnyɔla anto amɔtshi waohwelo asɔ? Petero tetemalaka mbuta ate: ‘Lo ndjela nsaki yawɔ, vɔ mbohɛka dia oma lo dui dia Nzambi mbakatongama olongo lo nshi y’edjedja ndo mbakatombe nkɛtɛ oma lo ashi ndo mbodingamiyɔ la ashi. Ndo ɔnɛ la elola k’ashi akɔ mbakalanya Nzambi andja ɔsɔ.’ (2 Petero 3:5, 6) Eelo, ekɔ anto amɔtshi wahakombola dia lushi la Jehowa ndja. Vɔ hawolange dia ɛngɔ kɛmɔtshi memadja awui wasalawɔ lushi la lushi lo nsɛnɔ yawɔ. Vɔ hawolange ndjokoya la Jehowa l’ɔtɛ wa yoho yawɔ ya lɔsɛnɔ ya lokaki! Oko wata Petero, vɔ nsɛnaka ‘lo ndjela nsaki yawɔ.’
9. Dionga diakɔna diaki la anto wa lo nshi ya Nɔa ndo ya Lɔta?
9 L’ɔtɛ wa ‘nsaki yawɔ,’ amɔnyɔdi asɔ mbohɛka dia Jehowa akekɛ lonya lo akambo w’anto lo nshi yakete. Yeso Kristo ndo ɔpɔstɔlɔ Petero wakatɛkɛta di’awui wakete lo “nshi ya Noa” ndo lo “nshi ya Lota.” (Luka 17:26-30; 2 Petero 2:5-9) La ntondo ka Mvula k’elola, anto kombidja yimba lo ɛhɛmwɛlɔ wakawasha Nɔa. Woho akɔ wâmɛ mbele, la ntondo k’elanyelo ka Sɔdɔma la Ngɔmɔra, Lɔta akɔsama oma le akilo ande w’apami oko onto lata “awui wa sawusawu.”—Etatelu 19:14.
10. Kakɔna kayosalɛ Jehowa wanɛ wahadje ɛhɛmwɛlɔ ande yimba?
10 Woho akɔ wâmɛ mbele ɛlɔ kɛnɛ. Koko, tolembete kɛnɛ kata Jehowa lo dikambo dia wanɛ wahadje ɛhɛmwɛlɔ ande yimba ɔnɛ: “Dimi layusuya antu wudjashi l’atei w’engenongeno awo, watutaka l’etema awo vati: [Jehowa] hutsha ololo kana kolo. Ekundji awo wayuyala diango dia dimbu, mvudu yawo yayuyala elanyelu ketu. Vo wayuhika mvudu, keli hawudjase loko. Vo wayune ekodi wa vinyo lu dikambo, keli hawono ashi awo w’elua.” (Zefaniya 1:12, 13) Anto koka tetemala sala awui awɔ wa lushi la lushi, koko hawotokondja wahɔ wa pondjo oma lo olimu awɔ wa wolo. Lande na? Nɛ dia lushi la Jehowa layoya la shashimoya ndo ɛngɔnyi tshɛ wakawayamɔtshɛ hatowashimbɛ.—Zefaniya 1:18.
‘Totetemale likongɛ’
11. Dako diakɔna diahombaso mbohɔka?
11 Otshikitanyi la andja wa kɔlɔ wotodingi ɔnɛ, sho pombaka mbohɔka dako diakafunde ɔprɔfɛta Habakuka ɔnɛ: “Enelo kene keko ne dia etena kakasonwama. To kutsha nkuma l’ekumelu kato, to huta kashi. Kuyanga to kayutshimbatshimba nyukikungeli. To kayuya mete hakiutshimbatshimba.” (Habakuka 2:3) Kânga mbakoka lushi lɔsɔ mɛnama diele oko lambotshimbatshimba lo ndjela kanyi y’anto, sho la dia mbohɔka dia Jehowa kema ɔkɔkɛ. Lushi lande layoya la wonya, mbuta ate lo wonya wahalongamɛ anto.—Mako 13:33; 2 Petero 3:9, 10.
12. Ɔhɛmwɛlɔ akɔna wakasha Yeso, ndo kakɔna kɛnya dia ambeki ande wa kɔlamelo wakakitanyiya ɔhɛmwɛlɔ akɔ?
12 Lo mɛnya ohomba wa nongamɛka lushi la Jehowa, Yeso akate dia ndo ambeki ande amɔtshi hawototetemala sala akambo la shamanya. Nde akate lo kɛnɛ kendana la wɔ ate: “Keli lam’ayuta ukambi a kolo uku l’utema andi ati: Khumemi ambutubiya. Ku lam’ayundutatela nkomola anyandi ekambi, lam’ayundolekaka, lam’ayundonokaka la ambidjoki a wanu, khumi a ukambi ako ayuya lu lushi lahandalungamela, ndu lu unya wahandeyi. Ndi ayôkomola wulu.” (Mateu 24:48-51) Lo wedi okina, ɔhɔmbɔ wa kɔlamelo ndo wa kɛsɔ tetemalaka sala akambo la shamanya la kɔlamelo tshɛ. Olui w’ɔhɔmbɔ tetemalaka sungukala ndo ndjalɔngɔsɔla. Yeso akakitsha ɔhɔmbɔ ɔsɔ ‘lâdiko dia diangɔ diande tshɛ’ diele lanɛ la nkɛtɛ.—Mateu 24:42-47.
Ohomba wa sala akambo la shamanya
13. Ngande wakɛnya Yeso ohomba wa sala akambo la shamanya?
13 Aki ohomba efula dia Akristo wa lo ntambe ka ntondo tetemala sala akambo la shamanya. Vɔ wakahombe mbɔsa yɛdikɔ ya ndawɔ oma la Jerusalɛma aha la tshimbatshimba etena kakawɛnyi dia “elui w’alimbi wambudinga Jerusalema.” (Luka 21:20, 21) Dui sɔ diakakotshama lo ɔnɔnyi 66 tena diaso nɛ. Tende woho wakatɔtɔmiya Yeso ohomba w’Akristo sala akambo la shamanya: “One leli ladiku dia luudu takitaki dia ntosa diango uma lu luudu landi. One leli l’ekambo takalulaki dia ntosa koti diandi.” (Mateu 24:17, 18) Lo menda woho wɛnya ɔkɔndɔ w’anto ɔnɛ osomba wa Jerusalɛma wakatshikala ɛnɔnyi ɛnɛi aha la ndanyema, lande na kakahombe Akristo kitanyiya ɛtɛkɛta wa Yeso wa sala akambo la shamanya lo ɔnɔnyi 66 tena diaso nɛ?
14, 15. Lande na kakahombe Akristo wa lo ntambe ka ntondo mbɔsa yɛdikɔ aha la tshimbatshimba etena kakawɛnyi di’alembe wambodinga Jerusalɛma?
14 Kânga mbele ekɔ mɛtɛ dia alembe w’ase Rɔma kondanya Jerusalɛma la ntondo ka ɔnɔnyi 70 tena diaso nɛ, ndoko ki kaki l’osomba lo ɛnɔnyi ɛnɛi ɛsɔ. Ɛnɔnyi ɛsɔ wakalole l’awui wa ngala ndo diakatanelo. Lo dikambo dia kɛnɛ kaketaka la Jerusalɛma lo etena kɛsɔ, ombewi ɔmɔtshi wa ɛkɔndɔ akate dia lo etena kakɔ “ta dia wɔma ndo dia lɔnyɔi dia lam’asa ase wodja diakalɔmaka ndo anto wakayakimɔ l’awui w’esehe.” Wakɔshi ɛlɔngɔlɔngɔ dia sukɛ ta sɔ, dia mbɔsa dihomɔ dia ta ndo dia mbɔtɔ l’olimu w’ɔsɔlayi. Vɔ wakawaetshaka akambo w’ata lushi la lushi. Wanɛ waki kosukɛka tɛdikɔ takawɔshi wakɔsamaka oko afungi. Otondongaka Akristo wakatshikala edja efula l’osomba, tshike wotokoka monga lo wâle wa mamba.—Mateu 26:52; Mako 12:17.
15 Sho la dia mbeya dia Yeso akate dia “wane waki la Judiya,” koko aha paka la Jerusalɛma ato mbakahombe tatɛ ndawɔ. Dui sɔ diaki ohomba nɛ dia ngɔndɔ ngana tsho l’ɔkɔngɔ w’alembe w’ase Rɔma mimɔ la Jerusalɛma, vɔ wakatoya nto dia ndjɔlɔ l’ase Juda. Ngalileya mbakalɛndjama ntondo lo 67 tena diaso nɛ, ndo ɔnɔnyi wakayele lâsɔ, Judiya akayɔlɛndjamaka. Dui sɔ diakela pâ ka mamba lo toshamba tshɛ. Akakome nto dui dia wolo di’ose Juda tshɛ ndawɔ oma la Jerusalɛma. Anto wakalamaka nkuke y’osomba ndo onto tshɛ lakayangaka ndawɔ akɔsamaka oko onto lalanga kimɔ ase Juda l’anya w’ase Rɔma.
16. Dionga diakɔna diakahombe Akristo wa lo ntambe ka ntondo monga ladiɔ dia shimbamɛ lo nshi ya pâ?
16 La awui asɔ tshɛ lo yimba, sho kokaka shihodia lande na kakatɔtɔmiya Yeso ambeki ande dia vɔ sala akambo la shamanya. Akristo wakahombe monga suke dia ndjahombia diaha vɔ mundama lo djonga ya nsaki ka lomombo la l’emunyi. Vɔ wakahombe mbetawɔ ‘tshika kɛnɛ tshɛ kaki lawɔ’ dia kitanyiya ɔhɛmwɛlɔ wa Yeso. (Luka 14:33) Wanɛ wakakitanyiya aha la tshimbatshimba ndo wakalawɔ lo lɛkɛ lokina la Jɔrɔdana wakashimbamɛ .
Totetemale sala akambo la shamanya
17. Lande na kahombaso ndeka sala akambo la shamanya?
17 Prɔfɛsiya ya lo Bible mɛnyaka hwe dia tamboleka nyɔngɔmɛ lo nshi y’ekomelo. Sho pombaka ndeka sala akambo la shamanya nshi nyɛ. Lo nshi ya wɔladi ɔsɔlayi hatshimbe wɔɔngɔ ndo hoke dia nde ekɔ lo wâle wa ta. Koko, naka nde hɛnyi ohomba wa mambalɛka ko ambelamɛ la shashimoya lo ta, kete nde honga suke ndo dui sɔ diayonga la etombelo wa kɔlɔ efula. Ɔsɔku mbediɔ ndo lo kɛnɛ kendana la ta dia lo nyuma. Naka hatoyosala akambo la shamanya, kete sho hatotonga suke dia shika ekolo la ntondo ka ɛlɔshamelo wakoka pomana laso ndo lushi la Jehowa mbeyaka ndjotokumɛ. (Luka 21:36; 1 Tesalonika 5:4) Naka onto ɔmɔtshi l’atei aso ‘ambotshika ndjela Jehowa,’ kete ɔnɛ ekɔ etena ka nde mboyanga nto.—Zefaniya 1:3-6; 2 Tesalonika 1:8, 9.
18, 19. Kakɔna kayotokimanyiya dia sho namaka lo yimba “lushi l’eyelu ka [Jehowa]”?
18 Aha la tâmu, ɔpɔstɔlɔ Petero akatotɛ dia sho namaka lo yimba “lushi l’eyelu ka [Jehowa]”! Ngande wakokaso sala dui sɔ? Yoho mɔtshi ele lo monga la ‘etsha wa lɔkɛwɔ l’ekila ndo la ditshelo dia anto wamamema Nzambi.’ (2 Petero 3:11, 12) Monga la olimu efula wa sala l’awui asɔ ayotokimanyiya dia sho nongamɛka l’asolo walomɔlomɔ oyelo wa “lushi la [Jehowa].” Tshɛkɛta ya lo Grɛkɛ yokadimɔmi ɔnɛ “namaka lo yimba” nembetshiyaka lo yoho ya mɛtɛ mɛtɛ ɔnɛ “samanyisha.” Hatokoke ntɔla nshi yambotshikala esadi esadi polo l’oyelo wa lushi la Jehowa. Koko, etena kakongɛso lushi lakɔ, nshi yayotshɔ esadi esadi naka tekɔ l’awui efula wa sala l’olimu wa Nzambi.—1 Koreto 15:58 .
19 Kanaka yimba lo Ɔtɛkɛta wa Nzambi ndo sɛdingolaka waohwelo wa lɔkɔ ayotokimanyiya dia sho sala dikambo sɔ, mbuta ate “nongamɛ la otema ɔtɔi (nongamɛ ndo samanyisha) oyelo” wa lushi lɔsɔ, eelo, dia sho “tetemala likongɛ.” (2 Petero 3:12, The Amplified Bible; The New Testament, oma le William Barclay) L’atei wa waohwelo asɔ mbele ndo prɔfɛsiya efula yakatɛkɛta aha tsho di’oyelo wa lushi la Jehowa koko ndo di’ɛtshɔkɔ efula wayokondja wanɛ ‘watetemala kongɛ Jehowa.’—Zefaniya 3:8.
20. Dako diakɔna diahombaso kitanyiyaka?
20 Ɔnɛ ekɔ mɛtɛ etena ka sho tshɛ kitanyiya dako diakatosha Jehowa lo tshimbo y’ɔprɔfɛta Zɛfaniya ɔnɛ: “Ntundu nyu nyatatshanyema uku fufudi yatufumbofumboka; ntundu ududu wa [Jehowa] watayi le nyu; ntundu ka lushi la [Jehowa] latayi le nyu. Nyuyangi [Jehowa], nyu akanga a memakana tshe wa la kete, nyu wane watulamaka adjangu andi. Nyuyangi akambu w’ololo, nyuyangi memakana. Undu, nyu mbeyaka panda lu lushi la kele ka [Jehowa].”—Zefaniya 2:2, 3.
21. Kakɔna kamboyashikikɛ ekambi wa Nzambi lo ɔnɔnyi 2007 ɔnɛ?
21 Kokaka mɛtɛ dia divɛsa diakasɔnama dikambo di’ɔnɔnyi 2007 mbuta ɔnɛ: ‘Lushi la woke la Jehowa laya suke.’ Ekambi wa Nzambi wekɔ l’eshikikelo ɔnɛ lɔ “laya suki, lo lambusukana, lo layuya esadi.” (Zefaniya 1:14) ‘Lɔ halotshimbatshimba.’ (Habakuka 2:3) Ɔnkɔnɛ etena kakatakongɛ lushi lɔsɔ, nyɛsɔ toleke mbidja yimba lo nshi yasɛnaso nyɛ, lo mbeya di’ekotshamelo k’ekomelo ka prɔfɛsiya shɔ kaya suke!
Onde wɛ kokaka kadimola?
• Elɛwɔ ‘lushi la woke la Jehowa’?
• Lande na kahɛnyi anto efula dia ɔnɛ ekɔ etena ka sala akambo la shamanya?
• Lande na kakahombe Akristo wa lo ntambe ka ntondo sala akambo la shamanya?
• Ngande wakokaso ndeka sala akambo la shamanya?
[Efundelo wa l’etei w’odingɔ wa lo lɛkɛ 12]
Divɛsa di’ɔnɔnyi 2007 diekɔ l’ɔtɛ a dui ɔnɛ: ‘Lushi la woke la Jehowa laya suke.’—Zefaniya 1:14.
[Esato wa lo lɛkɛ 9]
Oko wakidiɔ lo nshi ya Nɔa, amɔnyɔdi wayodiakema la shashimoya etena kayɔsa Jehowa yɛdikɔ
[Osato wa lo lɛkɛ 10]
Akristo wakahombe mbɔsa yɛdikɔ aha la tshimbatshimba etena kakawɛnyi “elui w’alimbi wambudinga” Jerusalɛma