Owandji w’ɔngɔnyi akasale ɔsɔnwɛlɔ wa kɔlɔ
OWANDJI ɔmɔtshi wa dikɛnda w’ɔngɔnyi aki onto ɔlɔlɔ, akakitanyiyaka ɛlɛmbɛ ndo aki ondjashi Nzambi. Lam’akandaye le Yeso nde akôkusamɛ ndo akawombola ate: “Umbetsha w’ololo, kayumutsha dia nkita lumu la pundju?”
Yeso akôkadimola lo mbɛnya ɔnɛ dia kondja lɔsɛnɔ, onto pombaka kitanyiya ɛlɛmbɛ waki Nzambi. Lam’akandalɔmbɛ Yeso dia nyomôlembetshiyawɔ dimɛna, Yeso akawotɛ ate: “Tudiakaki. Tunanaki. Tuvaki. Tumamanyiaki. Olemia sho la nyo. Ulangi unyaye uku ayalangaye.” Ɔsɔ aki ɛlɛmbɛ w’ohomba waki l’atei w’Ɛlɛmbɛ wakasha Nzambi Mɔsɛ. Oma lâsɔ, pami kakɔ akate ate: “Akambu aso tshe mbatumutshaka, dikambu diakona diambutshikala?”—Mateu 19:16-20.
Yeso “akawuki ngandji” ndo akawotɛ ate: “Dikambu otoi mbambutshikala le ye. Utshu, utusundja diango dieli laye, kusha akanga a weula, ku we ayuyala la diango l’ulungu. Kuyi, kuyundjeli.”—Mako 10:17-21.
Mbala kakɔ ɔtɔi, owandji wa dikɛnda akakome la ntondo ka yɛdikɔ ya wolo. Kakɔna kakandahombe sala? Onde nde ayetawɔ tshika ɔngɔnyi ande wa l’emunyi ko koma ombeki wa Yeso, kana nde hatolanga shisha diangɔ diande? Onde nde ayoyanga ekundji wa la nkɛtɛ, kana ayoyanga ekundji wa l’olongo? Ɔsɔ mɛtɛ aki yɛdikɔ ya wolo le nde. Mɛnamaka hwe dia nde akayashaka lo awui wa lo nyuma nɛ dia nde akakitanyiyaka Ɛlɛmbɛ ndo akambola kɛnɛ kakandakoke sala nto dia nde mbetawɔma le Nzambi. Ko yɛdikɔ yakɔna yakandɔshi na? Nde “akakende la lunyangu, ne dia ndi aki kanga diango efula.”—Mako 10:22.
Owandji wa dikɛnda ɔsɔ kɔmbɔsa yɛdikɔ ya lomba. Otondokoma ombeki wa kɔlamelo waki Yeso, tshike nde otokondja lɔsɛnɔ la pondjo lakandayangaka. Aha kɛnɛ kakakomɛ ɔlɔngɔlɔngɔ ɔsɔ mbalangaso tɛkɛta, nɛ dia sho mbeyaka dia ɛnɔnyi oko akumi anɛi l’ɔkɔngɔ, alembe w’ase Rɔma wakalanya Jerusalɛma la Juda vwa. Efula k’ase Juda wakashisha ɛngɔnyi awɔ ndo nsɛnɔ yawɔ.
Otshikitanyi la owandji wa dikɛnda ɔsɔ, ɔpɔstɔlɔ Petero nde la ambeki akina wakasale ɔsɔnwɛlɔ w’ɔlɔlɔ. Vɔ ‘wakatshike diangɔ tshɛ’ ko wakayele Yeso. Yɛdikɔ yakawɔshi yaki la wahɔ efula le wɔ mɛtɛ! Yeso akawatɛ dia vɔ wayolongola diangɔ diakɔ tena efula oleki nɛ diakawatshike l’ɔkɔngɔ. Ndo nto, vɔ wakahombe kondja lɔsɛnɔ la pondjo. Vɔ wakɔshi yɛdikɔ yele takawakoke ndjonyanga l’ɔkɔngɔ pondjo.—Mateu 19:27-29.