Akambo wakimanyiya dia nkumbo monga l’ɔngɛnɔngɛnɔ

Okandwelo w’ekakatanu

Omi akate ate: “Lende ele ana?”

Wadi akate ate: “Wakatshwe lo lobingu dia tosomba ahɔndɔ.”

Omi akate ate: [La kɛlɛ ndo lohangɔhangɔ] “Wate na, atosomba ahɔndɔ? Shi ngɔndɔ ketshi kɛnɛ mbakawasombe ahɔndɔ!”

Wadi akate ate: [Dia ndjaswɛ ndo ele la lonyangu lo mbeya di’omɛnde ambomala l’ɔtɛ wa dui dia kɔlɔ diambondosala] “Enda wambokitshakitsha oshinga w’ahɔndɔ. Vɔ wakanɔmbi dikimɔ mbakametawe dia vɔ ntshɔ.”

Omi akate ate: [Ambomala ndo ahangɔhangɔ] “Wɛ mbeyaka dia hatolangaka di’ana somba diangɔ osombasomba aha la mimbolami! Lande na kakayetawe aha la mimbolami?”

OKAKATANU akɔna wafɔnyayɛ wele la atshukanyi asɔ wahombawɔ kandola? Mɛnamaka di’omi momalaka esadi. Koko, mɛnamaka nto dia atshukanyi asɔ hawosangi lolemi lo kɛnɛ kendana la lotshungɔ lahomba monga l’anawɔ. Ndo mɛnamaka dia vɔ hawosawola dimɛna.

Ndoko diwala diele kokele. Atshukanyi tshɛ wayohomana la weho ɛmɔtshi w’ekakatanu. Oyadi ekakatanu akɔ wekɔ weke kana totshitshɛ, wadi l’omi pombaka mbeka woho wa mbakandola. Lande na?

L’edjedja ka wonya, ekakatanu wahakandɔma mbeyaka ndjokonya diaha vɔ sawola dimɛna. Sɔlɔmɔna nkumekanga ka lomba akate ate: “Tamu . . . tatuyalaka uku tukingiti ta mbulu ta lu luudu la wuki.” (Tukedi 18:19) Ngande wakokanyu sawola dimɛna etena katomba okakatanu?

Oko wele doyi ndo asasa kimanyiyaka dia dikila kɛndakɛnda dimɛna lo demba mbele ndo ngandji la dilɛmiɛlɔ kimanyiyaka dia atshukanyi sawola dimɛna. (Efeso 5:33) Etena kakandolawɔ ekakatanu, ngandji ayotshutshuya atshukanyi dia vɔ mbohɛ munga yakawasalanɛ ntondo yakoka mbakonya lo ewanu ndo vɔ mbidja yimba dia kandola okakatanu wambotomba. (1 Koreto 13:4, 5; 1 Petero 4:8) Atshukanyi walɛmiyana hawohembwana ɔtɛkɛta ndo onto l’onto salaka la wolo dia shihodia kɛnɛ kalanga osekande mbuta.

Wanya anɛi wakimanyiya dia kandola ekakatanu

Tɔsɛdingole wanya anɛi wayela anɛ, tende atɔndɔ wa lo Bible wakoka tokimanyiya dia kandola ekakatanu lo yoho ya la ngandji ndo la dilɛmiɛlɔ.

1. Nyɔsɛ etena ka tɛkɛta dikambo diambotomba. “Engo tshe keko la etena kato, . . . etena ka nembohala, la etena ka nteketa.” (Undaki 3:1, 7) Oko wakatadiɛnyi lo mbɔtwɛlɔ, ekakatanu ɛmɔtshi mbeyaka momadja anto efula. Naka dui dia ngasɔ diambotomba, kete onga la ndjakimɛ ndo ‘lɛmbɔhala’ naka olonganyi ayɛ ambotatɛ momala. Nyu kokaka mbewɔ ndanya diɔtɔnganelo diele lam’asanyu naka nyu ndjela dako dia lo Bible diata ɔnɛ: “Ntatela tamu eli ntundula ushu a tshitshe lu kungi. Okone ukimo tamu ntundu to tatayala wulu.”​—Tukedi 17:14.

Koko, “etena ka nteketa” kekɔ. Lo ɛnyɛlɔ k’adiyo, ekakatanu kokaka fulanɛ esadi naka hanyowakandola. Ɔnkɔnɛ, tanyonyake ekakatanu yimba lo nongamɛ dia wayoshila lo vɔamɛ. Naka wɛ ambɔlɔmba dia nyu pembola owanu, kete ɛnya dilɛmiɛlɔ le olonganyi ayɛ lo mbɔsa etena aha la mbetsha etena k’otale dia nyu tɛkɛta dikambo diakɔ. Daka dia ngasɔ kokaka nyokimanyiya dia nyu kamba la dako dia lo Bible nɛ: “Unya tadjelaki kele kanyu.” (Efeso 4:26) Omalɔkɔ, wɛ pombaka kotsha daka diayɛ.

HEMBA SALA NGANƐ: Nyɔsake etena lomingu tshɛ dia tɛkɛta awui wa lo nkumbo. Naka wɛ mɛnaka dia wɛ mongaka la kɛlɛ lo etena kɛmɔtshi ka lo lushi, ɛnyɛlɔ kam’akomayɛ oma l’olimu kana la ntondo ka ndɛ, kete tetawɔke dia nyu tɛkɛta awui wa lo nkumbo wenya ɛsɔ. Koko, sɔna etena kɛnayɛ dia wɛɔngɔ anyu nyu akɔ ahende wekɔ ki.

2. Ta kɛnɛ kele l’otema ayɛ la dilɛmiɛlɔ tshɛ. “Nyutaneli akambu wa mete, untu la unyandi.” (Efeso 4:25) Naka wɛ ambotshukana, kete olonganyi ayɛ mbele wonyayɛ loleki. Omalɔkɔ, etena kasawolayɛ la olonganyi ayɛ, tɛnde awui wa shikaa wele l’otema ayɛ. Margareta,a lambodjasɛ lo diwala ɛnɔnyi 26 mbutaka ɔnɛ: “Etena kakiso teke ka tshukana, lakalongamɛka di’omɛmi akahombe mbeya mbala kakɔ ɔtɔi woho wakamayaokaka naka okakatanu wambotomba. Lakayeyaka dia ndjala la elongamelo ka ngasɔ kondjala dikambo dia mɛtɛ. Kakianɛ, lohemba dia kɛnɛmɔlɛ olonganyi ami tokanyi ndo woho wayaokami dimɛna.”

Ohɔ dia oyango ayɛ etena kasawolanyu dikambo dimɔtshi ele wa mbewoya olonganyi ayɛ tokanyi tayɛ koko aha mbomama l’ehele, mbuta ate mbɔlɛndja. Dia sala dikambo sɔ dimɛna, ɛnya dikambo diambotomba oma lâsɔ ta etena kotombidiɔ ndo lembetshiya woho wayaokayɛ lo kɛnɛ kendana la dikambo diakɔ. Ɛnyɛlɔ, naka wɛ mbokaka kɛlɛ etena kadja olonganyi ayɛ luudu mindo, wɛ kokaka mbotɛ la dilɛmiɛlɔ tshɛ ɔnɛ: ‘Etena kakalolayɛ oma l’olimu ndo kakitshayɛ ahɔndɔ l’odihe [etena ndo dikambo shikaa], dimi mɛnaka dia wɛ handola olimu wasalami [lembetshiya woho wayaokayɛ shikaa].’ Oma lâsɔ, la yewo tshɛ tɛnde kɛnɛ kafɔnyayɛ kakoka kandola dikambo sɔ.

HEMBA SALA NGANƐ: Dia kokimanyiya dia wɛ mbohɔka tokanyi tayɛ dimɛna la ntondo ka tɛkɛta la olonganyi ayɛ, funda kɛnɛ kafɔnyayɛ kele tshondo y’okakatanu ndo woho walangayɛ mbokandola.

3. Hokamɛ ndo etawɔ kanyi y’olonganyi ayɛ. Ombeki Jakɔba akafunde dia Akristo pombaka monga ‘suke dia mpokamɛ, ɔkɔkɛ dia tɛkɛta ndo ɔkɔkɛ dia mboka kɛlɛ.’ (Jakoba 1:19) L’atei w’akambo wahaleke ngɛnyangɛnya anto lo diwala mbele ndo kanyi y’ɔnɛ olonganyi ayɛ hashihodia woho wayaokayɛ lo kɛnɛ kendana la dui dimɔtshi. Ɔnkɔnɛ, ɔsa yɛdikɔ ya sala tshɛ diaha olonganyi ayɛ monga la kanyi ya ngasɔ!​—Mateu 7:12.

Wolfgang, lambotshukana aya ɛnɔnyi 35 mbutaka ate: “Etena katɛkɛtaso akambo, dimi momalaka ndjekoleko etena kɛnami dia wadɛmi hashihodia yoho yakanyiyami akambo.” Dianna, lambotshukana aya ɛnɔnyi 20 mbutaka ate: “Mbala efula la longanyu tshɛ, dimi mbutɛka omɛmi dia nde mɛtɛ hampokamɛ etena katɛkɛtaso akambo.” Ngande wakokanyu kandola ekakatanu ɛsɔ?

Tɔsake dia wɛ mbeyaka tokanyi ndo nsaki y’olonganyi ayɛ. Ɔtɛkɛta wa Nzambi mbutaka ɔnɛ: “Uma l’utaku, mbatuyakaka ta. Keli one latukaka alaku w’ololo, atuyalaka la yimba.” (Tukedi 13:10) Ɛnya dilɛmiɛlɔ otsha le olonganyi ayɛ lo mbotshika dia nde tɛkɛta aha la mbohembola ɔtɛkɛta. Oma lâsɔ, yashikikɛ dia wɛ amboshihodia kɛnɛ kotshinde, nyomota kɛnɛ kakayoki ndo ewoya olonganyi ayɛ woho wakayoki kɛnɛ kotshinde aha la mbɔsɔka kana momala. Etawɔ dia olonganyi ayɛ kokiya dimɛna kɛnɛ kakandatshi naka wɛ hakioki dimɛna. Tonake dia wɛmɛ oto tɛkɛta. Nyengɔnyake ɔtɛkɛta edja ndo lam’ayonyɛna dia onto l’onto amboka tokanyi ndo nsaki y’olonganyi ande.

Ekɔ mɛtɛ dia wɛ pombaka monga l’okitshakitsha ndo la solo dia lotutsha dia mpokamɛ olonganyi ayɛ la yambalo tshɛ ndo mbetawɔ kanyi yande. Koko, naka wɛ tatɛ mɛnya olonganyi ayɛ kɛnɛmɔ ka ngasɔ, kete olonganyi ayɛ nde lawɔ ayotshutshuyama dia kɔlɛmiya.​—Mateu 7:2; Romo 12:10.

HEMBA SALA NGANƐ: Etena kavusolayɛ kɛnɛ kakatshi olonganyi ayɛ, tokalolɛke kɛnɛ kakandatshi tshɛkɛta lo tshɛkɛta. La ngandji tshɛ, hemba dia mɛnya dia wɛ akoki ɛtɛkɛta ndo nsaki y’olonganyi ayɛ.​—1 Petero 3:8.

4. Nyetawɔ okandwelo. “Antu ahendi ndeka untu otoi, ne dia vo watulungulaka difutu di’ololo uma l’ulimu awo. Naka vo wamboko, omotshi mbeyaka mbetula unyandi.” (Undaki 4:9, 10) Ekakatanu ɛmɔtshi kokaka kandɔma naka atshukanyi kamba kâmɛ ndo kimanyiyana lam’asawɔ.

Ekɔ mɛtɛ dia Jehowa mbakasha pami ɔkɛndɛ wa monga ɔtɛ wa nkumbo. (1 Koreto 11:3; Efeso 5:23) Koko monga ɔtɛ halembetshiya monga la hiadi. Omi la lomba hatɔsa tɛdikɔ aha la mumbola kanyi ya wadɛnde. David, lambotshukana ɛnɔnyi 20 akate ate: “Dimi pembaka nyanga dui dimɔtshi diasangami la wadɛmi lolemi ndo mbɔsaka yɛdikɔ yayotetawɔ sho tshɛ.” Tanya, lambotshukama aya ɛnɔnyi esambele mbutaka ate: “Kɛnɛ kele ohomba ekɔ aha nyanga dia mbeya akasadi kɔlɔ. Mbala mɔtshi atshukanyi mongaka la toho totshikitanyi ta kandola okakatanu ɔmɔtshi. Dimi lakɛnyi dia sheke ya tondoya ele monga la ekanelo k’ɔlɔlɔ ndo mbetawɔ tokanyi t’onto okina.”

HEMBA SALA NGANƐ: Onto l’onto afunde toho totshikitanyi tɛnande takokanyu kandola okakatanu wambotomba lo kamba kâmɛ. Naka tokanyi tokina taya bu, kete enda tokanyi takayafundji ndo kamba la okandwelo ɔmɔtshi wayonyetawɔ nyu akɔ ahende. Oma lâsɔ, nyɔsɛ yema y’etena aha la tshimbatshimba dia menda kana yɛdikɔ yakanyɔshi yekɔ dimɛna.

Nyokambe kâmɛ koko aha onto l’onto lo yoho yande

Yeso akɛdika diwala la lɔkɔhɔ. (Mateu 19:6) Lo nshi yande, lɔkɔhɔ aki otamba wakawakakatanyaka nyama hiende woho wa yɔ kamba kâmɛ. Naka nyama yakɔ hayokambi kâmɛ, kete yɔ hayotosala olimu dimɛna ndo lɔkɔhɔ mbeyaka mbasha pâ lo kingo. Naka yɔ kamba kâmɛ, kete yɔ kokaka mɛmba wotsho w’efula ndo fusa ɛtshi k’otale.

Woho akɔ wâmɛ mbele, wadi l’omi wahakambe kâmɛ mbeyaka monga la pâ lo lɔkɔhɔ lawɔ la diwala. Lo wedi okina, naka vɔ mbeka dia kamba kâmɛ, kete wayokoka kandola suke la okakatanu tshɛ ndo wayosala olimu wa dimɛna. Yɔnɛ Kalala, pami kɛmɔtshi kotshukanyi kele l’ɔngɛnɔngɛnɔ akate lo tshena pe ɔnɛ: “L’edja ka ɛnɔnyi 25, dimi la wadɛmi tekɔ lo kandola ekakatanu aso lo mbutanɛka awui hwe hwe, onto l’onto ndjadjaka lo dihole di’osekande, lo nɔmbaka ekimanyielo ka Jehowa ndo lo kambaka la atɔndɔ wa lo Bible.” Onde nyu kokaka ndjela ɛnyɛlɔ kawɔ?

YAMBOLA ƆNƐ . . .

▪ Awui akɔna walekami nanga tɛkɛta la olonganyi ami?

▪ Ngande wakokami ndjashikikɛ dia lekɔ lo shihodia nsaki ya mɛtɛ y’olonganyi ami lo dikambo nɛ?

▪ Naka nshi tshɛ dimi tɛtɛka dia sala awui woho walangami, ekakatanu akɔna wakokami tondja?

[Nɔte ka l’ɛse ka dikatshi]