Woshelo w’apɔlɔmɛ wa Kalasa ka 125 ka Ngiliyadɛ

Wambokeketsha waa misiɔnɛrɛ dia monga oko Jeremiya

ƆNANGƐSO Geoffrey Jackson, ɔmɔtshi la lo Olui-walɔmbɔla akate ate: “Kalasa ka Ngiliyadɛ kɛnɛ kayohɔmaka l’ɔkɔndɔ wa Ɛmɛnyi wa Jehowa.” Nde akatɛka anto 6156 wakaye dia ndjenda woshelo w’apɔlɔmɛ wa Kalasa ka Ngiliyadɛ ka 125 ka Bible ka Ɛmɛnyi wa Jehowa ɛtɛkɛta ɛsɔ lo Ngɔndɔ ka divwa 13, 2008. Naka sho mbidja ndo ambeki 56 w’oma lo kalasa kɛnɛ, kete Kalasa ka Ngiliyadɛ kamboshila toma waa misiɔnɛrɛ olekanyi 8 000 lo ‘tokoma ta nkɛtɛ’!​—Etsha 1:8.

Ɔnangɛso Jackson, laki ɔnɔmbɔdi wa ekongelo ka woshelo w’apɔlɔmɛ ɔsɔ akambola ate: “Onde woho wɛkɛ anto otema le nyu ayonyokimanyiya dia nyu ndowanya olimu anyu w’esambishelo?” Oma lâsɔ, nde akashile akambo anɛi wakoka kimanyiya onto dia anto akina mbɛkɛ otema le nde: Monga la dionga di’ɔlɔlɔ, mbisha ɛnyɛlɔ k’ɔlɔlɔ, tondjaka wetshelo paka oma l’Ɔtɛkɛta wa Nzambi ndo ndjasha tshɛ dia mbeyanya lokombo laki Jehowa.

Ɔnangɛso David Schafer, lakamba lo Kɔmite ka wetshelo, akasha sawo diele l’ɔtɛ a dui ɔnɛ: “Onde wɛ ayoshihodia akambo tshɛ?” Nde akashikikɛ ambeki wa lo Kalasa ka Ngiliyadɛ dia vɔ kokaka ‘shihodia akambo tshɛ’ wahombama dia kamba oko waa misiɔnɛrɛ naka vɔ wayotetemala nyanga Jehowa ndo mbetawɔ l’okitshakitsha tshɛ ɛlɔmbwɛlɔ k’oma le ‘ɔhɔmbɔ wa kɔlamelo ndo wa kɛsɔ.’​—Tuk. 28:5; Mat. 24:45.

Oma lâsɔ, ɔnangɛso John E. Barr, ɔmɔtshi la lo Olui-walɔmbɔla akayosha sawo diele l’ɔtɛ a dui ɔnɛ: “Tanyetawɔke dia kânga ɛngɔ ɔtɔi nyokakitola oma lo ngandji ka Nzambi.” Alako wele oko w’ombutshi wakasha ɔnangɛso Barr wakakeketsha ambeki wa lo Kalasa ka Ngiliyadɛ ndo ambutshi awɔ ndo vɔ wakâkimanyiya dia minya wɔma tshɛ wakakoke monga la wɔ lo kɛnɛ kendana l’ahole wakawahombe tomama oko waa misiɔnɛrɛ. Nde akâlembetshiya ɔnɛ: “Lam’ele tekɔ lo tshikala lo ngandji ka Nzambi, tekɔ lo dihole di’ekokelo ndo dia dimɛna efula.” Ndoko ɛngɔ kakoka kakitola waa misiɔnɛrɛ oma lo ngandji ka Nzambi, onyake paka vɔamɛ mboyakakitodi oma le Nzambi.

Ɔnangɛso Sam Roberson lakamba lo Departɛma diendana la Kalasa ya teokrasi akakeketsha ampokami dia vɔ “ndɔta dihɔndɔ dioleki tshɛ dimɛna.” Ambeki kokaka ‘ndɔta Nkumadiɔndjɔ Yeso Kristo’ lo mbekaka kɛnɛ kakasale Yeso ndo lo kambaka la tɔ lo nsɛnɔ yawɔ. (Romo 13:14) Oma lâsɔ, ɔnangɛso William Samuelson, omendji wa lo Departɛma dia Kalasa ya teokrasi, akɛnya kɛnɛ kasha onto nɛmɔ. Aha tokanyi t’anto koko tokanyi ta Nzambi mbasha onto nɛmɔ.

Ɔnangɛso Michael Burnett, ɔmɔtshi l’atei w’embetsha akakɔnya ambeki lo kɛnɛ kendana la kɛnɛ kakahomana la wɔ l’olimu w’esambishelo. Kânga mbakatomama ambeki efula lo bɛtshi dia nkɛtɛ diasambishama mbala la mbala etena kakiwɔ lo Kalasa ka Ngiliyadɛ la Patterson, New York, vɔ wakahomana l’anto wakɛnya nsaki. Ɔnangɛso Gerald Grizzle lakamba lo Biro kendana la nsanganya ya weke akakɔnya anangɛso asato wakɔtɔ lo Kalasa k’ase Kɔmite ka filialɛ. Ekadimwelo wakawasha wakakimanyiya ambeki wa lo Kalasa ka Ngiliyadɛ dia vɔ ndjalɔngɔsɔla lo kɛnɛ kendana la ekakatanu wakawahombe tohomana la wɔ lo wedja wakawahombe tomama.

Ɔnangɛso David Splane, ɔmɔtshi la lo Olui-walɔmbɔla ndo ɔnɛ lakalongola dipɔlɔmɛ lo kalasa ka 42 ka Ngiliyadɛ, akasha sawo diele l’ɔtɛ a dui ɔnɛ: “Nyokoya Jeremiya.” Kânga mbakokaka Jeremiya ɔkɛndɛ wakandalongola wɔma, Jehowa akokeketsha. (Jer. 1:7, 8) Nzambi ayokeketsha ndo waa misiɔnɛrɛ y’eyoyo. Ɔnangɛso David Splane akate ate: “Naka wɛ ambonga la okakatanu wɛ l’onto ɔmɔtshi, ko wɛ mbidjasɛ ndo funda waonga dikumi w’amɛna wakɛnɛmɔla onto ɔsɔ walangayɛ. Ndo naka wɛ hakoke mbadia waonga dikumi, kete wɛ heye onto akɔ dimɛna dimɛna.”

Jeremiya aki la yimba ya ndjahombia. Etena kakandalange mpekɔ, nde akalɔmbɛ Jehowa ndo Jehowa aki kâmɛ la nde. (Jer. 20:11) Ɔnangɛso Splane akate ate: “Naka wɛ amboyaoka dia wɛ ambɔkɔmɔ, ko wɛ mbutɛ Jehowa. Wɛ ayamba woho wayokokimanyiya Jehowa.”

L’ekomelo ka woshelo w’apɔlɔmɛ, ɔnɔmbɔdi akohola ampokami dia ambeki wambolongola apɔlɔmɛ wambeka toho efula takoka mbakimanyiya dia anto mbɛkɛ otema awɔ le wɔ. Etena kayeya anto dia vɔ kokaka mbɛkɛ otema le waa misiɔnɛrɛ, losango lawɔ layoleka monga la shɛngiya le wɔ.​—Is. 43:8-12.

[Kiombo ya lo lɛkɛ 22]

AWUI WENDANA LA AMBEKI

Wakaye oma lo wedja: 6

Wakatomama lo wedja: 21

Lofulo la ambeki tshɛtshɛ: 56

Yɛdikɔ ya l’atei atei y’ɛnɔnyi awɔ: 32,9

Yɛdikɔ ya l’atei atei y’ɛnɔnyi wambowetsha l’akambo wa mɛtɛ: 17,4

Yɛdikɔ ya l’atei atei y’ɛnɔnyi wambowetsha l’olimu wa lo tena tshɛ: 13

[Osato wa lo lɛkɛ 23]

Kalasa ka 125 ka Ngiliyadɛ ka Bible ka Ɛmɛnyi wa Jehowa

Lo listɛ lele lanɛ l’ɛse, nkombo nɔngama oma lo lonya la wadi otsha lo lonya l’omi ndo oma la ntondo otsha l’ɔkɔngɔ.

1) Hodgson, A.; Wall, A.; Beerens, K.; Hortelano, M.; Newman, L.; De Caso, A. 2) Jenkins, J.; Jarzemski, T.; Méndez, N.; Corona, V.; Canalita, L. 3) Fryer, H.; Savage, M.; Tidwell, K.; Erickson, N.; Dyck, E.; McBeath, R. 4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. 5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. 6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. 7) Corona, M.; Wall, R.; Puse, S.; Méndez, F.; Jarzemski, S.; Savage, T. 8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. 9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.