Ambola w’oma le ambadi

Etena kakɔna kakatshanyema Satana oma l’olongo?​—Eny. 12:1-9.

Kânga mbele dibuku dia lo Bible dia Enyelo hadiosha etena shikaa kakatshanyema Satana oma l’olongo, diɔ shilaka akambo amɔtshi wakoka tokimanyiya dia sho mbeya etena kakandatshanyema. Dui dia ntondo ele eotwelo ka Diolelo dia Mɛsiya. L’ɔkɔngɔ wa eotwelo kɛsɔ “ta diaki l’ulungu,” ndo Satana akalɛndjama ko wakawotshanya oma l’olongo.

Afundelo mɛnyaka hwe dia 1914 mbele ɔnɔnyi wakakomɛ ‘etena kakashikikɛma k’ase wedja’ ndo kakashikikɛma Diolelo.a (Luka 21:24) Edja ka ngande kakete dia ta ndjɔlɔma l’olongo diakayokonya lo Satana mbitshanya oma l’olongo?

Enyelo 12:4 mbutaka dia “ului ako [Satana] akemala la ntundu ka umuntu lakayangi mbuta; akalungamela ati: Kandi on’andi lam’ayunduwuta.” Kɛsɔ mɛnyaka dia Satana akalange ndanya Diolelo sɔ kam’akadiotɔ. Kânga mbele Jehowa akekɛ lonya diaha Satana kotsha eyango ande wa kɔlɔ ɛsɔ, Satana akayashikikɛ ndo akatetemala mbidja welo dia salɛ Diolelo diaki dieke kashikikɛma kɔlɔ. Diakɔ diele aha la tshimbatshimba, “Mikaele la andjelo andi” wakɔshi yɛdikɔ ya minya “ului ako la andjelo andi” oma l’olongo diaha vɔ ndjosalɛ Diolelo sɔ kɔlɔ. Mbokɛmaka dia wakalɛndja Satana ndo wakawotshanya oma l’olongo yema tshitshɛ l’ɔkɔngɔ wa Diolelo sɔ mbotɔ lo 1914.

Dui dikina diahombaso sɛdingola ele eolwelo k’Akristo w’akitami kele oko wadiɛnya Afundelo kakatatɛ yema tshitshɛ l’ɔkɔngɔ wa Diolelo shikikɛma.b (Eny. 20:6) Lam’ele ndoko ɔnango Kristo l’okitami latɛkɛtama dia aki kâmɛ la Yeso lo ta diakandalɔshaka olui nde la andjelo ande, ta sɔ diakalɔma l’olongo ndo wotshanyelo waki Satana nde la ɛdiɛngɛ ande wakahombe komɛ etena kakatatɛ anango Kristo mbolɔ.

Ɔnkɔnɛ, Bible hɛnya datɛ shikaa diakatshanyema Satana nde la ɛdiɛngɛ ande oma l’olongo. Koko, mɛnamaka dia dikambo sɔ diakasalema l’ɔkɔngɔ wa Yeso Kristo mbahema l’okudi l’olongo 1914.

[Nɔte ya l’ɛse ka dikatshi]