‘Etena kakashikikɛma’ kaya suke

L’ƐNYƐLƆ k’ɔprɔfɛta Habakuka, ambeki waki Yeso wakakombolaka dia mɛna ekomelo k’asui tshɛ. Oko wakaweke kɛnɛ kayoyosala Diolelo diaki Nzambi dia nɔngɔsɔla akambo wa la nkɛtɛ, vɔ wakambola Yeso ɔnɛ: ‘Etena kakɔna kayoyala akambo asɔ? Djembetelo yakɔna yayɛnya wôngelo ayɛ [lo wolo wa Diolelo] ndo ekomelo ka dikongɛ di’akambo nɛ?’ (Mateu 24:3) Lo okadimwelo wakandasha, Yeso akate dia paka Jehowa oto mbeya etena shikaa kayotatɛ Diolelo nɔmbɔla akambo wa la nkɛtɛ. (Mateu 24:36; Mako 13:32) Koko, Yeso ndo anto akina wakatatshi akambo wayohomba nsalema la nkɛtɛ dia mɛnya ɔnɛ etena kɛsɔ kaya suke.—Enda kiombo yele lo lonya l’omi.

Shi wɛ mbetawɔka di’akambo asɔ wekɔ lo nkotshama ɛlɔ kɛnɛ? Yeso akatatshi nto di’olimu ɔmɔtshi wa wetshelo wayosalema lo nkɛtɛ k’otondo. Nde akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.”—Mateu 24:14.

Kɛsɔ mɛtɛ mbasalema ɛlɔ kɛnɛ. Ɛmɛnyi wa Jehowa mbasala olimu ɔsɔ. Lo wedja oko 236, olekanyi miliyɔ esambele ya Ɛmɛnyi wa Jehowa wekɔ lo mbutɛ anto kɛnɛ kayoyosala Diolelo ndo vɔ wekɔ lo mbakimanyiya dia vɔ mbɔtɔnganyiya nsɛnɔ yawɔ l’ɛlɛmbɛ wosembwe waki Nzambi kasangoya dia nkomiya asui tshɛ la pâ. Naka wɛ ntetemala mbeka akambo wendana la Diolelo diaki Nzambi, kete wɛ ayonga la elongamelo ka ndjɔsɛna pondjo pondjo l’andja wahatonga l’asui.

[Kiombo ya lo lɛkɛ 15]

Avɛsa watɛkɛta dikambo dia nshi y’ekomelo

MATEU 24:6, 7; ENYELO 6:4

• Ata wahatayalaka ndoko lushi

MATEU 24:7; MAKO 13:8

• Adidimu wa mamba wa nkɛtɛ

• Ndjala ya kasha

LUKA 21:11; ENYELO 6:8

• Waa hemɔ

MATEU 24:12

• Ehamelo ka ɛɔnywɛlɔ k’ɛlɛmbɛ

• Ngandji kayɔla

ENYELO 11:18

• Elanyelo ka nkɛtɛ

2 TIMOTE 3:2

• Ngandji ka falanga ka tshambandeko

• Ohedia le ambutshi

• Ndjalanga lo yoho ya tshambandeko

2 TIMOTE 3:3

• Ngandji ka mɛtɛ hatonga

• Anto hawotokana

• Anto wa l’atshunda tshɛ hawotonga la ndjakimɛ

• Ngandji k’akambo w’ɔlɔlɔ k’anto efula kayɔla

2 TIMOTE 3:4

• Anangi wa ɛngɛnɔngɛnɔ oleki wa Nzambi

2 TIMOTE 3:5

• Akanga wa dungi pende efula wayɔsɛma ɔnɛ wekɔ Akristo

MATEU 24:5, 11; MAKO 13:6

• Aprɔfɛta wa kashi efula wayoyala

MATEU 24:9; LUKA 21:12

• Akristo wa mɛtɛ wayɔhɛnyahɛnyama

MATEU 24:39

• Anto hawotodja yimba lo ɛhɛmwɛlɔ washa Bible

[Osato wa lo lɛkɛ 15]

Lo nkɛtɛ k’otondo, Ɛmɛnyi wa Jehowa wekɔ lo mbetsha anto akina akambo wendana la Diolelo dia Nzambi