Onde onto ɔmɔ pokamɛka alɔmbɛlɔ?

“Lakadjaka tâmu dia Nzambi bu. Lo tena dimɔtshi, dimi kosalaka dɔmbɛlɔ. Dimi kombetawɔka ɔnɛ onto ɔmɔtshi pokamɛka alɔmbɛlɔ, koko dimi pombaka mbetawɔ dia laki l’elongamelo k’ɔnɛ onto ɔmɔ pokamɛka alɔmbɛlɔ. Dimi komonga l’ɔngɛnɔngɛnɔ ndo komonga ndoko l’oyango lo lɔsɛnɔ. Laki la wɔma wa monga la mbetawɔ le Nzambi nɛ dia lakafɔnyaka ɔnɛ paka ase wola mbaki la mbetawɔ le Nzambi.”—PATRICIA,a IRLANDE.

ONDE ndo wɛ mbakanyiya oko Patricia? Onde wɛ nɔmbaka kânga mbadjayɛ tâmu ɔnɛ Nzambi bu? Naka eelo, kete eya dia aha wɛmɛ oto mbakanyiya ngasɔ. Sɛdingola bɛnyɛlɔ diayela nɛ:

◼ Ɛkɔnya ɛmɔtshi wakawakɔnya ase Britanniques 2 200, wakɛnya dia paka pursa 22 y’anto mbaketawɔka ɔnɛ Nzambi lakatonge andja ndo latokaka dɔmbɛlɔ ekɔ. Koko, pursa 55 y’anto nɔmbaka paka lo tena dimɔtshi nto.

◼ Ɛkɔnya ɛmɔtshi wekewɔ ka nsala le anto 10 000 w’oma lo ahonda anɛi, wanɛ wata ɔnɛ vɔ bu la mbetawɔ le Nzambi, mɛnyaka dia olekanyi pursa 30 wakate ɔnɛ vɔ nɔmbaka.

Lande na kadjawɔ tâmu?

Allan, pami kɛmɔtshi kadjasɛ lo wodja w’Angleterre mbutaka ate: “Lakataka dia dimi bu la mbetawɔ le Nzambi nɛ dia lakafɔnyaka dia oyango wele l’ɛtɛmwɛlɔ ele wa mbahemɛ anto ndo wa ndjakondjɛ falanga. Ndo nto, lakataka dia otondongaka Nzambi ekɔ tshike wɛngiya bu efula l’andja ɔnɛ. Koko tena dimɔtshi, lakadjasɛka ki ndo lakayatɛkɛtɛka dimɛ. Ndo nto, lakayambolaka nte: ‘Ngande wamomoyokoma lo nkanyiya nganɛ?’”

Onto tshɛ lele l’ekanelo ka ngasɔ ekɔ l’ɛkɔkɔ ande hita wadjande tâmu dia kana alɔmbɛlɔ kadimɔmaka. Mbala efula onto mbeyaka monga la tâmu l’ɔtɛ wahandakondja ekadimwelo lo ambola wayaokande, wele oko:

◼ Onde Otungi ekɔ?

◼ Lande na kasala ɛtɛmwɛlɔ akambo wa kɔlɔ mbala efula?

◼ Lande na katshika Nzambi asui?

Naka wɛ mbeya ekadimwelo wa ambola asɔ, shi wɛ ayonga l’eshikikelo lo kɛnɛ kendana la dɔmbɛlɔ?

[Nɔte ka l’ɛse ka dikatshi]