Ɛkɔkɔ watɔlɔmba Nzambi dia mbɔlɔmba

Nzambi pamiaka lɔngɛnyi lande.

Angɛnyi sawolaka lam’asawɔ dia monga la diɔtɔnganelo dia dimɛna. Woho akɔ waamɛ mbele, Nzambi tɔlɔmbaka dia sho sawolaka la nde. Dui sɔ todiholɛka mboka dia sho monga la lɔngɛnyi l’oshika kaamɛ la nde. Nde mbutaka ate: ‘Nyu nyayombelɛ, nyayoya ndo nyayɔnɔmba, ko dimi layonyohokamɛ.’ (Jeremiya 29:12) Naka wɛ sawolaka la Nzambi, kete wɛ ‘ayoyasukanya la nde, ndo nde ayoyasukanya la yɛ.’ (Jakɔba 4:8) Bible toshikikɛka ɔnɛ: ‘Jehowa ekɔ suke la wanɛ tshɛ wɔɔtɛndɛ.’ (Osambu 145:18) Etena tshɛ kayotolekaka mbɔlɔmba, mbayotalekaka lɔngɛnyi lasaso la Nzambi ndowana.

Nzambi nangaka kokimanyiya.

Yeso akate ate: “Onto akɔna l’atei anyu lele, naka ɔnande mbɔlɔmba mapa ko nde mbosha dive? Kana naka nde mbɔlɔmba lose, onde nde ayowosha oloyi? Ɔnkɔnɛ naka nyu, . . . mbeyaka mbisha ananyu weshasha w’ɛlɔlɔ, kete hoke Shɛnyu lele l’olongo! Shi nde ayoleka mbisha wanɛ wɔɔlɔmba diangɔ di’ɛlɔlɔ?” (Mateo 7:9-11) Lo mɛtɛ, Nzambi kɔlɔmbaka dia wɛ nɔmba nɛ dia ‘nde ndjakiyanyaka dikambo diayɛ’ ndo nde nangaka kokimanyiya. (1 Petero 5:7) Nde kɔlɔmbaka dia wɛ ntshɔ la ekakatanu ayɛ le nde. Bible totɛka ɔnɛ: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka.”—Filipɛ 4:6.

Anto wekɔ l’ohomba wa mbeya akambo waki Nzambi.

Tomanyi ta lo awui wendana la demba di’onto wakɛnyi dia miliyɔ nkama y’anto wekɔ l’ohomba wa nɔmba. Kaanga anto amɔtshi wahetawɔ ɔnɛ Nzambi ekɔ ndo wanɛ wata ɔnɛ hatokoke mbeya Nzambi wekɔ l’atei w’anto asɔ.a Ekɔ ngasɔ nɛ dia anto wakatongama l’ohomba wa mbeya akambo waki Nzambi. Yeso akate ate: “Ɔngɛnɔngɛnɔ le wanɛ weya dia wekɔ l’ohomba wa mbeya akambo waki Nzambi.” (Mateo 5:3) Yoho mɔtshi yakokaso nsala dui sɔ ele lo sawolaka la Nzambi mbala la mbala.

Naka sho mbetawɔ leeta la Nzambi dia mbɔlɔmba, naa wahɔ wakokaso nongamɛ?