Nzambi ayanga nkomiya asui tshɛ keem’edja

“Jehowa le, polo l’etena kakɔna kayomolela dia nyanga ekimanyielo, koko wɛ hoke? Polo l’etena kakɔna kahombami nɔmba ekimanyielo l’ɔtɛ w’akambo wa ngala, koko wɛ hekɛ lonya?” (Habakuka 1:2, 3) Ɔsɔ ekɔ ɛtɛkɛta waki Habakuka, pami k’ɔlɔlɔ kaketawɔmaka oma le Nzambi. Onde delo diande diakɛnyaka dia nde komonga la mbetawɔ? Ndooko! Nzambi akashikikɛ Habakuka dia nde akashikikɛ etena ka nkomiya asui.​—Habakuka 2:2, 3.

Etena kele wɛ kana owotɔ ayɛ ɔmɔtshi ekɔ lo nsowa, ekɔ wɔdu mbita dia Nzambi ekɔ ɔkɔkɛ dia nkomiya asui, mbuta ate nde pombaka mbekɛ lonya ko wonya akɔ waamɛ. Koko, Bible toshikikɛka ɔnɛ: “Jehowa hatshimbatshimba dia nkotsha daka diande oko wafɔnya anto amɔtshi dia nde ekɔ lo ntshimbatshimba, koko nde ekɔ la solo dia lotutsha otsha le nyu, nɛ dia nde halange kaanga onto 1 ndanyema, koko nde nangaka dia anto tshɛ nkondja diaaso dia ndjatshumoya.”—2 Petero 3:9.

ETENA KAKƆNA KAYONYA NZAMBI ASUI?

Keem’edja! Yeso akɛnya dia lɔlɔnga lɔmɔtshi la laande layohomba mɛna osanganelo wa tolembetelo ta lo nshi y’ekomelo ka “dikongɛ di’akambo.” (Mateo 24:3-42) Woho wakotshama prɔfɛsiya ya Yeso lo nshi yaso nyɛ mɛnyaka dia keem’edja Nzambi ayanga mbekɛ lo awui wɛnya anto paa.a

Ko ngande wayela Nzambi ekomelo k’asui tshɛ? Etena kaki Yeso la nkɛtɛ, nde akɛnya wolo wa Nzambi wa minya asui w’anto. Tɔsɛdingole bɛnyɛlɔ dimɔtshi dia dui sɔ.

Mpokoso y’oma lo diangɔ diakatongama: Lam’akatatehɔka Yeso nde l’apɔstɔlɔ ande Ndjale ka Ngalileya, lɔpɛpɛ la wolo lakapɛpɛ lakalange mimboya waato. Koko Yeso akɛnya dia nde la She wekɔ la akoka wa mbahemɛ diangɔ diakatongama. (Kɔlɔsayi 1:15, 16) Yeso akate tsho ɔnɛ: “Shii! Lɛmbɔhala!” Kakɔna kakatombe? “Lɔpɛpɛ lakɔlama ndo ashi wakɔlɛ yɔɔ.”​—Makɔ 4:35-39.

Hemɔ: Yeso akeyamaka dimɛna oma lo dikoka diande dia nkɔnɔla akanga wa totshungu, akanga wa dikuse, mbidja ndo akanga wa dikunyɛ, akanga wa sudi, ndo weho ekina wa hemɔ tshɛ. Nde “akakɔnɔla wanɛ tshɛ waki la hemɔ.”​—Mateo 4:23, 24; 8:16; 11:2-5.

Ndjala: Yeso akakambe la wolo wakawosha She dia mfudia diangɔ dia ndɛ. Bible mbutaka dia mbala hiende y’etondo etena kakandasalaka olimu ande, nde akalesha anto nunu.​—Mateo 14:14-21; 15:32-38.

Nyɔi: Kanyi y’ɔnɛ Jehowa ekɔ la wolo wa minya nyɔi mɛnamaka hwe lo ɛkɔndɔ w’anto asato wakolola Yeso wakafundama. Onto ɔmɔtshi l’atei awɔ lakandolola akavu l’edja ka nshi nyɛi.​—Makɔ 5:35-42; Luka 7:11-16; Joani 11:3-44.