Woho wakokayɛ nkondja wahɔ oma lo woho wayakiyanya nzambi dikambo diayɛ
Nzambi akatonge alemba aso la dikoka dimɔtshi dia diambo dia ndjakɔnɔla. Etena kele onto lele la yoonge ya dimɛna ko etenyi kande kɛmɔ ka demba kambohembɔ kana ambohomɔ mpota, demba “salaka dui dimɔ dia wolo efula diakakongɛma dia nkɔnɔla mpota oyadi ya weke kana ya totshitshɛ.” Aha la ntshimbatshimba demba tatɛka nsala dui dimɔ dia nshimba otombelo wa dikila, nunya ahole weteta dikila, nkɔnɔla mpota ndo nkeketsha lokoho.
OHOKANYIYA DUI NƐ: Naka Otungi akakongɛ alemba aso dia vɔ nkɔnɔla mpota ya lo demba, onde hatokoke monga la wɛkamu lo alaka ande dia tokimanyiya dia sho nkɔnɔ ndo sho la wɔ oma lo mpota yaso ya lo yimba? Omembi ɔmɔ w’esambo akafunde ate: “Nde kɔnɔlaka otema wambatɛ; nde mɔmbaka mpota yawɔ.” (Osambo 147:3) Ko naka wɛ ekɔ lo nsowa lo yimba l’ɔtɛ wa dui dimɔ diakete kana dia nshi nyɛ, ngande wakokayɛ monga l’eshikikelo dia Jehowa ayɔmba mpota yayɛ oyadi nshi nyɛ kana lo nshi yayaye?
KƐNƐ KATETSHA BIBLE LO DIKAMBO DIA NGANDJI KA NZAMBI
Nzambi ndakaka ɔnɛ: “Tokake wɔma, nɛ dia dimi lekɔ kaamɛ la yɛ. Toyakiyanyake, nɛ dia dimi kele Nzambi kayɛ. Dimi layokokeketsha, eelo, dimi layokokimanyiya.” (Isaya 41:10) Onto leya dia Jehowa ndjakiyanyaka dikambo diande ekɔ la wɔladi wa lo yimba ndo wolo wa nde ndɔshana la ehemba wotshikitanyi. Ɔpɔstɔlɔ Pɔɔlɔ akelɛ ki ka l’etei kɛsɔ ɔnɛ “wɔladi wa Nzambi woleki tokanyi tshɛ.” Pɔɔlɔ akakotsha ate: “Lo akambo tshɛ, dimi lekɔ la wolo oma le ɔnɛ lambisha lokalo.”—Filipɛ 4:4-7, 9, 13.
Afundelo tokimanyiyaka dia sho monga la mbetawɔ lo alaka wa Jehowa dikambo dia nshi yayaye yaki anto. Ɛnyɛlɔ, lo mukanda wa Ɛnyɛlɔ 21:4, 5 (divɛsa diatanema lo lɛkɛ layela) totɛka kɛnɛ kayosala Nzambi ndo lande na kahombaso monga la wɛkamu le nde dia nde ayosala awui anɛ:
“Nde ayokitola asɔyi tshɛ oma lo washo” waki anto. Jehowa ayonya asui ndo ekiyanu tshɛ, oyadi kaanga ekiyanu wɛna anto akina oko bu wolo efula.
‘Lo mbidjasɛ lo kiti ka lowandji’ ka l’olongo, Kanga-Wolo-Tshɛ lele Nkumekanga ka ditongami tshɛ ayɛnya wolo nde ndo lowandji la nshimba asui ndo tosha ekimanyielo kele la so ohomba.
Jehowa toshikikɛka dia alaka ande wekɔ “kɔlamelo ndo mɛtɛ.” Mbuta ate, l’ɔtɛ wa lokumu ndo lokombo lande, Nzambi ka mɛtɛ toshikikɛka dia nde ayokotsha ɛtɛkɛta ande.
“‘Nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.’ Ko Ɔnɛ lakadjasɛ lo kiti ka lowandji akate ate: ‘Eenda! Dimi leetɛ diangɔ tshɛ eyoyo.’ Nde akate nto ate: ‘Funda, nɛ dia ɛtɛkɛta ɛnɛ wekɔ wa kɔlamelo ndo mɛtɛ.’”—Ɛnyɛlɔ 21:4, 5.
Diangɔ diakatongama diɛnaso ndo Bible tɛnyaka waonga wa Shɛso lele l’olongo. Etena kele etongelo totshutshuyaka dia sho nkoma angɛnyi waki Nzambi, Bible toshaka leeta lɔnɛ ɔnɛ: “Nyoyasukanya la Nzambi, ko nde ayoyasukanya la nyu.” (Jakɔba 4:8) Etsha 17:27 mbutaka ɔnɛ: “Nde bu etale oma le ɔmɔmɔ la l’atei aso.”
Etena katayɔshi etena ka mbeya Nzambi, wɛ ayoleka monga l’eshikikelo dia ‘nde ndjakiyanyaka dikambo diayɛ.’ (1 Petero 5:7) Wahɔ akɔna shikaa wayoyokondja lo monga la wɛkamu wa ngasɔ le Jehowa?
Tɔsɛdingola ɛnyɛlɔ ka Toru ladjasɛ la Japon. Nde akodiama oma le ombutshi wa womoto w’Okristo, koko akayoyasha l’olui ɔmɔtshi wa ngala welɛwɔ yakuza, ɔsɔ ekɔ olui ɔmɔtshi wa dengalenga wa la Japon. Nde mbutaka ate: “Lakafɔnyaka dia Nzambi ekɔ lo mpetshami ndo lakayaokaka dia nyɔi k’anto wele la mi, djekoleko wanɛ wakamalekaka nanga, aki tshondo ya dilanya le mi.” Toru mbutaka dia lo nsɛna lɔsɛnɔ la ngala ndo monga la yimba ya kɔlɔ, nde akayokoma “otema wolo ndo hoke onto kandji.” Lo kɛnɛ kendana la dionga diande, nde mbohɔka ate: “Lakalangaka mvɔ leke dikɛnda l’ɔkɔngɔ wa dimi ndjaka onto ɔmɔ lo ndeki nɛmɔ ndo lo nsala ngasɔ lakalangaka monga la lokumu lo lokombo lami.”
Koko, etena kakeke Toru nde la Hannah ya wadɛnde Bible, Toru akasale etshikitanu wa wolo lo lɔsɛnɔ ndo lo dionga diande. Hannah mbutaka ate: “Lakɛnaka hwe etshikitanu ɛsɔ.” Kakianɛ, Toru mbutaka la mɛtɛ tshɛ ate: “Ekɔ mɛtɛ Nzambi kɛmɔ kayakiyanya lo dikambo dia ɔmɔmɔ la l’atei aso. Nde halange dia kaanga onto ɔtɔi la l’atei aso mvɔ ndo nde ekɔ suke dia dimanyiya wanɛ mɛtɛ wayatshumoya l’ɔtɛ wa wandja awɔ. Nde pokamɛka akambo wakokaso mbotɛ paka ndamɛ oto ndo wele hatolange onto okina mbahokamɛ. Keem’edja, Jehowa ayanga minya ekakatanu, asui ndo shɔkɔ tshɛ. Kaanga kakianɛ, nde tokimanyiyaka lo toho efula tahatalongamɛ. Nde tokaka ngandji ndo tokimanyiyaka etena keso lo paa.”—Osambo 136:23.
Oko wadiɛnya ɛnyɛlɔ kaki Toru, mbeya ɔnɛ Nzambi koka ndo keem’edja nde ayanga minya mpokoso ndo ayanga minya awui wa kɔlɔ tshɛ ndo asɔyi tshɛ hatosha tsho elongamelo ka shikaa dikambo dia nshi yayaye, koko tokimanyiyaka dia sho nsɛna lɔsɛnɔ la dimɛna oma ko kakianɛ. Eelo, kaanga l’andja wambolola l’asui, wɛ koka nkondja wahɔ lo woho wayakiyanya Nzambi la ngandji tshɛ dikambo diayɛ.