Toyale la Lowando lo Kɛnɛ Kele Laso
1 “[Nzambi, NW] akatenya ngandji kandi ne dia Kristu akatuvwela lam’akisu [teke, NW] antu wa kolo.” (Romo 5:8) Ande woho wahombaso ndjâla la lowando sho tshɛ l’olambo woleki woke wakakimɔ Jehowa nde l’Ɔnande lo dikambo diaso lee! Dikila dia Kristo diakatshulɔma toshaka elongamelo ka monga la lɔsɛnɔ la pondjo, elongamelo kahakoke ndoko onto tosha.
2 Woho akɔna wakokaso mɛnya lowando laso na? Anto efula wekɔ la mposa k’ewo k’oshika katanema paka lo Dui dia Nzambi di’ekila. Lolango la Jehowa ele dia weye mɛtɛ. (1 Tim. 2:4) Tayɛnya ɔnɛ tekɔ lo mbɔsa mɛtɛ la nɛmɔ ‘lam’asambishaso lokumu l’ɔlɔlɔ la diolelo diaki Nzambi.’ (Luka 4:43) Woho wakambaso olimu ɔsɔ l’otema ɔtɔi mɛnyaka dia sho tambeyaka dikambo di’ɔnɛ Kristo akatovɔɛ ndo ɔnɛ sho nangaka mbôkoya lo kitanyiyaka dui diande dia mbetɛ anto ambeki la kɔlamelo tshɛ.—Mat. 28:19, 20.
3 Naa waaso wele laso wa sambisha na? Onde sho kokaka ndjalaka ambatshi mboka wa tshanda tena la tena? L’ɔkɔngɔ wa vɔ mbɛdikola akoka awɔ, anto amɔtshi wayɛna dia vɔ kokaka kamba olimu w’ombatshi mboka wa pondjo. Ɔsɔ ekɔ akoka amɔtshi woleki ɔlɔlɔ wa mbetsha wenya efula lo dianganya lokumu l’ɔlɔlɔ la Diolelo. Ondo wɛ akakanyiya mbala kɛmɔtshi dia ndodja dɛmandɛ, koko wekamu wakayokoshimba dia wɛ dilodja. Ondo akambo ayɛ ambotshikitana. Naka ɔsɔku mbediɔ, onde wɛ ambokana yimba ɔlɔlɔ dia kamba olimu w’ombatshi mboka kana monga ombatshi mboka wa tshanda?
4 Lam’endaso kɛnɛ keta lasuke laso, lowando laso keketshamaka. Akambo wa ngala, lohetsho ndo ewanu wekɔ lo tafulanɛ l’andja. Paulo akate dikambo di’eleko kaso kɛnɛ oko ‘tena dia wolo.’ (2 Tim. 3:1) Kânga mbasalema akambo asɔ wa lonyangu, sho tekɔ la nkumu efula y’ɔlɔlɔ ya mbewoya anto akina. Tekɔ la periodikɛ hiende y’amɛna efula, Tshoto y’Etangelo la Réveillez-vous! Sho kokaka mbisha anto periodikɛ yakɔ lo ngɔndɔ kɛnɛ. Sho tekɔ ndo la tobukubuku tatɛkɛta asawo efula. Ekanda ɛsɔ mbishaka wanɛ wâla ekeketshelo k’oshika. Lowando laso pombaka totshutshuya dia sho mbadianganya efula.—Heb. 13:16.
5 Ondo lɛnɛ odjashiyɛ anto hawoleke ndjasha l’akambo wa lo nyuma. Lo woho wotshikitanyi, mbilo mɔtshi yekɔ ɛtɛtɔ efula. Anto efula watanema l’atei w’elui wa lo tongelongelo ta lo mbilo kaso ndjashaka. Naka lɔsɛnɔ layɛ koshaka lotshungɔ la wɛ disala, onde wɛ hakoke ntshɔ lo mbilo kɛmɔtshi kele anto l’ohomba mɛtɛ w’ekimanyielo kayɛ? Mɛtɛ omendji w’otshimbedi anyu ayoyala l’alako amɔtshi wa kosha w’endana la dikambo sɔ.
6 Ɛkɔkɔ wa sho ndjâla la lowando la kɛnɛ kele laso hawohandɔ; mɛtɛ sho tekɔ la lokema la diangɔ di’amɛna. Paka lo mbewoyaka anto akina lokombo lande la asangwelo ande mbokokiso mboka Jehowa losaka dimɛna efula.—Is. 12:4, 5.