Tokoke Kâmɛ Kele Laso oma l’Ekimanyielo ka Diolelo
1 Diolelo diaki Nzambi diekɔ mɛtɛ tshondo y’ɛlɔmbwɛlɔ kele la lɔkɛlɛngɛ ndo lowandji. Diɔ mbaki ɔtɛ a dui w’esambishelo ka Yeso. (Mat. 4:17) Olimu wa Yeso aki ntondotondo olimu ɔmɔtshi w’olakanyelo ndo w’esambishelo ka mɛtɛ k’endana la Diolelo. Yeso akatolakanya dia sho nɔmbaka lo dikambo dia Diolelo ndo dia tetemala la diyanga ntondo. (Mat. 6:9, 10, 33) Naka sho tshikala suke suke la Jehowa ndo l’ɔlɔngɔswamelo wakinde, kana naka sho kotsha ɔkɛndɛ aso wa sambisha ndo naka sho ndjakakitola l’andja ɔnɛ, kete tayokoka kokɛ kâmɛ kele laso oma l’ekimanyielo ka Diolelo. Oma lo etsha ndo ɛtɛkɛta aso, sho mɛnyaka ɔnɛ tambeta la Diolelo wedi ɔtɔi.—Joa. 18:37.
2 Oma ko 1914, Diolelo diekɔ dikambo dia mɛtɛ le miliyɔ y’ambolami adiɔ. Kâmɛ kele lɔkɔ tshikitanaka la kɛnɛ keta l’andja ɔnɛ wambatɔna. Dia diɔ ndjâla wolo watshumanya anto kâmɛ, Diolelo pombaka ndjâla dikambo dia mɛtɛ le so. Lande na kediɔ dikambo dia mɛtɛ lo asho aso na?
3 Oko wele ɛlɔmbwɛlɔ tshɛ, Diolelo diaki Nzambi diekɔ l’ɛlɛmbɛ. Koko, lo kɛnɛ k’endana l’ɛlɛmbɛ akɔ, vɔ wekɔ l’atei a Bible. Walelo wa Dui dia Nzambi wa lushi la lushi toholaka kɛnɛ kalɔmbawɔ ambolami a Diolelo. Wekelo w’onto ndamɛ w’ekanda ndo alako wakondjaso oma le “ɔhɔmbɔ wa kɔlamelo ndo wa kɛsɔ” tokimanyiyaka dia sho kotsha ɛlɛmbɛ wa Nzambi lo lɔsɛnɔ laso la lushi la lushi. (Mat. 24:45, NW) Naka sho kotsha kɛnɛ kekaso, kete Diolelo diayoleka monga dikambo dia mɛtɛ lo asho aso. Ɔsɔku mbashinganyaso amama wa ngandji k’onto l’ɔnango l’andja w’otondo ndo tayotonga nkumbo kɛmɔtshi kele kâmɛ k’atɛmɔdi wayakitshakitsha la tshina dia Yeso.
4 Esambishelo ka Diolelo Tokakatanyaka: Wakatotome dia sho sambisha lokumu l’ɔlɔlɔ la Diolelo ‘polo ndo lo tokoma ta kɛtɛ.’ (Etsha 1:8) Shambu ya sambisha lo “mbukana l’utema otoi” tokakatanyaka nɛ dia sho ndjatshutshuyaka dia ‘tombola’ Jehowa. (Romo 15:5, 6) Etena kakambaso kâmɛ l’asekaso wa l’andja w’otondo l’ohetoheto, sho keketshaka mbetawɔ kaso ndo mbishaka nyuma ka Jehowa diaaso dia tɔ kamba olimu oma lo tshimbo yaso dia kotsha lolango lande. Lo “ndjalaka la lotumu efula l’olimu wa Nkumadiɔndjɔ” sho mongaka ‘nge, hatosukasuka.’—1 Kor. 15:58, NW.
5 Lo wedja efula, Satana pembaka dia mamba kâmɛ kaso ndjonga lo kengɛ olimu w’esambishelo. Nde kambaka la weoho tshɛ wa tolonga tele lande dia mbidja ofukutanu ko tondja tamu l’oyango wa pɔhɔla ewanu la mindjo. (Tuk. 6:19; Ngal. 5:19-21, 26) Nde nangaka tɛna tayatambiya l’akambo wa tamu wa l’andja ɔnɛ, kana tasukɛ eyango ɛmɔtshi w’endana l’akambo wa pɔlitikɛ kana w’atshunda. (Jak. 3:14-16) Afundelo tokeketshaka dia sho nshika tanga la ntondo ka shɛngiya yande, naka hatosadi ɔsɔku kete nde tɔlɛ. (1 Pet. 5:8, 9) Hatokoke shisha mɛtɛ k’elongamelo ka Diolelo lo yimba yaso ndo l’etema aso.
6 Naka sho nangaka kokɛ kâmɛ kaso, kete sho pombaka ndjâla la lɔkɛwɔ l’ɔlɔlɔ ndo nyanga lomba l’oma l’olongo. Etena katanemaso la ntondo k’ekakatanu, djekoleko naka anangɛso wekɔ l’atei a dikambo diakɔ, sho pombaka mɛnya elowa wa nyuma dia kokɛ wɔladi. Sho pombaka tshika otako, ɔkɔmiya l’akambo w’anyanya wa l’andja ɔnɛ wadja diatɔnelo. (Ef. 4:1-3; Kol. 3:5-10, 12-14) Sho pombaka ndodja yimba yaso la tokanyi t’ɛlɔlɔ ndo tasha ekeketshelo. Mɛtɛ Diolelo diekɔ dikambo dia mɛtɛ le so! Koko sho pombaka monga la kɛsɔ dia dikambo sɔ ndjalaka nshi tshɛ ɔsɔku.—Ef. 6:11, 13.
7 Woho wele elongamelo ka diambo efula ka Diolelo dikambo dia mɛtɛ totshumanyaka lo yimba ya kâmɛ yayotshikalaka pondjo pondjo.—Osam. 133:1.