Djembetelo Yahombama dia Shimbamela
1 La ntondo ka nde sala dombwelo diande dia losembwe, Jehowa mbewolaka anto nshi tshɛ ndo mbishaka akanga a ndjakitshakitsha diaaso dimɔtshi dia vɔ kondja panda. Lo nshi y’Ezekiyɛlɛ, anto amɔtshi wakakumaka akhumu ndo wakalelaka nɛ dia akambo wa wɔnɔnyi wakasalemaka. Jehowa akasale woho wa wanɛ tshɛ wakasunganaka mbidjama djembetelo dia vɔ shimbamela. (Ezek. 9:4-6) Ɛlɔ kɛnɛ, olimu w’esambishelo wakambaso kotshaka oweso akɔ wamɛ. Sho kokaka monga l’ɔkɛndɛ w’ohomba.
2 Pomana l’anto w’etema ɔlɔlɔ ekɔ paka nna dia ntondo. Sho mbɔsaka tɛdikɔ dia kalola dia towaenda. Ɔlɔngɔswɛlɔ wa diendelo di’oyoyo tatɛka ko lushi letaso mbala ka ntondo etena kafundaso kɛnɛ kakatatshiki ndo sawo diakatasawudi l’onto akɔ. Dia pomɔ lokolo l’ɔlɔ lo diendelo diaso, sho pombaka ndjalɔngɔsɔla dimɛna lo kɛnɛ kayotota ndo kayotosala.
3 Naka takatshike “Tshoto y’Etangelo,” kete sho kokaka kotola yambalo y’onto akɔ l’ɔtɛ ayɔ a dui wa woke:
◼ “Lembetɛ dia, lo lohoso la Tshoto y’Etangelo akafundama ɔnɛ: ‘Mbewoyaka Diolelo diaki Jehowa.’ Lâsɔ mɛnamaka dia kɛnɛ katshikitanya periodikɛ ele tɔ mbetawɔka ɔnɛ Diolelo diaki Nzambi mbele tshɔi yakɔ ya lokando l’ekakatanu w’andja. Tɔ nembetshiyaka kɛnɛ kayokotsha Diolelo diaki Nzambi etena kayosalema lolango laki Nzambi la nkɛtɛ. Ɔsɔ mbele lokumu l’ɔlɔlɔ lele, lo ndjela Yeso, layosambishama l’andja w’otondo.” Tâle Mateu 24:14, ko sho nembetshiya woho wa kondjaka Tshoto y’Etangelo tena la tena ndo woho wa kamba la yɔ olimu dia mbeka Bible wɛmɛ.
4 Ondo tayoleka kotola yambalo y’onto paka lo Bible keto ndo tɛkɛta di’ohomba wa kialaka tena la tena. Sho kokaka mbuta ɔnɛ:
◼ “Mɛnamaka oko, suke l’anto tshɛ weyaso nangaka kondja alako amɔtshi w’eshika dia kandola ekakatanu wa lo lɔsɛnɔ la lushi la lushi. Oko le yɛ, lende okokiso kondja alako wasungana ndjela na? [Totshike onto akɔ etena akadimole.] Anto efula wakadje etema lo alako w’angɛnyi awɔ kana wakafute wanɛ washana alako dia vɔ mbakondja koko ndoko di’ɔlɔ diakatombe. Lo mɛtɛ, miliyɔ y’anto wakɛnyi ɔnɛ Bible ekɔ tshɔi yakɔ y’alako wasungana ndjelama. Bible nembetshiyaka woho wa kandola ekakatanu tshɛ. [Tâle 2 Timote 3:16, 17.] Ondo wɛ kanaka ɔnɛ Bible ekɔ wolo shihodia, koko otshike kɛnya woho wa wɛ mbishola ɛngɔ k’oshinga wolo kele l’alako w’eshika lɔkɔ.” L’ɔkɔngɔ diko, tofole lo “Index des mots bibliques les plus importants” lo tshɛkɛta “ngandji” l’ekomelo ka Traduction du monde nouveau, ko sho mbɔsa avɛsa amɔtshi wɛnya lo na okoki ngandji tokimanyiya dia sho shidiya tokumbɛkumbɛ.
5 L’oyango wa tatɛ mbeka l’onto Bible, ondo sho nangaka tɛkɛta dikambo dia dibuku “Kokaka we Monga la Loseno la Pondjo lo Paradiso ka la Kete” lam’atatɛso sawo l’ɛtɛkɛta ɛnɛ:
◼ “Sho nangaka nkumbo kaso ndo kombolaka dia kikondjiyɛ kɛnɛ koleki ɔlɔlɔ tshɛ. Onde nkumbo kayɛ honga l’ɔngɛnɔngɛnɔ naka tɔ mbidjasɛ l’andja wele oko w’ɔnɛ?” Towɛnya asango wele lo lɛkɛ 156-7. Tâle divɛsa ɔtɔi kana avɛsa ahende woshilami lo ndjɛkɛ shɔ ko sho shikikɛ ɔnɛ alaka asɔ wakashama oma le Jehowa Nzambi, ɔnɛ lahakoke mbuta kashi. Towɛnya ɔnɔngɔ wa totshapita lo lɛkɛ 5 la 6, ko sho mombola asawo akɔna waleka mbɔngɛnyangɛnya; tofole dibuku lo tshapita yayondɔsɔna ko sho sɛdingola odingɔ ɔtɔi kana edingɔ ehende.
6 Onde wɛ nangaka kimanyiya onto ɔmɔtshi dia nde mbidjama djembetelo yahombama dia nde kondja panda? Dia sho kotsha ɔkɛndɛ ɔsɔ, pombamka ‘kotsha olimu aso dimɛna’ lo ndjalɔngɔsɔlaka dimɛna ndo lo kalolaka esadi dia tenda anto tshɛ wɛnya saki.—2 Tim. 4:5.