Kristo: Ɛnyɛlɔ le Ɛlɔngɔlɔngɔ
1 Ɔlɔngɔlɔngɔ ɔmɔtshi akate l’ɔkɔngɔ wa nde kɛtshanya l’anto edja lo Bible ate: “Lonto la wolo la Yeso akamambia efula. Nde mɛtɛ kele owandji wakamakoke mbetawɔ!” Mɛtɛ hatokoke mbuta ngasɔ lo dikambo dia lonto l’anto wa l’andja wa pɔlitikɛ, kana dia tozambizambi ta l’asɛkɛ wa tɔkɛnyɔ ndo dia wanɛ wanyanyema oma lo kɛnɛ kasalawɔ. Akristo wa mɛtɛ hawete wedi ɔtɔi la wanɛ wɔtɔ l’akambo wa l’andja ɔnɛ ndo wele la dionga diahɔtɔnɛ la ɛlɛmbɛ wa lokristo.—Osam. 146:3, 4.
2 Ɛlɔngɔlɔngɔ mbeyaka ndjashikikɛ ɔnɛ naka vɔ ndjala la mbetawɔ le Yeso Kristo, kete vɔ wekɔ amɔtshi a l’atei w’ɛkɔkɔ wa Nzambi ndo Yeso mbaeyaka. Katshunga k’ɔlɔlɔ k’ɛkɔkɔ mbakokɛka. (Joa. 10:14, 15, 27) Ɛlɔngɔlɔngɔ wokoya Kristo wekɔ l’ɔtshɔkɔ.
3 Ɔnangɛso ɔmɔtshi lakamba lo Bɛtɛlɛ ka lo Brooklyn aki l’oyango wa ndjâla la diɛsɛ dia kamba olimu ɔsɔ tatɛ lam’akinde l’ɛnɔnyi enanɛi. Wakokeketsha dia nde mbɔsa olimu wa lo Bɛtɛlɛ oko mboka k’ɔlɔlɔ ka ndjela ɛnyɛlɔ ka Kristo lam’ayondola. Ambutshi ande l’emendji weteta wakôtshutshuya dia nde mbesa oyango ɔsɔ. Dia vɔ mbokimanyiya lo nde ndjalɔngɔsɔla di’olimu akɔ, vɔ wakokeketsha dia nde sɛnaka oko ose nkumbo ka Bɛtɛlɛ, lo kambaka elimu wa lo luudu ndo lo nɔngɔsɔlaka Mbalasa ka Diolelo la lo nyomoleka mbeya olimu. Ɛlɔ kɛnɛ kende lo kamba lo Bɛtɛlɛ tamba ɛnɔnyi efula, nde ekɔ l’ɔngɛnɔngɛnɔ lo woho wakandayatshutshuya lam’akinde eke dikɛnda dia ndjela ɛnyɛlɔ kakatshike Kristo.
4 Yeso kombesa lotumu lɔmɔtshi l’andja ɔnɛ; nde akasɔnɛ olimu w’opandjudi. Kadiyɛso kɛmɔtshi keke osekaseka akalange ndjâla ombatshi mboka l’ɔkɔngɔ wa nde shidiya kalasa, koko nde akakandakandaka nɛ dia nde kokondja olimu wasungana dia nde kambaka lo tena dimɔtshi to. Nde akataka ndamɛ ate: ‘Tokokondja olimu kele kandjolodja dɛmandɛ dia ndjâla ombatshi mboka.’ Ekumanyi kɛmɔtshi akawɛnya ate edja katandakonge, mbayondoleka tshutshuyama dia kamba olimu wa ngunga hiende, nɛ dia ndoko odingitanu wakakoke mboshimba. Nde ekɔ lo kɔndɔla ate: “Lakalɔmbɛ Jehowa dia nde nɔmbɔlami oma l’ekimanyielo ka nyuma kande k’ekila.” Kem’edja nde akɔshi olimu w’ombatshi mboka wa tshanda, ko akayonga ombatshi mboka wa pondjo. Yema l’ɔkɔngɔ, nde akayokondja olimu wakasunganaka mɛtɛ l’ekongelo kande k’ombatshi mboka.
5 Yeso akewoya anto losango la Diolelo l’ohetoheto. (Mat. 4:23) Akristo weke ɛlɔngɔlɔngɔ kokaka ndo vɔ lawɔ mɛnya ohetoheto lo esambishelo, aha la mboka anto wɔma. Ɔmɛnyi ɔmɔtshi wele l’ɛnɔnyi 14 ekɔ lo kɔndɔla ate: “La kalasa, anto tshɛ mbeyaka ɔnɛ dimi lekɔ Ɔmɛnyi. . . .Vɔ dieyaka ɔlɔlɔ ko ndjâka dimi pomana l’asekami etena katamasambisha, dimi haloke sɔnyi. Esangɔ tshɛ, vɔ pokamɛka esambishelo, ndo tena efula vɔ nongolaka ekanda wendana la Bible.”
6 Yoho ya ndjela ɛnyɛlɔ ka Kristo mbeyaka kimanyiya ɛlɔngɔlɔngɔ dia mbɔsa tɛdikɔ t’ɔlɔlɔ lo kɛnɛ kendana la nshi yawɔ yayaye. Lo dihole dia vɔ ndjasha l’eyango wa l’andja ɔnɛ, vɔ ‘mbohɔka Otungi awɔ wa woke’ la ndjalaka l’ohetoheto l’olimu wa Jehowa. (Und. 12:1) Oko woho wasala Kristo, vɔ wekɔ la “ngandji ka Shesu” katosha ɛlɔlɔ woleki wɛnɛ tshɛ wokoki tosha andja ɔnɛ. Vɔ kokaka monga l’elongamelo ka ‘ndjâla pondjo’ lo dihole dia mbeta l’andja ɔnɛ waya ka shishɔ.—1 Joa. 2:15-17.