Teyanya lokombo la Jehowa lo nkɛtɛ k’otondo
1 Lam’akatɛ Yeso ambeki ande dia vɔ ndjâla ɛmɛnyi ‘polo ndo lo tokoma ta nkɛtɛ,’ lâsɔ ko nde ambotawashaki ɛnyɛlɔ ka vɔ ndjela. (Etsha 1:8) Wonya tshɛ ndo dihole tshɛ diakandatanaka anto, nde akâsanyɛka sangwelo diaki Nzambi diendana l’anto. L’ɛnyɛlɔ ka Yeso, ɔhɔmbɔ wa kɔlamelo kambaka lo weho efula dia kele lokombo laki Jehowa ‘leyame lo nkɛtɛ k’otondo.’—Is. 12:4, 5.
2 Kɛnɛ kakasalemaka lo nshi yakete: L’ɛnɔnyi wakete, wakafundaka asawo (sermons) lo tojurunalɛ; wakatondja “Photo-Drame de la création” ndo wakakiɛnya le miliyɔ y’anto; wakakambe la mituka wele la wɔɔndjɔ kana mikro wa weke lâdiko; ndo wakakambe efula la fɔnɔ (phonographe) ndo lo tena dimɔtshi wakakambe la aradiyo. Dihomɔ sɔ tshɛ aki paka dia sambisha lokumu l’ɔlɔlɔ. Lo mɛtɛ, ntondotondo wakɛnya ohomba wa sawolaka l’anto elundji l’elundji woho wa mbeya nomialomia nsaki kɛnya onto. Diakɔ mbele, esambishelo ka lo luudu la luudu ekɔ woho wa dimɛna efula wa mbeyanya lokombo la Jehowa l’ahole tshɛ.—Etsha 5:42.
3 Kɛnɛ kasalema lo nshi yaso nyɛ: Oko watatshikitana tena mbataleke ndo fukutana andja ɔnɛ, ndo l’ahole efula anto wôtanemaka paka lo pai lawakawɔ. Atɔi ato mbatodjasɛka dia mbadia ndo kana yimba lo akambo wa lo nyuma. Diakɔ mbele sho pombaka mbɔtɔnganyiya olimu aso la yoho ya lɔsɛnɔ lasɛna anto. Lâdiko wa sho kindjakindja ɛtshi kaso ka nkɛtɛ mbala ko mbala l’esambishelo ka lo luudu la luudu, tambokeketshama dia ntshɔ l’ahole watanema anto ndo mongaka ‘wonya tshɛ suke’ dia mamɛɛ elongamelo kaso. (1 Pet. 3:15) Kɛdikɛdi sho la dia ndjâketembola dia sambisha wanɛ wakamba laso elimu, wɔtɔ laso kalasa, sambisha lo toshinga, lo lobingu, l’ahole wa fɔni, lo wa makashinyi, ndo l’ahole tshɛ wokoki tanema anto. Lam’ele Jehowa tokimanyiyaka, weolo wadjaso mongaka l’etombelo w’ɔlɔlɔ efula. Onde ndo wɛ mbayanga anto l’ahole tshɛ watanemawɔ?
4 Nyɛsɔ, onto l’onto, totshe tshɛ kakokaso ntsha dia mbeyanya lokombo la Jehowa lo lɛtshi laso la nkɛtɛ. Sho kokaka kondja ɔngɛnɔngɛnɔ efula lam’akambaso olimu aso dimɛna, naka tayendɛ le Jehowa dia nde kotolaka anto w’ɛlɔlɔ.—Joa. 6:44.