Onde wɛ ekɔ lo tetemala?
1 ‘Dimi ndoko l’ɔkɔkɔ okina w’ɔngɛnɔngɛnɔ woleki wɔnɛ: wa mboka di’anami wekɔ lo tetemala kɛndakɛnda lo akambo wa mɛtɛ.’ (3 Joa. 4) Etete kaki l’ana waki Joani wa lo nyuma akawosha ɔngɛnɔngɛnɔ efula. Diakɔ mbele, Shɛso lele l’olongo pombaka mboka ɔlɔ efula lam’ɛnande miliyɔ y’anande ‘wakɛndakɛnda lo akambo wa mɛtɛ’!—Tuk. 23:15, 16; 27:11.
2 Kânga mbele lo tshɛ kawɔ ekambi waki Nzambi wekɔ lo tetemala l’ohetoheto l’olimu w’Akristo, amɔtshi l’atei awɔ wambotatɛ mbɔla yema yema. Kânga mbele ondo waki la wolo w’efula lam’akawatatɛ mbeka akambo wa mɛtɛ, l’edja k’ɛnɔnyi watete, anto asɔ ndjɔkɔmɔka ko woyashaka paka yema tsho kana lo pai l’olimu wa mbetɛ anto ambeki.
3 Lo mbuta mɛtɛ, ondo etete k’anto amɔtshi kamboyokitakita l’ɔtɛ w’ekakatanu wa lo demba kana nɛ dia waya esombe. Koko vɔ pombaka mandɔma l’etete kawɔ. Vɔ wekɔ lo sala kɛnɛ kɛdimi lawɔ. Koko onto tshɛ lakakimɔ lɔsɛnɔ lande le Nzambi la dia ndjambola ɔnɛ: ‘Onde lamboleka ndjasha l’eyango wakimi hita polo ndo lo yɛdikɔ yele wahɔ wa Diolelo wɔsaka paka tshenyi ya tshitshɛ tsho lo lɔsɛnɔ lami? Onde laya ‘djungudungu,’ kana lekɔ lo tetemala ndjaketembola ‘la wolo tshɛ’?’ (Eny. 3:15, 16; Luka 13:24) Nyɛsɔ tokane yimba la kɛnɛ keso lo sala ndo toyalowanya l’ahole wahombama, aha la mbohɛ dia Jehowa ekɔ lo ndaka dia mbisha ‘lotombo, kɛnɛmɔ, ndo wɔladi le onto tshɛ latotshaka kɛnɛ kele ɔlɔlɔ.’—Romo 2:10.
4 Woho wa tetemala: Kakɔna kakakimanyiya Yeso dia tetemala na? Paulo akalembetshiya ate: ‘Dia ɔngɛnɔngɛnɔ wakakitshama la ntondo kande, nde akakikɛ asui wa l’otamba, akɔnyɔla nsɔnyi ndo akatodjasɛ lo lonya l’omi la kiti ka Diolelo ka Nzambi.’ (Heb. 12:1-3) Ɔngɛnɔngɛnɔ wakakitshama la ntondo ka Yeso ndeka ehemba wa lo tshanda mɔtshi tsho wakahombe pomana la nde la fwa. Naka tayohɔka ɔngɛnɔngɛnɔ wambokitshama la ntondo kaso, kete sho lawɔ kokaka tetemala. (Eny. 21:4, 7; 22:12) Naka tayendɛka le Jehowa dia nde tosha wolo l’ekimanyielo ka wekelo w’onto ndamɛ, ka wɔtwɛlɔ wa nsanganya wa mbala la mbala, ndo oma l’alɔmbɛlɔ w’etete, kete tayokoka tetemala l’olimu wakandatosha.
5 Jehowa ngɛnangɛnaka lo mɛna etete kele l’ekambi ande wa kɔlamelo. Nyɛsɔ totamanya mbɔngɛnyangɛnya lo tetemala ‘kɛndakɛnda lo akambo wa mɛtɛ.’