Ɛtshɔkɔ wa Jehowa tɔngɔnyaka
1 Mbala efula vɔ mbutaka ɔnɛ onto ekɔ kanga ɔngɔnyi lo menda efula k’okundji wele lande. Diakɔ diele anto efula mbɔsaka akanga wa falanga oko anto wele l’ɔngɛnɔngɛnɔ woleki ndo wahakoke pomba ndoko ɛngɔ. Koko, lonyangu ko wanɛ wafɔnya di’akuta kokaka mbisha onto ɔngɛnɔngɛnɔ wekɔ lo ndjâkesa. (Tuk. 5:12) Ndoko ɔngɛnɔngɛnɔ w’oshika wele la wanɛ ‘wayashikikɛ dia ndjâla ɛngɔnyi’ lo kɛnɛ kendana la lomombo la l’emunyi. (1 Tim. 6:9) Lo yoho yotshikitanyi, ekambi waki Jehowa wekɔ l’ɔngɛnɔngɛnɔ wa mɛtɛ ndo wekɔ anto woleki ɔngɔnyi l’andja ɔnɛ. (Tuk. 10:22; Eny. 2:9) Lo yoho yakɔna na?
2 Kɛnɛ kɛnya dia tekɔ ɛngɔnyi: Sho tekɔ la shɛnɔdi y’efula ya lo nyuma ndo la eokelo k’oshika ka Bible, Ɔtɛkɛta waki Nzambi. Oma lo tshimbo y’ɔlɔngɔswamelo ande wa la nkɛtɛ, Jehowa ekɔ lo tetemala la tetsha akambo wendana la nde ndamɛ ndo l’Ɔnande dikambo dia wahɔ wakiso wa pondjo. Eokelo k’oshika, tokimanyiyaka dia sho ndjasukanya la Jehowa ndo monga la diɔtɔnganelo di’oshika lam’asaso la nde. (Jak. 4:8) Mbeya tshikitanya ɔlɔlɔ la kɔlɔ, ndo ndjela ɛlɛmbɛ waki Nzambi tokokɛka oma lo hemɔ ndo wâle ɛmɔtshi. Tekɔ l’eshikikelo dia Jehowa ayotokotshɛ ehomba aso, ndo tayonga l’ɔngɛnɔngɛnɔ waya oma le nde ndo la wɔladi wa lo yimba.—Mat. 6:33.
3 Tekɔ la wɔladi ndo la kâmɛ l’atei wa nkumbo kaso k’anto l’ɔnango ka lo nyuma nɛ dia sho kɛnɛmɔlaka elowa wa nyuma kaki Nzambi. Lam’ele tekɔ kâmɛ lo dimama dia wolo dia ngandji, hatohombe fɔnya pondjo dia Nzambi kana anangɛso kokaka tokalɛ lam’ahomanaso la mpokoso kɛmɔtshi.—Ngal. 6:10.
4 Nsɛnɔ yaso yekɔ la kitshimudi ndo l’oyango wa mɛtɛ. Mbisha lonya l’olimu w’esambishelo ka lokumu l’ɔlɔlɔ wakambema l’andja w’otondo ekɔ diɛsɛ dia woke efula le so. Sho mongaka l’ɔngɛnɔngɛnɔ w’oshika etena kakimanyiyaso anto akina dia vɔ monga la diɔtɔnganelo di’ɔlɔlɔ la Nzambi ndo dia kamba la so kamɛ l’ɔtɛmwɛlɔ wa pudipudi. Nɛmɔ di’efula diele l’olimu aso w’oshinga wolo, tombolaka Jehowa ndo toshaka ɔngɛnɔngɛnɔ wa tshɛ lo woho washaso lonya lo okidiamelo wa lokombo lakinde. Sho mongaka la yimba kana dionga di’ɔlɔlɔ, teya shate elongamelo kaso kendana la nshi yayaye kotsha kotshama kem’edja.
5 Tɛnya lowando laso: Nyɛsɔ tonge la lowando l’efula l’ɛtshɔkɔ wa Jehowa, nɛ dia vɔ mbatetɛ mɛtɛ anto woleki ɔngɔnyi lanɛ la nkɛtɛ. (Tuk. 22:4) Naka sho kanaka yimba lushi tshɛ la kɛnɛ kele laso, kete tayotshutshuyamaka dia mbisha Jehowa losaka oma lo lokaho lande loludi la ngandji ndo tayotetemala la mbomamema paka ndamɛ oto.