Nsɛnɔ yekɔ lo wâle
1 Bible mɛnyaka hwe dia Jehowa nangaka dia ‘weho w’anto tshɛ shimbamela.’ Koko, ekɔ nto mɛtɛ dia elongamelo ka lɔsɛnɔ kele la miliyara y’anto lanɛ la nkɛtɛ nemanɛka la woho wa dionga diele lawɔ otsha le Jehowa Nzambi ndo otsha lo Diolelo diande dialɔmbwama oma le Yeso Kristo. Onto kokaka ndjala la dionga di’ɔlɔlɔ paka lo “nkuma lu ewu ka mete.” (1 Tim. 2:3, 4) Etena katatewoya anto ɔnɛ kem’edja nkɛtɛ kɛnɛ kayanga la mbɛdiama oma l’akambo wa kɔlɔ tshɛ dia tshikɛ andja w’oyoyo wele la losembwe waki Nzambi dihole, tekɔ nto l’ɔkɛndɛ wa tetemala kamba olimu ɔnɛ w’ohomba washimbɛ nsɛnɔ y’anto.—Mat. 24:14; 28:19, 20; Romo 10:13-15.
2 Bonde kahomba olimu ɔsɔ kambema esadi esadi na? Yeso akewola anto lo kɛnɛ kendana la “fono [kɛmɔtshi] ka wulu kayuya, wuhu wahatayalaka uma k’etatelu k’andja edja ndu kakiane.” (Mat. 24:21) Fɔnu kɛsɔ kayokoma lo kondo ko yatɔ lo Aramangɛdɔna. (Eny. 16:16) Nyemba y’anto, mbidja ndo ewotɔ aso, asukanyi aso, wanɛ wakamba la so olimu, anyaso wa la kalasa kana anto akina weyana la so, wayolanyema naka vɔ tona mbetawɔ lokumu l’ɔlɔlɔ latatasambisha. Diakɔ mbele, oyango wakiso ele sambisha ‘weho w’anto tshɛ’ lo mbokoya Nzambi, ɔnɛ lakɛnya ngandji kande le anto wa l’andja w’otondo lo kimɔ Ɔnande, Yeso Kristo oko tshungo dikambo di’anto tshɛ. (Joa. 3:16) L’ohetoheto tshɛ, sho la dia sala la wolo dia mbeta anto tshɛ dia vɔ ndawɔ oya lo dihole diaki Nzambi di’ekokelo. Lo kotsha olimu w’esambishelo lo yoho ya dimɛna efula, sho mbewɔka onongo wa dikila—Ezek. 33:1-7; 1 Kor. 9:16.
3 Naa oyango wakiso na? Ɔtɛkɛta waki Nzambi w’otondo tɛtɛka di’ohomba wele l’olimu w’esambishelo. Oko wakadite ɔpɔstɔlɔ Paulo: ‘ngandji ka Kristo totshutshuyaka’ dia mbɔtɔnganyiya nsɛnɔ yaso la mboka yaki Nzambi. (2 Kor. 5:14) Lâdiko dia lâsɔ, Tshoto y’Etangelo mbikaka epole ɔsɛkɛ mbala la mbala l’ɔkɛndɛ wele laso wa nsambisha. Olimu Aso wa Diolelo ekɔ lo tetemala la mɛnya woho wahomba kambema olimu w’esambishelo. Dikumanyi dia l’etshumanelo kongɛka olimu ndo tokeketshaka dia kamba olimu akɔ. Asekaso apandjudi tɔsɛngɔlaka dia sambisha kâmɛ la wɔ. Sho mbokaka akambo efula lo kɛnɛ kendana la woho wa nɔngɔsɔla asawo wakiso, wa nkahanya periodikɛ ndo ekanda ekina, wa sala waendelo w’eyoyo, wa nɔmbɔla wekelo wa Bible, ndo woho wa kamba la diaaso tshɛ diatanema dia sambisha. Akambo asɔ tshɛ tokimanyiyaka dia kotsha oyango wakiso wa shimbɛ nsɛnɔ y’anto.—1 Kor. 9:22, 23; Ef. 1:13.