Woho wa mbetawoya anto akina
1 Ɔpɔstɔlɔ Paulo akeyamaka oko onto lakeyaka mbetawoya anto akina. (Etsha 19:26) Kânga Nkumekanga Angiripa akawotɛ ate: “L’etena ka tshitshe, we nkanaka dia mbetemi usika Kristu!” (Etsha 26:28) Kakɔna kakakimanyiya Paulo di’anto efula mbetawɔ olimu ande na? Nde akakanaka l’anto yimba dimɛna oma l’Afundelo, ndo akataka akambo wɔtɔnganɛ l’ampokami ande.—Etsha 28:23.
2 Lo ndjela ɛnyɛlɔ kaki Paulo, sho lawɔ pombaka mbeya woho wa mbetawoya anto l’olimu aso. Lo sala ngande na? Ele lo kamba la shɛnɔdi etena katɛkɛtaso ndo lo pokamɛ anto akina. (Tuk. 16:23) Akambo asato w’ohomba anɛ wayotokimanyiya dia sala dikambo sɔ.
3 Hokamɛ dimɛna: Wonya watɛkɛta onto okina, hokamɛ dia tana dikambo diosanginyu lolimi diakokayɛ mbôsambisha. Naka onto ambonyiya wombola kana ambotona sawola la yɛ, kete hemba dia mbeya lande na ahandalange sawola la yɛ. Kɛsɔ ayokokimanyiya dia mbeya shikaa kakɔna ketawɔnde, bonde kadietawɔnde ndo kɛnɛ kawetawoya dikambo diakɔ. (Tuk. 18:13) Sala la mayɛlɛ tshɛ dia mbeya kɛnɛ kakanande.
4 Oka wembola: Naka onto mbetawɔka Losato l’Osanto, kete wɛ kokaka mombola wate: “Onde wɛ oketawɔka Losato l’Osanto?” Kotsha nto wate: “Onde wɛ ambekaka dimɛna kɛnɛ kata Bible lo dikambo sɔ?” Wɛ kokaka mumbola nto ɔnɛ: “Naka Nzambi ekɔ etenyi kɛmɔtshi ka lo Losato l’Osanto, onde hatokoke nongamɛ dia Bible nembetshiya dikambo sɔ dimɛna dimɛna?” Ekadimwelo wayondokosha wayokokimanyiya dia wɛ kana yimba l’onto akɔ lo kɛnɛ kata Afundelo.
5 Kana l’onto yimba dimɛna: Ɔmɛnyi wa Jehowa ɔmɔtshi akambola womoto ɔmɔtshi laketawɔka ate Yeso mbele Nzambi ate: ‘Naka wɛ pemba mbɔsa ɛnyɛlɔ k’anto ahende wa woho ɔtɔi, naa diɔtɔnganelo dia lo nkumbo diayokoka kamba layɛ?’ Womoto akɔ akakadimola ate: “Layowaɔsa dia wekɔ onto l’ɔnango.’ Ko Ɔnangɛso akakotsha ate: “Ondo wɛ mbeyaka mbaɔsa oko ana wa wasa. Ko Yeso akandalange mbuta lam’akandatetsha ate Nzambi kele Mbapa ko ndamɛ ekɔ Ɔna?” Womoto ɔsɔ akayoshihodiaka dia ɔmɔtshi mbolɛ osekande ndo nde ekɔ la lowandji loleki okina. (Mat. 20:23; Joa. 14:28; 20:17) Yimba ndo otema ande wakanandema oma lo yewo ya mbetawoya yakakambe l’Ɔmɛnyi wa Jehowa ɔsɔ.
6 Ekɔ mɛtɛ di’aha anto tshɛ mbetawɔ dia mpokamɛ akambo wa mɛtɛ oyadi sho kokambaka la mbɔtwɛlɔ y’amɛna. Koko l’ɛnyɛlɔ kaki Paulo, nyɛsɔ toyasha tshɛ dia nyanga anto wele l’etema w’ɛlɔlɔ wa l’ɛtshi kaso ka nkɛtɛ woho wa mbaetawoya losango la Diolelo.—Etsha 19:8.