Totetemale Mbidja Diolelo lo Dihole dia Ntondo
1 Mbidja Diolelo dia Nzambi lo dihole dia ntondo lo lɔsɛnɔ laso ndo tetemala la ntshaka ɔsɔku bu dikambo dia tshitshɛ etena kahomanaso l’ɛhɛnyɔhɛnyɔ l’awui w’ekondjelo kana ekakatanu ekina. Woho akɔna wakokaso tetemala la mbidja Diolelo lo dihole dia ntondo lam’ahomanaso l’ekakatanu? Kakɔna kayototsha naka wambotosha olimu watoshimba dia sho mbɔtɔka mbala la mbala lo nsanganya kana watodjɛ wekamu l’olimu aso w’esambishelo na? Onde lâsɔ Diolelo pombaka mbɔsa dihole dia hende lo lɔsɛnɔ?
2 Ekɔ Ohomba Monga la Mbetawɔ ka Nge: Naka akambo wa ngasɔ wambodja mbetawɔ kaso l’ohemba, kete hatohombe mbohɛ daka diaki Jehowa ndo woho wakatoshikikɛ Yeso dia Nzambi ayotosukɛ naka tayoyanga ntondotondo Diolelo. (Osam. 37:25; Mat. 6:31-34) Tɔsɛngiya ndo ɛhɛnyɔhɛnyɔ wa l’andja ɔnɛ mbeyaka fukutanya kanyi yaso ndo toshimba dia tetemala la mbidja Diolelo lo dihole dioleki. Anto amɔtshi wakayotshikɛka oyango wa ndjala onto la woke l’olimu kana wa kondja falanga efula mbɔsa dihole di’ohomba lo lɔsɛnɔ. Koko, l’ɛnyɛlɔ kaki Paulo, sho pombaka sɛdingola dimɛna kakɔna kele mɛtɛ ohomba lo lɔsɛnɔ.—Fil. 3:7, 8.
3 Onde Ekɔ Ohomba Sala Etshikitanu Ɛmɔtshi? Opandjudi ɔmɔtshi akate ate: “Otema ami tshɛ aki paka l’awui ami w’okanda ndo ɔsɔ mbaki dikambo diakamalekaka nanga. Kânga mbakamalekaka ndjasha efula l’awui w’okanda, dimi lakokaka dia dimi kokaka tshikala Ɔmɛnyi wa Jehowa.” Koko nde akayakiyanyaka dia nde kokaka sala akambo efula dia nde nyomoleka kambɛ Jehowa. L’edjedja ka wonya, nde akayotshika awui w’okanda wakawodjɛka wekamu l’ohamelo ande wa lo nyuma. L’ɔkɔngɔ wa nde ndjakimɔ tshɛ l’olimu wa Diolelo, nde akayonga l’akoka wa mbuta ɔnɛ: “Kakianɛ, lamboka dia laya la lɔsɛnɔ la dimɛna lo washo waki Jehowa, ndo ɔsɔ ekɔ dikambo diele mɛtɛ ohomba.”
4 Diɛsɛ ko anto efula wakatshike elimu awɔ wa l’emunyi ndo eyango awɔ wa kondja falanga efula, ko wakatshikitanya nsɛnɔ yawɔ, ndo wakayokambaka olimu wa lo tena tshɛ. Akɛnda, ekambi w’olimu weke enyemba ndo dikumanyi diakɔtɔ lo Kalasa k’Olowanyelo w’Ekambi wakasale ngasɔ ndo wakakondja waɛsɛ w’ɔlɔlɔ efula w’olimu. Lam’okoyawɔ ɛnyɛlɔ k’oshika kaki Paulo, vɔ ngɛnangɛnaka la yema ya diangɔ dia l’emunyi diele lawɔ.—1 Kor. 11:1; 1 Tim. 6:6-8; Heb. 13:5.
5 Kânga mbakoka anto wa l’andja ɔnɛ mɔnyɔla kanyi yele laso lo kɛnɛ kendana la lɔsɛnɔ, sho tshɔkwamaka oma le Jehowa. (1 Kor. 1:26-31) Onde hatonga ekeketshelo dia mbeya ɔnɛ nde ayokamba laso dimɛna ndo ayotokimanyiya dia kotsha olimu ande? Diaaso diele laso kakianɛ dia sambisha Diolelo diamboshikikɛmaka, hatodikondjaki nto pondjo. Ɔnkɔnɛ, etena ka sho tetemala mbidja Diolelo lo dihole dia ntondo lo nsɛnɔ yaso tɔ kɛnɛ.