‘Ngande Wayowoka?’
1 Yeso akate l’eshikikelo tshɛ ate: “Dieli la lukumu l’ololo nsambishama ntundu lu wedja tshe.” (Mako 13:10) Kânga mbadjaso welo tshɛ, ekɔ miliyɔ nkama y’anto wele watasambishama lo vwamɛmɛ nganɛ. Emboledi ɛmɔtshi wakashimbe olimu aso. Wedja efula wekɔ la lofulo l’anto la mamba lele lekɔ lo tahame paka pama tsho. Ko lâsɔ, ‘ngande wayowoka?’—Romo 10:14.
2 Toyaɛkɛ le Jehowa: Sho pombaka mbohɔ dia Jehowa mbeyaka etema w’anto tshɛ. Oyadi akambo akɔna wele l’onto, naka nde nyanga akambo wa mɛtɛ wendana la Nzambi l’otema ɔtɔi, kete nde ayowatana.—1 Ek. 28:9.
3 Abarahama aki la lonyangu lo kɛnɛ kendana l’ase Sɔdɔma la Ngɔmɔra. Koko Nzambi akoshikikɛ dia osomba wa Sɔdɔma hatolanyema naka nde tana kânga anto w’ɔlɔlɔ dikumi lɔkɔ. (Etat. 18:20, 23, 25, 32) Ndoko lushi lambolanya Jehowa anto w’ɔlɔlɔ kamɛ l’anto wa kɔlɔ, oko wakadiɛnya otshungwelo waki Lɔta nde l’anande wa wamato.—2 Pet. 2:6-9.
4 Mbala kɛmɔtshi Elisha akafɔnyaka dia paka ndamɛ oto mbakatshikala dia kambɛka Nzambi ka mɛtɛ. Koko, Jehowa akoshikikɛ dia nde kondjala ndamɛ oto ndo ɔnɛ olimu wakandatatɛ sala wakakoke shidiyama. (1 Khum. 19:14-18) Ko ngande wɛnaso awui lo nshi yaso nyɛ na?
5 Toyasha l’Olimu Waki Jehowa: Sho hateye polo lo yɛdikɔ yakɔna yakahombe olimu w’esambishelo kambema. Jehowa mbele l’ɔkɛndɛ w’olimu ɔsɔ ndo nde ekɔ lo kamba l’andjelo ande dia nɔmbɔla olimu akɔ. (Eny. 14:6, 7) Paka ndamɛ mbahomba shikikɛ polo lo yɛdikɔ yakɔna yahomba wedja tshɛ sambishama. Naka Jehowa alanga, kete nde ayokoka ngɛnangɛna dia losango la Diolelo diangana lo toho tahatakoke ndo kanyiya woho w’anto efula ‘mboka lokumu l’ɔlɔlɔ ndo koma ambetawudi.’ (Etsha 15:7) Awui wasala Jehowa wayɔtɔnganɛ tshɛ lo tshɛ la lonto lande, mbut’ate Nzambi ka ngandji, ka lomba, ndo ka losembwe.
6 Tekɔ la diɛsɛ dia kamba lo yoho yɔtɔnɛ la lolango la Jehowa, lo mbidja welo aso tshɛ dia mbokiya onto tshɛ lokumu l’ɔlɔlɔ.—1 Kor. 9:16.