Ekadimwelo Lo Wembola Anyu

◼ Bonde kahombaso monga la yewo etena kasambishaso lo mikanda?

Esambishelo ka lo mikanda ekɔ yoho mɔtshi ya dimɛna y’esambishelo yambokamba laso edja efula. Koko awui weta nshi nyɛ l’andja ambotshutshuya anto dia monga la yewo dia mbifola mukanda w’oma le onto lahaweye. Anto wɔsaka mukanda wa lo divɔlɔpɛ waheyama oma lɛnɛ oyewɔ kana wele bu l’adrɛsɛ w’onto lofundji oko mukanda wa wɔma, djekoleko naka alɛta wa lâdiko wa divɔlɔpɛ fundama l’anya ndo naka divɔlɔpɛ diakɔ diekɔ woke. Anto wotomeso dia mbasambisha mbeyaka mbikadja mukanda wa ngasɔ aha la vɔ mbifola. Ngande wakokaso sala dia mbewɔ dikambo sɔ na?

Naka kokaka, kete sho pombaka funda mukanda ɔsɔ lo mashinyi ndo lâdiko wa divɔlɔpɛ pombaka fundama nto lo mashinyi. Sho pombaka funda lokombo l’onto latomɛso mukanda lâdiko wa divɔlɔpɛ. Aha funda ɔnɛ “Le Anto Wadjasɛ lo Lokombo Kapanda.” Ndo nto, sho pombaka mbala tshɛ funda adrɛsɛ wakokawɔ totokadimola lâdiko wa divɔlɔpɛ. Naka bu dimɛna dia sho funda adrɛsɛ aso hita, kete tofunde lokombo laso ndo adrɛsɛ wa Mbalasa ka Diolelo. Tatotomake mukanda wele bu la lokombo. Tatofundake pondjo adrɛsɛ wa Bɛtɛlɛ.​—⁠Enda lo Okadimwelo lo Wembola Anyu l’Olimu Aso wa Diolelo wa Ngɔndɔ ka Dikumi l’Ahende 1996.

Alako akina ndo ɛnyɛlɔ ka woho wa funda mukanda mbeyaka tanema lo dibuku Manuel pour l’École du ministère théocratique, lɛkɛ 84-90. Alako anɛ wayotokimanyiya dia kamba la mikanda lo yoho ya dimɛna dia sambisha anto lokumu l’ɔlɔlɔ.