Wambotosha Lokumu l’Ɔlɔlɔ
1 Wambotosha mɛtɛ diɛsɛ dia woke dia mbewoya lokumu l’ɔlɔlɔ laki Nzambi! (1 Tes. 2:4) Kânga mbele anto amɔtshi tonaka losango lele la nkudu lɔsɔ, wanɛ wele l’etema w’ɔlɔlɔ kotwamaka oya lo losango lakɔ oko anto wakotwama oya l’opumu ɔmɔtshi w’ɔlɔlɔ. (2 Kor. 2:14-16) Lokumu l’ɔlɔlɔ lɔsɔ lekɔ panda le wanɛ walietawɔ ndo walikitanyiya. (2 Tes. 1:8) Ayotohomba sala la lokumu l’ɔlɔlɔ lambowotosha dia mbewoya na?
2 Yeso la Apɔstɔlɔ: Yeso aketshaka esambishelo ka lokumu l’ɔlɔlɔ lo dihole dia ntondo. (Luka 4:18, 43) Kânga lam’akandalɛmbɛ ndo wakinde la ndjala, ngandji kakandokaka anto ndo lowando laki lande lo losango lɔsɔ akôtshutshuyaka dia lisambisha anto akina. (Mako 6:30-34) Oma l’ɛtɛkɛta ande ndo oma l’ɛnyɛlɔ kande, nde akakɔkɔmiya lo timba t’ambeki ande ohomba w’olimu w’esambishelo ka Diolelo.—Mat. 28:18-20; Mako 13:10.
3 Lo ndjela ɛnyɛlɔ kaki Yeso, apɔstɔlɔ wakasambisha lokumu l’ɔlɔlɔ l’ohetoheto tshɛ. Kânga etena kakawâkɔmɔla ndo mbâshimba dia sambisha, “vo kumpeko mbetsha antu la nsambisha lukumu l’ololo.” (Etsha 5:40-42) Ɔpɔstɔlɔ Paulo akakambe olimu ɔsɔ aha la mpekɔ. (1 Kor. 15:9, 10; Kol. 1:29) Nde akɛdika diɛsɛ diaki lande dia sambisha lokumu l’ɔlɔlɔ la dibasa diakandakolama otsha le anyande anto, ndo nde akatshindja wahɔ ande l’ɔkɔngɔ l’oyango wa kotsha ɔkɛndɛ ɔsɔ.—Etsha 20:24; Romo 1:14-16.
4 Diɛsɛ Diele Laso Ɛlɔ Kɛnɛ: Lowando lele laso l’ɔkɛndɛ w’ekila wakawatosha ayototshutshuya dia sho nyanga waaso wa pamia olimu aso w’esambishelo. (Romo 15:16) Edward, laki paka lo kɔsa k’akanga wa dikuse l’ɔtɛ wa pâ kaki lande, akahombaka mbidjasɛ lo soko di’ɔtɛlɛ ndo akasambishaka wanɛ wakatshikalaka l’ɔtɛlɛ akɔ akambo wendana la mbetawɔ kande. Koko, oko wakandakombolaka nyomoyasha efula l’olimu ande w’esambishelo, nde akalɔngɔsɔla tshukatuka mɔtshi, yele oma l’ekimanyielo kayɔ, nde akakambe oko ombatshi mboka ɛnɔnyi efula, ndo akakindolaka nunu dia kilɔmɛtɛlɛ lo tasambisha. L’ɛnyɛlɔ kaki Edward, anto efula ɛlɔ kɛnɛ wambosala etshikitanu dia vɔ nyomoleka dianganya lokumu l’ɔlɔlɔ.
5 L’ɛnyɛlɔ kaki Yeso ndo k’apɔstɔlɔ, nyɛsɔ tetshake nshi tshɛ olimu w’esambishelo lo dihole dia ntondo lo nsɛnɔ yaso. Lo sala ngasɔ, sho mɛnyaka ngandji kaso otsha le anto akina ndo lowando laso lo lokumu l’ɔlɔlɔ lakawatosha dia mbewoya.