Dui Diakɔna Dietshayɛ lo Dihole dia Ntondo?
1 Ɛlɔngɔswɛlɔ efula wendana l’awui w’ɔtɛmwɛlɔ ndeka ndjasha l’etsha wa kimanyiya anto, ɛnyɛlɔ mbikisha wa mvudu ya kalasa kana ya mpitadi. Koko, Ɛmɛnyi wa Jehowa, kânga mbahawohɛ ‘ntshanela awui w’ɔlɔlɔ ndo kahana l’anto akina kɛnɛ kele lawɔ,’ dui dietshawɔ la ntondo ele kimanyiya anto lo nyuma.—Heb. 13:16.
2 Ɛnyɛlɔ ka lo Ntambe ka Ntondo: Yeso akasale akambo w’ɔlɔlɔ efula etena kakandakambaka olimu ande lanɛ la nkɛtɛ, koko olimu ande wa ntondo aki wa sambisha akambo wa mɛtɛ. (Luka 4:43; Joa. 18:37; Etsha 10:38) Nde akadjangɛ ambeki ande dia ‘mbetɛ anto wa lo wedja tshɛ ambeki, ndo mbaetshaka.’ (Mat. 28:19, 20) Ndo nde akɛnya di’anto wayonga la mbetawɔ le nde wayokamba lo yɛdikɔ y’efula olimu wakandatatshiya. (Joa. 14:12) Yeso akɔsaka olimu w’esambishelo oko olimu woleki tshɛ ohomba nɛ dia vɔ kimanyiyaka anto dia mbeya mboka ka panda.—Joani 17:3.
3 Ɔpɔstɔlɔ Paulo akɔsaka olimu ande w’esambishelo oko “okende,” wakinde kokokaka minya yimba. (1 Kor. 9:16, 17) Nde aki suke dia mbetawɔ ndjahombia, mbikikɛ woho w’ohemba tshɛ, kana asui tshɛ dia nde kotsha olimu ande. (Etsha 20:22-24) Ɔpɔstɔlɔ Petero nde l’asekande waki paka la dionga dia woho akɔ wâmɛ. Kânga mbakawawadje lo lokanu ndo mbakɔmɔla, “vo kumpeko mbetsha antu la nsambisha lukumu l’ololo vati: Jesu keli Kristu.”—Etsha 5:40-42.
4 Ko kayotota dikambo diaso na? Onde sho mbetshaka olimu w’esambishelo ka lokumu l’ɔlɔlɔ la Diolelo ndo mbetɛ anto ambeki lo dihole dia ntondo? L’ɛnyɛlɔ ka Yeso, onde sho ndjakiyanyaka mɛtɛ lo dikambo di’anto ‘wahɛnyahɛnyama ndo wele bu l’ekimanyielo, oko ɛkɔkɔ waha l’olami’? (Mat. 9:36) Awui wɛnaso nshi nyɛ ndo prɔfɛsiya ya lo Bible mɛnyaka hwe di’andja wa kɔlɔ ɔnɛ wayanga komɛ! Lam’ayoteyaka ohomba wele l’olimu w’esambishelo, tayotshutshuyama dia tetemala sambisha l’ohetoheto.
5 Ɛdikola Akambo Wele Layɛ: Lam’ele mbala efula akambo wele l’onto l’onto tshikitanaka, ekɔ dimɛna mendaka mbala la mbala dia kana sho kokaka sala etshikitanu wahombama dia sho ndeka sambisha efula. Kadiyɛso kɛmɔtshi akakambe oko ombatshi mboka wa pondjo l’ɛnɔnyi wa 1950, 1960, ndo 1970 koko nde akayɛna ohomba tokotshika olimu ɔsɔ l’ɔtɛ wa hemɔ. Koko, l’edjedja ka wonya nde akayɔkɔlɔnganaka. Atet’edja, nde akayɔsɛdingolaka akambo wele lande ndo akayɔsaka yɛdikɔ ya tatɛ kamba olimu akɔ nto. Nde mɛtɛ aki l’ɔngɛnɔngɛnɔ efula wa mbɔtɔ lo Kalasa k’Olimu w’Ambatshi Mboka aya l’ɛnɔnyi 90! Ko kayotota dikambo diayɛ? Onde wɛ ekɔ suke la mbɔsa pasiɔ kana shidiya kalasa? Naka akambo wele layɛ wambotshikitana, onde wɛ ayokoka kamba olimu w’ombatshi mboka?
6 Lam’akɛnyi Yeso dia Mata ‘ndjahɛnyahɛnyaka l’elimu efula,’ nde akawɛnya la ngandji tshɛ dia nde ayokondja ɛtshɔkɔ efula naka nde ndjasha paka lo kɛnɛ kele ohomba. (Luka 10:40-42) Onde wɛ kokaka ndjanyɛ diangatangata? Onde ekɔ mɛtɛ ohomba dia wadi l’omi kamba olimu wa l’emunyi? Naka etshikitanu ɛmɔtshi salema, onde ase nkumbo kokaka sɛnaka la lofuto laki onto ɔtɔi? Anto efula wakakondja ɛtshɔkɔ efula lo nyuma lo sala etshikitanu dia nyomoleka sambisha efula.
7 Nyɛsɔ sho tshɛ toyele ɛnyɛlɔ kakatotshikɛ Yeso nde l’apɔstɔlɔ! Sho kokaka monga l’eshikikelo dia Jehowa ayɔtshɔkɔla welo wadjaso l’otema ɔtɔi dia sala kɛnɛ tshɛ kakokaso sala l’olimu w’ohomba efula w’esambishelo ka lokumu l’ɔlɔlɔ la Diolelo.—Luka 9:57-62.